Oqaluuserisassani immikkoortoq 54-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Pingasunngorneq 4. juni 1997 nal. 10.47
Ataatsimiinnermik aqutsisoq: Inatsisartut Siulittaasuat Jonathan
Motzfeldt.
Maliinannguaq Markussen Mĝlgaard, Siunnersuuteqartoq Inuit Ataqatigiit:
Tassa Kangaatsiamut tunngatillugu.
Kangaatsiap kommuuniani aalisartut piniartullu ukiuni makkunani
ajornartorsiorput ilaatigut ukiuni kingullerni eqqamik aalisagaqarluarsimaqisut
piniangassaqarluarsimaqisullu kommuuneqarfinnik allanik Kangaatsiap
kommuunianik annertunerusumik iluaqutaangitsumik pilersuijuarnera
iluarinagu.Tassami pingaartinneqaraluarmat aamma Kangaatsiami sullivinnik
ataavartunik tunisassiornermik aallaaveqartumik ingerlatsilernissaq.
Taamaattumik siunnersuutigaara Kangaatsiap
kommuuniani nunaqarfiisa eqqai ilanngullugit sunik tunisassiaqarneranik
misissuititsisoqarnissaa. Tunisassiorfinnimi pilersitsisoqaraluarpat kommuunip
aningaasarsiorneranut tamanna annertuumik iluaqutaassagaluarmat.
Taavalu tassunga ilanngullugu siunnersuutinni
saattuarniarneq ingerlalerpat Kangaatsiap kom-muuniata eqqaani umiarsuarmik
tunitsiviliinissaq aamma siunnersuutigivara Anthon Frederik-sen-tulli. Tassa
Kangaatsiami aalisartut benzin-rujussuaq atorlugu Aasiannut assartuinissartik
orniginngimmassuk.
Jakob Sivertsen, Siunnersuuteqartoq, Atassut:
Ukiuni arlaqalersuni puisit amiisa
tunisassiarineqartarnerannut tunngasunik Inatsisartuni
oqaluuserisassanngortitsisarsimavunga, tamatumani piniartoqarfinni piniartut
piniarluni inuus-sutissarsiutip aningaasarsiornermut kiserluinnarmi
toqqammavigineqarnera peqqutigalugu. Ullu-mikkut piniartoqarfinni puisit
amiinnaannik aningaasarsiornermut toqqammaveqarneq eqqar-saatigalugu puisit
amiisa akii appartinneqassagaluarpata tamatuma kingunerissavaa piniarto-qarfinni
ilaqutariippassuit aningaasarsiornerata annertuumik eqqorneqarnerat. Taamaammat
pisariaqarluinnassaaq puisit amiinik avammut niuernerput
aalaakkaasunngortinnagu ammit akiinut nunatta kasseata tapiissuteqartarnissaa.
Taavalu naalisaaqquneqaratta tassunga
ilanngullugu aamma nannut amiisa aasakkut pisarine-qartartut
tuneqqusaannginnerisa aamma aaqqiiffiginiarneqarnissaat amminut
siunnersuuteqar-ninnut ilanngullugu saqqummiukkakku.
Taamaallillunga siunnersuutip toqqammavia
naalisarlugu saqqummiuppara.
Finn Karlsen, siunnersuuteqartoq, Atassut:
Ja, naatsuarannguamik, tassa Narsap
kommuuniani savat meqquisa atorluarneqarnissaat pillugu ataatsimiititaliaq
isumasioqatigiititsisimavoq ukioq 1996-mi peqataatillugit Narsap kommuunia, Nanortallip
kommuunia, Qaqortullu kommuunia, taavalu Savaatillit Peqatigiit Suliqatigiissut
aamma Savaatillit Arnattai, Sulisa,
Savaatillit Siunnersoqatigiivilu. Tassani isumasioqatigiinnermi
isumaqatigiissutigivarput savat meequisa ukiumut 30 tons-it missaanni eqqaannarneqartar- tut
iluaqutiginiarneqarnissaat - tunisassiaralugit.
Taavalu akinut tunngatillugu ukiuni
siullerni imminut akilersinnaanngimmat siunnersuutigisimavara maannakkut ukiut
siulliit tapiissuteqarnikkut savat meqqui tunisassiarineqalernissaat
anguniarneqassasoq, tassa naatsorsuutigaara ukiumut 350.000,- missaani ukiumut
tapiissutigi-neqartassasut.
Tassa taanna naatsuaqqamik
oqaatigeriarlugu, taava siunnersuutimma aappaannut tunngatillugu sinerissap
qanittuani raajarnianut pisassissutit amerlineqarnissaat, nalunngikkaluarlugu
ajorna-kusortorujussuusoq, kisianni uani imannak eqqarsaatigalugu
siunnersuutigaara, misissoqqis-saatariaqartoq raajaqarfinni soorlu pingaartumik
kujataa eqqarsaatigalugu massakkut takune-qarsinnaavoq ukiuni kingullerni
annertoorujussuarmik pisaqarfiusarnera qaffakkiartortoq, massakkullu
pisassiissutigineqartut ukiuni siullerninngaanniit ikileriarnequunerat
tunngaviga-lugit april-ip naaleranut pingasorarterutaannanngoreerput ilaasa
pisassaat, ataasiakkaanillu nalunngisaqarpunga nunguutsereersimasunik, taakkulu
taamatut ingerlalluannassagunik ukua ilaatigut pingasorartannannguisa
nunguutsisussaapput immaqa september-i tikingitsorluunniit, taavalu tamakkua
raajarniat qanoq pineqassanersut eqqarsarnartoqartorujussuummat.
Kujataani taanna raajaqarfik kujataa
eqqarsaatigalugu malunnartumik annertoorujussuarmik alliartorami aamma
pisarineqartartut takuneqarsinnaapput amerligaluttuinnartut taamaammat
inuussutissarsiutit pingaarnerpaataanik oqalulluta misissueqqissaarneq assorsuaq
uanga pi-ngaartikkakku, immaqa misissueqqissaarnikkut pisassiissutit
amerlineqarsinnaagaluartut.
Siverth K. Heilmann, Ataatsimiititaliap Siulittaasua, Atassut:
Inatsisartut Aalisarnermut Piniarnermut
Nunalerinermullu ataatsimiititaliaata isumaliutissiissutaa imaattoq
saqqummiutissavara:
Inatsisartut Aalisarnermut Piniarnermut
Nunalerinermullu ataatsimiititaliaat Inatsisartut 1997-mi upernaakkut
ataatsimiinnerannut atatillugu ulluni 29. april, 14. maj, 15. maj, 21. maj
aammalu 26. maj 1997 ataatsimiittarput.
Aalisarnermut Piniarnermut
Nunalerinermullu ataatsimiititaliap siunnersuutit suliasaanngortin-neqartut
imattumik oqaateqaateqarfigissavai:
Siullermik Jakob Sivertsen-ip puisit
amiisa akiisa appartinnaveersaarneqarnissaat anguniarlugu oqallinnissamik
aammalu Hans Enoksen-ip puisit amiisa piniartunit tunineqartartut isumannaariffigineqarnissaannik
pillugit. Tunngaviatigut siunnersuutit isumaqataanini ataatsimiititaliap
oqaatigissavai, ataatsimiititaliap Great Greenland-ip aammalu KNAPK-p akornanni
ilaatigut puisit amiisa akii pillugit isumaqatigiinniarnerit unittoornerat
nalunngilaa. Ataatsimiititaliap tassunga atatillugu isumaqatigiinniarnermik
pissutsit pillugit illuatungeriinnik taakkunannga marlunnik, kiisalu Aalisarnermut
Piniarnermut Nunalerinermut Pisortaqarfimmit paasissutissanik piniarsimavoq.
Ataatsimiititaliap Naalakkersuisut
kajumissaassavai isumaqatigiinniarnerit nangeqqinneqar-nissaat
sulissutigeqqullugu.
Ataatsimiititaliaq Aalisarnermut
Piniarnermut Nunalerinermullu pisortaqarfimmiit paasissu-tissinneqarpoq Great
Greenland-ip KNAPK-mik isumaqatigiinniarnissamik piginnaatitsissut utaqqigaa,
kisiannili Great Greenland-ip ingerlatitseqatigiiffinngortinneqarnissaanik
suliniar-toqartoq Naalakkersuisunit piginnaatitsissummik
pilersugaasussaanngitsumik.
Tassunga atatillugu ataatsimiititaliap
isumaqatigiissup Naalakkersuisut kajumissaassavai akuliussinnaanertik atorlugu
puisit amiisa akiisa appartinnaveersaartinneqarnissaat eqqarsaatigeqqullugu.
Tamanna tunngaveqartinneqarpoq puisit
amiisa akii appartinneqassagaluarpata piniartut amerlasoorpassuit
aningaasarsiornikkut eqqorneqarnissaannik ataatsimiititaliap paasinninneranik.
Aammattaaq ataatsimiititaliap nalunngilaa ukiunut
missingersuisorfiusunut 1998-imut, 1999-imut aammalu 2000-imut aningaasanut
inatsisimi 1997-imi konto nr. 500716-imi takuneqar-sinnaasoq. Ammit
tunisaanerannut tapiissutit allanngortinneqarani 27,6 mio. kr.-uinnassasoq.
Ataatsimiititaliap isumaqatigiissup kajumissaarutigaa tapiissut taanna
appartinneqassanngitsoq.
Tassunga atatillugu ataatsimiititaliap
nannut amiisa tunisaanerattaaq oqaluuseraa, aammalu tassunga atatillugu
kajumissaarutigissallugu nannut aasami pisarineqartartut amiisa tunisaanerannut
periarfissat pitsaanerulersinneqassasut.
Savat meqquisa tunisassiarineqalerneranni
tunisinermut akinut tapiissuteqartalernissamik Finn Karlsen-ip siunnersuutaa
siunnersuutaa pillugu imatut oqaaseqassaagut.
Tunngaviatigut ataatsimiititaliap
siunnersuut isumaqatigaa. Ataatsimiititaliap nalunngilaa ukiuni kingullerni
Narsami savat meqquinik tunisassiorfimmik pilersitsisoqarsinnaanera
siunertaralu- gu tunngavissanik misissuinernik suliniuteqartoqarsimasoq.
Tamatumunnga uiggiullugu ataatsimiititaliap Narsap Kommunianit Savaatillit
Peqatigiit Suleqatigiissut Qaqortumi savaatilinnut savaatilinnut
siunnersuisoqatigiiffimmit, Sulisa A/S-imit kiisalu Aalisarnermut, Piniarnermut
Nunalerinermullu Pisortaqarfimmit pissarsiarisimavai.
Ataatsimiititaliap nalunngilaa manna
tikillugu savat meqquinik nioqqutissiornermik akilersinnaassuseq angussallugu
ajornakusoorsimaqisoq. Ataatsimiititaliarli isumaqarpoq pisuussutit tamakku
iluaqutigineqanngitsut, manna tikillugu ikuallaannarneqartartartut iluaqutiginiarnis- saat misilinniarneqartariaqartoq.
Peqatigisaanik ataatsimiititaliap eqqumaffigaa ataavartumik tunisinermut
tapiissuteqartoqartarnissaa. Nunarsuarmi niuernikkut suleqatigiiffissuup WTO-p
isumaqatigiissutaanut nunatta pisussaaffiinut akerliussagunarmat. Taanna
naapertorlugu tapee-riaatsit toqqaannartumik nioqqutissiornermut
attuumassuteqartut ukiut ingerlanerini nungutik-kiartuaarneqassapput.
Ataatsimiititaliap tassunga uiggiullugu paasisimavaa illuatungeriinnit
tusarfigineqartunit isumagineqarpoq, misileraanerup pilersitsiniarnerullu
nalaani tapiisarneq savat meqquisa pitsaanerusumik iluaqutiginiarneqarnissaanut
iluaqutaassasoq siunissaq ungasinnerusoq isigaluguttaaq.
Ataatsimiititaliap isumaqatigiissup savat
meqquisa inuussutissarsiutitut iluaqutiginiarneqar-nissaannut
aalajangersimasumik anguniagaqarnissaq isumaqataaffigaa aammalu
Naalakkersui-sunut kaammattuutigissallugu tamatumunnga tapersersueqqullugit.
Tassunga atatillugut savat meqquinik tunisinermut tapiisoqartarnissaanik
pisariaqarpat ikaarsaariarfiup pilersitsiniarne-rulluunnit nalaani. Tamanna
nunatta WTO-p isumaqatigiissutaa malillugu pisussaaffii eqqarsaatigalugit
pisariaqarpoq.
Ataatsimiititaliap aammattaaq inassutigaa
soqutigisaqaqatigiit tassunga tunngasut ilaatinneqas-sasut. Misissueqqaarnerit
nioqqutissiornissamut piareersarnerit aammalu tapiissutit angissusii- sa
aalajangersarneqarnissaat eqqarsaatigalugit.
Sinerissap qanittuani raajarniat
amerlanerusunik pisassinneqartalernissaannik Finn Karlsen-ip siunnersuutaa
aammalu sinerissami raajarniartut pisassaasa amerlineqarnissaannik Hans
Enoksen-ip siunnersuutaa, kiisalu sinerissamut qanittumi raajartassat
amerlisinnaqarnissaannik Lars Karl Jensen-ip siunnersuutaanut imatut
oqaaseqassaagut.
Ataatsimiititaliap isumaqatigiissup
paasivaa sinerissamut qanittumi raajarniartunut aningaasa-qarnikkut
ajornartorsiutaalersinnaammat ukioq imaasiinnartoq, tamakkiisumik
tamakkigajavilluguluunniit ukiumut pisassatit tamaasa pisarereersimagunikkik.
Taamaattumik apeqqut pillugu ataatsimiititaliaq naalakkersuisunut ilaasortamit
aamma Aalisarnermut, Piniarnermut Nunalerinermullu Pisortaqarfimmut
paasissutissanik pissarsisimavoq.
Tamatumunnga atatillugu ataatsimiititaliap
paasivaa aalisartut akunnerminni pisassiissutinik pigisanik pisinissamut
tunisinissamullu periarfissaqartut. Peqatigisaanik aalisartut ukiuni
ataasiakkaani ukiumut pisassanik pisinissamut periarfissaqartut.
Ataatsimiititaliap paasivattaaq Namminersornerullutik Oqartussat massakkorpiaq
pisassanik pigisaqanngitsut ESU aqqutigalu-gu sinerissamut qanittumi
raajarnianut tunniunneqarlutilluunniit tunineqarsinnaasunik.
Siunnersuutit suliarineqarnerinut
atatillugu sinerissamut qanittumi raajarniat ajornartorsiutaan-nut
aaqqiissutaasinnaasutut periarfissat assigiinngitsut ataatsimiititaliap
oqallisigai. Tamatumunnga atatillugu Aalisarnermut, Piniarnermut
Nunalerinermullu Naalakkersuisoq ataatsimiiti-taliap 14. maj 1997
isumasioqatigaa. Ataatsimiititaliap Naalakkersuisunut ilaasortap paasissutissiissutai
ataatsimut isigalugit tusaatissatut tiguai kissaatigaluguli makku
erseqqissaatiginissaanut.
Ataatsimiititalip ilisimaaraa sinerissamut
qanittumut raajartassanut pisassiissutinik pigisallip ataatsip, taakkulu Royal
Greenland A/S-imut tunisimagai. Taamaasilluni Royal Greenland A/S massakkut
sinerissamut qanittumi ukiumut pisassanik pigisaqarpoq, pisortaqarfimmiilli
paasissutissani tiguneqartuni takuneqarsinnaavoq pisassat taakku angallammut
aalajangersimasumut tunngatinneqanngitsut. Tamatumunnga atatillugu ataatsimiititaliap
Royal Greenland A/S-imit ilisimatinneqarpoq sinerissamut qanittumi
raajartassanut pisisutut tunisisutuunngitsoq isigineqartariaqarami.
Tamatumunnga nangissutitut naalakkersuisunut ilaasortap ataatsimiititaliamut
ilisimatitsissutigaa pisassat pineqartut pisiarineqarsimasunut
tunisassiorsinnaassutsip naleqqussarneqarneranut atatillugu
fantailsiliornermut tunisassiassaqarnissaq qularnaarniarlugu.
Ataatsimiititaliap oqallisigaattaaq periarfissaqarnersoq avataasiorluni raajartassat ilaasa sineris-samut qanittumi aalisarnermut nuunneqarsinnaanerat. Ataatsimiititaliap nalunngilaa pisassanik avataanit sinerissamut qanittumut nuussisoqarsinnaanngitsoq. Inatsisartut nr. 18-imi 31. Oktober 1996-imeersumi ' 14 imm. 4-aat naapertorlugu avataasiorluni pisassiissutinik pigisalik pisas-siissutinik pigisaminik ilaannakuusunik tamakkiisumilluuniit arsaaneqarpat tamanna pineqartumut taarsiissuteqarnermik kinguneqassaaq. Ataatsimiititalialli kissaatigaa erseqqissaatigissallugu pisassiissutinik pigisat qaqugorsuarmut pigineqartussanngortitaanngimmata, ukiulli tallimat siumut ilimasaaruteqaqqaarluni atorunnaarsinneqarsinnaallutik.
Tamatumunnga nangissutitut ataatsimiititaliap maluginiarpaa Royal Greenland A/S 13. Maj 1997 ataatsimeersuarnerminut atatillugu oqaatigigaa nunani allani niuerfiit nutaat minnerunngitsu- mik kangia ungasissoq ingammillu Kina aallunniarini.
Ataatsimiititaliaq isumaqarpoq Naalakkersuisut sukumiinerusumik misissortariaqaraat avataasiorluni aalisariutit nunani allani aalisarnermut ikaarsaariarneranni periarfissaqarnersoq aalisariutip taassuma avataani pisassarisimasai ilai sinerissamut qanittumi aalisarnermut nuunneqarsinnaanersut. Ataatsimiititaliattaaq isumaqarpoq tamanna inuiaqatigiit aningaasaqarniarnerat ataatsimut isigalugu iluaqutissaqarsinnaasoq, tassami taamaasiornikkut nunami suliffissuarni suliffissaqartitsiniarneq iluaquserneqaannarani aamma suliffissuarni taakkunani naammassisaqarsinnaassuseq pitsaanerusumik atorneqalissammat.
Naggasiutigalugu ataatsimiititaliap isumaqatigiissut Naalakkersuisunut immikkut pingaartillugu inassutigissavaa TAC qaffanneqarpat sinerissamut qanittumi raajarniarneq salliutinneqaqqullugu. Taamatuttaaq ataatsimiititaliap pingaartittariaqartutut isigaa Naalakkersuisunut kaammattuutigissallugu Inatsisartut inatsisaanni nr. 8-mi 31. Oktober 1996-imeersumi ' 31 imm. 6-at naapertorlugu sinerissamut qanittumi pisassiissutinik pigisanik tunisisoqassappat tamakku inuussutissarsiutinut tapersiisarnermut ataatsimiititaliamut tamarmiusumut tunisineq piviusunngortinneqartinnagu saqqummiunneqaqqaartaqqullugit.
