Oqaluuserisassani immikkoortoq 08-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Marlunngorneq 11.maj 1999 nal. 15.40
Ataatsimiinnermi aqutsisoq: Anthon
Frederiksen, aamma Anders Andreassen, Siulittaasoqarfimmi ilaasortat:
Steffen Ulrich-Lynge, Ineqarnermut
Atavveqarnermut Pilersuinermullu Naalakkersuisoq:
Danmarkip Nunattalu
nalunaarasuartaateqarnikkut suleqatigiinnerat pillugu ataatsimiititaliap
Kalaallit Nunaanni radiukkut attaveqarnermut tunngasut pillugit nalunaarusiaa
Naalakkersuisut matumuuna saqqummiuppaat.
Nalunaarasuartaateqarnermut tunngasut
pillugit inatsisiliornikkut allaffissornermilu aqutsinikkut akisussaaffik,
matumani pingaartumikNnunatta nunarsuullu sinnerata akornanni
nalunaarusuartaateqarnermut tunngasut eqqarsaatigalugit, 1997-imi
Namminersornerullutik Oqartussanit tiguneqarneranut atatillugu radiukkut
attaveqarnermut tunngasut misissuiffigineqarnerat aallartinneqarpoq.
Misissuinermi tassani paasisat
nalunaarusiakkut agguaanneqartukkut massakkut pigineqalerput.
Radiukkut attaveqarnermut tunngasut imaatigut
ajunaalersunik isumannaallisaanermillu sullissinerit assigalugit danskit
naalagaaffianit oqartussaaffigineqarput, Nunatsinnut inatsisiliorneq
aqqutigalugu aalajangersaavigineqartartut. Naalakkersuinikkut aqutsinikkullu
ingerlatat assersuutigalugu frekvensit pillugit nunat tamat
isumaqatigiissutaannut, frekvensit atorneqarnerisa pilersaarusiorfigineqarnerannut,
akuersissutinik tunniussisarnermut kiisalu nakkutilliinermut
aningaasalersuinermullu tunngassuteqarput.
Nunatsinni radiukkut attaveqarneq
inatsisikkut 1992-imeersukkut Kunngip Peqqussutaatigut atortuulersinneqartukkut
aalajangersaavigineqarpoq. Inatsimmut tassunga nalunaarutit tallimat atapput.
Radiukkut attaveqarneq Danmarkimi
1997-imi tunngaviusumik allanngortiterneqarpoq, inatsillu taanna suli aamma
allanngorteqqinneqartussaalluni. Taamaattumik Nunarput tassuuna
kinguaattooqqalerpoq, Nunatsinnut inatsisit nutarterneqarsimanngimmata.
Radiukkut attaveqartarneq pillugu
oqartussaassuseq taassumaluunniit ilaa Nunatsinnut nuunneqassappat tamatuma
naalakkersuinikkut, aningaasaqarnikkut aqutsinikkullu kingunerisassai eqqarsaatigalugit
ataatsimiititaliap misissuinera nalunaarusiami allaaserineqarpoq.
Namminersornerullutik Oqartussat suliassallu suliassaqarfimmi tassani
naalagaaffeqatigiinnermi oqartussanit isumagineqartut akornanni siunissami
atassutissat ataatsimiititaliap aamma allaaseraa.
Pissutsit arlallit radiukkut attaveqartarneq
pillugit inatsisip allanngortinneqarnerani aaqqiivigineqarneranilu ilaasussat
nalunaarusiami sukumiisumik allaaserineqarput, suliassaqarfiup taassuma
Namminersornerullutik Oqartussanit tiguneqarnissaa tiguneqannginnissaaluunniit
apeqqutaatinnagu.
Akuersissutit, radiunik nakkutilliineq
radiumillu atuisinnaanermut allagartanik tunniussisarnermi suliassat
ingerlatallu amerlanersaat nunami maani sulisunit massakkut suliarineqartarput.
Suliassaqarfimmik taassuminnga tigusinerup kingunerisaanik qitiusumik
aqutsinermut kiisalu inatsisit naleqqussaanermilu malittarisassat
suliarineqarnerinut amerlanerusunik sulisoqalernissaq piumasaqaataassaaq.
