Oqaluuserisassani immikkoortoq 09-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq: Inatsisartut Siulittaasuat Anders
Andreassen.
Daniel Skifte, Aningaasaqarnermut Ineqarnermullu
Naalakkersuisoq:
Umiarsiualivimmiinnermut
akileraarutit pillugit Inatsisartut inatsisaata allanngortinneqarneranik
Inatsisartut inatsisissaannut siunnersuut matumuuna Naalakkersuisut sinnerlugit
saqqummiutissavara.
Inatsisartut inatsisaat maanna
atuuttoq malillugu umiarsuit namminneq aalajangersinnaavaat, umiarsuup
usitussusiata bruttotons-imik imaluunniit Bruttoregistertons-imik
uuttortarneqarnera tunngavigalugu akileraarut naatsorsorneqassanersoq.
Naatsorsuutigineqarsinnaavoq umiarsuit amerlanersaasa Bruttoregistertons
uuttuutitut atortaraat, taaassumami atorneratigut umiarsuup usitussusia,
aammalumi akileraarutissaa minnerussammat.
Umiarsuit amerlanersaasa siunissami
bruttotons-iinnarmik nalunaarsortittarnissaasa ilimagineqarsinnaanerat
eqqarsaatigalugu, siunissami bruttotons-ip umiarsualivimmiinnermut
akileraarutip naatsorsorneqarnerani uuttuutitut atorneqartarnissaa
naleqquttuussammat, siunnersuuutikkut matumuuna anguniarneqarpoq
umiarsualivimmiinnermut akileraarutit naatsorsorneqartarnerinut tunngaviit
allanngortinneqarnissaat. Sulili bruttoregistertons-iinnarmik
uuttuisitsisimasunik umiarsuaqarmat inatsisissatut siunnersuummi anguniagaavoq ' 3-mi immikkut aalajangersagaliortoqarnissaa,
taamaalillluni umiarsuit taakku umiarsualivimmiinnermut akileraarutaasa
bruttoregistertons uuttuutigalugu naatsorsorneqartarnerat
ingerlatiinnaqqullugu. Taaneqartullumi aammattaaq tunngavigalugit
bruttoregistertons ' 2,
nr.3-mi ' 4-milu
taaneqartoq allanngortinneqarnissaa siunnersuutigineqanngilaq.
Inatsisartut inatsisaat maanna
atuuttoq malillugu umiarsuit bruttotons-iminnik
brutto-regiostertons-iminnilluunniit uuttuisitsisimanngitsut akileraarutinut
akiligassaat Akileraaartarnermi Pisortaqarfimmit missingersorlugit angissusilerneqartussaapput,
takuuk inatsimmi ' 6,
taamaattumillu aalajangersakkap taassuma siunnersuummi matumani
allanngortinneqarnissaa pisariaqartutut isigineqanngilaq.
Naatsorsueriaatsip tunngavianik
teknikkikkut allanngortitsinerussammat, maleruagassat siunnersuutigineqartut
kingunerisaannik akileraarutitigut isertitassat ukiumoortut allannnguuuteqarnissaat
naatsorsuutigineqanngilaq.
Siunnersuut akileraarutit
akitsuutillu qaffanneqannginnissaannik Naalakkersuisut anguniagaannut
naapertuuppoq.
Taamatut oqaaseqarlunga
Naalakkersuisut sinnerlugit, umiarsualivimmiinnermut akileraarutit pillugit
Inatsisartut inatsisaata allanngortinneqarneranik Inatsisartut inatsisissaannut
siunnersuut Inatsisartunut oqaluuserisassanngortippara, akileraartarnermullu ataatsimiititaliamit
suliarineqa-reerpat aappassaaniigassanngortillugu.
Hans Enoksen, Siumup oqaaseqartua:
Naalakkersuisut umiarsualivimmiinnermut akileraarutissiisarnerup inatsisitigut allanngortinneqarnissaanik siunnersuutaat Siumumit tamakkiisumik taperserparput.
Paasivarput allannguutaasussaq teknik-ikkut allanngortitsinermik taamaallaat imaqartoq, taamaakkaluartorli allannguutissap pisariaqartitsineq naapertorlugu paasisitsiniutigineqarnissaa inassutigissavarput.
Taama oqaaseqarluta inatsisissap allannguutissaatut siunnersuutit aappassaaneerneqartinnani akileraartarnermut ataatsimiititaliami oqaluuserineqarnissaa inassutigissavarput.
Sivert K. Heilmann, Atassutip oqaaseqartua:
Aallaqqaammut oqaatigissavarput
umiarsualivimmiinnermut akielraarutit pillugit inatsisartut inatsisaata
allanngortinneqarnissaanik inatsisartut inatsisissaannut Naalakkersuisut
siunnersuutaat Atassummit tapersersorluinnaratsigu, Atassutip pingaartitaraa
kissaatigalugulu sunilluunniit ingerlatitsinerup pisariillisaaffigineqartuarnissaa
aaqqissuussivigineqartarnissaalu, taamaattumik inatsisip massakkut atuuttup,
marloqiusamillu ingerlatinneqartup, siunissami bruttotons-iinnarmik
umiarsualivimmiinnermi akielraarutip naatsorsornerani uuttuutitut
atorneqartarnissaa naleqquttutut Atassummiit isigaarput.
