Oqaluuserisassani immikkoortoq 12-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
(Aningaasaqarnermut Naalakkersuisoq)
Ataatsimiinnermik aqutsisoq: Inatsisartut Siulittaasuat Ole Lynge.
Ole Lynge, Inatsisartut Siulittaasuat:
Ataatsimiinneq ammarpoq. Ullumikkut Inatsisartut 7. maj ataatsimiinnisaanni ukua oqaluuserisassaapput immikkoortoq: 12, 68, 85, 99, 62, 14, 15, 16, 46, 40 aamma 47.
Aallartivitsinnata oqaasissaqalaarpunga, tassalu Inatsisartuni ilaasortap Finn Karlsenip Atassummeersup, ulloq 7. maj ilanngullugu sulinngiffeqarallarnissani allakkatigut nalunaarutigaa, taamaammallu Inatsisartut siulittaasoqarfiata inassutigissavaa Finn Karlsenip sulinngiffeqarallarnissaa Inatsisartut akuersissutigissagaat.
Qinigaanerup Misilinneqarnissaanut Ataatsimiititaliap akuersissutigaa Atassutip sinniisussaatut siullersaat Naimanngitsoq Petersenip Inatsisartunut qinigasinnaassuseqarnera, taamaalillunga inassutigaara Naimanngitsoq Petersenip Finn Karlsenimut sinniisussatut ulloq 7. maj 2001 ilanngullugu Inatsisartuni ataatsimeeqataanissaa Inatsisartut akuersissutigissagaat. Akerliusoqarnerluni?
Taamaattoqanngilaq, taavalu Naimanngitsoq Petersen tikulluarit, Inatsisartuni inissannut ingissinnaavutit.
Aammalu Inatsisartuni ilaasortap Siverth K. Heilmannip Atassummeersup ullormiit maajip arfineq aappaanniit maajip qulingat ilanngullugu sulinngiffeqarallarnissani allakkatigut nalunaarutigaa. Taamaammallu Inatsisartut Siulittaasoqarfiata inassutigissavaa Siverth K. Heilmanni sulinngiffeqarallarnissaa Inatsisartut akuersissutigissagaat.
Qinigaanerup Misilinneqarnissaanut Ataatsimiititaliap akuersissutigaa Atassutip sinniisussaata aappaata Saaleeraq Johansenip Inatsisartunut qinigaassinnaassuseqarnera.
Taamaalillunga inassutigaara Saaleeraq Johansenip Siverth K. Heilmannimut sinniisussatut ulloq 9. maj 2001 ilanngullugu Inatsisartuni ataatsimeeqataanissaa Inatsisartut akuersissutigissagaat. Akerliusoqarnerluni?
Akerliusoqanngilaq.
Saaleeraq Johansen tikilluarit Inatsisartuni inissannut ingissinnaavutit.
Kiisalu aamma Inatisartuni ilaasortat Lars Karl Jensen, Siumut, Inatsisartuni ilaasortaq Lars Sĝrensen, Inuit Ataqatigiit kiisalu Inatsisartunut ilaasortaq Per Berthelsen, Siumut, ataatsimeeqataalernissinnut tikilluaritsi.
Kiisalu immikkoortoq 12 tikissavarput, Aningaasaqarniarnikkut ingerlatsinikkut nassuiaat. Tassani Aningaasaqarnermut Naalakkersuisoq Josef Motzfeldt saqqummiussissaaq.
Josef Motzfeldt, Aningaasaqarnemut Naalakkersuisoq:
Ukiuni kingulerpaani Nunarput aningaasaqarnikkut pitsaasumik ineriartorsimavoq. Aningaasaqarneq ataatsimut isigalugu pitsanngoriartorsimavoq, suliffissaaleqisullu ikiliartorlutik.
Tamatuma peqatigisaanik iluaqutaasimapput akileraarutitigut isertitat qaffannerat kiisalu suliffissaaleqisunut allanullu aningaasartuutit apparsimanerat.
Taamaattumik inuiaqatigiinni aaqqissugaanerit pitsanngorsarnissaannut pisortallu aningaasatigut missingersuutaasa patajaallisarnissaannut pitsaasumik aallariarfissaqalersimavugut.
Pissutsit taamaannerata pisussaatippaatigut ullut atugarissaarfigisatta isumatuumik atorluarnissaannut.
Atukkavut naammagalugit uniinnarsinnaanatalu uniinnassanngilagut, neriuutigalugulu pitsaasumik ingerlalersimaneq nangiinnarumaartoq.
Ukiut ingerlaneranni takusareersimavarput aningaasaqarnerup ingerlanera mumeqqissinnaasartoq. 1980-ikkut naalerneranni 1990-ikkullu aallartilaarneranni aningaasaqarnikkut nakkariartorsimaneq tamatumunnga takussutissaalluarpoq.
Taamatut ineriartornerup pitsaanngitsup uteqqinnissaa pinngitsoorumallugu aningaaasaqarnikkut maannakkut inissisimanerput atortariaqarparput, aningaasaqarnerup pitsaannginneruleriartorsinnaaneranit qoqassineqarumanata aningaasatigut sillimallualernissatsinnut.
Ullut pissarissaarfiit ajorsarfinngorsinnaanerisa saniatigut piareersimaffigisariaqarpagut ukiuni aggersuni allannguutaasussat, tassami pilersugassat amerliartussammata pilersuisussallu amerliartoratik.
Ukiuni aggersuni pilersortariaqartunik pilersuineq annertusiartussaaq, tamannalu aningaasaqarnikkut ingerlatsinermut inuiaqatigiittullu aaqqissugaanitta pitsanngorsarnissaanut piumasaqaatitaqartoq.
Inuit utoqqalisut ukiuni aggersuni amerliartornissaata kingunerissavaa arlalitsigut aningaasartuuteqarnerulerneq, tamatumani pingaartumik ilanngullugit pisortanit soraarnerussutisianut peqqinnissaqarfimmullu tunngasut.
Nunatta inuisa qanoq ukioqqortusseqartarnerata allanngoriartornissaanut missingersuutit takutippaat ukiuni qulini tulliuttuni utoqqalisut 63-it sinnerlugit ukiullit amerliartorusaaginnassasut.
Ullumikkut 63-it sinnerlugit ukiullit 3.500-it missarpiaaniipput, ukiulli qulit qaangiuppata 4.700-it sinnersimalissavaat, tassa utoqqalinersiuteqartariaqartut 1.200-it sinnerlugit amerlisimassallutik.
Inuit pisortanit soraarnerussutisiaqarsinnaasut taamatut amerliartornerata kingunerisaanik ukiuni pineqartuni pisortanit soraarnerussutisiat qaffakkiartussapput, taamalu 2011-mi ullumikkornit ukiumut 50 mio. kr.-inik amerlanerulersimassallutik.
Tamatuma peqatigisaanik peqqinnissaqarfiup nalunaarsuutaani takuneqarsinnaavoq utoqqalisut inuusunnerusunit nakorsiarajunnerusaqisut. Utoqqalisut amerliartornissaannut kaputartuukkaanni naatsorsuutigineqarpoq ukiuni aggersuni peqqinnissaqarfiup aningaasartuutai amerlisartussasut.
Peqqinnissaqarfimmut aningaasartuutit ukiumut 700 mio. kr.-it sinnerlugit amerlassuseqartaramik Namminersornerullutik Oqartussat aningaasaqarnerannut malunaatilerujussuupput, taamaattumillu suliaritittartut procentinngorlugu annikitsumilluunniit qaffariartarnerat annertuumik aningaasartuuteqarnerulernermik kinguneqartarput.
Utoqqalisunut aningaasartuuteqarnerulernissaq eqqaaginnaraanni ilimagineqarpoq ullumikkumut sanilliullugu 2009-mi peqqinnissaqarfiup aningaasartuutai 20 mio. kr.-it angullugit amerlisimassasut. Inuusaaseq pissutigalugu nappaateqalersarnerit kingunerannik aamma peqqinnissaqarfiup aningaasartuutai qaffakkiartortussaapput.
Tassalu utoqqalisut amerliartornerata kingunerisaanik ilimagisariaqarparput ukiumut aningaasartuutit 70 mio. kr.-it tungaannut qaffakkiartornisaat.
Tamatuma saniatigut Nunatta karsiata piareersimaffigisariaqarpaa aalisarnikkut appariartorsinnaaneq. Aalisakkanit nioqqutissiat akikillissappata aalisarnermiluunniit iluanaarutit appariartussappata pisariaqalersinnaavoq inuiaqatigiinni ingerlatat taamaaginnarlutik ingerlanissaat qulakkeerumallugu Nunatta karsiata aningaasaataasa atortariaqarnerat.
Taamaattumik Nunatta karsia ukiuni atugarissaarfiusuni ileqqaartariaqarpoq pisortanit soraarnerussutisiaqalersussat aningaasartuutissallu ilimageriinngisaraluit allat akissaqartissinnaajumallugit.
Ukiuni makkunanissaaq malugiartuinnarparput nunarsuarmioqatigiinnut pulajartuinnarnerput, tamatumalu piumaffigaatigut unammillersinnaassuseqarnerulernissamik, tamatumani ilanngullugit inuiaqatigiit kalaaliusugut ineruartornissamut allanngortiterinissamullu piumassuseqarnerput piginnaassuseqarnerpullu.
Ukuni kingullerpaani aningaasaqarnermut qaffakkiartorsimagluartoq Naalakkersuisut isumaqarput inuiaqatigiit aningaasaqarnerata malunnaatilimmik qaffakkiartornissaa imaaliallaannarluni ilimagineqarsinnaanngitsoq.
Aaqqissuussinikkulli nutarterinertigut qaffakkiartorsinnaaneq annertusarneqarsinnaavoq taamalu pigissaarnerujartornissaq periarfissaqalersinnaalluni.
Tassami Nunatta aningaasaqarnerata inuiaqatigiittullu aaqqissugaanitta tunngaviusumik aaqqissuuseriaatsit arlallit aporfigisarpai, aalisarnerup aalisakkerinerullu ineriartorneranik isumalluuteqarnerujussuarput inuussutissarsiutittalu ataasinnaavallaamik tunngaveqarnera.
Nunamut suleqatigisatsinnut sanilliulluta ilinniartitaanikkut naammassisaqarsinnaassutsikkullu ataatsimut isigalugu nakkanganerunerput pisortat sunniuteqarnerujussuat, tassa nunatsinni suliffeqarfiit angisuut amerlanersaannik piginnittuunermikkut suliffeqarfinnik namminersortunik ingiaaqqanerat taamalu inuussutissarsiornerup sukkasuumik ineriartornissaanik akornuseeqqanerat.
Tamakkua tamaasa qanoq iliuuseqarfigisinnaavagut, tamannalu ilisimaaralugu Naalakkersuisut ukiakkut ataatsimiinnermi saqqummiuppaat Inuiaqatigiit aaqqissugaanerat pillugu Iliuusissatut pilersaarut.
Saqqummiussami siunissamut takorluukkanik taaneqartumi allaaserineqarpoq Nunatta ungasinnerusoq isigalugu aningaasaqarnikkut imminnut napatissinnaaneruleriartornissaa taamalu naalakkersuinikkut namminiileriartornissaa siunertaralugu anguniagaasut.
Tassunga sakkussaq tassaavoq inuiaqatigiit aningaasaqarneranni tunngavissarititat naleqqussarneqarnisaat inuussutissarsiutinik ingerlatsineq niuernermi piumasaasut tunngaviginerulerlugit ingerlasinnaanngortillugu.
Taamatut suliniarnermi pingaarluinnartut tassaapput ilinniartitaanerup ataatsimut isigalugu qaffassarnissaa, inuussutissarsiorneq pillugu inatsisitta pisariinnerulernissaat, attaveqaatitigut pilersuinikkullu aaqqissugaanerit allanngortiternissaat kiisalu pisortat toqqaannartumik inuussutissarsiutinut aningaasaliisarnerata annikillilernissaa.
Suliniutit ataasiakkaat qanoq amerlatigalutilluunniit ikitsigigaluarpata anguniakkat anguniarnerani naalakkersuinikkut toqqaanerit arlallit pisariaqassapput. Toqqaanerit ukiut qaninnerpaat isigalugit ajorsiallaatitut malugineqaratarsinnaasut, illuatungaatigulli pisariaqartut. Pisariaqartut qaffakkiartornissaq taamalu atugarissaaleriartuinnarnissaq qulakkeerniassagaanni aalajangiusimassagaanniluunniit.
Taamaattumik pingaaruteqarluinnarpoq inuiaqatigiit aaqqissugaanerat pillugu iliuusissatut pilersaarummi sammivissatut tikkuartukkat taamakkiisumik aalajaatsumillu tapersersorneqarnissaat.
Sammiviginiagaq ukiuni arlalikasinni naalakkersuinikkut allaffissornikkullu aqutsinikkut aalajangiusimaneqarpat aatsaat aaqqissugaanikkut pilitikki isumannaatsumik naammassineqarsinnaanngussaaq.
Suliassat amerlaqisut isumannaatsumik ingerlassinnaajumallugit Naalakkersuisut aalajangiusimaniarpaat ukiumut tullermut aningaasanut inatsisissami suliassat salliutitassat aalajangiusimaannarnissaat.
Imaatigut angallassinerup allanngortiternissaa pimoorullugu aallartinneqarpoq ukioq kingulleq aningaasanut inatsimmut tunngatillugu. Suliaq naammassilersutut isikkoqarpoq periaaseq aaqqiissutissaq aanaralaannguanngorluni.
Imaatigut usinik angallassinermi suliassanut ataatsimoortunut tunngatillugu pineqarput assartuinermi akit assigiissuunissaannut akitsuutip atorunnaarsinnissaa, Nunatsinnit tunisassiat Nunatta iluani assartorneqarnerannut tapiissutit atorunnaarsinnissaat aammalu usinik angallassinermi akeqartitseriaatsip nutaap atulersinneqarnissaa.
Naalakkersuisut imaatigut usinik angallassinermi suliassanut ataatsimoortunut tunngatillugu tusarniaaqqaarneranni paasissutissiisoqarpoq pingaartumik avannnaaniit aalisakkanik nunanut allanut nioqqutissanik angallassinermut kingunissai misissoqqittariaqartut, aammalu Nunatsinnit tunisassiat Nunatta iluani assartorneqartarnerannut tapiissuteqartarnerup atorunnaarsinneqarnissaanik siunnersuummut oqaaseqaataasut misissoqqinneqartariaqartut.
Tamanna tunngavigalugu Naalakkersuisut imaatigut usinik angallassinermut siunnersuutit kingunissaat pillugit inuussutissarsiutinik ingerlatsisut itinerusumik oqaloqatigilersimavaat.
Naalakkersuisut qularinngilluinnarpaat ajornartorsiutit siunnersuummiittut inuussutissarsiutinillu ingerlatsisut tusarniaaqqaarnermi akissutaanniittut oqaloqatigiinnerulernikkut qulaajarneqarsinnaassasut.
Ilimagineqarpoq taamatut oqaloqatigiinneq aqqutissiuunneqarumaartoq taamaasillunilu inaarutaasumik siunnersuut Naalakkersuisut 2002-mut Aningaasanut inatsisissamut siunnersuutaannut ilanngunneqarsinnanngussalluni.
1997-imi Isumaginninnermik iluarsaaqqinnermut Ataatsimiititaliarsuup allaaseraa ineqarnermut tunngatillugu inuit atukkamikkut ikiorseerneqartarnerat allanngortittariaqartoq nutartertariaqartorlu.
Maannakkut Naalakkersuisut piareerpaat ineqarnermut akiliutit nutarternissaat, tamatuma kingunerissallugu pisortat attartortittagaanni ineqarnermut akiliutit aningaasartuutinik tunngaveqarnerulernissaat tamatumali peqatigisaanik qulakkeerlugu pissakinnerusut akiliuteqarnerulinnginnissaat.
Paasiuminarnerusumik oqaatigissagaanni ineqarnermut akiliutit nutarterneqarnerata kingunerissavaa siunissami isumaginninnerup isumaginninnermik ingerlatsineq aqqutiginerullugu ingerlanneqarnerulernissaa ineqarnermik ingerlatsineq aqqutigivallaarnagu.
Naalakkersuisut isumaqarput ineqarnermut akiliutit isumaginninnermilu isumannaallisaarnernik aaqqissuussinerit allanngortiterneqarneri ataatsimoortillugit isigisariaqartut.
Ineqarnermut akiliutit aningaasartuutinut naleqqunnerusut pilersinneqarsinaasariaqarput isumaginninnermi isumannaallisaatitut aaqqissuussinerit pitsanngortiitigalugit. Allanngortiterinermi anguniagaavoq pigissaarnerit ineqarnermut aningaasartuuterpiaat malillugit akiliisalernissaat. Tamatuma saniatigut Naalakkersuisut siunnersuutigaat namminersortut pisortallu inissiat pigisaat pillugit naligiinneruleriartornissaq.
Taamaattumik Naalakkersuisut ineqarnermut akiliutaasartunik nutarterineq qulequttanut marlunnut katersorsimavaat.
Inissiani pisortat attartortittagaanni kvadratmeterimut akiata tamarmi 1,5 %-ianik aningaasaliissutigisimasat matussuserneqartalernissaat
2:: Ineqarnermut meeqqanut tapiissutit ineqarnermut isumannaallisaanermik aaqqissuussinermut boligsikringemut nutaamut pitsaanerusumullu ilaatinneqalernissaa.
Ukiuni kingullerni aningaasaqarnerup pitsanngoriartorneratigut suliffissaaleqisut ikiliartorsimapput, tassa kisitsisinngorlugu 500-it sinnerlugit sulilersimapput.
Naalakkersuisut suliffissaarunnissamut sillimmaseeriaatsimik anguniagaat piviusunngortinneqassappata Namminersornerullutik Oqartussat suliffissaarunnermut aningaasartuuteqartussaassapput.
Sillimmasiutitigut tunniuttakkat akileraaruteqartaasussat ukiumut 80.000 kr.-it inummut ataatsimut tunniunneqartalissappata suliffeqanngitsut 500-inik amerlinerinnaannut ukiumut tunniunneqartartut 40 mio. kr.-inik amerlisussaapput, taakkulu aningaasalersorneqassapput pisortanit, sulisitsisunit sulinermillu inuussutissarsiuteqartunit.
Annertuumik suliffissaarusimanerup nalaani suliffissaqartut amerlisarniarlugit immikkut iliuutsit aamma Namminersornerullutik Oqartussanut aningaasartuutaasinnaapput. Namminersornerullutik Oqartussat Royal Greenland A/S-illu sulisoqassuseq naammassisaqarsinnaassuserlu naleqqussarniarlugit isumaqatigiissutaanni 1997-imeersumi pineqarput inuit 230-t missaat, tamannalu ullumikkut Inatsisartut ilisimasaattuut ukiumut 50 mio. kr.-it missaannik akeqarsimavoq.
Taamannaannarluunniit assersuutaasinnaavoq aaqqissuussinerit taamaattut qanoq akisutigisinnaanerannut.
Ukiuni aggersuni pilersortariaqartut amerliartornissaat ilimagineqarmat Naalakkersuisut anguniarpaat sulisinnaasut tamarmik suliffeqarnissaat pikkorissarnissaallu. Siusinaartumik soraarnerussutisiaqalertarnerup aningaasalersugaanerata allanngortinneratigut aammalu sulisinnaanngoqqinnissamut periarfissat pitsanngorsarneratigut sulinissamut piginnaassuseqarneq inuillu ataasiakkaat sulisinnaalernissaat annertusarneqassaaq.
Tamatuma peqatigisaanik Naalakkersuisut siunertaraat ikiorseeriaatsit atuuttut allanngortiternissaat pisariillisarnissaallu ilaatigut kommunini allaffisoornikkut suliarinnittarneq pisariillisarlugulu pitsanngorsarniarlugu.
Tamatuma saniatigut ukiup ilaani suliffissaarukkallartarnerit atorluartarpagut piginaaneqarnerup annertusarneranut sulisitsisut, sulinermillu inuussutissarsiuteqartut kommunillu suleqatigalugit ilaatigullu aningaasalersueqatigalugit.
Inuussutissarsiornerup ingerlallualernissaa siunertaralugu assigiimmik akeqartitsinerup allanngortitsiniarneranut atatillugu Naalakkersuisut misissulersimavaat innaallagissap, erngup kiassarnerullu assigiimmik akeqartitaanerata allanngortinneqarsinnaanera taamaalilluni inuussutissarsiutit ingerlallualernissaat tunngavissikkumallugu, tamatumuunakkut agguaasarnikkut politikimi anguniakkat akornusinngikkaluarlugit.
Kiisalu Naalakkersuisut samminerulerniarpaat suliffeqarfiit Namminersornerullutik Oqartussanit pigineqartut namminersortunut pigisassanngortinneqarnissaat meeqqallu atuarfiata sammineqarnera ingerlateqqinniarlugu Naalakkersuisut aamma aalajangiusimavaat.
Naggataatigut Naalakkersuisut pingaartillugu erseqqissassavaat aningaasanut inatsisissap suliarineqarnerani sammisassat ataasiakkaat immikkut aallutassat immikkoortiterneqaraluartut, imaanngimmat sammisamut immikkut aallutassatut pineqartumut aningaasaliissutit pinngitsoornani amerlanerulersinneqarnissaat.
Tamanna imatut paasisariaqarpoq aningaasanut inatsisissap suliarineqarnerani sammisassat immikkut sammisassatut taaneqarsimanngikkaluartut Naalakkersuisut eqqarsaataannut tamarmiusunut ilaajuarmata, soorunami.
Naalakkersuisut qularinngilluinnarpaat aaqqissugaanerit allanngortiternissaannut pisariaqartunut piffissanngorsimammat, aaqqissuussinernik allanngortiterinerit sivisuumik ilungersuullugit ingerlattariallit.
Piffissanngorsimavoq siullermik patsisigalugu aningaasaqarnerput isumanaatsuummat allanngortiterinernut tunngavissaqqilluni.
Aappassaanik, Naalakkersuisut ersarissumik kissaatigaat inuussutissarsiornitta imminut napatissinnaanerulernissaa, taamaalilluni suliffeqarfiit illersorniarlugit pisortat tapiissuteqartarnerat immikkullu aaqqissuussisarnerat annikillileriffigineqaqqullugu.
Kiisalu pissutigalugu inuiaqatigiinnut sullissisinnaasut sullisiumasullu tamaasa ullumikkut pisariaqartikkatsigit.
Taamaattumik pisortat aningaasatigut eqqanaarsarnerat aaqqissugaanikkullu allanngortiterisariaqarnerit pisariaqartut naalakkersuinikkut suliniutitsinni pingaarnersaajuassapput.
Naggataatigut inuiaqatigiinnik aaqqissuussineq pillugu politikimi allannguutissat tamakkua aallartittariaqarpagut, tassa Nunarput siunissami aningaasaqarnikkut naalakkersuinikkullu nammineernerulersikkumallugu nammineq suliniarnermigut nunarsuarmioqatitsinnut kimeqarnerulersillugu.
Naalakkersuisut neriuutigaat oqallinneq manna aqqutigalugu sammivilissagipput inuiaqatigiit aningaasaqarnikkut taamalu naalakkersuinikkut nammineerneruleriartornissaannut aqqutissarput.
Tamatumanilu tunngaviusariaqarput inuiaqatigiit qaffasinnerusumik ilinniarsimalernissamik inuussutissarsiornerullu namminersortunit ingerlanneqarnissaanik qulakkeeriffigineqartut nunarsuarmioqatigut unammilleqatigalugit ullumikkumut atukkagut ajornerulersinngikkaluarlugu.
Taamatut oqaaseqarlunga Naalakkersuisut aningaasaqarniarnikkut ingerlatsineq pillugu 2001-imut nalunaarutaat Inatsisartunut oqaluuserisassanngortippara.
Mikael
Petersen, Siumup
oqaaseqartua:
2001-imi
Aningaasaqarnikkut ingerlatsineq pillugu nassuiaat matumuuna
saqqummiunneqartoq pissanganartumik suleqataaffigissallugillu kajungernartunik
siunertaqarluartunillu imaqarpoq, Siumumiit nuannaarutigalugit
tikilluaqqungaakkatsinnik.
Nassuiaat
paasiuminartunngorlugu ilusilerneqarsimavoq, allaaserineqarneralu
naalakkersunermik suliaqartunut paatsuugassaajunnaarlugu suliarineqarsimalluni.
Siumumut
nuannaarutissaavoq Nunatsinni aningaasaqarniarnikkut aningaasarsiornikkullu
illorraap tungaanut ersarissumik ingerlanerput, tassami aningaasaqarneq
ataatsimut isigalugu qaffakkiartorpoq. Pisortat, tassa Namminersornerullutik
Oqartussat kommunillu aningaasaqarnerat ingerlatsinerallu
isumannaalligaluttuinnarput aammalu suliffissaaleqisut ataatsimut isigalugit
ikiliartuinnarnerat nuannaarutissaalluni, naak soorunami piffiit ilaanni
aammalu ukiup qanoq ilinera naapertorlugu suliffissaaleqisartut suli
annertugaluartut, taakkuali ajornartorsiutaalersarnerat kommunit
peqatigalugit aaqqiivigineqarpat aamma ajornartorsiutaalersartut tamakku
annikillisinneqarsinnaassapput.
Tamaangali
killiinnassanngilaq killeqaannassananilu aatsaat aallartilaarpugut
ingerlaqqissaagummi soorlu Naalakkersuisut nassuiaataatigut
takuneqarsinnaasoq.
Suliassanik
ulikkaarpugut ingerlaaserput allanngortittariaqarparput, aaqqissuussaanikkut
nutaamik ilusilersuisariaqarpugut pissusitoqqat ineriartorfiunngitsut
ikkusimaarfiuliinnarsimasut tamaasa atorunnaarsillugit, nutaanik inuttut
pissarsinarnerusunik sullissinermillu naammassisaqarsinnaatsumik
ineriartortitsisumik pitsaassutsimillu attassiinnarsinnaasunik
suliffeqarfinnik suni tamanik Nunatsinni sumiluunniit
ingerlaaseqalertariaqarpugut.
Tamatta
paasisinnaasatsinnik atorsinnaasatsinnillu, tamanna pisariariaqaannanngilaq
piviusunngortittariaqarlunilu.
Nunatta
aningaasaqarniarnikkut nammineersinnaalernissaa angussagutsigu taamaalillutalu
namminersorsinnaalerluta.
Nunatsinni
aningaasarsiornikkut ineriartorneq qaffakkiartornerlu takussutissaqalereerput,
aammalu inuussutissarsiuuteqarnikkut niuernikkullu atugarisat
assigiinngitsutigut sunniuteqartarlutik, aamma taamaappoq nunanik allanik
niueqateqarnermi nunanillu allamiunik aningaasalersueqateqartarnerup
annertusiartorneranni.
Taamaattumik
Siumumiit pingaartipparput akileraarutitigut akitsuutitigullu Nunatsinni
atugassarititaasut periarfissarititaasullu ataatsimoortumik
nalilersoqqissaarneqarnissaat, ullumikkut pissusiusutigut atugassarititaasunut
Nunattalu aningaasaqarniarnikkut nammineerneruleriartuinnarnissaanut
naapertuuttunngorsaanissaq siunertaralugu.
Tamatta
nalunngisatsitut pisortat ingerlatsiviini tamani ingerlatsinermut
aningaasartuutaasartut qaffasippallaarujussuaqaat. Taamaattumillu tassani
annikillisaanissamut suliniutigut sakkortusisariaqarpagut, sullissineriat
assigiinngitsunut sammivillit ajornerulersinngikkaluarlugit, ajornanngippallu
allaat sullissinernik pitsaanerulersitsisumik kinguneqartumik.
Siumumiit
erseqqissumik oqaatigissavarput aaqqissugaanikkut nutarterineq soorunami
kinguneqartariaqarmat sutigut tamatigut pisariillisaanernik,
ingerlatsinermillu aningaasartuutikillisaanermik, illuatungaatigullu
inuussutissarsiutitigut pisariaqartinneqartutigut ineriartortitsiviulluni
unammillersinnaassuseqarlersitsisumik, taamaalillunilu ataatsimut isigalugu
inuttaasut tamarmiusut atugarissaarnerulernerannik qulakkeerisumik.
Taakkualu
siuliini taasakka angusaqarfiullutik piviusunngortitsiviussappata, Nunatta
isorartunerujussua nalunngereerlugu aammalu inoqarfippassuit
siammasissumiittut pitsaanerpaamik ataqatigiissinneqarlutik
ikioqatigiissinneqassappata, taava kommunit imminnut qanittut tamakkiisumik
ingerlatseqatigiissilernissaat avaqqunneqarsinnaanngilaq.
Imatut
paasillugu nunap immikkoortuini avannaani, qeqqani, kujataani tunumilu
ataatsimoortumik ingerlaqatigiissinnaaneq piviusunngortinneqartariaqalerpoq,
makkunuunatigut:
Atuartitaanermi
ilinniartitaanermilu, inuussutissarsiutitigut ingerlatsinermi
takornariartitsinernilu suliffeqarnermi atorfinitsitsisarnernilu, teknikkikkut
ingerlatsinerni sanaartornernilu, aningaasaqarniarnermi
akileraartitsisarnermilu, peqqinnissaqarnermi isumaginninnermilu,
avatangiisitigut nakkutilliinermi eqqissisimatitsinermilu kiisalu
minnerunngitsumik ataatsimoortumik niueqatigiittarnermi.
