Oqaluuserisassani immikkoortoq 15-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataasinngorneq 10. maj 1999 nal. 13.54
Ataatsimiinnermi aqutsisut: Johan Lund Olsen, Inatsisartut Siulittaasuat.
Josef Motzfeldt, Aningaasaqarnermut Niuernermullu Naalakkersuisoq:
Aningaasarsianit akileraarutit pillugit Inatsisartut inatsisaat naapertorlugu Inatsisartut ukiup 1999-ip affaani siullermi ataatsimiinnerminni 2000‑imut akileraarutitigut il.il. ilanngaatissat aalajangersartussaavaat.
Ilanngaatit
il.il. makku pineqarput:
2:
Ilanngaat aalajangersimasoq.
3:
Aningaasarsiat B‑t akileraaruteqaataasussaanngitsut.
4:
Akissarsiortunut killilimmik akileraartussaasunut ilanngaat
aalajangersimasoq.
5:
Kommuninut ataatsimut akileraarut, ' 28 a, imm. 2.
Ilanngaatit
ataasiakkaat il.il. erseqqinnerusumik nassuiarneqarnerannut, qanoq
sunniuteqartarnerannut kiisalu ukiuni siuliini qanoq
angissusilerneqartarnerannut atatillugu saqqummiussinermi ilanngussaq 1
innersuussutigineqassaaq. Taamatuttaaq ilanngussaq 2-mi nassuiaateqarfigineqarput
2000-imi aningaasarsiat tunngavissaattut naatsorsuutigisat.
Naalakkersuisut
sinnerlugit inassutigissavara 2000‑imut akileraarutitigut il.il.
ilanngaatissat ima angissusilerneqassasut.
Inummut ilanngaat ukiumut Kr. 40.000. Ilanngaat aalajangersimasoq ukiumut
Kr. 8.000.
Aningaasarsiat B‑t
akileraaruteqaataasussaanngitsut ukiumut Kr. 5.000. Killilimmik akileraartussaasunut
ilanngaat ukiumut Kr. 1.000. Kiisalu kommuninut ataatsimut akileraarut. 4 %.
Taamaalilluni
2000‑imut ilanngaatissat il.il., ilanngaat aalajangersimasoq kisiat
pinnagu, 1999‑imut ilanngaatissatuulli angissusilerneqarnissaat
inassutigineqarpoq. Matumuunalu eqqaasitsissutigiinnassavara ilanngaat
aalajangersimasoq 1999-i 2.000 koruuninik qaffaavigineqarpoq politikkikkut
allaffissornikkullu agguataarinissamik tunngaveqarnera pissutigalugu.
Tamannalu 1998 upernaakkut Naalakkersuisut inassuteqarnerat najoqqutaralugu
Inatsisartuni aalajangerneqarpoq.
2000‑imi
kommuninut ataatsimut akileraarutip allanngornagu 4 %‑inut angissusilerneqarnissaa
Kalaallit Nunaanni Kommuneqarfiit Kattuffiata isumaqataaffigaa.
Aallaqqaataani
oqaatigeriikkattut paasissutissat sukumiinerusut pillugit soqutiginnittut
ilanngussanut 1-imut 2-mullu innersuutiitigalugit, Naalakkersuisut
sinnerlugit Inatsisartut qinnuigissavakka 2000-imut akileraarutitigut
ilanngaatissat il.il. aalajangersaqqullugit.
Hans Enoksen, Siumup oqaaseqartua:
Akileraarutitigut ilanngaatissat il. il.
ukioq 2000-imut atuuttussat aalajangersarneqarnissaannut atatillugu Naalakkersuisunit
inassutigineqartut tamakkiisumik Siumup akuersaarpai.
Daniel Skifte, Atassutip oqaaseqartua:
Ukiumut 2000-imut akileraarutitigut
ilanngaatissat Atassummi pisarnertitut peqqissaartumik
oqaloqatigiissutigereerlugit makku oqaatigissavagut.