Naliliinerni pingaaruteqartut ilagaat frekvensinut
tunngasuni nunat tamat akornanni atassuteqartarnernut naalagaaffeqatigiinnermi
oqartussat suli akisussaanissaat, taamalu frekvensit pilersaarusiorfigineqarneranni
pingaarnerusutigut akisussaaffimmik suli tigumiaqarnissaat.
Tamatuma kingunerisaanik kaammattuutigineqarpoq
Namminersornerullutik Oqartussat naalagaaffeqatigiinnermilu oqartussat
siunissami suleqatigiinneranni Nunatsinnit oqartussaaffigineqartussanut
killiliussassat aalajangersarneqassasut, tamatuma nukittorsarneqarnissaa
kiisalu suliassaqarfimmi tassani suliassat amerlanerusut Nunatsinnit
oqartussaaffigineqalernissaannut tunngavissarpiaasunik pilersitsinissaq
siunertaralugit.
Nunami maani qitiusumik aqutsineq
eqqarsaatigalugu teknikikkut/inatsisilerinikkut immikkut ilisimasanik piorsaanissaq
manna tikillugu pisariaqartinneqarsimanngitsoq paasineqarsinnaavoq,
taamaattumillu siunissaq qaninnerusoq eqqarsaatigalugu suliassaqarfimmi tassani
suliassanik amerlanerusunik oqartussaaffiginnilernissamut
tunngavissaqanngilaq.
Taamaattorli suliassanik amerlanerusunik
Namminersornerullutik Oqartussat tigusinngikkallarnissamik oqaaseqaataat
inatsisitigut tunngavigisat allanngortiterneqarnissaannut
naleqqussarneqarnissaannullu Ilisimatusarnermut Ministeriaqarfiup
suliniuteqalernissaanut nukissanillu immikkoortitsinissaanut tunngavissaavoq.
Inatsisinik nutarterinermik sulineq Ilisimatusarnermut Ministeriaqarfiup
Naalakkersuisoqarfiullu akornanni suleqatigiinnikkut
ingerlanneqanngitsoortussaanngilaq, inatsillu Folketingimi akuerineqannginnermini
Inatsisartunut akuerisassan-ngorlugu saqqummiunneqartussaalluni.
Radiukkut attaveqarnermut tunngasut pillugit
ataatsimiititaliap kaammattuutaanut Inatsisartut oqaaseqaateqarnissaat
Naalakkersuisut tusarusuppaat, taamaalilluni inatsimmik allanngortiterineq
naleqqussaanerlu ingerlanneqalersinnaaqqullugit.
Tommy Marĝ, Siumup oqaaseqartua:
Danmarkip Nunattalu
nalunaarasuartaateqarnikkut suleqatigiinnerat pillugu ataatsimiititaliap
nalunaarusiaa sukumiisoq misissorluareerlugu matumuuna imatut Siumumiit
oqaaseqarfigissavarput.
Maluginiarparput ataatsimiititaliap
kaamaattuuteqarnermini ilaatigut oqaariartuutigigaa raadiukkut tunngassuteqartutigut suliassanik amerlanerusunik
nuussinissaq maannakkuugallartoq sulissutigineqassanngitsoq, tamannalu
Siumumiit isumaqatiginartipparput.
Nalunaarusiamimi taakkartorneqartutut
suliassaqarfiit pineqartut annertunersaatigut teknikkimut
tunngassuteqarnerummata, taasalu frekvensinut tunngatillugu Nunanut
Tamalaanut isumaqatigiissutinut
tunngassuteqartut, frekvensit pilersaarusiorfigineqarnerannut aammalu
inatsisinut taakkununnga
tunngassuteqartunut attuumassuteqartuunerummata.
Aamma minnerunngitsumik suliassaqarfiit
pineqartut ullumikkut Nunatsinnut nuunneqas-sangaluarpata tamanna isumaqarpoq
allaffissornikkut Namminersornerullutik Oqartussani sulisorisat tunngaatigut annertusaasoqartariaqarnera.
