Oqaluuserisassani immikkoortoq 53-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataasinngorneq 2. juni 1997 nal. 17.15
Ataatsimiinnermik
aqutsisoq:
Jonathan
Motzfeldt, Siunnersuuteqartoq, Siumut:
Siunnersuutiga
ilassilluarneqarmat qujassutigaara, partiinit tamanit ilassilluarneqarpoq
tapersersorneqarluni aamma nuannaarutigaara Peqqinnissamik Naalakkersuisup
inussiarnersumik nuannersumillu suliassaq tigusimammagu, taamaalilluni
ingerlaqqinnissamut periarfissat taakkartorneqarlutik. Isumaqarpunga aamma
piffissaq eqqartoq tunngavia eqqorlugu siunnersuut taanna maannakkut
saqqummiunneqartoq.
Tassami
siunnersuutigisanni uanga arnat tassani pisimavakka aamma tassani noqqaassutit
arnaninngaanniit namminermi saqqummertartut eqqarsaatigalugit
suliariniarneqarnissaq isumannaartumik pinaveersartitsiniarnissaq nappaammik
anguniarlugu.
Soorunami
allat krĉft-mut tunngasut, tobatornikkut aallatigulluunniit, tupatornaveersarnissamik
kaammattuinerit ajorinngilakka aamma taamaattut aqqutissaammata.
Kisianni
pingaarnepaatippara, aamma maluginiarsimavara Kĝbenhavn-mi amt-a imaluunniit
Danmark-mi aamma amt-it ilaat, suliniutissaminnik piviusumik
iliuuseqarniartarsimanerat aamma nappaammik taamak ittumik uaguttut immaqa
annertutigisumik atugaqanngikkaluarlutik maannakkut naamassiniagaqarmata.
Uagut
aamma puujortarparput ilaannikkut taamaattunik eqqartuigutta soorlu nappaatip
akiorni-arneqarneranut pinaveersaarnissaannut, inuit taamak
amerlanngittigaluta, taamak ikitsigaluta, aammalu atortorissaarutinik taamak
annertutigisunik peqarluta, naammassisinnaasariaqarparput, ukiut tamaasa
pinngikkaluarlugu, Kalaallit Nunaanni arnat tamaasa
neqeroorfigisinnaassallugit, misissortinnissamik taamaattumik.
Amerlassuserput
najoqqutaralugit taamak ittunik pinaveersartitsinernik neqeroorutissat
arna- nut ukiui
aaliangersimasuninngaanniit periarfisssittariaqarpagut. Tamanna isumaqarpunga
naammassineqarsinnaasariaqartutut isigisariaqaripput. Inuit million-usuugutta
allaavoq, kisianni imak amerlanngitsigaagut aammalu atortorissaarutit nalaanni
inuulluta, pikkorissunillu aamma nakorsanik pilersaarusiortussanik peqarluta
naammassisinnaagipput isumaqarpunga oqartariaqarluta,
naammassiniartariaqarparput taamak ittoq suliassaq.
Anders
Nilsson-ip oqaaserisamini tb-mi iliorsimanerup umiarsuarmi inunnik
misissuinernik ilalerlugu sulisinnaanera, sulisitsisinnaaneq taavaa, apeqqutit
tamakkua takornataasariaqanngillat aaqqiiniassalluni, siunnersuutitut uanga
pingaarutilittulluunniit isigaakka periarfissat taamaattut qiviarneqassappata.
Aamma imaaginnassanngimmat aasinaasiit illoqarfimmi kisimik najugallit arnat
periarfissinneqassasut aamma arnarparujussuit nunaqarfinni allanilu, ullut
tamaasa nakorsiarsinnaanngillat aamma taamaalillutik
neqeroorfigineqassagaluarmata.
Suliassaq
taamak ittoq naammassineqarsinnaasariaqarpoq inuiaqatigiit taamak ikitsigisunik
inulinni aammalu taamak pikkoritsigisunik atortorissaarutinillu aamma pigisaqarfiusuni.
Kristine
Raahauge, Inatsisartut Peqqinnissamut Ataatsimiititaliaata siulittaasua,
Siumut:
Partiit
oqaaseqartuinut tamanut qujangaarpunga, tassa siunnersuuteqartunut
isumaliutissiissutitsinnut tapersersuinerat pillugu.
Aammalu
nuannaarutigalugu arlariinnik eqqaaneqarmat peqqinissaq siunertaralugu
paasititsi-niaanissaq qanoq pingaaruteqartigisoq, aammalumi taanna qanittukkut
peqqissuseq pillugu nassuiaateqarnermi tikkuartorneqartoq ilagivaat inuup
nammineq peqqinnissani eqqarsaatigalugu inuuniarnerminik nalunngisaqarluaruni
paasisimasaqarluaruni aamma ajornerusumik nappar-simalernissaminut imminut
ikiorsinnaanera.
Atassut-ip oqaaseqartuanut una tarnikkut ikiorserneqartarnissaq peqqutigalugu apeqqusiinera, tassalu uani Inatsisartut Peqqinnissamut Ataatsimiititaliaata isumaliutissiissutaa 1997-mi upernaakkut ataatsimiinnerup nalaani Peqqinnissamut ataatsimiititaliaq april-ip 30-ni aamma maj-ip 22-ani ataatsimiippoq.
Ataatsimiititaliap Inatsisartunut ilaasortap Jonathan Motzfeldt-ip arnat illissamikkut iviangimikkullu krĉft-qartut sapinngisamik piaartumik paasineqarlutik katsorsarneqartarnissaannik siunnersuutaa kiisalu Inatsisartunut ilaasortap Maliinannguaq Markussen Mĝlgaard-ip najukkani tarnip pissusiinik ilisimasalinnik atorfinititsisarnissamik siunnersuutaa oqaluuserai.
Arnat illissamikkut iviangimikkullu krĉft-qartut sapinngisamik piaartumik paasineqarlutillu katsorsarneqartarnissaannik Inatsisartunut ilaasortap Jonathan Motzfeldt-ip siunersuutaa. Jonathan Motzfeldt-ip siunnersuutaata oqaluuserineranut atugassatut Peqqinnissamut Ilisimatusarnermullu Pisartaqarfimmit paasissutissarsiortoqarpoq, arnallu ilumikkut nappaataannut aqutsisutut nakorsaaneq Peder Kern arnat illiaasa paavinik qinnguartaalluni misissuinermik suliniutaalersussaq, ukiamut aallartinneqartussatut naatsorsuutigineqartoq pillugu ataatsimiititaliamut oqaasiinnartigut nassuiaateqarpoq.
