Oqaluuserisassani immikkoortoq 25-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq, Inatsisartut Siulittaasuat Anders Andreassen:
Taava tikissavarput immikkoortoq 25, tassalu aalisarneq pillugu inatsisartut inatsisaata allanngortinneqarneranik inatsisartut inatsisissaanik siunnersuut siullermeerneqarnera, tassani siulliulluni saqqummiussissaaq Niels Mátâq, tassalu Hans Enoksen-ip siunnersuutaa saqqummiuteqqaarallassavaa, Hans Enoksen-ni massakkut maaniissinnaanngimmat.
Niels Mátâq, Siunnersuuteqartoq Hans Enoksen-ni sinnerlugu, Siumut:
Siunnersuut
saqqummiussassara imatut aallartippoq, tusarparput sinerissap killingani Royal
Greenland-ip kilisaateeqqanik piseriarluni raajarniartitsiniarnera aallartinniarneqartoq.
Taamatut aaqqiiniarneq tulluanngilaq unitsittariaqarlunilu.Tassami maannakkut
aalisartut pisassaat ima killeqartigilersimapput aalisarnertik killilimmik
ingerlatilersimallugu. Ukiup
naanissaanut ingerlaannarsinnaanissartik anguniarlugu.
Tulluartuugilluinnarpoq aalisartut pikkorissut
angallatitaarusukkaluarlutik periarfissaqaratik periarfissaqanngitsut,
sanioqqutiinnarlugillu Royal Greenland imminut periarfissinnialermat.
Tassalu siunnersuutigaara pisassat sinerissap
killingani raajarniartunut tunniunneqassasut imaluunniit aalisartunut
inuusuttunut angallatitaarniartunut tunniunneqassasut, nutaamik
aallarteriarnissaannut periarfissatut.
Paaviaaraq Heilmann, Aalisarnermut, Piniarnermut,
Inuussutissarsiornermut Nunalerinermullu Naalakkersuisoq, Siumut:
Naalakkersuisut sinnerlugit matumuuna aalisarneq
pillugu Inatsisartut inatsisaata allanngortinneqarnissaanik siunnersuut
saqqummiutissavara.
Inatsisissatut siunnersuummi pineqartut
aalisariutit ilaannut immikkoortunut ukununnga immikkoortinneqarsinnaapput:
- angallatit
avataasiorlutik nioqqutissiorfiuutigisut immani nunatta aalisarnikkut oqartussaaffigisaani
taakkulu avataani aalisarnerat.
- nunat
allamiut angallataasa nunatsinnut tulaassuinerat angallammulluunniit allamut usingiartarnerat.
- sinerissamut
qanittumi raajarniutit pisassiissutinit pigisaat.
Taakkua saniatigut tassani pineqarpoq
inuussutissarsiutigalugu aalisarsinnaanissamut inatsimmi aalangersakkanit
immikkut akuerineqarnissamut periarfissanik annertusisitsinissamik siunnersuut.
Angallatit avataasiorlutik
nioqqutissiorfiuutigisut eqqarsaatigalugit inatsisissatut siunnersuut nunatta
nunat tamalaat akornanni pisussaaffiisa annertunerulernerata kingunerisaanik inatsisip
atuuffiata annertusinissaanik imaqarpoq, ilaatigut angallatit nunatsinneersut
imartani nunatta aalisarnikkut oqartussaaffiginngisaani aalisartut
aalisarsinnaanermut akuersissummik peqartariaqarnerannik eqqussinissamik.
Taakkua saniatigut nunani allamiut angallataasa nunatsinnut tulaassuinerat
imaluunniit angallammut allamut usingiartarnerat inatsimmik allanngortitsinissamik
siunnersuummi pineqarpoq.
Siunnersuutit nunatta angallatit nunatsinni
nalunaarsorsimasut nunat tamalaat imartaanni aalisarnerini aalisarsinnaanermut
akuersissuteqarfiginnittussaatitaalerneranik nunanut allanut
pisussaaffeqarlernerata kingunerai. Tassani pingaarnerpaamik pineqarput
Atlantikup Avannaani Kitaani aalisarneq pillugu suleqatigiiffiup, NAFO-p, aamma
Atlantikup Avannaani Kangiani aalisarneq pillugu kommission-p, NEAFC-p,
nakkutigisaanni aalisarneq. Sumiiffinni naalagaaffiit allat oqartussaasuinit
nakkutigineqartuni - matumani ilaatigut Svalbard-ip eqqaani aalisarneq
eqqarsaatigalugu - nunatta aalisarneranut aalisarsinnaanermut
akuersissuteqartarneq inatsisissatut siunnersuummut ilaavortaaq.
Ukiuni qaangiuttuni nunat tamalaat imartaanni
immanilu nunat allamiut aalisarnikkut oqartussaaffigisaanni nunatta
aalisarsinnaatitaanini tamakkiisumik iluaqatigisarsimanngilaa. Assersuutigalugu
Flemish Cap-mi raajarniarnermut peqataaneq annikitsuinnaasimavoq, aammalu
immami Svalbard-mut atasumi angallataativut 1982-ip kingorna
peqataasimanngivillutik. Aalisarsinnaanermut pisinnaatitaaffiit taakku
iluaqutigineqannginnerata kilisaataatileqatigiiffiit nunatsinni
nalunaarsugaanngitsut soqutiginninnerisa annertusiartornerat kingunerisimavaa.
Taamaattumik pissutsini taaneqartuni
aalisarsinnaanermut akuersissuteqarfigineqartussaatitaalerneq nunatta
soqutigisaanik illersuisuussaaq, tassami angallatit nunatsinni nalunaarsugaasut
akuersissuteqarfigineqartussaatitaalernerat, inatsimmi piginnittussaanermik
piumasaqaatit naammassineqarnissaanik pisussaaffimmik ilallugu, nunat allamiut
angallataasa nunatta avataani nunatta aalisagartassaanik aalisarnissartik
siunertaralugu angallatiminnik nunatta erfalasuanik erfalasuliisarnissaat
pinaveersimatissammagu.
Inatsisip atuuffiata nunat tamalaat imartaanni
aalisarnermut annertusinissaa Naalagaaffiit Peqatigiit immami pisinnaatitaaffiit
pillugit isumaqatigiissutaanni aalajangersakkanut, aalisakkat angalaartut
ungasissumullu nuuttartut pillugit Naalagaaffiit Peqatigiit
isumaqatigiissutaannut kiisalu Naalagaafiit Peqatigiit inuussutissat
nunalerinerlu pillugit suleqatigiiffiata, FAO-p akisussaassusilimmik
aalisarnermi pissusilersortarnissamut najoqqutassiaanut naapertuuppoq.
Allanguutissatut siunersuutip nunatsinnut
tunngasortai Naalakkersuisut nunatsinni aalisariutit inuttalersornerannut
malittarisassat allanngortinnissaat pillugu anguniagaannik imaqarpoq. Tamanna
pissuteqarpoq aalisariutit avataasiortut 1990-ikkunni aaqqissuussaanikkut
annertuumik naleqqussagaasimanerannik. Angallatit avataasiortut
nioqqutissiorfiuutigisullu atorlugit raajarniarnerup aaqqissuussaanerinnaata
angallatit 1990-mi 48-niit maannakkut 1998-mi 16-inngornerata kinguneraa.