Kiisalu ataatsimiititaliap oqaatigissavaa Naalakkersuisunut ilaasortamit ilisimatinneqaramik aalisariutit qaammataasat atorlugit malinnaavigineqalernissaat Nunat Avannarliit Atlantikumut sineriallit aalisarnermut ministeriisa isumaliutigigaat. Tamatumunnga atatillugu ataatsimiititali-ap kaammattuutigaa tamanna pillugu Royal Greenland A/S APK-lu isumasioqqullugit.
Lars Karl Jensen-ip Inatsisartunut Aalisarnermut Ataatsimiititaliaata aalisagartassiisarnermut sunniuteqarnerulernissaanik siunnersuutaa pillugu imatut oqaaseqassaagut.
Ataatsimiititaliap nalunngilaa pisassiissutini pigisassat pillugit ataatsimiititaliaq suliami inaarsarneqarneranut atasumik atorunnaarsinneqarmat. Aammalu Aalisarnermut, Piniarnermut Nunalerinermullu Pisortaqarfimmit pisassiissutinik pigisanik najoqqutaqarnermi aalisarnerni allani atorneqalernianngitsoq.
Ataatsimiititaliap aammattaaq nalunngilaa TAC-ip pisassiissutillu aalajangersarnissaannut piginnaatitaaneq Inatsisartut inatsisaat nr. 18 31. oktoberimeersoq naalakkersuisuniittoq. TAC pisassiissutillu aalajangersartarnerannut tunngatillugu Naalakkersuisut Aalisarneq Pillugu Siunnersuisoqatigiit aalisartut kattuffiinik kiisalu Aalisarnermut, Piniarnermut Nunalerinermullu Pisortaqarfimmit sinniisunik ilaasortalimmut tusarniartarpaat. Taamaalilluni ataatsimiititaliap nalunngilaa aalisarnermut inatsit naapertorlugu Aalisarneq pillugu Siunnersuisoqatigiinnut ilaasortanngorsinnaannginnini.
Ataatsimiititaliarli isumaqarpoq aalisarnerup inuiaqatigiinnut kalaallinut tunngaviusumik pingaaruteqarnera eqqarsaatigalugu tunngavissaqartoq Aalisarneq pillugu Siunnersuisoqatigiinnut naalakkersuinikkut isummaminnik ilanngussisoqarpat. Tamanna pisuussutinut, pisaqarsinnaassutsip annertussusianut, pisat amerlassusianut aammalu aningaasaqarniarnikkut suliffissaqartitsiniarnermilu pissutsit ataatsimut eqqarsaatigineqarnissaannik tunngaveqartoq. Taamaattumik ataatsimiititaliap isumaqatigiissup Naalakkersuisunut kaammattuutigaa Inatsisartut Aalisarnermut, Piniarnermut Nunalerinermullu Ataatsimiititaliaanni ilaasortamik ataatsimiititaliap nammineerluni toqqagaanik Aalisarneq pillugu Siunnersuisoqatigiit immikkut aggersaalluni ataatsimeeqataasartumik ilaneqarnissaat Aalisarneq pillugu Siunnersuisoqatigiit sulinerannik malinnaasinnaasumik, Siunnersuisoqatigiit TAC pisassallu pillugit Naalakkersuisunut inassuteqaatigisartagaannut sunniuteqartussaanngitsumik.
Suliffeqarfissuup Royal Greenland A/S aalisakkanik suliffissuit ingerlassinnaanngisai ingerlatitsisinnaasunit allanit ingerlanneqarsinnaasunngorlugit periarfissiunneqarnissaannik Lars Karl Jensenip siunnersuutaa imatut oqaaseqarfigissavarput.
Ataatsimiititaliap ilisimaaraa Royal Greenland A/S nunami suliffissuaataasa tunisassiorsinnaassusertik tamakkiisumik atunngikkaat. Ataatsimiititalialli aamma nalunngilaa raajanik tunisassiornermik allat ingerlatsinerat isumaqartariaqanngitsoq nunami suliffissuit naammassisaqarsinnaassusiisa pitsaanerusumik atorneqalerneranik. Peqatigisaanik ataatsimiititaliap nalunngilaa saniatigut pisat pitsaanerusumik iluaqutiginiarneqarsinnaagaluartut igiinnarneqartartut. Ataatsimiititaliaq ilisimatinneqarpoq Royal Greenland A/S allanik tunisassiorsinnaanernut saaffiginnissutit tutsuiginartut ilumoorullugit suliarisarini. Tamatumunnga atatillugu ataatsimiititaliaq isumaqarpoq unammilleqatigiinneq aalisakkanut suliffissuaqarneq ataatsimut isigalugu iluaqutaassasoq.
Taamaattumik ataatsimiititaliap isumaliutigisimavaa allat aalisakkanik tunisassiornermi ingerlatitsinissamut periarfissinneqartariaqannginnersut Royal Greenland A/S nunami suliffissuaammini inuiaqatigiinni pissutsit Royal Greenland A/S-ip Namminersornerullutik Oqartussat aningaasalersugaannik tapiiffigineqartarluni ingerlataasa tunisassiarineqa ajugaanik. Ataatsimiititaliaq isumaqarpoq tassunga atatillugu suliffinnik attartorneq pisinissarlu isumaliuutigissallugit na-leqquttuussasoq.
Ataatsimiititaliap tikkuassavaa allat suliffinnik tamakkuninnga ingerlatitsinissamut periarfissarsissagaluarpata tamanna nutaanik nunami suliffissanik nassataqassanngitsoq, peqatigisaanik Royal Greenland A/S iluanaarniarnissaq siunertarinagu ingerlatitseqatigiiffissuarmut isumagisassanngortinneqartut ilaannit pisussaaffeerutissagaluarpoq. Ataatsimiititaliap soqutiginnittoqartoq nalunngimmagu ataatsimiititaliap isumaqatigiissup inassutigissavaa Naalakkersuisut Royal Greenland A/S-imut sunniuteqarsinnaanertik atussagaat siunertaralugu allat aalisakanik allanik nunami tunisassiorfinnit Royal Greenland A/S-ip inuiaqatigiit soqutigisaat tunngavigalugit ingerlataani Royal Greenland A/S-imit tunisassiarineqanngitsunik tunisassiorsinnaanissamut periarfissinneqarnissaat.
Kangaatsiap kommuniani tunisassiaasinnaasunik misissuisitsinissamik Maliinannguaq M. Mĝl-gaard-ip siunnersuutaa kiisalu Kangaatsiap kommunianut saattuanut tunitsiviliisoqarnissaanut Anthon Frederiksen-ip siunnersuutaa imatut oqaaseqarfigissavagut.
Ataatsimiititaliaq Kangaatsiap Kommuniani saattuanut tunitsiviliinissamut kiisalu misileraalluni aalisartitsinissamut siunnersuummut tunngaviatigut isumaqataavoq. Ataatsimiititaliap innersuussutigissavaa Aalisarnermut, Piniarnermut Nunalerinermullu Pisortaqarfik AMIS aqqutigalugu 1997-imi Kangaatsiap kommuniani misileraalluni arnallunnik saattuanillu aalisarnissamik pilersaaruteqarmat, aammalu tunisassiorfimmik pilersitsisinnaaneq taakku ajunngitsumik inerneqarnissaannik tunngaveqassammat.
Ataatsimiititaliaq aammattaaq pisortaqarfimmit ilisimatinneqarpoq misileraalluni aalisarnissa-mut atatillugu tunitsiviliinissamik pilersaaruteqartoqanngimmat. Tassami misileraalluni aalisarnermit inernerit paasineqaqqaarumaneqarmata. Taamaattorli ataatsimiititaliaq isumaqarpoq Kangaatsiami misileraalluni aalisarneq iluatsissappat tunitsiviliinissaq ilalerneqarsinnaasoq. Taamaattumik ataatsimiititaliap isumaqatigiissup Naalakkersuisunut inassutigaa tamatuma misissorneqarnissaa aammalu isumaliuutigineqarnissaa.
Puisit neqillu allat nioqqutissiarineqarnissaat pillugu Anthon Frederiksen-ip siunnersuutaanut imaattumik oqaaseqassaagut. Ataatsimiititaliap isumaqatigiissup puisit neqaanik tunisassiulersinnaaneq tunngaviatigut isumaqatigaa.
Ataatsimiititaliaq ataatsimut isigalugu isumaqarpoq puisit neqaannik kalaaliminernillu allanik aalisarnermut tapertaasinnaasunik nioqqutissiorneq tapersersornartuusoq. Tassunga atatillugu ataatsimiititaliap innersuussigissavaa suliniutinik maanna aallartitsisoqareermat. Peqatigisaanik ataatsimiititaliap erseqqissassavaa pingaaruteqarluinnarmat tunisassiorfinni puisit uumasullu allat neqaannik tunisassiornermik peqataatinneqartunut tunisassiorsinnaanernut akuersissutit pisa-riaqartut aallartinnginnerni aaqqinneqareersimanissaat.
Puisit neqaannik tunisassiornermut atatillugu ataatsimiititaliap immikkut maluginiarpaa maannakkut Royal Greenland A/S-ip oqartussaaffigisaanik suliniuteqartoqalermat, puisip neqaannik niuernermik tunngaveqarluni tunisassiortoqarsinnaanerannik periarfissaqartoqarneranik takussutissiisussamik. Ataatsimiititaliap tamatumunnga tunngatillugu Naalakkersuisut allattoqarfianit tigusani tusaatissatut tiguai.
Tamatumunnga uiggiutitut ataatsimiititaliap erseqqissassavaa puisit neqaannik tunisassiorneq nunanut allanut niuerneq eqqarsaatigalugu annerusumik soqutiginaateqartutut isigigamiuk. Tamatumunnga atatillugu maluginiarlugu pilersaarutikkut qulaani taaneqartukkut siunertat ilagimmassuk nunanut allanut nioqquteqarnermik tunngaveqarluni tunisassiornissamut periar-fissat misissorneqarnissaat ataatsimiititaliap pilersaarut soqutigalugu malinnaaffigissavaa.
Tamatumunnga uiggiullugu ataatsimiititaliap isumaqatigiissup Naalakkersuisunut inassutigaa Maniitsumi Aalisakkanik Tunisassiornermik Ilinniarfik, ATI, kiisalu Narsami Inuussutissalerinermut Ilinniarfik, INUILI, annertunerusumik pilersaarummut akuliutitinneqarnissaat.
Taamatut oqaaseqarluta ataatsimiititaliap isumaliutissiissutaa Inatsisartunut oqaluuserisassan-ngortipparput. Ataatsimiititaliamilu ilaasortaapput Siumumit Lars Karl Jensen aamma Hans Enoksen, Inuit Ataqatigiinnit Johan Lund Olsen Atassummiillu Otto Steenholdt aamma Sivert K. Heilmann.
Paaviaaraq Heilmann, Aalisarnermut, Piniarnermut Nunalerinermullu Naalakkersuisoq:
Inatsisartut Aalisarnermut, Piniarnermut Nunalerinermullu Ataatsimiititaliaata isumaliutissiissutaa qujassutigaara.
Aalisarnermut, Piniarnermut Nunalerinermullu Ataatsimiititaliap isumaqatigiinneqartumik Jakob Sivertsen-ip aamma Hans Enoksen-ip puisit amiisa akiisa appartinneqannginnissaanik siunnersuutaat oqallisigisimavai, Naalakkersuisullu kajumissaarlugit Great Greenland-ip KNPK-llu akornanni isumaqatigiinniarnerit aallarteqqinneqarnissaat sulissutigeqqullugu.
Tamatumunnga imatut akissuteqassaanga. Aalisarnermut, Piniarnermut Nunalerinermullu Naalakkersuisoqarfimmi sulissutigineqalerpoq Great Greenland-ip Naalakkersuisunit isumaqatiginniarsinnaatitaanerata nalilersoqqinneqarnissaa isumaqatiginniarnerit aallarteqqinnissaat siunertaralugu.
Ataatsimiititaliap isumaqatigiissup Naalakkersuisut kajumissaarpai puisit amiisa akiisa appartinneqannginnissaat, kiisalu tunisanut tapiissutip appartinneqannginnissaat siunertaralugu sunniuteqarsinnaanertik atoqqullugu. Soorlu ataatsimiititaliap nammineq eqqaasitsissutigigaa ukiuni missangersuusiorfiusuni ukiup 2000-ip tungaanut tapiissutit allanngortinneqannginnissaat missangersuusiorneqareersoq.
Taamaaliornikkulli Naalakkersuisut isumaqanngillat tunisinermi maannakkut periaatsit ilaatigut sanngiissuteqartut aalajangiusimaneqaannassasut. Naalakkersuisuni ingerlatseriaaseraarput, soorlumi ataatsimiinnermi kingullermi ammit pillugit nassuiaammi saqqummiunneqartoq, tunisinerup ilusaata ineriartortinneqarnissaa sulissutiginiarlugu, taamaalilluni ammit pillugit nassuiaammi kaammattuutigalugit saqqummiunneqartut piginnaatitaaffiliinermik malinneqar-simapput.
Great Greenland-imut piginnaatitaaffiit suliarineqarneranni pingaaruteqarluinnarsimavoq suliffeqarfimmut tassunga ammit tunineqartartut ataatsimut isigalugit pitsaanerulernissaat. Taamaaliortoqarpoq ilaatigut isumannaarniarlugu amminik mersortarfiit amminik pitsaasunik pisiariumasaannik pissaqartinniarlugit aamma suliffeqarfiup ingerlatsinikkut angusarisartagai pitsaanerulersinniarlugit.
Ukiuni kingullerni amminik mersortarfiit amminik pilersorneqarnertik naammagisarsimanngilaat. Tamanna erseqqissumik saqqummerpoq upernaaq Qaqortumi amminik mersortarfiit pillugit isumasioqatigiinnermi Sulisoqarnermik Naalakkersuisoqarfimmit aaqqissuunneqartumit. Tama-tumunnga peqatigitillugu Naalakkersuisut piginnaatitaaffiliipput tunisinermi pitsaassutsinik naliliisarneq pisariinnerulersinniarlugu, taamaasiornikkut ammit ajornerpaat toqqaannartumik Great Greenland-imut ajunaarutaasartut tunineqarsinnaajunnaarsinniarlugit.
Pitsaassusissatut piumasaqaataasunik kattussinikkut pissusissamisoorpoq naleqquttumik ag-guaqatigiisillugu akigitinneqartussap amminut tunineqartunut atuuttussap nassaariniarnissaa, taamaasiornikkut piniartoq piffissap ingerlanerani aalaakkaanerusumi isertitaqarsinnaalissammat.
Tunisanut tapiissutit aningaasanut inatsimmi annikillisinneqanngimmata piniartut ataatsimut tapiissutitigut aningaasaliiffigineqarput ukiunut siuliinut annikinnerulinngitsumik. Ilisimaneqarluarpoq tunisanut akigititaasut, piniartut pissarsiarisartagaat, ammit pissusiviusutigut tunineqarnerannit nalinganit qaffasinnerummata, aamma ammit pitsaanerpaat kisimik suliffeqarfimmut iluanaarutaasarmata, tassa amminik qitulisakkanik tunisinikkut.
Ataatsimiititaliattaaq nannut amiisa tunisaanerat oqallisigisimavaa. Taaneqanngilaq suna tunngavigalugu taakku oqallisigineqarsimanersut, siusinnerusukkut taariikkattut Naalakkersui-sut Great Greenland KNAPK-mut isumaqatigiinniarsinnaatippaat, taamatuttaaq ammit annikitsuinnarmik iluanaarutaasinnaasut iluanaarutaasinnaanngitsulluunniit pillugit apeqqutip oqallisiginissaanut. Nannut aasakkut pisat amii tamakkununnga ilaapput.
Nannut amiisa meqqui katattarput kajortillutillu. Suliffeqarfimmilu aasakkut pisat amii tunineqarsinnaanngitsutut nalilerneqartut ukiut ingerlanerini amerlisimaqaat. Tassa taakku allarluinnartut atorneqarsinnaaffiinnik nassaartoqanngippat tunineqarsinnaanngillat. Paarlattuanik ukiuk- kut pisat amii iluanaarutissatut naleqarput. Tamanna takuneqarsinnaavoq aasakkut pisat ukiukkullu pisat amiisa akimikkut assigiinnginnerisigut. Taamaammat Naalakkersuisut isumaqarput Great Greenland amminut tunitsiviusinnaasumik sallerpaatillugu nassaarniartariaqartoq, tassa nannut aasakkut pisat amiisa tunisaaqqilersinnaanissaannut allanik aqqutissiortoqalersinnagu, aamma nunarput sapinngisamik tunisassiassanik pitsaasunik tunisisartunut nittarsaattussaammat.
Inatsisartunut ilaasortap Finn Karlsen-ip savat meqquisa tunisassiarineqalerneranni tunisinermut akinut tapiissuteqartalernissaamik siunnersuutaanut ataatsimiititaliap inassuteqaataani pingaarnernut Naalakkersuisut isumaqataapput. Taamaalilluta isumaqataaffigaarput meqqut inuussutissarsiutigalugu iluaqutigineqalernissaannik siunnerfilimmik suliniuteqartoqartariaqarmat. Naa-lakkersuisunittaaq isumaqatigarput taamatut siunertanut tapiissuteqartoqarsinnaanera tunisassiornermut tunngatillugu aammalu ataavartumik tapiissuteqartarnertut ilusilerneqartariaqanngimmat, tamannami nunarsuarmi niueqatigiinnermut suleqatigiiffissuup WTO-p isumaqatigiissutaanut akerliussammat.
Taamaattorli Naalakkersuisut suliniutinut siunnerfilinnut ikiorsiisoqarsinnaanissaa erseqqinnerusumik misissorumavaat, tassa siullermik kalaallit savaataasa meqquinik tunngaveqarluni pitsaasumik assigiimmillu pitsaassusilinnik tunisassiortoqalernissaanut sunniuteqaqataasinnaa-sumik. Taamatut aallartitsisoqarnissaa pingaaruteqarpoq, tunisassiassat assigiinngiiaartut pitsaassusillit tunineqartartut piviusorsiunngitsumik tunngavigineranniit.
Naalakkersuisut taqqavani arlalinnik suliniuteqartoqarnerat ilisimaaraat. Tassa aaqqissuussaanerusumik iluaquteqalernissamik aallartitsiniarlutik annertuumik soqutiginnittunik aamma ataatsimiititaliap kissaatigisaa maluginiarparput soqutigisallit attuumassuteqartut ingerlaqqittoqarneranut peqataasariaqarnerannik. Tamakku tunngavigalugit suliaq ingerlateqqinneqassaaq taamaalilluni suliniummik eqqarsaatigilluakkamik paasiuminartumillu suliaqartoqarsinnaaqqullugu, meqqut inuussutissarsiutigalugu iluaqutigineqalernissaanut tunngaviusumut ajornartorsiutaasut aaqqinniarlugit.
Inatsisartunut ilaasortat Finn Karlsen-ip, Lars Karl Jensen-ip Hans Enoksen-illu sinerissamut qanittumi raajartassat amerlisinneqarnissaannut siunnersuutaannut Naalakkersuisut imatut oqaaseqaateqassapput.