Jonathan Motzfeldt-ip siunersuutaa tapersersorini ataatsimiititaliap oqaatigissavaa. Ataatsimiititaliap Naalakkersuisunut kaammattuutigaa, krĉft-mik nappaatit allat assersuutigalugu iviangikkut, puakkut, erlavitsigut il. il. pitsaaliornissaannik pilersaarutit suliarineqassasut. Iliuusissatut pilersaarutit krĉft-mik pitsaaliuinermik pilersaarutit taamaattut aallartinneqarnerisa qanoq akeqarumaarneri naatsorsuutinik ilaqartillugit. Ataatsimiititaliap Naalakkersuisunut taamatuttaaq kaammattuutigaa, illissap paavanik qinnguartaanikkut misissuinerit aallartinneqarnerinut atatillugu paasisitsiniaanerit annertunerusut aallartinneqassasut.
Inatsisartunut ilaasortap Maliinannguaq M. Mĝlgaard-ip najukkani tarnip pissusiinik ilisimasalinnik atorfinititsisarnissamik siunnersuutaa.
Kommuunini tarnit pissusiinik ilisimasalinnik atorfinititsiortornissamik Maliinannguaq M. Mĝlgaard-ip siunnersuutaa aamma ataatsimiititaliap oqaluuseraa. Najukkani tarnip pissusiinik ilisimasalinnik amerlanerusunik atorfinititsisoqartariaqartoq ataatsimiititaliap siunnersuuteqar-toq isumaqatigaa. Isumaginninnikkut pitsaaliuinermi inuillu inuttut inuuniarnikkut atukkatigut ajornartorsiuteqartut ikiorneqartarneranni tarnip pissusiinik ilisimasaqartut pingaaruteqarnerat Ataatsimiititaliap pingaartippaa. Ataatsimiititaliap aammattaaq Isumaginninnermik iluarsaaqqinnissamut Ataatsimiititaliarsuup inerniliinera innersuussutigaa. Tamatuma saniatigut kommuunini tarnip pissusiinik ilisimasalinnik atorfinititsinermi aningaasartuutit agguataarneqartarnerat ataatsimiititaliap oqaluuseraa.
Siunnersuut toqqaammaviusumik isumaqatigalugu ataatsimiititaliap oqaatigissavaa inerniliivor-lu aaqqissuussinerup taamaattup aningaasalersorneqarnera Namminersornerullutik Oqatussat KANUKOKA-llu isumaqatigiinniutigisariaqaraat. Taamaammat ataatsimiititaliap kommuunini tarnip pissusiinik ilisimasalinnik atorfinititsisalersinnaanerit aaqqissuussinerullu taamaattup aningaasalersoneqarnera pillugu KANUKOKA-mik oqaloqatiginninnerit aallarteqqullugit Naalakkersuisunut kaammattuutigaa.
Ataatsimiititaliami ilaasortaapput Siverth K. Heilmann aammalu Anders Nilsson - Atassut-miit, Maliinannguaq Markussen Mĝlgaard - Inuit Ataqatigiit-niit Niels Mattaaq - Siumut uangalu Siumut.
Marianne Jensen, Peqqinnissamut, Avatangiisinut Ilisimatusarnermullu Naalakkersuisoq, Siumut:
Aallarniutigalugu Inatsisartut Siulittaasuat Jonathan Motzfeldt, Inatsisartut peqqinnissamut ataatsiititaliaani siulittaasutut tunuarnerani Naalakkersuisut sinnerluit ataatsimiititaliami tassani sulisimaneranik qutsaviginiarpara aammalu Inatsisartunut ilaasortaq Kristine Raahauge siulittaasutut qinigaanerani pilluaqqullugu.
Arnat illissamikkut iviangimikkullu krĉft-qartut sapinngisamik piaartumik paasineqarlutillu katsorsarneqartarnissaannik Inatsisartunut ilaasortap Jonathan Motzfeldt-ip siunnersuutaa pillugu kiisalu krĉft-mik nappaatit allat soorlu puatsigut naakkullu krĉft-qalersinnaanerup pinaveersaartinniarneranut qanoq iliuuseqarnissamik sulissuteqartoqarnissaanik ataatsimiititaliap kaammattuuteqarneranut tunngatillugu makku ilisimatitsissutigissavakka:
Illissap paavatigut krĉft-qarneq. Naalakkersuisuni paasivaarput ataatsimiititaliaq illissap paavatigut krĉft-qartarneq pillugu suliniutinik ilisimatinneqarsimasoq, tassalu aaqqissuussaa-sunik inunnik misissuisitsisarnissamut pilersaarusiorneq ingerlavoq, ukiup matuma naanginnerani aallartittussatut naatsorsuutigineqarluni.
Iviangikkut krĉft-qarneq. Ukiut 25-it ingerlaneranni piffissami 1950-miit 1974-ip tungaanut iviangimikkut krĉft-qartut 50-it paasineqarsimapput, tassa ukiumut agguaqatigiissillugu marluusarsimallutik. Nunatsinni iviangimikkut krĉft-qalersartut amerliartortutut nakorsanit taakkunannga katsorsaasartunit oqaatigineqarpoq. Danmark-mi arnat inuunerup ingerlanerani iviangimik- kut krĉft-mik eqqugaasartut 8 %-put.
Pissutsit krĉft-qalersartut amerliartornerinut pissutaaqataasut makkuupput:
Nunatsinni agguaqatigiisillugu ukioqqortusiartornerunerput agguaqatigiisillugu.
Arnat ikinnerusunik meerartaartarnerat, tassami naartuneq milutitsinerlu iviangikkut krĉft-qalersinnaanermut illersuutaasarmata.
Iviangit immuisa taartaannik atuinikkut piffissaq arnat milutitsiffiata piffissap sivikillisarnera.
Arnat naartusinnaanngitsut amerliartornerat, naartunikkut milutitsinikkullu illersuut pinngitsoortarmassuk.
Arnat akornanni tupamik pujortartarnerup atugaanerujartornera.