Namminersonerullutillu Oqartussani
allaffissornikkut annertusaasoqarnissaa partiit tamatta
qineqqusaarnitsinni sapinngisaq tamaat pinaveersaarsimatinneqartariaqartutut
isummerfigaarput. Taamaattumik kaammattuutigineqartut oqimaalutarluareerlugit maannakkuugallartoq ataatsimiititaliap
nuussisoqanngikkallarnissaanik oqariartuuteqarnera taperserparput.
Siumumiilli erseqqissarusupparput pingaartikkatsigu nalunaarusiami suliassaqarfiit
pineqartut siunissami
Nunatsinnut oqartussaaffigineqarnerisa
nuunneqarnissaat
pilersaarusiorluakkamik suliniutigineqassasoq. Taamaattumik
ataatsimiititaliaq isumaqatigaarput oqarmat, radiukkut attaveqartarnermut tunngassuteqartutigut
Namminersornerullutik Oqartussat
oqartussaaffeqarnerisa annertusineqarnissaa pitsaanerulersinneqarnissaalu
siunertaralugit naalakkersuinikkut allaffissornikkullu suliniutissat eqqarsaatersuutigineqarnissaat
pitsaasuussammat Taamatummi suliniuteqarnermi maani Nunatsinni sulisorisavut
nalunaarusiami suliassaqarfinnut
pineqartunut
sulisinnaalernissaat anguniarlugu piginnaanngorsaasoqarnissaanik imaqartutut paasigatsigit.
Taamaattumik Naalakkersuisut qinnuigissavagut
Qallunaat Nunaanni Ilisimatusarnermut
Ministeriaqarfik suleqatigalugu radiukkut attaveqartarnermut tunngassuteqartutigut sulisoqarnerup piginnaasaqarnerullu
tungaasigut suliassaqarfimmi suliassanik amerlanerusunik nuussinissaq pillugu
naalakkersuinikkut aalajangiinissamut tunngavissat pitsaasut
pilersinneqarnissaat siunertaralugu suliniuteqaqqullugit, soorlu aamma
Danmarkip Nunattalu nalunaarasuartaateqarnikkut suleqatigiinnerat pillugu
ataatsimiititaliaq taamatut kaammattuuteqartoq.
Taamatuttaaq Siumumiit isumaqarpugut Nunatsinni radiukkut attaveqarneq pillugu inatsit 1992-meersoq nutartertariaqalersimasoq piaartumik ullumikkumut atuuttunut naleqqussarlugu inatsisiliuuttariaqaripput.
Taamatut oqaaseqarluta Siumumiit nalunaarusiami kaammattuutigineqartut isumaqatigalugit naalunaarusiaq tusaatissatut tiguarput.
Jakob Sivertsen, Atassutip oqaaseqartua:
Danmarkip Nunattalu nalunaarasuartaateqarnikkut suleqatigiinnerat pillugu ataatsimiititaliap Kalaallit Nunaanni radiukkut attaveqaateqarnermut tunngasut pillugit nalunaarusiaa Ineqarnermut, Attaveqaateqarnermut Pilersuinermullu Naalakkersuisup saqqummiussaa Atassummiit soqutigalugu sukumiisumillu oqaluuserereerlugu imatut oqaaseqarfigilaarniarparput.
Atassummiit aallaqqaammut oqaatigissavarput Nunatsinni illoqarfiit nunaqarfiillu akornanni minnerunngitsumillu nunarsuup sinnerani sumi inissisimaneq apeqqutaatinnagu ukiuni kingullerni attaveqaateqarnikkut malunnaatilimmik ineriartortitsisimaneq innuttaasunit tassalu ulluinnarni atassuteqaatinik atuisunit assut iluarisimaarneqartoq naammagisimaanerqartorlu malugisinnaagatsigu, Atassummi assut nuannaarutigisatsinnik. Nalunaarusiaq peqqissaartumik suliarineqarsimammat sammineqarsinnaasut pingaarnersiorlugit Atassummit oqaaseqarfigilaassavavut.