Naalakkersuisut nuannaarutigalugu paasivaat erseqqinnerusumik nassuiaat ataatsimiititialiap tusaatissatut tigugaa. Raajanut TAC-ip pisassiiffinni aalisariutinut avataasiutinut sinerissamullu qanittorsiutinut agguaanneqartarneranut tunngaviatigut malittarisassat imaapput; aalisariutit assigiit akunnerminni ukiumut pisassiissutinik pisassiissutinillu pigisanik niueqatigiissinnaallutik annertunerusunik pisassiissutinik pissarsiumagunik.
Kiisalu Naalakkersuisut uppernarsaasinnaapput pisassiissutinik akuersissutinik pigisalinnut ataasiakkaanut pisassiissutigineqartut piffissaa killiligaanngitsumik piginnaatitsissutaammata. Kisiannili taakku sivikinnerpaamik ukiunik tallimanik siumut ilisimatitseqqaarluni piffissaat killeqartitaalersinnaallutik. Aalisarnermut, Piniarnermut Nunalerinermullu Ataatsimiititaliap isumaliutissiissummini taavaa Royal Greenland A/S oqarsimammat nunanut allanut niuerfinnik nutaanut nassaarniarluni, pingaartumik Asiap kangiani pingaartumillu Kina-mi tuniniaavimmi. Tamanna imatut paasineqassanngilaq Royal Greenland A/S-ip kilisaatimi avataasiutit ilaat, assersuutigalugu nunat allat imartaani itisuumi aalisariartilerai. Tamatumani taamaallaat siunertarineqarmat nunanut allanut asiap kangianiittunut tunitsivissanik nutaanik nassaarniarnissaq.
Aalisarnermut, Piniarnermut Nunalerinermullu Ataatsimiititaliap pingaartillugu kissaatigaa Naalakkersuisunut inassuteqaatigissallugu TAC annertusineqalissagaluarpat sinerissamut qanittumi raajarniartut salliutinneqassasut. Tamatumunnga Naalakkersuisut Aalisarnermut, Piniarnermut Nunalerinermullu Ataatsimiititaliamut erseqqissumik ilisimatitsissutigissavaat TAC pillugu NAFO-p ilisimatuussutsikkut siunnersuisoqatigiivinit Pinngortitaleriffik aqqutigalugu Naalakkersuisunut siunnersuisoqartarmat isumalluutinik misissuinerit Kalaallit Nunaata aalisarnikkut oqartussaaffiani ingerlanneqartut tunngavigalugit.
Kalaallit Nunaata kitaani raajap pillugit siunnersuisoqartarpoq raajaqassuseq tamaat eqqarsaatigalugu, tassa nunap isuanit aalisarnerup avannarpasinnerpaamik killeqarfianut, sinerissamut qanittumi taamatullu avataani. Tassami isumaqartoqarmat raajat uumasoqatigiiusut immikkoortut ataatsit. Taamaalilluni raajanik aalisarneq ataatsimut isigalugu siunnersuuteqartoqartarpoq, taamalillunilu tamanna aalisariutinut aalajangersimasunut aalisarfinnulluunniit ataasiakkaanut sammitinneqartarani. Taamaammat Naalakkersuisut isumaqarput taamaallaat TAC qaffanneqarsinnaasoq NAFO ilisimatuussutsikkut siunnersuisoqatigiivisa siunnersuinerat malillugu.
TAC-mik qaffaanikkut taamaallaat aalisariutit aalajangersimasut iluaquserneqassappata taanna periaatsimik 1994-imiilli atorneqartumik allanngortitsinerussaaq. Naalakkersuisuni isumaqar-pugut taamatut allanngortitsisoqassappat pisariaqartoq pingaarutilinnik oqimaatsunillu pissutis-saqartoqartariaqassasoq. Taamatuttaaq taamatut aalajangiisoqalersinnagu kattuffiit tamarmik peqataasariaqarput.
Aalisarnermut, Piniarnermut Nunalerinermullu Ataatsimiititaliattaaq taavaa pingaartittariaqarlugu Naalakkersuisut kajumissaarlugit Namminersornerullutik Oqartussat Inatsisartut peqqussutaanni nr. 8 31. oktober 1996-imeersumi ' 31 imm. 6 naapertorlugu sinerissami qanittumi pisassiissutinut pigisanik tunisaqassappata tunisineq piviusunngortinneqalersinnagu tamanna Inuussutissarsiutinut Tapersiisarnermut Ataatsimiititaliamut tamarmiusumut saqqummiunneqaqqaartassasoq.
Tamatumunnga tunngatillugu Naalakkersuisunit oqaatigissavarput Naalakkersuisunit akuersaarsinnaammassuk Inuussutissarsiutinut Tapersiisarnermut Ataatsimiititaliaq pisassiissutinit pigisat tunineqaqqinnissaat pillugu inassuteqaammik nassuissaqartassasoq, tassa tamanna pillugu Naalakkersuisut aalajangiilersinnagit.
Kiisalu Naalakkersuisunit nalunaarutigissavarput Aalisarnermut, Piniarnermut Nunalerinermullu Naalakkersuisoqarfimmit aalisariutit qaammataasat aqqutigalugit nakkutigineqalernissaat sivitsulersumi sulissutigisimammagu. Tamatuma siornatigut naalakkersuisoqarfimma aalisartut suleqatigalugit tamanna oqallisigisimavaa, kisiannili qaammataasatigut suliniutaasut naammassineqarnissaat inaarsarneqarnissaallu utaqqimaarsimallugu. Taamaalilluni nunarput tamakkuninnga atuisutut ilanngussinnaaniassammat. Tamatumunngattaaq tunngatillugu ilisimatitsissutigissavara qaammataasat atorlugit kalaallit aalisariutaannuinnaq atuutissanngimmat, kisiannili eqqarsaatigineqarluni atuutilersinneqassasoq imaalillugu nunani allamiut aalisariutaat Kalaallit Nunaata aalisarnikkut oqartussaffiani aalisartut tamarmik, taamanikkussamut Kalaallit Nunaanni aali-sarsinnaanermut akuersissutinik nakkutilliisoqarfimmit qaammataasatigut nakkutigalugit malinnaavigineqarsinnaanngorlugit.
Inatsisartut Aalisarnermut, Piniarnermut Nunalerinermullu Ataatsimiititaliaata aalisagartassiisarnermi sunniuteqarnerulersinnaanissaanik Inatsisartunut ilaasortap Lars Karl Jensen-ip siunnersuuteqarneranut taamatuttaaq siunnersuuteqartup Aalisarneq pillugu Siunnersuisoqatigiinnut ilaasortaatitaqalernissamik kissaataanut tunngatillugu Naalakkersuisunit makkunannga erseqqissaateqassaagut.
Ukiakkut ataatsimiinnermit aalisarneq pillugu inatsisip allanngortinneqarneranut atatillugu Inatsisartut inatsisaanni nr. 18 31. oktober 1996-imeersumi ' nutaaq ilanngunneqarpoq, tassani imatut allassimalluni: A' 32. Naalakkersuisoq, Aalisarneq pillugu Siunnersuisoqatigiinnik pilersitsissaaq aalisarnermik soqutigisaqaqatigiiffinnik kiisalu Aalisarnermut, Piniarnermut Nunalerinermullu Pisortaqarfimmit peqataaffigineqartumit. Imm. 2 Naalakkersuisut suliassani '-ini 5, 7, 9, 10, 11, 13, 18, 20, 22 aamma 23-imut tunngasuni aalisarneq pillugu siunnersuisartoqatigiit tusarniartassavaat@. Aalisarneq pillugu Inatsisartut inatsisaanni taamaalilluni aalajangersarneqarpoq kikkut Aalisarneq pillugu Siunnersuisoqatigiinni ilaasortaasinnaanersut. Taamatullu erseqqissarneqarluni Naalakkersuisoqarfiup Aalisarneq pillugu Siunnersuisoqatigiit suliassani aalajangersimasuni tusarniartassagai.
Naalakkersuisuni isumaqarpugut Aalisarneq pillugu Siunnersuisoqatigiinnut Aalisarnermut, Piniarnermut Nunalerinermullu Ataatsimiititaliap peqataatitaasartutut attaveqalernissaa Aalisaneq pillugu Siunnersuisoqatigiit naalakkersuinermik suliaqartunut siunnersuinissamut kiffaanngissuseqarnerannik equgasumik takussutissiissasoq. Taamaakkaluartoq Naalakkersuisut apeqqut Aalisarneq pillugu Siunnersuisoqatigiinnut oqaluuserisassanngortinniarpaat.
Suliffeqarfissuup Royal Greenland A/S-ip aalisakkanik suliffissuit ingerlassinnaanngisai ingerlatsisinnaasunut allanut ingerlanneqarsinnaasunngorlugit periarfissarsiuteqqullugit Lars Karl Jensen-ip siunnersuutaanut imatut oqaaseqaateqassaanga.
Aallaqqaasiullugu erseqqissassavara Royal Greenland A/S aktieteqarluni ingerlatseqatigiffittut ingerlanneqarmat, tassa imaappoq nammineerluinnarluni aningaasaqarnikkut inatsisitigullu immikkoorluni. Inoqassappat ingerlatseqatigiiffeqassappalluunniit Royal Greenland A/S-ip suliffissuaataanik tigusiniarlutik ingerlatsiniarlutilluunniit soqutiginnittunit taamatut saaffiginnittoqartussaavoq Royal Greenland A/S-imut. Tamatumunnga atatillugu Royal Greenland A/S nalunaaruteqarpoq suliffissuarnik pisinissamik tigusinissarluunniit pillugit ingerlatseqatigiiffik pimoorussamik saaffiginnissummik suli tigusaqarsimanngitsoq.
Nunatsinni raajanik suliffissuaqarnermi tunisassiornermut atortulersuutit pigineqartut affaannaat ilisimaneqartutut iluaqutigineqarput Royal Greenland A/S suliffissuaataanik pisisoqassagaluar-pat tunisisoqassagaluarpalluunniit Royal Greenland A/S-ip isumaa malillugu nana tamaat eqqarsaatigalugu tunisassiassat taamatullu suliffissat annertusinavianngillat. Taamaammat Naa-lakkersuisut isumaqarput uagut naalakkersuinikkut aalisarnerup pisariillisaavigineqarnissaanik nukissagut atornerusariaqarigut ilaatigut aalisakkatigut periarfissat allat eqqarsaatigalugit, taamalu nunatsinni tunisassiorneq suliffissaqarniarnerlu annertusisillugit.
Nunaqarfinni tunisassiorfiit eqqarsaatigalugit tunisassiorfiit taakku Namminersornerullutik Oqartussat isumaqatigiissuteqarfigalugit Royal Greenland A/S-imit ingerlanneqarput. Tunisassiorfiit tamakku Royal Greenland A/S-imit iluanaarutigalugit ingerlanneqarsinnaanngimmata Namminersornerullutik Oqartussat tunisassiorfiit tamakku ingerlanneqarnerannut akiliuteqartarput.
Nunaqarfinni tunisassiorfiit ingerlanneqarnerat pillugu isumaqatigiissummi Namminersorne-rullutik Oqartussat aamma Royal Greenland A/S 1995-imi tunngaviusumik isumaqatigiissuteqarput ilaatigut 1997-ip tungaanut ilanngullugulu ingerlatitsinissamik isumaqatigiissuteqarnermut atatillugu naatsorsuutitigut tunngaviit isumaqatigiinniarnermut ilanngunneqassannginnerannik kinguneqartussamik. Royal Greenland A/S-imut tunngaviusumik isumaqatigiissut 1997-ip naanerani atorunnaassaaq ilaatigut tamanna tunngavigalugu pilersaaruteqarpunga suleqatigiisitaliussallunga ilaatigut suliassaqartussamik Namminersornerullutik Oqartussat nunaqarfinni tunitsiviit ingerlanneqarneranni tapiissutaasa allatut atorneqarsinnaanerannik periarfissanik misissuisussanik. Kiisalu nunaqarfinni tunisassiorfiit ullumikkut taamaallaat tunitsivittut atorneqartut atorneqalernissaannik periarfissanik misissuisussamik.
Kangaatsiap Kommuniani tunisassiaasinnaasunik misissuinissamik Maliinannguaq M. Mĝlgaard-ip kiisalu Kangaatsiap kommuniani saattuanut umiarsuarmik tunitsiveqalernissaanik Anthon Frederiksen-ip siunnersuutaanut imatut oqaaseqarfigissavakka.
Kangaatsiap kommuniani tunisassiaasinnaasunik misissuisitsinissamut periarfissat pillugit siunnersuummut tunngatillugu oqaatigisinnaavara Aalisarnermut, Piniarnermut Nunalerinermullu Pisortaqarfik aalisarnikkut misileraanermut ineriartortitsinermullu suleqatigiisitaliaq, AMIS, aqqutigalugu ulluni makkunani Kangaatsiap kommuniani nipisanniarluni misileraanermik ingerlatseruttulermat. Kommunimi tassani misileraalluni aalisarneq pitsaasumik angusaqarfiussappat tamatuma kingornatigut kommunimi tunisassiornermik aallartitsinissamut periarfissat naliliivigineqarsinnaassapput. Arnarluit suallit, tassa nipisat, saattuallu misileraalluni aalisarneqarnerisa saniatigut ukioq manna eqqarsaatigalugu kommunimi misileraalluni aalisarnissanik allanik pilersaaruteqartoqanngilaq, siunissami kommunimi misileraalluni aalisartarnissat eqqarsaatigalugit Naalakkersuisut isummamut ilaliisinnaapput, tassa tamanna pillugu toqqarlugit siunnersuutinik saqqummiussisoqassagaluarpat.
Saattuanut umiarsuarmik tunitsiviliisoqarnissaanut Anthon Frederiksen-ip siunnersuutaanut tunngatillugu oqaatigissavara angallammik tunitsiviliisoqarnissaanik periarfissat misissorneqarsimammata. Misissuinikkut ilaatigut ukioq kingulleq Kalaallit Nunaata kujataani umiarsuarmik tunitsiviliinikkut misilittakkanik tunngaveqartumik paasisat erseqqipput. Umiarsuarmik tunitsiviliineq aaqqineruvoq akisooq ajornartorsiutitaqartorlu, sivikitsuinnarmik periarfissaqarluni aallartinneqarsinnaanngitsoq tamatumunnga ilanngunneqassaaq taamatut aaqqiineq aalisartu- nut peqataasunut naammanginanngitsuusoq paasinarsigajummat.
Taamaammat ukioq manna ilaatigut Kangaatsiap eqqaani saattuaqqassusianik misissuinerit allatut ittut aallartinneqassapput. Tamatumani atorniarneqarput angallatit nutaaliaasut naleqqussakkanik aalisarnermut allanillu atortulersukkanik, minnerunngitsumik saattuat sivisunerusumik angallammiititarnissaanik periarfissaat pitsanngorsarniarlugit. Taamaaliornikkut aalisartut peqataasut periarfissaat isumannaarniarneqassapput aamma suliffissuarni pigineqareersut, aningaasaqarneq eqqarsaatigalugu, naammaginartumik pitsaassusilinnik tunisisarnissamut periarfissat pitsanngorsartinneqalissallutik. Taamatut suliniuteqarnerup kingunerissavaa angallatinut peqataasunut annertungaatsiartumik tapiissuteqartoqartarnissaa.
Ilanngutissavara Kangaatsiap kommunia tamakku pillugit ilisimatinneqareermat. Kiisalu ataatsimiititaliap puisip neqillu allat tunisassiarineqarnissaannik Anthon Frederiksen-ip siunnersuutaa suliarisimavaa. Naalakkersuisuni isumaqarpugut tamakkununnga tunngatillugu suliniutaasut ingerlareersut kalaalimerngit tunisassiassallu allat pillugit nassuiaammi ataatsimiinnermi matumani siusinnerusukkut saqqummiunneqartumi paasissutissiissutigineqartut. Paasivarpullu immikkoortumi tassani ataatsimiititaliap inerniliineri Naalakkersuisut siunissami suliassatut kaammattuutigisaannit allaanerunngitsut.
Taamaalillunga neriuutigaara Aalisarnermut, Piniarnermut Nunalerinermullu Ataatsimiititali- ap isumaliutissiissutaa tamakkiisumik oqaaseqarfigisimassallugu.
Lars Karl Jensen, Siumup oqaaseqartua:
Inatsisartunut ilaasortat arlaqartut oqaluuserisassatut siunnersuutaat aallaavigalugit ataatsimiiti-taliap isumaliutissiissutaanut Naalakkersuisut akissuteqaataat sanilliussutigalugu Siumumit imatut oqaaseqarfigissavagut.
Jakob Sivertsen-ip puisit amiisa akiinik appartitsinaveersaarnissamik siunnersuutaanut taama-tullu Hans Enoksen-ip puisip amiisa piniartunit tunineqartartut isumannaariffigineqarnis- saannut siunnersuutaanut ataatsimiititaliap inassuteqaatai Siumumit taperserpagut.
Maannakkut ammit akii appatsaaliorlugit tapiissuteqartarneq ukiunut tullernut isumannaariffiusimagaluartoq Siumut isumaqarpoq ammit pitsaassusia najoqqutariinnarlugu, tassungalu taarsiullugu ammit nr. 1-imik aamma nr. 2-mik taagorneqartut agguaqatigiisillugu assigiimmik akeqartinneqalerpata tamatuma kingunerissagaa ammit pitsaanerpaanissaata angunissaa tunisisumit anguniassallugu maannakkornit annikinnerulissasoq. Tamannalu amernik pisiortornermut Kalaallit Ammeriviannut amernik suliaqarluni pitsaasumik avammut nioqqutissiornermut, minnerunngitsumillu tamanna aamma piniartukkormiut aningaasaqarnerannut sunniuteqarnerlussaaq.
Siumup Naalakkersuisut inassuteqarfigissavai amernik tunisisut eqikkarlugit annikillilernissaannut aammalu ammit akiisa isumaqatiginniutigineranut atatillugu, tamatumani nannut aasakkut pisat tunineqarsinnaanerat ilanngullugu, isumannaatsumik illugiinnillu akuersaarneqarsinnaa-sumik tamatuma aaqqiivigineqarnissaa Naalakkersuisuninngaannit suliniuteqarfigeqqullugu.
Finn Karlsen-ip Narsami savat amiinik pisiortorluni tunisassiornerup tapiissuteqarfigineqarnissaanik siunnersuutaanut Siumumit ataatsimiititaliap inassuteqaataa taperserlugu inassutigissavarput savat amiinik nioqqutissiorneq aallartippat qiviunik suliaqarnermi ineriartortitsineq ingerlanneqassasoq tamatumani aamma umimmaat qiviuvi ilanngullugit.
Sinerissap qanittuani raajarniartut pisassaasa amerlineqarnissaanik ilaasortat pingasut Lars Karl Jensen-ip, Finn Karlsen-ip Hans Enoksen-illu siunnersuutaannut Siumumit maluginiarparput tassunga atatillugu ataatsimiititaliaq periarfissanik assigiinngitsunik misissuereerluni inner-suussuteqartoq. Sinerissamut qanittumi pisassanik ESU aqqutigalugu utertitsisoqarnerani tamakkua agguaateqqinnerat ataatsimiititaliami susassaqartumit suliniuteqarfigineqassasoq. Tamatumani pisassanik ajornartorsiortut ESU-mut akilersuinerminni malinnaaniarnissaat siunertaralugu.