Iviangikkut krĉft-qarnerup paasineqalertorlunilu katsorsarneqalertornissaa pillugu Danmark-mi Sundhedsstyrelse-i nassuiaammini danskit amt-nut ilaatigut ima kaammattuuteqarpoq:
Siullermik, amt-it tamarmik nappaammik paasiniaariaatsimik pilersitsissasut nappaatip paasisap katsorsarneqarneratalu pitsaassusissaa anguniarlugu. Paasiniaariaaseq, imaluunniit pilersaarut, taama ittoq inunnik misissuititsisinnaanerit ingerlalluarnissaanik tunngavissaalluarpoq.
Aappassaannik, iviangikkut krĉft-mik qinnguartaanikkut misissuinissamik, mammografiscreening, amt-it pilersaaruteqartut misissuinerup misigissutsitigut kingunerisartagaat pillugit ilaatigut "krĉft-qartutut paasisat eqqunngitsut" kingunerisartagaannik paasiniaallutik misissuinissaat kaammattuutigineqarpoq.
Aammattaaq oqaatigineqassaaq arnat 50-69-nik ukiullit iviangimikkut krĉft-qalersimasinnaanerannik taamatut misissuisarneq, misissorneqartuni taakkunani toqusartut 29 %-nik ikilisimanerannut uppernarsaatissaqarmat. Allanik ukiulinnik misissuinerup qanoq sunniuteqarsinnaanerannik takussutissaqanngilaq.
Oqaatigineqassaaq danskit amt-ii ataasiakkaat taamaallaat, tassa Kĝbenhavn-nip kommuunia kiisalu Fyn-ip Storstrĝm-millu amt-ii, inunnik misissuinissamik pilersaaruteqarsimammata, allat tamarmik nappaammik paasiniaasarneq qinersimagaat.
Sundhedsstyrelse-ip najoqqutassiai malillugit ivianginik qinnguartaalluni misissuinerup iluaqutitassaa, nunatsinni inoqassutsimut atuutsikkaanni, tassaavoq ukiumut ataatsimut iviangimigut krĉft-qalersimasup ataatsip piaartumik paasineqarnermigut pilanneqareernermigullu arnap aniguinissaata qulakkeerneqarsinnaanera.
Naggasiullugu oqaatigineqarsinnaavoq iviangikkut krĉft-qalersimasinnaanermik qinnguartaalluni misissuineq iluaqutitaqarlunilu ajoqutitaqarsinnaammat. Pilersaarutip naammassiniarnissaa ajornakusoorpoq, taamaattumillu nakorsaanernit immikkut ilisimasalittut akisussaasut attuumassutillit peqatigalugit ataatsimiititaliami nalileqqissaarneqartariaqarluni. Pilersaarutip aningaasartuutitai allanut sullissinermut eqqunneqarusuttunut oqimaaqatigiissinnissaat pisariaqarpoq.
Aningaasartuutitaqarujussuanngitsumilli aaqqiissutaasinnaasoq unaavoq iviaginut qinnguartaammik Dronning Ingrid-ip Napparsimavissuata qinnguartaasarfiata pilerneqarnissaa, taamaalilluni nappaammik paasiniaaffeqalissammat napparsimasunillu peqqinnissaqarfeqarfinnit innersuunneqartunut misissuiffeqalissalluni.
Allakkut krĉft-qalersimasinnaasunik misissuinissat pillugit. Inunnik misisuinissamik periutsinik, krĉft-qarfiulersimasinnaasut pillugit piaartumik paasinnissutaasinnaasunik ullumikkut nakorsat peqanngillat, krĉft-qalefiusinnaasut soorlu makku eqqarsaatigalugit:
Puakkut krĉft-qarneq, oqaatigineeqassaarli puakkut tuberkulose-qalersimasinnaasunik qinnguartaanikkut akuttunngitsumik misissuisarnerup atorneqaqqilernera ilatigut iluaqutaasinnaammat, tassa taamatut misissuineq iluatsillugu puakkut krĉft-qalersimasinnaasut paasineqarsinnaammata.
Qingakkut, torlukkut, qanikkut qinersinilu qisiliorfinni krĉft-qalersarneq. Innuttaasut siutini, qingami, toqqusaanilu nappaatinut immikkut ilisimasalimmut misissorteriaannaanissaat qulakkeertariaqarpoq. Immikkut ilisimasqarfik Dronnin Ingrid-ip Napparsimavissuani pilersinneqaqqammerpoq, sinerissamilu angallannerit annertusisussaapput misissuinissaq siunertaralugu.
Naakkut krĉft-qarneq. Napparsimasut naaminnut atatillugu ataavartumik ajornartorsiutillit gastroskopi-mik taasartagaat atorlugu qinngullugit misissorneqarnissaannik neqeroorfegineqartariaqarput. Dronning Ingrid-ip Napparsimavissuata pilaasarfiani ullumikkut taamatut misissuisoqalersinnaavoq arlalitsigullu angalasoqarpoq. Angalanerit annertusiniarneqassapput.
Inatsisartunut ilaasortap Maliinannguaq Markusssen Mĝlgaard-ip tarnip pissusiinik ilisimasalinnik najukkani atorfinititsisarnissamik siunnersuutaanut tunngatillugu makku oqaatigissavakka:
Tarnip pissusiinik ilisimasalinnik kommuunini atorfinititsiortornissamik siunersuummut Naalakkersuisut paasinnipput pitsangorsaataasinnaasunillu suliniarnissamut ammallutik. Ineriartornerup takutippaa innuttaasunut tarnimikkut inuttullu atukkamikkut ajornartoriutilinnut suliniuteqarnerup siuarsarneqarnissaa annertuumik pisariaqartinneqartoq, taamaaliornikkut najukkani nukissanik atorluaanissamut periarfissagissaarnerulissammat. Assersuutigalugu aliasunneq, ajornartorsiuteqarneq aammalu imminortartut amerlanerujussuat susassaqarfiupput pingaarutillit kommuunini suliniuteqarfiusariaqartut.
Taamaattumik Peqqinnissamut Ilisimatusarnermullu Pisortaqarfiup KANUKOKA pisortaqarfiillu allat attuumassutillit attaveqarfiginiassavai ajornartorisutinik aaqqiinissamut periarfissanik paasiniaanissaq siunertaralugu, tassunga ilanngullugu aningaasalersuinissat suliassanullu akisussaaffinnik agguataarinissat eqqarsaatigalugit.