Ikinnerulernerat imaani suliffiit ilimagineqartutut affaannanngornerannik
kinguneqarpoq. Taamaalilluni inatsisissatut siunnersuutip nunatsinni
aalisariutit inuttalersonerannut atatillugu nunaqavissuunissamik piumasaqaatit
inatsisitigut erseqqissarnerat nassataraa. Erseqqissaanerup taassuma
Naalakkersuisut inuttalersuinermut malittarisassanik, aalisariutinut
avataasiortunut nioqqutissiorfiuutigisunullu tunnganerusunik
sukanganerulersitsisinnaalersissavaat.
Siunnersuummi aamma pineqarpoq
inuussutissarsiutigalugu aalisarsinnaalernissaq pillugu inatsimmi
aalajangersakkanit immikkut akuersissuteqarfigineqarsinnaanermut periarfissanik
allilerineq. Aalisarneq pillugu inatsimmi maannakkut atuuttumi
piumasarineqarpoq inuit aalisarnermik inuussutissarsiuteqarlerniartut
qaammatisiutit ukiuini kinguleriinni marlunni inuussutissarsiutigalugu
aalisarnermik ingerlataqarsimassasut kiisalu isertitaasa tamarmiusut
minnerpaamik pingajorarterutaat marluk aalisarnermit pisuussasut. Taamaattumik
naalakkersuisut siunnersuutigaat immikkut akuerineqarnissamut periarfissat
annertusineqassasut, taamaalilluni inuusuttut ajornannginnerusumik
aalisarnermik inuussutissarsiuteqarlersinnaanngorlugit. Immikkut akuerineqarsinnaanermut
aalajangersagaq nutaaq taamatuttaaq siusinnerusukkut aalisartuusimasut
inuussutissarsiummut uternissaannut ajornannginerulersitsissaaq.
Siunnersuutip aammaattaaq umiarsuaatillip
sinerissamut qanittumi raajarniarnermi pisassiissutinit procent-nik qassinik
pigisaqarsinnaanerata appartinneqarnissaa imaraa. Maannakkut aalajangersakkat
atuuttut inunnut ingerlatseqatigiiffinnulluunniit pisassiissutit tamarmiusut 10
%-iinik pigisaqarnissamut periarfissiipput. Pisassiissutinit pigisat procent-ata 6 %-inut
appartinnissaa siunnersuutigineqarpoq. Sinerissami qanittumi raajarniarnermi
piginnittuunerup siammarnerunissaata angunissaa qularnaarumallugu
Naalakkersuisut tamanna siunnersuutigaat. Kisitsisip 6 %-iunissaa
nalaatsornerinnakkut toqqagaanngilaq. Tassami ullumikkut naminersortut
kilisaataatileqatigiiffiat ataaseq 5 aamma 6 %-it akornanni peqareerpoq.
Naalakkersuisut isumaqarput pisassiissutit tamarmiusut 6 %-iinik pigisaqarneq,
maannakkut raajanut TAC eqqarsaatigalugu, angallitit ullumikkut sinerissami
qanittumi raajarniarnermi peqataasinnaasut angissusiinut naleqquttoq.
Aalisarneq pillugu Inatsisartut
inatsisaata allanngortinnissaanik siunnersuut Aalisarneq pillugu
Siunnersuisartoqatigiinnut KANUKOKA-mut, Politimesterqarfimmut kiisalu
Kangilinnguani Sakuutooqarfimmut tusarniaassutigineqareerpoq. KANUKOKA,
Politimestereqarfik, Kangilinnguani Sakkutooqarfik aamma APK inatsimmut
siunnersuummut oqaaseqaatissaqarsimanngillat.
KNAPK tusarniaassummut akissutimini
nammineq aalisarneq pilllugu Inatsisartut inatsisaannut allannguutissatut
siunnersuummut missingiummik oqaasertaliorsimavoq. Missingiut taanna
makkuninnga imaqarpoq:
Siullermik KNAPK isumaqarunarpoq
inatsisip siunertaani qitiutinneqartoq allamut saatinneqartariaqartoq. Manna
tikillugu tassani nunami suliassaqartitsineq, taamatullu aamma imaani
suliassaqartitsineq nunamilu tunisassiorfiit aningaasaqarnerat
isiginiarneqarsimapput. KNAPK, kattuffiup tusarniaassummut akissutaa
naapertorlugu, isumaqarunarpoq siunissami siunertat pingaarnersaat
aalisarnermik inuussutissarsiuteqarnermi aningaasaqarnerinnarmut sammitinneqassasoq.
KNAPK-p aammaataaq siunnersuutigaa
procent-it sinerissamut qanittumi paasissiissutinit umiarsuaatillit annerpaamik
pigisinnaasaat appartinneqassasut. Pisassiissutinit pigisat procent-ata
annerpaaffissaata 5%-imut appartinneqarnissaa siunnersuutigineqarpoq. KNAPK-p
aammattaaq siunnersuutigaa ingerlatseqatigiiffiit Namminersornerullutik
Oqartussanit pigineqartut katillutik, tassa ingerlatseqatigiiffiit aqutaat
ilanngullugit, annerpaamik 5 %-mik pigisaqassasut.
Kiisalu KNAPK-p siunertaraa
sinerissamut qanittumi aalisarnermi pisat ilaasa angallammi,
umiarsuarmiluunniit tunitsimmi, tunisassiarineqarsinnalernisaat.
Naalakkersuisut KNAPK-p aalisarneq
pillugu Inatsisartut inatsisaata allanngortinnissaanut missingiusiaanut
imaatunik oqaaseqarniarput:
Naalakkersuisut isumaqarput
aalisarnermik inuussutissarsiuteqarnerup suliassaqartitsinikkut sunniutaa sutigut
tamatigut annertunerpaamik iluaqitigineqassasoq. Aalisarnermik inuussitissarsiuteqartut
aningaasaqarniarnerinnaata isiginiarneqalerneratigut nunami suliffissuit suli
annertunerusumik suliassatigut annikkisaartitaalernissaat naalakkersuisut
siumut naatsorsuutigereersinnaavaat. Naalakkeruisut taamaalillutik
raajartassiissutit ikiliartuinnarnissaannut aarlerinartoqartuartillugu
inatsisip siunertaani aalajangersakkanik allanngortitsilersaanngillat.
Naalakkersuisut procent-nik pigisat
annerpaaffissaata umiarsuaatillip inuuilluunniit ataasiakkaat pigisinnaasaasa 5
%-inngortinnissaannut tunngaviatigut KNAPK-mut akerliunngillat. Taamaakkaluartoq
Naalakkersuisut siunnersuutiminni 6 %-mik killiliinissamik
siunnersuuteqarumallutik aalajangernerat kilisaataatileqatigiiffiup
namminersortup pisassiissutit 5 aamma 6 %-inik pigisaqareerneranut
attuumasseteqarpoq.