Naalakkersuisullu akissuteqaataanni malugaarput sinerissap qanittuani pisassat imaluunniit raajartassat tamarmiusut annertussusiligaanerata, TAC-mik taasartakkatta, qaffaavigineqarnissaat ullumikkorpiaq periarfissaqanngitsoq. Tamanna tunngavigalugu Siumumit Naalakkersuisunut inassutigissavarput TAC-p qaffanneqarnissaa qaquguluunniit arlaatigut periarfissaqalerpat ullumikkut sinerissamut qanittumi aalisariuteqassutsimut nunamilu suliffissuarni suliassaqartitsinermi ajornartorsiutaasut isiginiarlugit aaqqiiviginissaat salliutinniaqqullugu.
Inatsisartut Aalisarnermut Ataatsimiititaliaata aalisagartassiinermut sunniuteqarnerulernissaanik Lars Karl Jensen-ip siunnersuutaanut tunngatillugu Siumup maluginiarpaa ataatsimiititaliap isumaqatigiissup Aalisarneq pillugu Siunnersuisoqatigiit ataatsimiinneranni alaatsinaattutut aallartitaqarnissaanik kaammattuutaa Naalakkersuisut periarfissaqartinnagu oqaatigigaat. Siumumit isumaqarpugut Aalisarnermut Ataatsimiititaliap ulluinnarni sulinermini pisariaqartikkaa aalisariuteqassuseq suliffissuarnilu suliassaqarsinnaassutsip isummerfiginiarnerani sinerissap qanittuani avataasiornermilu pisassanik isiginiagaqarluni suliassat isummerfigisarnissaat ataatsimiititaliamit pingaartinneqartoq.
Tamanna tunngavigalugu Siumup Naalakkersuisunut inassutigissavaa ataatsimiititaliap Aalisarneq pillugu Siunnersuisoqatigiinnut alaatsinaattumik aallartitaqarsinnaanera periarfissaqarnersoq misissorluaqqullugu.
Suliffeqarfissuup Royal Greenland A/S-ip aalisakkanik suliffissuit ingerlassinnaanngisai allanit ingerlanneqarsinnaanerata periarfissarsiunneqarnissaanik Lars Karl Jensen-ip siunnersuutaanut tunngatillugu Siumumit oqaatigissavarput maannakkut Royal Greenland A/S-ip suliffissuisa tunisassiornermut naleqqussarnerat aallaavigalugu suliffissuit atorluarneqarnerunissaat isumalluarfigigatsigu. Tamatumunngali tunngatillugu inassutigissavarput siunnersuuteqartup taasaatut ittumik Royal Greenland A/S saaffigineqassaguni Naalakkersuisut oqarnerattut tamanna Royal Greenland A/S-imit ammaffigeqqullugu.
Ataatsimiititaliap isumaliutissiissutaani tikkuartorneqartut nunaqarfinni tunitsiviit allatut aaqqisuussiffigalugit namminersortutut ingerlanneqarsinnaanerat Siumup soqutiginaateqartutut isumaqarfigaa, pisuussutit atorluanngisatta tunisassiarineqarsinnaanissaat siunertaralugu, tamatumallu sulissutigineqarnissaa inassutigalutigu.
Kangaatsiap kommuniani tunisassiassanik misissuisitsinissamik Maliinannguaq M. Mĝlgaard-ip siunnersuutaa aammalu Kangaatsiap eqqaani assagiarsunnik tunitsiviliisoqarnissaa pillugu Anthon Frederiksen-ip siunnersuutaa taamatullu aamma Anthon Frederiksen-ip puisit neqillu allat tunisassiarinissaat pillugu siunnersuutaanut tunngatillugu Aalisarnermut, Piniarnermut Nunalerinermullu Ataatsimiititaliap isumaliutissiissutaa aammalu Naalakkersuisut akissuteqaataat imminnut naapertuummata annertunerusumik oqaaseqarnata saqqummiunneqartunut isumaqataanerput nalunaarutigaarput.
Naggataatigut Siumumit inassutigissavarput Kangaatsiap eqqaani pisuussutit uumassusillit tunisassiornermi toqqammavigineqarsinnaasut misissuiffigineqarnerat sukumiisumik AMIS aqqutigalugu ukiuni aggersuni annertusarneqassasut.
Aalisarnermut, Piniarnermut Nunalerinermullu Ataatsimiititaliap isumaliutissiissutaa ilassil-luarlugu taamatut oqaaseqarluta tusaatissatut tiguarput.
Otto Steenholdt, Atassutip oqaaseqartua:
Inatsisartut Aalisarnermut, Piniarnermut Nunalerinermullu Ataatsimiititaliaata isumaliutissiissutaa Aalisarnermut, Piniarnermut Nunalerinermullu Naalakkersuisup ersarissumik akissuteqarfigisimagaa Atassummit oqaatigissavarput.
Ataatsimiititaliamut ilaasortatut uanga oqaatigissavara qulaani taaneqartut marluk ukiuni suliffiusuni paaseqatigiissumik ingerlaarnerat assut iluarisimaarnartuusoq. Siunnersuutit aqqanillit, oqarta tamualluarneqareersimasut, maanna Inatsisartunut saqqummiunneqarput.
Puisit amiinut tunngasut Jakob Sivertsen-imit, Hans Enoksen-imillu saqqummiunneqarsimasut qujanartumik ersarissumik akineqarsimapput. Paatsuugassaanngilarmi piniarnerinnarmik inuuniuteqartut akissarsiutituaasa akii appaaffigisariaqanngimmata. Eqqarsaatigeriartigit inuit qaammammut aalajangersimasumik akissarsiallit, qanoq akissarsiamikkut minnerpaanngua-milluunniit appaaffigineqassagaluarunik qanupilorujussuaq naammangittaalliortassagaluarpat. Aamma inuit taamatut akissarsiaqartut tamatigut piumasarisarpaat pisiassat akitsortarneri ilutigalugit akissarsiatik tamatigut qaffaaffigineqartassasut. Ila, soorluuna pissusissamisuussa-galuartoq ammit akii aamma ukiut tamaasa pisiassat akiinut naleqqussarlugit qaffaaffigitsiartassagaluaraanni.
Atassummit paasilluarparput soorunami ammit pitsaasut pisisup iluanaarutigisinnaasani suli amerlisikkumammagit. Amminillu pitsaasuunngitsunik, oqarta soqutigisaarukkiartorluni. Atassummit isumaqarpugut Great Greenland-ip ammit suli amerlanerit pissarsiariniartariaqarai, pingaartumik mersortarfinnut pilersuutissanik, amminik suliaralugit akilerluarsinnaasunik pissaqartittuassagunigit.
Atassummit paasilluarsinnaavarput mersortarfiit ammit pisiatik pillugit naammangittaalliortarsimammata. Kinami nuannaajallassava kusanartumik kavaajaliorniarluni amernik mamaartunik pisitinneqarsimassagaluaruni. Ammit aamma allat, soorlu nannut amii, akisuumik tuniumagaluarnermik ukiorpassuarni ammerivimmiitiinnarneqartarnerat inissaminiissasorinanngilaq, allaat soorlulusooq asiutserlugit tassani tigummiusaaraat. Suli atorsinnaaneranni ammerivinnut tunineqartarniarlik kusanartuliassanngorlugit, tamakkununnga soorlu ilaasinnaapput nannut aasakkut pisarineqarsimasut amii. Soorunami tamatta nalunngilluinnarparput piniakkat suulluunniit amii ukiukkut pitsaanerusarmata, taamaattumik ammit taamaattut akisunerusarneri tupaallannartuunngilaq.
Inatsisartut Aalisarnermut, Piniarnermut Nunalerinermullu Ataatsimiititaliaat paasisassarsiorluni ukioq manna kujataani savaateqarfinnut angalaarsimavoq. Tamatsinnut angalaqataasimasunut tupaallannartuuvoq savat amerpassui meqqorpassuilu taama amerlatigisut eqqaannarneqartut paasilerlugu, uffalu aappaatigut nalunagu nunatta ilaani, soorlu avannaani, taama oqortussaaleqineqartigisoq.
Paasinarpoq silarsuarmut avatitsinnittumut savat amiinik meqquinilluunniit tuniniaasinnaanerput ajornartorsiormat nunat allat savaateqarluartut tuniniaanerat unammillersinnaannginnatsigu. Taamaammat savat nunatsinneersut amii meqquilu uagut nammineq nunatsinni iluaqutiginerusariaqarpagut. Taamaalillutalu Finn Karlsen-ip Atassumminngaanneersup siunnersuutaa ilalerparput.
Miserratigissanngilarput ilikkajasunik nunatsinni arnartaqaratta. Savap amia meqquiluunniit takuinnarunikkit sunngorsinnaanerinik pilersaarusioreertartunik. Meqqunik qissineq amerlanerit imaasiallaannaq ilikkarsinnaavaat, nuersagassanillu imannaannaq, oqarta namminneq atugassaminnik, pilersitsiortulersinnaagaluarlutik. Isuma manna Atassummit eqqarsaatigillaqquarput; soorlu savat amii meqquilu taamaatsiinnarlugit katersoriarlugit avannamut tunumullumi nassiussorneqarsinnaanerpat, nassiussorneqarnerannullu aki kisiat akigitillugu piserusuttunut pisiariortortillugit. Nalunngilarput katersorniarneri, pingaartumillu savaatillit eqqarsaatigalugit eqqumiigissagaat, amminik sulisinneqarnertik tunniussuinertillu, assartuinertik, akissarsissutigissanngikkunikku eqqumiigilluinnassagaat. Kisianni eqqarsaatit suugaluartulluunniit tamarmik misissorneqartariaqalerput. Uagut kalaallit ileqqorinnginnatsigut atorsinnaasunik eqqaaneq.
Taama eqqarsaatersortilluta suliffeqarfiit marluk eqqarsaatitsinniipput tassalu; Neqi A/S aammalu Meqquleriffik A/S. Qanoq ililluta taakku ikiortigilluarlugit savat meqquisa amiisalu imannarsuaq eqqaannarneqarneri iluaqutissanngorlugit siunissami qanoq iliuuseqarfiginiarlugit suliniuteqartariaqalerpugut.
Ataatsimiititaliap sinerissamut qanittumi raajartassat pillugit paasinnittumik suliarinnissimanera Naalakkersuisumit aamma ilassineqarpoq, oqaatigalugulu nassuiaatip ataatsimiititaliamit tusaa-tissatut paasinnittumillu tigusimagaa. Tamatumunngali aamma tunngatillugu Atassummit Naalakkersuisunut inassutiginiarparput kujataani qanoq raajaqassuseq misissuiffigitiniaqqullugu. Tassa uagut Atassummit eqqumiigilluinnaratsigu qanga soqarluanngitsumik nalilerlugu taasaq maanna raajaqanaarlugu aalisariutinit assigiinngitsunit ussagarfigineqaleraluttuinnarmat. Imaassinnaavoq misissuinerup takutikkaa tamaani annertunerusumik raajarniarsinnaaneq tunngavissaqartoq, allaat immaqa pisassat amerlatsilaarsinnaanerannik kinguneqaratarsinnaasumik. Kisianni taamatut oqarpugut nalunngikkaluarlugu Atassumminngaannit taanna TAC-imik taaneqartartoq, amerlanerpaamik annertunerpaamik pisarineqarsinnaasut taama taasarmatigit, taamaallaat qaffanneqarsinnaasoq atlantikup avannaani aalisarnikkut kattuffissuaq NAFO-mik taaneqartartoq, ilisimatuussutsikkut siunnersuisoqatigiivisa siunnersuinerat malillugu.
Atassummit ilassilluarparput ataatsimiititaliap siunnersuutaa; Inuutissarsiutinut Tapersiisarnermut Ataatsimiititaliaq pisassiissutinik pigisat tuniniarneqaqqinnissaat pillugu inassuteqaammik nassiussaqartassasoq Naalakkersuisunit akueriumaneqarmat.
Aalisariutit qaamataasat atorlugit nakkutigineqalernissaat pilersaarutigineqartoq paasivarput. Tamanna uagut aalisariutaatitsinnuinnaq atorani aammali nanami allamiut sumi aalisarnerannik nakkutilliisuussammat Atassummit ajoriffissaqartinngilarput, naak nalunngikkaluarlugu aamma Qallunaat Nunaanni aalisartut taamatut nakkutigineqarnissaminnut sakkortuumik akerliugaluartut. Kisiannili isumaqarpugut nakkutilliilluarnerup unioqqutitsinani aalisarnissaq nunatsinni pingaartitarput tamatumuunakkut iluaquserneqarsinnaasoq.
Ataatsimiititaliap aalisagartassiisarnermi sunniuteqarnerulernissaanik Lars Karl Jensen-ip siunnersuutaata erseqqissumik Naalakkersuisut tungaanninngaannit nassuiarneqarsimanera Atassummit naammangalugu annerusumik oqaaseqarfigissanngilarput. Naalakkersuisulli paa-sinnillutik siunnersuisoqatigiinnik, tamannarpiaq pillugu, oqaloqateqarusunnerat naammagisimaarparput.
Aammattaaq Lars Karl Jensen-ip siunnersuutaa suliffissuit atorneqaratik napaannartut qanoq atorneqarsinnaanerannik imalik Naalakkersuisut ersarissumik akisimagaat paasivarput. Aalisarnermulli Ataatsimiititaliap isumaqatigiissutip, ukiup matuma naanerani, atorunnaarnissaa iluatsillugu Naalakkersuisut pilersaaruteqarnerarlutik akissumminni oqarnerat Atassummin-ngaannit ilalersorparput.
Aap, qineqqusaarneq taamaattarpoq. Qeqertarsuarmiit aalisaat ninginneqarsinnaavoq qapersil-lugu Kangaatsiap tungaanullu siatsillugu, ajunngilaq tassa taama pisarpugut.
Kangaatsiap kommuniani tunisassiaasinnaasunik misissuilersimaneq qamannga pisumik tikilluaqquarput, neriulluta misissuineq ima iluatsilluartigissasoq suliffimmik pilersitsinissamik kinguneqalersinnaalluni. Umiarsuarmik tunitsiviliisarneq ukiorpanni atorsimasarput, misilittagaqarfigilersimavarput. Soorunami iluaqutaasarneri pitsagigaluarlugit akisuallaartarsimaneri uniffigaagut. Qujanaqaarli periaasissanik allanik, tassa angallatinik nutaaliaasunik angisoorsuunngikkaluartunik, atortoqarsinnaalerneq Naalakkersuisup tamakkununnga taarsiullugu innersuussutigisinnaalersimammagu.
Naggasiullugu puisit neqaasa suli atorluarneruneqarnissaannik siunnersuutaasimasumut aamma Naalakkersuisut akissutaat naammagisimaarparput. Neriulluta suliniarneq qangali aallartereersimasoq iluatsikkuartussasoq. Tamannami ersarissumik nassuiarneqareersimammat, tassa saqqummersinneqarsimammat nassuiaat ima ateqartoq: Kalaalimerngit tunisassiassallu allat pillugit nassuiaat.
Atassummit siunnersuutit aqqanillit ataatsimiititaliami sukumiisumik suliarineqarsimasutut nalilerlugit ataatsimiititaliaq sulilluarsimasutut nalilerparput.
Johan Lund Olsen, Inuit Ataqatigiit oqaaseqartuat:
Inatsisartunut ilaasortaaqatitta arfinillit siunnersuutaat pillugit Aalisarnermut, Piniarnermut Nunalerinermullu Ataatsimiititaliaq peqqissaartumik, aammalu tusarniagassat arlallit isumasiorfigisareerlugit isumaliutissiissusiorsimavoq Inuit Ataqatigiit ataatsimut isigalugu tapersersorsinnaasatsinnik. Taamatuttaaq Naalakkersuisut isumaliutissiissummut akissuteqarlutik arlalitsigulli ataatsimiititaliap isummerfigisimasaannut akerliullutik tikkuagaqarput, taakkuuppullumi ma-tumani pingaarnerutillugit Inuit Ataqatigiinnit sammisassagut.
Ingerlavallaartinnangali erseqqissassavara Inatsisartunut ilaasortat ataasiakkaat siunnersuutigi-simasaannut tunngatillugu tamaviisa ataasiakkaarlugit matumani samminiannginnatsigit isumaliutissiissutikkut Inuit Ataqatigiinniit taakkununnga isummiussagut aamma ersarereeqimmata.
Ataatsimiititaliamit pingaartuutillugu ilaatigut puisit amiisa akigineqartarnermikkut appartinnaveersaarneqarnissaat siunertaralugu Naalakkersuisunut oqariartuuteqarniarsimavugut, tassa Inuit Ataqatigiinnut aamma pingaaruteqarluinarsimammat aningaasanut inatsit aqqutigalugu ammit tunisaanerannut tapiissutit allanngortinneqaratik ukioq manna ukiuni tulliuttuni 27,6 mio kr.-inut tagginneqarsimanerat aalajangiusimaannarusukkatsigu.
Tamanna pisariaqarpoq ilaqutariippassuit puisit amiinnaanerusoq isumalluuteqarlutik naammaginalaarsinnaasumik inuussutissaqarnissaat qulakkeerniaraanni aammalu eqqaamanialaaraanni puisit amiisa nunatta avataani tunisaanerat suli imatorsuaq aamma qaffariaateqarsimanngimmat. Ataatsimiititalialli inassuteqaatigisaannut illuatungiliillutik Naalakkersuisut Great Greenland aqqutigalugu aalajangiusimaannarniarpaat tunisinermut maannakkumut periaatsit allanngortinneqassasut, tassa pitsaassusiliisarneq eqqarsaatigalugu piumasaqaatit kattunneqarnerisigut akigitinneqartalertussaq taamaasilluni agguaqatigiisitsinikkut aalajangerneqartalissammanngooq.
Inuit Ataqatigiit qularaarput taamak iliulernikkut ammit pitsaanerpaat pissarsiarineqartalissanersut, tassami piniartup naak-una pitsaanerpaaginnarnik ameerniarlernissaminut kajumissaatissaa agguaqatigiisitsinerinnakkut aalajangerneqareersimasumik ameerniutigisartakkaminik akilerneqartalissappat, maannamut allaat akikinnerusumik akilerneqartussanngorneratigut. Akimmi agguaaqatigiisitsinerinnakkut nassaarineqarsimasumik aalajangersaavigineqartalissappata pini-artup taamaallaat isumagiinnartussaalissavaa ameerniutissami amerlanerpaatinniaannarnissaat pitsaassuseq isumakuluutigivallaarnagu, tassami pitsaassusiliisarneq najoqqutaralugu akilerneqaatigisaraluani kisiannili maanna appartinneqarnerisigut annaasussannguleramigit angummanniapiluuginnartunngortinneqalerpoq, soorunami siusinnerusukkut isertissinnaasaraluani aamma matussuserniarlugit.