Kalaallit Nunatsinni raadiukkut atassuteqartarnermut tunngassuteqartuni inatsisiliat ullutsinnut naleqqussarneqarnissaat kiisalu Namminersornerullutik Oqartussat aamma danskit naalagaaffiani oqartussaasut akornanni siunissami suleqatigiiffiusussatut kaammattuutigineqartut arlallit atuarneqarsinnaasut nalunaarusiami innersuussutigaavut, soorlu Kalaallit Nunatsinni raadiukkut atassuteqarnermut tunngassuteqartut pillugit inatsisitigut tunngavigisat iluarsaanneqarnissaat ullutsinnut naleqqussarlugit Kalaallit Nunatsinni naalakkersuinikkut, niuernikkut teknikikkullu ineriartornermi mianerisassat mianeralugit, inatsisitigut iluarsartuussiniarnerit Atassummiit pissusissamisoortutut isigaarput. Aammattaaq maluginiarparput frekvensinut tunngatillugu Nunanut Tamalaanut tunngassuteqartut suli danskit naalagaaffiannit oqartussaasunik akisussaaffigineqarnissaat nalunaarusiamik suliaqartut piumasarisimammassuk tamanna Atassummi iluarisimaaratsigu. Frekvensinut tunngatillugu nunat tamalaat akornanni isumaqatigiissutaasut imaaliallaannarlugit Namminersornerullutik Oqartussanut nuunneqarnissaat periarfissaanngitsoq maannamut nalunnginatsigu.
Naggataatigut Kalaallit Nunatsinni raadiukkut atassuteqartarneq pillugu nalunaarusiami suliaqartut sulilluarsimanerannik qutsavigaavut.
Taamatut naatsumik oqaaseqarluta raadiukkut attaveqarnermut tunngasunut Namminersornerullutik Oqartussat oqaaseqaatai tamakkiisumik Atassummiit taperserparput.
Ole Lynge, Inuit Ataqatigiit oqaaseqartuat:
Danmarkip Kalaalit Nunaatalu akornanni nalunaarasuartaateqarnikkut suleqatigiinnerat pillugu ataatsimiititaliap Kalaallit Nunaanni radiukkut attaveqarnermut tunngasut pillugit nalunaarusiaa naalakkersuisunit saqqummiunneqartoq Inuit Ataqatigiit imatut oqaaseqarfigissavaat.
Ataatsimut isigalugu nalunaarusiap annertuup pissutsit arlaqartut aammalu inatsisiliornermi naleqqussaanissamut tunngaviusussat taakkartorpai. Taakkua ilai pingaaruteqartutut isigisavut ukua Inuit Ataqatigiinniit taarusuppavut:
Siullermik suliassanik agguataarineq oqartussaassuseqarnerulersitsinissarlu aamma tamatuma ataani Nunatsinni atuisut naammagittaalliortarfeqalersinnaannerannut apeqqutit kiisalu sanaartukkanut Tele Greenland -ip pilersitaasa ingerlataasalu akuersissutinik tunniussisarnerup Tele Styrelsemit ingerlanneqaannartariaqarnerannut pissutigitinneqartut.
Tamanna pillugu Inuit Ataqatigiinniit pissusissamisoorluinnartutut isigaarput ingerlatsiviup sullissisunut akisussaassuseqarnikkut sanaartukkatigullu erseqqissumik sinaakkusiissoqartarsinnaanera qulakkeerniarlugu iliuuseqartoqarpat aamma Nunatsinni hackpencit pilersaarusiorfineqarnerisa aalajangersaaffigineqarnissaannut atatillugu Namminersornerullutik Oqartussat Tele Styrelsillu akornanni suleqatigiinnikkut siunnersuutit suliarineqarpata, tassami suleqatigiisitap oqarneratuut Namminersornerullutik Oqartussat tamatumani sunniuteqarluarnissaat qulakkeerneqartariaqarmat.