Kilisaataatileqatigiiffiup taassuma
aalisarsinnaatitaanerminik tunisaqarnissaanik pinngitsaalinissaa
Naalakkersuisut isumaat malillugu inatsimmik tunngavissaqarani
arsaarinninnerussaaq.
Naalakkersuisut KNAPK-p sinerissamut
qanittumi aalisarnermi pisat ilaasa angallammi namminermi
tunisassiarineqarsinnaanerannik imaluunniit umiarsuarmut tunitsivimmut
niuneqarsinnaanissaannik siunnersuutaa akuersaarsinnaanngilaat. Naalakkeruisut
isumaqarput suliniut taamaattoq aammaattaaq - aalisarneq pillugu inatsisp
siunertaata allangortinnissaanik siunnersuutaasoq assigalugu - aalisarnerup
nunami suliassaqartitsiniarnermut sunniutaanik navianartorsiortitsisinnaasoq,
taamaattumillu tapersersortariaqanngitsoq. Tassungali atatillugu
Naalakkersuisut nassuerutigisariaqarpaat, aalisakkat ilaat eqqarsaatigalugit,
tunitsiviusinnaasunik tunisassiorfiusinnaasunillu tamatigut
pilersitsisoqarsinnaanngimmat. Taamatut pisoqartillugu Naalakkersuisut
isumaqarput umiarsuarnik tunitsiviliisoqarnissaa ajornaqateqanngitsoq.
Naalakkersuisulli isumaqarput umiarsuarnik tunitsiviliisoqarsinnaangitsoq,
inuiaqatigiit nunami naammattunik angummassinnaasunillu
tunisassiorfeqartillugit.
Royal Greenland A/S tusarniaassummut
akissummini makku taasimavai:
Royal Greenland A/S-ip
pisassiissutinit pigisat procent-ata, sinerissamut qanittumi raajarniarnermi
umiarsuaatillip pigisinnaasaasa appartinneqarnissaat makku pissutigalugit
kaammattuutigiumanngilaa:
Royal Greenland A/S isumaqarpoq
siunissami qaninnerpaami angallatinik sinerissamut qanittumi aalisariutinik
nutarterisoqarnissaanut pisariaqartitsisoqartoq. Royal Greenland A/S isumaqarpoq
sinerissamut qanittumi raajarniarnerup aningaasaqarnikkut imminut
akilersinnaanissaanut angallatit maannamut ilisimaneqartunik anginerit
atorneqarnissaat piumasaqaataasoq. Kiisalu taakkua pisassiissutinik
naleqquttumik amerlassusilinnik tunngaveqartariaqartut. Royal Greenland A/S-ip
naliliinera naapertorlugu pigisaqarsinnaanerup annerpaamik 6 %-iunissaa
angallatinik sinerissamut qanittumi atorneqartunik nutarterinissamut
naleqqussaanissamullu pisariaqartinneqartumut killiliisuussaaq. Allatut
iliuusissatut Royal Greenland A/S-ip siunnersuutigaa pisassiissutit ilaannik
procent-nik pigisassat 6 %-inut appartinneqarnissaat 6 %-init amerlanerusunik
pigisaqarnissamut immikkut akuersinissamut periarfissalerlugu.
Naalakkersuisut sinerissamut
qanittumi raajarniarnermi pisassiissutit ilaannik pigisaqarsinnaanerup
siammarnerunissaanik anguniagassatut nalunaarutigsaat eqqarsaatigalugu
Naalakkeruisut Royal Greenland A/S-ip tusarniaassummut akissummini siunnertaa
soorunami akuersaarsinnaanngilaat.
Tusarniaassummut KNAPK-mit aamma
Royal Greenland A/S-mit akissutit piumasqarneq malillugu aammattaaq
Inatsissartut Aalisarnermut, Piniarnermut Nunalerinermullu Ataatsimiititaliaannut
nassiunneqarput.
Taamatut oqaaseqarlunga
Naalakkeruisut sinnerlugit aalisarneq pillugu Inatsisartut inatsisaata allanngortinnissaanik
siunnersuut Inatsisartunut suliareqqitassanngortippara, siunnersuutip
Inatsiartuni aappassaaneerneqannginnerani Inatsiartut Aalisarnermut,
Piniarnermut Nunalerinermullu Ataatsimiititaliaannut
innersuussutigineqarnissaa siunnersuutigalugu.
Lars Karl Jensen, Siumup oqaaseqartua:
Aalisarneq inuutissarsiutaavoq suli
nunatsinni siunissaqarluartoq, naak akit allanngorarneri pissutigalugit
ingerlatsineq oqimaassinnaagaluartoq suli aalisakkanit tunisassiat nunarsuarmi
piumaneqaqaat tamannalu annertuunik nunatsinni suliffissaqartitsivoq.
Taamaattumik Siumup inassutigissavaa
aalisarnermi inatsisip nutarterneratigut makku pingaartillugit
naleqqusarneqassasut:
Siullermik; kilisaatit nunatsinni angerlarsimaffeqartut
imartatsinni nunallu allat imartaanni aalisarsinnaanerisa
periarfissaqartuarnissaat ingerlanneqartariaqarpoq taamatullu nunat atlantikup
avannaaniittut suleqatigalugit periarfissaqartuarnissaat aammalu nunatsinni
aalisagartassat nammineq oqartussaaffigisatta pitsaasumik isumatuumillu
aqunneqarnerat pingaartillugu ingerlanneqassasoq.
Aapassaanik; Kalaallit Nunaanni
pisassat nammineq nunatsinni oqartussaaffigisatta agguaaneqartarnerat
aalisarneqarsinnaaneralllu sammitinneqartariaqarpoq angallatinut Kalaallit
Nunaanni angerlarsimaffeqartunut aalisarnissamut akuerississuteqarnissat
aammalu matumani nunat allat Kalaallit Nunaata isumaqatigiissuteqarfigisai
nunatta imartaani aalisassappata akuersissut taamaallaat Kalaallit Nunatsinni
Naalakkersuisunit tunniunneqartariaqarpoq.
Tamakkua tamarmik aalisarnermik
inuutissarsiuteqarnerup pitsaasumik isumannaallisaaffiginissaanut
pingaaruteqarput.
Inatsisip allannguutissaa maanna
saqqummiunneqartoq malitseqartinneqassaaq umiarsuit nunatsinni
angerlarsimaffeqartut aammalu nunanit allaneersut imartatsinni aalisarlutik
pisaminnik nunamut imaluunniit umiarsuarnut allanut usingiarsinnaanerisa
Naalakkeruisunit aalajangersarneqarnissaannik, taamatut aaqqiineq
toqqammavigalugu suliffissanik amerlanerusumik pilersitsisinnaaneq Siumut-miit
isumalluarfigaarput.
Aalisargartassat nunatta
oqartussaaffigisai aalisarnermik inuutissarsiuteqartunut sammitsineqarnissaat
Siumup pingaartippaa taammattumik inatsisip allannguutissaani kikkut aalisarsinnaanerannik
aalajangersagaliornermi kinnguaariit aalisarnermik inuutissarsiuteqartut
aammalu aalisarnermik siunnerfeqarlutik Imarsiornermik Ilinniarfimmi
ilinniargaqartut inuutissarsiummik ingerlatsinissamut periarfissaat
ammatsinneqartariaqartut, matumani aamma inatsisit allanguutissaanik.
