Kalaallit Nunaanni Inatsisartut

Pingasunngornikkut apeqquteqaat3		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Pingasunngorneq 28. maj 1997 nal. 17.20

 

Pingasunngornermi apeqquteqaatit.

 

 

 

Ataatsimiinnermik aqutsisoq: Inatsisartut Siulittaasuat Jonathan Motzfeldt.

 

Finn Karlsen, apeqquteqartoq, Atassut:

Pingasunngornikkut apeqquteqaatinik immikkoortunik marlunnik nassitsisimavunga.

Siullermik savaateqarfinni aqqusinniornerit aqquserngillu aserfallatsaaliungaaneri pillugit apeqquteqaateqarpunga.  Tassa nalunnginnakku savaateqarfinni aqqusinniorneq pillugu misissui­soqartoq aningaasaliisinnaaneq eqqarsaatigalugu.

 

Savaateqarfiit ilaatigut 80 km.it missaani takissusilinnik aqqusineqarmata taamaattumik kommu­nit assut ajornartorsiutaalersimavoq aqqusinernik aserfallatsaaliuineq naammattumik aningaasa­liiffigissallugu. Tamatuma kingunerivaa savaateqarfinni aqqusinilukkaluttuinnarneq, taamaasil­luni maskinatinut naleqaqisunut aqqusinilunnerujussuaq assut nungullarsaataalluni.

 

Taamaattumik apeqqutigerusuppara savaateqarfinni aqqusinernut aserfallatsaaliuinermullu aningaasaliisinnaaneq pillugu misissuineq sumut killinnersoq.

 

Paaviaaraq Heilmann, Aalisarnermut, Piniarnermut Nunalerinermullu Naalakkersuisoq:

Inatsisartunut ilaasortap hr. Finn Karlsen-ip apeqquteqaataanut akissutinut aallaqqaatigalugu uppernarsassavara Naalakkersuisut savaateqarfinni aqqusinniortarneq pillugu ajornartorsiutaasut ilisimaarimmatigit. Tassami attaveqarnermut pilersuinermullu atortulersuutit ingerlalluartut savaateqarnermi inuussutissarsiutip ineriartortinneqarnissaanut pingaaruteqarmata.

 

Naalakkersuisuni isumaqarpugut Namminersornerullutik Oqartussat aqquserngit tamakku kommunit peqatigalugit suli aningaasalersueqataasariaqaraat.

 

1997-imut ilassutitut aningaasanut inatsisissamut atatillugu Naalakkersuisut aappassaaneerinnin­nissamut allannguutissamut siunnersuuteqarput, tassani siunertarineqarluni kontokkut immikko­ortitakkut ukioq manna aningaasaliissutissanik immikkoortitsisoqassasoq.

 

Ajornartorsiutaasut pillugit immikkuualuttunik eqqartuinissaq pinngitsoorniarlugit Naalakkersui­sut allannguutissatut siunnersuutaat allakkatinut akissutinnut ilanngussatut ilanngunneqartoq innersuussutigissavara.

 

Kiisalu uppernarsassavara ukiup matuma ingerlanerani aaqqiisuteqavinnissamik nassaarniarluni sulineq ingerlateqqinneqassammat, taamatut sulinermi soorunalimi Naalakkersuisut kommunit ilanngullugit pineqartut peqataatissavaat.

 

Finn Karlsen, apeqquteqartoq, Atassut:

Akissutisiara assut naammagisimaarpara, tassami agguataaraanni angisoorujussuunngikkaluar­poq, kisianni isumaqarpunga taakku aallarnisaataasinnaasut aamma neriullunga ukiuni tullerni milliartornatik alliartorusaalaarumaartut.

 

Upernaaq manna -tassa uagut februarimi upernareertaratta kujataarmiuugatta- upernaaq manna februarimi illorsuartaarpugut kultur huse-mik aningaasarpassuarnik nalilinnik, soorunami tamatta isumalluarfigeqisatsinnik. Kulturikkut suliniarnitsinni annertuumik aallavittut atugassatut takorlooratsigit.

 

Uanga nammineq annertuumik isumalluaqataasimavunga kulturimik illuarsartaarnerput tunnga-  vigalugu, kulturerput oqaluttuarisaanerpullu tunngavigalugit isiginnaagassiortartugut, aammalu nunarput sinnerlugu nunani allani immaqa annertunerpaamik oqaluttuarisaanitsinnut tunngasu­mik nittarsaassisorisartakkavut kulturikkut illorsuartaarnitsinni pitsaalluartumik periarfissaqassa­sut, tassalu tassani Silamiukkut eqqarsaatigaakka. Kisianni paasigakku siornatigut illuutigisamin­ninngaanniit kulturikkut illorsuannut nuunnermik kingorna periarfissakilliornerujussuanngorsi­masut. Taamaattumik apeqqutigerusuppara qanoq pilersaaruteqartoqarnersoq kulturikkut illorsuatsinnik Silamiukkut eqqarsaatigalugit. Aammalu sinerissamut allamut Kalaallit Nunatsin­nut qanoq sumullu atorniarneqarnersoq, kulturip illorsua, nunanullu allanut.

 

Konrad Steenholdt, Kultureqarnermut, Ilinniartitaanermut Ilageeqarnermullu Naalakkersuisoq:

Inatsisartunut Ilaasortaq aperivoq isiginnaartitsisartoqatigiit Silamiut pillugit, tassa kulturip illorsuani suut pilersaarutaanersut, kiisalu kulturip illorsua, nunatta sinnera nunallu allat eqqar­saatigalugit qanoq atussamaarneqarnersoq.

 

Isiginnaartitsinerit kulturip illorsuassaata pilersaarusiorneqarnerani pinngitsoorani suliniutinut ilaatinneqarnissaat eqqarsaatit ilagiuarsimavaat, suli kisiartaallutik isiginnaartitsisarnernik ingerlataqartuummata Silamiut.

 

Oqaluuserisaq naammassivoq.