Ataatsimiititaliap nalunaarusiamini erseeqqisssumik oqaatigaa ullumikkut Namminersornerullutik Oqartussat akisussaaffinnik tigummisai naapertorlugit allaffeqarfitsigut sulisoqarnikkullu siunissami allannguutaasinnaasut kingunerisassaat sukumiinerusumik qaqilerneqartariaqartut, tassami sulisussat immikkut qaffasissumik ilinniagaqarsimasut pigineqalernissaat qulakkeerneqarsimatinnagu akisussaaffinnik tamakkiisumik isumannaatsumillu tigusinissaq piareersimaffigineqarnerusariaqarpoq, tamannalu aatsaat pisinnaavoq atorfeqarfiusinnaasut pisariaqavissussallu inuttaleriartorneqarnissaannut atatillugu ukiunut aalajangersimasunut pilersaarusiortoqarnissaa. Taamaaliornissat annertuumik Nunatsinnut pingaaruteqartussaavoq Inuit Ataqatigiillu naalakkeruisunut kaammattuutigissavaa apeqqut tamanna susassaqartunut anngunneqarnissaa isumageqqullugu.Tassa naatsumik oqaatigalugu, akisussaaffiup tamakkiisumik tigunissaanut piareersarluartariaqarpugut.
Ataatsiiititaliap isumaqatigiissup
nalunaarutaani isumaliutersuutigineqartut inassuteqaataalu ataatsimut
isigalugit Inuit Ataqatigiit tamakkiisumik akuersaaratsigit nalunaarutigaara.
Naggasiullugu suleqatigiisitaq
Inuit Ataqatigiinniit qutsavigerusupparput taamatullu Forskningsministeriap
Namminersornerullutik Oqartussat suleqatigalugit Kalaallit Nunaanni raadiukkut
attaveqaateqarnermut tunngassuteqartutigut inatsisitigut tunngavigisat tassunga
atallutik nalunaarutit ullutsinnut naleqqussarneqarnissaannut
iluarsaanneqarnissaannullu siunnersuuteqarnissaq sulissutigissagaa uaguttaaq
kaammattuutigalutigu.
Anthon Frederiksen,
Kattusseqatigiit oqaaseqartuat:
Danmarkip Nunattalu
nalunaarasuartaateqarnikkut suleqatigiinnerat pillugu ataatsimiititaliap
Nunatsinni raadiukkut attaveqartarneq pillugu nalunaarusiaa Kattusseqatigiinniit
soqutigalugu misissorsimavarput imatullu oqaaseqarfigissallugu.
Kattusseqatigiinniit
pingaartitatta ilagilluinnarpaat Nunatsinni raadiukkut attaveqarnermut
tunngasuni inatsisiliat taakkununngalu atatillugu malittarisassat Nunatsinni
pissutsinut naleqqussarneqarlutillu tamakkiisumik
aalajangiiffigineqartalernissaat, tassami ukiuni makkunani raadiunik
misissuinerit aammalu raadiup maligaasai atorlugit attaveqarnermi akuersissutit
tunniunneqartarnerat taakkuninngalu aqutsineq eqqarsaatigalugit suliassat
amerlanerpaartaat sulisunit nunaqavissunit isumagineqareerput, kisianni
oqartussaaffiit tamakkiisumik Nunatsinnut nuunneqassappata aammalu innuttaasut
suli annerusumik atukkamikkut artukkerneqassanngippata ullumikkut pissutsit
isiginiartariaqarput, tassami taamatut nuussissagaanni aningaasaqarnikkut ilinniartitaanikkullu piumasaqaataasut
avaqqunneqarsinnaanngitsut ilanngullugit nalilersuiffigilluartariaqarmata,
ataatsimiititaliammi ilaatigut naliliinera naapertorlugu suliassaqarfinni
suliassanik amerlanerusunik nuussisoqarneratigut suliarinninnissami
suliaqarfimmut pisariaqarneratut ilisimaarinnittunik immikkut ilisimasalinnik
pisariaqartisisoqarnissaa annertuutut oqaatigineqarsinnaavoq.
Taamaattumik maannakkutut pissutsit
itsillugit aammalu minnerunngitsumik nunat tamat akornanni raadiup maligaasai
atorlugit attaveqartarnermut tunngassuni oqartussaaffiit
naalagaaffigeqatigiinnerup ataani akisussaaffigineqarnerat aammalu Danmarkimi
attaveqaatitigut aqutsisoqarfimmit nakkutilliineq
oqartussaaffigineqarallartillugu aningaasalersorneqarneralu
pingaartinneqartillugu pisariaqarpoq Namminersornerullutik Oqartussat
Danmarkimilu Ilisimatusanermut Ministereqarfiup akornanni suleqatigiiffiusartussat
pillugit ersarissaasoqarnissaa, suliassaqarfiit oqartussaaffiillu tamakkiisumik
siunissami Nunatsinnut nuukkiartuaarneqarnissaat siunertaralugu.