Aamma soqutigalugu pingaartipparput
aalisariutit kilisaatillu inuttalersugaaneranni kalaallit amerlanerusut
inuttaanissaannik anguniagaqarnissaq maanni ilanngullugu peqqussusiuuneqassasoq,
inatsisillu ullutinnut naleqquttuunissaa piumasaralugu.
Naalakkersuisunut
inassutigissavarput siorna inatsisartuni ataatsimiinnermi oqaluuserineqartup
tassalu qallunnat naalagaaffiani inatsiseqatigiinnermi inuttalersuinermi
inatsisip nunatsinni atuuttup nutarterneqarnissaa sulissutigeqqullugu.
Siumut-miit pingaartipparput
raajarniarnermi pisassanit pigisat maannakkut ataasiakkaanit pigineqartut
annertussuserilersimasaat, taakkua inatsit malillugu
arsaarinnissutaasinnaanngillat.
Taamaatumik tamatuma
allanngortinneqarnissaani Naalakkeruisut inassutigisaat pisassanit pigisat
aalisarnermik ingerlatsisunit ataasiakkaanit pigineqartussat annerpaamik 6
%-unissaat Siumut-miit taperserparput.
Nunanik allanik
isumaqatigiissuteqarluni aalisarnerup annertusarneqarnerani Siumut-miit
Naalakkeruisunut inassutigissavarput aalisarfinni siornatigut
peqataaffigisatsinni soorlu Flemish Capimi, Svalbardip imartaani kiisalu
Barentshavip imartaani aalisarnikkut pisassarfigisatsinni peqataanerup
annertusarnissaa suliniutigeqqullugu, oqaatigineqartarmat sumiiffiit taakkua
ilaanni aalisakkat ilaat amerlitsikkiartuinnartut.
Naggataatigut, aalisarnermi
ullumikkut killiffigisarput tunngavigalugu Siumut akuersaarumanngilaq
aalisakkat qaqinneqareersut ilaasa iluaqutigineqaratik eqqarneqartarnerat
taamatut ingerlatiinnassallugu taamaattumik tamatumap aaqqiiviginissaa pillugu
ataatsimiititaliami susassaqartumi oqaluuserineqarnissaa inassutigaarput.
Siumut-miit taamatut oqaaseqarluta
aappassaaneerlugu oqaluuserineqannginnerani Inatsisartut Aalisarnermut
ataatsimiititaliaani oqaluuserineqarnissaa inassutigaarput. Taamatullu aamma
Inatsisartunut ilaasortap Hans Enoksenip siunnersuutaa ataatsimiititaliami
tassani suliarineqassaaq.
Siverth K. Heilmann, Atassutip oqaaseqartua:
Inatsisartut 1996-imi ukiakkut katersuunneranni,
Aalisarneq pillugu Inatsisartut inatsisaat suliaraarput, maannakkullu
inatsisissamut allannguutissatut Naalakkersuisut saqqummiussaat Atassut-miit
iluarisimaarparput, imatullu oqaaseqarfigissallugu.
Atassutip pingaartitaraa politikkeralugulu,
aalisarnermik inuussutissarsiuteqarnerup nutaanngorsartuarnissaa pissutsinullu
naleqqussaajuarnissaq, kiisalu aalisartortatsinnut sullissinermi pitsaasumik
atugassaqartitsinissaq angujumallugit.
Nalunngilarput qanoq aalisagaqartigissuserput
alanngorartuartuusoq, pingaartumik immap kissassusiata sunniuteqarluartarmat.
Atassut-ip pingaartitaraa immatta pisuussutaasa nungusaataanngitsumik
atorneqarnissaat.
Atassut isumaqataavoq, angallatit avataasiorlutik
nioqqutissiiorfiuutigisut nunatta nunat tamalaat akornanni pisussaaffiisa
annertunerulernissaat aammalu angallatit nunatsinnersut imartani nunatta
aalisarnikkut oqartussaaffiginngisaani aalisarsinnaanermut akuersissummik
periarfissineqartussaammata.
Inatsimmi allannguinermi aamma aalisartut nunami
allamiut angallataasa nunatsinnut tulaassuinerat angallammulluunniit allamut
usingiarsinnaanerat erseqqissarneqarmat Atassummiit pissusissamisoortutut
isigaarput.
Siusinnerusukkut Atassummiit nunatsinni
kilisaatini anginerusuni inuttalersuisarnerup nunaqavissuunissamillu
piumasaqaatit atorluarneqarnissaat tikkuartortarsimavarput. Taamaattumik
Naalakkersuisut inatsimmi sukaammiiniarnerat Atassummiit
isumaqatigilluinnarparput.
Avataasiorluni nioqqutissiorfiuutigalutik
kilisaatit ukiuni kingullerni ikiliartuinnarsimapput, taamaattumik Atassummiit
pissusissamissoorluinnartutut isigaarput, Kalaallit aalisartut pikkorssut
misilittagaqarluartullu nunatta imartaani
atorluarneqarnissaat nunattalu avataani misilittakkat
annertusartuarneqarnissaat.
Maannakkut aalisarneq pillugu inatsimmi
inuussutissarsiutigalugu aalisarsinnaaneq, ukiuni marlunni isertitat
tamarmiusut minnerpaamik pingajorarterutaanissaannik imaqarpoq.
Atassummiit Naalakkersuisut isumaqatigilluinnarpagut,
inuusuttut ajornannginnerusumik aammalu siusinnerusukkut aalisartuusimasunut
inuussutissarsiummut uternissaannut, immikkut akuersissummik
inuussutissarsiutigalu aalisarsinnaalernissamut periarfissiiniarneqarmata.
Tassunga atatillugu Kommuunit inuutissarsiornermi aammalu KNAPK-p sinerissami
immikkoortoraqarfiisa nalilersuinermi suleqatigisarnissaat
avaqqunneqarsinnaanngilaq.
Atassutip oqaatigiuarpaa, aalisarnermik
inuussutissarsiuteqarnerup nutaanngorsartarnissaa pissutsinullu naleqqussaajuarnissaq
saneqqunneqarsinnaanngitsoq.
Taamaattumik umiarsuaatillip sinerissamut
qanittumi raajarniarnermi pisassiissutit procent-nik qassinik
pigisaqarsinnaanerata 10 %-niik 6 %-nut appaaniarneq Atassummiit
akuersaarparput, pingaartilluguli TAC-mik qaffaasoqassagaluarpat pisassiissutit
procentinik nutaamik naliliipallattarnissaq.
Aalisariutit selskabillu imminnut
kattussuuttarnerat takornartaajunnaaarpoq, ilaatigullu Namminersornerullutik
Oqartussat suliffeqarfiutaani soorlu Royal Greenland A/S-tut ittuni piginneqataaffiusartuni.
Siuliini taariikkakka pillugit Aalisarnermi Ataatsimiititaliami
aporfiusinnaasut pitsaaqutaasinnaasullu nalilersorluarniarumaarpagut.