Suleqatigiinneq,
ikioqatigiinneq isummersoqatigiittarnerlu kingunissalimmik siunissaqartitsisarput
taamaattumik ikuttunnguakkuutaarluni katersuuffeqarani ingerlarusaarneq
ineriartorfiunngisaannarpoq.
Siumumiit
nalunngilluinnarparput Naalakkersuisut Siulittaasuata kommuninut
kajumissaarutigiuaraa taamatut suleqatigiinnerunissaq, aammalu kommunit
imminut qanittut avannaani minnerunngitsumillu kujataani
suleqatigiiffigisinnaasamikkut aallartisarlutik periarfissarsiortut.
Kommunit
nammineersinnaatitaanerat ataqqilluinnaraluarlugu, taamaattoq
Naalakkersuisunut kaammattuutigissavarput nunap immikkoortukkuutaarlugu
ineriartortinneqarnissaata ilusilersornissaa aaqqissuussaanissa kommunit
kattuffiat KANOKUKA peqatigalugu suliaralugu aallarteqqullugu.
Aaqqissugaanikkut
allanngortiterinermi avaqqunneqarsinnaanngitsut ilagaat nukimmik pilersorneqarnerup
allatut tunngaveqarluni ingerlaaseqalernissaa. Taamaattumik Naalakkersuisut
taassuma tungaatigut nutaanik periuseqarlutik nutarterinialernerat Siumumiit
ilassilluarparput.
Sutigut
tamatigut imminut akilersinnaanerusumik ingerlatsisoqassappat, taava nukimmik
pilersorneqarnermik ingerlatsineq aamma taamatorpiaq anersaaqarluni
ingerlanneqartariaqarpoq.
Taamaattumik
Nukissiorfiit ingerlanneqarnerat imminut akilersinnaasunngortinneqarnissaanik
Naalakkersuisut oqariartuuteqarnerat isumaqatigilluinnarparput, tamannami
pinngitsoorneqarluinnarmat.
Tassunga
ilanngullugu oqaatigissavarput suli isumaqartuaratta, pingaartittuarlugulu
nukimmik pilersorneqarnermi uuliamut pituttorsimanerujussuup
qimakkiartuaarnissaa pisariaqarluinnartoq.
Massakkummi
misigeqqipparpunaasiit nunarsuarmi uuliap akiata qaffariarnerata Nunatsini
ingerlatsinermi kiffartuussinermi inuussutissarsiornermilu qanoq
sunniuteqapilussinnaatiginera. Taamaattumik erngup nukingata Nunatsinni
naammattorsuarnik periarfissarisatta atorluarneqarnissaa Siumumiit
ilungersuutigissavarput. Periarfissallu siullerpaat atorlugit
piviusunngortitsiffigerusullutigut.
Kujataani
Qorlortorsuarmi, Sisimiut eqqaani Tasersuarmi, Ilulissat eqqaani Paakitsumi
erngup nukissiorfissat tulleriissaarlugit sananeqarnissaat
nipangiusimaannarnagit matumuuna kaammattuutigeqqippagut, tamatta
nalunnginnatsigu taaamaaliorutta inuiaqatigiinnut aningaasarsiornikkut
ineriartoqqinnissamut atugarissaarnerulernissamullu
periarfissarissaarnerpaassalluta
Soorlu
nunat taamaaliornissamut periarfissallit tamarmik taamaaliortut, aatsaammi
tassa atorluaaneq isiginngitsuusaarneqarsinnaanngitsoq.
Nuummi
Utoqqarmiut Kangerluarsunnguanni erngup nukissiorfiup nukimmik
pilersitsisinnaanerata avaqqunneqarsinnaajunnaareerpoq annertusarneqarnissaa,
taamaattumik aamma taassuma ilanngullugu eqqumaffigineqarnissaa
inassutigissavarput.
Tasiilami
erngup nukissiorfeerassaq pinngitsoorani piviusunngortinneqartariaqarpoq,
taassumalu takutissavaa taamannak annikinnerusunik
nukissiorfeeraliorsinnaanerit aamma illoqarfinni allani periarfissalinni
ingerlanneqarsinnaassasut, soorlu Qasigiannguani Paamiunilu.
Nunatta
iluani Nunatsinnullu ilaasunik usinillu angallassineq inoqarfiit
sumiikkaluartulluunniit inuussutissarsiornikkut aningaasarsiornikkullu
ineriartorsinnaassuseqarnissaannik qulakkeerinnittuusariaqarpoq.
Nunatsinni
namminermi nunanullu allanut angallanneq pingaaruteqarluinnarpoq, inuiaat
Kalaallit inuusaatsikkut, niuernikkut isumagineqarnikkullu
inooqatigiinnerannut, inuiannillu allanik inooqateqarnerannut
attaveqarnerannullu.
Nunatta
isorartunerujussua aammalu angallannikkut atoruminaassinnaasarnera
pissutigalugit angallannikkut aaqqissuussinerit qanoq ittulluunniit
pilersinneqaraluarpata pisortat aningaasalersueqataajuarnissaat
pisariaqartinneqartuassasoq Siumumiit isumaqarpugut.
Taamaakkaluartoq
Siumumiit isumaqarpugut ukiuni makkunani angallannermut tunngatitat ukiumut
tapiissutaasartut 234,9 mio. kr.-iusut annertoreeqisut angallassinerit
akikinnerulersinneqarnerannut sunniuteqarteqartinneqarnerusariaqartut.
Tamatuma
piviusunngortitsiviunissaa siunertaralugu Naalakkersuisunut
kaammattuutigissavarput sinerissami mittarfiliortiternerit tamakkiisumik
naammassingajalermata, silaannakkut angallassinerit pingaartinnerullugit
tapeeriaatsit aaqqissuunneqaqqullugit, taamaalilluni Nunatsinni silaannakkut
angallassineq kikkunnilluunniit akilerneqarsinnaasoq
pilersinneqarsinnaaqqullugu.
Naalakkersuisut
pilersaarutigaat imaatigut usinik assartuinerup allanngortinneqarnissaa 1.
januar 2002 aallarnerfigalugu. Tamatumani aallaaviussallutik usinik
assartuinermi assigiimmik akeqartitsinerup atorunnaarsinneqarnissaa aammalu
tamatumunnga tapiissutaasartut atorunnaarsinneqarnissaat.
Siumumiit
nassuiaatigineqartumi takusinnaasagut naapertorlugit paasivarput
aaqqissuussinissami periusissaq siunnerfiusoq suli
nalilersoqqissaarneqartariaqartoq. Aaqqissuussutissatut siunnerfiusoq
arlalitsigut pitsaanerulersitsisinnaagaluarpoq, tassami Naalakkersuisut
siunertarimmassuk usinik assartuinermut akitsuutit assigiinnerata
atorunnaarsinnerata kingunerissagaa pisisartut akilertagaasa
annikillisinnissaat, kisianni paasivarput avannaani qaleralinnik
nioqqutissiortut 9 mio. kr.-it missaannik akissaajaateqarnerulissasut, aammalu
nioqqutissanik pilersuinermi pisisartut akilertagaasa annikillisinneqarnissaat
suli qulakkiivinneqarsimanngitsoq, tamannalu soorunami imaaliinnarlugu
akuersaarsinnaanngilarput, taamaattumillu taakkua aaqqiivigineqarsinnaanerat
pillugu misissueqqissaarniarnerit iluarisimaarlutigit.
Qularnanngilaq
periutsit eqaannerusinnaasut nassaarineqarsinnaammat siunertaasut
iluatsitsiviusumik piviusunngortitsiviusinnaasut, Siumumiillu
erseqqissaatigissavarput ullumikkornit ajornerusumik aaqqiissuteqarnissaq
siunertaanngimmat, suliap peqqissaartumik ingerlanneqarnissaa
pingaartikkipput.
Inissiani
attartortikkani pisortat pigisaanni ineqarnermut akiliutit aningaasartuutinut
naleqqunnerulersinneqarnissaat aamma pisortat namminersortullu inissiaataasa
akornanni nikingassutsit millisinneqarnissaat Naalakkersuisut siunertarigaat
paasilluarparput.
Ineqarnermut
akiliutissat naatsorsorneqartarneranni qanoq isertitaqartigineq
apeqqutaatinnagu ullumikkut tunniunneqartartut peerneqarnissaat, tassa
ineqarnermut akiliummi meeqqanut tapiissutit Naalakkersuisut siunniussimavaat.
Taarsiullugu
kissaatigineqarpoq tapiissutit inoqutigiinnut isertitaqartarnerminnut
tunngassuteqartut tunngavigalugit ineqarnermut akiliutissamik
akilerneqarnissaannut taperserneqarnissaminnik pisariaqartitsisunut
nuunneqarnissaannut siunniunneqartoq Siumumiit iluarisimaarput.
Ineqarnermut
akiliutaasartunut iluarsiissutissatut siunnersuutiginartup pingaarnertut
nassatarissavaa inissianik pigisaqartut aningaasaliissutigisinnaasaminnik
aningaasaliissutigisinnaasaminnik iluanaarutissaasa, kapitalafgift,
naatsorsorneqartarnerisa allanngortinneqarnera, kvadratmeterit tamakkerlugit
1,5 %-inngorluni, aamma ineqarnermut akiliummi meeqqanut akiliummi meeqqanut
tapit peerneqarnerat, ineqarnermullu isumannaallisaatitut tapiissutit
aaqqissuussinermi nutaami ilanngunneqarsimallutik.
Ineqarnermut
akiliutaasartunut iluarsiissutissat aqqutigalugit anguniarneqartoq
pissaqarnerit namminneq inissannik pigisaqalernissaat, namminneq inissamik
pigisaqalernissamut ileqqaaruteqartarnissamut periarfissat
annertusarnerisigut piviusunngorsinnaasutut isigaarput, taamaaliornikkut
isertitakinnerusartut inissaqarniarnikkut periarfissaat aamma
pitsaanerulersinneqassammata.
Isumaginninnermut
iluarsartuusseqqinnissaq pillugu 1997-imi Inatsisartuni oqallisigineqartut,
aammalu siorna isumaginninnikkut ikiorsiissutit pillugit Inatsisartut
oqallinnerat Naalakkersuisunut aallaavigineqarsimasut Siumumiit paasivarput.
Annertussusileriikkanik
ikiorsiissutit SIK-mi ilaasortaannarnut atuukkunnaarlutik suliffissaaleqisunut
tamanut atuutsinneqalernissaat Siumumiit isumaqatigigatsigu oqaatigissavarput,
ukioq 2002-miit annertussusileriikkanik ikiorsiissutit
allanngortinneqarnissaat tamatumalu kingorna suliffissaarusimanermi
aningaasaateqarfik siunissami sulisitsisunit sulisunillu toqqaannartumik
aningaasalersorneqartussaq pilersinneqassalluni.
Siunertarineqarpoq
sulisut nunaqavissuugunik tikisitaagunilluunniit tamarmik aningaasaateqarfimmut
aningaasalersueqataasinnaanissaat.
Siumumiit
isumaqarpugut Naalakkersuisut piginnaatinneqassasut Danmarkimi oqartussaasunik
isumaqatiginninniarnissanut siunertarisariaqarmamman aaqqissuussinerup
paaseqatigiiffiusumik tamanit paaseqatigiiffiusumik pilersinneqarnissaa, aamma
Danmarkimi kattuffinnit Nunatsinnut suliartortartunit ilaasortaqartunit,
siunertaasummi ilagisariaqarmassuk Nunatsinnut suliartortartut Danmarkimut
angerlarnerminni tassani suliffissaarunnermi aningaasaateqarfinnut nuallaannarsinnaasarnissaat,
soorunami tamanna isumaqatigiissutaasinnaassappat.
Aaqqissuussinerup
tamatuma nutaassap immikkut allaffissornikkut annertusaanngikkaluarluni
kommuninit aqunneqarluni ingerlanneqarsinnaanera pillugu Naalakkersuisut
misissueqqissaarnissaat inassutigissavarput.
Piginnaanngorsaaqqinnerup
sukumiinerusumik aallutilerneqarnissaa Siumumiit ilassilluarparput, tassami
ukiuni arlaqalersuni tamatuma kommunit peqatigalugit aaqqissuulluagaasumik
ingerlanneqalernissaa anguniartuaratsigu.
Piginnaanngorsaaqqiisarnerit
siunertarivaat inuit akunnattumik piginnaaneqalersimasut suliffeqarnermut
uteqqissinnaalernissaat, siunissami taamatut piginnaanngorsagaasut
aningaasatigut atugassaat piareersarneqartut paasivarput.
Tamatumani
aallaavigineqarlutik SIK-ip pisortanut isumaqatigiissutaani suliamik
ilinniagaqarsimanngitsut toqqammaviatigut akissarsiarisartagaat, tamannalu
Siumumiit iluarisimaarparput.
Aaqqissuussinissap
aningaasalersorneqarnissaa KANUKOKA-mik isumaqatigiissuteqarsimaneq
naapertorlugu kommuninit Namminersornerullutillu Oqartussanik 50/50-imik
aveqatigiiffiusarnissaa ilanngullugu iluarisimaarparput.
Aaqqissuussinermi
nutaami ineqarnermi meeqqanut tapiissutit ineqarnermut tapiissutinut
tapitartuunneqarsimapput, tamatumani ineqarnermut tapiissutit
pineqarsinnaanerat isertitaqqortussuseq naapertorlugu, aammalu meeqqat 18-it
inorlugit ukiullit qanoq amerlatigisut angerlarsimasuutigineqarnerat aammalu
ineqarnermut akiliutip annertussaa ilanngullugit apeqqutaatillugit.
Ineqarnermut
tapiissutit pissarsiarineranni isertitat qummut killissaat 128.000 kr.-iniit
180.000 kr.-inut annertussusilerneqarsimapput ilaqutariinnut
meerartaqanngitsunut. Ineqarnermut tapiissutinik pissarsiaqarniaraanni
ataatsimik meeraqarsimagaanni, isertitat qummut killissaat 372.000 kr.-iuvoq,
ineqarnermut tapiissutinik pissarsisinnaassagaanni isertitat qummut killissaat
444.000 kr.-inut aaqqiivigineqarsimavoq, meeqqallu tapiissuteqaataasinnaasut
amerlanerpaaffissaat arfinilinnut killilerneqarsimalluni.
Siumumiit
erseqqissumik oqaatigissavarput ineqarnermut tapiissutaasartunut nutaamik
aaqqissuunneqarneranni isertitakinnerit akunnattumillu isertitallit
pingaartillugit aaqqissuussinerit ilusilerneqartariaqartut, taamaattumik
matumuuna saqqummiunneqartut massakkut aningaasaqarnikkut atugarisaasut
eqqarsaatigalugit naammagisimaarpagut.
Atuarfitsialak
pillugu matumuuna Naalakkersuisuniit paasissutissat saqqummiunneqartut
Siumumiit naammagisimaarpagut, kisianni Siumumiit erseqqissaatigeqqissavarput,
Atuarfitsialaap inuiaqatigiit ataatsimut isigalugit ilinniartitaanerup
qaffasissusiata pitsaanerulersinneqarnissaanut pingaaruteqarluinnartup
kommunini tamani aallartilluarnissaa qulakkeerneqartariaqartoq, aamma
aningaasatigut kingunerisassai tamaasa eqqarsaatigalugit.
Ukiuni
aggersuni inuusuttut 17-iniit 24-inut ukiullit amerliartuinnartussaapput,
tassungalu atasumik aamma ilinniarnertuunngorniartut amerliartuinnarput,
kisitsisinik naatsorsueqqissaartarfiup nalunaarutai naapertorlugit.
Taamaattumik
tamatuma nassataanik ilinniarnertuunngorniarfinni amerlanerusunik ilinniartoqalernissaanut
periarfissat annertusineqartariaqartut Siumumiit isumaqarpugut.
Ilinniarnertuunngorniarfiit
pioreersut allinerisigut amerlanerusunngortillugilluunnii, soorlu aamma
ilinniartunut inissat kolligiet amerlanerusut pisariaqartinneqalissasut.
Inuusuttut
amerliartornerisa nassataanik ilinniarfiit ingerlaqqiffiusut aamma
annertusartariaqassapput, soorlu Ilisimatusarfeqarfissap
pilersinneqarneratigut tamanna annertuumik aamma iluaquserneqarsinnaassasoq.
Sanaartornermik
ilinniarfik allineqartariaqassaaq, pissutigalugu ilinniarfiusinnaasut tassunga
atasumik ingerlanneqartut amerlisimammata. Ilinniarnerillu nutaat nutaatut
aallartinneqarsimasut tassaapput issittumi teknikikkut eqiteriffik, Arctisk
Teknologi Center, aamma HTX, Hĝjere Teknisk Eksamen, Teknisk Gymnasium aamma
ingeniĝrinngorniarneq, Danmarks Teknisk Universitet peqatigalugu.
Ilanngullugu Naalakkersuisunut inassutigissavarput HHX-ip, Hĝjere Handels
Eksamen, Qaqortumi aallartinnissaata pilersaarutaasup
piviusunngortinneqarnissaa ingerlatiinnaqqullugu.
Soorunami
tamakku kissaaterpassuit tamarmik aningaasarpassuarnik naleqarput. Kisianni
inuiaqatigiinni aaqqissuussaanikkut nutarterinerup tamakku
naammassineqarsinnaanissaannut akissaqartilersinnaassagaatigut Siumumiit
isumaqarpugut.
Namminersornerullutik
Oqartussat pigisaat suliffeqarfissuit ingerlatseqatigiiffiit, soorlu KNI
Pisiffik, KNI Pilersuisoq, Royal Arctic Line, Arctic Umiaq Line, Tele
Greenland, Royal Greenland Nuka A/S-ilu, Inissiaatileqatigiiffik INI A/S
kiisalu Grĝnlandsfly Namminersornerullutik Oqartussat piginneqataaffigisaat,
naluneqanngitsutut Nunatsinni inuiaqatigiit aaqqissugaaneranni
inuussutissarsiornikkut aningaasarsiornikkullu ingerlatsineranni
pingaaruteqarluinnarlutik qitiullutik inissisimasuupput, Nunatsinni
sumulluunniit saalluni qanoq iliuuseqarniaraanni avaqqunneqarsinnaanngitsut.
Ingerlatseqatigiiffissuit
massakkut ukiuni qulinngulersuni A/S-itut ingerlanneqareerput, namminneq
siulersuisoqarlutik, imaaliinnarlugu toqqaannartumik inuiaqatigiinniit
naalakkersuinikkullu suliaqartuniit akuleruffigineqarsinnaanatik. Tamannalumi
aamma sungiunniagassaavoq.
Kisianni
imaanngilaq inuiaqatigiit naalakkersuinermillu suliaqartut
piumasaqarsinnanngivissut, aammalu ingerlatseqatigiiffissuit inuiaqatigiit
ataatsimoortumik soqutigisaannut suleqataasinneqassanngitsut.
Siumumi
isumaqarpugut ullumikkut killiffitsinni ingerlatseqatigiiffissuit ilaat
inuiaqatigiinni periarfissarisinnaasarialuamikkut
susassaqarfigisinnaasamikkullu nammaqataanngippallaartut, soorlu
sulisoqarnikkut politik-qarnermi, sulisut siunertaqarluartumik tigussaasumillu
pikkorissartinneqartarnerini, suliffimmi
avataningiisit pitsanngorsarneqarnerini il.il., aammalu ingerlatseqateqatigiiffissuit
aningaasaqarnerarnerinnarmut sammivallaartumik ingerlatsisartut innuttaasunik
sullissinermi pitsaassuseq tunniussinnaasartik pivallaarnagu.
Soorunami
A/S-itut ingerlatsineq imminut akilersinnaassuseq naapertorlugu
niuernerpalaartumik ingerlatsinermi aningaasaqarniarnikkut
isumannaatsunngornissamut ikaarsariarnermi piffissaq atorneqartariaqartoq
pisariaqarpoq, kisianni piffissaq qanoq sivisutigisoq isumannaatsunngornissamut
atorneqassagami?
Tele
Greenland A/S susassaqarfimmini kisermaassisuusoq, kiisalu KNI
susassaqarfimmini unammillerfiusumik ingerlatsiviusoq, tassa KNI Pisiffik,
isumannaatsumik inuiaqatigiinnilu tulluusimaarutaasinnaasunik
ingerlatsilersimapput.
Taakkua
takutippaat aaqqissuussilluaraanni, sulisunillu ukkassilluaraanni
inuiaqatigiinni siunertaasunut naapertuuttumik imminullu akilersinnaasumik
ilumut ingerlatsisoqarsinnaasoq, taamaattumik Siumumiit Naalakkersuisunut
kaammattuutigissavarput, ingerlatseqatigiiffissuit pigisatta
aaqqissuussaanerisa misissuiffigineqarnissaat, nalilersuiffigineqarnissaallu
aallarteqqullugu, allanngortiteriniaannarneq pinnagu, kisiannili
isumannaatsumik inuiaqatigiinnillu ataatsimut isiginnilluni
sunniuteqarluartumik nammaqataanerulernissaat siunertaralugu.
Inuiaqartigiit
Kalaallit ullumikkut killiffitsinni misilittakkat assigiinngitsut sukkasuumik
aqqusaartorlugit ingerlanitsinni, ilinniartitaanerillu pitsanngoriartuinnartut
atuunnerisigut, atugartuussutsikkut ukiuni kingullerni 20-ni
siuariartupiloorsimavugut, ingerlatatsigullu assigiinngitsutigut Pisortat
pigisaasigut nunarsuarmi pissutsinut sukkasuumik nutaanngoriartunut allaat
arlalippassuartigut ingiaqataaginnarata ilaatigut siuarsimasutut
taaneqarsinnaalersimalluta. Tamanna nunanit allamiunit aamma
arajutsisimaneqanngilaq.
Taamaattumik
Siumumi isumaqarpugut inuiaqatigiinni inatsisitigut piumaqaatitigut nammineerluta
maleruagassiorsinnaalersimanerput aammalu inuiaqatigiit atugartuussutsikkut
killiffitsinni aaqqissuussinernut nutaanut
nammataqarsinnaassuseqalersimanerput naapertorlugit ullumikkut
piffissanngortoq suliffeqarfissuit annertuut isumannaatsumik
ingerlanneqarsinnaalereersut namminersortunut
ingerlatassanngortinneqarnissaannut, inuiaqatigiit ataatsimut soqutigisaat
ulorianartorsiortinnagit.
Siumumiit
oqaatigissavarput Naalaakkersuisut nalunaarummikkut saqqummiussaat makku,
isumaqatigigatsigit:
Namminersortunut
ingerlatassanngortitsinikkut makku ilanngullugit anguneqarsinnaassasut,
Namminersornerullutik
Oqartussat Pisortat suliassaannik qitiusunik aallussinissaminnut
periarfissaqarnerulissasut
Pisortat
suliffeqarfiussui qulangiisimasutut inissisimasut suliffeqarfinnik namminersortunik
pilersitsinissamut killiliisimajunnaassasut.
Aningaasarsiutigalugit
nutaanik pilersissinnaasat pitsaanerusumik unammillersinnaassuseqalernerup
kingunerisaanik aallartinneqarsinnaalissasut,
kissalu
namminersortunut ingerlatassanngortitsinikkut isertitaqartarnikkut Pisortat
aningaasarissaarnerulissasut.
Naalakkersuisut
isumaqatigaagut namminersortunngorsaaneq atsikkutigiissaartumik ingerlanniarmassuk,
aammalu suliffeqarfiit ataasiakaaginnarlugit peqqissaartumillu
namminersortunngorsaaneq ingerlanniarmassuk.
Immikkoortoq
kingulleq angumerinngitsoorpara piffissat killeqarmata, kisianni
aappassaaniileruma taanna saqqummiutissavara.
Daniel
Skifte, Atassutip
oqaaseqartua:
Aningaasaqarnermut
ingerlatsineq pillugu nalunaarummi aallaaviuvoq siorna Naalakkersuisut atuagaq
saqqummersitaat ateqartoq: Siunissamut takorluugaq.
Atuagaq
taanna saqqummersinneqaqqaarmalli Atassutip iluarisarisimavaa, tassami
partiitut aallartikkattali politikeriuarsimasatsinnut naleqquttorujussuummat,
aammalu taamak siunnerfeqartumik suliaammat, tamanna Atassutip
nuannaarutigaa.
Kisianni
aningaasarsiornikkut immitsinnut napatinnerulernavianngilagut, ullutsinnituut
ingerlatsinermut akissaajaatit qaffakkaluttuinnartikutsigit.
Illuatungaatigullu aamma aningaasatigut isertitagut Nunatta karsiata
sinneqartoorutigisartagai taamak annikitsigitillugit, namminersortunngornissarput
ungasilliartortissavarput.
Taamaattumik
nalunnarummi Naalakkersuisut oqarnerat, issuaaneq: Ataamaattumik
ingerlatsinermut akissaajaatit malunnaatilimmik annikillisartariaqarpagut,@
issuaaneq naavoq, asuli oqarataarnertut sinnattuaqinertullu Atassutip
nalilerpaa.
Tamatumani
tunngaviliussuutigut kingusinnerusukkut qulequttat assigiinngitsut iluini
oqaatigisarumaarpagut, unali maannangaaq taasariaqarpara, ingerlatsinermi
aningaasartuutit malunnaatilimmik annikillisarneqaratik malunnaatilimmik
alliartortinneqarput, pingaartumik 1999-imiit maannakkumut.
Tamannalu
uppernarsarneqarsinnaavoq titartagaq 2.6 takussutissiami allanilu titartakkani
saqqummiussorneqartuni qimerloorluaanikkut.
Umiarsuit
atorlugit angallassinerup, imaluunniit assartuinerup allanngortinnissaa
misissorluaqqaarumaneqarmat tamanna iluarisimaarparput, tassami soorlu
pingaartumik Avannaaniit aalisakkanik nunanut allanut assartuineq
eqqarsaatigalugu pingaaruteqarpoq misissuilluartoqaqqaarnissaa.
Pisisartunut
akigitinneqartut qiviaraanni aamma uppernarsarneqarpoq akit qaffakkaluttuinnarnerat.
Titartakkami takussutissiami siornali uuliap akiata qaffannera, tamatumali
kinguneranik qaffakkiartorneq titartagartamut ilanngunneqarsimagaluaruni suli
qaffakkaluttuinnarneq annertunerussagaluarpoq.
Atassut
isumaqarpoq akit qaffakkaluttuinnartitaanerat
annikillisimatinneqarsimasinnaagaluartoq ukiuni kingullerpiani aningaasat
naleerukkiartornerat politikikkut suliniarnermi ingalassimaniarneqarsimagaluarpat.
Tamanna pisinnaasimanngimmat uggornarpoq.
Namminersornerullutik
Oqartussat aningaasat isertitaat aamma ingerlatsinermut sanaartornermullu
aningaasartuutaat 1999-imiit 2000-imoortut imminnut naleqqiukkaanni ila
ersareqaaq, ilisimatuujusariaqaranilu piaartumik takusinnaassallugu ukiuni
siusinnerusuni isertittakkat, aammalu ingerlatsinermut sanaartornermullu
aningaasartuutaasartut imminnut ataqatigiissut ingerlatsiviusimagaluarlutik,
ukiuni kingullerpiani imminnut ataqatigiunnaarnerullutik aatsangalersinneqarsimasut.
Suli
aatsangaqut annertunerulissagaluarpoq uuliap siorna akitsornera
ilanngunneqarluni ersersinneqarsimagaluarpat.
Aaqqiissutissat
siullerpaat tassaavoq ingerlatsinermi aningaasartuutit sukateriffigalugit,
oqaasiinnanngitsumik, kisiannili aamma pimoorullugit timitalerlugit qanoq
iliuuseqarfigalugit.
Tamatumunnga
angusaqarniarnissamut Naalakkersuisut qanoq iliuuseqarniarpat?
Atassutip
sakkortuumik ajuusaarutigaa Naalakkersuisut 2000-iinnarmi Inatsisartut
aningaasat akuersissutaat 256 mio. kr.-inik naleqartut
atunngitsoortinneqarsimammata.
Atuinikinnerusimaneq
Nunatta karsianut sillimmateqarnerulernermik kinguneqartussaagaluarpoq,
kisianni taamak pinerliornerujussuaq akuerineqarsinnaanngilaq,
naluneqanngimmat sinerissami Pisortat sullivii, soorlu INI A/S-ip
immikkoortortai, sulisitsisut privatillu minnerunngitsumillu sulisartut
suliassaarullutik nalunaaruteqartuartarmata.
Ukiuni
kingullerni marluinnarni aningaasat katillugit 367 mio. kr.-it sanaartornermi
nutaanngorsaanermilu atunngitsoorneqarsimapput. Naak sinerissami
suliffeqarfiit sulisartullu suliassaminnik kaakkaluartut.
Tamanna
tupinnaqaaq akuerineqarsinnaananilu, aamma Atassutip tamanna pillugu
oqaasissani kingulliit suli aninngilai, tassami Nunatta karsiata naatsorsuutai
maani inimi arlaleriarlugit suliarineqartussaapput, upernaaq manna aammalu
ukiamut.
Ukiuni
aggersuni, tassa 2001-imiit 2004-mut pilersaarusiorfiusumi takussutissiatut
2.2.2-mi takutinneqarsinnaasut oqaaseqarfigisariaqartut arlaqarput.