Atassutip pingaarluinnartutut anguniagaraa
inuiaqatigiit akileraarutitigut akitsuutitigullu nammakkersugaanerat
sapinngisamik minnerpaaffigisinnaasamini inissisimassasoq. Kiisalu ajornanngippat
akileraarutit appartinneqarnissaat siunertariuarneqartariaqartoq. Aamma
qangaaniilli oqaatigiuartarparput Nunatsinni akileraartarnermi malittarisassat
ima paasiuminartigalutillu suliariuminartigissasut innuttaasunit kikkunnit
tamanit ajornartorsiutigineqaratik paasineqarlutillu
suliarineqarsinnaassallutik.
Atassutip 2000-imut akileraarutitigut
ilanngaatissatut siunnersuutigineqartut taamatut iluseqarluni, tassa
1999-imisulli allannguuteqartinnagit annertussusiligaallutik,
akuersissutigineqarnissaat tapersersorumavaa.
Atassutip maluginiarsimavaa Nunatsinni
kommunit pingaartumik ukiuni kingullerni aningaasatigut
atugarissaarnerulersimanerisa kinguneranik kommuninut ataatsimut akileraarut
allanngortinnagu 4 %-inut angissusileqqinneqarnissaa KANUKOKA-p
isumaqataaffigisimagaa. Tamanna nuannaarutigaarput.
Naggataatigut Atassummiit piffissaq manna
iluatsillugu maannangaaq oqaatigereerniarparput, ukiunut 2000-ikkunnut
isilernitsinni maannamut akileraartarnikkut aaqqissuussineq nunatsinni
atuuttuusoq pinngitsoorani allanngortittariaqassasoq, tamanna taamatut
isumaqatigigatsigu.
Tamanna pisinnaavoq soorlu naligiimmik
akeqartitsinerup allanngortinneqarsinnaaneranut tunngasumik Inatsisartuni
oqallinnissaq pisussanngorpat, tassami Atassutip naatsorsuutigaa,
naalakkersuisut ukiaru Inatsisartut ataatsimiilerpata tamanna pillugu
oqallisissiaq aallarnissaatitut qaffatsinneqarumaartoq. Qulaani oqaaserisavut
innersuussutigalugit siunnersuut ataatsimut isigalugu Atassutip
allannguuteqartinnagu akuersaarpaa.
Lars Sĝrensen, Inuit Ataqatigiit oqaaseqartuat:
Inatsisartut upernaakkut siullermeerlutik
ataatsimiinneranni aningaasarsianut akileraarutit pillugit Inatsisartut
inatsisissaat ukiumi nutaami januarip aallaqqaataaniit atuutilertussaq pisarneq
malillugu Naalakkersuisuniit saqqummiunneqarpoq.
Inuit Aqatigiinniit maluginiarparput ukiumut
2000-imut akileraarutitigut ilanngaatissat il.il. pillugit Naalakkersuisuniit
saqummiunneqartut ukiumut 1999-imut sanilliullugit allanngortussaanngitsutut
siunnersuutigineqartut. Inuit Aqatigiinniit ukiumut 2.000-imut akileraarutit
ilanngaatissatut Naalakkersuisuniit siunnersuutigineqartut akuersaarpagut.
Naalakkersuisunullu kaammattuutigissavarput
maannangaaq inuuniarnermi atugarisat pillugit misissuisimaneq aallaavigalugu
maanilu Nunatsinni akissarsiakinnerpaartagut suli oqilisaaffigineqarsinnaanissaat
eqqarsaatigalugit, minnerunngitsumillu aningaasarsiatigut isertitatigullu
nalimmassaanissaq siunertaralugu
akileraartarnikkut nutaamik aaqqissuussisoqarsinnaanissaa siunertaralugu
suleqatigiissitamik pilersitseqqullugit, tamannalu misissussagaat.
Akileraarutit pillugit nutarterinissami Kalaallit Nunaanni kommuneqarfiit kattuffiat
qanimut suleqatigineqarnissaa pingaaruteqarluinnarpoq, ilisimaneqartutuummi
kommuneqarfimmiit kommuneqarfimmut akileraarutitigut aamma assigiinngissutaasut
suli annertupput. Soorlu inuuniarnermi atugarisat pillugit misissuisimanerup
takutikkaa Nunatsinni innuttaasut 1/4-liisa ukiumut 99.000 kr-nit ataallugit
isertitaqartartut, aammalu innuttaasut affaat sinnerlugit ukiumut 199.000 kr-nit
ataallugit isertitaqartartut.