Atassummiit nuannaarutigaarput
Naalakkersuisut siunnersuummi akileraarutit akitsuutillu
qaffanneqannginnissaannik siunnerfeqarmata, taamaallaalli naatsorsueriaatsip
tunngavianik teknik-ikkut allanngortitsinerummat.
Taama naatsumik oqaaseqarluta
inatsisissatut siunnersuutip aappassaaniinnginnerani akileraartarnermut
ataatsimiititaliamit suliarineqarnissaa Atassummiit akuersaarparput.
Manasse Berthelsen, Inuit Ataqatigiit oqaaseqartuat:
Bruttoregistertons aammalu bruttotons
umiarsualivimmi akileraarutinik naatsorsuinermi atorneqartartut
ataasiinnaanngortinneqarnissaat Inuit Ataqatigiinniit
akornutissaqartinngilarput, tassa umiarsualivimmi akileraarutissanik
naatsorsuinermi taamaallaat bruttotons-ip atorneqartalernissaa.
Taamaammat isumaqataalluta inatsimmut
allannguutissap akileraaartarnermut ataatsimiititaliamut
ingerlateqqinneqaqqaarnissaa aappassaaneerneqannginnerani Inuit Ataqatigiinniit
innersuussutigissavarput.
Bjarne Kreutzmann, Akulliit Partiiat:
Umiarsualivimmiinnermut akileraarutit
pillugit Inatsisartut inatsisaata allanngortinneqarneranik I natsisartut
inatsisissaannut siunnersuut teknik-ikkuinnaq allannguuteqaataasussaq,
taamaattumillu maleruagassat siunnersuutigineqartut kingunerisaannik
akileraaarutitigut ukiumoortumik isertitaqaataasartunut
allannguuteqangaartussaassanngitsoq naatsorsuutigineqartoq, Akulliit Partiiat
sinnerlugu tamakkiisumik taperserpara.
Taama isummernernut ilaatigut aamma
patsisigaara akileraarutit akitsuutilluunniit qaffanneqarnissaannut
isumaqataannginnama, taamaattumillu inassutigissavara siunnersuut inersuarmi
maani aappassaaneerlugu oqaluuserineqannginnermini taama isikkoqarluni
akileraartarnermut ataatsimiititaliamut ingerlaqqissasoq.
Anthon Frederiksen, Kattusseqatigiit:
Umiarsualivimmut akileraarutit pillugit
Inatsisartut inatsisaata allanngortinneqarnissaanut siunnersuut
Kattusseqatigiinniit isumaqatigaarput, tassami taamaallaat naatsorsueriaatsip
tunngavianik teknik-ikkut allanngortitsineruinnartussaammat aammalu
akileraarutitigut ukiumoortumik isertitatigut sunniuteqartussaanngimmat.
Piffissarli ungasissorsuunngitsoq,
imaluunniit ukiut tulliuttut eqqarsaatigalugit Kattusseqatigiinniit
Naalakkersuisunut kaammattuutigerusupparput, aammalu akileraaartarnermut
ataatsimiititaliamut nalilersoqqullugu, ukiuni kingullerni
umiarsuapiluunersuit takornarissanik ulikkaarlutik nunatta sineriaanut
pisartut, nunanit allaneersut
nunatsinnut tikittarnerisa akileraartinneqartalernissaat aamma
nakkutigilluarneqalernissaat sulissutigeqqullugu, tassami umiarsuit tamakkua
ilaatigut namminneq iluarisannguaminnik pissanngippata arlaatigut
nakkutilliineq aqutsisinnaannerlu pitsaasoq takutinneqartariaqarput.
Taamatut naatsumik oqaaseqarlunga suliap
aappassaaneerneqannnginnermini akileraaartarnermut ataatsimiititaliami
oqaluuserineqarnissaa taperserpara.
Daniel Skifte, Aningaasaqarnermut Ineqarnermullu Naalakkersuisoq:
Siullermik partiit oqaaseqartuinut tamanut
qujavunga, malunnarpoq Naalakkersuisut siunnersuutaat tamakkiisumik
ilassilluarneqartoq, tamanna nuannerpoq, qujanarujussuarlu.
Oqaatigissavarattaaq naggataatigut partiit
soorlu Siumup aammalu Kattusseqatigiit kaammattuutaat akileraartarnermut
ataatsimiititaliami aamma nalilersorneqarnissaat naatsorsuutigalugu
kingusinnerusukkut uterfigineqassammata, taama naatsumik oqaaseqarlunga
taamatut siunnersuutip ilassilluarneqarnera qujasutigaara, qujanaq.
Oqaluuserisaq naammassivoq.