Aalisartut assigiinngitsutigut aalisarnikkut
aningaasarsiornierisa kiisalu tunitsivitsigut aalisarfimmiit ungaseqisumut
tunisiartortarnerat aammalu sinerissami qanittumi aalisartut ilaat pisassaminnik
ukiup sinneranut nunguutsiaartarnerat, Atassut-miit ilungersunartutut
isigaarput.
Taamaattumik KNAPK-p sinerissamut qanittumi
aalisarnermi pisat ilaasa, angallammi namminermi
tunisassiarineqarsinnaanerannik imaluunniit umiarsuarmut tunitsivimmut
niuneqarsinnanissaanik tikkuagaqarnerat Atassummiit paasisinnaalluarparput.
Aalisartummi sumi sunillu aalisarnerat ilaatigut apeqqutaalluinnartarpoq,
taamaattumik saaffiginnittoqartillugu Naalakkersuisut
nalilersuipallattarnissaat Atassut-miit kaammattuutigiinassavarput.
Taamaakkaluartoq Naalakkersuisut
isumaqatigilluinnarpagut, aalisakkat pisarineqartut nunami suliffissuarnut
tulaanneqartarnissaat, suliffissaqartitsiuarnissaq aningaasarsiornerlu tamanut
iluaqutaanerusussaq Atassummiit pingaarluinnartutut isigigatsigu.
Royal Greenland A/S-ip pisassiissutit ilaannik 6
%-nut amerlanerusunik pigisaqarnissamut immikkut akuersinissamut
kissaateqaraluarnerat Naalakkersuisut saaffiginnissummut itigartitsiniarnerat
Atassummiit isumaqatigaarput.
Taava ukioq 1998-imi februarimi Inatsisartunut
Ilaasortap Hans Enoksen-ip sinerissami qanittumi Royal Greenland A/S-i
raajarniutitaarniarluni aalisartitsiniarneranut unitsinneqarnissaanut
siunnersuutaanut uani ilanngutingitsuungara kingullermik naatsunnguamik
issuaaffigilaassavara. Atassut-minngaanniit imatut oqarsimagatta, taanna
pillugu; siunnersuuteqartoq tassa Hans Enoksen-i Atassut-miit ugguuna
isumaqatigisinnaavarput tulluartuusinnaanngitsoq aalisartut inuusuttut
pikkorissut angallatitaarusukkaluartut raajartassaqaratilli
isiginnaartuuginnarnissaat.
Illuatunngaaniit pisortat ingerlataannik,
Namminersornerullutillu Oqartussanik tamakkiisumik pigineqartunik
aalisartortagut inuusuttut ingiarsimaarneqassappata, erseqqissarlarali
Atassut-ip ersarissumik tunngavigisaa unaasoq aalisarneq aalisartunit
ingerlanneqassasoq kisianni Royal Greenland-ip tulaassuinermi
ajornartorsiuteqarnera paasivarput aaqqiiviginiartariaqartoq.
Taanna pillugu aamma Inatsisartut aalisarmermi
ataatsimiititaliaanni nalilersuinissaq aamma Atassut-minngaanniit
pingaartipparput.
Taamatullu oqaaseqarlunga aamma
ataatsimiitilataliami suleqqinnissatsinnut qilanaarpugut, qujanaq.
Johan Lund Olsen, Inuit Ataqatigiit oqaaseqartuat:
Aalisarneq pillugu inatsimmut Naalakkeruisut
allannguutissatut siunnersuutigisaat Inuit Ataqatigiit tunngaviatigut
tapersersinnaavaat takusinnaasavut malillugit ukiuni kingullerni aalisarneq
eqqarsaatigalugu tungitsinniit oqariartuutigalugillu kissaatigisarsimasavut
matumani siunnersuutigineqartutuut naaperiarneqarlutillu ilaatigut aamma
tamakkiisumik naammassiniarneqarumammata.
Tamanna ersersinnieqarpoq pingaartumik aalisariutit
inuttalersorneqartarnerannut tunngatillugu malittarisassatigut maanna
sukatiterisoqartussanngulermat, taamaatillunilu piffissami aggersumi maani
nunaqavissut aalisariutini tamani annertunerusumik
inuttarineqarsinnaalernissaat aamma pimoorussaanerusumik aqqutissiunneqartussanngormat.
Tamanna soorunami nuannaarutiginngitsuunngilarput Inuit Ataqatigiinniillu
neriutigivarput sukatiterinissaq aalisariutinut kisimi tungaannarani aammali
imartatsinni umiarsuarnut angalasunut allanut sunniuteqarlerluni aamma malunniukkiartulerumaartoq
- soorlu aamma maannakkut ilaasunik angallassilluni sinersortaatitsinnut
kiisalu imarpik ikaarlugu aamma Royal Arctic Linep umiarsuaataannut.
Taamatuttaaq aamma Inuit Ataqatigiit
nuannaarutigisatsituut maluginiarparput inuusuttut aalisarnermik aamma
inuussutissarsiuteqalersinnaaqqullugit piumasarisat qasukkartiterneqartussanngormata
taamaalillunilu immikkut akuersissuteqartoqarneratigut
ajornannginnerulertussaassalluni aalisartutut siunissami
ingerlatsilersinnaanissaq, soorlumi aalisartuusimasut kingumut
inuussutissarsiummik tamatuminnga ingertseqqissinnaanissaat aamma
ammaanniarneqartoq.
Taamatullu oqaaseqareeraluarluta
paasiuminaatsipparput sooq tamanna aatsaat immikkut akuersissuteqaqqaarnikkut
pisassanersoq? Soormi inatsimmi tamanna tamanut ammartinneqartariaqartoq
toqqaannartumik allassimaannaruni - apeqqutaanani utoqqaanersutit,
utoqqaliarsaalernersutit imaluunniit inuusuttuunersutit - inuusuttuusimaguimmi
aatsaat periarfissinneqassaatinngooq Naalakkersuisut immikkut akuersissuteqarnerisigut.
Tamanna ippinnartoqartipparput. Taamaattumik
aappassaaneerisoqartinnagu kissaatigissavarput Aalisarnermut
Ataatsimiititaliami tamanna nalisersorneqarluassasoq - ilisimavarpummi aalisarnermik
inuussutissarsiuteqarneq ataatsimut isigalugu malittarisassaqartitsinikkut,
akileraarusersuinikkut assigisaatigullu aporfissaqartoq Akinguaariit nikittariaqartarnerannut@ (generationsskifte)
attuumasseteqarsinnaasumik. Taamaattumik pisariaqarsorinarpoq inatsit aqqutigalugu
tamakkiinerusumik aamma siunertaqarluni aaqqiissuteqarniartarnissarput Aimmikkut akuersissuteqaannartarneq@ taamaallaat isumalluutigiinnarnagu.