Misissuisimanermittaaq aamma
uppernarsarneqarpoq, ukiumut isertitakinnerpaaffiusartut tassaasut
kommuneqarfiit mikinerusunik oqaatigineqartartut. Inuit Ataqatigiinnissaaq
isumaqarpugut inuuniarnermi atugarisat pillugit misissuisimaneq
annertuumik paasissutisseereertoq,
atunngitsuussallugu pissutissaqanngitsugut.
Taama oqaaseqarluta Naalakkersuisunullu
kaammattuuteqarluta ukiumut 2000-imut akileraarutitigut ilanngaatissat il.il.
Naalakkersuisuniit saqqummiunneqartut akuersaarpagut.
Mads Peter Grĝnvold, Kattusseqatigiit oqaaseqartuat:
Ukioq 2000-imut akileraarutit
ilanngaataasussat ilaallu ilanngullugit aalajangersaanerat, ukioq 2000-imut
akileraarutitigut ilanngaatissat ilaallu ilanngullugit aalajangersaanerit
pillugit:
Inummut ilanngaat - ' 32, imm. 1,
ilanngaat aalajangersimasoq - ' 16,
imm. 2, aningaasarsiat B-t akileraarutaasussaanngitsut - ' 15, imm. 2,
akissarsiortut killilimmik akileraartussaanngitsunut ilanngaat
aalajangersimasoq ' 2, imm. 2, aammalu kommuninut ataatsimut akileraarut - ' 28
a, imm. 2-tut siunnersuutigineqartut Kattusseqatigiinniit inassutigissuarput,
suliap aappassaaneerneqannginnerani Inatsisartut Akileraartarnermut
Ataatsimiititaliaani oqaluuserineqassasut.
Kattusseqatigiinniit kissaatiginartipparput
utoqqaat sulisinnaajunnaarnersiutillit soraarnerussutisiallillu pillugit
aalajangersakkat erseqqarinnerusumik nassuiaateqarfigineqassasut.
Taamatut oqaaseqarluta suliap aappassaaneerneqannginnerani
Akileraartarnermut Ataatsimiititaliamut sukumiisumik oqaluuserineqarnissaa inassutigaarput.
Josef Motzfeldt, Aningaasaqarnermut Niiuernermullu
Naalakkersuisoq:
Tassa akileraartarnermi akileraarutaasussanik
isertitaqartarnermi aappaagumut ilanngaatissap matumuuna paasivara
Inatsisartunit Partiinit tamanit, Naalakkersuisut inassuteqaataat akuersaarneqartut.
Soorunami Atassutip oqaluttuatut innuttaasut
akitsuutisigut nammakkersungaanerat pisariaqanngitsumik annertusarneqarnissaa
Naalakkersuisut aamma isumaqatiginngilaat. Soorunami periarfissaqarutta nunallu
aningaasivia naammattunik innuttaasut atugaannik naammaginartumik
atugassaqartitsisinnaappat, akileraarutit appartinneqarsinnaanerat
orniginartorujussuungaluarpoq, ullumikkulli tamanna piffissaanngilaq
ullumikkorpiaq, aammalu oqaaseqartut arlallit Atassumminngaaniit kiisalu
Kattusseqatigiinninngaaniit inatsisip akileraartarnermut inatsisip
paasiuminartuulluni innuttaasunut kikkunnilluunniit imaasiallaannaq
atorneqarsinnaasariaqarneranik ujartuineq, imaluunniit maluginiagaqarneq
tamanna ilumoorpoq, pissusissamisoorpoq.
Atassutillu akileraartarnikkut
aaqqissuussineq Nunatsinni atuuttuusoq ullumikkut pinngitsoorani
allanngortinneqartariaqartutut isumaqarfiginninnera, tamanna uaguttaaq
isumaqataaffigaarput Naalakkersuisuninngaaniit, tamanna naligiimmik imaluunniit
assigiimmik akeqartitsinerup allanngortinneqarsinnaanerinnaanilluunniit
pinnani, kisianni naliginnaasumik akileraartarnermut ullumikkut periutsit
atuutsinneqartut qangali allanngortinneqarsimapput. Ullumikkumullu
naleqqussartariaqarnerat Naalakkersuisut isumaliutigaat tamanna aamma Inuit
Ataqatigiit oqaluttuanut oqaatigissavara.