Taamaammat ataatsimiititaliap
kaammattuutai Kattusseqatigiinniit tamakkiisumik taperserpavut taamaalillutalu
isumaqarput nalunaarutigalugu.
Steffen Ulrich-Lynge, Ineqarnermut
Attaveqarnermut Pilersuinermullu Naalakkersuisoq:
Partiit Kattusseqatigiillu
tigusilluarnerannut aammalu tapersersuilluarnerannut kaammattuineranullu
naalakkersuisut sinnerlugit qujavunga. Taamaalilluta naalakkersuisut inatsimmik
allanngortiterinissaq aammalu naleqqussaanissaq ingerlanneqarnissaanut
aallartissinnaanngussagatta. Aamma maluginiarpara unartaa Ilisimatusarnermut
Ministeriaqarfik naalakkaersuisoqarfillu imminnut suleqatigeeqqissallutik
siunissami ungasinnerusmut maanga Kalaallit Nunaannut suliat taakku taaneqartut
nuunnissaannut piareersarnissamut
kaammatuinersi aamma tusaavara.Qujanaq.
Gudmand
Rasmussen, Atassut:
Qujanaq.
Una oqallinneq assorujussuaq nuannarivara tassani uani peqataaaffigisinnaagakku.
Siullermik uani Nunatsinni attaveqaatit pillugit Telemut oqaaseqalaarusuppunga.
Tassa uani ajornartorsiutit annertuut imarsiornermi uanga misigisartakkakka
eqqaalaarusupakka.
Nunatsinni
ajornartorsiuteqarpugut attaveqarniarnikkut imaannaanngitsumik
anigoruminaattunik Asserssutitut taasinnaavara Upernaviup eqqaani nunaqarfinnut
ingerlaarnerni nunaqarfiit tikilerneranni atassutaaruttarpoq umiarsuaq,
inatsisitigullu piumasaqaataavoq tikiffimmut tikilernermi piffissaq aalajangersimasoq
nalunaarutigineqarsimanngippat taava naalakkamut pineqaatissiinermik
kinguneqarsinnaasoq, naak nammineq pisuussutigisanngikkaluaraa.
Erloqinartarpoq
illoqqarfimmut tikilluni attaveqarsinaajunnaartarneq, allaat Uummannap eqqaani
taanna atuuppoq. Angallatini naalagaalluni angalanermi aallarnermi
nassiunneqartarpoq angallatsip positionia qaqugukkut tikinnissaa taannalu tutsiunnaveeraangat peqqusiileqinarsisarpoq
niuertut nunaqarfinni saaffiginngikkaanni attaveeruttarneq., tassa
matusoortarpoq. Umiarsuit aamma mobileqarput kisiannili aamma taakkunatulli
raadiutut atorsinnaanerat killeqartigaaq aamma avani avannaatungaani taanna
atuuppoq.
Nuussuup
eqqaani tassa Qeqertarsuup alannguani attaveerutivittarpoq umiarsuaq
raadiukkut. Siornatigut tigummineqarallarmat sakkortusaavik Qeqertarsuarni
ukiut siulliit ajornartorsiut taanna pisarsimanngilaq, kisiannili ilumoortoq
uaniippoq sakkortusaavik Aasiannut nuunneqarmat naalaarniarneq taanna assorujussuaq
ajornartorsiutaalersimalluni, taamaattumik isumaqarpunga naalakkersuisumut
taanna tusaatissatut tigullaqullugu. Pisariaqartitsisorujussuupput aalisartut
qujanartumik aamma ajunaarnernik pisoqartanngimmat qujasariaqarpugut, tassami
tassanngaannaq pisoqartillugu sumilluunniit kalerriisinnaasumik nipimik
ikiuisinnaanermik tutsiuttoqarsinnaajunnaavittarmat. Taamaattumik taanna
naalakkersuisumut assut tusaatissatut
tigullaqugaluarapa. Tassani ataatsimiinissatsinni neriussuunga immaqa
sukumiinerusumik paasitinneqarlutalu aamma eqqartuiffigineqarumaartugut,
pisarialerujussuummammi.