1:
Sanaartugassanut aningaasaliissutissatut missingersuutit asuli
annertunaagaavallaarujussuarput, ukiuni makkunani atunngitsuisarnersuarnut
naleqqussarneqarsimanatik. Taamak naleqqussaasimannginneq Atassutip
suliapalaatut nalilersugaalluanngitsutullu nalilerpaa.
Ingerlatsinermi
aningaasartuutit malunnaatilimmik milliniarneqarsimanngillat, sulili
akerlianik alliartuaarusaartinneqarput. Tamatumunnga Naalakkersuisut
siunnerfigeriikkaminnut imminnut akerlilerput,
tamanna qanoq nassuiartariaqarpa?
Nunatta
karsiata sinneqartoorutissai ukiuni pingasuni aggersuni annikingaarmata, tassa
naatsorsuutigineqarmat ukiumut 15 mio. kr.-inik sinneqartoortassasugut, taava
ukiualuit ingerlaneranni aningaasatigut imminut napatinnerulernissamik
Naalakkersuisut siunnerfeqarnerat imaaruppoq.
Tassani
assersuutigalugu taasariaqarpoq isertitat 60 %-iisa missaat Danmark-miit
tapiissutitut suli isertittagarigatsigit. Sinneqartoorutit 15 mio. kr.-init
ukiunut saluttunut toqqortigassat tapiissutinut 3 mia. kr.-inut
annikillisaatigineqassappata, ila nikingassut suli angeqaaq namminersulernissat
oqallisiginerata sulissutigineratalu nalaani.
Titartakkami
2.2.2-mi takutinneqartoq ataatsimut isigalugu ilumut piviusorsiornersoq
Atassutip takujuminaatsippaa, taamaattumik aperisariaqarpugut, naak
Naalakkersuisut titartagaq 2.2.2 eqqarsaatigalugu Nunatta
aningaasarissaarnerulernissaanik suliniutaat.
Atassutip
paatsoorneqarumanani erseqqissassavaa, Naalakkersuisut Nunatta karsiata
sinneqartooruteqalaartarnissaanik suliniutaat akerlerinngilluinnarmagu.
Minnerpaamimmi taamaattariaqarpoq, anginerusariaqarluni, imaluunniit
isertitat anisitallu imminnut oqimaaqatigiinnerusariaqarput.
Unaana
ujartoripput, Naalakkersuisut pilersaarutitut oqariartuutaat qulequttat
aningisuut marluk, tassalu ukiualuit qaangiuppata aningaasaqarnikkut
nammineernerulernissaq, kiisalu namminersulernissamik siunnerfeqarneq
aningaasatigut kiffaanngissuseqarluni qanoq imminnut ataqatigiippat,
maannamut saqqummiunneqartut tunngavigalugit.
Taama
ujartuinermi peqqutit ilagilluinnagaat unaavoq, tassalu maannamut ukiuni
arlaqalersuni Pisortaqarfiit ilaat ajornannginaavillugu aningaasanik
millionerpassuarnik naleqartunik atuivallaartoorsimasarmata allaat Nunatta
karsiata sinneqartoorutissatut takorluukkanit annerungaartunik
atuivallaartoortoqartarluni, soolu peqqinnissaqarfiut iluani.
Sanaartugassat
eqqarsaatigalugit ukioq manna 2000-imi aningaasaliissutit
akuersissutigineqareersut naammassiniagassat kativillugit 1 mia. kr.-it
pallissivaat, tassa tassani sanaartugassat ukiuni siuliini inaanngitsuukkat,
sanaartugassallu ukiumi nutaami pilersaarutaasut ataatsimut katillugit.
Taamaakkaluartoq ukiumi 1999-imi 592 mio. kr.-it nalingi, kiisalu 2000-imi 593
mio. kr.-it nalingi taamaallaat inaarlugit naammassineqarsimapput.
Tamanna
allatut oqaatigalugu imaappoq: Pissutsit taamatut ingerlaannassappata ukioq
2004-mi sanaartugassanut nutarterinissanullu atunngitsuukkat,
aningaasaateqarfimmi uninngasut 975 mio. kr.-inngorsimassapput. Soorunami
taamaattoqarnissaa Atassutip kissaatiginngeqaa.
Taamaattumik
Atassut isumaqarpoq ingerlatsinermi aningaasatigullu aqutsinermi periaatsinik
allanik nutarterinissamut piffissanngortoq, allannguisoqartariaqartorlu.
Taamaaliornissamut peqquteqarnerup uppernarsaataasa ilaat assersuutitut
taaneqartariaqartoq unaavoq, maannakkumut 2001-imut sanaartugassanut
nutarterinissanullu pilersaarutit amerlanerpaartaat suliluunniit qaammatini
makkunani suliariumannittussarsiuunneqanngillat.
Taamatut
sakkortusaarnitsinnut peqqutit annersaraat, maannangaaq Atassutip
takusinnaalereermagu 2001-imi Nunatta karsiata naatsorsuutissai aappaagumut
saqqummiutassat aamma 2000-imitulli isikkoqarlutik sanaartornermi
nutarterinermilu aningaasanik akuersissutaareeraluanik
atuinngitsuugassarpassuaqarfiusut.
Naalakkersuisut
ajornartorsiummut tamatumunnga aaqqiiniuteqarniarlutik neriorsuuteqanngikkunik,
taava sulinerminni qasusuulersimassapput, imaluunniit siunissamut
takorluueriaasiat pitsaasuusimassanngilaq.
Taamatut
apeqquteqartariaqalerninnut tunngaviupput siuliani tunngavilersorlugit
eqqartoriikkakka, tamatumunnga uppernarsaatitut isigisariaqartut.
Aktieteqarluni
ingerlatseqatigiiffinni anginerni akiitsut, kiisalu Nunatta karsiata akiitsui
ilanngullugit eqqarsaatigigaanni akiitsut Nunatsinneersut
qaffakkaluttuinnarnerat Atassutip aarlerinartoqartippaa.
Nunatta
karsiata nammineq akiitsuisa Naalakkersuisuniit appariartuaartinneqarnerat
Atassutip iluarinartuutippaa, nuannaarutigalugulu, kisiannilu
sulifissuaqarfissuit Pisortanit pigineqartut, pingaartumik Royal Greenland
A/S-ip, akiitsorparujussui suli malunnaatilimmik amerliartortinneqartut,
peqqutissaqavissumik Atassummiit aarlerinartutut isigineqarput.
Tamanna
pillugu Naalakkersuisut qanoq iliuuseqarniarpat?
Suliffissuaqarfiit
allat aamma eqqarsaatigalugit, tamakkununngalu kaputartuullugu, sullissinissamik
isumaqatigiissutit aningaasartai Pisortanit akiliutigineqartartut
ikigisassaanngeqisut qiviaraanni malugisariaqarpoq Naalakkersuisut
tamatumani sukateriniartut, soorlu kingumut nalunaartarnerisa
sakkortusaarnerat eqqarsaatigalugu.
Taamak
iliuuseqarniarneq Atassutip annertuumik taperserpaa. Tassami Pisortanut
pisariaqavippoq aningaasat sullissinissamut akiliutigineqartartut ilumut
siunertamut atorneqartarnersut qulakkiissallugu.
Aamma
taasariaqanngikkaluartorluunniit matumuuna Atassutip piumasaraa, soorunami
kingumut nalunaarutit partiinut tamanut Kattusseqatigiinnut attaviitsumullu
assilineri nassiunneqartassapput, taamaaliornikkut aatsaat
pissusissamisoortumik qinikkat malinnaatitaalissapput, asuli kingumut
nalunaarutit pisortat allaffeqarfiini pujoralassertiinnarnagit.
Naalakkersuisut
Aningaasaqarniarnikkut ingerlatsineq pillugu nalunaarutaanni taaneqarsinnaasut
allat maanna annertunerusumik iserfigissanngilagut, tassami aamma
apeqqutit arlaqartut pingaaruteqartullu Inatsisartut upernaaq manna
ataatsimiinneranni oqallisigineqartussaapput, soorlu KNI-ip ilaata
namminersortunngorsarnissaanut tunngasoq.
Aamma
taamatut isigivagut Inatsisartut ukiamut ukiunilu aggersuni
oqallisigiumaagaat, soorlu akileraartarnerup allanngortiteneqarnissaa,
akiitsunut tunngasut ineqarnermullu tunngasut il.il.
Piffissaq
nalleriarpat piumaartussani Atassut ersarissumik nipeqarluni
siunnersuuteqartarnissaminut oqalliseqataanissaminullu qilanaalereerpoq.
Naggataatigut
Atassut imatut oqaaseqarniarpoq,:Naalakkersuisoq saqqummiussinermini imatut
aallartippoq, issuaaneq: @ukiuni
kingullerpaani Nunarput aningaasaqarnikkut pitsaasumik ineriartorsimavoq, Aissuaaneq
naavoq. Aamma saqqummiussissummi naanerani qallunaatuuani imatut isumalimmik
oqaatsimik atuivoq, uagut Nunatsinni atugarissaarpugut, imaluunniit
atugartuujuvugut, tassa qallunaatut taallugu, vores velfĉrdsamfund.
Aap
taamaassorinnittoqarsinnaavoq, Atassut isumaqarpoq aningaasatigut
sinneqartoorutaasartut aamma siunissami sinneqartoorutissatut
takorloorneqartut suli annikippallaarujussuartut.
Aamma
Atassut isumaqarpoq Nunarput suli nunarsuarmioqatitta allat ilaannut
naleqqiulluta suli tamakkiisumik naammaginartumik Nunatsinni atugaqarluta
atugarissaartuutitaalersimanngitsugut.
Atassut
isumaqarpoq Nunarput pitsaanerpaarpaamik suli ineriartortinneqartariaqartoq,
inuttaasunit pisariaqartinneqartut amerlaqisut timikkut anersaakkullu
atugarissaarluni angurusutat aallaavigalugit.
Taakkuami
piorsaaffigineqarneri suli naammanngillat, soormi atugarissaartuusimassagutta,
qallunaatuani oqaaseq, velfĉrdssamfund, atorneqarmat, taava sooq aalisartut
ilaat taakkua ilaqutaat ullumikkut ajornartorsiortorujussuuppat, piniartut
puisit amiinnaanik oorisiorfeqartut apeqqummi tassani sumiippat?
Sooq
meeqqat atuartut ilaat atuarfipalaannguani ilinniutissaaleqiffiusuni
atuartitaappat? Sanaartugassat amerlaqisut nutaanngorsaanerillu
pisariaqartinneqartut sooq suli pisariaqartippagut? Il. il.
Atassut
isumaqarpoq nalunaarut sinnattuaqillunilusooq takorlooqqissaarpallaartoq.
Uppernassuseqartumik ersarissumik takutitsinngilaq, taamaattumik siorna 17.
maj 2000 maani inimi oqaluttarfimmiit oqaatsima ilai uppernarsarlugit
peqqutissaqavittutut misigisimavunga taassallugit, tassa taamani
Naalakkersuisut nalunaarutaanni Nunarput aamma aningaasarissaarneragaammat,
imatut oqarsimagama, issuaaneq aallartippara, AAtassut
isumaqarpoq Nunatsinni aningaasarsiornikkut ullumikkut oqaatigineqartutuut
taamak inissilluarsimatiginngitsugut. Nioqqutigisatsinnut akigitinneqartut
taamak akilernerlugaatigitillugit." Issuaaneq naavoq.
Ulluni
makkunanerpiaq aalisarnerup iluani pisut ilungersunartut isiginnaakkagut
taamatut oqarnissatsinnut taasaqaqqinnissatsinnullu uppernarsaapput
Atassummullu nakuunerulersitsillutik. Qujanaq.
Asii
Chemnitz Narup, Inuit
Ataqatigiit oqaaseqartuat:
Qujanaq.
Aallaqqaatigalugu Naalakkersuisut aningaasaqarniarnikkut ingerlatsineq pillugu
nalunaarutaannut Inuit Ataqatigiinniit qutsavigerusuppagut. Ukioq manna
nalunaarusiami ukiuni kingullerni inuiaqatigiit aaqqissugaanerat pillugu maani
Inatsisartuni eqqartortarsimasagut sukumiinerusumik sammineqarput.
Soorlu
imaatigut assartuineq, aamma ineqarnermut akileeriaaseq nutaaq, ineqarnermullu
tapiissutit, isumaginninnermut sulisoqarnermilu pissutsit, kiisalu
innaallagiamut imermut kiassarnermullu akigitinneqartunik
aaqqissuusseqqinniarneq sammineqarlutik.
Tamakku
ilaat saqqummiussinermi uani oqaaseqarfigissavagut aammalu allanik
oqaasissaqarluta, imaattunik: Aalisarnermut, sanaartornermut,
sulisoqarnermut, ilinniartitaanermut, kommunit aningaasaqarniarnerannut,
aningaasarsiornikkut aaqqiiviginiagassat allat, Namminersornerullutik
Oqartussani allaffeqarfitsigut ingerlatsinermut, Naalakkersuisunut apeqqutit
kissaatillu. Aamma nunarsuup sinnerata qanilliartuinnarneranut kiisalu
aningaasarsiornikkut ineriartortitsinermut piumasaqaatinut tunngasut
oqaaseqarfigissagatsigit.
Nunarput
Kalaallit Nunaat nunarujussuuvoq ikittuinnannguanik inulik inoqarfinnut 70-nut
amerlanerusunut siammarsimasunik.
Taamak
siammasitsigaluta najugaqaratta attaveqatigiinnikkut aaqqissuussinermik
naleqqussakkamik pisariaqartitsivugut. Tassa inunnik angallassinikkut,
nioqqutissanik assartuinikkut allatigullu attaveqatigiinnikkut
periarfissatigut.
Aamma
tunisassiornermi annertuukkaanik ingerlatsinikkut iluaqutiginiarneqarsinnaasut
nunani allani maani Nunatsinni anguneqarsinnaanngingajavittarput. Inoqarfiit
imminnut ungasinnerujussuunerat aamma peqqutigalugu kommunit tamangajammik
niuerfeeqqatut matoqqasutut isiginiarneqartariaqarput.
Tamakku
pissutigalugit killilersorneqanngitsumik unammilleqatigiinneq immikkorluinnaq
ittumik Nunatsinni atuuttariaqassaaq. Imaluunniit allatut oqaatigalugu
killilersorneqanngitsumik unammilleqatigiinneq tamakkiisumik
atortinneqarsinnaanngilaq.
Ilami
Nunatsinni pissutsit immikkut ittut aamma aningaasarsiornikkut
ineriartortitsinerup sammineqarnerani aallaavigisariaqarput.
Suliassaq
tassaavoq inuiaat Kalaallit ineriartortinneqarnerannut periusissatsinnik
ilusilersuinissaq qulaani taaneqartut aallaavigalugit.
Aningaasaqarniarnerput
aamma immikkooruteqarpoq. Ukiumut aningaasat isertittakkatta 60%-ii
Danmarkimiit tapiissutitut pissarsiarisaratsigit. Pisortat ingerlatsinerat
annertoqaaq, suliffeqarfiillu anginerit pisortanit pigineqarlutik.
Inuussutissarsiorneq
isertittakkagullu annertunerpaamik aalisarnermit pipput. Tamatumalu
kinguneranik silaannaap allanngoranera aalisakkat takkusimaartarnerat
aalisariutillu qanoq ittuuneri amerlassusiilu eqqarsaatigalugit
mianernarluinnartunik inissisimalluta.
Naalakkersuisut
ukiuni tulliuttuni qulini aningaasaqarnikkut pisariaqartitsinitta
qulaajarnerani innuttaasut amerlassusissaannik missingersuutit aamma
ilannguppaat.
Inuiaqatigiittut
katitigaanitta allanngoriartornerata inuiaqatigiit pilersuinissamik
isumassuinissamillu pisussaaffii annertunerulernissaannik kinguneqassaaq.
Inuit Ataqatigiit Naalakkersuisut isumaqatigaat tamanna maannangaaq
piareersarfigilereertariaqaripput nalunaarmata.
Aningaasarsiornermi
ineriartortitsineq Naalakkersuinikkut siunertarisat naapertorlugit, tassalu
aalajangiuteriikkatut aningaasarsiornikkut naalakkersuinikkullu
kiffaanngissuseqarlerusunneq anguniarlugit ingerlanneqassaaq.
Tamanna
anguneqassappat nutaanik eqqarsarneq allannguinerillu pisariaqassapput.
Inuiaqatigiit ilinniarluarsimasuusariaqarput. Innuttaaqataasullu tamarmik
Nunatta siunissaanut ilusilersueqataasariaqarput.
Inuit
Ataqatigiinni Naalakkersuisut siorna ukiakkut inuiaqatigiit aaqqissuussaanerat
pillugu allannguutissatut kissaatigisatut saqqummiussaat tunngaviusumik
isummerfigereerpagut. Uagullu isummagut naapertorlugit allannguutissat
sakkussaapput aningaasarsiornikkut naalakkersuinikkullu
kiffaanngissuseqarnerulernissap anguniarnerani.
Allannguinerit
immini siunertaassanngillat. Aamma inuiaqatigiit naligiinnermik nammaqatigiinnermillu
toqqammavillit anguniagaanerat tunulliunneqassanngilaq.
Nunatta
aningaasaqarniarnera patajaallisagaavoq. Suliffissaaleqisut ikiliartortut
akileraarutitigut isertitat amerliartorput.
Pisortat aningaasatigut ingerlatsinerat oqimaaqatigiissagaavoq. Tamatuma pisussaaffiliinerani Naalakkersuisut oqarnerat Inuit Ataqatigiit isumaqatigaat. Pisussaaffiliivoq ungasinnerusumut isiginiarnissamut. Aamma pisussaaffiliivoq nalunngeriikkatsitut aningaasartuutissat annertusiartortussat sillimmartaarfiginissaannut, takkuttussallu ullumikkut naatsorsoreersinnaanngisagut aamma ilanngullugit.
Naalakkersuisut imaatigut assartuinermi akitsuusersuinikkut tapiissuteqartarnikkullu allannguinissamut periarfissat pillugit misissuinertik nangissimavaat. Maannakkut killiffik naapertorlugu takusinnaavarput nutaamik aaqqissuussinikkut annikitsukkuutaartunik assartuineq tassa usit poortukkat kiisalu avannamut isorliunerusunullu assartuineq akisunerulissasut.
Naatsorsuinerit aamma takutippaat qaleralinnik avammut tuniniaanermi aningaasartuutit 9 mio. kr.-inik qaffariassasut. Taamaattumik pissusissamisuussaaq aperissalluni tamakku kiap akilissavai.
Allannguinerit annertuut atuutilersinnagit kingunerisinnaasaasa sukumiisumik misissorneqartarnissaat Inuit Ataqatigiinniit oqaatigiuartarparput. Taamaattumik Naalakkersuisut aalisakkanik tuniniaanermut sunniutigisinnaasaanik misissueqqaarniarnerat iluarisimaarluinnarparput.
Taamatut periuseqarniarneq Inuit Ataqatigiit piumasarisartagaannut naapertuuppoq.
Isummivinnissamut Naalakkersuisut aalajangiiffigisassamut saqqummiussinissaannut utaqqissuugut. Ilami nalunaarutit soorlu imaattut ittut toqqammavigalugit annertuunik sunniuteqartussanik aalajangersuinissaq pissusissamisoorsorinnginnatsigu.
Taava ilanngutilaassavara uani titarnerit tammarsimammata maluginiaratsigu Naalakkersuisut susassaqartut uani qanimut annertusisamik oqaloqatiginiarlugit aalajangersimammata aaqqissuussineq assartuinermut tunngasoq pillugu, taanna aamma iluarisimaarparput.
Inuit Ataqatigiit innaallagiamik tunisassiornermi, imermik pilersuinermi kiassarnermilu aningaasartuutaasartut nalunaatsumik ersersinneqarnissaat isumaqatigaat. Pissutsit piviusut ersersinneqarnerisigut akigititat pillugit aalajangiiniarnerit eqqortut ajornannginnerulissapput, nalimmassaatillu suut atortariaqassanersut nalunarunnaassaaq.
Aalisarneq Nunatta aningaasaqarniarneranut qitiulluinnarluni inissisimavoq. 1980-ikkut naalerneranni aalisariutit avataasiortut amerlavallaaleraluarput. Taamaammat Inatsisartutigoortumik aaqqiissuteqarniarluni akuliuttoqarsimavoq, ilaatigut aalisariutit avataasiortut amerlassusii aalisagartassanut naleqqussarniarlugit.
Maanna aamma sinerissap qanittuani aalisarneq eqqarsaatigalugu nutaamik aaqqissuussinissaq pisariaqalerpoq. Apeqqutit nunamut tulaassuisussaatitaanermut nunami tunisassiorfinnut umiarsualiisarnernut qulaajartariaqarput. Sinerissamut qanittumi aalisarneq ungasinnerusoq isigalugu ineriartortissinnaajumallugu.
Naalakkersuisut inuiaqatigiinni aningaasarsiornerup annertuseriaqqinnissaanut periarfissat killeqartutut nalilerpaat. Taamaakkaluartoq Inuit Ataqatigiinni annertusaaqqinniarnermut periarfissat sutigut suli atorluarneqarsinnaanerunerat eqqarsaatersuutigisimavarput.
Naluneqanngitsutut sanaartornermi suliassanut 700-800 mio.-it missaat aningaasanut inatsisitigut immikkoortinneqarput. Aningaasaliissutit taakku aningaasarsiornikkut aamma suliffissaqartitsiniarnermi ilinniartitaanermilu iluaqutigineqartussaapput.
Aningaasaliissutinik aqutsineq sapinngisamik amerlasuut ilinnialernerannik ilinniakkaminnillu naammassinnissinnaanerannik kinguneqartinneqartariaqarpoq. Tamannalu aamma ataavartumik suliffeqalernissamut aqqutaaniartussaalluni.
Sanaartornermut suliaqartut naammassisaqarsinnaanerat tassa kapacitet aamma pingaaruteqarluinnarpoq. Inissanik pisariaqartitsineq sanaartugassanillu allat eqqarsaatigalugit suliffeqarfiit naammassisinnaasaasa ilisimanissaat pisariaqarluinnarpoq, sanaartornermi suliakkiissutit naammassisinnaasallu oqimaaqatigiittariaqarmata.
Naammassisinnaasat annikippallaarpata taava qanoq iliussaagut? Avataaniit sulisussanik tikisitsissaagut? Imaluunniit qanoq iliorluta sanaartornerup iluani akit qaffapiloornissaat pinaveersaartissavarput?
Mittarfiliortiternermi mesterit ima imatullu amerlatigisunik nunaqavissunik sulisoqarnissaannik piumasaqaateqarsinnaaneq misilittagaqarfigivarput. Tamanna assigiinngitsunik isummersorfigineqarsinnaavoq. Inuit Ataqatigiit siunnersuutigissavaat siunissami sanaartortussat aalajangersimasunik ilinniarfiusinnaasunik pilersitsinissaat piumasaqaateqalissasugut. Taamaalilluta ilinniarnissamut periarfissat tassaniittut qulakkeersinnavagut.
Suliffissaaleqisut ikiliartornerat nuannaarutissaavoq. Suliniuteqarnerpulli tamaanga killeqassanngilaq. Nalunngilarput ilinniarsimanngitsut tassaasut suliffissaaleqisoqaleraangat siulliullutik eqqugaasartut. Nunami tunisassiorfinni tulaassuineq kipisaqattaarluni ingerlaleraangat imaluunniit tunisassiorfiit matuneqaqattaaleraangata sulisartut ullormiit ullormut angerlartinneqartarput.
Aningaasarsiornikkut ingerlarnerliortoqaleraangat ilinniagaqarsimanngitsut siulliullutik misillerfigisarpaat. Tamakku pissutigalugit Inuit Ataqatigiit piumasaraat ilinniagaqarsimanngitsut suliffeqarnerminni ilinniagaqarnissamut piginnaanermikkullu nukittorsarnissamut periarfissinneqartassasut.
Suliffeqarnermi atugassarititaasut eqaatsumik aaqqissorneqassapput. Suliffik suliffiinnaanani ilinniarfiullunilu pikkorissarfittut ingerlanneqarluni. Aningaasaqarnikkut patajaatsumik atugaqarnerup nalaani inuiaqatigiit pisussaapput amerlanerpaat ilisimasaqarnerulernissaat piginnaaneqarnerulernissaallu isumaginiassallugu. Apeqqut pingaaruteqartoq alla tassaavoq, sulisussat nooqattaarsinnaanerisa pisariillisarnissaa, nalunngilarpummi Nunatta ilaani sulisussaaleqisoqartartoq uffa allani suliffissaaleqisoqartoq. Tamatuminnga aaqqiiniarnermi sulisoqarnikkut politiki ineqarnermullu politiki ataqatigiissaartariaqarput.
Taamatuttaaq isumaliutigineqarsinnaavoq suliffissaqarumallutik nuuttut immikkut ajunngitsorsiassaqartinnissaat.
Sulisartorpassuit sulinerminni nungusarneqaatigisaminnik suleruluttarsimapput, tamatumalu kinguneranik sulisinnaassusermikkut innarlerneqartarlutik. Tamakku tassa ilaatigut siusinaartumik sulisinnaajunnaarnersiuteqartuupput.
Aningaasaqarnermut inatsimmut siusinaarluni sulisinnaajunnaarnersiutilinnut immikkoortitat oorit qiviaraanni 195 mio. kr.-it missaaniittut naatsorsorneqarsinnaavoq sulisinnaajunnaarnersiutillit Nunatsinni 2000-it missaaniittut.
Inuit
Ataqatigiit isumaqarput taakkua ilarpassui suli sulisinnaassuseqaraluartut
atorluartariaqartumik taakkununnga inunnut sullivinnut inuiaqatigiinnullu
iluaqutaasumik. Taamaammat aqaguagu piginnaanngorsaqqiinissaq siunertaralugu
aaqqissuussinissap nutaap eqqartornissaa qilanaaraarput. Taanna
siunissamut sammineruvoq. Kisiannili aamma massakkut sulisinnaajunnaarnersiuteqareersut
arlaatigut ikiorsertariaqarpagut. Inuiaqatigiit aningaasarsiornerannut aamma
taakkua iluaqutaasinnaapput.
Taamatut
iliuuseqarniarneq sulisitsisut ilumut piumassuseqarpata aatsaat
piviusunngortinneqarsinnaavoq.
Ukiuni
qaangiuttuni ilinniartitaaneq pillugu Inatsisartut oqallittarsimaqaat.
Aningaasarsiornikkut anguniakkat ilinniartitaanermillu anguniakkat imminnut
naleqqussarneqassappata aningaasarsiornikkullu immitsinnut
napatilernissarput angussagutsigit taava apereqqittariaqalersimavugut
ilinniakkat sorliit ilinniarneqarnissaannik kajumissaarutigissavagut.
Ilinniartitaaneq sakkugalugu aningaasarsiornermi
kiffaanngissuseqanerulernissaq anguniarutsigu?
Inuit
Ataqatigiinni isumaqarpugut ilinniartut inuussutissarsiutinut tassa
aningaasarsiornikkut naleqarnerulersitsisunut innersuutissagigut. Nalilinnik
pilersitsiviusut, soorlu aalisarneq tassani aalisarneq tamaat ataatsimut
isigalugu sanaartornerlu eqqarsaatigivagut.
Ilinniartitsineq
Aaningaasat
pilersinneqarfiini@sulilernissamut
siunnerfeqartariaqarpoq. Taamaalilluta aningaasarsiornikkut ineriartorneq
toqqaannarnerusumik attuumassuteqarfigilersinnaagatsigu
sunniuteqarfigilersinnaagatsigu aammalu nakkutigilersinnaallutigu.
Kommunit
aningaasaqarniarnikkut siuariartornerat patajaannerusumillu
ingerlalersimanerat paasillugu qiimaallannarpoq. Tamannalu tunngavigalugu
aammalu kommuninut ataatsimoortumik tapiissutaasartut pillugit siorna
isumaqatigiissutaasoq eqqarsaatigalugu Inuit Ataqatigiit naatsorsuutigaat
kommunit periarfissatik najoqqutaralugit akisussaaffimminnik annertunerusumik
tigummiaqalissasut. Aamma sanaartugassat akilerneqarnissaat eqqarsaatigalugu.
Aamma
naatsorsuutigaarput siunissami ungasinngitsumik ukiunut arlalinnut
atuuttussamik sanaartorneq pillugu kommunit ataasiakkaat
isumaqatigiissuteqarfigineqarumaartut.
Aallaqqaataani
oqaatigineqartutut Nunatsinni ineriartortitsinermut pissutsit aaqqinniagassat
amerlaqaat. Nunatta inissisimanera innuttaasullu siammarsimaqalutik
najugaqarfeqarnerat piumasaqarpoq imaannaanngitsunik.
Pisariillisaaneq
aningaasartuutinillu apparsaanissaq siunertaralugit allannguiniarnerit
arlalippassuit Inatsisartut tunngaviusumik isummerfigereerpaat.
Aningaasartuutinik apparsaaneq ilaatigut unammilleqatigiinnikkut
anguneqarsinnaavoq. Tamatumanili nassuerutigineqartariaqarpoq nunani allani
unammillernermi killilersugaanngitsumik ingerlatsineq Nunatsinnut imaalillatsiaannaq
eqqussinnaannginnatsigu.