Ukioq una massakkuminngaanniit ukioq ataaseq
Naalakkersuisut akileraartarnikkut, kiisalu aamma allatigut innutaasut
pisortanik pisussaaffimminnut isumaginninneranut tunngasutigut qulaajaanissaq
ukiumik ataatsimik piffissaqarfigerusukkatsigu.
Qulaajaanerillu taamaattut
aallartisarneqareermata, Naalakkersuisut isumaqanngillat arlaat eqqaallugulu
allanngortipallariarlugu ataatsimiinnerup tulliani kukkusoqarsimasoq
paasinarsippat aamma allannguuteqaqqitsitsisarnissaq, tamanna periuseq
inuiaqatigiinnut paasiuminarsaarinninnerunani kisianni immaqa puullaaqinermik
kinguneqartitsiinnartarmat, sukumiisumik misissuinermik toqqammaveqarluni
Naalakkersuisuninngaanniit allanngortitsinissaq piareersaasiorparput.
Kiisalu kommuunit, kommuunit aamma allanngortiterinermi kommuunillu Inatsisartullu,
tassa Nunatsinni pisortanik taaneqartartut akileraarnermi ingerlatsisuuvugut,
kommuunimut akileraartarput inuttaasut, aamma innuttaasut
Namminersornerullutik Oqartussanut nuna tamakkerlugu akileraarutikkut
akileraartarput. Taamaammat akileraarutit sukkulluunniit naleqqussarneqarnissaanni
taakkua pisortat immikkoortortaat marluk pinngitsoornatik
suleqatigiittariaqarmata, qanimut aningaasaqarnikkut ingerlatsinikkut Kommuunit
Kattuffiat, kommuunit sinnerlugit attavigiuartariaqarpoq, aamma tanna
ingerlatereerparput.
Kiisalu Kattusseqartigiit oqaluttuannut,
utoqqaat sulisinnaajunnaarnersiutillit soraarnerussutisiallillu pillugit
aalajangersakkat ersarinnerusumik, nassuiaateqarfigineqassasut tikkuarneqarpoq.
Tamanna nalinginnaasumik, kommuunit akileraartitsisuusut innuttaminnut qanimut
isumagisinnaassagat, qularinngilara, kisiannili soorunami kommuunit
pisariaqartitsisimassappata tamanna qitiusumik Akileraartarnermut
Pisortaqarfimminngaanniit ikiuuffigissavarput. Ullumikkorpiarlu tamatumunnga
pisariaqartitsineq qanoq angitigisoq Kommuunit Kattuffianinngaanniit imaluunniit
kommuunit ataasiakkaaninngaannit annertunerusumik Pisortaqarfimmut
Naalakkersuisoqarfinnut apuunneqarsimanngilaq, kisianni aamma nalinginnaasumik
kommunit pisussaaffigigamikku tamanna naammassisinnaassagaat qularinngilara.
Taamatut oqarlunga qujassutigaara
Inatsisartuni partiit tamarmik Naalakkersuisut inassuteqaataat
akuersaarmatigit.
Daniel Skifte, Atassutip oqaaseqartua:
Partiit oqaaseqartui
oqaaseqarfigilaarniarpakka. Ilaatigut Inuit Ataqatigiit innersuussutigaat akileraartarneq
pillugu nutarteriniarnermi suleqatigiissitaliortoqarsinnaanersoq qaffatsillugu.
Taavalu Kattusseqatigiit aamma oqaatigaat, taanna immaqa suliassaq
Akileraarternermi Ataatsimiititaliamit suliarineqaruni pitsaanerussasoq.
Siullermik oqaaseqarfigilaassuara aamma
Naalakkersuisunut ilaasortap akissuteqaataa. Tassani imatut paasivara,
Naalakkersuisut akileraartarnermik
aaqqissuussinissaq allanngortinniarlugu sulissuteqarnertik ingerlatiinnarpaat.