Taamaattumik puisit amiisa tunisaanerat isumaqatigiinniarnerillu unittooqqasut eqqarsaatigalugit Inuit Ataqatiginniit Naalakkersuisut sakkortuumik inakkusussavagut isumaqatigiinniarnerit nangeqqinneqarnissaat sulissutigineqaqqullugu, tamatumanilu aamma puisit amiisa akiisa appartinneqannginnissaat anguniarneqaqqussallutigu, siuliani pitsaassusiliisarnermut oqaasereriikkagut aamma innersuussutigalugittaaq.
Sinerissap qanittuani raajartassiissutit eqqarsaatigalugit ataatsimiititaliap isumaliutissiissutigisamini tikkuartugai Inuit Ataqatigiit tamakkiisumik tapersersoratsigit oqaatigissavarput, aammalu tassunga tunngatillugu uparuanngitsoorusunnginnatsigu Naalakkersuisut aalisariutip avataasi-ortup ataatsilluunniit raajartassarisimasaasa ilaannaataluunnit sinerissamut qanittumut nuunneqarnerisigut inuiaqatigiit ataatsimoortumik aningaasaqarniarnerannut iluaqutissartarisinnaasai pillugit tigussaanerusumik tamanna oqaaseqarfiginngimmassuk, tassami taamaaliornikkut nunami suliffissuarni suliffissaqartitsiniarneq iluaquserneqaannarani aamma suliffissuarni taak-kunani, tassa Royal Greenland A/S-ip ingerlataani, naammassisaqarsinnaassuseq maannamit pitsaanerusumik aaqqiivigineqarsinnaagaluarmat, tamannaavormi Royal Greenland A/S-ip nammineq ujartugaa.
Ataatsimiititaliap raajartassiissutigineqartartunut maannamit annerusumik ilaatigut Aalisarnermut Siunnersuisoqatigiit aqqutigalugit malinnaatinneqarsinnaaqqullutik noqqaassuteqarnerat Naalakkersuisunit tunuarsimaarfigineqarmat tamanna Inuit Ataqatigiit ajuusaarutigaarput, tassami taamaallaat kissaatigineqaannaraluarmat malinnaatinneqartuarnissarput, aammalu ataatsimiititaliaq aqqutigalugu alakkarterisinnaanissarput.
Tamanna tunngavigalugu ajornarsaarisoqaannassappallu Inuit Ataqatigiinniit maannangaaq ilimasaarutigeriissavarput aalisarnermut inatsisip tassuunarpiaq allanngortinneqarsinnaanissaa ukiamut ataatsimeeqqilernissatsinnut sukumiisumik nalilersuutigiumaaratsigu.
Taamatullu Inuit Ataqatigiit ataatsimiititaliap isumaliutissiissutigisaanut, minnerunngitsumilli Naalakkersuisut tassunga illuatungilersuillutik oqaaserisaannut tikkuagaqarluta neriuutigissa-varput matumani taakkartukkagut nalilersueqqinnissani aamma ilaatinneqarumaarmata.
Bjarne Kreutzmann, Akulliit Partiiat:
Isumaliutissiissummi pineqartut ataatsimut
eqikkarlugit oqaaseqarfigissavakka. Puisit amiisa akiisa appartinneqarnissaannut,
tassa 27,6 mio. kr.-inik, tapiissuteqarnissamut tunngatillugu, tapiissutit
appartinneqarnissaannut Inatsisartut Aalisarnermut, Piniarnermut
Nunalerinermullu Ataatsimiititaliaata inassutaa Akulliit Partiiata taperserpaa.
Savat meqquisa tunisassiarineqarneranni
tunisinermi akinut tapiissuteqartarnissamik siunnersuummut tunngatillugu
ataatsimiititaliap inassuteqarnermini tunuliaqutaa Akulliit Partiiata paasivaa,
tassa savat meqquisa tunisaaneranni tapiissuteqartarnermi eqqumaffigisariaqartut
WTO-mik isumaqatigiissumi nunatta pisussaaffii.
Sinerissamut qanittumi raajartassat
amerlisinneqarnissaannut siunnersuummut tunngatillugu Namminersornerullutik
Oqartussat ilisimatitsissutaat tusaatissatut tiguarput, tassa sinerissamut
qanittumi raajarnianut Erhvervsstĝtte aqqutigalugu tunniunneqarsinnaasunut
tunineqarsinnaasunilluunniit ullumikkut peqartoqanngikkallarpoq. Akulliit
Partiiata paasivaa avataasiorluni raajartassat sinerissamut qanittumi
aalisarnermut nuunneqarsinnaanngitsut kissaatigineqarlunili taama
aaqqiisoqarsinnaanissaa misissuiffigineqassasoq.
Akulliit Partiiata isumaqatigilluinnarpaa
Naalakkersuisut Royal Greenland A/S sunniiviginiartariaqaraat, tassa
aalisakkat Royal Greenland A/S-imit tunisassiaanngitsut, allanit tunisassiarineqarsinnaanissaannut
periarfissiinissamut.
Imm. 12-ip oqallisiginerani Akulliit
Partiiata erseqqissarpaa saattuarnernermi pisariaqartinneqartoq isumaqartugut
tassaasoq saattuat tunisaaneranni nunat tamat piumasarisaat pissuitigalugit
umiarsuarmik tunitsiveqarnissaq. Taamaattumik nuannarutigaara paasillugu
ataatsimiititaliap tassunga tunngatillugu inassutaa taanna takuneqarsinnaalluni
Inatsisartunut ilaasortap Maliinan-nguaq M. Mĝlgaard-ip aamma Anthon
Frederiksen-ip siunnersuutaanut atatillugu isumaliutissiissummi allassimasoq.
Puisit neqaasa tunisassiarineqarnissaannik
siunnersuummut tunngatillugu Royal Greenland A/S-ip ataani suliniutinik
aallartitsisoqareersimaneranik paasissutissiissut tusaatissatut tiguara.
Anthon Frederiksen, Kattusseqatigiit:
Inatsisartunut ilaasortat Hans Enoksen-ip
aamma Jakob Sivertsen-ip siunnersuutaat puisit amiinut tunngasut
Kattusseqatigiinnit paasilluarlugit Aalisarnermut, Piniarnermut Nunalerinermullu
Ataatsimiititaliap kajumissaarutaa, tassalu ammit tunisaanerannut tapiissutit
appartinneqannginnissaat tapersersorparput. Kisiannili akit
isumaqatigiinninniarnermut unittooqqasut Naalakkersuisut minnerpaakkulluunniit
akulerutsinneqarnissaat eqqarsarnartoqartillutigu. Tassami
isumaqatiginninniarnerit naalakkersuinikkut naqisimaneqanngitsumik
ingerlanneqar-tarnissaat pingaaruteqarmat.
Inatsisartunut ilaasortap Finn Karlsen-ip
siunnersuutaanut tunngatillugu Naalakkersuisut kajumissaarutaat taperserparput.
Kiisalu Inatsisartunut ilaasortap Hans Enoksen-ip, Lars Karl Jensen-ip Finn
Karlsen-illu siunnersuutaat, tassalu sinerissap qanittuani raajarniat
amerlanerusunik pisassinneqartalernissaannut tunngasut Kattusseqatigiinnit
tapersersorpagut. Minnerunngitsumik nunami suliffissaqartitsiniarneq
eqqarsaatigalugu, aammalu sinerissap qanittuani ukiuni kingullerni
pisassiissutit avammut annertuumik nussorneqarsimanerat eqqarsaatigalugu. Maannakkut sinerissap qanittuani pisassiissutit
amerlineqarnissaanut arlalitsigut akimmiffissaqaraluartoq taamaattoq
Aalisarnermut, Piniarnermut Nunalerinermullu Ataatsimiititaliap
Naalakkersuisunut inassuteqaataa aamma Kattusseqatigiinnit taperserparput.
Inatsisartunut ilaasortap Lars Karl
Jensen-ip siunnersuutaa, tassalu Aalisarnermut, Piniarnermut Nunalerinermullu
Ataatsimiititaliap aalisagartassiisarnermut sunniuteqarnerulernissaanut
tunngasoq, Kattusseqatigiinnit isumaqatiginngilarput. Tassami isumaqaratta
Aalisarneq pillugu Siunnersuisoqatigiit aamma aalisartut kattuffiannit ilaasortaaffigineqartut
naalakkersuinikkut annerusumik akuliuffigineqarnatik suliassaq ajunngitsumik
naammassisinnaagaat.
Royal Greenland A/S-illu aalisakkanik
suliffissuit ingerlassinnaanngisai pillugit siunnersuummut tunngatillugu
Kattusseqatigiinnit ataatsimiititaliaq isumaqatigaarput oqarmat
unammilleqatigiinneq aalisakkanut suliffissuaqarneq ataatsimut isigalugu
iluaqutaasoq, kisiannili eqqaamasariaqarpoq ukiualuit matuma siornatigut
aalisakkanik tunisassiortut namminersortut arlallit ingelatsisimagaluarput,
kisiannili inuiaqatigiit pigisaannut suliffeqarferujussuarnut unammillerneq
saperamik uniinnartariaqarsimapput. Taamaattumik tunisassiorfiit pineqartut
aalisakkanut atornagit neqinut, timmissanut kalaaliminernullu
atorneqarsinnaanerat orniginarnerussaaq.
Kattusseqatigiinnit siunnersuutinnut
tunngatillugu aammalu Inatsisartunut ilaasortap Maliinan-nguaq M. Mĝlgaard-ip
siunnersuutaanut tunngatillugu, nuannaarutigaara Kangaatsiap kommuniani
aalisartut annertuumik ajornartorsiuteqartut matuma kingorna qanoq
iliuuseqarfiginiarneqarmata, naak aallaqqaammut saattuarniarnermut
tunitsiviliisoqassanngikkaluartoq, kisianni misileraanerit siunniunneqartut
isumalluarnartoqarmata.
Aammalu puisit neqillu allat pillugit
tunisassiarineqarnissaat pillugu, ilaatigut kalaalimerngit tunisassiassallu
allat, pillugit nassuiaat oqaluuserineqarmat oqaaseqaatigut
innersuussutigalugit isumaliutissiissut tusaatissatut tiguarput.
Paaviaaraq
Heilmann, Aalisarnermut, Piniarnermut Nunalerinermullu Naalakkersuisoq:
Qujassuteqarfigissavakka partiit tamaasa,
aammalu Kattusseqatigiit, ersarissumik Aalisarnermut, Piniarnermut
Nunalerinermullu Ataatsimiititaliap isumaliutissiissutaanut Naalakkersuisullu
akissutitsinnut oqaaseqaataannut.
Partiit ataasiakkaarlugit oqaaseqarfigissagukkit
Siumumit aallartissaanga. Siumuminngaannit puisit nannullumi amiisa
isumaqatigiinniartut illuatungeriit naapiteqqinneqarnissaat pillugu
Naalakkersuisut sulissuteqarnissaannik kaammattuivoq, tamannalumi aamm ammit
pillugit isumaqatigiinniarnissamut tunngatillugu, maannakkut soorlu
oqaatigigipput, isumaqatigiinniarnissamut piginnaatitsissut taanna
nalileqqikkipput, aammalu nutaamik piginnaatitsissummik, qularnanngitsumik
Ammerivimmut tunniusseqqittussaassagatta.
Savat amiisa umimmaallu qiviui pillugit
ineriartortitsineq ingerlanneqassasoq taaneqarpoq. Aamma suleqatigiisitaqartoq
Narsami, taakku aamma peqatigalugit taassumap ingerlateqqinnissaa
timitalerniarlugulu sulisoqarnissaa soorunami Naalakkersuisunit aamma
kaammattuuteqarumaarpugut.
Sinerissamut qanittumi raajartassat
pillugit akissuteqaatigut ataatsimut isigalugu Siumuminngaannit tusaatissatut
tiguneqartut paasivakka. Kisiannili aamma paasillugu periarfissaqassappat TAC-p
qaffanneratigut qanoq ilisamik sinerissamut qanittumi aalisartut, raajarniat,
salliutinneqarsinnaanerat misissoqquneqarpoq. Taanna soorunami
misissussavarput, kisiannili aamma maannamut periusaagallartut, soorlu aamma
akissuteqarnitsinni oqaatigigipput, periarfissaqartitsinerat killeqarpoq.
Kisianni taassumap allanngortinneqarsinnaanera qanoq ilillugu misissuiffigissallugu
nalilersussavarput.
Aalisarneq pillugu Siunnersuisoqatigiinni
alaatsinaattumik Aalisarnermut, Piniarnermut Nunalerinermullu
Ataatsimiititaliap inissisimasoqarnissaa pillugu isumaqarpunga Naalakkersuisut
mattussivinngitsut, oqariartuutitsinni akissuteqaatitsinnilu. Tassa Aalisarneq
pillugu Siunnersuisoqatigiit aperissallugu neriorsuutigaarput, tassanilu
akissutigineqartut tunngavigalugit Naalakkersuisuni nalilissavarput
Aalisarnermut, Piniarnermut Nunalerinermullu Ataatsimiititaliap
alaatsinaattutut inissisimalernissaa. Uanga takusinnaasakka malillugit
massakkorpiaq periarfissaqarsinnaanera soorluuna ajornavissanngitsoq,
kisiannili taaseqataasinnaasutut, soorluli Anthon Frederiksen-ip taagaa,
inissisimasoqalernissaa taanna sapinngisamik tunuarsimaarfigerusukkipput
Naalakkersuisunit ersarissumik oqaatigaarput.
Nunaqarfinni tunitsiviit pillugit
Aalisarnermut, Piniarnermut Nunalerinermullu Ataatsimiititali-ap
malinnaatinneqarnissaa neriorsuutigissavara, soorlu oqaatigiginga
suleqatigiisitaliamik pilersitsisoqassasoq, taassuma nunaqarfinni tunitsiviit
tunisassiorfeeqqallu siunissami maannakkuminngarnit annertunerusumik
atorneqarsinnaanerat misissuiffigalugu suleqatigiissitamik pilersitsisussaagatta.
Atassummit oqaatigineqartut
arlalialunnguit aamma oqaaseqarfigilaassavakka. Ammit pitsaassusii
soqutigigaat aamma Atassummit erseqqissumik paasivara. Tamannalu pillugu
Naalakkersuisunit isumaqatigiinniartussanut piginnaatitsissummi aamma tamanna
siunniullugu isumaqatigiinniarfigineqartussat, tassa KNAPK,
naapissutaasinnaasumik aaqqiisoqarnissaa soorlu periarfissaqassasoq, ilaatigut
KNAPK-p ataatsimeersuarnerani peqataaninni apeqqarissaarnermi aamma tamatumap
naaperiarfigineqarsinnaanera eqqartorneqartoq taaneqarmat. Tamannalu
nuannaarutigaara illuatungeriit aalajangersimasumik uninngaannaratik
naaperiarfeqarsinnaanerannik periarfissiisoqartoq takusinnaagakku.
Nannut amiisa, pingaartumik aasami pisaasimasut,
tunisassiarineqarsinnaanerat arlaatigut periarfissiisoqarnissaa
misissuiffigissavarput. Ajornakusuussaaq massakkut imaaliinnarluni qanoq
aaqqiivigineqarsinnaassanersut. Kisianni Naalakkersuisut pingaartippaat
tunisassiat pitsaasut aamma nunaut allanut, pingaartumik nannut amii
ingerlanneqartarmata, salliutinneqassasut, pingaartinneruneqassasut.
Kisiannili periarfissaqassanersoq nannut aasami pisaasimasut amii
misissuiffigineqassaaq.
Savat amii meqquilu tunisassiassatut
periarfissarsiunneqarnissaat, aamma soorlu siusinnerusukkut taagiga,
ingerlassaaq. Aammalu tamatumani ilisimasallit tassani suliaqassasut
qularutiginngilara, aammalu soornami tamanna pissusissamisoorpoq,
ilisimasallit taanna suliarippassuk uagut naalakkersuinikkut tunngavissanik
periarfissarsiuussissaagut suliat taakkua ingerlannerannut.
Atassummit aamma kujataani raajaqassuseq
misissorneqassasoq kissaatigineqarpoq. Oqaatigissavara naliliisarneq
maannakkut imatut pisarmat sineriak tamaat, kujataa, avannaa, sinerissamut
qanittoq avataalu Pinngortitaleriffimminngaannit ingerlanneqartarpoq. Tassani
paasissutissat aalisartut tunniussaat, biologit namminneq misissugaat
tunngavigalugit peqassutsimik naliliineq pisarpoq. Sumiiffinni ataasiakkaani
peqassuseq nalilerneqarneq ajorpoq, sineriak ataatsimut tamaat isigalugu
naliliisoqartarpoq, aammalu isumaqarpunga taannaasoq isigineqartariaqartoq
ataatsimut pisassanik siunnersuuteqarnermi aalajangiinermilu annertussusissaat
eqqarsaatigalugu. Taamaammat inassutigissavara taamatut pissuseqarneq allatut
pissusilersornissamik tunngavilerniarneqassanngitsoq, tassami ataatsimut
isigalugu sineriapput, raajaqassuseq eqqarsaatigalugu,
isiginiarneqartariaqarmat. Aammalu taakkunannga atuinerput ataatsimut isigalugu
nalilerneqartariaqarluni.
Aalisarneq pillugu Siunnersuisoqatigiit
oqaloqatigineqarnissaanut, tassalu ataatsimiititaliap tassani alaatsinaattutut
inissisimalernissa pillugu, Atassutip iluarisimaaraa paasivara.
Apeqqutit allat erseqqissumik
Naalakkersuisunit akineqarsimanerattut nalilerlugit Atassutip oqaaseqarnerani
soorunami qujassutigissavara.
Inuit Ataqatigiinnanngaannit
oqaatigineqartut imatut oqaaseqarfigissavakka. Ammit pitsaassusaat
qaffanniarlugu KNAPK-mut Ammerivimminngaannit isumaqatigiinniarneq soorunami
oqareernittut aaqqiviginiarsarivarput, isumaqatigiissullu massakkut
nutarternissaanut tunngatillugu piginnaatitsissutip naapitseriummik
immerneqarnissaa, taamatut oqartoqarsinnaappat, soorunami Naalakkersuisut
piumassuseqarfigaat.
Amminut tapiissutit eqqarsaatigalugit
Naalakkersuisunit oqaatigissavarput soorluuna isumaqartoqartoq puisinut
tapiissutit millisinniarneqartut, taamaanngilaq. Puisit amiinut tapiissutit
ukiuni kingullerni amerliartuinnarsimapput, aatsaallu taama ukioq manna puisit
amiinut tapiissutit annertutigissapput, tassa katillugit 34,6 mio. kr.-it
atugassanngortinneqarmata. Taamaattumik paasiuminaatsilaarpara soorlulusooq
annilaangasoqartoq Naalakkersuisut pilersaaruteqartut puisit amiinut
tapiissutinik appaaniartoqartoq, taamaattoqanngilaq. Illuatungaatigut
Naalakkersuisut ukiuni tulleriiaani arlalinni puisit amiisa tunineqarnerannut
tapiissutit allisikkiartorsimavai, Inatsisartut akuersisinneratigut. Tamanna
aamma Naalakkersuisunit soorunami Inatsisartuni partiinut tamanut qujassutigissavarput,
tamakkumi piniartukkormiunut iluaqutaapput.