Sanaartortitsiniarluni
suliariumannittussarsiortarneq assersuutigisinnaavarput. Sanaartornermi
sulisitsisunut Nunarput tamakkerlugu suliffiginiassallugu
ajornakusoorsinnaaqaaq. Tamannalu pissutigalugu suliariumannittussarsiornerit
ilaanni ikittuinaat neqerooruteqartarlutik.
Inoqarfippaalunni
suliassanut aalajangersimasunut mesteri ataasiinnaagajuttarpoq. Tamatumap
kinguneranik suliariumannittussarsiornermi ataasiinnaq
neqerooruteqarajuttarluni. Taamaalilluta unammilleqatigiinnikkut
akikillisaanissaraluaq angunngitsoortarparput.
Tamanna
aallaavigalugu Ineqarnermut Attaveqarnermullu Naalakkersuisoq
kajumissaarusupparput eqqarsaqatigiittartussanik tĉnketankemik
pilersitseqqullugu unammilleqatigiinnikkut anguneqarsinnaasunik
qulaajaasussanik periusissanillu Nunatsinnut naleqquttumik siunnersuuteqartussamik.
Aaqqinniagassat
ilaat alla tassaavoq sulerusussutsip qaffassarnissaa. Sulisitsisorpassuit
pisortaqarfinniikkunik imaluunniit namminersortuugunik
naammagittaalliuutigisartagaat tassaavoq aamma sulisorisat
aalajaassuseqannginnerat.
Inuit
Ataqatigiit kaammattuutigissavaat tamanna ajornartorsiut suliffeqarfinni
ataatsimoorullugu anigorniaqqullugu. Ajornartorsiut suliffeqarfimmut tamarmut
attuumassutilik ataatsimut aaqqitassaq. Sulisitsisut soorunami aamma
annertuumik akisussaaffeqarput sullivinni sulisunut atugassarititaasut
aalajangersaaviginerisigut naammassisinnaasaminnik.
Pisortat
allaffeqarfiinik ingerlatsinermi Inuit Ataqatigiit pisariaqarsoraat Nunatsinni
innuttaasut pisariaqartitaat inuillu sulisut naammassereersinnaasaat
pisinnaasaallu aallaavigalugit aaqqissuunneqassasoq.
Namminersornerullutik
Oqartussani atorfillit piginnaanngorsarnerat pillugu pilersaarutinik
nalunaarummi ersittoqanngilaq. Sulisut ataasiakkaat
periarfissinneqartariaqarput piginnaanngorsaqqittuarnissamik
akisussaaffimmik qaffakkiartortumik nassataqartussaq. Inuit Ataqatigiinnullu
pingaaruteqarpoq suliitigaluni pikkorissarsinnaanissamut
periarfissiisarnissaq, pilersaarusioriikkamik suliassat aalajangersimasut
aallunneqarsinnaalersillugit.
Atorfiit
sulinermut sungiusarfittut isigineqarsinnaasut aamma pilersinneqartariaqarput.
Taamaattumik apeqqutigissavarput tamakkunaatigut pilersaarutit qanoq
ittuunersut.
Naalakkersuisut
aningaasaqarnitta ingerlannerata erseqqissumik malinnavigineqarsinnaaneranik
anguniagaqartuarnerat Inuit Ataqatigiit iluarisimaarpaat. Aamma Inuit
Ataqatigiit kissaatigaat suliaq tamanna nanginneqassasoq paasissutissanik
Nunatta ataatsimut aningaasaqarniarneranik naatsorsuutaanullu tunngasunik
katersinikkut Nunatsinni aningaasarsiornerup allanngoriartorneranik
takussutissiisinnaalernissaq siunertaralugu.
Siorna
novemberip qeqqani Nunatsinni Naatsorsueqqissaartarfiup qaaqqusineratigut
inuusuttumik aningaasarsiornermik immikkut ilisimasalimmik
oqalugiartitsisoqarpoq. Oqalugiarnermi Nunatta inuiaqatigiittut
naatsorsuuteqalernissaanut tassa nationalregnskabeqalernissaanut suliniutit
aallarnisaataasut saqqummiunneqarput. Taannalu naatsorsueriaaseq GRAM-mimik
taaguuteqartinneqarpoq.
Tassani
oqalugiarnermi paasinarsivoq nationalregnskabeliorniaraanni suli
paasissutissanik katersanik Naatsorsueqqissaartarfimmi
amigaateqartoqartoq. Inuit Ataqatigiinni isumaqarpugut naatsorsueriaaseq
pineqartoq annertuumik iluaqutinngorsinnaasoq. Aamma ilaatigut Inatsisartunut
ilaasortat aningaasanut inatsisissanik siunnersuutinik suliaqartilluta,
taamaattumik kissaatigaarput Naalakkersuisut suliap tamatumap
naammassineqarnissaa isumagissagaat.
Aamma
periarfissaq manna atorlugu eqqaasitsissutigissavarput ukiakkut 1999-imi
aningaasanut inatsisissap eqqartorneqarneranut atatillugu nammineq pisat
iluaqutigineqarnerisa Nunatta aningaasaqarneranut naatsorsuutini
takuneqarsinnaalernissaat kissaatigalugu oqaatigigatsigu.
Qulaani
naatsorsueriaatsimut eqqartorneqartumut tamanna ilanngunneqartariaqarpoq suut
suliarineqartartut tamarmik naatsorsuutini takussutissaqartinneqartariaqarput.
Nunatsinni uatsinnut napatinniarluta iliuutsigut tamakkiisut aamma
oorinngorlugit nalilersorlugit naatsorsorneqartariaqarput.
Siunissami
nunanik allanik niueqateqarnermi aningaasat aniatitat isertitallu
oqimaaqatigiinnerisa takuneqarsinnaalernissaat Inuit Ataqatigiinninngaanniit
kissaatigaarput, uani pineqarpoq betalingsbalance. Massakkut
takusinnaasatuarput tassaavoq nioqqutissanik eqqussuineq avammullu tunisineq
tassa varebalancemik taaneqartartoq. Naatsorsuutit oqimaaqatigiissaarinermik
aallaavillit aningaasanik nalilinnik iliuuseqarnerit tamaasa takutissavaat.
Aningaasarsiornikkut
kiffaanngissuseqarnerulerumalluta kissaateqarnitsinnut naapertuuppoq.
Naalakkersuisunut
arlalinnik apeqqutissaqarpugut.
Aningaasaqarniarnerput annertuumik aalisarnerup ingerlaneranik sunnerneqarsimavoq. Siorna kinguppaat pisarineqarsinnaasut amerlisinneqarput. Taamaattumik apeqqutigerusupparput tamanna ilimagineqartutuut aningaasarsiornermut pitsaasumik kinguneqarsimanersoq.
Aalisarnerup
iluani pissutsit aningaasaqarniarnitsinnut tunngasut qanoq ingerlappat.
Ulluni qanittuni aalisarnikkut aaqqiagiinngitsoqarnera aningaasaqarniarnikkut qanoq kinguneqassava?
Royal Greenlandip nunani allani taarsigassarsiaminik taarsersuinera qanoq ingerlava?
Aningaasaqarnermut Naalakkersuisup saqqummiussinermini eqqaavaa Naalakkersuisut pisortat pigisaannik namminersortunngorsaaneq immikkut sammigaat Naalakkersuisut ataatsimoorussillutik piginneqataariaatsinik siuarsaaniaqataaniarnerlutik.
Nunatta nunarsuup sinneranut ilaanera annertusiartuinnartumik sammisalerparput. Tamanna Inuit Ataqatigiinnut pingaaruteqartuaannarsimavoq. Tamatumanili aningaasarsiornerinnavimmik aallaaveqannginnissaa kissaatigaarput.
Nunarsuatta
sinnerani paasineqareerpoq aningaasarsiornerinnavik sammineqalersillugu
inooqatigiinnermut isumaginninnermullu tunngassuteqartut
tununneqaqqajaasartut. Allat paasisaat ilikkarfigisinnaassavagut misittagaallu
tusaaniartariaqarpagut soorlu verdenssociale forummimi ukioq manna Brasiliami
ataatsimeeqqaartumi inuiappassuit oqariartuutigigaat.
Apuunniagaat
tassaavoq nunarsuarmi allamik ineriartortitsisoqarsinnaavoq. Nunarsuaq inuppalaarnerusoq
naligiiffiunerusoq inuiannillu assigiinngitsunik ataqqinniffiusoq.
Nunatsinni
oqallisigisariaqarparput una aningaasarsiornerup annertusaaffigineqarnerani
sunaana siunertariniarippu? Aningaasarsiornikkullu kiffaanngissuseqarneruneq
sumut atussavarput?
Aningaasarsiornikkut
ineriartortitsinermi piumasaqaateqartariaqarpugut, aningaasarsiorneq nammineq
siunertatut isiginagu soqutigisalli allat sallitillugit. Inuit Ataqatigiit
aammarluta oqaatigerusuppaat isumalluutinik
uumassusilinnik inuuniuteqarnitta nungusaannginnissamik annertuumik
pisussaaffilermatigut. Pinngortitap innarlerneqannginnissaa
inuussutissarsiutittalu pingaarnerit aalisarnerup piniarnerullu pinngortitamik
mianerinninneq aallaavigalugu illersortuarnissaat.
Tassunga
uiggiullugu aningaasarsiornikkut ineriartortitsinerup siunertarissavaa
inuiaqatigiit imminnut napatittut pilersikkiartuaarnissaat. Tamannalu kikkut
tamarmik pisinnaasartik naapertorlugu peqataanissamut pisinnaatitaaffiisa
pisussaaffiisalu qulakkeerneqarneranik ilaqartinneqassaaq,
innuttaaqataasutut ataasiakkaarluta piginnaanivut inuugallartilluta
atorneqarsinnaaqqullugit inuttullu ineriartortuarnissarput
qulakkeerumallugu.
Inuit
Ataqatigiit kissaatigaat aningaasaqarnikkut ingerlatsinerup innuttaasut
tamarmik inuunerissaarnissaat qulakkeerniassagaa. Ingerlatsinerup
isertitaqarnikkut equngassutit nalimmassarniassagai kiisalu inuuniarnikkut
atukkat oqilisaaffiginiassagai.
Naggataatigut
oqaatigissavarput Naalakkersuisut aningaasarsiornerup ingerlalluarnerata
nalaani ileqqaarnissatsinnik siunertaqarnerat isumaqatigilluinnaratsigu.
Aningaasartuutissat suli aqagussaq eqqarsaatigalugu
annertussusilerneqartassapput. Patajaatsumik aningaasaqarnikkut atugaqarnitsinnik
ileqqaartariaqarpugut ukiut qulit 15-it qaangiuppata akiligassariligassagut
akissaqartinniassagatsigit, taamatullu aamma ilimaginngisamik aningaasanillu
nalilinnik pisoqariataarsinnaanera sillimaffigeertariaqaratsigu.
Taamatut
oqaaseqarluta Naalakersuisut Aningaasaqarniarnikkut ingerlatsineq pillugu
nalunaarutaat akuersaarparput.
Mogens
Kleist,
Kattusseqatigiit oqaaseqartuat:
Qujanaq.
2001-imi aningaasaqarniarnikkut ingerlatsineq pillugu nassuiaat
Aningaasaqarnermut Naalakkersuisup saqummiussaanut Kattusseqatigiinniit imatut
oqaaseqaateqassaagut.
Ukiuni
kingullerni Nunatta aningaasaqarnikkut ingerlasimanera qissimissagaanni
Landskarsip sinneqartooruteqartarnera takussaasarsimavoq tamannalu
nuannaarutissaavoq. Taamaattorli ukioq kingulleq pilersinneqartoq anlĉgsfondi
suli iluamik atorluarneqanngilaq, tassami sinerissami suliffeqarfippassuit
ukiuunerani sulisuminnik ilanngartiterisariaqartarsimapput sanaartornermut
pilersaarutit iluamik suli ingerlanneqarsimanngimmata.
Takusinnaavarput
ukioq kingulleq aningaasat fondemiittut amerligaluttuinnartut, ukiullu
naanerani aningaasaatit 256 mio.-inik amerlassuseqalersimallutik.
Aap
aningaasaqarnerput ajunngitsumik ingerlavoq. Taamaattorli sinerissami
suliassat iluamik ingerlanneqanngillat. Pissutsit taamaattut piffissami
qaninnerpaami aaqqinneqartariaqarput. Aammalu anlĉgsfondip ingerlanneqarnera
pitsaanerusumik siunissami ingerlanneqartariaqarpoq.
Ukiut
kingulleq Naalakkersuisut saqqummiussaat taakkartorlugu siunissami takorluugaq
taassuma anguniagasartai assigiinngitsut taakkartorpaat. Tungitsinniillu
pissanngatigaarput anguniakkat eqquutsinneqarsinnaanersut tamakkiisumik,
tassami avatitsinniit sunnerneqartarnerput aningaasaqarniarnikkut
annertuumik sunniuteqartarmat.
Taaginnartigit
Nukissiorfiit qaammat una akitsuineri kiassarnermut, imermut aammalu kallerup
inneranut nunarsuarmi uuliap akiata qaffasinnera tunngavigalugu.
Assigiinngitsorpassuit ukiup ingerlanerani pisimapput taakkartorneqartullu
ilagaat pisortat aningaasaliissutaasa aalajangersimasumik
annertussuseqalernissaat aammalu inuiaqatigiit aaqqissugaanerata
pitsanngorsarneqarnissaa.
Ersarinnerpaamik
takussutissatut silaannakkut ingerlannerup nalimmassarneqarnerata kingunerat
tassalu akit assigiinngitsut Grĝnlandsflymit atuutilerneqarmata, ilaatigut
tupinnaannartumik akinik qaffaanikkut aammalu Naalakkersuisut
eqqumaffigisimanngisaannik taamatut nalimmassaanerat kingunerisartagaasa
ilagaat.
Tupigisuutigivarpullu
Grĝnlandsflymi sulisut ikilisarniannguarlugit aningaasartuutitik sulisuminnut
annertusingaatsiarsimammatigit. Taamaattumik Naalakkersuisunut
piumasaqaateqartariaqarpugut imaattunik. Tassalu aningaasarsiornermut
ilisimasalimmik pikkorissumik inissiiniarlik, kammalaatitik inissitsiternagit.
Ila qassissaamita Inatsisartutigoorlugu oqaatsit taakku annisilerpagut.
Naalakkersuisoq
saqqummiinermini oqarpoq isertitat amerliartorput. Aap isertitat
amerliartorput aammalu suliffissaaleqisut ikiliartorlutik. Tamanna tamatta
nuannaarutigisariaqarparput. Taamaattorli suli suliffissaaleqisunut
tunngatillugu ersarissumik politikeqalernissaq Kattusseqatigiinniit
ujartorusukkatsigu.
Tassami
suliffissaaleqisut piffisami sivisuumi suliffissaaleqisimasut ersarissumik
neqerooruteqarfigisalernerisigut nalunngilara piffissami kingullermi
Aningaasaqarnermut Ataatsimiititaliap akuersissutigai kommunini
suliffissaaleqisunut tunngatillugu aningaasaliinerit kommunit
suleqatigigalugit. Taamaattorli ersarissumik kommunit qanimut suleqatigalugit
suliffissaaleqisunut politikeqalertariaqarnerput anguniartariaqarparput.
Nalunngilarpummi
illoqarfinni sikusartuni ukiup ilaani suliffissaaleqineq piujuartartoq.
Taamaattumik Naalakkersuisut kommunit qanimut suleqatigalugit
suliffissaaleqisunut pikkorissartitsisarlernissaat kissaatiginaqaaq
siunissami ingerlaavartalernissaat.
Aningaasat
akileraarutitigut isertittakkat qujanartumik amerliartorsimapput,
nuannaarutissaapput. Taammattorli ukiakkut assigiinngitsutitigut
akitsuusiisarnerit ingerlasarput, ukiormi naagaangat aningaasat isertitat
naatsorsuutigisaniit annertunerungaatsiartarmata.
Avataaniit
eqquttakkatta avammut tunisartakkatsinnut sanilliutissagutsigit tamatta
nalunngilarput nioqqutissat eqqussagut suli annertuallaartut. Taamaattumik
tunisassiorsinnaanissatsinnik suli annertunerusumik ujartuisariaqarpugut.
Nunatsinni
ullumikkut aningaasarsiorneq qissimissagutsigu oqarsinnaavugut
aningaasarsiornerup qaffassimaarfiani tassa qallunaatut hĝjkonjunkturimik
taaneqartartoq isertitat aningaasartuutillu 1996-imiit 2000-imut 3,9 - 4.
mia.-iniit qaffakkiartorsimasut 4,6 - 4,8 mia.-it akornanngut.
Taamaattumik
Aningaasaqarnermut Naalakkersuisumut apererusunnarpoq aningaasarsiornikkut
qaffassimaarfik ammut aallarpat qanoq aningaasartuutinut tunngatillugu tassalu
isertitat ikilippata aningaasartuutit malinnaatinneqassanersut, tassani
aningaatigut ingerlariaaseq nunarsuarmioqatitta annertoorujussuarmik
sunniuteqarfigimmassuk, taakkua qanoq malinnaatinneqassanersut.
Angallannermut
tunngatillugu pissanngatigaarput Naalakkersuisut 2001-imi siunnersuutigisassaannut
aammalu ineqarnermut tunngatillugu akiliutaasartut
allanngortinneqarumaarnissaat qanoq isikkoqarumaarnersut. Ilanngukkusuppagut
isumaginninnermut suliffissaaleqinermullu tunngasut, aammalu imeq, kiassarneq
kallerup inneranut akiigitat aaqqiivigineqarnissaanut tunngasut.
Namminersornerullutik
Oqartussat aningaasartuutigisartagaasa inissisimaneri Kattusseqatigiinniit
nuannaarutigaavut annertuumik nikingassuteqanngimmata naatsorsuutigisat
tunngavigalugit, aammalu oqaatigerusupparput aningaasaqarneq eqqarsaatigalugu
suli patajaatsumik aningaasatigut ingerlatsinissaq
ingerlatiinnartariaqartoq.
Taamaattorli
Namminersornerullutik Oqartussat suliffeqarfiutaanni ataasiakkaani akiitsut
suli annertuallaanerisa aaqqiivigineqarnissaat suliniuitigeqqullugit
kaammattuutigissavagut.
Tassalu
suliffeqarfissuaq Royal Greenland akiitsuinut tunngatillu Naalakkersuisut
ersarinnerusumik akiitsunut tunngatillugu piumasaqaateqarnissaat
Kattusseqatigiinniit piumasaqaateqarfigerusukkatsigit, tassami
nalunngilarput Royal Greenland akiitsui suli Landskarsip tigoriaannarnik
aningaasaataanik annertuneroqimmata, ullumikkut minnerpaamik 2 mia.-itut
amerlatigimmata.
Royal
Greenland eqqarsaatigalugu taakkartorneqartartut ilagaat nunarsuarmi
aalisakkat tunisassiorfiit annertunerpaanut ilaammat. Aap, tamanna
nuannaarutissaavoq, kisianneqarporli tassa akiitsorsuisa annertussusii. Ila
tupinnaqaaq attartornerinnakkut taamatut angusaqartoqarsinnaammat.
Taamaattorli apererusunnarpoq akiitsui qanoq ilillugit Naalakkersuisut
aaqqiiviginiarneraat siulittaasoqartitsinertik aqqutigalugu.
Suliffeqarfissuit
akiitsui annertunerusumik appartinneqarsimanngillat taamaattorli Naalakkersuisunut
innersuussutigerusuppagut oqaatigiuartakkagut suliniutigeqqullugit.
Nuannaarutigaarput kommunit aningaasaqarnerisa pitsaasumik ingerlaneri. Ersarissumillu isertitat aningaasartuutinut sanilliullugit annertuseriarsimaneri eqqarsaatigalugit. Taamaattumik kommunit aningaasatigut pitsaasumik ingerlanerannut assigiinngitsut soorunami pissutaapput. Ukiunilu tulliuttuni sanaartornerit annertuumik ingerlanneqarnerat neriuutigaagut pitsaasumik pilersaarusiorneqarnikkut ingerlanneqarumaartut, kommunimmi ilaanni sanaartorneq suli pitsaasumik ingerlalinngimmat. Taamaattumik anlĉgsfondip ingerlanneqarneranut tunngatillugu aaqqiinissat piaartumik ingerlanneqarnissaat kissaatigaagut.
Ilami aningaasat 256 mio.-it kommuninut ingerlanneqarsimagaluarpata kommunit aningaasaqarnerinut annertuumik sunniuteqartussaagaluarmata, minnerunngitsumillu kommunini suliffissat eqqarsaatigalugit.
Aap, Nunarput aningaasaqarnikkut ajunngitsumik ingerlavoq. Taamaattorli inissaaleqineq suli ajornartorsiutitta annersaraat. Innuttaasut suli ukiorpassuit utaqqeqqaarlutik inissaminnik tunineqarsinnaalersarput aammalu minnerunngitsumik Namminersornerullutik Oqartussani suliffillit piffissami sivisuumi utaqqiisaagallartumik ineqartitaasarnerat qanoq inuiaqatigiinnut akisutiginersoq nalunnginnatsigu.
Ukiuni
kingullerni aningaasartuutit annertunerusumik appariarsimanerannut
takussutissaqanngimmat 1999-imi utaqqiisaagallartumik ineqartitsinermut
vagantbolinut minnerpaamik 14 mio.-it atorneqarsimammata. Suli ajornartorsiut
taamatut isikkoqarpoq. Ullumikkut ila aaligooq anigaasaqarnerput
ajunngitsumik ingerlasoq. Suli
pissutsit taamaattut akuersaaginnassanerpagut?
Aalisartortatta
tunisassiornikkut tunitsiveqarniarnerata saniatigut tunisamik akiinik
appasippallaarnerat tunngavigalugu Naalakkersuisunut
ataatsimeeqateqarneralui annertunerusumik kinguneqanngitsut taasinnaavagut.
Ila
tupinnaqaaq Naalakkersuisut oqalunnguatuarlutik Nunatsinni aalisarneq
inuussutissarsiutitut pingaarnerpaatut taammaattorli aalisartortatik
tusaajumanngimmatigit tassalu namminneq suliffeqarfissuartik tassalu Royal
Greenland illersorniannguatuarlugu iliuusaat dobbeltmoralskiummata.
Eqqarsarnarpoq
suunuku Naalakkersuisut aamma kikkunukua sullinniaraat. Aalisartortatik
imaluunniit suliffiaatiminnik aqutsisut. Naalakkersuisut ila qaquguuna
pissutsinik piviusunik takusinnaanngorniartusi.
Atuarfitsialak
aallartisarlugu ingerlanneqarlualereerpoq. Taamaattorli oqaatigerusupparput
nunaqafinni suli oqaluffiutigalutik oqaluffiusut qaqugu
aaqqiiviginiarneqarnersut. Minnerunngitsumillu ilinniartitsisussaaleqinerup
akiorniarnerat qanoq aaqqiiviginiarneraat.
Piffissami
aggersumi KNI namminersortunut tuniniarneqarnissaat Naalakkersuisut
anguniarpaat. Pissanngatigaarpullu kikkut pisisussaanersut aammalu
apeqquserusullugu piffissaanersoq suliffeqarfiup aningaasatigut
ingerlalluartup sooq taamak tuaviuutsigalugu tuniniarneqarnissaa? Uffalu
ukiuni aggersuni ukiut tamaasa Landskarsimut aningaasanik nakkartitsisartoq.
Ineqarnermut
akiliutaasartut aaqqiivigineqarnissaasa kingunerisinnaasai qanoq
isikkoqassanersut pissanngatigaagut. Tassami akissakinnerusut annertunerusumik
ikiorniarlugit taamatut iliorniarnissaq eqqortumik pitsaasumillu
kinguneqassanersoq. Tassami ingerlatseriaaseq eqqunneqarpat kikkummita
atornerlussavaat. Aammalu ilinniartunummita assigiinngitsutigut qanoq
kinguneqarsinnaassava?
Naalakkersuisut
taakkartugaat aningaasaqarnikkut aqutsineq sakkortooq ingerlanniarlugu
taamaattorli pingasunngormat maajip aappaani akuersissutigivaat pilersaarut
annertooq tassalu Ilimmarfik aningaasatigut annertoorujussuarmik
inuiaqatigiinnut sunniuteqartussaq. Taamaattorli ikittunnguit iluaqutissaat
apeqquserusupparput. Taamaattumik tungitsinniit oqaatigissavarput
aningaasatigut qulakkiigassat annertuut suli aaqqiivigineqanngitsut suli
Naalakkersuisooqatigiit nalunaarutigimmassuk pilersinneqarnissaanut
amerlanerussuteqarlutik.
Aperusunnarpoq
ukiuni aggersuni aningaasat fondimiittut tamakkerlugit pigineqanngippata taava
kikkut akiliisussanngussanersut aammalu apererusunnarpoq fondit sorliit
atorneqassanersut.
Kattusseqatigiinniit
taamatut oqaaseqarluta Naalalakkersuisut aningaasaqarnikkut ingerlatsineq
pillugu nalunaarutaat tusaatissatut tiguarput oqallinnisamullu ilaanissarput
naatsorsuutissavarsi. Qujanaq.
Ole
Lynge, Inatsisartut
Siulittaasuat:
Tullinnguuttoq
Otto Steenholdt attaviitsoq. Saqqummiisut tamakkereersimalerpata halvtime
pausernissarput naatsorsuutigaarput. Takanna Otto.
Otto
Steenholdt,
attaviitsoq:
Nalunaarusiaq
imartuujuvoq atuarlugu soqutinartunik imalik. Paasiuminartunngorlugu immikkoortortalersugaavoq,
isumaliutissanillu amerlaqisunik tunniussuilluni.
Nunatta
inui ataatsimut isigalugit toqqissiallannarpoq malugalugu suliffissaqanngitsut
ikiliartuaaneri aningaasaqarnitta naammaginakannernera,
sinneqartooruteqalaarluni ingerlalernera.
Siorna
aningaasaqarnerput pillugu oqallinnermi Naalakkersuisut nersualaarsimavakka
oqaatsikkalu ilasimallugit allatut ajornartumik aningaasatigut sukangasumik
ingerlatsineq ingerlatiinnaqqullugu. Nalunaarummi atuarneqarsinnavoq
taamatut aningaasatigut aqutsineq suli ingerlaqqittariaqartoq.
Taamatut
suli ingerlaaseqarnissaq naak pisariaqartuugaluartoq tusarlugu annernarpoq,
ilami Nunatsinni innuttaasut amerlavallaalermata pingaartumik
pissakinnerusunik taaneqartartut, taamatut aqutsinerup eqqugai
amerliartorlutik takussaagaluttuinnarmata.
Ingerlatsinermut
akissaajaatit qaffakkiartuinnarput, naak ukiut tamaasa Inatsisartunit
Naalakkersuisunillu taakkua apparsarneqarnissaat
uteqattaartuarneqaraluartoq.
Takussaasumik
malunnaatilimmillu qanoq iliorfigisariaqalerpoq. Taamaattumik Aningaasaqarnermut
Naalakkersuisoq maanngaaniit inanniarpara ingerlatsinermut akissaajaatit
apparsarnissaat kisiat qulequtsiullugu sulisussamik Inatsisartunullu
siunnersuusiortussamik ataatsimiititalioqqullugu.
Taamatut
inassuteqarnera Naalakkersuisumut nalilillaqquara. Ingerlatsinermut
akissaajaatit annikillisarneranni tamatigut isumaqataaneq ajorpunga
inuussutissarsiutinut tapiissutit sakkortuallaamik ikilisaaffiginiarlugit
oqartoqaraangat.
Tassamii
inuutissarsiutit suulluunniit suliffissanik pilersitsisinnaasut avammullu
tuniniaanitta annertusarnissaanut pingaaruteqarluinnartut kikkunnilluunnit
aallartisarneqaleraangata tapiisarnissaq uanniit pingaartinneqarluinnarmat.
Tassa aallarteqqaarniartut tamatigut imannarsuaq aningaasaateqarpiarneq
ajormata.
Taamaattumik
tamatumunnga atasumik Naalakkersuisut inattorniarpakka inuutissarsiutinut
tapiissutinut ikilisaaniarnerminni suliffissuit kallerup inneranik, imermik
kiassarnermillu pisariaqartitsilluinnartut atuisariaqarnerat paasillugu
erngup, kallerup innerata kiassarnerullu assigiimmik akeqalernissaannik
eqqarsarnerminni qajassuusseqqullugit.
Ineqarnermut
akiuliutit allanngortinneqassapput. Akissaqassuseraasiit aallaavigalugu init
assigiit tassa angeqqatigiit immaqalu assigiinnik isikkivillit
assigiinngitsunik akilersorneqalissapput akissaqassuseq aallaavigalugu.
Taamatut
iliuuseqartarneq tamatigut iluarinartuuneq ajorpoq. Kimulluunniit annerusumik
akiliisussamut pitsaaqutit akitsuutaasimagaangata naammagisimaarneqartarpoq.
Inigisamut akiuliutit inip pitsaassusianik angissusianillu
aallaaveqartariaqarput.
Inissiat
namminersortunit pisortanillu pigineqartut akiisa assigiilersinnaanerat
siunniunneqartoq paasineqarpoq. Qularutissaanngilarlu akikinnerit akiinik
qaffaanikkut tamanna aatsaat anguneqarsinnaasoq.