Tamanna taamatut akissuteqarneq nuannerpoq, suleqatiginnikkusussusermik
ersersitsivoq, tamannalu peqqutigalugu isumaqarpunga una suliassaq Kattusseqatigiit
siunnersuutaattut Akileraartarnermi Ataatsimiititaliami eqqartorneqariarluni
taava pisariaqartinneqarpat suleqatigiissitaliortoqarumaarpoq. Suleriaaseq
taamaappat Atassumminngaanniit kaammattuutigiuminartinneruarput.
Johan Lund Olsen, Inatsisartut Siulittaasuat:
Maannalu allamik oqaaseqartoqarnianngimmat, kisianni
una erseqqissaatigilaartariaqassuara, tassa Inatsisartut suleriaasissaat
maannakkut atuuttoq malillugu tassa ' 39-imi aalajangersarneqarmat, tassa
Inatsisartut inatsisissaattut peqqussutissaatullu ilusilerlugit
siunnersuutigineqanngitsut, maani inimi ataasiaannarlugit
oqaluuserineqartarmata. Aatsaalli amerlanerussuteqarlutik partiit
kissaatigisaat kissaatigineqarpat Ataatsimiititalimut aamma
ingerlateqqinneqarsinnaassasoq.
Taamaattumik tassa naatsorsuutigisariaqarpoq
ukioq 2000-imut akileraarutitigut ilanngaatissat il.il. uani
aalajangersarneqaqqullugit Naalakkersuisuninngaanniit Inatsisartunut
noqqaassutigineqartut maani akuersaarneqartut, kisiannili una aamma paasivara,
apeqqutit allat, apeqqutip massuma oqallisigineqarnerani saqqummersut, taakkua
aamma Ataatsimiititaliami oqallisigiumaneqartut, aamma taanna
akornutissaqanngilaq, kisianni tassa erseqqissaqqiinnassavara maannakkut tassa
ukioq tullissaanut akileraarutitigut ilanngaatissat il.il. taakkua maannakkut
aalajangersarneqartussammata, suleriaaserput una malillugu. Taavalu aamma
oqaaseqaqqikkumavoq Aningaasaqarnermut Niuernermullu Naalakkersuisoq, takanna.
Josef Motzfeldt, Aningaasaqarnermut Niuernermullu
Naalakkersuisoq:
Paatsuungasoqaqqugu Atassup oqaluttuanut
oqaatigissuara, Kattusseqatigiit suliassamik aappaagumut akileraarutitigut
ilanngaatissanut tunngatillugu, nalinginnaasumik suleriaaseq najoqqutaralugu
Akileraartarnermut Ataatsimiititamut innersuussimmata, taannalu suliassaq
partiinit tamanit tapersersorneqarmat, Akileraartarnermut Ataatsimiititamut
ingerlatinneqassaaq.
Unali akileraartarnerup tunngaviusumik
allanngortinnissaa Inuit Aqatigiininngaanniit ilaatigut
suleqatigiissitaliuunneqarnissaanik siunnersuutigineqartoq, Naalakkersuisuni
ingerlatagut massakkut ingerlateriikkavut nangittumik suliarissavagut,
kisiannili soorlu aningaasaqarnermut tunngassunik apeqqutini Aningaasaqarnermut
Ataatsimiititaq qanimut ataatsimeeqatigisarlugu suleqatiginiarlugu
aallartereertugut, annertuumik allannguisoqassatillugu Inatsisartut sinnerlugit
ataatsimiititaliat susassaqartut tamatumani suleqatigineqarnissaat, periuseq
taanna pissusissamisoortutut isigaarput, aammalu atorusullugu.
Pisariaqartitsinitsigut Akileraartarnermut Ataatsimiititaliaq
allanngorterisoqassappat allanngutaasussanik tamakkuninnga qanimut
suleqatigineqassaaq ilisimatinneqartuassallunilu.
Johan Lund Olsen, Inatsisartut siulittaasuat:
Taava tassa oqaaseqaqqittoqarumanngilaq,
taamaalillutalu oqaluuserisassap tullianut tassa ingerlaqqissinnaanngorpugut.