Pisassiissutinit pigisassarineqarsinnaasut qummut
killilerlugit procent-ata 10 %-niit 6 %-nut appartinneqarnissaat
siusinnerusukkut Inuit Ataqatigiit kissaatigisariigaannut naapertuummat,
taamatullu raajarniarnermi pisassat amerlanermut
iluaqutissanngorsinnaaqqullugit siammartiterneqartariaqarmata annerusumik
tamanna oqaaseqarfiginatigu matumani assorsuaq ilalernartuutikkatsigu
oqaatigeriissavarput.
Nunat tamalaat akornanni isumaqatigiissutit
malillugit pisussaaffigisaatta nassatarisaanik inatsimmik
naleqqussaasariaqarnerput pissusissamisuuginnarmat annerusumik matumani siullermeerinitsinni
aamma oqaaseqarfigissanngilarput - Aalisarnermulli Ataatsimiititaliamut
siunnersuutip ingerlateqqinneqarnerani kissaatigissallugu una
misissorneqarallassasoq, tassalu: nunat tamalaat imartaanni immanilu nunat
allamiut aalisarnikkut oqartussaaffigisaanni aalisanngitsoortakkatsinnilli
aalisagartassinneqartarnerput eqqarsaatigalugu, siunertaanersoq nuna allamiut
aalisariutaasa pisassaraluatsinnik aamma aalisalersinneqartalernissaat?
Taamaassimassappammi Inuit Ataqatigiit isumaqarpugut
tamanna akuersaarneqarsinnaanngilluinnartoq uagummi nammineq
kilisaassuatsinnit - ilaatigut Royal Greenlandip kilisaassui
atortorissaareeqisut ungasiliarsinnaasullu atorluarnerisigut raajartassat
tamakku iluaqutigilluarsinnaasorigatsigit. Tamannami anguneqarsinnaappat
raajartassat ukiuni makkunani nammineq imartatsinni aamma
ikiliartorileriikkavut siamasinnerusumik - qularnanngitsumillu nunamut
tulaassassat amerlineqarnerinik kinguneqartumik
aaqqissussiffigisinnaalissagaluarpavut Royal Greenlandimut, minnerungitsumilli
nunami suliffissaqartitsiniarnermut aamma iluaqutaangaartumik.
Eqqaamaqqussavarpummi Royal Greenland-ip, Ice
Trawl-ip kiisalu APK-p kilisaassui tassaamaata avataani uutiteriutigalugtit
maannakkut tunisassiortooreeersut, taamaattumillu nunami
suliffissaqartitsiniarnermut iluaqutaasussanngorlugit tamakkiisumik
tulaassuisussaatitaanngereersut.
Kilisaassuarmi ataasiinnarluunniit imartanut
allanut illuartiallanneqarluni aalisariartinneqartuuppat
raajartassarineqartulli inuiaqatigiinnit pigineqaannarlutik, suliffiit qassit
pioreersut qulakkeereersimassagaluarpavut? Ila immaqa qeqertarsuarmi
raajaleriffiup imaluunniit Maniitsumi raajaleruffiup ukioq kaajallallugu
suliassaqartinneqarsinnaanerinik naleqartumik raajartassaqartitsilissagaluarpugut!
Ippassaaniusaannannguarmi imartatsinni
raajartassarineqartut takuvagut qanoq aalisapallanneqarlereersimanersut. Ukioq
manna qaammtit siulliit pingasut ingerlanerinnaani takuvarput avataasiortut 25
%-it tikillugit kiisalu sinerissami qanittumi raajarnat 18-19 %-it
pisarereersimagaat. Aarlerinarpoq ukiaru tulaassassanik
nunguutsisoqareersimanissaa - taamaattumik pisariaqarluinnalerpoq TAC-p iluani
kvote-lersuilluta maannakkutuut raajartassiisarnitta nutaamik aamma
nalilersuiffigiuarnissaa, siunertaasariaqarporlu nunamut tulaassassat
amerlisarneqartuarnissaat.
Taamaattumik aamma taama oqaaseqareeratta
Naalakkersuisoq isumaqatigalutigu nalunaarutigissavarput Inuit Ataqatigiit
aamma kissaatigininninnatsigu inatsisp eqqartukkatta siunertarisaatigut
allannguisoqassasoq - kisiannili erseqqissarlugu - aalisakkat allat
eqqarsaatigalugit soorlu; saattussat allallu tunisaajuarnissaat
anguniarumallugu umiarsuarnik tunitsiviliisoqartarsinnaanissaa
ammatinneqartuartariaqarmat.
KNAPK-p tusarniaaffigineqareernermi kingorna
inatsimmut allannguutissanik piumasaqarluni ilaatigut ammasumik
unammilleqatigiittoqartariaqarneranik tikkuagaqarpoq. Tamanna siorna 18.
december 1997-mi Royal Greenland-ip KNAPK-mit isumaqatigiissutiminit tamanit
atorunnaarsitsiniarneranik toqqammaveqarpoq, ilisimaneqartutuummi Royal
Greenland-ip taamani tamanut ersarilluinnartumik nalunaarutigivaa aalisakkanik
tulaassuissussatik pissarsiarineassagunikkit siunissami pituttorneqaratik taava
unammillertariaqalerlutik.
Inuit Ataqatigiit soorunami arajutsisimanngilarput
tamanna aalisartunut iluaqutissartaqarsinnaammat - pingaartumik piviusumik
tutsuiginartumillu unammilleqatigiinneqalerpat, kisiannili aamma
illuatungerluinnaanik pitsanngitsortaqarsinnaammat - tassalu akit
minnerpaaffilerneqarsimatinnagit aalisartunut akilutitsinermik
kinguneqaratarsinnaammata.
Taamaattumik aalisarnermut inatsimmi KNAPK-p
noqqaassutigisaa malillugu ammasumik unammilleqatigiittoqartariaqarneranik
aalajangersagaqartitsinissaq peqqissaarulluinnarlugu nalilersorluaqqaagassaavoq
- oqartariaqarpungalu Inuit Ataqatigiit maannakkorluinnaq tassungarpiarlu
isummiussaqariinginnatta - kisiannili kissaatigissallutigu Aalisarnermut
Ataatsimiititaliami tamannarpiaq sukumiisumik misissorneqaqqaassasoq,
ilaatigut Royal Greenland-mik KNAPK-millu immikkut aamma
nassuiaatitseqqusilluni aggersaatitsinikkut.
Taamatullu oqaaseqarallaannarluta Inuit
Ataqatigiit naatsorsuutigilluinnarparput saqqummiussavut aamma
tusaaniarneqarumaartut qilanaarivarpullu Aalisarnermut Ataatsimiititaliami
aappassaaneerisoqartinnagu suleqataanissatsinnut aamma tassani Inatsisartunut
Ilaasortap Hans Enoksen-ip siunnersuutaa ilanngullugu aamma ataatsimiititaliami
eqqartussallutigu.
Bjarne Kreutzmann, Akulliit Partiiat:
Aallaqqaammut oqaatigissavara, aalisarneq pillugu
Inatsisartut inatsisaata allanngortinneqarnissaanik siunnersuut
tapersersorakku, makku pissutigalugit:
Tassa siullermik inuussutissarsiutigalugu
aalisarsinnaaneq pillugu inatsisip aalajangersagartaanit immikkut
akuersissuteqarsinnaanermut periarfissat annertusineqarmata.