Lars
Karl Jensen, Siumut:
Aap.
Uani Nunatsinni raadiukkut attaveqarnermut tunngasunut ukua attuumalluinnarmata
isumannaallisaaneq nunarsuarmiut tamarmik atugarisaat aamma Tele-ip
Attaveqaatip taassuma suleqataaffigisaa, isumaqarpunga Naalakkersuisuni aamma
eqqumaffigisassatut tikkuassallugu pingaaruteqartoq maannakkut frekvensit
taagorneqartut, immaqa oqarsinnaavugut aallakaatitsiviit, taakkua nunarsuaq
tamakkerlugu aaqqissuussaaneranni Nunarput peqataalerpat raadiumi
atuisinnaasut allagartaat aamma pinngitsooratik qaffanneqartussaapput. Allaat
maannakkumut takornariaqarnermi angallassisut ajornartorsiutigilereerpaat
nammineq angallateqaraluarlutik tamakkuninnga akuerisaasunik, radiukkut
allagartaqannginnertik peqqutigalugu inunnik ilaasoqarsinnaanerat
killilersugaalermat.
Imaappoq
inatsisiliornikkut mianerisassat taakkua ilagisussaavaat inatsisiliorneq
nunarsuarmiut tamarmik atugaat akuuffigissagutsigu aamma Nunatsinni imartatta
angallaviginerani nammineq nunaqavissut angalanerat tassuuna
killilersorneqassanngimmat nunarsuarmioqatinik isumaqatigiissuteqarneq
piinnarlugu. Isumaqarpunga taanna eqqumaffigineqartariaqartoq.
Maannakkut
takornarissanik angallassisut eqqaagakkit raadiumut allagartalersuineq
siusinnerusoq eqqarsaatigalugu VHF-inut raadiuaqqanut killilimmik allagartallit
angallasisinnaaneri sinerissami angallassisinnaanerat killeqartitaanngilaq,
kisianni arlalinnik saaffigineqartareerpu-nga ajornartorsiut taanna
eqqumaffiginiaqqulugu, tassa inunnik angallassissagunik tuluttut
oqalussinnaaneq aamma pingitsooratik pisinnaasariaqarmassuk raadiumik
allagartanik peqarnissaminnut.
Maannakkut
naalisaat GMDS6 atorneqartoq umiarsuarni tamani atugassatut aamma
isumaqatigiissutaareerpoq Nunatsinillu aamma imarsiornerup iluani
inatsisiliornermi taanna akuuffigissagutsigu tassuuna sukaterisussaanerput
atuisunut sianigillaqqullugu naalakkersuisunut oqariartuutigiinnarpara.
Steffen
Ulrich-Lynge, Ineqarnermut Attaveqarnermut Pilersuinermullu Naalakkersuisoq
Gudmand
Rasmussenimut aammalu tassunga atatillugu inatsimmut tassunga massakkut
oqaluuserisatsinnut tunnganngikkaluarput taakku marluk saqqummiunneqartut,
kisialli oqaatigissavara aamma Lars Karl Jensenimut taakku sillimaniarnermut tunngasut
taavalu aamma oqaatsinut tunngasut, tassa tuluttut oqalussinnaanermut tunngasut
aamma misissorneqarput massakkut. Assigiinngitsutigut taava kingusiinnerusukkut
saqqummiussissaagut aamma periarfissaqassagutta soorunami sivikitsoq piffissaq
atorlugu saqqummiussisinnaavugut allakkatigut taakkununnga apeqquteqartunut.
Taamaappoq.
Anders
Andreassen, Siulittaasoqarfimmi ilaasortaq:
Tassa
allanik oqaasissaqartueruppoq. Taamaalilluta ullumikkut oqaluuserisassaq
immikkortoq 8 tassalu raadiukkut attaveqarnernut tunngasunut
Namminersornerullutik Oqartussat oqaaseqaataata suliarineqarnera naammassivoq.
Taamaalillunilu aamma ullumikkut oqaluuserisassat tamakkerpavut.