Raajat pisassiissutit aammalu taakkua
angallatit assigiinngitsut, tassa avataasiutit aammalu sinerissamut qanittumi,
avinneqarsimanerat nikisinneqarnissaa pillugu Inuit Ataqatigiit oqaaseqarnera
imatut akissavara; Aalisarnermut, Piniarnermut Nunalerinermullu
Ataatsimiititaliap Inuit Ataqatigiinnit paasinninnerulluni tamassumap apeqqutip
maannakkut pissusiusut eqqarsaatigalugit uninngavigigallarnissaat, taama
paasigakku. Kisiannili arlaatigut periarfissaqassagaluarpat, pisassiissutit
immaqa qaffannerisigut, periarfissaqarnersoq misissuiumalluta oqarpugut.
Kisianni oqarsinnaanngilanga massakkut sutigut allannguinitsigut pisassiissutit
allineqassagaluarpata aalisariutinut aalajangersimasunut amerleriaatit taakku
immikkoortinneqarnissaat. Kisianni periarfissaqarnersoq misissorumavarput.
Kisianni imaanngilaq taanna akuerigipput imaluunniit itigartikkipput.
Tunngavissaasut taamanikkussamut pisassiissutinik alliliisoqassagaluarpat
apeqqutaajumaarput.
Aamma Inuit Ataqatigiinnut
innersuussutigissavarput siusinnerusukkut akissutiga Aalisarneq pillugu
Siunnersuisoqatigiinnut Aalisarnermut, Piniarnermut Nunalerinermullu
Ataatsimiititaliap alaatsinaattutut inissisimatinneqalernissaanut tunngatillugu
akissutigisakka.
Akullit Partiiannut oqaatigissavara
erseqqissumik naatsumillu oqaatigisaanut qujassuteqassagama.
Kattusseqatigiit ammit pillugit
isumaqatigiinniarnerit siusinnerusukkut taasakka innersuussutigissavakka.
Naalakkersuisut akuliuttarput pissutigalugu Ammerivik piginnaatitsissummik
tunisaramikku Ammerivik isumaqatiginninniarsinnaassammat, taamaattumik
piumanngikkaluaruttaluunniit aamma ilaatigut pissutigalugu puisit amiinut
tapiissutinut Inatsisartut Naalakkersuisut ulluinnarni aqutaanni,
tapiissuteqartarnera pissutigalugu pinngitsoornata akuleruttussaavugut.
Taamaattumik naalakkersuinikkut akulerukkusunngikkaluaruttaluunnit
akuleruttussaavugut aammalu neriorsuutigivara Ammeriviup, KNAPK-p tungaanut
isumaqatiginninniarnissamini, siusinnerusukkut piginnaatitsissut
pissarsiarisimasaa taassumap aaqqiivigineqarnissaa naapitsissutissanngorlugu
Naalakkersuisuni suliarissagatsigu. Taamaammat saneqqussinnaanngilarput
akulerunnissarput.
Kattusseqatigiinnut akissuteqaatit allat
partiinut allanut tunngatillugu oqaatigisakka innersuus-sutigissavakka.
Aammalu Inuit Ataqatigiit oqaaseqartuannut
Johan Lund Olsen-imut erseqqissaatigissavara Royal Greenland A/S-imut aammalu
APK-mut tusarniaasimagatta. Pisassiissutit avataasiummik ataatsimik peersinikkut
pisassaasalu sinerissamut qanittumut aalisartunut tulaassuisunut nuunneqarneratigut
qanoq kinguneqartitsisoqarsinnaanersoq.
Inuit Ataqatigiit oqaluttuat oqaraluarpoq
nunami suliffinnik pilersitsinikkut aammalu sulisunik amerlanerusunik sulisoqalissasoq
aammalu aningaasat pissarsiarineqartussat annertunerulissasoq. Kisianni
nalilersuinitsigut aammalu Royal Greenland A/S-imi APK-milu
nalilersuisitsinitsigut tamanna illuatungaanik paasivarput. Erseqqissumik,
assersuutigalugu Royal Greenland A/S-ip akissutaa imaattoq, oqaatigissavara;
Kilisaat ataaseq 3.200 tonsinik pisassaqartoq taakku pisassaat, tassami
pigisarimmatigit, minnerpaamik 200 mio. kr.-inik akeqassapput
pisiarissa-gaanni. Tassa kiilumut 38 kr.-it massakkut ulluni makkunani
niueqatigiittarnermut aallaaviusartoq. Taassuma saniatigut arsaarinninnermik
naleqartumik, tassa aalisarsinnaajunnaarnermut taarsiissutissanik, aningaasanik
pissarsiariaqassaagut. Taassuma saniatigut aamma aalisariutip taassuma
aalisarsinnaajunnaarneranut, imaluunniit angallatip atorsinnaajunnaarneranut,
nunatsinnimi aalisarsinnaajunnaarpat allamik aalisarfissamik
nassaarsimanngikkutta, piginnittoq qularnanngitsumik aamma aningaasanik
piumasaqaateqassaaq.
Aamma suliffissat eqqarsaatigalugit, taakku pisassat massakkut inunnik 40-nik ukiumut suliffissaqartitsipput. Pisassalli taakku nunamut nuunneqassagaluarpata suliffissat 32-it pissarsiarineqassapput. Tassa sulisut ikilisinneqassapput. Taassuma saniatigut, taamaaliussagaluarutta, aningaasarsiornikkut 30 mio. kr.-it tungaanut nunatta annaasaqaatigissavai. Tassa avataasiorluni pisat avammut tunineri/tunisassiarineri akisunerummata.
Taamatut partiit oqaaseqartui akissuteqarfigalugit qujassuteqarfigeqqissavakka.
Sivert K. Heilmann, Aalisarnermut, Piniarnermut Nunalerinermullu Ataatsimiititaliap siulittaasua:
Ataatsimiititaliaq sinnerlugu partiininngaannit assigiinngitsuninngaanneersunit akissutigineqar-tunut aammalu Naalakkersuisut ilaasortap akissutaanut qujavugut.
Takisuuliornianngilanga, kisiannili maluginiaqquinnassavara ataatsimiititaliami sapinngisar- put sukumiisumik tusarniaanerillu pillugit Inatsisartuni ilaasortat assigiinngitsut siunnersuu- taat suliarisarpagut nalilersoqqissaarlugit. Taakkulu aamma Inatsisartut massakkut oqallinnermut aallaavigalugit nalilersuillutik sulisimapput, aammalu Naalakkersuisunut ilaasortamit akineqarlutik.
Kisianni maluginiarpara arlalitsigut siunnersuuteqartut qanillattortarsimagigut aammalu ilaatigut paaseqatigiinnikkut, immaqa isumaqatigivinngikkaluarlugit, kisianni qanillattuisinnaaneq periusigisartagarput atortarsimavarput.
Kisiannili naggataagut oqaatigiinnassavara nuannaarutigalugu maluginiarakku Aalisarnermut, Piniarnermut Nunalerinermullu Ataatsimiititaliami akissuteqarnitsinni partiit amerlanerpaat uagutsinnut isumaqataanerat. Taakkulu Inatsisartut isummersornerannut aallaavittut aammalu isummersornerannut atorneqarluarsinnaasutut nalilersinnaagakku, nuannaarutigigakku.
Taamatut naatsumik oqaaseqarlunga partiit qutsavigeqqippakka Aalisarnermut, Piniarnermut Nunalerinermullu Ataatsimiititaliamut nersorinnillutik oqaaseqarnerannut.
Otto Steenholdt, Atassutip oqaaseqartua:
Savat meqqui kiisalu amii iluatissarfigerujussuarlugit oqaaseqarnitsinni inussiarnersumik akineqarnerput ajorinngilarput. Tassami nammineerluni suliarineqarsinnaasut, taamaattumik oqaaseq atorpara; taamaatsiinnarlugit nassiussuunneqarsinnaaneri. Angutaasugut uagut ilimanarpallaannginnatta tigullugit, errorlugit qiortarlugillu pinissaat. Arnartatsinnut piukkunnaqimmata allaat qiortarlugit kusanartunngorlugit suliarilluarsinnaammatigit, alersiliaralugit kiisalu aamma avannaamiunut misilillaqqullugu qissineq ilikkaratarsinnaammassuk, aamma taamaaliornikkut namminnerlu aamma qilattagassiassaminnik sanasalernissaat, taanaana piukkullugu taamatut savaateqarfimmiuunngikkaluarlunga eqqarsaatersorfiginga.
Kisianni kujataani raajaqarfik Naalakkersuisup akissutaanut tunngatillugu eqqarsaatersuutigaarput, tassa oqaaseq una atorneqarmat; sumiiffinni ataasiakkaani naamik, kisianni nuna tamakkerlugu misissuinissaq - aap. Ajunngikkaluarpoq, kisiannili aalisartut taqqavani kujataaniittut allatulli, soorlu aamma avannaani, namminneerlutik ujarlersimapput nassaarlutillu raajaqarfinnik. Qanga avannaani taamatut nassaartut kajumissaaserneqartarput aningaasannguanik, ilatik iluaquserlugit nassaarneri pillugit. Una eqqartugara kujataani raajaqarfik misissorneqarsimavoq, tassa fiskeribiolog-it ilagalugit Adolf Jensen-iunnguatsiartumillu ilaqarluni. Taakku oqarput akilersinnaasunik raajaqanngilaq. Inerpoq. Kisianni massakkut qanoq ippa? Immaqa nunatsinni raajarniarfiit allaat pingaarnersarilinnguatsiarpaat, kisianni naluarput qanoq raajaqartiginersoq. Aalisartut namminneerlutik mikinerusumik aalisariuteqarlutik nassaarisimavaat, kisianniaasiit avataaninngaannit angisuut aamma ornittalerpaat. Tamakkuuppulluunniit misissuinikkut oqar-figineqartariaqartut qanoq iliuuseqartariaqarnermik.
Raajat karsiliortarpugut maani immikkoortitikkanik. Taanna taamatut illersorneqarnaniluunniit misissorneqanngikkuni iluaqutissarsuugaluaq immaqa imaaliallaannaq aseroratarsinnaavaat. Taamaattumik nuannissagaluarpoq, soorlu umimmannut imaluunniit tuttunut pisut eqqartoratsigit, siunissami iluaqutissaasorisagut paaserusuttarpagut qanoq atsigisumik toqoraavigisinnaavagut, illersussagutsigulu qaqugu unitsissavarput? Kalaalli Nunatsinni raajarniarneq inuussutissarsiornitsinni taama pingaaruteqartigisoq, taannaannarluunniit misissullaqqullugu Atassummit tikkuagarput isumaqarlunga tusaaniartariaqartoq, inuussutissarsiutit pingaarnersaata taama siunissami isumalluutaatigisup, taanna eqqartugarput allaat illersugassatut imaluunniit aalisarfigineqarnerulaarsinnaasutut oqaatigineqarnissaa kujataani aalisartunut pingaaruteqarluinnartuummat.
Taanna Aalisarnermut, Piniarnermut Nunalerinermullu Naalakkersuisumut taamatut erseqqissaateqarfigaara.
Lars Karl Jensen, Siunnersuuteqartoq, Siumup oqaaseqartua:
Siullermik Siumup oqaaseqartuatut Siumuminngaannit saqqummiussagut pillugit Naalakker-suisoq inussiarnersumik tapersiiffigisinnaasaminik taasai qujassuteqarfigerusuppakka.
Taavalu aamma nammineq siunnersuuteqartutut siunnersuutigisima ataatsimiititaliami suliarineqarsimanerat qujassutigalugu pinngitsoorusunngilanga TAC-mut tunngasumut naatsukullannguamik oqaaseqalaassallunga.
Raajartassat annertusineqarnissaanut tunngatillugu TAC-p qaffanneqarsinnaanera qularivara. Namminerli taamatut siunnersuuteqarama, kisiannili aallaavigisakka neriuppunga siunissami suleriaqqinnissami paasineqassasut aammalu eqqaamaneqassasut. Tassa ukiup siulia naalersoq raajartassat ukiuni pingasuni pisarineqartarsimasut najoqqutaralugit sinerissamut qanittumi agguaanneqarmata agguaassineq assorujussuaq mamaagineqarsimavoq. Aallaqqaammut pisassat agguaqatigiisinnerannut taakkunani ukiuni pingasuni pisarisaasarsimasut agguaanneqariarlutik sinneruttut pisassanik naammangittaalliortunut, imaluunniit annertusineqarnissaminnut pinnagit paggataarutigiinnarlugit agguaateqqinneqarput, taamaalillutillu aalisariutillit raajarniartut akilersuinerminni malinnaaniarnerat assorujussuaq erloqinartorsiortinneqarluni.
Ilaatigut Finn Karlsen-ilu assigiimmik siunnersuuteqarfigigatsigu aallaavigivarput nalunnginnatsigu januari februariluunnit ingerlatilaartoq, pinerpoq, raajarniutaatilinninngaannit saaffigineqaqattaalerpugut; maannakkut pisassaaruppugut ESU-mut akilersukkagut ilanngaavigineqarsinnaanerlutik imaluunnit pisassanik pisisinnaanerluta.
Ilaatigut tamakkua erloqinartorujussuarmik inissisimaffiupput. Aammalu nalunngilarput inatsisiliortuullutalu aamma qinigaangatta tamakku isumalluarfigisarmatigut arlaatigut qanoq iliuuseqarsinnaanermik ujartuullugit raajartassat amerlineqarsinnaanerannik uanga siunnersuuteqarsimavunga.
Aammalu nuannaarutigivara siunnersuutima, immaqa aappaattut taasinnaasara, uani Aalisar-nermut, Piniarnermut Nunalerinermullu Ataatsimiititaliap Aalisarneq pillugu Siunnersuisoqatigiinni alaatsinaattutut inissinneqarsinnaaneranut Naalakkersuisup ammaffiginninnera. Uagutsinnimi kipiluttunartarpoq aatsaaginnaq assersuutigisatut taasama assinganik pisoqartillugu suso-qarnersoq naliliiffiginiassallugu.
Taanna pisassanik agguaasimaneq uterfigisaqattaarnianngikkaluarlugu oqaatigissavara ilaatigut paasiniaanninni oqartoqartarmat raajartassaminnik amingaateqalersut aalisariut pisiarigamikku nalunngereeraat taama ikitsigisunik pisassalik. Taava oqarsinnaavugut suliassap ataatsip iluani ataqatigiittoqarsimasuuppat angallatitaarnissaanik taava akuerisimasariaqanngikkaluarpoq naalliuutissaanik.
Tamakkua aamma suleriaqqinnissami uanga tunginninngaannit siunnersuutigissavara, kukkunigummi ilinniarfigisarutsigit aatsaat iluamik ingerlatsilersinnaagatta.
Johan Lund Olsen, Inuit Ataqatigiit oqaaseqartuat:
Taamaallaat uagut Inuit Ataqatigiinninngaanniit matumani aappassaanik oqaaseqarnisatsinni oqaaseqarfigitsiassavagut.
Siullermik puisit amiinut tunngatillugu isumaqarpunga nuannaarutigalugu tamatta tulluusimaarutigisariaqaripput partiit tamarmik pingaartilluinnarlugu oqaatigimmassuk puisit amiisa maannakkut akii appartinniarneqassanngilluinnartut. Taanna partiit tamarmik maani oqaatigivaat aamma isumaliutissiissummi taamatut oqaasertalerlugu oqaatigereeratsigu, tassa Siumut, Atassut, Inuit Ataqatigiit, Kattusseqatigiit aamma Akulliit Partiiata tamanna pingaartillugu oqaatigivaat.
Taamaattumik soorunami neriuutigivarput, aamma aatsaaginnaq Aalisarnermut, Piniarnermut Nunalerinermullu Naalakkersuisup tamanna pillugu maani oqaluttarfimminngaannit neriorsuutigisani attatiinnarumaarmagu, aammalu isumaqatigiinniarnerit maannakkut unittooqqasut ingerlateqqinneqarnissaanni taakkua nammineq neriorsuutigisani eqqaamaqqissaarlugit Great Greenland-imut ingerlateqqikkumaaramigit.
Kisianni taamatut oqareerluta eqqumiigilaanngitsuunngilarput Naalakkersuisoq ataatsimiititaliap isumaliutissiissutaanut akissuteqaateqarluni oqaatigigamiuk: ATamatumunnga peqatigitillugu Naalakkersuisut piginnaatitaaffiliipput@ tassa puisit amii eqqarsaatigalugit @tunisinermi pitsaassutsinik naliliisarneq pisariinnerulersinniarlugu, taamaasiornikkut ammit ajornerpaat toqqaannartumik Great Greenland-imut ajunaarutaasartut tunineqarsinnaajunnaarsinniarlugit.@
Pitsaassusissatut piumasaqaataasunut kattussinikkut pissusissamisoorpoq naleqquttumik ag-guaqatigiisillugu akigitinneqartussap amminut tunineqartunut atuuttussap nassaariniarnissai@, tassa taanna aalajangiusimavaat. Kisianni taava ataqatigiikkunnaarpoq, aatsaannguaq oqaatigeriigaanut aammalu neriorsuutigisaanut. Tassami ilisimaneqartutut ammit pitsaassuseq 1, pitsaassueq 2, pitsaassuseq 3 maannakkut aaqqissuussiffigineqarsimapput, taakkualu aamma immikkut akilersorneqarsimallutik.
Naalakkersuisut taanna aatsaaginnaq issuagara aalajangiusimaannarniassappassuk, taava naatsorsuilaarsinnaagaanni kialluunnit takusinnaareerpaa akeq apparumaarmat. Tamannaavorlu isumaqatigiinniarnerit ingerlanneqaraluartut aamma ilaatigut unittoorutigisimasaat. Tamanna tupigisassaanngilaq, tassami kikkut isumaqatigiissuteqarnermikkut isertitassatik appartikkusussammatigit. Atagu misilikkaluarsiuk SIK taamatut aamma isumaqatigiinniarfigalugu; akissarsiasi appassavagut. A-assaa suliumajunnaarnersuaq aatsaat iluamik ingerlanneqalissagaluarpoq inuiaqatigiit unittuuvillutik unittoortinneqarlutik.
Soorunami aamma aalisartut piniartortagut isumaqatigiinniarnikkut taamatut piumaffigineqarpata aamma akit appartinneqarnissaat, paasisinnaalluakkatsinnik aamma appartinneqarsinnaanissaat taanna akuersaarnavianngilaat.
Taamaattumik isumaqarpugut pitsaassusiliisarnermut piumasaqaataasut kattunnerisigut aaqqissuusseqqinnissaq Naalakkersuisut nalilersoqqittariaqaraat, imaluunnit imaassimanerpa taanna aalajangiusimaannassagunikku taava immaqa qaavatigut bonus-iliisarneq aqqutigalugu aaqqiivigineqartarniartoq. Tamanna Naalakkersuisut tungaanninngaanniit akineqarsinnaanissaa kissaatigilaassangaluaqaara.