Nunani allamiut angallataasa nunatsinnut
tulaassuinerat angallammulluunniit allamut usingiartarnerat
nakkutigineqarsinnaalissammat.
Siunnersuutit nunatta angallatit nunatsinni
nalunaarsorsimasut nunat tamalaat imartaanni aalisarnerini aalisarsinnaanermut
akuersissuteqarfiginnittussaatitaalerneranik nunanut allanut
pissuaaffeqarlernerata kingunerimmagit.
Kiisalu inatisisip atuuffiata nunat tamalaat imartaanni
aalisarnermut annertusinissaa Naalagaaffiit Peqatigiit immami
pisinnaatitaaffiit pillugit isumaqatigiissutaannut naapertuummat.
Aammattaaq pissutigalugu siunnersuut imaqarmat,
aalisarnermik inuussutissariuteqalerusuttut oqilisaavigineqarnissaannik,
taamaalilluniluni Landskasse-mut isertitat amerleriassammata, inuiaqatigiit
tunngaanniit kissaatit tamakkinngikkaluarlutik amerlanerusut piviusunngorsinnaanissaannik
kinguneqartumik.
Aammattaaq KNAPK-mut Royal Greenland-mullu
tusarniaanermi akissutit pillugit Naalakkersuisut oqaaseqataat
isumaqatigaakka.
Taamatut oqaaseqarlunga inassutigissavara,
siunnersuut inersuarmi manni aappassaaneerlugu oqaluuserineqannginnermini
ataatsimiititalianut attuumassuteqartunut ingerlatinneqassasoq.
Anthon Frederiksen, Kattusseqatigiit:
Kattusseqatigiinniit pingaartilluinnakkatta
ilagaat nunatsinni aalisartortatta sapinngisamik pitsaasunik aamma
inatsisitigut periarfissarsiuuneqartuarnissaat aamma nunatta imartaata
avataani. Taamaattumik nunat tamalaat imartaanni immanilu nunat allamiut
aalisarnikkut oqartussaaffigisaanni nunatta aalisarsinnaatitaanerminik
atorluaasimannginera, aappaatigut pakatsissutigalugu, matumuuna inatsisip
nutaamik ilaneqarneratigut, nunatta nunani tamalaani pisussaaffiisa
erseqqissarneqarnerannut atatillugu, aalisartortatsinnut iluaqutaanerusumik
kinguneqartumik sunniuteqarsinnaanera takorloorlugu, aalisarneq pillugu
inatsisip allanngortinneqarnissaanut siunnersuut tunngaviatigut
isumaqatigaara.
Aammalu tassunga atatillugu pissusissamisoorpoq
Naalakkersuisut, aalisariutit nunatsinneersut inuttalersorneqartarnerannut
tunngasumik nalunaarusiornissaat. Aamma ilaatigut inatsisip
annertusineqarneratigut nunani allamiut angallataasa nunatsinnut
tulaassisarnerat, angallatinulluunniit allanut usingiartarnerat ilanngullugu
pitsaanerusumik nakkutigineqarsinnaalissammat Kattusseqartigiinniit
iluaraarput.
Kattusseqaritiinniillu aamma Aalisarnermut
Ataatsimiititaliamut kaammattuutigissuarput, nunat tamalaat imartaanni aamma
imartani nunat allat aalisarnermi inatsisitigut oqartussaaffigisaanni kalaallit
aalisarfigisinnaatitaaffiini tamakkiinerusunik atuisarnissaq
sulissutigeqqullugu. Ukiuni piniartuunermiit suliffissuaqarnermut
ikaarsaariarfiusuni nunatsinni aalisartut, piniartut sulisartullu
suleqatigiilluarlutik ingerlasimapput piniagassanik aalisagartassanillu
pinnaaffiunngitsumik, akaareqatigiilluni nuannersumik inuuneq ingerlanneqarpoq
aamma taamaattuartariaqarluni. Kisiannili ukiuni kingullerni aningaasap
naalaganngoriartornera pissaaneqarniunnerlu kikkut aalisartuussappagit, kikkut
sulisartuussapagit kikkut sumik sunillu pisaqassanersut aaliangersaanerit
inunnik immikkoortiteraluni iliuseqartarnerit Kattusseqatigiinniit tamatigut
akuersaaginnarneqarsinnaanngitsutut isumaqarfigaakka. Tassami assersuutigalugu
aalisarneq pillugu inatsit 1996-mi allanngortinneqaraluarpoq ukiuni kingullerni
marlunni aalisarnermik inuutissarsiuteqarsimanngitsut suliffissuarnut
tunisisinnaaneri mattullugit. Taamanikkulli Kattuseqatigiinniit piumasaqaatikka
makkua qasukkarneqarnissaat pillugu. '-ip pineqartup allangortinneqarnissaa siunnersuutigigaluarpara
iluatsinngitsumik. Ilaatigut makku pissutigalugit:
Sulisartorpassuit pingaartumik avannaani
sikusartuniittumik ukiukkut fabrikki
matugaangata suliffissaaruttartut, taamaalineranilu arlalissuit
socialeqarfimmut aningaasanik aalliinnaratik nammineerlutilli
aalisarnialertartut pingaartumik qaleraleeqarfinni. Taamaaliornikkut
suliffissaaleqisussangaluit imminnut napatissinnaanertik ingerlatiinnartarpaat
inuiaqatigiinnut annerusumik aningaasartuutaanngitsumik. Taamaattumik
qujanartumillu naalakkersuisut maanna kiisami kingusinaaraluarlutik-aasit paasinnilernerat tunngavigalugu inatsimmi ' 6-ip, imarisaanik piumasaqaatinik
maannamut atuunniaraluartunik kisiannili atortinneqarsinnaangitsunik qasukkaaniarnerat taperserpara. Pisassiissutigineqartartunut
tunngatillugu oqaatigisariaqarpoq, Kattusseqatigiinniit
pingaartilluinnaratsigu, namminersortut pisortat ingerlataannit unammillerneqannginnissaat.
Taammaattumik Aalisarnermut Ataatsimiitsitaliamut kaammattuutigisariaqarpoq,
pingaartumik sinerissap qanittuani raajarniartut eqqarsaatigalugit,
taakkununnga pisassiissutigineqartartut, Royal Greenland-ip aalisariutaanut
nuukkiartortinneqannginnissaat isumageqqullugu. Tassami aalisartorpassuit
nunami suliffissaqartitsilluartartut ukiuni kingullerni, ukioq naaqqajanngitsoq
pisassaminnik nunguutsillutik uniinnartariaqartarnerat akuersaarneqarsinnaangimmat.
Taamaattumik Inatsisartuni ilaasortap Hans
Enoksen-ip siunnersuutaa paasilluarlugu aamma tamakkiisumik taperserpara.
Taamatullu naatsumik oqaaseqarlunga allannguutissatut siunnerssutip
tunngaviatigut akuersaarlugit, suliap aappassaaneerneqannginnerani
Aalisarnermut Ataatsimiitsitaliami suliarineqarnissaat inassutigigalugu.