Sammisani
nutaanik taaneqartuni inuit inuunertusiartornerat Namminersornerullutik
Oqartussanut akissaajaataanerulernissaa qasseeriarluni uterfigineqartarpoq.
Tamatumunnga tunngatillugu suliunnaajaartarneq allanngortinniarneqarluni.
Tamanna ilalersornarpoq, utoqqalinersiuteqalertussanngortummi suli
sulisinnaasut namminneq piumassusiat aallaavigalugu sulisiinnarneqarsinnaanerat
pitsaanerutinneqartarmat.
Eqqaamaqquarali
imaluunniit eqqaamallaqquakka inuit ilaqartuarmata sulerulooreersimallutik
utoqqalinersiuteqalernissaminnullu inatsisit piumasaannut
naammassinnereersimasut suliunnaarusuttullu aningaasatigut sukannersumik
aqutsiniarneq pissutigalugu ajornasaarunneqartalissanngimmata.
Maanimi
oqallinnerit ilaanni utoqqaat amerligaluttuinnarnerisa Landskarsimut
aningaasartuutaavallaariartorneri ajuusaarnartutut nipilerlugu
oqaatigineqarmat akerliliisimavunga, tassa paaseqqullugu peqqinnikkut
allatigullu inuiannut siuarsimasunik taaneqartartunut nallersuutilernitta
tamannarpiaq, tamakkorpiaat ilisarnaatigitimmagit.
Innaallagissap,
erngup kiassarnerullu akii qanga nuna tamakkerlugu
ersoqatigiiffigisariaqartutuut pingaartitassarsimasut assigiinngitsumik
akeqartaalernissaat siunniunneqartoq aamma assigiinngitsunik
isummersorfigineqarsinnaavoq.
Aammalu
nuannersut ilagaat Namminersornerullutik Oqartussat suliffeqarfiutaasa
namminersortunut ingerlatassanngortinniarneqarnerat tamatumunnga
tunngatillugu oqartariaqarpoq, soorluuna pisiffiit pilersuisullu
ataatsimoortillugit avammut tunineqarsinnaanerat aningaasaatilissuarnik
pisisinnaalluartunik ujarlernermi qiviaqqajaaneqarpallaartartut.
Naalakkersuisut
imaalillartoq Nunatsinni liberalistit ukiorpanni oqaasinnaarisimasaasa ilaat
kiisa allanngunngivillugit saqqummiuttalerpaat. Soorlu makku: "pisortat
suliffissui qulangiisimasutut inissisimasut suliffeqarfinnik namminersortunik
pilersitsinissamut killiliisuupput." Ilaa uaguulluni oqariartaaseq
ilisarnaq.
Nuummi,
Sisimiuni, Qaqortumi, Ilulissani, Aasianni kiisalu Maniitsumi niuertarfiit
ataatsimoortillugit tunerusunneqarput. Allalli Pisiffik imaluunniit sisamat
Nanortalimmi, Narsami, Paamiuni Qasigiannguanilu ittut Pilersuisoq A/S-imut
tunniunneqassallutik.
Silatusaarnertut
taajumavara nioqqutissanik annertuumik ataatsimoortitsilluni avataaniit
pisiniartarneq akinut apparsaataalluartartoq aggulunnagu Pisiffiit
Pilersuisullu isumaqatigiissutigissammassuk.
Taamak
oqarpunga annilaanngatilersimagaluarakku nioqqutissanik annertuunik
ataatsimoortunillu pisiniartarfiit immikkuualuttunit tassa aggulutamik
pisiniarfigineqartalissasoralugit, pisiassat akiinik qaffaanernik annertuunik
kinguneqartussamik.
Namminersortunngorsaaneq
kiisami Naalakkersuisunit atuallanneqartoq nunap aningaasaqarniarneranut
pitsaasumik sunniuteqartussaq siusinnerungaartukkulli
aallartissimasariaqaraluarpoq. Kisianni nuannaarluta oqaannarniarta
kingusinaarneq pinngitsuuinnerminngaaniit ajunnginnerusoq.
Peqqinnissaqarfimmik
allanngortitsineq qujanartumik nakorsassaaleqinermik aaqqiiartulereersimavoq.
Ungasissorsuunngitsukkut Peqqinnissaqarfimmut Naalakkersuisoq aningaasanik
sippuisimasoq qajassuunneqarani ajorineqalermat uanga assut illersorsimavara,
aningaasat sippuilluni atorneqarsimasut sulianut eqqortunut
atorsimanerarlugit.
Sippuisaqqullugu
inannianngilara, sippuilernerli piaartumik nalunaarutigiinnarsimagaluarpagu
iluarinerusimassagaluarlugu. Suliniutinik allanik taasat ataanni
peqqinnissaqarfik pillugu nalunaarut aamma iluarisimaarpara.
Suliffissaaleqisut
1998-ip kingorna 35% sinnerlugu ikileriarsimasut qiimaallannarput. Nunatta
avannaani suliffissaaleqineq minneruvoq. Tamatumunnga uanga
pissutaasorisarpara avannaamiut inunnit ilatsiinnartunik assuarisaqartuarnerat
kiisalu aammalu avannaamiut sunilluunniit ingerlataqarusuttarnerat
malunnarluinnartarmat.
Aningaasarsiorneq
suli pitsaanerulissagaluarpoq nunani avatitsinniittuniit eqqussukkagut avammut
tunisatsinnit kisitsisitigut qaangerneqaraluarpata. Kisianni soorluunna
kisitsisaat taakku marluk imminnut qanilliartortut.
Aallaqqaataaniit
oqaatigaara Nunatta aningaasaqarnera ilorfaap tungaaniittutuut taasariaqartoq
suli pitsanngoriartussappat pisariaqartoq ilinniartitaaneq
pitsanngorsaatigalugu inuit suliffissaqaleriartortikkaanni.
Kisiannili
inuit inuunertusinerat siumukarnerup ersersitaa aamma aningaasaqarniarnikkut
ajoraluartumik oqimaarsartitsilereerpoq. Tassa sulisinnaasut utoqqalillutik
sulisinnaajunnaartunit ikinnerulerujartuaarmata, pilersuisut pilersugassanit
ikinnerulerujartormata.
Nunatta
karsiata isertitai qimerlooraanni ersarilluinnartumik takuneqarsinnaavoq
naalagaaffiup tapiissutaannaanerusunit nappateqartugut.
Nuna
namminersortoq imminullu akilersortoq takorloortillugu oqartariaqarpugut
namminersulernissaq ungaseqisoq namminersulerumaarnerpummi nunamut allamut
akilersortissinnaanagu nalunngilluaratsigu.
1980-ikkut
ingerlaneranni Nunattalu akissaarulluni unittuungajannerani nunanit allanit
aningaasarpassuarnik akiitsornissamik pisariaqartitsilersimavoq. Qujanartoq
akiitsut taakku akilersorluaratsigit ikilisingaatsiaqalugillu. Kisianni
aningaasaatitta tigoriaannarnik taaneqartartut akiitsunut taakkununngarpiaq
akilersuutaallutik ikiartornerat iluarinartinngilara.
Nalunaarusiaq
ataatsimut tamaat isigalugu iluarisimaarlugu maanna oqaluttarfimmiit
nalunaarutigaara.
Ole
Lynge, Inatsisartut
Siulittaasuat:
Ottomut
qujanaq. Tassalu aningaasaqarneq pillugu nassuiaammut saqqummiussisut
pereermata oqareernittut unikkallatsiassuugut pisariaqartitsisoqarmat. Tassalu
nalunaaqutaq ataatsimut aallarteqqinnissaq, uumap immikkoortup 12-p
oqaluuserinera nangeqqissavarput.
Ataatsimiinnerput
unikkallarpoq.
-----------
Ataasinngorneq
7. maj 2001, nal, 13.00.
Ole
Lynge,
Inatsisartut Siulittaasuat:
Ataatsimiinneq
ingerlaqqippoq tassalu immikkoortoq 12. 2001-imi aningaasaqarniarnikkut
ingerlatsineq pillugu nassuiaatip oqaluuserinera taamaalillugu
nangittussanngorparput. Siullermik taassumap ingerlaqqinnginnerani immikkut
Inatsisartuni ilaasortat Jakob Sivertsen Atassut aamma Vittus Mikaelsen maanga
sulileqqinneranni tikilluaqquakka.
Immikkoortoq
12-mut oqaaseqarniarlutik nappaasut tulleriinneri malillugit massakkut Aningaasaqarnermut
Naalakkersuisoq, Josef Motzfeldt akissuteqassaaq..
Josef
Motzfeldt,
Aningaasaqarnermut Naalakkersuisoq:
Naalakkersuisut
aningaasaqarnermut ingerlatsinermut nassuaataat oqallisigineqarnerata ingerlaqqinnerani
Naalakkersuisuninngaanniit nalilerparput peqataarusussuseq inimi maani
pigineqartoq allanngortiterinerni nutarterinerni peqataarusussuseq annertooq
takutinneqartoq maluginiarparput. Tamannalu soorunami
qujassutiginngitsoorusunngilara.
Aningaasaqarnerup
ilorraap tungaanut ingerlanera miserratigiumagaanni miserratigiumanngikkaanniluunnit
takussutissat pingaarnerpaaq isumaqarpunga Inatsisartuni tamattaalluta
tulluusimaarutigisariaqagarput tassaasoq ukiut kingulliit ingerlanerini
inuit 500-t suliffissaarusimagaluarlutik suliffeqalersimanerat.
Ukiut
kingulliit ingerlanerini Landskarsip kommunillu akileraarutitigut
isertittagaasa 20 %-it angullugit 100 mio.-it qaangeqalugit
isertitsissutaanersimanerat takussutissaavoq qujanartumik ingerlaneq nammineq
ataasiakkaarluta tanngassimaarutiginiarutsigu taamaaliorsinnaavugut. Kisianni
innuttaasut qinikkat peqatigalugit pilersitserusussusiannik annertuumik
ineriartornerusimasoq Naalakkersuisut tulluusimaarutiginngitsuunngilaat.
Taamaalilluta
aamma innuttaqativut amerlasuut pisortat ikiorsiisarnermut
aningaasaliissarnerinnaanik inuussuteqartut ikiliserujussuarsimavagut.
Inuttut qerattarsimaaruteqarnissaq annertooq innuttaasut amerlasuut imminnut,
ilaquttaminnut inuiaqatigiinnullu napatikkusussusiannik takutitsisoq
nalunaarusiami maani qitiusutut Naalakkersuisut nalilerpaat.
Taamatut
oqareerlunga Naalakkersuisut pingaartippaat misittakkat uaguinnaanngitsut
nunat aamma allat tamarmik misilittagaat najoqqutaralugit ukiut pilimalluni
ingerlaffiit tassaasariaqartut upalungaarsarfiusut ineriartornerup
aningaasarsiornerup killormut mumeriataarsinnaanerannut sillimmatissanik.
Tassuunakkut
innuttaasut atugarissaarnerat atugarissaarnerulersimanerata
allanngorarujussuarsinnaanera pakkersimaarsinnaagatsigu.
Innuttaasut
atugarisaat tassaapput Naalakkersuinikkut qinikkat isumannaatsumik
isumaginiagassaat. Aningaasarsiornikkut ingerlalluarnermi
upalungaarsornermut atorsimanngikkutsigit innuttaasut atugarisaat 90-kkut
aallartinneranni ilungersunangaarsimasut ukiut qulinnannguit matuma siorna
nalaassimasagut qiviaannarsinnaavagut.
Sapinngisamik
innuttaasut imminnut napatinnerminni toqqammavigisassaat isumannaatsut
pilersissagutsigit tassa isumannaarniagassarput.
Arlalinnit
oqaatigineqarpoq akileraartarnikkut pissutsit massakkut killiffiat tassa
nalilersorneqartariaqartoq. Siumut taamak oqarpoq Inuit Ataqatigiit taamak
oqarput Atassutikkut taamak oqarput.
Suleqatigiissitaliornissamik
Naalakkersuisuutitaqartut partiivisa oqaaseqarnerat taanna pissusissamisoortipparput.
Uparuaaginnaqinani Naalakkersuisut akileraartarnermut pissutsit qanoq
iliorniarpaat. Allaanngilaq Inatsisartut nammineq isumaqanngitsut. Tassa
Atassutikkut Kattusseqatigiillu uparuarumavakka aperimmata Naalakkersuisut
taanna qanoq iliorniarpaat?
Namminnerlu
isummaminnik sumilluunniit saqqummiinatik.
Naalakkersuisut
sulisussaapput Inatsisartut suleqatigalugit. Inatsisartut qiimmassaqatigalugit
isumassarsioqatigalugit. Illuinnaanik illuinnaanut piumasaqarneq
naleqquttuunngilaq Naalakkersuinikkut qinikkatut innuttaasunit
qinigaasimagaanni.
Ilaatigut
aamma oqaatigineqarpoq Siumuminngaanniit kommunit akornanni suleqatigiinnerup
annertusartariaqarnera. Tassuunakkut Naalakkersuisut isumaqataalluinnarput
aammali taamatut oqareerlunga, Naalakkersuisut pisussaaffimmisut isiginngilaat
kommunit kikkut sutigut qanorlu iliornikkut suleqatigiinnissaat
naalagaaniutigissallugu.
Pissutsit
taamaatut kommunit aningaasaqarnermikkut inuiaqatigiinnut
kiffartuussinermikkut immaqa uagutsinninngaaniit
ilisimaneruvaat kikkut suleqatissaqqissut imminnut nassaarisinnaanerat. Suut
iluaqutaasinnaasut innuttaasunut nassaarisinnaanerlugit kommunit
namminneerlutik taakkua isumagissagaat Naalakkersuisut naatsorsuutigaat.
Tamatumanili
Naalakkersuisut qiimmassaaqatigiinnissaq aammalu suleqatigiinnissaq soorunami
pisarnermissut peqataaffigissavaat.
Siumukkunniinngaaniit
oqaatigineqarpoq ilaasunik angallassinikkut aningaasat tapiissutaasartut
bilitsinut akikilliliissutaasut 300 mio.-it pallillugit annertussuseqartut
silaannakkut angallasineq pingaarnerutillugu atorneqarsinnanerat
misissorneqartariaqartoq.
Naalakkersuisut
misissuernerput tapiissutinut tunngatillugu qulaajaanerput tamanna ingerlapparput.
Piffissanngoraangat paasissutissat naammattut Inatsisartut pisariaqartitaat
pigileraangatsigit isummerfissatut ilissinnut saqqummiuttarpagut. Aamma
taamaaliussuugut apeqqummi uani pingaaruteqartumi.
Taavalu
partiit arlallit oqaatigisaat usini assartuinermi pissutsik
allanngortitsiniarnermi nunat immikkoortuini assigiinngitsuni
akiuteqartalernissaq taassumap equngassutigisinnaasai maluginiarneqartutut
Inatsisartuninngaanniit Naalakkersuisut qujassutigaat maluginiarneqarmat
aaqqiiniutit massakkut ullumikkorpiaq uani isummerfigineqartariaqanngitsut.
Tassami
Naalakkersuisut siunnersuummik taamaattumik saqqummiinerminnut atatillugu
ingerlaannartumik susassaqartut umiarsuaatileqatigiiffiit tunisassiornermik
ingerlataqartut sulisitsisut tamaviisa tusarniaavigalugi ingerlassimavagut.
Takkulu akissutaat massakkut oqaloqatiginnissutigalugit ingerlappagut.
Kisianni
pisariaqarpoq Naalakkersuisut aningaasatigut nassatarisassaat
isummerfigisariaqarmatigit, 2000 ukioq tullerminngaaniit 2002-mi
aaqqissuussinerit nutaat atuutilissappata ukiortaamiit aningaasanut
inatsisissatut siunnersuupput Naalakkersuisut junip naajartornerani
piareerutsigu tamakku isummerfigereersimasariaqarpagut.
Tassanilu
Inatsisartunit partiinit oqaatigineqartut soorunami najoqqutarissavagut
erseqqinnerutikkusukkaluarpagut. Kisiannili susassaqartunik
oqaloqateqarnerput pingaartipparput. Ilaatigut ikaarsaariarnermi
aaqqiissutaasinnaasutut Naalakkersuisorput eqqarsaaterput oqaloqatiginnissutigisarpullu
tassaavoq nutaamik akilersuisitsineq assartuinermi eqqunneqarpat
nalunaarusiami atuarneqarsinnaasutut raajanik saattuanillu assagissanik
tunisassiat assartorneqarnerata akikilliissutaasoq taanna malugissavaa.
Kisiannili umiarsualivitsigut piareersimannginneq pissutaanerulluni
avannaani qaleraleerniarneq qalerallit avammut tuniniarneranni
aningaasartuutit annikillisussaanngillat.
Taamaattumik
Naalakkersuisut siunnerfigisarput tassaavoq raajat Landskarsimut artornannginnerpaamik
inuiaqatigiinnullu artornannginnerpaamik raajanik assagissanillu tunisassiat
avammukaassornerini akikillissutissaq immaqa taamak
akikillitigitinngikkaluarlugu qaleraleerniarmut ikaarsaariarnermi
oqilisaassutissatut aningaasat ilaat atorneqarsinnaasutut takorloorpagut.
Tassuunakkut
minnerunngitsumik Uummannami Upernavimmilu talittarfeqarnikkut usilersuisarnikkut
containerit qanoq angitigisut tiguneqarsinnaanerinut apeqqutit Inatsisartut
aamma aningaasaliisarnermikkut aaqqitassaat piffissaqarfigisinnaavagut
akikillisaanissamut tamakkiisumut.
Aamma
oqaluuserineqartoq annertooq tassaavoq, ineqarnermut sillimmasiinermut
akikillissutaasartoq boligsikring, taavalu ineqarnermut meeqqanut
tapiissutit taakkua 1980-ikkut naalernerannili oqaluuserineqalersut
massakkut aaqqiissutissaat kusanartoq Naalakkersuisut ataatsimiinnermi uani
saqqummiuttussaammassuk.
Tassuunakkut
akitsuiallannermik eqqorneqartussat tassaassapput innuttaasut 10%-iisa missaat. Pisortat ineqarfiini ineqartut 10 %-iisa missaat,
tassa aningaasarsiaqqortunerpaat.
Naak
kisimiilluni ilaasortap Otto Steenholdtip tamanna upissukkaluaraa
pissusissamisoortutut isigaarput tassuunakkut isertitakinnerusut akunnattunik
isertitallit iluaquserneqarnerunissaat Inatsisartuni ukiuni qulit sinnerlugit
oqaluuserineqartuni siunnerfigeqquneqartoq malillugu Naalakkersuisut
aaqqiissutissamik taamatut siunnersuuteqarput.
Ineqarnermut
tunngatillugu akikinnerusunik ineqaraluartut akisuneruallattumik
aaqqiiviginissaat akisoorujussuarnik nutaanik ineqartut
akikilliallatsinnerisigut. Nammaqatigiinnermik toqqammaveqartoq
mamiasuutigisariaqanngitsoq Naalakkersuisut isumaqarput.
Ineqartut
namminneq pisuussutiginngilaat 1970-ikkunni kvadratmeterimut 6.000 kr.-it
atorneqarallarmata sanaajusimasuni ineqartut nammaqateqassappata ullumikkut
sanaajusartut 15.000-20.000 kvadratmeterimut akeqartunik ineqartuninngaaniit,
ineqartut oqilisaassivigissallugit. Innuttaasut namminneq pisuussutiginngilaat
akit taamatut ineriartorsimaneri.
Aktieselskabinut
tunngatillugu Naalakkersuinikkut ulluinnarni ingerlatsinermut akuliussinnaaneq
mianernartuuvoq. Kisianni oqaatigineqartutuut mattutivinneqartariaqanngillat
innuttaasut qinikkatik aqqutigalugit tamatumunnga sunniuteqarnissaminnut.
Tamanna
aamma atuuppoq, ullumikkut atuuppoq ataatsimeersuartarnerni Naalakkersuisut
Inatsisartuninngaaniit ilaatigut oqaatigineqartut najoqqutaralugit
piumasarisaasut anguniaqqusaasut ataatsimeersuarnerni oqaatigisarpagut.
Kiisalu
Namminersornerullutik Oqartussat selskabit pigisaat ullumikkut qanoq
siunissami ingerlaqqissanersut ajugaaniussutigineqartutullusooq ilaatigut
oqaatigineqarpoq qangali taanna uagut oqaatigisareeratsigu qangarsuarli
pilersinneqarsimasariaqaraluarpoq.
Massakkut
alloriarneq siulleq ingerlanniarsarisarput tassaavoq KNI-mut tunngasoq.
Inatsisartut ilisimassavaat Namminersornerullutik Oqartussat
selskabiuteqarpugut ukiumut 8 mia.-it angullugit kaaviiaartitaqartunik.
Aningaasat
pigisat kaaviaartitat taamak annertutigisut pigitillugit qanoq
inuiaqatigiinnut iluaqutaasinnaanerat
nalilersorluariarlugu nutarteriniarneq taamaattoq aallartinniarneqarpoq.
Immaqali pisariaqarsinnaavoq ukiumi tulliuttumi selskabit ilaat
ingerlanerliortut arlalitsigut uparuartorneqartut taagunngikkaluarlugit
sunarpiaanersut selskabinit ingerlalluartuninngaaniit aningaasanut inatsimmi
oqaasertaliinikkut aaqqiissuteqarfigisinnaanerat eqqarsaataasinnaasut
ilagiisariaqarpaat.
Ingerlatsinermi
aningaasartuutit qaffakkiartuinnarnerat Naalakkersuisunut uparuartorneqarpoq
minnerunngitsumik Atassumminngaanniit aammalu Kattusseqatigiinninngaanniit.
Ingerlatsinermi aningaasartuutinik oqaraangatta inuiaqatigiinnut
kiffartuussinerit inuiaqatigiinnut aningaasaqarnikkut isumannaatsumik
kiffartuunneqarnikkullu isumannaatsumik ingerlatitaanerat pineqartarpoq.
Ilinniartitaanikkut
peqqinnissaqarfimmi ammit akiisigut massakkullu tikinneqartoq aalisakkat
akiisigut qanoq iliorsinnaanerit tassaapput ingerlatsinermi
aningaasartuuteqarnermi ukiuni kingullerni qaffariartortitsisimasut.
Utoqqalisartut
amerliartornerat malugaarput. Utoqqalinersiat 500 mio.-it pallillugit ukiumut
tunniunneqartartut taakkua malussarissarissorujussuupput utoqqalinersiaqartut
amerliartornerannut.
Taamaattumik
tassani inatsisit toqqammavigalugit Inatsisartut pisussaaffitik
puigussanngilaat ingerlatsinermi aningaasartuutinik qaffaajartornermi nammineq
aamma aalajangersakkatik tamatumani toqqammaviummata.
Naalakkersuisut
ilungersorpugut. Allaffissornermi ingerlatsinermi aningaasartuutit
annikillilertuarpagut. Aamma taanna sulisunik ilinniartitseqqinnermi
siornaak siunnersortit PLS-kut siunnersuuteqarnerat aallaavigalugu sulisunik
ilinniartitseqqinnerit Nunatsinnilu pissutsinik naleqqunnerusumik
ingerlatseriaaseqarnissaq anguniarlugu ingerlatsivugut.
Projektsekretariati
tamakkununnga isumaginnittuuvoq. Sulisut akunnerminni samarbejdsudvalgit
suleqatigiinnermut ataatsimiititat aqqutigalugit suut pikkorissarnerit
uiguleriissillugit ukiut ingerlanerini sulisunut atortinneqassanersut sulisut
namminneq aalajangersagaat najoqqutaralugit politiki anguniagassat
aalajangersorneqarput.
Pisortaqarfiit
sinniisartut ilaatigut aamma Atassumminngaanniit uparuarneqarpoq. Taanna
takornartaanngilaq kisiannili missingersuutit pillugit inatsiseqalernikkut
taanna sakkortunerujussuarmik alaatsinaanneqalersimamammat ilisimaneqarpoq.
Ukioq
kingulleq eqqarsaatigissagaanni Landskarsip naatsorsuutai ualimut tikitassavut
aamma taakkunannga takussutissaavoq Naalakkersuisoqarfiit pingasut
atuinerunermik nalaataqarsimasut tassaasut Peqqinnissaqarnermut
Naalakkersuisoqarfik, Ilinniartitaanermut Naalakkersuisoqarfik aammalu
Isumaginninnermut Naalakkersuisoqarfik.
Taakkuupput
Inatsisartut ualimut innuttaasut kiffartuunneqarnerannut ilinniartitsinermullu
aningaasartuutinik akuersissanerluni itigartitsissanerlutilluunniit
isummerfigisassaat.
Aningaasartuutit
amerlaqaat arlariinnik katitigaasut. Aningaasartuutit ingerlatsinermut aningaasartuutit
ilaqarput Inatsisartut qanorluunniit Inatsisartuutigigaluarunik
Naalakkersuisut qanorluunniit Naalakkersuisuutigigaluarunik
susinaanngisaannik akiorsinnaanngisaannik.
Nunarsuarmi
avatitsinnit akiusut uuliamik akiusut eqqarsaatigigutsigit,
napparsimaveqarnermi akigititaasut eqqarsaatigigutsigit tamakkuupput
toqqaannartumik uagut sunniuteqarfigisinnaanngisagut isumaqatigiissutit
toqqammavigalugit nunarsuarmilu akiusut toqqammavigalugit
aalajangerneqartartut.
Kisianni
pisussaaffigaarput Inatsisartuni Naalakkersuisunilu pisussaaffigaarput
sunniuteqarfigisinnaasavut pisinnaasarput tamaat atorlugu ingerlatsinermi
akitsuiartorneq aningaasat pisissutaasinnaaneranut
sanngiilliortitsisinnaasut tamaasa akiorniassallugit.
Taamaattumik
ilivitsukaamik ingerlatsinermut aningaasartuutinut, aningaasartuutit
qaffakkiartornerannut Naalakkersuisut qanoq iliuuseqarsimannginnerannut
oqalunneq eqqortuunngilaq.
Aningaasat
nalikilliartornerannut ukioq kingulleq Inatsisartut akuersipput KNI
Pilersuisup uuliaarniernermut aningaasat isertinnerusagaasa 58 mio. kr.-it
nalingisa innuttaasut ikummatissanik imerpalasunik pisinerminni 58 mio.-inik
akisunerussussaagaluaq taakku atorlugit akikillisaaneqassasoq. Taannalu
tamatsinnut atuuppoq, oqilisaavoq aalisarnermik ingerlanneqartunut,
angerlarsimaffinni kikkunnut tamanut 58 mio.-inik Inatsisartut oqilisaassipput
siorna akuersinermikkut.
Tamanna
Inatsisartut arajutsisimasariaqanngilaat taamaattumik Atassumminngaaniit
uuliap akianik pakkersimaarinninneq Naalakkersuisunngooq annertunerusumik
atorsimasariaqaraluaripput. Tassa pisinnaasagut aningaasat Inatsisartut
aningaasaliuttagaannut inatsisikkut nassaarisinnaasagut tamakkivillugit
oqilisaassiniarnermut atorsimavagut.
Annertuumik
tikinneqartut ilagivaat sanaartornermi iluarsartuussinermilu ajornartorsiutit.
Taanna pingasunngorpaaqqooqaaq tikittussaavarput. Annertunerusumik taanna
uninngaviginianngilara naak partiit arlallit taanna annertuumik
oqaaseqarfigereeraluaraat.
Uani
aningaasarsiornermi naalakkersuinikkut ingerlatsinermi nassuiaammi immikkut
siunissamik samminerusumik oqallinnissaq eqqarsaatigigakku taanna
attullatsialaaqattaaginnassavara. Oqallinnissaq pingasunngorpat pisussaq
arsaartorumanagu.
Atassumminngaaniit
aamma oqaatigineqarpoq sanaartugassanut asuli annertunaagaavallaarujussuartunik
aningaasarlersuisimasugut. Kikkut Inatsisartut? Naalakkersuisut?. Ajornartorsiut taanna
imaannaannngitsuuvoq. Inatsisartut aningaasanut inatsimmi akuersisartuupput.
Sanaartugassat annertussusilerneqarnerat Inatsisartut akuerisaraat.
Kisianni
puigussanngisarput aamma tassaavoq Namminersornerullutik Oqartussat
kisimiilluta sanatitsisuunngilagut, sanatitsisut allat tassaapput kommunit
sanaartugassamikkut annertusaasimasut ukiuni kingullerni. Aktieselskabit
sanaartukkamikkut annertusaasimapput ukiuni kingullerni.
Taamaattumik
ajonartorsiut taanna Nunatsinni mesterit ilumut nammassinnaaneraat imaluunniit
avataaninngaaniit ikiortissarsiortariaqarnersugut akikillisaataasumik
naammassinninnerulernissamik siunertaqarluta, aqaguagu sanaartugassanut
iluarsagassanullu aningaasaliisarneq oqaluuserilerutsigu partiinit
isummersorfigineqarnissaa assorujussuaq uagutsinnut piuminassooq.
Kisiannili
eqqaamasariaqartoq mannaavoq sanaartugassanut aningaasaliissutit
imaaliallaannaq ingerlatsinermut aningaasartuutinut atugassanngortinnissaaq
eqqarsarnartoqartorujussuummat.
Ingerlatsinermut
aningaasartuutit aningaasanut inatsimmi ikkunneqaraangamik nalunngilarputtamatta
peeqqinniarneq qanoq ajornakusoortigisoq. Taamaattumik nassaariniagassarput
eqaannerpaaq aningaasat killeqartut innuttaasunut iluaqutaanerpaamik
atornissaanut aqqutissarsiornissami Inatsisartuni partiit tamaasa
assorujussuaq suleqatiserivagut.