Niels Mattaaq, Siumup oqaaseqartua:
Inatsisartut Peqqinissamut Ataatsimiititaliaata isumaliutissiissutaa Siumut-miit imatut oqaaseqarfiginiarparput. 1997-mi upernaakkut Inatsisartut ataatsimiinnerisa nalaani Peqqinnissamut ataatsimiititaliaq april-ip 30-ani aamma maj-ip 22-ani ataatsimiippoq.
Ulluni taakkunani Inatsisartut peqqinnissamut ataatsimiititaliaata sammisimavai Inatsisartunut ilaasortap Jonathan Motzfeldt-ip arnat illissamikkut iviangimikkullu krĉft-qartut sapinngisamik piaartumik paasineqarlutillu katsorsarneqartarnissaannik siunnersuutaa.
Kiisalu Inatsisartunut ilaasortap Maliinannguaq Mĝlgaard-ip najukkani tarnip pissusiinik ilisimasalinnik atorfinititsisarnissamik siunnersuutaa oqaluuserineqarnera.
Jonathan Motzfeldt-ip siunnersuutaanut tunngatillugu Siumut isumaqarpoq, ataatsimiititaliap oqaatigisaatut peqqinnisamut ilisimatusarnermullu pisortaqarfimmiit paasissutissiisoqarsimammat, arnat ilumikkut nappaataannut aqutsisutut nakorsaaneq Peder Kern, arnat illiaasa paavinik qinnguartaalluni misissuinermik suliniutaalersussaq pillugu, ukiamut aalartinneqartussatut naatsorsuutigineqartoq oqaasiinakkut nassuiaatigisimagaa, tassungalu paasissutissat ersaritsut saqqummiullugit Siumup taamatut nappaatillit piaarnerusumik paasineqarlutillu katsorsarneqartarnissaat siunnersuuteqartutuut kaammattuutigaa.
Aamma Siumup ataatsimiititaliaq isumaqatigaa Naalakkersuisunut kaammattuutigineqassasoq krĉft-mik nappaatit allat soorlu iviangitsigut, puatsigut, erlavitsigullu il.il. pitsaaliornissaanik pilersaarutit suliarineqassasut.
Siumut-miit ataatsimiititaliaq isumaqatingaarput Naalakkersuisunut kaammattuuteqarmat krĉft-mik misissuinerit ilutigalugit timip pissusiisa allat nappaammik pasinarsinnaasunik misissuinernut atatillugu annertunerusumik paasisitsiniaanerit aallartinneqassasut.
Kiisalu Siumut isumaqarpoq pingaaruteqartuusoq Paarisa-p pilerseqqinneqarnissaa, Paarisa-mmi sulinermini annertuumik pitsaaliuvinerit paasisitsiniaanerit allallu inuiaqatigiinnut pingaaruteqartuusut paasisitsiniutigalugit ingerlanneqartartut annertoqisut suliarisarmagit matumuuna Paarisa-p pilerseqqinneqarnissaanut isumaqataanerput saqqummiupparput piaartumik piviusunngussasoq Kalaallit Nunatsinni ulluni ukiunilu aggersuni pisariaqartinneqaqimmat.
Kiisalu Inatsisartunut ilaasartap Maliinannguaq Mĝlgaard-ip najukkani tarnip pissusiinik ilisimasalinnik atorfinititsisarnissamik siunnersuutaanut tunngatillugu Siumut-miit ataatsimiititaliap tapersiinera isumaqatigalugu nalunaarutigeriarlugu oqaatigissavarput illoqarfinni avinngarusimasuniittuni taamatut atorfilik assut amingaatigineqarmat, taamaattumik tarnip pissusiinik ilisimasalimmik atorfinititsisarnissamik siunnersuut isumaqatigaarput. Kiisalu ataatsimiititaliaq isumaqatingalutigu, tapersiissuteqassagut, pingaaruteqarluinnarmat piffimmi pitsaaliuinermut suliniuteqarnerit annertunerusumik tapersersorlugillu ikiortariaqarnerat tamani eqqumaffigilluarneqarnissaa kaammattuutigaarput.
Inuillu inuttut inuuniarnikkullu atukkatigut ajornartorsiuteqartut pisariaqartittuassammassuk tarnip pissusiinik ilisimasalimmik atorfeqartitsinissaq.
Kiisalu ataatsimiititaliaq Siumut-miit isumaqatigaarput tarnip pissusiinik ilisimasalinnik atorfinititsinermi anngaasartuutigiummaakkat agguataarinikkut angusaqarfiginiarneqartassasut. Soorlu ataatsimiititaliaq aalajangiinermini oqaaseqartoq Namminersornerullutik Oqartussat Kommuuneqarfiillu Kattuffiata isumaqatigiinniutigisariaqaraat.
Aamma ataatsimiititaliaq isumaqatigaarput oqaaseqarnermini inassutigimmagu aaqqissuussinerup taamaattup aningaasalersorneqarnera pillugu nunatsinni Kommuuneqarfiit Kattuffianniik oqaloqatiginninnerit aallarteqqullugit Naalakkersuisunut kaammattuuteqarmat.
Isumaliutissiissut Siumut-miit taamatut oqaaseqarfigalugu isumaqataanerput nalunaarutigssavarput.
Anders Nilsson, Atassut-ip oqaaseqartua:
Atassut-ip iluareqalugu oqaatigiumavaa ukioq manna illissap paavani krĉft-qartoqarsinnaaneranik misissuisalerneq atulerinneqarsimammat - naak immaqa arnat inersimasut affaannaat misissorneqartarsimagaluartut.
Atassut-ip aamma akuersaarumavaa peqqinnissaqarfimmi qullersaqarfimmit pilersaarutigineqarmat allatigut krĉft-qarsinnaanermik misissuisitsisalernissamik pilersaaruteqarmata.
Ungasinngitsukkut tusarparput krĉft-qarnerit ilaat tassa putsigut krĉft-qarneq ajorunnaarsinniassallugu neriuutissaqangaanngitsoq. Nappaassuarli taanna pinaveersaassallugu periarfissaqarpoq.
Nunatsinni inersimasut 80 %-ii pujortartarput. Puatsigullu krĉft-qalersarnermut pissutaanerpaavoq pujortarneq, pujartarnerlu aamma nappaatinut allanut pisuusarpoq. Taamaattumik puatsigut krĉft-qarlernaveersaarnissaq inuit ataasiakkaat namminneq isumagisassaraat. Pujortarnaveersaarnissaq ajornanngeqaaq. Aningaasaatitit ileqqaarniakkit - tupasissanak! Pujortartarnak!
