Kalaallit Nunaanni Inatsisartut

Oqaluuserisassani immikkoortoq 60-1

Ataatsimiinnerit ] Tilbage ] Op ] Næste ]

Siullermeerneqarnera Aappassaanneerneqarnera Pingajussaaneerneqarnera

Ataasinngorneq, 31. maj 1999, nal. 10.13

 

Oqaluuserisassani immikkoortoq 60

 

Naalakkersuisut peqquneqarput naalagaaffiup oqartussaasuinut ”Misissuisussatut Kommissionit Pillugit Inatsit” kunngip peqqussutaatigut Kalaallit Nunaannut atortussanngortinneqarnissaannik ingerlaannarlutik isumaqatigiinnialeqqullugit.

(Inatsisartunut ilaasortat Johan Lund Olsen, Anders Andreassen, Finn Karlsen, Hans Enoksen)

 

 

Ataatsimiinnermi aqutsisoq: Johan Lund Olsen, Inatsisartut Siulittaasuat:

 

Johan Lund Olsen, Inatsisartut Siulittaasuat:

Taava ingerlaqqeriarutta immikkoortoq 60, taanna Inatsisartut Siulittaasoqarfiat sinnerlugu uanngaanniit taanna saqqummiutissavara.

 

Tassa Kalaallit Nunaanni Inatsisartut suleriaasissaanni ' 30 naapertorlugu Siulittaasoqarfiup ilaasortai imaattumik aalajangiiffigisassatut siunnersuuteqarniarput. Tassa Naalakkersuisut peqquneqarput naalagaaffiup oqartussaasuinut Misissuisussatut Kommissionit Pillugit Inatsisip kunngip peqqussutaatigut Kalaallit Nunaannut atortussanngortinneqarnissaannik ingerlaannarlutik isumaqatigiinnialeqqullugit.

 

Siunnersuut imaattumik tunuliaqutaqarpoq. Misissuisussatut kommissioni pillugit inatsit ulloq 25. maj 1999, folketingimi pingajussaaneerneqarnermini akuersissutigineqarpoq, naatsorsuutigineqarporlu 1999-imi junip qaammataani atortussanngortinneqassasoq. Inatsissami ' 34-mi aalajangersarneqarpoq, inatsisit naalagaaffiup ingerlataanut tunngatillugu misissuinerit eqqarsaatigalugit ingerlaannaq Kallaallit Nunaannut atuutilissasoq.

 

Ilanngullugu inatsimmi ' 34, imm. 2-mi aalajangerneqarpoq, inatsit pissutsinut naalagaaffiup ingerlataasa avataaniittunut tunngatillugu misissuinerit eqqarsaatigalugit Kalaallit Nunaanni pissutsit immikkut pissutigalugit allannguuteqartariaqassaguni, taakku allannguutigalugit kunngip peqqussutaatigut Kalallit Nunaannut atortussanngortinneqarsinnaasoq.

 


Pissutsit naalagaaffiup ingerlataasa avataaniittut pillugit misissuisarsinnaanerit Inatsisartuni assut kissaati­gineqartarsimapput. Maanna misissuisussatut kommissioni pillugit inatsisip kunngip peqqussutaatigut tamakkiisumik, taamaattorli Kalaallit Nunaanni pissutsit immikkut ittut pissutigalugit allannguuteqartaria­qassaguni, taakku allannguutigalugit Kalallit Nunaanni atortuulersinneqarnissaanut inatsisitigut tunngavis­sat pigineqalerput.

 

Siulittaasoqarfik isumaqarpoq tamatuma sapinngisamik piaartumik pinissaa pingaartuusoq, taamaam­mallu siunnersuutigineqarpoq naalagaaffiup oqartussaasuinut isumaqatigiinniarnerit ingerlaannartumik aamma aallartinneqassasasut. Tassa taannaavoq Inatsisartut Siulittaasoqarfiata suleriaasissarput malillugu siunnersuutigisaat. Tassungalu tunngatillugu Naalakkersuisut Siulittaasuat akissuteqassaaq.

 

Jonathan Motzfeldt, Naalakkersuisut Siulittaasuat:

1996-imi upernaakkut ataatsimiinnermi KNI A/S-imik misissuisussanik kommissioniliortoqarnissaanik siunnersuut Inatsisartut oqallisigaat. Siunnersuutip oqallisigineqarnera naggaserneqarpoq, Inatsisartuni amerlanerussuteqarluartut isumaqatigiissutigisimammassuk eqqartuussivitsigut misissuisoqarsinnaanera­nut Nunatsinni periarfissiisoqassasoq.

 

1996-imi upernaakkut ataatsimiinnerup kinguninngua Inatsisartut aalajangernerat ministeriuneqarfimmut nassiunneqarpoq, ilisimannittutut akisussaassuseqarluni nassuiaateqarsinnaanermut inatsisitigut tunngavis­siinissamut iliuusissat pisariaqartut aallartinneqarnissaannik qinnuigalugu.

 

Misissuisussatut kommissioni pillugit inatsisissamut siunnersuut folketingimi naammassillugu suliarine­qareerpat suliassaq uterfigeqqinneqassasoq ministeriuneqarfiup taamanikkut akissutigaa. Qanittukkullu majip 25-anni misissuisussatut kommissioni pillugit inatsit folketingip inaarutaasumik akuersissutigaa.

