Pingasunngornikkut apeqquteqaat4 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Pingasunngorneq 4. juni 1997 nal. 17.10
Ataatsimiinnermik aqutsisoq: Jonathan Motzfeldt, Inatsisartut Siulittaasuat:
Mikael Petersen qinnuigissavara saqqummiusseqqullugu, taanna pereerpat tullianik ataatsi-miinnissaq aalajangiiffigineqassaaq, tassalu ataatsimiinneq naammassiniassavarput.
Mikael Petersen, apeqquteqartoq:
Siullermik oqaatigissavara
nuannaarutigigakku manna siunnersuut matuma ataatsimiinnerup naalivinnerani
ilanngullugu apeqquteqaatitut saqqummiunneqarsinnaatinneqarmat.
Aalisariuteeqqat Q23-t ESU-kkoorlugit
pisaarineqarsimasut taarserneqarsinnaalernissaannik periarfissiisoqarnissaanik
apeqquteqaat:
Aalisariuteeqqaat Q23-nik taaneqartartut
amutsiviit Qaqortumi sanaartugaasa ilaat piginnittuminnit annertuumik
ajornartorsiuteqarfigineqarput. Aalisartut Q23-nik angallateqartut arlallit
saaffiginnissuteqartarsimagaluarput kinguneqartanngitsumilli, tassa
saaffiginnissutaasartut KIS-imut, Amutsivinnut, kommuninut, Aalisarnermut,
Piniarnermut Nunalerinermullu Naalakkersuisoqarfimmut ingerlanneqartarsimagaluarlutik.
Oqaatigissuaralu allaat aalisartuninngaanniit massakkut ilanngullugu
misissorneqarluni eqqartuussisoqarsinnaanera.
Q23-t nutaatut sanaartorneqalermata
Amutsivinniit aalisartunut neqeroorutigineqarsimapput angasattajaangaartumik eqquutsinneqanngitsumillu.
Matumani erseqqissarneqarpoq neqeroorutigineqarsimasut nutaatut
sanaartorneqaleramik 2,5 tons-inik useqarsinnaasutut - lastia qaavalu
eqqarsaatigalugit. Misilittakkalli massakkut ersarilluinnartumik takutikkaat
aalisariuteeqqat 1 tons qalerallit usigiinnarlugit kingornatungai immap
iluaniilereertartut - aalisartunut angallammullu annertuumik
ulorianartorsiortitsisumik, allaallumi inuunermik ulorianartorsiortitsinermik
kinguneqartartumik.
Naatsumik oqaatigalugu aalisariuteeqqat
Qaqortumik sanaartorneqartut, Q23-inik taaneqartartut, qaleralinniutitut
imminnut akilersinnaanerat killilerujussuuvoq, allaallumi imminnut akilersinnaajunnaavittutut
oqaatigineqareersinnaallutik. Taamatut aalisariutitut atorneqarsinnaanissaminnut
aamma motor-ilersorneqarnerat tulluutinngitsutut uppernarsarneqarsimavoq.
Taamaattumik maani siunnersuut
naalisarlugu Naalakkersuisumut apeqqutigissavara taakku aalisariuteeqqat
pineqartut ESU-kkoorlugit aningaasalersorneqarsimasut piaartumik allanik
taarserneqarsinnaalernissaat anguniarlugu suliniuteqarneq sumut killinnersoq,
tassami aamma apeqquteqaatitut ingerlatereersimagakku ukiarmi Inatsisartut
ataatsimiinneranni.
Taamatut pisoqarnissaa
pingaaruteqarluinnarpoq, immikkut aaqqissuussisoqarnissaa, tassa angallateeqqat
taakku pineqartut avannaani allanit piginnittut saniatigut
piumaneqarsinnaanerat ilimananngilluinnarmat. Taamaattumik inatsisitigut
ESU-kut aaqqiinissaq pisariaqartutut taasariaqarluni.
Paaviaaraq Heilmann, Aalisarnermut, Piniarnermut
Nunalerinermullu Naalakkersuisoq:
Inatsisartunut ilaasortap Mikael
Petersen-ip apeqquteqaataanut akissutitut aallaqqaasiullugu, taamatut
tallimanngornikkut apeqquteqaat Inatsisartut 1996-mi ukiakkut
ataatsimiinneranni oqaatigineqartoq akissuteqarfigineqartorlu
innersuussutigissavara.
Ukiakkut ataatsimiinnermit
tallimanngornikkut apeqquteqaatit assilineqarnera, tassangalu akissuteqaat
matumunnga akissuteqaammut ilanngunneqarpoq. Oqaatigineqassaaq Inuussutissarsiornermut,
Angallannermut Pilersuinermullu Pisortaqarfik Amutsivinnut suliassaqarfittut
akisussaasoq angallatit Q23-t pillugit Uummannap kommunianit
saaffigineqarsimammat pisortaqarfimmi tassani suliarineqartussamik.
Naalakkersuisut Inuussutissarsiornermut,
Angallannermut Pilersuinermullu Pisortaqarfiup suliamik suliarinninnerata
inernissaa utaqqivaat, tassannga paasisat saqqummiunneqarnissaasa tungaannut
Naalakkersuisut siusinnerusukkut akissuteqarfigineqarsimasoq tunngavigissavaat.
Naggasiullugu oqaatigissavara sukumiisumik
misissuisoqarnissaa Naalakkersuisoqarfimmit pineqartumit
akissuteqarfigineqariarpat sukumiisumik misissuiffigineqarnissaa
neriorsuutige-riissagakku.
Mikael Petersen, apeqquteqartoq:
Akissuteqaammut qujavunga, kisianni
erseqqissaatigissavara una suliaq suliassarlu imaannaanngitsuupput,
taamaattumik neriuppunga Naalakkersuisut tungaanninngaanniit pingaartutut
suliassatut isigineqarumaartoq. Tassami aalisartut arlalissuit tamatumani
pineqarput aammalu piaartumik aaqqiivigineqarnissaminnut utaqqillutik.
Otto Steenholdt, ataatsimiinnermik aqutsisoq:
Taamaalilluni akissuteqarneq tassunga
naavoq.
Oqaluuserisaq naammassivoq.