Atassut-miit aamma pingaarteqalugu oqaatigerusupparput kikkut tamarmik - sumi najugaqarnerat apeqqutaatinnagu - misissortinnissamut periarfissaqartariaqartut. Taamaattumik kaammattuutigeqqissavarput umiarsuarmik anginngitsumik naleqquttumik pisaarnissaq qanoq akeqassanersoq naatsorsoqqissaaqqullugu. Taanna angallatigalugu inoqarfiit tamaasa tikinneqarsinnaapput misissuiffigalugillu.
Atassut-ip aamma tapersersorumavaa anersaakkut timikkullu atugarliuteqartut ikiorserneqarsinnaanerat pitsanngorsartuaqqullugu. Tamakkuli nalinginnaavallaalersinnagu eqqaasitsissutigisariaqarparput inuit tamatta peqqissuuniarnissatsinnut nammineq angisuumik pisussaaffeqaratta! Ilagisariit ikinngutillu kisiisa eqqarsaatiginagit aammali inuit allanit soqutigineqanngitsutut ittut eqqarsaatigalugit.
Tarnikkut ikiorserneqartarneq isumannaarneqarsimagaluarpoq, tamannali nioqqutissamut iluameersumut taartaaginnarpoq, tassaasoq, inoqatit atugarissaarnissaat eqqarsaatigalugu isumaginninneq namminerlu piumassutsimik soqutigisatigut akissarsiaqarfiunngitsumik sulineq.
Johan Lund Olsen, Inuit Ataqatigiit oqaaseqartuat:
Inatsisartunut Siulittaasortaap Jonathan Motzfeldt-ip arnat illissamikkut iviangimikkullu krĉft-qalersartut sapinngisamik piaartumik paasineqarlutillu katsorsarneqartarnissaannik siunertaqartumik kiisalu Inatsisartunut ilaasortap Maliinannguaq Markussen Mĝlgaard-ip najukkani tarnip pissusiinik ilisimasalinnik atorfinititsisoqartariaqarneranik oqariartuuteqartunik siunnersuuteqarsimanerannut Inuit Ataqatigiit isumaqataavugut tamannalumi isumaliutissiisutigineqartumi uppernarsarneqarluni aamma aatsaanginnaq ersersinneqareerpoq.
Inuit Ataqatigiit maluginiarparput Jonathan Motzfeldt-ip siunnersuutigisaanut atatillugu peqqinnissaqarfiup iluani sunniutit arlallit maanna pilersaarusiorneqareerlutillu ilaatigut ukiamiit aallartittumik timitalerneqartussanngoreermata aammalu tamatumani iluarisimaarlutigu paasigatsigu naalakkersuisuni krĉft-qalersarnerup pinaveersimatinniarnissaanut misissuititsisarnissanut annertusaasariaqarnissaq aamma piareersimaffigineqartoq.
Taamaattumik siunnersuuteqartup eqqarsaatigisaanut iluaqutaalluinnartussamik Dronning Ingrid Napparsimavissuani ivianginut qinguartaammik Peqqinnissamut Naalakkersuisup oqarneratuut atortorissaarusiisoqassammat, tamanna Inuit Ataqatigiit ilassilluarumavarput soorluttaaq aamma allatigut krĉft-qalersinnaasarneq annerusumik peqqinissaqarfiup tungaaniit misissuiffigijuarneqarlutillu pitsaaliuinissaq siunetaralugu sunniutissat pingaartinneqarlutik aamma ingerlatinneqartuassammata.
Krĉft-ip aammalu taassuma nappaatip alianaqisumik kinguneqarluni ilaqutariippassuarnik maani nunatsinni eqquisartup akiorniarnissaanut minnerunngitsumilli nappaatip atorneqalerneraniit piaarnerusumik paasineqartalernissaanut iliuusissanut peqataajuartariaqaratta Inuit Ataqatigiit taamatut oqaaseqarluta siunnersuuteqartoq isumaqatigalugu taperserparput.
Inatsisartunut ilaasortap Maliinannguaq Markussen Mĝlgaard-ip tarnip pissusiinik ilisimasalinnik kommuunini atorfinititsiortoqarnissaanik siunertaqartumik siunnersuuteqarnerani Inuit Ataqatigiit Peqqinnissamut Ataatsimiititaliaq isumaqatigalutigu siunnersuuteqartoq aamma taperserparput. Siunnersuut iluatinnarpoq kommuuninilu maannamut amerlanernit taamatut immikkut ilisimasalinnik atorfinititsisoqatariaqarneranik aamma malitsiqartinneqartariaqarluni.
Taamaattumik Inuit Ataqatigiit-niit nuannaarutigalugu maluginiarparput Naalakkersuisut Kalaallit Nunatsinni Kommuuneqarfiit Kattufiannik pisortaqarfiillu allat attuumassutillit attaveqarfiginiassallugit piareersimanerarluni aamma nalunaaruteqarmat, taamaalilluni kommuunit akissallit kisimik pinnatik, kommuunit akissaasuasut tarnip pissusiinik ilisimasalinnik siunissami aamma atorfinititsisinnaalissammata.
Taamatullu oqaaseqarluta Peqqinissamut Ataatsimiititaliap Isumaliutissiissutaa taamatullu aamma Naalakkersuisup siunnersuuteqartunut tapersiuteqarluni oqaaserisai ilanngullugit Inuit Ataqatigiit akuersaarpagut.
Bjarne Kreutzmann, Akulliit Partiiat:
Jonathan Motzfeldt-ip siunnersuutaanut
tunngatillugu Inatsisartut Peqqinnissamut Ataatsimiititaliaata
isumaliutissiissutaa Akulliit Partiiat-ni soqutigalugu misissuataarsimavara,
Ataatsimiititaliallu inassutai tamakkiisumik taperserlugit.
Tassa krĉft-mik nappaatit allat, soorlu
iviangitigut krĉft-i, puatsigut krĉft-i aamma naakkut krĉft-i il. il.
pitsaaliorniarlugit iliuusissanik pilersaarusiortoqassasoq.
Aammalu iliuusissanik pilersaarutit
tamakku krĉft-mik pitsaaliuinermik pilersaarutit taamaattut aallartinneqarpata
qanoq akeqarumaarnersut naatsorsuutinik ilaqartariaqartut.
