Oqaluuserisassani immikkoortoq 01 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Oqaluuserisassat
avataatigut.
Ataatsimiinnermik aqutsisoq, Inatsisartut Siulittaasuat, Anders Andreassen:
Ataatsimiinneq aallartitsinnagu nalunaarutigissavara ullumi nunarput canadamiunik tikeraartoqarmat, nuannaarutigaaralu maanna ataatsimiinnitta aallartinnera najorumasimammassuk. Tikilluaritsi ataatsimiilluarisilu.
Ataatsimiinnermik aqutsisoq: Finn Karlsen, Siulittaasup tullia siulleq, Atassut.
Inatsisartut Siulittaasuat, Anders Andreassen:
Ataatsimiinneq ammarpoq.
1998-imi aappassaannik ataatsimiinnissatsinnut - Upernaakkut ataatsimiinnermik taasatsinnut - Inatsisartut Naalakkersuisunullu ilaasortat uummammik pisumik tikilluaqquakka.
Siulittaasoqarfimmi ataatsimiinnissamik matumannga piareersaanitsinni ataatsimiinnissap qanoq iluseqarumaarnissaa pissanngatigisimaqaarput, ataatsimiinnermummi kingullermut - Ukiukkut Ataatsimiinnermik taasimasatsinnut - suliassiissutaasinnaagaluit Upernaakkut Ataatsimiinnissamut kinguartinneqartarsimammata.
Qujanartumilli Naalakkersuisunit ilaasortanillu siunnersuutit manna tikillugu tigusimasavut amerlassutsimikkut imaapput ataatsimiinnissaq qaammammik ataatsimik sivisussusiligaasimasoq allanngortinneqassagunarani. Taamaattoqassappalli suliassat piareersarnerat piffissarititaasumi naammassineqartassaaq. Tamannalumi tamatta siunnerfiginnguatsiarparput.
Ajoraluartumik ullumi tamarmiunngilagut, tassa Inatsisartunut ilaasortat Naimángitsoq Petersen, Malînánguaq Marcussen-Mølgaard aamma Jakob Sivertsen assigiinngitsunik pissuteqarlutik ullumi ataatsimeeqataasinnanngimmata.
Pisarnertut Inatsisartut sinnerlugit ukununnga inuulluaqqusissutit nassiussimavakka: Ataqqinartorsuaq Dronning Margrethe II, kunngikkormiutut ataqqinassusilik Prins Henrik, Statsministeri, Danmarkimi Inatsisartut Siulittaasuat, Islandimi Altingip Siulittaasua kiisalu Savalimmiuni Lagtingip Siulittaasua.
Taama naatsumik oqaaseqarlunga tikilluaqqoqqippassi.
Taavalu immikkoortumut tullermut nuutsinnata Siulittaasup tullia Finn Karlsen qinnuigissavara ataatsimiinneq aqoqqullugu maani saqqummiussisussaanera pillugu.