Ilanngullugu oqaaseqarfigilaassavara raajartassat eqqarsaatigalugit, aamma Naalakkersuisut tungaaninngaannit oqaatigineqarmat, soorlulisooq ersisaariniartoqaannartoq, tassagooq avataasiortut arlaanninngaannit arsaarinnissutaassagaluarpata imatut imatullu inuiaqatigiinnut anner-tutigisumik naleqassaarooq. Allaat 200 mio. kr.-inik oqaluttoq tusaavara. Aalisarnermut Ataatsimiititaliami oqanngilagut maannakkorpiaq taamaaliortoqassasoq, tassa arsaarinnittoqavilluni arsaarinnittoqassasoq, soorunami Aalisarnermut Ataatsimiititaliaminngaannit aamma aalisar-nermut inatsiserput, maani nunatsinni atuuttoq, malittussaavarput, nammineq aamma siorna aalisarnermut inatsit maani Inatsisartuni suliarigatsigu Aalisarnermut Ataatsimiititaliaminngaannit sukumiilluinnartumik tamanna suliaralugulu, maani Inatsisartunut akuersissutigitissimavarput.
Kisianni tassani eqaamaniagassaq aajuna; pisassiissutit naassaanngitsorsuarmik kikkunnul-luunniit pigisassanngortinneqarsinnaanngimmata, tassa avataasiortunulluunniit imaluunnit sinerissap qanittuani aalisartunut. Inuiaqatigiit tunngaviusumik suli pigivaat, aamma taamaattuassaaq. Taamaattumik aamma ukiunik tallimanik siumut ilimasaaruteqareerluni taakkua allatut aaqqissuussutigineqarsinnaapput.
Isumaqarpunga aamma tamanna ataatsimiititaliap isumaliutissiissutitsinni erseqqissaatigigip- put. Taamaattumik Naalakkersuisup tamanna eqqarsaatimini aamma ilaatittariaqarpaa. Tassami, Inatsisartunut ilaasortat pingasut Finn Karlsen, Hans Enoksen aammalu Lars Karl Jensen ilumoorluinnarmata sinerissap qanittuani raajarniat raajartassinneqarnermikkut amerlasuutigut ajornartorsiuteqarmata ukioq imaaleriiginnartoq. Taamaattumik aamma qanoq iliuuseqarniartariaqarpugut ukiuni tullinnguuttuni. Periarfissaqarpugut ukiut tallimat maannaminngaannit eqqarsaatit tamakkua, aamma Inuit Ataqatigiinninngaannit saqqummiussagut, nalilersornissaannut.
Finn Karlsen, Siunersuuteqartoq, Atassut:
Savat meqquisa
tunisassiarineqalernissaannut tapiissutinik siunnersuuteqarnermut
Aalisarnermut, Piniarnermut Nunalerinermullu aammalu Naalakkersuisut partiillu
tamarmik tapersiinerat qutsatigissavara, taamaalilluni asuli maangaannaq
eqqaanerujussuaq ikuallaasarnerlu sulisitsinermik kinguneqalissammata.
Siunnersuutimma aappaanut tunngatillugu
oqaasissarigaluakka amerlanerit Otto Steenholdt-ip animmagit, kisianni tassa
soorunami aamma paasiuminaatsittorujussuuara immikkoortukkuu-taarluni misissuinissamut
piumassuseqartoqanngimmat. Oqaatigisarparput inuussutissarsiutit- ta pingaarnersarigaat aalisarneq, immaqami
raajarniarneq aalisarnerunngimmat taamatut oqartoqartarpoq, naluara.
Kisianni una ilumoorami, 1970-ikkut
aallartilaarneranni Adolf Jensen misissuisimagaluarpoq taqqavani, kisianni
akilersinnaanngitsutut taaneqarpoq. Tamatumali kingorna nammineq aalisartut
misilittaanermikkut aalajangersimasumik ataatsimik kalittarfeqalerput.
Misilittaaqqinnermi alliartorusaarpoq. Ullumikkut raajarniarfigisartagaq
annertoorujussuanngorsimavoq, aamma kialluunniit tamakkuninnga soqutigisallit
ukiuni kingullerni qanoq sukkatigisumik tulaanneqartartut qaffakkiartortut,
aamma massakkut. Taamaammat massakkut taqqavani pisarineqartut, amerlanerpaat -
massakkut pingasorarterutaannanngorput - aprilip naanerani taavalu nunguutsereertoqarnikuulluni.
Taamaattumik sinerissap qanittuani
raajarniat illersornerat sakkortusassagutsigu pisariaqarpoq raajat
karsiliinikkut illersuineq annerusoq takussutissaqartitsilissagaluartoq.
Massakkummi illersorneqarsinnaanngitsumik avataaninngaannit kilisaatit angisuut
raajarniat tunuartarput, killeqarfik ilummut qaangerlugu. Taakkulu
pisaqartarput imaasiallannerinnarmi, allaat raajarniat ukiumut pisassai
angungajallugit pillatsiarnerinnarminni. Taamaattumik isumaqarpunga sinerissap
qanittuani raajarniat nungusaapiluttuunngitsut, imaluunnit
nungusaataanngitsumik raajarniartuusut. Sakkortuumik killiliigutta
isumaqarpunga misissueqqinnikkullu sinerissap qanittuani raajarniat anginerusumik
pisassinneqarsinnaagaluartut.
Anthon Frederiksen, Kattusseqatigiit:
Sinerissap qanittuani raajarniarnermut
tunngatillugu oqaaseqaatikka innersuussutigiutigalugit aammalu oqaluttup
kingulliup oqaasii qalleqqissanngikkaluarlugit qamannga pisumik tapersersorujussuarpakka.
Aamma nuannaarutigaara
qujassutigissallugulu Aalisarnermut, Piniarnermut Nunalerinermullu
Ataatsimiititaliap siunnersuutikka ilanngullugit ajunngitsumik
suliarisimammagit. Tassami pisariaqarluinnarpoq inuussutissarsiutitta
pingaarnerpaat, pingaarnerpaartaat, pitsaasumik nunatsinnut inuinullu
aaqqiissuteqarfigissallugu suliniutigineqarnissaa.
Pinngitsoorusunngilanga Atassutip
oqaluttuata Otto Steenholdt-ip oqaasiinut oqaaseqalaassallunga. Tassa
Kangaatsiap kommuniani aalisartut ukioq decemberi qaammat annertuumik
ajornar-torsiuteqarlutik nalunaaruteqarnerat ilaatigut tunngavigalugu
Kangaatsiap kommuniani ajor-nartorsiutaasut pillugit siunnersuuteqarnitsinnut,
uanga Maliinannguaq M. Mĝlgaard-illu, tunngatillugu oqarmat Qeqertarsuarmiit
qineqqusaarnermut atatillugu aalisaat Kangaatsiap tungaanut ninginneqartoq.
Taanna Otto Steenholdt-imut amuaqqugaluarpara, aalisaat ninginneqartoq. Tassa
eqqunngimmat. Siullermik oqareernittut siunnersuut taanna tunngaveqarpoq aalisartut
piniartullu ilungersungaarlutik saaffiginninnerannik aammalu saaffiginninnerisa
kingorna nammineerluta Kangaatsiap kommuniani angalanitsinni qinersisartut
tikillugit, qineqqusaarfiginagit kisiannili ajornartorsiutaanik tusarniaalluta
angalanitsinnik aallaaveqarmat. Isumaqarpunga Otto Steenholdt-ip nammineerluni
aalisaatiarakasik ningitaa aamma eqqaasariaqartoq; tassalu savat meqquinik
avannaamiut arnartaasa passussilernissaanik tunngasoq, taanna qanorluunniit
nalilerneqassanersoq nalorninakujukkaluartoq taamaattoq qineqqusaarnerinnartut
immaqa oqaatigissagaanni ajunnginneruvoq.
Ippassaaniinnannguaq oqallippugut
ilaatigut tuttunik toqoraanermi perlukut, erlaviit allallu,
matoorneqartarnerannut tunngatillugu. Taannalu naluneqanngitsutut aamma Atassummit
eqqaanissamut tunngasoq inatsisitigut akuerineqaqqullugu
akuersissutigineqarpoq. Illuatungerluinnaqqinnaanik Atassutip oqaluttuata Otto
Steenholdt-ip aatsaaginnaq oqaatsimini imatut oqarpoq: Auagut kalaallit ileqqorinnginnatsigu
atorsinnaasunik eqqaaneq@,
kisianni ippassaani atorsinnaasaraluatta immamut kiversarlugit
eqqarneqarsinnaanerinut inatsisitigoorlugu akuersinerat massakkut oqaatsinut
naapertuutinngilluinnarpoq. Taamaattumik Otto Steenholdt aalisaa-tinik
marlunnik amuagassaqalerpoq, siullermik Qeqertarsuup tungaaninngaannit
ninginneqartoq aammalu savat meqquinut tunngatillugu avannaamiut arnartaannut
alersiliorsinnaasununngooq savat meqqui atorlugit. Taakku aalisaatit marluk
amuassavai. Qujareerpunga, amuarnerani isiginnaassavara tusarnaarlugulu.
Jonathan Motzfeldt, ataatsimiinnermik aqutsisoq:
Oqallinneq ingerlaqqitsippallaarnagu
oqaatigissavara ilaasortat marloriaannarlutik oqaaseqartartussaammata,
ilaasortat ilaatigut marloriarlutik oqaaseqareermata. Pingajussaaneertussat
im-mikkut akueralugit naatsuaqqamik oqaaseqartinneqassapput.
Manasse Berthelsen, Inuit Ataqatigiit oqaaseqartuat:
Piniarnermut Naalakkersuisup ukua
isumaqatigiinniarnerit Great Greenland-ip KNAPK-llu ingerlataat politikkikkut
akuleruffigineqartussaammata uani isumaqatigiinniarnerit oqaaseqarfigilaassavakka.
Siullermik oqaatigissavarput, Johan Lund
Olsen tapeqqillugu, Naalakkersuisut pisinnaatitsissutip
nalilersoqqinneqarnissaanut iliuuseqarniarlutik oqaaseqarmata, taanna assut
nuannaarutigaarput. Ilumoorsinnaanngilarmi, kisitsisilersorluaannarlugit,
massakkut ameq panertillugu pitsaanerpaatut tunineqartartoq 525 kr.-eqarpoq,
piniartumut ulluinnarni inuuniarneranut iluaqutaasoq. Ukualu massakkut nutaamik
nalilersuinermi siunniunneqarpoq pitsaassutsit 1-2-3 atorunnaarlugit
ataasiinnarmik tunisisalernermi taamaallaat 275 kr.
akigitinniarneqartoq.Tassani piniartunut assut annertuumik eqquisussaavoq.
Taannaannaanngilarli, maannakkut
sinerissami ammeriviit aallartitsiortulerput taakku akit 0tunngavigalugit,
soorlu Maniitsumi Aasiannilu amminik pisiortorlutik qassaannakkanik. Taakku
ammeriviit kommunimit ingerlanniarneqarput suliffissaqartitsiniutitut ilaatigut
ingerlanneqarlutik. Tassanilu suliffissaqartitsiniarnermi ammit taakku 150
kr.-ilerlugit piniartunit pisiareriarlugit suliarinerinut Great Greenland-imut
tuneqqittarpaat, taakkua massakkut akit akigitinneqartut iluaqutigilluarlugit.
275 kr.-imut appartinneqarpat tassaniipput
piniartuinnaanngitsut kisiannili kommunit arlallit sinerissami piniartut
atugaannik oqilisaaniarlutik suliniuteqarnerat, tassani aamma annertuumik
eqqorneqartussaavoq. Tassanilu aamma eqqaasariaqarpoq piumasaqaatitut nutaatut
siunnersuutigineqartut pitsaassutsit B aamma C atorunnaarsinniarneqartut
tusaamanarmat taamaallaat pitsaanerpaaginnaat tunineqarsinnaanngorlugit,
massakkumillu tunisisarnermik piumasaqaataat aamma allileqqillugit.
Uani upernaami ataatsimiinnermi
siunnersuuteqarsimagaluarpunga Diskobugt-imi ammerivimmik
pilersitsisoqarsinnaanersoq, tassani pissutigineqarpoq Great Greenland
aktieselskab-itut ingerlammat maanngaannit toqqaannartumik
akuleruffigineqarsinnaanngitsoq.
Great Greenland-ip aaqqissuussaaneranut
aamma uparuaalaassaanga. Kisitsisit misissullatsiarnerini,
akissutigineqarnerani oqaatigineqarpoq, Kangaatsiamit avannamut ammit
tunineqartar- tut Kalaallit Nunaanni tunineqartartut affaraat. Great
Greenland-iminngaannit nalunaarutigineqarpoq 76.000-it sinnilaarlugit,
Kangaatsiamiillu avannaatungaanit tunineqartartut tassaapput 37.000-it, tassa
affarluinnai.
Naluneqanngilaq tunitsiviit qanikkaangata
suliarineqarfissai assigiiaartumik, tassani anguneqartarpoq ammit
pitsaassusaat ajunnginnerusoq. Tassanilu aamma ammit pitsaassusaannik nalilersuinerit
assigiiaarnerusut aamma tamatumuuna anguneqarsinnaapput, soorlu Great
Greenland-ip nalunaarutigaa ammit pisiarisartakkatik 27 mio. kr.-ilerlugit
akilertaraat, kisianni tigoreeraangamikkit nalilersuinertik najoqqutaralugu
taamaallaat 18 mio. kr.-it sinnilaarlugit akeqartussaagaluit. Tassani
ajornartorsiuteqarpoq nalilersuisarnerni. Taanna aaqqinniarneqassanngilaq
nalilersuisarnerit A-B-C-llu peerlugit, kisianni assigiiaarnerusumik
ilungersuutigineqaqqittariaqarpoq, uku nalunaarsuisarnerit assigiiaarnerusumik
sinerissami ingerlanneqartarnissaannut.
Maliinannguaq M. Mĝlgaard, Siunnersuuteqartoq, Inuit Ataqatigiit:
Qujanaq, siunnersuutinnut tunngatillugu,
tassa Kangaatsiap kommuniani tunisassiaasinnaasunik misissuinissamut
siunnersuut sumut tunngatillugu, nuannaarutigaara massakkut misileraalluni
ingerlatsisoqalersimammat aammalu naak nipisat suaat aammalu saattussat tassani
pineqaraluartut aamma kissaatigineqartut allat tusarneqarumaartut siunissami,
allanik kissaatigisaqartoqassappat misileraanissamik tusarniarneqarumaartut
taamatut neriorsuisutut neqartumik oqartoqarmat nuannaarutigaara. Tassami
Kangaatsiap kommuniani tunisassiornikkut ajornartorsiuteqartoqarpoq
annertuumik, aammalu Niaqornaarsummi Attumilu tunisassiorfiit Royal Greenland
A/S-ip ingerlatai martsip aallartilaarnerani alakkarterakkit annertunerusumik
tunisassiaqaratik uninngasut, assut ajuusaarnarpoq. Taamaattumik tunisassiassat
allat suunersut misilerarneqarnissaat pingaaruteqarluinnartuuvoq.
Aamma Anthon Frederiksen-ip oqaatigereermagit oqaaseqarfigissanngilara Otto Steenholdt-ip qineqqusaarnerarluta oqarnera. Kisianni tassa pisussaaffigaarput qinigaasutut qinigaaffigut angalaffigissallugit ajornartorsiutaallu tusarniassallugit. Tassa Inatsisartuni suliassarput pingaarnerpaaq.
Taava erseqqissaatigilaassavara saattuarniarnermi umiarsualiinissamut aamma uanga siunner-suuteqarama atuarneqarsinnaasimaguni takuneqarsinnaavoq Anthon Frederiksen kisimi tassani taakkartorneqarmat erseqqissaatigilaarniaringa. Tassani nuannaarutigaara misileraasoqareerpat taanna uterfigineqarsinnaassasoq Aalisarnermut, Piniarnermut Nunalerinermullu Ataatsimiititaliamit ilaatigut oqaatigineqarmat.
Naluneqanngittutut aqqut takingaartoq Kangaatsiarmiut assartuinermut atortariaqartarpaat. Soorunalimi pisariillisaassutit makku, imaaqa saattussat sivisunerusumik uninngasinnaanerinut pisariillisaassutit, ornginginaraluartut kisianni aamma illuatungaatigut nalunngilarput aalisartup tunisassani tunitsivissaminut ingerlakkuniuk, taannalu aqqutaa ungasissimappat, piffissaq sivisunerusoq atortariaqarpaa. Tunitsivissarli qanittumiippat piffissaq sivikinnerusoq atussavaa, taavalu aalisariaqqinnissaminut aamma periarfissaqarnerussalluni. Tassa imaappoq, pisaqarlu-arnerulersinnaalissaaq taamaalillunilu isertitai ameralanerulersinnaassallutik.
Taamaattumik taanna siunnersuut aalajangiusimallugu taamaalillugu, aammalu ilassilluarneqarmat ilaatigut nuannaarutigaara. Kangaatsiarmiut immikkut taamatut saqqummiussaqarfigineri isumaqarpunga ajunngilluinnaqqissaartuusoq, Otto Steenholdt-ip mamaagitigigaluarpaguluunniit. Tassa nalunngilarput Kangaatsiarmiut kommunini kisiartaallutik Inatsisartunut ilaasortaatitaqanngitsut. Taamaattumik pissusissamisuuinnarpoq uagut Diskobugt-imi qinigaasutut ataatsimut isigalugit iliuuseqarnissarput.
Amernut tunngatillugu naggasiutigalugu. Aap, naluneqanngilaq ukiarmi annertuumik ammit pillugit oqallissismasugut maani inimi nalunaarusiarlugu sukumiisumik eqqartorsimagipput. Kisianni tassani ilaatigut ammit tunisaanerannut tunngatillugu oktoberip 25.-iani 1996-imi oqallinnitsinni partiip ataasiinnaap oqaatigisimavaa akinik nalimmassaanissaq, tassa imaaqa aki ataasiinnaq isiginerullugu aaqqissuussisinnaanissaq orniginartinneqartoq, tassalu Akulliit Partiiat, kisianni partiit allat tamarmik saqqummiisui taassuminnga eqqaasaqarsimanngillat.
Taamaattumik Naalakkersuisut taamannak tunuliaqutaqartutut saqqummiinerat, oqaaseqarsi-manerat imannak nipilimmik; pitsaassusissatut piumassuseqaataasumik kattussinikkut pissusis-samisoortoq naleqquttunik agguaqatigiisillugu akigitinneqartussap amminut tunineqartunut atuuttussap nassaariniarnissaa. Tassa imaappoq ameq ataasiinnarmik akeqalersillugu. Taamatut paasisariaqarami taanna saqqummiussaq.