Kiisalu illissap paavanik
qinnguartaanikkut misissuinerit aallartinneqarnerinut atatillugu paasisitsiniaasoqartariaqartoq.
Tarnip pissusiinik ilisimasalinnik
najukkani atorfinititsinissamik Inatsisartuni ilaasortap Maliinannguaq
Markussen Mĝlgaard-ip siunnersuutaanut tunngatillugu Ataatsiliititaliap
isummernera Akulliit Partiiat-ta aamma taperserpaa, tassa tamatumani
periarfissat aamma qanoq aningaasalersorneqarsinnaanerat pillugit
Naalakkersuisut KANUKOKA isumasioqatigissagaat.
Taamak oqaaseqarlunga isumaliutissiissut
tusaatitut tiguara.
Anthon Frederiksen, Kattusseqatigiit:
Inatsisartunut Ilaasortap Jonathan
Motzfeldt-ip siunnersuutaa paasilluarlugu Kattusseqatigiit-niit taperserparput
tassami ajornartorsiut annertooq aammalu peqqissuseq pillugu nassuiaat
Inatsisartuni upernaaq manna oqallisigigatsigu paasivarput nunatsinni
toqusartut 17 %-ii krĉft-mik nappaateqarlutik toqusartut. Taamaattumik
nappaatip taassuma sapinngisamik piaartumik paasineqarlutillu
katsorsarneqartarsinnaanik siunnersuut tamakkiisumik isumaqatigaarput.
Ataatsimiititaliallu kaammattuutaa ilalerlutigu.
Inatsisartunut ilaasortap Maliinannguaq
Mĝlgaard-ip siunnersuutaanut tunngatillugu ilaatigut Isumaginninnermut
Ataatsimiititaliarsuup isumaliutissiissutaa pillugu oqallinnermi
Kattusseqatigiit-niit oqaaseqaatigut innersuussutigalugit Peqqinnissamut
Ataatsimiititaliap Naalakkersuisunut kaammattuutaa taperserparput.
Jonathan Motzfeldt, Siunnersuuteqartoq, Siumut:
Siunnersuutiga ilassilluarneqarmat
qujassutigaara, partiinit tamanit ilassilluarneqarpoq tapersersorneqarluni
aamma nuannaarutigaara Peqqinnissamik Naalakkersuisup inussiarnersumik
nuannersumillu suliassaq tigusimammagu, taamaalilluni ingerlaqqinnissamut
periarfissat taakkartorneqarlutik. Isumaqarpunga aamma piffissaq eqqartoq
tunngavia eqqorlugu siunnersuut taanna maannakkut saqqummiunneqartoq.
Tassami siunnersuutigisanni uanga arnat
tassani pisimavakka aamma tassani noqqaassutit arnaninngaanniit namminermi
saqqummertartut eqqarsaatigalugit suliariniarneqarnissaq isumannaartumik
pinaveersartitsiniarnissaq nappaammik anguniarlugu.
Soorunami allat krĉft-mut tunngasut,
tupatornikkut aallatigulluunniit, tupatornaveersarnissamik kaammattuinerit
ajorinngilakka aamma taamaattut aqqutissaammata.
Kisianni pingaarnepaatippara, aamma
maluginiarsimavara Kĝbenhavn-mi amt-a imaluunniit Danmark-mi aamma amt-it
ilaat, suliniutissaminnik piviusumik iliuuseqarniartarsimanerat aamma
nappaammik taamak ittumik uaguttut immaqa annertutigisumik
atugaqanngikkaluarlutik maannakkut naamassiniagaqarmata.
Uagut aamma puujortarparput ilaannikkut
taamaattunik eqqartuigutta soorlu nappaatip akiorniarneqarneranut
pinaveersaarnissaannut, inuit taamak amerlanngittigaluta, taamak ikitsigaluta,
aammalu atortorissaarutinik taamak annertutigisunik peqarluta,
naammassisinnaasariaqarparput, ukiut tamaasa pinngikkaluarlugu, Kalaallit
Nunaanni arnat tamaasa neqeroorfigisinnaassallugit, misissortinnissamik
taamaattumik.
Amerlassuserput najoqqutaralugit taamak
ittunik pinaveersartitsinernik neqeroorutissat arnanut ukiui aaliangersimasuninngaanniit
periarfisssittariaqarpagut. Tamanna isumaqarpunga naammassineqarsinnaasariaqartutut
isigisariaqaripput. Inuit million-usuugutta allaavoq, kisianni imak
amerlanngitsigaagut aammalu atortorissaarutit nalaanni inuulluta,
pikkorissunillu aamma nakorsanik pilersaarusiortussanik peqarluta
naammassisinnaagipput isumaqarpunga oqartariaqarluta,
naammassiniartariaqarparput taamak ittoq suliassaq.
Anders Nilsson-ip oqaaserisamini tb-mi
iliorsimanerup umiarsuarmi inunnik misissuinernik ilalerlugu sulisinnaanera,
sulisitsisinnaaneq taavaa, apeqqutit tamakkua takornataasariaqanngillat
aaqqiiniassalluni, siunnersuutitut uanga pingaarutilittulluunniit isigaakka
periarfissat taamaattut qiviarneqassappata. Aamma imaaginnassanngimmat
aasinaasiit illoqarfimmi kisimik najugallit arnat periarfissinneqassasut aamma
arnarparujussuit nunaqarfinni allanilu, ullut tamaasa nakorsiarsinnaanngillat
aamma taamaalillutik neqeroorfigineqassagaluarmata.
Suliassaq taamak ittoq
naammassineqarsinnaasariaqarpoq inuiaqatigiit taamak ikitsigisunik inulinni
aammalu taamak pikkoritsigisunik atortorissaarutinillu aamma pigisaqarfiusuni.
Kristine Raahauge, ataatsimiititaliap siulittaasua, Siumut:
Partiit oqaaseqartuinut tamanut qujangaarpunga,
tassa siunnersuuteqartunut isumaliutissiissutitsinnut tapersersuinerat
pillugu.
Aammalu nuannaarutigalugu arlariinnik
eqqaaneqarmat peqqinissaq siunertaralugu paasititsiniaanissaq qanoq
pingaaruteqartigisoq, aammalumi taanna qanittukkut peqqissuseq pillugu
nassuiaateqarnermi tikkuartorneqartoq ilagivaat inuup nammineq peqqinnissani
eqqarsaatigalugu inuuniarnerminik nalunngisaqarluaruni paasisimasaqarluaruni
aamma ajornerusumik napparsimalernissaminut imminut ikiorsinnaanera.