Atassumminngaaniit
annertuumik uparuartorneqarpoq Landskarsip sinneqartoorutissaa 2002-mi 15
mio.-niinnarnik massakkut siunnerfeqarneq.
Aningaasanut
inatsit ukioq manna atuuttoq ukiarmi novemberip aqqarnganioqqooqaaq akuerigatsigu
2001-imut Landskarsi 35 mio. kr.-inik sinneqartooruteqassasoq akuerineqarpoq.
Tassungalu ilanngullugu ukiuni missingersuusiorfiusuni 2, 3, 4-milu 15
mio.-inik sinneqartoorutissatut anguniagaqarnissaq inimi maani tamakkiisumik
akuerineqarpoq. Aamma
Atassutikkut akueraat.
Kisianni
isumaqataavugut qujasariaqarpunga oqaaseqartunut sinneqartooruteqarnissamik
kiisami Landskarsip perngartamik ukioq manna anguniagaqarluni
aalajangiussisimanera suli annertunerusumik sinneqartooruteqarnissamik
anguniagaqaqqusilluni oqariartuutit Naalakkersuisut tusaavagut.
Aamma
taanna pillugu aningaasanut inatsisissami sulinitsinnut ilungersuuteqarpugut.
Illuatu-ngaanili oqimaaqatigiissaariniarnermut tassaavoq Inatsisartut
aningaasaleqqullugit kissaatigisaat matussutissaqartinniassagutsigit
aningaasat sillimmatitut naammaqqartut pigisagut qarajarnaveersaartariaqaratsigit.
Taamaattumik
aningaasat aningaasartuutaanerusutut kissaatigineqartut Atassutikkunnik Kattusseqatigiinnillu
tamanit matussutissaqartissagutsigit taanna oqimaaqatigiissumik aningaasanut
ingerlatsinermi akuerisimasarsi Inatsisartut akuerisimasaat taanna
atorneqartariaqarpoq.
Aningaasartuutiginerusassanut
nutaanut nassaarutta aningaasanut matussutissanik peqartariaqarpugut.
Tassani aningaasat tigoriaannartut sillimmatit isumalluutigineqassanngillat.
Taamaammat
Naalakkersuisut asuli annertulaagaavallaariniaannarlutik sanaassanut ikkussisimanngillat
pisariaqartitsineq annertoqimmat inuiaqatigiinni taamatut aningaasaliinissamut
siunnersuupput Inatsisartuni akuerineqarpoq.
Ajornartorsiulli
alla tassaavoq naammassinnissinnaaneq sumiittoruna taanna aqaguagu saqqummiussinermi
saqqummiunneqassooq. Sumiuna ajornartorsiuteqartugut maani pilersaarusiornermut
ajornartorsiuteqarpugut. Sanaartornermi ingerlatsisut Inuit
Ataqatigiinninngaaniit oqaatigineqartutut nuttarsinnaanera
ajornartorsiutaava? Tamakkua nammineq aaqqiiniutissanik tikkuagaqartariaqarpugut
uparuaaginnarata tassuunakkut Naalakkersuisut arfineq marluinnaavugut
partiitsinnit illuatungiliuttunit nerlersorneqarnissanik isumassanik
ujartorparput.
Inuiaqatigiit
ataatsit ataatsimoorullugu sulissunniarpagut ajortussanik ujarliinnarluni
kingumut sammisunik Naalakkersuinikkut sulisoqarsinnaanngilaq. Tikkuussinissat
uparuartuinerinnaanngitsut aqqutissanilli tikkuussinerusut takorusuppagut.
Ukiualuit
qaangiuppata aningaasaqarnikkut nammineerniarneq Daniel Skiftip oqaatigisaa
ukiualuit taakkua ukiulerneqanngisaannarnikuupput.
Taamaattumik aamma Daniel Skifte isumalioqatigiissitami ilaasortaavoq.
Isumalioqatigiissitap
isumannaatsumik qulaajaalluarnermigut saqqummiutassai Naalakkersuisut aamma
Inatsisartut sinnerisa utaqqivaat. Tassuunakkut tikkuunneqarumaaratta
pissutsinuku qanoq ittut ikaarsaariarnerit qanoq sivisutigisut
isumalioqatigiissitap tikkuussiviginiarai.
Suut
anguniarneqarnersut tikkuartornagit uparuartuutit annertunerusumik
uninngaviginianngilakka. Aalisarnermut pissutsit ullumikkorpiaq
atuutilersimasut minnerpaaffiliinissamik akinik minnerpaaffiliinissamik
oqalunnerit imaaliallaannaq Naalakkersuisut kisimiillutik isummerfigisinnaanngilaat.
Illuatungaani
ingerlatsinermi annikillisaaqqusillutik Inatsisartut illuatungiliuttut
minnerunngitsumik oqaluutigalutik aningaasartuutinik imaaliallaannaq
Naalakkersuisunut piumasaqarsinnaanngillat aningaasartuutit matussutissaanik
tikkuagassaqanngikkunik.
Taamaattumik
qujanarpoq Inuit Ataqatigiinniit Siumumiit tikkuartuiffigineqarmata
aalisarnikkut pissutsit massakkumut atuuttut tamakkiisumik
naliliiffigineqartariaqarput. Pisassavut nalunngilagut qanoq annertutigisut.
Aalisarsinnaassuserput qanoq annertutigisoq nalunngilarput. Tassani pineqartut
tassaasariaqarput tunisassiornermik pissutsit suut piumavagut.
Umiarsualiisarnerit nunami Inatsisartut aningaasalersugaannik tunisassiorfiit
sananeqarsimasut taakkua aallunnerussavagut. Sinerissap qanittuani
aalisariutit ullumikkut 36.391 tonsinik pisassinneqarsimasut tamakkiisumik
pisaqarsinnaanerat isumannaarniassagutsigu Inatsisartuni aningaasarlersuisarsimasut
aamma aningaasalersueqqinnissami piareersimasut peqataaffigisariaqarparput
aalisarnerup inuussutissarsiutaanera tamakkiisumik oqaloqataaffigissallugu,
tunisassiorfinni suliffissuarni pissutsit ilanngullugit.
Kiisalu
Atassutip siulittaasuata oqaaseqartuulluni oqaatigisaa aamma tassaavoq
kiffartuusseqatigiinnissami selskabinut NUKA A/S-ikkunnut Royal Arcticip
nunaqarfinnut isumaginnittuinut KNI Pilersuisukkunnut tamakkununnga
isumaqatigiissutigisimasavut ilumut siunertaminnut atorneqartarnersut taanna
qularineqarluni, qulaajaqquneqarpoq.
Eqqaamanerlunngikkukku
Inatsisartut Kukkunersiuinermut Ataatsimiititaliaani Daniel Skifte
ilaasortaavoq. Tassanilu tusarniaavigineqarninni ukiup kingulliup affaata
ingerlanerani Kukkunersiuinermut Ataatsimiititami oqarpunga nakkutilliineq
annerusoq ullumikkorninngaaniit piumaneqarpat
Naalakkersuisunut akornutaanngilaq kiffartuusseqatigiinnissamut isumaqatigiissuteqarnermut
isumaqatigisaq selskabit piumaffigissallugu ukiumoortumik akiliutit taava
tassanngaaniit naammassisaqarsimaneq kingumut piumasarissallugu
Naalakkersuisut piareersimasut.
Aamma
tamanna ilisimareerparput Royal Greenlandip peqassutsimut
naammassinnissinnaanermullu naleqqussaaneranut aningaasaliigatta.
Ukiumoortumik imaluunniit ukiup qeqqanoortumik nalunaaruteqartarput ilumut
aningaasat taakkua siunertamut atorneqarsimanerpat, naammassisassat suuppat,
taanna ajornaquteqanngilaq.
Taava
apequtigineqarpoq Naalakkersuisunngooq qanoq akileraarutit aaqqinniarpaat.
Tamanna Atassummiit Kattusseqatigiinniillu aperineqarpugut. Tassunga
tunngatillugu Siumukkut Inuit Ataqatigiillu oqaaseqartuisa
isumalioqatigiissitaliornissaq qulaajaasussamik akileraarutitigut
aaqqiissutissat suut innuttaasut atugaannut oqimaaqatigiinnerusumik
naammassinniffiusussat takuneqarsinnaanersut. Naalakkersuisut tamanna
naammassiniassavaat.
Ullumikkut
isertitaqassuseq najoqqutaralugu nalimmassaariniarnermi ineqarnikkut
aaqqiiniutissat Ineqarnermut Naalakkersuisumut Isumaginninnermullu
Naalakkersuisumut piffissami qaninninermi saqqummiunneqartussaapput
imaannaanngitsut, tassuunakkullu aamma Inatsisartut isummersornissaminnut
periarfissaqassapput.
Ilumut
atugarissaartutut Nunatsinni maani oqaatigineqarsinnaanersugut
Atassumminngaaniit apeqquserneqarpoq. Atugarliortut suli amerlaqimmata.
Tamanna ilisimaneqarpoq.
Taamaakkaluartoq
nunarsuaq ataatsimut nunaqarfittut isigigutsigu nunaqarfik manna Kalaallit
Nunaat atugarissaarfittut oqaatigineqartariaqarpoq.
Tamatigut
sanngiinnerusortaqarpugut taakkuuppullu asuli tusarnersunik
oqaluffigiinnarnagit sullinniagassat akileraarutitigut ineqarnikkut
aaqqissuussiniarnertigut. Suliffissaqartitsinikkut isumannaatsumik ilaqutariit
atugaqarnissaat qinikkat susassaqarfigaat.
Ukiumiit
ukiumut pilersaaruteqartarnerit Naalakkersuisut qimappaat. Massakkut ukiuni
tallimani sanaartugassanut tulleriiaarisarnissaq pisariaqarpoq. Ukiullu qulit
15-t anginerit suut ukiuni qulini 15-ni tulliuttuni anginerit isumannaagassat
erngup nukiliorfiuppata allatigulluunniit annertuunik sanaassaappata,
pilersaarutit taamaattut Naalakkersuisut Inatsisartunut saqqummiuttalissavaat,
taamaalilluni ullumimiit aqaguinnarmut isigineq aningaasarsiornermi
kiputitserujussuartartoq qimanneqassammat.
Aalisartut
piniartut sooq atugarliorpat? Atassutip oqaluttua aperivoq. Tuniniaanermi akit
1995-imioqqooqaaq Royal Greenlandip nammineq akilersinnaasumik
ingerlanneqarsinnaasut qaleralinniarneq, assagianniarneq raajarniarnerlu
tiguai taakkulu nunarsuarmi akiusut najoqqutaralugit akilersorneqartalissasut
Inatsisartuni akuerineqarpoq, NUKA A/S-imut tunngasut immikkoortillugit
inuiaqatigiit pisussaaffiisut isumagineqartussanngormata.
Massakkut
pissutsit nunami maani nammineq pisuussutiginngisatsinnik annertuumik toqqammaveqartut
atuutilersimapput, tassalu taanna sapaatip akunnerata uumap ingerlanerani
qanittoq isigalugu aaqqiiffiginiagassatut Naalakkersuisut neriorsuutigisaat
tassanngaaniillu partiinit aamma oqaatigineqartutuut ungasinnerusoq
eqqarsaatigalugu strukturi qanoq ittoq aaqqissuussinermi pissutsit qanoq
ittuunissaat aaqqittariaqarparput.
Nioqqutissiortunik
akiliinerlunneq aalisarnerup aaqqiissuteqarfiginissaanut ajornartorsiutaasoq
oqaatigineqarpoq. Akiliinerlunneq nunarsuarmi akiusuni toqqammaveqarluni
naatsorsueriaaseq upperinngikkaanni upperineqassanngilaq. Kisianni
Naalakkersuisut toqqannartumik aalisakkat akiinut
isumaqatiginninniartartuunngillat.
Kisiannili
ilisimaneqartutut aktieselskabi piumasaqarfigissagutsigu ima imatullu
akilersuisitsissuusi pisiassasi raajat pisiassasi qaleralli ima
akilissavasi, nalunngitsorsuullugu ajunaaruteqarnermik kinguneqartussaasut.
Naatsorsuiffik, ulloq naatsorsuiffik takkuppat aktieselskabit siulersuisui
pissaaneerutitaasimasutut isikkullit nalunaarusiussapput ajunaaruteqarpugut
160 mio.-inik assersuutigalugu 160 mio.-inik piginnittut ilissi
naalakkiinissigut ajunaartoorutigut taamatut annertutigipput akilerniarsigit.
Taava Inatsisartunukassuugut 160 mio.-inik qinuartorluta.
Ajornartorsiutit
ajornannginaarivallaarluni uparuarneqartarnerat nammineq ilisimatusalaarsinnaanermut
misissuilaarsinnaanermik piusaqartut Naalakkersuisut takorusunneruvaat
taamatut uparuartuinerminngaaniit.
Sinnattuaqisoq
uppernassuseqartumillu takutitsinngitsoq una nalunaarusiaq aningaasaqarnikkut
ingerlatsinermik nalunaarusiaq Atassumminngaannit oqaatigineqarpoq.
Pitsannguutissanik Atassutip tikkuagaa ataatsimilluunniit ajoraluartumik
Naalakkersuisut takusassaqanngillat. Ajorpoq, ajorpoq, ajorpoq, ajorpoq.
Taamatut Naalakkersuinikkut sulisoqarsinnaanngilaq
illuatungiliuttuugaluaraanniluunniit.
Killeqanngitsumik
unammilleqatigiinneq Nunatsinni ilumut tamakkiisumik atuutsinneqassanersoq
oqaaseqartut ilaanninngaanniit Asii Narup Ghemnitziminngaaniit
oqaatigineqarpoq.
Ilumoorpoq
tamakkiisumik taamatut ingerlatsisoqarsinnaannginneranut NUKA A/S-eqarnera
takussutissaavoq. Tamakkiisumik niuernikkut nukiit iperarlugit
naalaganngortinnissaannut Nunarput tulluanngimmat 260 mio.-it angullugit
angallassinikkut inunnik assartuinermik Inatsisartut tapiissuteqartarput
unammissutigineqarsinnaanngimmata.
Tamatigut
uppinnaveersaarluni mianeralugu Nunatta qanoq annertussusaa inuit qanoq
ikitsiginerput arlaanut uppikarnaveersarluni napaniarneq tassani sulinermi
qitiusariaqarpoq.
Immikkut
Nunatsinni pissutsi ittut mianeralugit ingerlatsineq
ingerlateqqittariaqarparput. Allanik issuagassaqanngeqaagut. Nunarsuaq
qanorluunniit angitigigaluarpat Nunatsinnitut ittumik Nunatsinnut
innersorneqarsimasunik pissaaleqivugut. Aqqutit nutaat nammineerluta
nassarniallaqqissutsitsigut anigorniartariaqarpagut.
Kiisalu
innuttaasunik sulisinnaanngortitseqqinniarneq siorna kommunit kattuffiannit
isumaqatigiissuterput najoqqutaralugu aallartinneqarpoq massakkut
ataatsimiinermi uani Isumaginninnermut Naalakkersuisup saqqummiuttussaavaa
qanoq siunnerfeqassanersoq. Taassumap saniatigut Inatsisartut ukioq mannamut
mio.-inik arfinilinnik atugassiipput ukiup qanoq ilinera najoqqutaralugu
suliffissaaruttartut nangeqattaartumik uiguleriiaakkanik piginnaasaasa
qaffassarnissannut atugassanik.
Taannalu
oqaatigineqaraluarpoq kommunit suleqatigalugit suliniut suli
aallartissimanngitsoq Kattussetigiinniit uparuarneqarpoq. Kattusseqatigiit
aamma Aningaasaqarnermut Ataatsimiititami ilaasortaqarput. Tassanilu
ilisimassavaat massakkut kommunit suliffeqarfiillu pineqartut suleqatigalugit
pilersaarutit qanoq ingerlanneqartut. Aqqut nutaajuvoq taammaattumik ukioq
siulleq misileraavittut atorpaat Naalakkersuisut ukiut ungasinnerusut
eqqarsaatigalugit qanoq tamakkiisumik aaqqiissuteqarnissaq. Isumaqatigiissutit
aningaasalersuinerit qanoq issappat? Kikkut peqataasappat? Suut
pikkorissaanerni piginnaanngorsaanerni siunnerfigineqassappat? Taakkua
susassaqartut tamaasa akuutillugit aaqqinneqassapput.
Kiisalu ilinniartitsinitsinni ullumikkut suut aallunnerussanerigut Inuit Ataqatigiinninngaanniit oqaaseqarfigineqarpoq. Taanna Ilinniartitaanermut Naalakkersuisup akissuteqarfigissagaa naatsorsuutigaara. Kisianni una ilumoornerarsinnaavara, ullumikkut Nunatsinni inuit 56.000-iulluta inuit sulisinnaasut qassiusut nalunngilagut. Suliffiit ingerlanneqartut kikkunnit ingerlanneqarpat.
Taakkua sulisut sunik ilinniagaqarsimanissaat piumasaqaataava. Taamatut misissuinissaq pisariaqarpoq aammalu Sulisoqarnermut Pisortaqarfimmiit Inatsisartut akuersinerisigut tamakkua qulaajaavigineqarnerat annertuumik ingerlanneqarpoq.
Taamaattumik soorunami erinitsattarpugut pissutsit aaqqinniarnerat ataasiinnanngorlugit isigileraangatisigit. Kisianni ajornartorsiut ataasinnaanngilaq. Ajornartorsiutit qaangerniagassat unammisassat tunniutiinnarfiusussanngitsut, taamatut isigalugit suliarissavagut aqqutit nutaat ujaatigalugit ingerlavugut tassuunakkullu isummasi tamassa atorfissaqartippagut.
Taavalu sanaartornermut tunngatillugu suliariumannittussarsiuussisarnermut tunngatillugu Nunatsinnut naleqquttumik pissarsiniarnissamut pilersitsinissamik isumalioqatigiittunik tassunga Sanaartornermut Naalakkersuisoq akissuteqassasoq naatsorsuutigaara, isumaqatiginarpoq.
Sulerusussuseq Nunatsinni pilersinneqassappat suliffinni ataasiakkaani suleqatigiiaat ataatsimiititaliaat peqatigalugit taanna nammineerluni taakkunani ingerlanneqartariaqarpoq. Imminut piumaffigineq annertunerusariaqarpoq aalisartuugutta, piniartuugutta, sulisartuugutta Naalakkersuinikkulluunniit suliaqarutta tamanna pukuttutsinniitittuartariaqarparput.
Kiisalu Nunatta Nunatsinni nammineq nunatut naatsorsuuteqalernissamik Inuit Ataqatigiit sinnerlugit Asii Ghemnitz Narup ujartugaa taanna ilumoorpoq. Naalakkersuisut taanna sulissutigalugu danskit naalakkersuisuinik ukioq martsimi kingullermik Aningaasaqarnermut Ministerimik naapitaqarnitsinni eqqartorparput, isumaqaratta aamma taanna Danmarkip susassaqarfigigaa.
Danmarks statistikki attaveqarpoq nunani assigiinngitsuni qanoq nunat naatsorsueriaasiat pitsaanerpaaq nassaarineqarsinnaanersoq. Massakkullu Naalakkersuisuni taanna pilersaarut suli unitsinngilarput 2-5 mio.-it akornanni akeqassooq ukiuni marlunni pingasuni, taassumap piareernissaa, taannalu aasaru danskit Aningaasaqarnermut aammalu Aningaasarsiornermut Ministerii, arnarsuit marluk tikippata taakkuninnga aamma oqaloqatiginninnerput nangeqittussaavarput.
Naalagaaffiup Nunatsinnut aningaasaliuttagaanut tunngatillugu isumaqatiginninniarnerni taareerpagut taamanikkulli piareersimasuutit paasissutissat amigarmata qaangiinnarneqarallarpoq.
Nunarsuaq inuppalaarnerusoq tamatta taanna perusoqaarput. Aamma taamaammat uani nukiit ajortitsiniarnerinnarnut atornagit, isummat katersuuffissaannik Naalakkersuisut peqataarusukkamik matumuuna nalunaarutigissavaat. Tassunakkullu Inuit Ataqatigiit oqaaseqartuat qutsavigaarput isumassamik taamaattumik Inatsisartunut aamma tunniussimmat.
Imminut napatikkusussuseq inuiaqatigiittut imminut napatikkusunneq tassaasariaqarpoq sulinitsinni pingaartitarput. Aningaasatigut upalungarsimanissaq puigornagu.
Kattusseqatigiinnut annertunerusumik oqaaseqarnanga tupigilaarakku oqaatigiinnassavara anguniakkat piviusunngortinneqassanersut ukiarmi Inatsisartuni ammaanermut tunngatillugu Naalakkersuisut Siulittaasuata oqaasiinut tunngatillugu Kattussseqatigiit akuerseqataareersut, ilalerereersut massakkut peqataanissaq avataanut ingillutik pissanngatigivaat tamakkua anguniakkatut aalajangersorneqartut, saqqummiunneqartut ilumut piviusunngortinneqassanersut. Aamma taamatut qinikkatut ingerlakkusukkaanni nammineq taanna akisussaaffiuvoq.
Kiisalu suliffissaaruttunut politikeqannginneq Kattusseqatigiit ujartorpaat siusinnerusukkut oqaatigeriikkakka oqaatigiinnassavakka Inatsisartut akuersinerisigut sanaartornermi iluarsaassinissamilu aningaaasarpassuit atoneqartut ilaat ilinniartitsinernut ukiup qanoq ilinerani suliffissaaruttartut taassumap saniatigut ilinniartitsinerit, ilinniagaatsunut suliffeqareeraluartunut, ilinniagaatsunut pikkorissaanerit annertuut Inatsisartut akilersugaat ingerlanneqareerput.
Kiisalu akiitsut selskabininngaanniit taarsigassarsiaasimasut akiitsut akilersornerannut qanoq Naalakkersuisut iliuuseqarnersugut, Naalakkersuisut selskabinit oqaloqateqarnerput Naalakkersuisoq pisussaqarfik tamakkununnga attuumassuteqartut oqaloqatigineqarnerat ingerlaavarpoq.
Tassanili aalisartunut akiliisinnaassuseq selskabi Royal Greenland eqqarsaatigissagutsigu qissimigaanngitsoortariaqanngilaq sinneqartoorutit piumasarisassagut qanoq sakkortutigitissavagut. Kisianni pingaaruteqartoq tassaavoq Royal Greenlandikkutut ittut aningaasarpassuarnik taartissaqarnerat Naalakkersuisut aamma qaangerniarlugu suleqataammata.
Tassuunakkulli Royal Greenlandi aningaasatigut nunarsuarmi pissutsinut kalluarneqarnera qanoq iluarsiivigineqassanersoq pisariaqassappat Inatsisartunut eqqartorneqarsinnaavoq.
Inissaaleqineq eqqarsaatigalugu Inatsisartut qujanartumik aaqqissuussinerit inissialiortitsinermi assigiinngitsut ingerlappaat 10/40/50, Illorput 2000, piginneqatigiilluni illuliaasartut aammalu taakkua saniatigut 60/40 inissialiat aamma taakku ingerlanneqarput.
Utaqqiisaagallartumik inissiisarnerit minnerunngitsumi illoqarfissuarmi maani Nuummi ajornartorsiutit qaangerneqarsimanngimmata nammineq Naalakkersuisut siulitta Ineqarnermut Naalakkersuisuusumut isumaqatigiissutaa najoqqutaralugu inissiat 100-it qimakkaangatsigit 60-it taamaallaat tigummiinnartassagigut.
Taassuma atornartorsiutaanera suli atuuppoq, kisiannili Inatsisartut akuiersisimapput inissiat 70-it missaaniittut sulisunut inissiaasussat sananeqassasut. Taassumap saniatigut Nuup kommunia aamma sulisuminut inissianik sanaartugassanik annertuumik aningaasaleereerpoq.
Otto Steenholdtimut sipaarniarnermik siunertaqartumik ataatsimiititaliornissaq taanna Inatsisartut partiivinut isummersorfigissagaat naatsorsuutigaara.
Kisianni Inatsisartuni pisussaaffik Naalakkersuisunilu pisussaaffipput tassaasariaqarpoq inuussutissarsiutinik ingerlataqartut atugarisaasa pitsanngorsarnissaat tassa uagut isumagisassarput.
Aningaasartuutinik annikillisaaniarneq aamma innaallagissamut imermut aalisakkerinermi suliffissuit massakkut 58 ĝremioqqooqqaaq kallerup inneranut imermullu 2,00 kr.-i sinnerlugu immaqa 5,00 kr.-ip missaannaani akiliisarnerat uagut innuttaasunut 21,00 kr.-i sinnerlugu akeqarpoq kubikmeterimut.
Taassuma mianerineqarnissaanik, isumaliutigilluarneqarnissaanik Otto Steenholdti oqaaseqarpoq. Eqqaamassavarput taakkua tapiissutaammata tapiissutillu, imaluunniit akikilliliinerit annertusiartortissagutsigit innuttaasut ilaqutariit inissiarsuarni ineqartut, nunaqarfinni ineqartut tamarmik akiliinerunissaanik tamanna kinguneqartussaammat ilumoorpoq eqqarsaatigilluartariaqarpoq.
Kiisalu Otto Steenholdtip nuannarisagaa liberalistinik oqalunneq, massakkut Naalakkersuisut isumaqarput piareersarluareerluni, immaqaluunniit oqartoqarsinnaavoq piareersaatit suli amigartut, innuttaasut susassaqarfii ingerlatsivissuit qangarsuarli tunineqareersimasussat Otto Steenholdti ilaliullugu oqaluttarnerat Naalakkersuisut pissusissamisoorsorinngilaat. Misissuilluaqqaarnerit kalluaasussanut qanoq kinguneqarnissaat sukumiisumik misissorneqarnissaat Naalakkersuisut pingaartikkamikku Inatsisartut akisussaaqataatillugit. Inatsisartut innuttaasunut qinersivinni nassuiaanissaannut nassuiaassutissaannik tunioraatigalugit nikikkiartornerit taakku ingerlappagut.
Kiisalu Otto Steenholdtip sinniisarnerit upissuppai taanna oqaaseqarfigereerpara. Taavalu nunap immikkoortuini kikkut eqeersimaarnerunerinik patsiseqarluni kikkut suliffissarunneri annikinnerunerinik oqarnera immaqa ikkappallaalaartumik oqaatigineqartutut uparuaannassavara. Tassami periarfissat pinngortitarsuup periarfissarititai tamakkua naalagaalluinnarmata sumi suliffissarissaarnermik sumilu suliffissaaleqinerup annertuneruneranik.
Taamatut oqaaseqarlunga oqaaserineqartut manna tikillugu Aningaasaqarnermut Naalakkersuisutut oqaaseqarfigaara, naatsorsuutigaaralu Naalakkersuisut ataasiakkaat susassaqarfimminnut aamma oqaaseqarumaartut.
Ole Lynge, Inatsisartut Siulittaasuat:
Aningaasaqarnermut Naalakkersuisumut qujanaq. Ingerlaqqitsinnanga una eqqaasitsissutigilaavinnassavara 2000-imi sanaartornermut iluarsaassinermullu aningaasaateqarfik pillugu nassuiaat ataasinngorpat tulliani maajip 14-iani oqaluuserineqartussaammat tamakkiisumik.
Tassa tullinnguuttut allannguuteqalaarsimapput oqaaseqartussat. Siulliussooq Mikael Petersen Siumup oqaaseqartua.
Mikael
Petersen, Siumup
oqaaseqartua:
Qujanaq.
Tassa saqqummiussara siullermeerama naallugu naaqqilaarniarpara aallaqqaammut.
Tassa aalisarnikkut pissutsit tikillugillu piffissaq naammat
unittariaqarsimagama taannalu saqqummiutissavara siulliullugu.
Ullumikkut
sineriak tamakkerlugu aalisarnikkut pissutsit ullumikkut 2001-ip
aasariartornerani killiffiusut aalisartunuinnaanngitsoq inuiaqatigiinnulli
tamatsinnut ilungersunaannaratik illoqinarsisimasututut Siumumiit
oqaatigisariaqarpagut.
Aalisartut
tunisassiortullu akornanni imaalitsiaannarlugit ataatsikkut
aaqqinneqarsinnaanngitsunik allaallumi killiffiusoq ima erloqinartigisutut
Siumumiit isigaarput allaat Naalakkersuinikkut aaqqiisoqarnissaa
pisariaqalerluni.
Eqqaamassavarpulli
aalisarnermik inuussutissarsiuteqartut tamavimmik matumani pineqanngimmata,
pineqartulli tassaanerullutik sinerissap qanittuani raajarniat aammalu
qaleralinniarnermik ingerlataqartut.
Ajornartorsiutit
erloqinarsisut tassaanerupput ukiortaamiit tunngaviusut appariarujussuarsimanerat,
tassaasut aningaasarsiornikkut aalisartunut tunngaviusut
appariarujussuarsimanerat. Ilaatigut allaat agguaqatigiisitsinermi
sinerissamut qanittumi isertitaasartut 34 % angullugu appariarsimallutik.
Aammalu
ukiuni massakkut arlaqalersuni tunitsiveqarniarnikkut ukioq kaajallallugu
ajornartorsiuteqartuarluni.