Tassani aarleqqutigineqarsinnaasut annertuujupput, tassa ajornartorsiutit annerpaartarisima- vaat ammit iluamik suliarineqartartut amigaataasorujussuummata nunatsinni, taavalu piumaneqarnerat annertusiartorluni akiilu qaffakkiartorlutik. Taamaattumik suli annertunerusumik uagut sulissutigisariaqarparput ammit pitsaasumik suliarineqarnissaat. Aatsaallu taanna anguneqarsinnaavoq pitsaasumik suliaqarsimasut immikkut akilerneqarpata. Assigiiginnarmimmi akeqartinneqaleraluarpata pitsanngorsarnissaat annertunerusumik isigineqarnavianngimaat, tassami amerlasuut naammassineqarnissaat pingaartinneqassaaq, kusanasaarnissaallu pivallaarneqarunnaarluni. Taamaattumik tassani taassuma aarleqqutiginera oqaatigissavara.
Naggasiullugu Qeqertarsuup tunuani ammeriveqalernissaanut ukiarmi siunnersuuteqarsimavunga aammalu Inatsisartut akuerisimavaat ammeriveqalernissaq, aqqutaani asiusartut pissutigalugu. Taanna Naalakkersuisunut apeqqutigerusuppara suliaq ingerlanersoq, kiisalu aamma ammit pillugit suleqatigiisita taamanikkut pilersinneqartussaq pilersinneqarsimanersoq qanorlu inger-lanersoq aamma apeqqutigerusullugu.
Naggasiullugu Paaviaaraq Heilmann-imut eqqaasitsissutigerusuppara qineqqusaarutiginikuummagu Royal Greenland A/S-ip kilisaataataasa ilaasa pisassaat nunamut qanittumut kilisaatinut tunniunneqartalernissaannut innersuussuteqarluni siunnersuuteqarnikuummat. Kisiannili mas-sakkut illuatungerluinnaanik aarleqquteqarluni saqqummiimmat. Isumaqarpunga Royal Greenland A/S-ip kilisaataassui uagut piginneqataaffigut qanoq iliuuseqarfigisinnaasariaqarigut aamma taamaalilluta suliffissuit matoorarnagit ilaat ammatiinnarsinnaagaluarlutigit, soorlu assersuutigalugu Qeqertarsuarmi suliffissuaq.
Otto Steenholdt, Atassutip oqaaseqartua:
Tassami Anthon Frederiksen-ip aammalu Maliinannguaq M. Mĝlgaard-ip assigiilluinnaqqissaamik Kangaatsiamut allamulluunniit Diskobugtimut tunngasunut, pereersimasut uteqattaarluinnaleraagatigit oqaluttartup nuutaatut kingarnikutut ullut tamaasa peqattaartileraagasigit, allatut ajornaqaaq kisianni oqarfigisariaqartarpusi; taanna oqallisigineqareerpoq uteqattaarunnaartariaqarpoq, qineqqusaartut-ukua kisimi taamaattartut.
Taamaattumik akissummi erseqqarereerpoq, ima erseqqaritsigaaq ilissinnut oqaatigineqartoq, suliassaq ingerlavoq. Aamma paasiniaalaarneq ajornanngilaq allattoqarfimmut nammineq siunnersuuteqarniaraanni. Paasigaannilu ingerlareersoq kingusinaarluni paasisimagaanni oqartariaqarpoq; utoqqatserpunga ingerlareermat, siunnersuutiga utertippara. Taamaaliorneq aamma ajornanngilaq.
Aamma Anthon Frederiksen-ip oqaatigisaa eqqagarsuit, issaannanguaq savanut tunngatillugit pisagut, eqqakkat uani pineqartut tassaapput atorsinnaannginnerarlugit imaanut eqqartariaqartunngooq. Tassaavoq taanna ippassaanikkunni oqaatigisarput. Anthon Frederiksen-ip aalisaat qapersimasoq sunaanersoq paasisimanngilaa. Aamma imannak eqiasutsiginngilatit uanga amuaassutissagikkit.
Jonathan Motzfeldt, Ataatsimiinermik aqutsisoq:
Ilumoorpoq taanna oqaatigisaq ataatsimiititaliap suliaq saqqummiutereersimavaa allaganngorlugu ilaasortat tamarmik piffissaqarput atuarsimassallugit piareersarfigalugillu. Partiinit isummerfigineqarput, Naalakkersuisut akissutaat allaganngorlugu saqqummiussaavoq isummerfigineqarnissaminut siunnersuuteqartunit periarfissaqarfigineqarsimalluni. Innersuussutigissavara maani oqallisigisat akissutinut tunngasut tunngavigalugit kingulliit naggataarutaasut oqaatigineqassasut.
Jakob Sivertsen , Siunnersuuteqartoq, Atassut:
Siunnersuuteqartutut puisit amiisa akiisa
appartinnaveersaarneqarnissaat pillugu partiinit tamanit, aamma pingaartumik
Inuit Ataqatigiinnit, taperserneqarnera assut qujassutigaara. Aamma
pisariaqarpoq eqqaamassagatsigu nunarput inoqartilugu piniartutut
inuussutissarsiorneq qaminnavianngimmat.
Takisuuliornanga Naalakkersuisut
saqqummiussaat uangattaaq maluginiagara ataaseq tassaavoq, puisit amiisa
panertut tunineqartarnerannut tunngatillugu naliliisarnerup
ataatsimoornerulernissaanik isuma, taanna siornatigut misilinneqarsimavoq
kinguneraali puisit amiisa panertut tunineqartarnerisa
pitsaannginnerulernerannik.
Ullumikkut piniartut nuiali ima
kakkatsigipput puisit tikiunneqartoq takuinnarlugu paasisarpaat nr. 1-iunersoq,
nr. 2-unersoq imaluunniit nr. 3-iunersoq, taamaattumik tamatigut pitsaasumik
suliariniartarpaat puisip amiata qanoq pitsaatiginera tunngavigalugu.
Taamaattumik taanna allanngortinneqassappat allatut ajornaqaaq pitsaassuseq
taava allannguteqanngitsoornavianngilaq.
Justus Ignatiussen, Siumut:
Puisit amii eqqarsaatigalugit maannanngitsoorsinnaannginnama
piniartoqarfimmiuulluni partiit oqaaseqartuisa tapersersormassuk Jakob
Sivertsen-ip siunnersuutaa taavalu aamma Naalakkersuisup oqaaseqarnermini
allassimasoq: Asoorlu ataatsimiititaliap nammineq eqqaasitsissutigigaa ukiuni
missingersuusiorfiusuni ukiup 2000-ip tungaanut tapiissutit
allanngortinneqannginnissaat missingersuusiorneqareersoq@. Tassani uanga
paasisinnaagakku taamanikkussamut akit milliartortinneqassanngitsut.
Ilumoorpoq maani issiasinnaanngikkaluarpugut
Inatsisartunut ilaasortaq ataaseq eqqaassanngikkaanni siuligut piniartuullutik
nunarput kaajallanniarlugu uniffissarsiorsimapput. Taamaattumik nuannerpoq suli
piniartuunerup nungutsaaliorneqarnissaa Naalakkersuisunit Inatsisartullu
tungaannit sulissutigineqartoq paasilluarakku.
Aamma siunissaq eqqarsaatigalugu, Tunu
eqqarsaatigalugu, inuusuttut suliffissaaleqisut taavalu meerannguit
suliffissaaleqisussat, siunissaq eqqarsaatigalugu, assut Otto Steenholdt-ip
aalisaa- tip amuagassaata aappaa pilerinartikkaluarpara amuassallugu, tassa
savat meqquinut tunngasoq. Taamaalilluni misilittaanikkut inuusuttut
suliffissaaleqisut tassuunakkut tapersersorneqarlutik ikorfartorneqarsinnaammata kalaallit inuiaqatigiit piginngisagut
misilittarlugit siunissaq eq-qarsaatigalugu tapertaasinnaagaluarpoq, imaluunnit
suliffissaaleqinermut ikorfartuutaasinnaa-galuarput. Inuiaat kalaallit
ikioqatigiillaqqissorujussuugatta.
Paaviaaraq Heilmann, Aalisarnermut, Piniarnermut
Nunalerinermullu Naalakkersuisoq:
Atassumiit Otto Steenholdt-ip oqaaserisai
maanga oqaluttarfimmut qaqeqqinnermini, aammalu Finn Karlsen-ip oqaaserisai
oqaaseqarfigilaassavakka, tassalu kujataani raajaqarfiit pillugit.
Ersernerluttuliorsimaguma
utoqqatsissutigissavara, kisianni tassa misissuisarnerit imatut ingerlasarput
sumiiffiit assigiinngitsut sinerissami misileraaffigalugit. Massakkut Paamiut
Pinngortitaleriffiup misileraanermut angallassua raajanik misileraanerit
ingerlanneqartarput.
Tassa aamma kujataani, Finn Karlsen
oqaraluarpoq 1970-ikkunnili Adolf Jensen atorlugu misiliisoqarsimasoq
taamanikkullu misileraanerit iluatsissimanngitsut, kingusinnerusukkullu raajat
aalisartut namminneq qallulersimagaat. 1990-ikkunnili misissuinerit
annertunerusut, sineriapput tamaat eqqarsaatigalugu, aamma Diskobugt-ip ilua
eqqarsaatigalugu aamma Paamiunit kujasinnerusut Qaqortup iluliumanersaani
aammalu avataani misissuinerit ingerlasimapput. Tassa sumiiffiit tamarmik,
ujartugarsi Otto Steenholdt Finn Karlsen-ilu, misissuiffigineqartarsimapput,
taakkulu ataatsimut pisassiinermut tunngaviusarsimapput, aammalu aalisartut
pisaminnut nalunaarutaat aallaavigalugit nalilersuinerit
ingerlanneqartarlutik.
Ilisimatitsissutigissavara aalisartut
nalunaarutigisarmatigit qanoq annertutigisumik pisaqarsi-manerlutik aammalu
sumi pisatik taakku pisarisimanerlutigik nalunaartarmata. Aamma tamak- ku
tunngavigalugit nalilersuinerit ingerlanneqartarput. Taamaattumik ujartugarsi
taanna misissuiffigineqarnissaa nalilersuinermi ilaatilluinnarlugu aamma
nalilersuineq ingerlanneqartarpoq.
Lars Karl Jensen-imut oqaatigissavara
pisassiissutit aaqqiivigineqalermata, imaluunnit avataasiortut
aaqqissuussiffigineqarsimanerat assigalugu, sinerissamut tulaassuisut
aaqqissuussiffigi-neqalermata, tassa angallatikkaarlugit pisassiineq atorlugu,
taakkua aningaasanik immikkoortitsivigineqarsimapput ukiut naatsorsuiffiusut
ilanngullugit, ukiormanna aamma ilanngullugu, 10 mio. kr.-inik taakkua
atorneqassasut raajarniutit taakku pisassamikkut aaqqissuussiffigineqar- tut assigiinngitsutigut
aaqqissuussiffigineqarnissaat, aningaasatigut akilersugassatigullu
inger-lanerat aamma tassani attorneqartussaalluni.
Tassani sulisussap, tassa
kondemneringsrċd-imik taasap, sulinissaa, suliassai suleriaasissaalu maannakkut
aaqqissuunneqarput. Tassalu Inatsisartut ataatsimeereernerisa matumap kinguninngua
ilaasortassat tassaniittussat ataatsimiigiaqquneqartussaapput tassanilu sulineq
aallartissaaq 10 mio. kr.-it taakkua qanoq atortarneqarnissaat pillugu
aaqqissuussinermik siunnersuuteqartussap, ESU-mit Naalakkersuisunillu
kingusinnerusukkut piviusunngortinniarneqartussamik.
Aamma Lars Karl Jensen-imut
eqqaasitsissutigissavara Naalakkersuisut angallatitaarniartunut
akuersisartuunngimmata, kisiannili ESU taannaavoq qinnuteqaatinut
akuersisartoq.
Inuit Ataqatigiit Inatsisartunut
ilaasortaannut Johan Lund Olsen-imut, Maliinannguaq M. Mĝlgaard-imut Manaasse
Berthelsen-imullu ataatsimut oqaaseqassaanga, pingaartumik ammit pillugit.
Oqareernittut ammit akii pillugit appaaniartoqanngimmat. Johan Lund Olsen-ip
akissuteqaatinni qup. 2 issuarpaa, taanna soorunami nammineq qanoq
paasissanerlugu isumakuluutigisinnaavaa. Kisianni ilimaginngilara aamma
naatsorsuutiginngilara KNAPK akuersilluni atsioqataassasoq, tassami
isumaqatigiinniarnerit atsiornermik naggaserneqartarmata, qularaara. Atsioqataanavianngilaq
ammit akiinut tunisinermi appariaateqarfiusussamut.
Ataatsimut isigalugu pingaarnerpaavoq,
Maliinannguaq M. Mĝlgaard-imut, Manasse Berthelsen-imut Johan Lund Olsen-imullu
oqaatigissvara, Naalakkersuisunit oqaatigisara isumaqatigiinniarnerit
nanginneqassasut, taakkulu isumaqatigiissuteqarlutik tamarmik naammagisaannik
ammit akii pillugit isumaqatigiinniarnerit naammassineqassasut.
Raajartassat eqqarsaatigalugit Johan Lund
Olsen-ip oqaatigisaanut tunngatillugu, soorlugooq ersisaariinnartunga. Kisianni
akissuteqarpugut unneqqarissumik, isumaqarpunga Naalakkersuisutut
pisussaaffigalugu erseqqissaateqassallunga Inatsisartunut ilaasortaannut. Johan
Lund Olsen ilaatigut oqarpoq: AAvataasiortup ataatsilluunniit
raajartassarisimasaasa ilaannaataluunniit sinerissamut qanittumi aalisarnermut
nuunneqarneratigut inuiaqatigiit ataatsimoortumik aningaasaqarniarnerannut
iluaqutissarisinnaasai pillugit tamanna tigussaanerusumik oqaaseqarfiginngimmassuk.@
Tassa taanna pillugu oqaaseqarpunga, taamatut nuussisoqassagaluarpat pisassanik
suliffiit ikilisinneqassapput, aningaasarsiorneq ajorteriartinneqassaaq aammalu
nunat ataatsimut tamaat isigalugu unneqqarissumik oqaatigisara aamma unaavoq,
naliliisoqarnera massakkullu niueqatigiittarnerit, pissutsit akillu
eqqarsaatigalugit 3.200 tons-it taakkua minnerpaamik 200 mio. kr.-it angullugit
kilisaataatillip pisassaminik arsaarneqartussap piumasarisussaagai, taassuma
qaavatigut ilineqartussaapput, oqareernittut, aalisarsinnaajunnaarnermik
imaluunnit pisassaarutsinneqarnermigut eqqartuussivinnut tunniussinermigut
piumasaqaatigisinnaasai.
Naalakkersuisut soorunami soqutigaat, Finn
Karlsen Atassummeersoq eqqarsaatigalugu, tulaassuisut ajunngitsumik
periarfissinneqarnissaat. Tassami taanna pissutigerpiarlugu Inatsisartut
aningaasaliinikuupput allatut ajornartumik pisassat
killilerneqartariaqarneranni taamatut aningaasanik ukiumut mio.-it
qulikkaarlugit naatsorsuiffigut ilanngullugit immikkoortitsisoqarneranut
Inatsisartut aningaasanut inatsisaat aqqutigalugu. Tassuunakkut qanoq
aningaasat taakku a-torneqassanersut kattuffiit susassaqartullu allat
peqatigalugit aaqqissuussineq ingerlanneqassaaq.
Maliinannguaq M. Mĝlgaard-ip
oqaatigisaanut tunngatillugu oqaatigissavara issaq oqarmat Diskobugt-imi
ukiarmi Inatsisartut akuerigaat ammerivik pilersinneqassasoq. Isumaqarpunga
taamanikkut akissuteqarninni imatut oqarama; pisariaqartitsisoqalerpat aammalu
aningaasatigut periarfissat allatigullu tunngavissat imatut isikkoqalerpata
ammerivimmik pilersitsisoqartaria-qartoq taava maannakkut sumiinnissaa
aalajangerneqariissanngitsoq. Sanaartortoqanissaa aalajangerneqarpat
sumiinnissaa aalajangerneqarumaarmat. Taanna Inatsisartunit annertunerusumik
oqaaseqarfigineqanngilaq, imatullu paasivara ammerivimmik pilersitsisoqassappat
sumiinnissaa suli aalajangerneqanngilaq.
Maliinannguaq M. Mĝlgaard-ip aamma
apeqqutigaa Piniarneq pillugu Siunnersuisoqatigiit, taakku pinnguatsiarakkit,
Ammerinermut Ataatsimiititaliaq, aap Piniarneq pillugu Siunnersuisoqatigiit
ataaniittussaavoq ammerinermut tunngatillugu ataatsimiititaliassaq. Maannakkut
oqaatigisinnaavara Piniarneq pillugu Siunnersuisoqatigiit malittarisassaat
aammalu ilusilersorneqarnerata ilusissaa susassaqartunut
tusarniaatigineqarmat, taanna pilersinneqareerpat taanna ataatsimiititaliaq
ataaniittussaq pilersinneqassaaq.
Maliinannguaq M. Mĝlgaard-ip aamma
oqaatigivaa qineqqusaarnermi kingullermi oqaatigisimaginga kilisaassuit Royal
Greenland A/S-ip pigisaisa pisassaasa ilaat sinerissamut qanittumi aalisartunut
nuunneqarsinnaanerat siunnersuutigisimaginga. Ilumoorpoq taanna
siunnersuutigisimavara, kisianni maannakkut aalisarnermut inatsit,
Inatsisartut aamma akuerisimasaat, aammalu pisassiisarnermut periutsit
maassakkut aamma Inatsisartunit tunngaviusumik akuerineqarsimasut
imaaliinnarluni nuutsisinnaanermut periarfissat periarfissaqartinngilaat.
Aammalu soorunami siunnersuuteqareernerup kingorna inerteqqutaanngilaq nammineq
aamma siunnersuutigisimasap nalileqqinnissaa. Tassalu nalileqqissimavara,
aammalu Naalakkersuisuni isumaqarpugut aningaasarsiornikkut taamak
ataasiinnaatigisumik, maannakkuugallartoq suli, ingerlatsisoqartillugu
nunatsinni, tassa aalisarneq eqqarsaatigalugu kisiat maannakkut
aningaasarsiorneq tunngavigaarput. Taanna kisiat annertunerusumik
tunngavigitillugu mianersortariaqarpugut tassani aningaasat
pissarsiarineqarsinnaasut nikisinneqarsinnaanerat, ajorseriarnissaata tungaanut
imaluunnit pitsanngoriarsinnaanerata tungaanut, isumaliuutigeqqissaarlugit
misissueqqissaarluni tunngaveqarluni aalajangerniarnermi
tunngaveqartoqartariaqartassasoq, pisariaqarpoq taanna. Tamakkulu
tunngavigalugit uani akissuteqaatikka tamakku tunngavigalugit tunngaveqarput.
Taamatut oqaaseqarlunga partiinut
assigiinngitsunut arlalippassuartigut isumaqatigiittugut Aalisarnermut,
Piniarnermut Nunalerinermullu Ataatsimiititaliap isumaliutissiissutaani
isuma-qatigiissutigut isumaqatigiissutigigassigit qujassutigaara.
Oqaluuserisaq naammassivoq.