Atassut-ip oqaaseqartuanut una tarnikkut
ikiorserneqartarnissaq peqqutigalugu apeqqusiinera, tassalu uani tikkuarlugu
inuit imminut sulerusussuseqarlutik tamakkuninnga aamma ikioqatigiillutik
sulisartut tikkuartorlugit, taanna aamma soorunami eqqartorsimavarput, kisiannili
aamma nalunngilarput ingammilu aamma inunnik isumaginninnermut
iluarsartorqinnermik angalasarnermi malugisimagipput ulluinnarni tamakkuninnga
soqutigisaqaqatigiillutik suleqatigiit imminnut kaammattoqatigiillutik
eqqartuisartut. Taassumalu saniatigut aamma atuarfeqarfinni, meeqqerivinni,
inunnik isumaginittoqarfinni, napparsimaveqarfinni, utoqqaaq illuini aammalu
innarluutillit najugaqarfiini sulisut assut pingaartikkaat tarnimut
ilisimasatinnik siunnersortinik piffimminni peqarnissaat, tassami suliaqarnerminni
aamma tassanngaannaq pisoqartillugu eqqugaasimasut aamma sullissisoq aamma
pisariaqartittarmassuk tamakkuninnga ilisimasalinnik qanittumi
oqaloqateqarsinnaanissaminnik, siunnersorneqarsinnaanissaminnillu.
Naalakkersuisup akissuteqaataanut aammalu
ersarissumik nassuiaataanut qujavugut aammalu misissuisarnissanut
assigiingitsunut maanna aamma partiinit assigiingitsunik tikkuartorneqartunut
suleqataarusuttunut piumassuseqarnera nuannaarutigeqaarput.
Marianne Jensen, Peqqinnissamut,Avatangiisinut
Ilisimatusarnermullu Naalakkersuisoq, Siumut:
Uanga aamma Naalakkersuisut sinnerlugit
Ataatsimiititaliap inassuteqaataanut aammalu Naalakkersuisut akissutaannut
tapersiinerit qujassutigerusuppakka, tassami nappaassuaq krĉft-mik
eqqornerqartut imannaanngitsumik atugatitaasarput ulluinnarni allaallu
katsorsarneqarnerminni nunartik ilaquttatillu qimallugu allatut ajornartumik
amerlanertigut Danmark-mi, ilaatigut piffissami sivisuumi, katsorsaanik
ingerlanneqartariaqartarpoq, tamakkulu soorunalimi aamma ilanngullutik aamma
atorsaateqarnermut ilapittuutaasarput.
Taassuma qaavatigut takornartaangilaq
taamatut sivisuumik katsorsarneqartariaqarnermi allatut ajornartumik
suliffeqaraanni sivisuumik suliffik qimassimasariaqartarpoq, ilaquttat allallu
qimassimasariaqarnerata saniatigut, tamaalillutillu aamma isertitat
suliffeqartuugaanni annaaneqartarput. Ajoraluartumik tamakkua aamma
nassataannik inuttut atugarliutit ilalersorneqartarnerat amerlisarneqartarneri
takornartaasanngilaq. Taamaattumik neriuppunga aamma peqqinnissaqarfiup
iluaninnaangitsoq kisianni aamma susassaqarfinni allani taamatut eqqugaasut
taassumalu eqqugaasimanerullu kingunerisaanik atugarisat aamma
tappiffigineqarnerunissaat eqqumaffigineqarniassasoq.
Tassa nalunngikkaluarparput soorunalimi
krĉft-mik nappaateqartarneq nutaajunngilaq tassa massakkut aamma
katersugaasivissuatsinni takananiittut paasineqarsimavoq ilaat krĉft-mik
nappaateqarsimasuusoq kisianni oqaatigisariaqarluni atsaat 1950-ip kingorna
annertunerusimik krĉft-mik nappaateqarneq paasineqarsinnaalersimammat
taamaattumik nunatsinni minnerunngitsumik ukiuni kingullerni nappaatip
taassuma paasineqartarnera annertusiartorsimavoq.
Ukiuni kingullerni puakkut
krĉft-qartarnermik toqquteqartartut ukiumut 30-it missaaniipput. Aammalu
ukiumut nunatsinni toqusartut tallimararterutaat tassa 20 %-ip missaa
naatsorsuutigineqarpoq ukiuni makkunani krĉft-mik toqqutigineqartartut.
Taamaattumik sapinngisamik piaartumik
paasineqarsinnaaneri aammalu sapinngisamik katsorsarneqarsinnaaneri
soorunalimi sulissutiginiarneqartariaqarput, kisiannili taamatut eqqartuinermi
ilaatigut umiarsuaaqqarmik immaqa misissuisinnaanerit
ingerlanneqarsinnaaneranik eqqartuinermi eqqaamasariaqartoq aamma unaavoq,
krĉft-mik misissuinerit paasiniaanerit ajornaatsuinnaanngimmata
ajornaqusoortuuvoq krĉft-mik napparsimalersimasut paasinniffigissallugit, tassa
aaversinnikkut allatigulluunniit amerlanertigut paasinninneq tamanna
ajornakusoorsimavoq nakorsanut, allatullu ajornartumik amerlanerpaatigut aatsaat
inummik pilattaalaarnikkut tamanna sukumiinerusumik paasiniarneqarsinnaalluni
aammalu taamatut misissuinerit nunatsinni paasineqarsinnaangillat
misissorneqarsinnaanngillat aatsaat Danmark-mut aallarunneqarlutik tassani
misissorneqarlutik iluamik paasinniffigineqarsinnaallutik.
Taamaattumik krĉft-mik nappaatinik
paasiniaanerit amerlasuutigut ajornakusoortuupput, ukiuni tulliuttuni immaqa
arlariinni nunatsinni annertuumik qanoq iliuuseqarfigisinnaangisagut, kisianni
qanoq iliuuseqarfigisinnaasagut qanoq iliuuseqarfigisariaqarpagut taamaatumillu
massakkut aamma illissap paavatigut misissuinerit taakkua aallarnisarneqartut
oqaatigineqarpoq.