Siorna
2000-mi maajip 17-ianni aningasaqarniarnikkut ingerlatsineq pillugu nalunaarut
maani inimi oqallisigigatsigu Siumumiit imaattunik oqaaseqarpugut,
uteqqilaassavakka, "Ullumikkut aalisarnikkut pissutsit annertuutigut
ajornartorsiuteqarfiupput sineriapput tamakkerlugu, ilaatigut
akueriuminaalluinnartunik. Minnerunngitsumik aalisakkanik
suugaluartunilluunniit raajanillu tunitsivissaqarniarnikkut
ajornartorsiutaasunik. Aammalu aalisartut aalisakkanillu pisiortortut
akornanni ajornartorsiutaasunik aallaaveqartunik.
Taamaattumik
Siumumiit Naalakkersuisut kaammattussavagut aalisarnikkut
ajornartorsiutiviusut aaqqiiviginiarlugit aalisartut tunisassiassanillu
pisiortortut akornanni oqaloqatigiinnerit toqqissisimasut aallartisarnissat
isumageqqullugu kommunit pineqartunut attuumassuteqartut peqatigalugit.
Taamatummik aalisarnikkut ajornartorsiutit ingerlaavartinneqaannassappata
inuussutissarsiutitta pingaarnersaata isumannaatsumik ingerlaniarnera
ajornakusoorsigaluttuinnassammat pisuuteqattaannerit annertusiartortillugit.
Taakkualumi
uteqqillugit matumuuna massakkut Naalakkersuisunut kaammattuutigeqqippagut.
Aalisarnikkut suliffissuaqarnikkullu ajornartorsiutaasut annertoorujussuupput.
Taamaattumik aaqqinniarlugit immikkut qanoq iliuuseqarnissaq
avaqqunneqarsinnaanngilaq.
Taamaattumik Siumumiit Naalakkersuisunut makku kaammattuutiginiarpagut.:
Aalisartunut
matumani ajornartorsiornermut eqqorneqartunut aaqqiissutaagallartussanik
qanoq iliuuseqassasut. Aningaasaannaat eqqarsaatiginagit. Kisiannili aamma
qanoq iliuusaasinnaasut oqilisaassutaasinnaasut allat eqqarsaatigalugit.
Aalisarnermi
aammalu aalisarnermut attuumassuteqartutigut inatsisit atuuttut tamarmik ukioq
maannamiit aallartittumik naleqqussarneqassasut nutarterneqarlutillu.
Royal Greenland A/S-imut isumaqatigiissutip maani inimi oqallisigineqartuartup maannakkut suli ukioq mannamut 50 mio. kr.-inik aammalu aappaagumut 48 mio. kr.-inik aningaasartaqartup allatut siunnerfeqartumik aaqqiivigineqarnissaa piaarnerpaamik Naalakkersuisut sulissutigilissagaat.
Nunatsinni
aalisakkanik tunisassiorneq annertusarneqassasoq aalisakkat qaqinneqartartut
tamaasa iluaqutigineqalernerisigut, aammalu tamatumunnga atatillugu Nunatsinni
aalisakkerinermik ilinniartitsineq ATI-mi Maniitsumi nutaamik aaqqissuunneqassasoq,
suliffeqarfiit aalisakkerinermik ingerlaqartut suleqatigalugit
aningaasaleeqatigalugillu.
Siumumiit
ilungersorluta peqataaniarpugut aalisarnikkut suliffissuaqarnikkullu
ajornartorsiutit annertuut aaqqiiviginiarneqarnerini.
Naalakkersuisut
saqqummiussaat allat tamaasa ilassilluarlugit suliallu ingerlaqqinnissaanni
suleqataanissarput nalunaarutigalugu aningaasaqarnikkut ingerlatsineq pillugu
nalunaarut manna tusaatissatut tigullugu Siumumiit ilanngullugu
oqaatigissavara.
Partiit
oqaaseqartut assigiinngitsut aamma isumaqatinartorpassuarnik
oqariartuuteqarput. Aammalu taamatut Kattusseqatigiit attaviitsorlu, kisianni
soorunami taamaattuartuummat aamma uparuaalaassaannga
ataasiakkaginnannguanik.
Siullermik
Atassutip oqaaseqartuanut tunngatillugu saqqummiussap quppernerup aappaani
Atassut ilanngullugu oqariartuuteqarpoq tassa aningaasatigut Landskarsip
isertitai aammalu ingerlatsinermut sanaartornermullu aningaasartuutit
1996-imiit 2001-imoortut qiviaraanni ataqatigiinnerat taanna
annertoorujussuarmik ataqatigiikkunnaarsimasoq oqariartuutigalugu.
Aammalu
ingerlaqqilluni tassani aatsanganeq assorujorujussuaq annertusisimasoq. Taanna
aatsanganeq sumik tunngaveqarnersoq assorujussuaq paaserusunnassagaluarpoq,
soorunami assigiinngitsorpassuarnik taanna isumaqartinneqarsinnaammat immaqa
avissaaquteqalersimaneq taanna pineqarnerugunaraluarpoq, kisianni Atassut
qinnuigerusuppara taanna pillugu itinerulaartumik nassuiaaqqullugu, tassami
oqaaseqarfigiuminarnerussammat.
Kisianni
sanaartornermut tunngatillugu Atassutip oqariartuutigisai aammalu
Kattusseqatigiinniit oqariartuutigineqartut oqaaseqarfigilaarniarpakka.
Nalunngilluinnarparput
ila ukiuni arlaqaleqisuni sanaartornermut aningaasartuutigisartakkagut
annertuumik ajornartorsiuteqarfigisarlutigit, aammalu taakkua
sananngitsoorneqartartut aammalu aningaasaliissutit atunngitsoorneqartartut
ukiut tamaasa annertungaatsiartaqalutik. Tamatta taanna nalunngilarput illuattuuguttaluunniit. Taamaattumik
aaqqinniarlugit qanoq iliuusissat siornaak
Naalakkersuisut nutaat aallartimmata aammalu Inatsisartut nutaat soorunami
taamaalillutik aallartimmata aaqqiissutissat ersarissut alloriarfiupput.
Tassa anlĉgsfondi pilersinneqarpoq taamaalilluni eqaannerusumik
sanaartugassatigut ingerlatsisarnissaq anguniarneqarluni.
Aammalu
sanaartugassat pilersaarutaasut kommunit suleqatigilluarlugit
piviusunngortinneqarnissaat annertunerusumik anguneqarsinnaaqqullugu.
Massakkullu
nalunngilarput ikaarsaariarneq pisimavoq aammalu tassani anlĉgsfondimik
pilersitsinermi piumasaqaatit assigiinngitsut Inatsisartuni
akuersaarneqareersimasut ikkukkiartorlutik massakkut aallarteruttorput.
Taamaattumik
suli uagut Siumuminngaaniit isumalluarfigaarput taamatut aaqqissuussineq
siunissami kinguneqarluartumik aamma suleqataaffigisinnaajumaarlutigu, aamma
kinguneqarluartumik kinguneqalerumaartoq angusaqarfiujumaartoq.
Eqqaamajuaannaassavarput
soorlu Aningaasaqarnermut Naalakkersuisut akissuteqarnermini eqqaagaa
aningaasarparujorujussuit Nunatsinni ukiut tamaasa sanaartornermut
aningaasaliissutigineqartarput Landskarsiminngaaniit 2001-imut 700 mio.-it
sinnerlugit aningaasaliissutigaagut.
Kommunit
200 mio.-it missaanik ukiumut atortarpaat. 900 mio.-it angoreerpagut. Ingerlatseqatigiiffiit selskabit
nammineerlutik aningaasalersugaat qasserpiaanersut uani takusinnaanngilara.
Aammalu privatit namminersorlutik aningaasalersugaat sanaartugassanut
sanaartukkanut aamma annertussapput, taamaattumik oqarsinnaasoraanga
Nunatsinni ila immaqa 5 mia.-it angullugit sanaartugassanut aningaasat
atorneqartartut uniorpallaassanngitsoq. Taamaattumik aningaasarpassuupput.
Aammalu nalunngilarput oqariartuutigineqartoq Nunatsinni nammineerluta uagut
avataaninngaaniit annertunerusumik ikiorneqanngikkutta
naammassisinnaasarput 400-500 mio.-it missaani inissisimasariaqartoq aamma
inissisimasuusoq.
Eqqarsarluartariaqarpoq
aap ilumut tassani aammalu ingerlariaqqinnissatsinni qanoq iliuusissat
ersarilluinnartut tassani isumaqatigiissutaasariaqarlutik
Namminersornerullutik oqartussat kommunillu
akornanni.
Isumaqarpunga
naammassisaqarsinnaassuseq taanna avaqqunneqarsinnaanngitsoq aallaavigissallugu.
Naalakkersuisup
akissuteqarnermini oqariartuutigissatsinnut akissutigisai assorujussuaq nuannaarutigaakka.
Isumaqarpunga taamatut piumasaqaatitsinnut ilassinnilluarneq qujassutigisariaqarlugu.
Minnerunngitsumik
akileraartarnikkut aaqqissuusseqqinnissamik aammalu taassumap iluani
pissutsinik ullumikkut Nunatsinni aningaasarsiornikkut atugaasunut
naleqqussarnissamik oqariartuuterput taanna tigulluarmagu.
Tassa suliaq aallartittariaqarpoq. Pissutsit allanngorsimaqaat ukiuminialunnguit ingerlanerini. Aammalu tamatta nalunngilarput nunani allaninngaanniit Nunatsinni aningaasalersuinissamut aningaasaleeqataanissamullu ingerlatseqataanissamullu kajuminneq annertusiartortoq. Aamma taamaappoq selskabit ingerlatseqatigiiffissuit Namminersornerullutik Oqartussat pigisaani aktiet tuniniarneqassappata. Aamma taamaappoq sermimik imermillu tunisassiorneq Nunatsinni annertusarneqassappat.
Tassaniipput sillimaffigisassat assigiinngitsut aamma ullumikkut inatsisitigut akileraartarnikkut akitsuusersuinikkullu atugassarititaasutigut allannguinissamik pinngitsooratik kinguneqartariaqartut. Tassami taakkunuunatigut annertusaagutta ullumikkut inatsisitigut tunngavigut Siumumi isumaqaratta naammanngitsut aamma naleqqussarneqartariaqartut.
Usinik assartuinermi nutaamik aaqqissuusseqqinnissamut tunngatillugu Naalakkersuisup akissuteqarnermini ilanngullugu taavaa aamma paasilluagara tamakkiisumik tassuuna aaqqiisoqassappat taava pisariaqartoq containerilersuinikkut ingerlatsinissamut tamakkiisumik aamma talittarfitsigut ineriartortitseqqinnissaq, minnerunngitsumik avannaa eqqarsaatigalugu, tassa Upernanavik Uummannarlu.
Takusinnaasakka naapertorlugit talittarfeqarnikkut annertusaanissamut aammalu containerilersuinikkut ingerlatsinissamut annertunerusumik Upernavimmi talittarfimmik piorsaanissaq aningaasaliiffigineqareerpoq finanslovikkoorlugu siunissaq eqqarsaatigalugu.
Kisiannili tassa amigaatigaarput Uummannami taamatut aningaasaliissuteqarnissaq, containerilersuinermik ingerlatsinerup akikillisaassutigisinnaasai atorluarneqassappata taava aamma Uummannami talittarfitsigut 40-50 mio. angullugit piorsaanissaq avaqqunneqarsinnaanngilaq.Taamaattumik eqqaamallaqqussavara taamatut Uummannamut talittarfitsigut piorsaanissamut aamma aningaasanut inatsisissaq suliarineqalerpat tamanna ilanngullugu aamma suliareqqullugu. Selskabit ataatsimut ingerlataat aningaasat kaaviaartitaat 8 mia.-it angullugit annertussuseqarnerarneqarput matumani nassuiaammi aamma soorlu Naalakkersuisup akissuteqaammini tamanna taagaa.
Ila aningaasarpassuupput ingerlatseqatigiiffissuit Namminersornerullutik Oqartussanit pigineqartut aningaasat kaaviiaartitaat. Taamaattumik tupigineqassanngilaq, neriuppunga tupigineqassanngitsoq Siumuminngaaniit saqqummiussigatta soorunami selskabit taamatut ingerlatsinerminni inuiaqatigiinni nutaamik aaqqissuusseqqinnissami aamma selskabit pisussaaffilersorneqarnerat ersarinnerusariaqartoq, privatinulluunniit ingerlatassanngortinneqaraluarpata. Uagut suli inatsisiliorsinnaanikkut aammalu inatsisiliornikkut ineriartornerput ingerlapparput. Inuussutissarsiutit pillugit inatsisiliagut naammaqqajanngillat, nunarsuarmioqataasutut nunarsuarmioqatitta nunat assigiinngitsut inuussutissarsiornikkut atugassarititaat innuttaminnut suli nalleqqajanngilagut. Piumasaqaatit ullumikkut atukkagut inatsisitigut inuussutissarsiornermut sammisut suli amigarpallaaqaat.
Taamaattumik taakkunuunatigut nutarterinerit ilutigalugit qularutiginngilluinnarparput Siumumi uagut aamma nukissaqartugut aamma nammassinnaagipput namminersortunngorsaaneq annertooq. Aamma atugartuussutsikkut killiffipput qiviarutsigu taamaappoq killiffitsinni taamatut annertuumik alloriarnissamut namminersortut annertuumik periarfissinneqarnissaanni inuiaqatigiinni soqutigisagut ulorianartorsiortinngikkaluarlugit aaqqissuussisinnaalluarpugut. Tassa taamatut Siumumi isumaqarpugut.
Aalisarneq uterfigeqqilaarlugu ullumikkut ajornartorsiutit aatsaannguaq saqqummiussakka aammalu taakkua ajornartorsiutaasa aaqqinniarlugit qanoq iliuusissat saqqummiussakka neriuppunga Naalakkersuisuninngaanniit akissuteqarfigineqarumaartut. Tassungalu ilanngullugu oqaatigilaarusuppara ajornartorsiut aamma imaannaanngitsoq ukiut tamaasa naapiligarput tassa aalisartut namminersortut akuersissuteqarnissamik qinnuteqaataat pimaarpallaartumik Naalakkersuisunit suliarineqartarmat.
Assersuutigalugu avannaani umiarsuarnik massakkut tunitsivinnik ingerlatsisoqartarpoq ukiut tamaasa. Massakkullu akuersissummik ukioq manna atugassamik suli taakku pisimanngillat Uummannaq Seafood eqqarsaatigalugu. Umiarsuarlu massakkut avannamukarluni ingerlaarpoq.
Taamaattumik kaammattuutigissavara tamakku ilanngullugit Naalakkersuisunit piaartumik suliarineqarnissaat.
Lars Karl Jensen, Siumut:
Nunatsinni aningaasaqarnikkut ingerlatsinerup killiffia, immaqa taamak taagaanni, pillugu nassuiaateqartoqaraangat aammalu siusinnerusukkut eqqartoreersimasagut kingumut kiviarlugit nutaartaat misissuataaraangatsigit innuttaasunut iluaqutaasinnaasunut isumaqarfigalugit siusinnerusukkut saqqummiuttakkat qaqinneqanngikkaangata soorunami aamma oqaasissaqarnartarpoq.
Uani saqqummiussorneqartut ilaatigut nutaartaqarput immaqa aarleqqutigineqartutut taaneqarsinnaagaluartik, kisianni uagutsinnit nuannaarutigineqartariaqartunik.
Uani eqqarsaatigivara utoqqalisartut amerliartornerat taanna uanga nuannaarutigigakku, peqqutigalugu Nunatsinni peqqinnerulernissaq aamma suliniutigivarput politikikkut taamaattumillu Nunatta aamma aningaasassaqartittariaqarpaa taamatut anguniagaqarneq.
Aningaasatigut aallerfigisinnaasagut killeqartut kisiat misissorluarutsigit maannakkumut ilaatigut naalagaaffimminngaaniit ingerlatat tiguneqarnerisigut nunatsinnut nammakkersuutaasut isumaqarpunga aamma qallunaat naalagaaffiannik isumaqatiginninniarnermi Naalakkersuisut aallaavigisinnaasaannik ilaqartut.
Tassami nalunngisatsitut KGH-p umiarsuaataasa Nunatsinnut nuunneqareerlutik ikilisarneqarnerisigut taamanikkut KGH-p pisussaaffigisai atorfillit tjenestemandiusut kingornunnikuuvagut umiarsuillu ikilisarneqarnerisigut taakkua tjenestemandiunerat pillugu soraarsiinnarneqarsinnaanngimmata akissaajaatigilernikuullutigit mikinngitsumik. Allaat oqaatigineqartarluni ukiumut 40-50 mio.-inik nalinginut taakkua sulisuunngikkaluartut aningaasartuutaasut Nunatsinnut.
Tamakkua Naalakkersuisunut misissoqqunassaqaat uanga tunginninngaaniit tamakkuummatami naalagaaffimmut isumaqartigiinniarnermi qularnanngitsumik aaqqiiffigineqarsinnaasut. Tassami inuit taamatut inissisimalersimasut uani taasakka amerlarnerpaartaat Danmarkimi najugaqartuummata, paasisakka najoqqutaralugit.
Neriuppunga taanna Naalakkersuisuni misissorneqarluni aamma suleriaqqinnissami naalagaaffimmullu isumaqatiginninniarnermi qaqinneqarsinnaajumaartoq.
Nuannerpoq oqaatigineqarmat aammalu takusinnaagatsigu Nunarput aningaasatigut qaffakkiartortoq. Uani qaffakkiartornermi ersarissaataasut taaneqanngitsut ilagivaat qularnanngitsumik saattussatigut aalisarneq, imaluunniit saattussanik aammalu qaleralinnik aalisarneq namminersortunit ingerlataammat.
Namminersortut tapiissutinik pineq ajorput akit avammut niuernerminni akigisatik najoqqutaralugit aalisartunik tunioraaffigineqartarput taakkulu Nunatsinni amerlanerulissappata isumaqarpunga aamma soqutiginartuusoq aqajunnguaq suliassarput suliffinnik pilersitsiniarluni Nunatta avataaninngaaniit aningaasaliisinnaasut aqqutissiuunnissaat suliassaammat qilanaarnartoq.
Selskabit assigiinngitsut pilersinnikuuvagut ajunngitsumik siunertaqarluta. Aammalu Nunatsinni sullissinikkut suliakkersorneqaraangamik oqartarput una imatut akeqarpoq tapiiffigitittariaqarpugut. Taanna selskabini ataasiakkaani ilaatigut ima atorluarneqartigivoq allaat immaqa assersuunneqarsinnaalluni selskabit ilai tassaasorilernarlutik nersussuit iluartuutitat aqqusinermut assiuppata angallanneq tamarmi unissaaq, ivigartorfissartik allinialerpassuk naalagarsiorfigalugit naalaannassavagut.
Uani angallannermi aaqqissuussaanerput qiviarutsigu angallanneq pillugu siunniussaqarnikuuvugut Nunatsinni eqaallisaanikkut timmisartunut suluusalinnut mittarfiliortitsinerit ingerlappu, naammassilerlutillu pilersaarutaasut malillugit. Qularnanngilarlu suli ilaqqinneqassapput.
Saniatigut
umiarsuaateqarpugut pingasunik. Nunatta inui angalaarsinnaasut taakkua
noqqoruullugit ingerlaniassagunik piumaffigineqarlutillu tamarmik
ingerlassasut taamatut aningaasanik allamut aallernavianngillat Landskarsimut.
Taamaattumik
isumaqarpunga arlaatigut naleqqussaanissaq angussagaanni pisariaqartoq angallanneq
pillugu isumasioqatigiissitsinissaq Nunatsinni qanoq amerlatigisut
umiarsuarnik angallannerat qanorlu amerlatigisut timmisartumik angallannerat
aallaavigalugu aaqqissuusseqqinnissaq avaqqukkuminnaammat.
Ineqarnermut
tapiissutit taakkua inuiaqatigiinnut oqilisaassinerit ilagivaat
pissusissamisoorlutillu. Kisianni maani oqaluttarfimminngaaniit aamma uanga
ataasiarnanga oqaatigisarnikuuvara Nunatsinni qisunnik nammineq peqarnata
avataaninngaaniit pilersorneqartilluta ingasappallaartoq boligstĝttep
illuutai nutarterneqarlutik iserfigineqaraluaraangamik akisualllaaneri
pissutigalugit qimassinnarlugit saninnguatigut periarfissat allat atorlugit
illorput 2000-imik assigisaanilluunnit naammaannartunnguamik
tigutsisilerlugit aammalu taakkununnga inuttassaannut nuannarutaaqisunik
aningaasatigut nammassinnaasaminnik nalilerlugit iserfigisarnerat.
INI
A/S-ip ingerlatitaanerani allatigullu oqimaaqatigiinngitsut tamakkua
isumaqarpunga aamma Nunatta aningaasarsiornikkut aningaasatigullu
inissisimanerani nalimmassaataasinnaasut.
Illut
iluarsaatereerlugit ukiuni pingasuni sisamani tallimani uningatinneqartut
kiassarneqanngilluinnartaramik aamma Nunatta silaannaata pissusianik
nammineerlutik aserfallakkiartoqqilertarput, immaqalu ukiuni sisamani
tallimani najugarineqanngereersut isertertussaqaleraangat aamma
iluarsaanneqartarput sulilu akitigut qaffakkiartortarlutik. T
aamaattumik
eqqarsaatigeqqunassaqaaq tamakkua illut napaannartorpassuit suli atorsinnaasut
nammineerluni illuliatut iserfigineqarsinnaaneri nammineerluni illuliatut
akiliiffigalugit iserfigineqarsinnaaneri aamma aqqutissiuunneqassasut.
Tamaaliornitsigut qularnanngitsumik sanaartukkanut aamma
angummassinnaanerput aamma tassuuna aqqutissiuutissagatsigu.
Sorpassuarnik
oqaasissaqarnaraluartoq isumaqarpunga uani aamma naggataarutigalugu oqaatigissallugu
usinik angallassineq eqqarsaatigalugu containerersornermik pilersaarutit
taakkua ingerlanerat ajunngilaq.
Kisianni
nunaqarfinnut containerersorluni ingerlatsiniarsarineq aamma
naliliiffigisassat ilagisariaqassavaat. Ataasiarnanga naammattoortarpara
angallat immaqa assartuinissamut isumaqatigiissuteqarfigineqarsimasoq
brammimik kalittoq brammillu qaavani containeri anginngitsunnguaq
nunaqarfimmukaanneqartoq oqqullugulu.
Soormi
angallammi taakkua containerit imai ikioraannarsimanngilaat
pilertornerusumillu usingiarlugit tikikkunik?
Imaannerluni
containerersortussat taanna piinnarlugu containerersortut. Akit
eqqarsaatigalugi taamak ittut takullugit ilaatigut eqqarsariarnartarpoq,
Inatsisartuni qanoruna oqalussimasugut? Sooruna taamatut ingerlasoqartoq?
Aamma pissusiviusut qanimut alaatsinaallugit arlaatigut sunniuteqarsinnaaneq
Inatsisartuninngaaniit qanoq oqariartuuteqarnissamut utaqqiinnarani
ingerlatsisut ilikkartariaqarpaat akikinnerusumik ujartuineq tamatta
pingaartikkatsigu. Qujanaq.
Jĝrgen
Wĉver Johansen,
Isumaginninnermut Suliffeqarnermullu Naalakkersuisoq:
Qujanaq.
Partiit Siumut aamma Inuit Ataqatigiit kiisalu Kattusseqatigiit
suliassaqarfinnut oqaaseqaataannut qujarusuppunga. Oqaatigineqartut
suliffeqarneq isumaginninnerlu pillugit tamarmik Kattusseqatigiit
oqaaseqaataat eqqaassanngikkaanni Naalakkersuisut siunnerfigisaannut
tapersiinertut paasigakkit tamannalu soorunami nuannerpoq.
Partiit
taakku oqaaseqaataat oqaaseqarfigilaassagukkit siullermik Siumut
oqaaseqartuata Mikael Petersenip saqqummiussai maluginiarpara Siumup
suliffissaarunnermi aningaasaateqarfimmut tunngatillugu Naalakkersuisut
iliuuseriniagaat kingusinnerusukkut aamma maani Inatsisartuni sammisassarput
taperseraat.
Tamanna
qujanarpoq aamma Mikael Petersenip ilumoorpoq oqarami Naalakkersuisut piginnaatinneqartariaqartut
Danmarkimi oqartussaasunik isumaqatiginninniarnissaminnut, siunertaasariaqarmammi
aaqqissuussinerup tamanit paaseqatigiiffiusumik pilersinneqarnissaa,
minnerunngitsumik kattuffinnut Nunatsinnut suliartortartunik
ilaasortaqartunik.
Ilumoorpoq
aamma taamak iliussaagut.
Allaffissornikkut
ingerlanneqarnissaa pillugu Naalakkersuisut misissueqqissaarnissaannik Siumup
inassuteqarnera aamma tusaavara. Tamannalumi siunertaraarput taamaammanuna
ukioq 2002 ikaarsaariarfittut atorneqarnissaa takorlooripput,
misissorneqartariaqartut tamarmik missorluarneqarsinnaanissaat
pisinnaaniassammat. Aamma minnerunngitsumik matumani pineqartut sulisut,
sulisitsisut Nunatsinnilu Suliffeqarneq Pillugu Siunnersuisoqatigiit
peqatigalugit.
Piginnaanngorsaaqqinneq
pillugu aaqqissuussinissaq nutaaq aqaguagu oqaluuserisussaavarput tassanilu
siunertarineqartut ukiorlu kingulleq Naalakkersuisut KANUKOKA-mut
isumaqatigiissutaannut tunngaveqartoq Siumumiit taperserneqarnera paasivara.
Aamma maluginiarpara taanna Inuit Ataqatigiit oqaaseqartuata Asii Ghemnitz
Narupip siunissamut sammisuuneraraa.
Taamatut
Siumup Inuit Ataqatigiillu piginnaanngorsaaqqiinermi suliniutaasut
soqutiginnillutik oqaaseqaataat isumalluarnarput aqaguagumut
oqallinnissatsinnut.
Ineqarnermut
tapiissutit nutaamik siunissami aaqqissuunneqarnissaat pillugu aamma aqaguagu
Naalakkersuisut saqqummiussissaagut. Saqqummiunneqartussat pillugit Mikael
Petersenip Siumut sinnerlugu oqaaseqarnera tapersiineralu
tunngavilersorluagaapput. Ilumoorpormi aaqqissuussineq nutaaq isertitakinnerit
akunnattumillu isertitallit pingaartillugit aaqqissuunneqartariaqarmat,
ilaqutariit meerartallit puigornagit.
Naalakkersuisuni
misigisimavugut Inatsisartut siornatigut piumasaqaataat Socialreformkommissionillu
siunertareqqusai saqqummiussaqarnissatsinni naammassisimallugit.
Sammineqartussarli taanna uterfigeqqissavarput aqaguagu.
Inuit
Ataqatigiit sinnerlugit Asii Chemnitz Narupip saqqummiussai aamma
oqaaseqarfigilaarusuppakka, ilumoormat suliffissaaleqisut
ikiliartorsimanerat sinnassaatigissanngikkipput, peqatigiillutami
suliniuteqarnerput tamaangaannaq killeqassanngimat.
Suliffeqarneq
pillugu aaqqissuusseqqinnerput ingerlavoq ilinniagaqarsimanngitsut
piginnaanikinnerusutullu oqaatigineqartartut salliutillugit
suliniuteqarnerlu taanna ingerlaqqittariaqartoq annikillilerneqarnani Inuit
Ataqatigiit oqariartuutigigaat paasivara, isumaqatigaaralu oqariartuut taanna.
Aamma
ilumoorpoq apeqqut pingaaruteqartoq alla tassaammat sulisussat
nooqattaarsinnaanerisa pisariillisarnissaa. Tamanna Inuit Ataqatigiit
tikkuartugaat Siumup ukiaq ataatsimiinnitsinni aamma oqaaseqarfigisaa
misissoqqissaassavarput. Ilaatigut ilumoormat aamma misissorneqartariaqartunut
ilaammat taamatut suliffissaqarumallutik nuuttut immikkut
ajunngitsorsiassaqartinnissaat.
Kattusseqatigiit
oqaaseqartuanut Mogens Kleistimut oqaatigerusuppara nammineq pisuussutiginagu
suliffissaaruttartut siunissami periarfissaat pitsaanerulersinniarlugit
piginnaanngorsarsinnaanissaat Naalakkersuisut Inatsisartut akuerisaannik
aqqutissiuussaasa ilagaat. Uangalu Suliffeqarnermut Naalakkersuisutut
nuannaarutigaara Nunatsinni sumiluunniit periarfissat akunnassigaangata
taamatut eqqugaasut piginnaanngorsarnissaat periarfissiissutigigatsigu.
Kommunit
sulisitsisullu taamatut sulisartunut piginnaanngorsaaqataanissaat
kajumissaarutigiumaarparput aningaasarpassuimmi atunngikkaluarlugit
peqatigiinnikkut periarfissat annertusarsinnaagatsigit.
Taamaaliornerpullu
suliffeqarnikkut aamma tassuunatigut ersarissumik politikeqarnitsinnut
ersiutaavoq. Isumaqatigaakkilli oqaravit taamatut aaqqissuussimanerput
pitsaasoq siunissami ingerlaqqittariaqarmat.