Paaviaaraq Heilmann, Aalisarnermut, Piniarnermut,
Nunalerinermut Inuutissarsiornermullu Naalakkersuisoq:
Qujanaq. Naatsumik oqaaseqassaanga. Tassa
paasisinnaasakka malillugit inimi maani aalisarnermut inatsimmut allannguutissat
naalakkersuisunit siunnersuutigineqartut amerlasuutigut tunngaviusumik
isumaqatigineqarmata. Taamaattorli ataasiakkaanik nassuiaateqassaanga, tassa
pingaartumik 6 procenti eqqarsaatigalugu 10 procentiminngaaniit
raajartassiissutinik pigisaqarsinnaaneq. Tassa maannamut 10 procenti
ataatsimoortumik tulaassanik sinerissamut qanittumut pisarineqartussanik
24.729- tonsiminngaaniit 10 procenti 2.472 tonsiuvoq, maannamullu nalunngisagut
malillugit ukiuni qaangiuttuni aalisarluarsimanerpaaq taakkunannga tulaassuisoq
tassa 1.000 tonsit missaaniippoq, taamaammat Royal Greenland-ip oqaaseqaatai
uani ataqatigiinngitsuliornerupput. Taamaattumillu 6 procentimut appaaneq
angallamut ataatsimut aamma sinnilimmik pisassaqartitsivoq. Kisianni soorunami
aamma angallataatileqatigiiffiit aamma arlariinnik angallateqarsinnaanerat
taanna eqqarsaatigineqarsinnaavoq. Maannamut amerlanerpaat ingerlalluartut
tulaassuisut raajanik pisassaqartarput 700 tonsit missaani, 500 tonsit qulaallugu
pisassallit taakua ingerlalluarput aningaasatigut aamma.
Oqareernittut annertuumik tunngaviatigut
ilalerneqarmata ataasiakkaannguit oqaaseqarfigissavakka. Siullermik Hans
Enoksen-ip siunnersuutaanut tunngatillugu oqaatigineqartut oqaaseqarfigissagukkit
tassa maannamut ilisimasaqannginnama uanga Royal Greenland-i nammineerluni
raajarniutinik pigisaqalernissaminik kissaateqarneranik. Uagut
pisortaqarfippullu ilisimatinneqarsimanngilaq raajarniutinik
pigisaqalernissaanik. Tassa taanna Atassutip aammalu Inuit Ataqatigiit
tikimmassuk taamatut oqaaseqarfigaara.
Taavalu Inuit Ataqatigiinniit oqaaseqartup Johan
Lund Olsen-ip sooq immikut akuersissutit atorneqassappat, sooq ataavartumik
aaqqissuussinermik aaqqissuussissanngilagut. Tassa taamatut pisariaqartitsinermik
kissaateqartoqarnerani naalakkersuisuniit tunngaviupput ilaatigut
amerlasuutigut taanna periarfissaq naatsorsuutiginngilarput atorneqassasoq,
kisiannili immikkut pisoqartillugu. Ilaatigut eqqarsaatigineqarsinnaapput
immaqa savaatillit ilaatigut angallateqartut kisiannili annertunerusumik
savaateqarnermik ingerlataqartut, immaqa aalisarnerinnarmik
ingerlataqarnissaminnut assigiinngitsutigut periarfissanik
ingerlatseqqilerusuttut. Taakkua immaqa immikkut akuerineqarsinnaanerannik
periarfissanik ammaaniartoqarpoq aamma soorunami sinerissap ilaani aamma
taamatut siusinnerusukkut aalisartoreersimasut immikkut aalisarnermut
ingerlaqqilernissaminnik periarfissamik atuiniartut aamma tamakkua periarfissinneqarnissaat
pineqarput. Imatut ullut tamaasa pisarnissaq immikkut akuersineq
naatsorsuutiginngilarput.
Aamma siunertaanngilaq nunat allamiut
aalisariutaat imartatsinni annerujartuinnartumik aalisartalernissaat. Tassa
siusinnerusukkut soorlu oqaatigereeripput naalakkersuisuninngaanniit
kissaatigaarput imartatsinni aalisagartassiissutit annerujartuinnartumik uagut
nunatta aalisartuinit pisarineqartassasut. Aammalu assersuutitut taasinnaavakka
siunnerusukkut taariikkakka tassa ammassat tunumi aamma peqataaffigilerpagut. Suluppaakkat
aamma kalaallit aalisartuinit pisarineqartalertussaapput siusinnerusukkut
annertunerusumik nuna allamiunut niuerutigisarsimagaluarivut. Tassa
tassuunakkut uppernarsaatitullusooq oqaatigineqarsinnaavoq taakkua ilaatigut
uagut aalisartortatsinnut annertunerujartuinnartumik peqataaffigiartorneqartut.
Taavalu Akulliit Partiiat tapersiimmat
annertunerusumik oqaaseqarfiginagu Kattusseqatigiit, Anthon Frederiksen kikkut
tunisisinnaanersut taavalu pissaneqarniunnermik nipilimmik oqaaseqarneq
eqqarsaatigalugu oqaatigissavara, naalakkersuisuni tunngaviusumik aalisarneq
pillugu politikkeqaratta killilersuisoqartussaatillugu tassaasut
salliutinneqartussat inuutissarsiummik ingerlatsisut, tassa aalisartut. Taavalu
qalerallit eqqarsaatigalugit oqalukkunnaravit Anthon Frederiksen,
oqaatigissavara ukioq siuliani biologit nalunaarutigisaat pingaartumik
Ilulissani Uummannamilu qaleraleqarnermut tunngasut ilungersunartuusimapput.
Tamakkulu tunngavigalugit piffissami sivisulaartumik qaleralinnut
nalunaarusiassaq sinerissamut qanittumi aalisarnermi sanarfineqarsimavoq,
tassa bioligit sukangasuumik nalunaaruteqarneri tunngavigalugit. Tassa
pisassiissutit mianersuutariaqarluinnalerneri immaqarmata. Kisianni
kingusinnerusukkut qujanartumik biologit nalunaarutaat pitsaanerusut
nalliummata taanna siusinnerusukkut nalunaarutigereerparput aamma ukiuunerani
aasakkut suliffeqartartut ukiuunerani suliffissaaruttartut sikuunerani
avannaani qaleralinniarfiusuni aamma periarfissinneqarnissaannik
naalakkersuisut matoqqatitsinngimmata. Taannalu ukiup tullissaanut
naammassereersimassaaq sikunnginnerani.
Taamatut oqaaseqarlunga ataatsimut isigalugu
taperserneqarmata kisiannilu oqaaseqaatigineqartut arlallit partiit
ataasiakkaat oqaaseqaataat ataatsimiititaliami suliarineqarnissaat
innersuussutigineqarmata aammalu naalakkersuisuniit uagut
innersuussutigigatsigu siunnersuutigut Aalisarnermut Ataatsimiititaliami
suliarineqassasut ataatsimoorussamik nalilersuinissaq naatsorsuutigalugu
taamatut annertunerusumik oqaaseqarnanga oqaaseqaatinut qujavunga.
Oqaluuserisassaq naammassivoq.