Aamma naggataatigut tamakkiisumik
oqaaseqarninni oqaatigissavara ulloq manna tikillugu krĉft-mik nappaatelersarnerup
suminngaanniit tunngaveqarnera sumit aallaaveqarnera suli ilisimaneqanngimmat
kisiannili oqaatigineqartarluni tobak tassuunakkut annertuumik
krĉft-qalersittarnernut assigiitsunut arlariinnut annertuumik
pissutaaqataasinnaasoq.
Taamatut oqaaseqareerlunga oqaaseqartut
oqaaseqarfigilaassavakka.
Nuannaarutigivara Siumup
oqaluttuaningaanniit Paarisa pilerseqqinneqarnissaa tuavisaarutigineqarmat
aamma isumaqarfigineqarmat piaartumik piviusunngortariaqartoq, tassa suliassat amerlaqaaq,
sulisussat massakkut amigaataapput, apeqqutit tamakkua sulisoqarnissamut
aningaasatigut allatigullu tunngasut misissuataarneqareernikuupput
piareerqapput tassa ameq apeqqutaaginnarpoq Inatsisartut qaqugu
aningaasaliinissamut piareersimalernissaat.
Atassut-ip oqaluttuaningaanniit
oqaatigineqarpoq immaqa, imaluunniit kikkut, illissap paavatigut
misissortinneqartarnissamik kikkut peqataatinneqartarnissaat eqqaaneqarpoq,
tassani erseqqissaatigilaassavara eqqarsaatigineqarmat naatsorsuutigineqarmat
arnat 20-niit 69-nut ukiullit misissorneqartassasut, ukiut pingasukkaarlugit
tassanilu eqqarsaatigineqarput arnat nunatsinni minnerpaamik ukiunik marlunnik
najugaqarsimasut. Ukiup matuma nikinnerani januar-ip aallaqqaataaniit 1997-mi
arnat taamatut misissortinneqartariaqartut kisinneqarsimapput 16.952-usut,
tassalu naatsorsuutigineqarpoq taakkua naafferartumik ukiut pingasut
ingerlanerini misissorneqartassasut.
Pilersaarutit maannakkumut pissusissamisut
ingerlapput taamaattumik naatsorsuutigilluinnarparput tamanna ukiuamut
pilersaarutigineqartutuut aallartinneqarsinnaajumaassasoq.
Inuit Ataqatigiit oqaluttuaniit Johan Lund
Olsen-mik oqaatigineqarpoq Dronning Ingrid Napparsimavissuani ivianginut
qinnguartaammik Peqqinnissamut Naalakkersuisup oqarneratuut
atortorissaarusiisoqassammat, issuarpara taamatut oqartoqarnera, kisianni tassa
erseqqissassavara oqaatigineqanngimmat taamaattumik pilersitsisoqassasoq
kisiannili periarfissatut, akisoorujussuunngikkaluartutut periarfissatut,
taanna oqaatigineqartoq tikkuunneqartoq, periarfissat ilaattut aammalu taamatut
pilersitsisoqassappat uani oqaatigineqarluni immaqa ukiumut Danmark-mi
pissutsit nunatsinnut imaaliinnarlugit nuussagaanni,
taamaalisoqarsinnaangunanngikkaluartoq, taava ukiumut arnaq ataaseq taamaalilluni,
arnap ataatsip inuunera, eqqanaarneqarsinnaasoq.
Tassa tassunnga tunngatillugu
oqaatigissavara ivianginnut misissuut qinnguartaat mamografi-mik taaneqartartoq
taanna 700.000 - 1.000.000 kr.-nik missaanni akeqarmat, tassa pissarsiarinerinnaa,
taava taassuma qaavatigut aamma nalunngilarput ikkussuunnera aammalu atorneqarnera
aamma akerqartartoq. Kisianni tassa periarfissat ilaattut taanna
oqaatigineqarpoq, oqaatigineqarani massakkorpiaq pilersaarutaasoq
pissarsiarinissaa.
Naggataatigut uanga aamma
erseqqissaqqiinnaasavara uangut Naalakkersuisuni pingaartikkatigu ukiuni
makkunani ajornartorsiutillit, annertunerusumik annikinnerusumilluunniit
artorsaateqartut ilungersuuteqartut, ikiorneqartariaqarmata
periarfissinneqarnerusariaqarmata, soorunalimi pingaaruteqarpoq immitsinnut
tapersersoqatigiissinnaanissaq attattuassallugu, immitsinnut
tuppallersarsinnaanissaq, oqaloqatigiinninnissaq, kisiannili aamma
pisariaqartinneqarsinnaasarpoq ilinniarsimasumik ikiorteqarnissaq, tamannalu aamma
Ataatsimiititaliap imissutigimmagu pimoorunnerusumik misissuataaffigeqqullugu
aamma taanna nuannaarutigalugu.
Josef Motzfeldt, Inuit Ataqatigiit oqaaseqartuat:
Inatsisartunut ilaasortap Maliinannguaq
Markussen Mĝlgaard-ip, ulluinnarni uagut 3-M-mik taasakkatta siunnersuutaata
ilassineqarluarnera, ataatsimiititaliamit aammalu partiinit tamanit, inuttaa
sinnerlugu qujassutigaarput, matumani siunnersuutip siunertaasa
ilagilluinnarpaat tarnikkut peqqissutsip timikkullu peqqissutsip imminnut
ataqatigiilluinnartuunerat, ilaannikkut timikkut nappaataasorisakkagut
paasineqartut najoqqutaralugit tarnikkut nappaateqarnikkut erloqissuteqarnikkut
aallaqqaateqartut paasineqarsimavoq.
Soorunami kisianni taamatut tarnikkut
ilisimatusarsimasunut atorfinititsiortornissakkut siun-nersuuteqartup
siunertaringilluinnarpaa innuttaasut inuppalaartumik
annertoqqusersorqatigiit-tarnitta tamatumannga taarserneqarnissaa. Tamanna
pisariarqartittuassavarput.
Inuit Ataqatigiit-ninngaanniit
arajutsisimanngilarput qujanartumik tarnit pissusaanik ilisimatusartut
inuuttut kalaallit amerlaqimmata arlaqaqimmata naamassinnereersimasullu aamma
qulit missiliulereersimallugit. Taamaattumik isumaqarpunga periarfissaq taanna
tamanna aamma atorluarniartariaqartoq, tarnikkut erloqissuteqartut oqaaseqatiminnik
paasineqarnissaat pingaartorujussuummat.
Oqaluuserisaq naammassivoq.