 

Inatsimmi tamatumani '34, imm. 2 malillugu inatsisip kunngip peqqussutaatigut Nunatsinni atulersinne­qarsinnaapput imaluunniit inatsit taanna atulersinneqarsinnaavoq. Siulittaasoqarfiup kaammattuutai Inatsisartut isumaqatigippassuk misissuisussatut kommissioni pillugit inatsisip Kalaallit Nunaannut atulersinneqarnissaanik kunngip peqqussusiornissaq siunertaralugu ingerlaannaq naalagaaffimmi oqartussaasuinut Naalakkersuisut isumaqatiginninnialissapput.

 

Naggataatigut aamma ilisimatitsissutigissavara naalagaaffimmi oqartussanik isumaqatiginninniarnerit ingerlaneranni Siulittaasoqarfik soorunami Naalakkersuisut peqataatinniarmassuk malinnaatillugu, isumaqatigiinniarnerit inernerinut Inatsisartut sunniuteqarsinnaaqqullugit.

 

Per Berthelsen, Siumup oqaaseqartua:


Kaammattuutigineqartutut Naalakkersuisut Siulittaasoqarfik qanilaartumik suleqatigalugu naalagaaffiup oqartussaasuinut misissuisussatut kommissioni pillugit inatsisip kunngip peqqussutaatigut Kalaallit Nunaannut atortussanngortinneqarnissaanik ingerlaannarlutik isumaqatiginninnialernissaat Siumup tungaanit taperserparput.

 

Otto Steenholdt, Atassutip oqaaseqartua:

Maana saqqummiussaq atuaannarlugu takuneqarsinnaavoq akerliuffigissallugu pissutissaqanngitsoq. Tassa tamannarpiaavoq qangali aamma piumasarsimasarput, 1996-imili amigaataasimavoq massakkullu periarfissinneqarluni taama saqqummiunneqarnera Atassumminngaanniit ilassilluarlugu nalunaarutigissa­varput, assut ilalersoratsigu.

 

Maliinannguaq Markussen Mølgaard, Inuit Ataqatigiit oqaaseqartuat:

Qujanaq, Namminersornerullutik Oqartussaanermi ukiuni kingullerni aaqqissuussinerit nutaat arlallit ingerlanneqarsimapput. Malunniuteqarnerpaallu tassaapput Namminersornerullutik Oqartussat pigisaani piginneqatigiiffinni aktieselskabinngortiterinerit.

 

Taakku iluminni qanorluunniit ilioraluarpata susinnaaneq ajorpavut, inatsisit malillugit taamaaliorsin­naannginnatta. Uffa massa illuatungaatigut inuiaqatigiit aningaasaliissutaannik, ilaatigut amerlangaartunik allanullu atorfissaqartikkaluaqisatsinnik aningaasaliisariaqartarluta. Taamaattumik pisoq kingulleq Diskomut tunngasoq eqqarsaatigalugu siunissamilu pisussanik pakkersimaarinninnissaq eqqarsaatigalugu Inuit Ataqatigiinniit nuannaarutigaarput inatsisip qallunaat nunaanni atuutsinneqalersup Nunatsinni atuutsilernissaa siulittaasoqarfiup saqqummiummagu.

 

Inuit Ataqatigiinniit inuiaqatigiit aningaasaliissutaasa torersumik ingerlanissaat pingaartitarigatsigu qanoq pisoqartillugu iternga tikillugu qaqugukkulluunniit misissuisinnaanermik pisinnaatitsilernissap inatsisinn­gortinnissaa akuersaarparput. Tamannalu pillugu inatsisip Qallunaat Nunaanni 25. maj atuutilersup Nunatsinni atuutilernissaa anguniarlugu naalagaaffimmik isumaqatigiinniarnerit piaartumik aallartinnissaat Inuiat Ataqatigiinniit tamakkiisumik tapersersorpagut.

 

Mogens Kleist, Kattusseqatigiit oqaaseqartuat:

Naalakkersuisut peqquneqarput naalagaaffiup oqartussaasuinut misissuisussatut kommissioni pillugit kunngip peqqussutaatigut Kalaallit Nunaannut atortussanngortinneqarnissaannik ingerlaannaartumik isumaqatigiinniaqqullugit.

 

Inatsisip Nunatsinni atuutsilerneqarnissaa Kattusseqatigiinniit tapersersorparput Naalakkersuisullu isumaqatigiinniarnissaannik qallunaat naalakkersuisuinik piaartumik ingerlanneqarnissaa innersuussutiga­lugu, kunngip peqqussutaatigut Kalaallit Nunaanni atuutsinneqalersinnaanngortinneqassasoq Kattusse­qatigiinniit innersuutigerusupparput, qujanaq.


 

Johan Lund Olsen, Inatsisartut Siulittaasuat:

Qujanaq, allanik oqaaseqartoqarnianngilaq. Tassa paasinarpoq Inatsisartuni partiit tamarmik Inatsisartut Siulittaasoqarfiata matumani immikkoortoq 60-imi siunnersuutigisaat, taanna akuersaarumaneqartoq. Taamaattumik taamatut ingerlaqqittussaassaaq, tassa Inatsisartut Siulittaasoqarfiata Naalakkersuisullu suleqatigiinnerisigut taanna suliaq ingerlateqqinneqassaaq.