Mogens
Kleistimut Kattusseqatigiit sinnerlugit oqaaseqartumut aamma oqaatigerusuppara
Naalakkersuisuni tunngavissalimmik uparuartuineq sukkulluunniit
tikilluaqqugatsigu. Kisianni tunngavissaqanngitsumik uparuartuineq
paatsiveerussaataannaavoq siunertaqarnanilu.
Mogens
Kleistip suliffeqarnermut tunngatillugu suliniutit ersarissut ingerlanneqartut
arajutsisimagunigit, aamma qularinngilara taamaassasoq, taava
kajumissaarusuppara Kattusseqatigiit Inatsisartut suliffeqarnermut
tunngatillugu ataatsimiititaliaani ilaasortaatitarsi saaffigeqqullugu
qularinngilara taassumap suliniutit pillugit sumut qanorlu Naalakkersuinikkut
siunnerfeqarnersugut oqaluttuussinnaagaatit.
Naggataatigut
maluginiarpara suliffeqarnermi atugassarititaasut eqaatsumik
aaqqissuunneqarnissaat aamma minnerunngitsumik Nunatsinni
ingerlatseqatigiiffiit inuiaqatigiinni periarfissarisinnaasaraluamikkut
susassaqarfigisinnaasamikkullu nammaqataanerusariaqarnerat Siumumiit IA
-miillu oqariartuutigineqartoq.
Tamannarpiaq
siunertaralugu illersuisutut inissisimavunga Nunatsinni ingerlatseqatigiiffiit
peqatigiillutik suliniutaannut pissanganarluinnartumut, Leadership Kalaallit
Nunaannik taaguuserneqarsimasumut.
Tassani
siunertarineqarpoq Nunatsinni naatsorsueriaatsip naleqassutsimik
aallaaveqartup ineriartortinneqarnissaat taamaaliornikkut Nunatsinni
inuiaqatigiittut pingaartitavut pisariaqartitavullu qanoq annertutigisumik
ingerlatseqatigiiffinnit aallunneqarnersut siunissami naatsorsuutinut
ilanngullugit takuneqarsinnaasunngorlugit naatsorsorneqartalernissaat.
Suliniutit
immikkoortuat siulleq junip qeqqata missaani naammassissaaq,
ingerlatseqatigiiffiilli nunatsinnut pingaaruteqartut 14-t Nunatsinnilu
kommunit annersaat aalajangereerput maannangaaq suliniut
ingerlateqqissallugu. Taamaattumik siunissaq eqqarsaatigalugu aamma tassani
isumalluarnartoqarpoq.
Taamatut
naatsumik suliassaqarfinnut tunngatillugu oqaaserineqartunut tunngatillugu
akissuteqalaarpunga qujavungalu saqqummiunneqartut pillugit.
Lise
Skifte Lennert,
Kultureqarnermut, Ilinniartitaanermut, Ilisimatusarnermut Ilageeqarnermullu
Naalakkersuisoq:
Uangattaaq
pissusissamisoortippara akisussaaffeqarfimma iluani kaammattuutigineqartut
innersuussutit apeqqutigineqartullu aamma oqaaseqarfigilaassallugit.
Siullermik
Siumup oqaaseqartuata Mikael Petersenip ilinniartitaaneq pillugu ujartorpaa
kommunini Atuarfitsialammut suliniuterput pillugu kommunini tamani
aallartilluarnissaata qulakkeerniarneqarnissaa.
Tassunga
atatillugu apuukkusuppara massakkut piffissaq mannarpiaq peqqussutissaq
meeqqat atuarfiannut peqqussutissaq tusarniutigineqarmat taavalu juunip
qiteqqutinnginnerani akissuteqarnissaq killilerneqarsimalluni. Taamaammallu
tassa taanna suliassaq ingerlavoq, neriuutigilluinnarparpullu kommunit
suleqatigilluinnarlugit ukiamut piareersaateqarnissarput.
Taava
ukua aamma eqqaammagit inuusuttut ukiuni aggersuni 17-iniit 24 -inut ukiullit
amerliartornerujussuat tassani aamma soorunami ineriartorneq
nalunnginnatsigu aamma suliniutit ilagisimavaat Sisimiuni sanaartornermi
ilinniarfiup iluani HTX tassalu ilinniarnertuunngorniarfik tekniskiusumik
aallartissimallugu. Tassalu ilinniartut siulliit ingerlalereerput arlassaalu
augustimi aallartittussaallutik. Taamaalilluni aamma taanna ikiuutaavoq
ilinniarnertuunngorniarluni ilinniartarnerup saniatigut aamma taamatut
pilersitarput taanna.
Soorunami
eqqumaffigaagut taakkua Siumuminngaaniit ujartorneqartut aammalu suliniutit
ingerlareersut iluaneereerput ilaat.
Kiisalu
aamma uani aalisarnerup iluani pissutsinut Siumuminngaaniit eqqartorneqartut
sisamassaraat, kaammattuutini immikkoortut sisamassaani aamma uanga
susassaqarfimma iluaniimmat tassalu una Nunatsinni aalisakkerinermut
ilinniartitsineq ATI-mi Maniitsumi nutaamik aaqqissuusseqqinnissaq
ujartorneqarmat.
Tassunga
atatillugu imatut oqaaseqarusuppunga. Ilumoorpoq Naalakkersuinikkut
isumaqatigiissummeereerpoq tassa IA-p Siumullu isumaqatigiissutaata
iluaneereerpoq taassumap aaqqissuuteqqinneqarnissaa ATI-p iluani.
ATI-mi
qitiusumik ilinniartitaanermut ataatsimiititaliaq tassa brancheudvalgi
aqqutigalugu suliassaq ingerlateqqissavara taavalu Naalakkersuisunut
saqqummiussillunga. Tassami brancheudvalgit suliassaasa
pingaarnersarimmassuk inuussutissarsiutitigut ineriartorneq aammalu
ataatsimiititaliap suliassaqarfiata iluani ineriartorfiusinnaasut
malinnaaffigissallugit. Taavalu tassa aaqqiinissaq taamaalilluta
qimerluussavarput piffissami qaninnerpaami.
Aamma
Inuit Ataqatigiinninngaaniit, Inuit Ataqatigiit oqaluttuata Asii Chemnitz
Narupip aamma uanga akisussaaffeqarfimma iluani ujartormagu ilinniartitaanerup
ilinniartitaaneq sakkugalugu aningaasarsiornermik kiffaanngissuseqalernissaq
anguniarutsigu aqqutissat suut atussanerigut ilinniakkat sorliit
ilinniarneqarnissaannik kajumissaarinissaq aamma ujartormagu tassunga
atatillugu imatut oqaaseqarusuppunga. Tassa taamatut saqqummiussinerit
ilalerpara aamma ilinniagaqarnersiuteqarnerup aaqqissuuteqqinnera piffissaq
manna suliarivarput tassanilu qulaajaanermi tulluartippara aallartereermat
taanna suliassaq taanna ilanngunneqassasoq.
Kisiannili
aamma taassumap saniatigut oqatigerusullugu ullumikkut ilinniagaqartut
sumilluunniit ilinniagaqartut tamaasa atorfissaqartingaaratsigit ilaa taanna
aamma nalilerneqassaaq ilumut ullumikkut pisariaqarnersoq ilinniakkat
aalajangersimasut immikkut qanoq iliuuseqarfigissallugit. Tassa taanna
sulinermi naliligassatut ilanngukkumaarpara.
Kiisalu
Kattusseqatigiinninngaaniit aamma assigiinngitsualunnik ujartuisoqarmat
ingammik ilinniartitsisoqarniarneq pillugu tassani innersuutissavara
pingasunngormat maajip aappaanni Mads Peter Grĝnvoldip nammineq
Kattusseqatigiiusup apeqquteqaataa aallaavigalugu oqallinneq
innersuutigissavara taamak qanitsigimmat. Taavalu aamma tassani isumaqarama
qulaajaaneq naammattoq aammalu uumap saqqummiunneqartumut attuumassutaa
killeqarmat annertunerusumik piffissaajaataasariaqanngitsoq.
Aamma
Ilimmarfimmut tunngatillugu Kattusseqatigiit ujartugaat aamma taamatut
innersuussutigiinnassavara aamma oqallinneq maajip aapaani pisimammat.
Alfred
Jakobsen,
Peqqinnissamut Avatangiisinut Pinngortitamullu Naalakkersuisoq:
Aap,
uangattaaq aamma Naalakkersuisunut uani immikkoortoq 12-imut saqqummiussamut
tapiissuteqarniarpunga siullermillu qujassutigissallu peqqinnissaqarfimmut
tunngatillugu partiinit oqaaseqartunut annertunerusumik imatut
uparuaasoqannginnera maluginiarakku tamannalu soorunalumi
tulluusimaarutigivara. Imatut paasillugu peqqinnissaqarfimmut tunngatillugu
taava annertunerusumik uparuartugassaqarpallaarsimanavianngitsoq.
Kisianni
qaqininnut annertunerusumik peqqutigivara oqaaseqartut ilaannit soorlu
Atassutip oqaaseqartuata Daniel Skiftip pisortaqarfiit ilaat aalajangersimasoq
tikkuarlugu oqaatigimmagit tassalu Peqqinnissaqarfimmi Pisortaqarfik ilaatigut
oqarluni ajornannginaavillugugooq aningaasarpassuarnik naleqartunik
atuivallaartoortarsimaneq ilaatigut taamatut imaqartumik oqarnera
oqaaseqarfigilaarusullugu.
Ilumummi
Naalakkersuisutut sulineq taamatut oqitsigisinnaasuuppat qanoq aningaasat
amerlatigisut atugassiissutigineqartut sipporlugit qanoq annertutigisumik
sipporlugit atuisarsimassagaluarnerpugut.
Kisianni
uani erseqqissaatigissavara uanga peqqinissaqarfimmi ukioq kingulleq taamatut
atuinerusimaneq ajornannginaavillugu atuivallaartoorsimasutut
oqaatigineqarnera taanna pissusissamisuunngimmat. Tassami sinerissami
peqqinnissaqarfimmi sulisorpassuagut ilungersorlutik sulisimapput. Taamatut
oqaatigissavara siusinnerusukkut oqaatigereernikuugaluarlugu naak.
Peqqinnissaqarfiup
ingerlanneqarnerani naammassisat aatsaat taamak annertutigisut ukiuni
kingullerni naammassineqarsimapput taamaattumik taamatut peqqinnissaqarfimmi
aningaasanik annertunerusumik atuinerusariaqarsimaneq taanna
ajornannginaavillugu taamatut atuinerusariaqarnermik oqaatigineqarnera
isumaqarluinnarpunga ajornannginaarineruvallaartutut taanna
uparuartariaqarlugu, tassami allaat Naalakkersuisuninngaaniit immikkut
marloriarluta aningaasaliissutaareersut iluini nuutsitsinikkut
qinnuteqartarsimagaluarpugut aningaasaqarnermut ataatsimiititaliamut.
Kisiannili taanna ajuusaarnaraluartumik taanna itigarsimavarput.
Aammalu
taassumap kingunerisaanik ilaatigut Inatsisartut Kukkunersiuinermut
Ataatsimiititaliaa immikkut aamma taassuminnga suliakkerlugu
sulisinneqarsimavoq. Tassanilu paasinarsivoq aamma kukkunersiuisut
namminersortut atorlugit misissuisoqaraluarmat annertunerusumik
uparuagassaqarsimanngitsoq.
Soorunalimi
taanna imatut uanga paasisimavara tassa peqqinnissaqarfimmi aningaasanik
atuinerusariaqarsimaneq imatut asuliinnaq atuinerusariaqarnermik
ingerlatsisimanngitsoq. Aamma eqqaamasariaqarparput inuiaqatigiittut
allanngorarnerit annertuut sakkortuullu ukiuni kingullerni 50-it
ingerlaneranni aqqusaarsimavagut.
Aamma
maannakkut takusinnaavarput soorlu ukioqqortusiartorneq Nunatsinni aamma
atuutileriartortoq. Taanna aamma tulluusimaarutissaasoq tassami
inuiaqatigiittut atugarissaarnerulersimavugut inuiaqatigiittut
peqqinnerulersimavugut. Taamaattumik taassumap immini aamma tulluusimaarutissaanera
isigisariaqarparput. Kisianni aamma isiginngitsuusaassanngilarput taamatut
amerliartornitta saniatigut ukioqqortusiartornitta saniatigut taava aamma
pisariaqartitsineq peqqinnissaqarfimminngaaniit annertusiartormat, taannalu
aamma tappiffigisariaqarparput. Tassa taakkua annerusumik oqaatigerusullugi
maannga qaqivunga.
Mogens
Kleist,
Kattusseqatigiit oqaaseqartuat:
Aningaasaqarnermut
Naalakkersuisup saqqummiussinermini taakkartorpai piffissami aggersumi
utoqqaat amerliartornissaat. Taamaattorli maannakkuminngaaniit
aningaasaqarnermut missingersuutit ukiuni tulliuttuni qissimissagutsigit 15
mio.-it taamatut soorlu sinneqartoorutissatut naatsorsuutigineqarput.
Maanakkuminngaaniit
tamakku utoqqaat amerliartornissaanut aningaasaqarnerput ersarissumik
aaqqissuutinngikkutsigu taamatuinnaq sinneqartoortarniaraanni taava
pinngitsoornata maannakkut taamatut aningaasaqarnitsinnut tunngatillugu
aningaasartuutigisassagut malinnaasinnaajunnaassapput isertitassatsinnut.
Taamaattumik
maannakkuminngaaniit pitsaasumik pilersaarusiortariaqarpugut taamatut utoqqaat
amerliartornerat eqqarsaatigalugit aningaasatigut aaqqiissagutta. Aammalu
Tuusip taakkartorpaa apeqqut imaattorlugu, akileraartarnermut tunngasut.
Isumaqarpunga oqaatigissallugu arlaanik uagut tungitsinninngaaniit taamatut
arlaatigut siunnersuuteqarsinnaanngitsutut imaattormatigut IA -kkut
Siumukkullu Naalakkersuisooqatigiinniarlutik atsioqatiikkamik taakku namminneq
suliassamittut anguniagassamittut taakkartugaasa ilagimmatigit taamaattumik
taanna uagutsinnut tutsinniarneqassanngilaq.
Aammalu
sanaartornermut 700-800 mio.-it taakkua tamarmik atorneqanngisaannarput 600
mio.-it inulaarlugit atorneqartarput. Taamaattumik naleqqussaasariaqarpugut
taassumap tungaatigut. Imaassanngimmammi taanna fondi aningaasanik
immertitertariaqaripput amerlanerpaanik.
Taamaattumik pingaaruteqarpoq aamma qissimissallugu taassumap tungaatigut
qanoq aningaasat ukiut ingerlanerani sanaartornermut atorneqarsinnaasut
aamma sukumiisumik misissuiffigissallugit.
Taamaattumik
aningaasaqarnikkut taamatut patajaatsumik pitsaasumik ingerlatsiniarutta aamma
sanaartorsinnaasagut toqqammavigalugit aningaasaqarnerput aamma
inissitsitertariaqarparput. Imaanngitsoq ukiut tamaasa imaluunniit ukioq manna
assersuutigalugu tassa katillugit 256 mio.-it taavalu aamma siornatigut
imaattorneqanngitsut Daarngup taakkartugai ilanngutissagutsigit 300-400
mio.-it missaaniikkaluarput.
Taamaatumik
aningaasarsiorneq pitsaasumik aamma ingerlanniarutsigu taava aamma taakku
malinnaasariaqarput.
Mikael
Petersenip taakkartugai immaqa 1,5 mia. missaaniissasut taakku imaattunut
tunngasut uanga paasiuminaatsippara aningaasat annertussusissaat maannakkut
aningaasat atortarutsigit, massakkut 592 mio.-it missaanik atorneqarnikuupput.
Taavalu sinneri taakkua atunngitsuukkat qaleriiaaleriaramik 256
mio.-inngorlutik. Taava kisitsisit uanga qaffasippallaarnera assorujussuaq
takujuminaatsippara.
Joorummut,
Joorup oqaatigisaanut oqassuunga pissanngatigaara taava taassumap qanittumi
suliffissaaleqisunut tunngatillugu saqqummiussassaq imaattua, taakkartugaa.
Una maannakkut finansudvalgimi ippassaanikkunni akuersissutigaarput
aningaasanik suliffissaaleqinermut tunngatillugu kommuninut assigiinngitsunut
aningaasaliinissaq. Taanna ajunngilaq. Kisianni ersarissumik taamatut
sikusartuni ajornartorsiut unaasartoq tassalu Royal Greenland matusigaangat
1, 2, 3 taava eqqorneqartarput taakkua ilinniarsimanngitsut fabrikkini
sulisut. Aammalu kapacitetimut taanna isumaqatigiissut atorunnaarpat taava
Naalakkersuisummita taassumap tungaatigut qanoq eqqarsaateqarpat? Tassami
ukiumut 50 mio.-it taakku aningaasat taakkartorneqartut oqaatigisarpaat.
Aammalu
minnerunngitsumik isumaqarpunga Naalakkersuisut aamma eqqaamaniartariaqaraat
taamatut angallannermut akit assigiingitsut aaqqiiviginiaraanni tassalu soorlu
containerersornerit soorlu assigiinngitsullu aamma tusaaniartariaqaraat
illuatungaatigut tassa atuisut.
Piffissami
kingullermi sulisitsisut peqatigiiffianinngaaniit oqaatigineqarpoq taassumap
inatsisissap qanoq sunniuteqarsinnaanera qanoq issinnaanersut. Taamaatumik
Atassutikkut imaattuat siulittaasuata oqaatigisaa tassalu taamatut
maannakkuminngaaniit siunissaq ungasinnerusoq isigalugu ukiut qulit
qaangiuppata minnerpaamik ukiumut 70 mio.-it eqqartorpai Tuusip, taavami
maannakkuminngaaniit pilersaarusiortariaqarpugut patajaatsumik
aningaasarsiornitsinnut tunngatillugu. Ukiut tamaasa 15 mio.-inik
sinneqartoortarniarutta taava 70 mio.-illu taamanikkussamut
aningaarsartuuteqartarluta. Taava takujuminaatsippara suminngaaniit aningaasat
aassanerai.
Taamaattumik
patajaatsumik aningaasaqarnikkut ingerlatsiniarutta aamma pilersaarusiorsinnaasariaqarpugut
pitsaasumik.
Aappaagumut
taamatut pilersaarusiussagutta 800 mio.-inik nalilinnik taavalu
sanaartorsinnaasagut 550 mio.-iinnarnut killeqarsinnaallutik
angummassinnaasagut taava sooruna anlĉgsfondip aamma aningaasaatai
amerligaluttuinnassapput. Taamaattumik naleqqussaalluta ersarissumik taamatut
imaattortariaqarpugut pilersaarusiortariaqarpugut aamma maannakkuminngaaniit.
Qujanaq
Simon
Olsen,
Inuussutissarsiornermut Naalakkersuisoq:
Nuannaarutigaara
partiit tamarmik aalisarnermut tunngasut uparuartorneqarnerat ilaatigut
erseqqissartarlugu oqaaseqarfigimmassuk. Aalisarneq Nunatta
aningaasaqarniarneranut qitiulluinnartumik inissisimasoq aammattaarlu
sinerissap qanittuani aalisarneq eqqarsaatigalugu nutaamik
aaqqissuussinissamik pisariaqartitsisoqalersoq.
Siullermik
oqaatigissavara tassa 99-iminngaaniit pisinnaasarput tamaat Naalakkersuisuni
malinnaasut nalunngilaat sinerissap qanittuani iliuusissanik aammalu
pitsanngorsaatissanik suliaqarniarsimagatta. Ukiorlu kingulleq massakkut
qaangiuttoq takusinnaasarput malillugu pitsanngoriarnermik
ingerlatsisoqarsimammat.
Apeqqutit
ilaatigut assigiinngitsut apeqqutigineqarput, soorlu pisassiissutit
qaffannerat aningaasarsiornerup pitsaanerusumik ingerlalernissaanik
kinguneqarsimanersoq apeqqutigineqarpoq, taanna apeqqut IA-minngaaneersuuvoq.
Oqaatigissavara ukiumi qaangikkatsinni ukiup naanera tikillugu ukioq mannamut
isumalluarnaqisumik ingerlasoqarmat:
Raajarniarneq
sinerissap qanittuani aatsaat taamak pitsaatigisumik angusaqarfiuvoq ukioq
2000, tassami raajat tulaanneqartut 300.000 tonsit imaluunniit 33.000 tonsit
pallimoorneqarput.
Tamatuma
kingunerivaa soorunami ukioq mannamut isumalluassalluta Naalakkersuisuniit
pissutissaqarlualeratta. Taamatuttaaq raajanut pisassat aamma qaffaateqarput
ukiup naalluinnarnerani. Taannalu suli isumalluarnerulernitsinnik aamma
sakkortusaavoq. Oqartariaqarpunga aningaasarsiornitta suli
pitsaanerulernissaanik isumallualernerput ukiup nutaap aallartisimalernerani
pingaartumik raajanut avammut tuniniaanermi akit apparujussuarnerannik
kinguneqartoq ilimagisatsinnut soorunami ajorneroqisumik
kinguneqartussanngornera tamatta ilisimaaraarput Naalakkersuisuinnaanngitsut
inuiaqatigiit malinnaasut tamarmik.
Soorunami
Naalakkersuisuni suli nikallunngilagut. Neriuttuarpugut pissutsit
pingaartumillu avammut akit pitsaanerulissasut. Aammattaaq pissutsit
maannakkorpiaq qanoq ittut aamma akillaqquneqarpoq. Tamanna naatsumik
oqatigisariaqarpoq. Pissutsit maannakkorpiaq aarlerinartumik inissisimapput
tassa akit taamaaginnassappata nerioqaagut qummut aallassasut.
Aammattaaq
soqutigineqarpoq partiinit, partiit ilaannit tassalu aaqqiagiinnginneq
maannakkut aningaasaqarniarnermut qanoq kinguneqassava?
Aaqqiagiinnginneq
taanna aningaasatigut pinngitsoorani naleqartussaassaaq. Allatut taanna
nalilersoruminaassaaq. Tassami Naalakkersuisuni sapaatip akunnerata
naalernerani isumaqatigiinniareernitsinni isumaqatigiippugut sapaatip
akunnerata uumap ingerlasup iluani suliaq naammassiniarneqassasoq tassalu
aalisartut piumasaqaataat malillugit qaammatini marlunni akitoqqat atorlugit
akilersuisoqassagaluarpat imaluunniit akilersuisoqassappat qanoq annertutigisumik
tamanna naleqassanersoq.
Taanna
arfininngormat ullannguamiit suliaralugu aallartinneqarpoq,
naatsorsuutigaarput ulluni tullerni naammassisinnaassasoq. Taassumap
saniatigut isumaqatigiissutitsinni, isumaqatigiinniartutut
oqaatigineqarsinnaagattami aamma tamanna taamatut pimmat, taava sapaatip
akunnerata missaanik qaangiuppat taava qaammatini marlunni aamma akit qanoq
ilillutik ingerlariaqqikkumaarnersut aamma suliareqqissaarneqassaaq.
Taannalu pissanganartumik aamma inissisimavoq.
Taassumap
saniatigut Royalip taarsigassarsiaminik taarsersuinerat qanoq ingerlara aamma
apeqqutigineqarpoq. Oqartariaqarpugut Naalakkersuisunit taarsersuineq
naammaginnanngilaq. Taamaammanuna Naalakkersuisuniit naammaginartumik
taarsersuinerup inissinnissaa kissaatigineqartoq ukiup
aallartisimalernerani.
Partiinit
aamma Siumumit ilaatigut iliuusissatut taakkarsorneqartut imaannaanngitsut
pinngitsooratillu akeqartussaasut isumaqarpunga tamatta
paaseqatigiiffigilluartariaqarigut.
Avammut
niuernermi akit maannakkumut inissisimanerliulersimanerat oqimaallunilu
ajornakusooqisoq nalaapparput. Taamaammat aqqutissat assigiinngitsut
atorlugit iluarsiiniartariaqarpugut.
Aalisarnermi
ajornartorsiuteqalerneq pissutigalugu eqqorneqartunut aaqqiissutissanik
iliuuseqartoqarnissaanik aningaasaannaat isiginagit taamatut aamma
siunnersuutit ilaatigut oqaasertaqarput. Tamanna naammassiniagassaassaaq
aamma.
Taamatuttaaq
aalisarnermut attuumassuteqartutigut inatsisit tassa maannakkumut atuuttut
allaat tamaasa piaartumik nalilersorneqarnissaat nutarterneqarnissaallu
kissaatigineqarpoq. Tamanna saneqqussinnaassanngilarput.
Naggataatigut oqaatigissavara neriuppunga Atassut aamma Kattusseqatigiit ilungersunartumut killiffigisatsinnut qaangiiniarnitsinnut aamma ikorfartuilluarumaartut. Qujanaq.
Otto Steenholdt, attaviitsoq:
Kingulliulluni oqaluttumut aallaqqaataanut oqaaseqalaarniarpunga. Tassa aalisarneq illersorlugu oqaluttunut qujassuteqarnera aamma tapersertariaqarmat.
Kisianni tassunga tunngatiinnavillugu aamma Siumup oqaluttuata oqaatigisaa ersarissoq Aalisarnermut Naalakkersuisumut uangattaaq ingerlateqqinniarpara ukiup ingerlanerani pisassiissutinik taaneqartartut aaqqinniaruusaartarnerat arriippallaartoq, oqallisigineqartuartorlu neriuutigilluinnarpara aalisarnerup avammut tuniniakkatsinnut qanoq sunniuteqartarnera aningaasaqarnitsinnut, taanna eqqaamallugu sukkanerusumik aalisartut piumasaat akuersaarniartaqqullugit tassa akuerineqareersimagaangata.
Paasilluinnarpara pissutsit aarlerinartut Aalisarnermut Naalakkersuisut maanngaaniit eqqaammagit aammalu aaqqiagiinnginneq akeqartussaasoq eqqartorlugu pissanganartumillu ingerlaaseqartugut.
Tamakkua itinerusumik oqaaseqarfigisariaqassanngillat kisiannili uanga imaanngilaq paasisimasaqartorsuugama, kisianni piumasareqaara ajornartorsiutit Nunatsinni aalisarneruppata, sulisartuuppata allalluunniit aporfiusut aqqusinermi suaartartunit oqaaserineqartut Inatsisartuni Naalakkersuisunilluunnit nakkaannarfigineqartassanngitsut.
Ataatsimut ingeqatigiilluni oqaloqatigiinnerit tamakkuninnga aaqqiissutissaapput. Taamaattumik tassa aajuna neriuutigisara. Akerliussutsimik takutitsineqaallattorlu akuersaalertannginneq massakkumut ingerlaaseriniagarput ingerlanneqassaaq takoqqullugu Nunarput aamma inatsisit naalakkersuinerlu aqqutigalugit ingerlanneqartoq.
Tulliullugu oqaatiginiarpara Peqqinissamut Naalakkersuisup oqaasii tassa maani nangeqqittariaqanngisakka kisiannili Atassutip aamma uparuarmagu oqinaarivallaarluni oqarsimaneq uanga oqaaserisarsimasannut akerliusut maani uteqqissanngilara, naalakkersuinermi nakorsassaaleqineq aaqqinneqarsimasoq uanga qujassutigeqigakku.
Naalakkersuisunut ilaasortat maanga qaqigaangamik oqaasiisa amerlanersaat qujanersuaq tassa parteeqatiminnut Lisa Lennertip oqaasia eqqornerassavara imannak oqarmat, "annerusumik piffissaajaatigisariaqanngitsut tamakkua qujaqattaarnersuarmut atorunnaarlugit oqallisigineqartumut atorneqarniarlik."
Uanga naatsorsuutigisarpakka Naalakkersuisuutitaqartut Naalakkersuisunut ilaasortaatitaasa oqallisissaq partiiminnut imaattoq oqaluttuarisaraat. Taakku oqaluttuaralugit Inatsisartuni piumasatik angussagamikkik. Taamaattumik inattoreerlugit qanoq oqaqqullugit aamma maani piffissaajaatigalugu qujaqattaarnerujussuit taakkua tallisaasaqisut sapinngisamik atornaveersaartariaqarput.
Tassa soorlu IA-p oqariartuutai eqqortut, Siumup naliligai qujanartut, piginnaangorsaaneq ersarissumik politikeqarnitsinnut tamakku ersiutaapput. Soorlu Wĉver Johansen aamma tamakkuninnga oqaluttoq. Oqaluuserisassat siulliullugit sammisariaqarput.
Aammalu Aningaasaqarnermut Naalakkersuisup Atassummut Kattusseqatigiinnullu oqaasii iluarinartuutinngilakka. Imannak oqarmat: Partiit taakku marluk akerliunerarlugit aperinerarlugit Naalakkersuisunut qanoq iliorniartut massagooq namminneq Inatsisartunut ilaasortaagamik pisussaallutik tamakkua suliarissallugit.
Ajussanngikkaluarpormi kisianni maani suliarisartakkagut amerlaqaat Naalakkersuisut namminneerlutik Inatsisartunut akuereqqullugit oqaaseqarfigeqqullugilluunniit saqqummiuttagaat.
Taamaattumik
tamakku eqqarsaatigissagaannit Inatsisartut kisimik oqarfigisariaqanngillat
ilissiuna pisuususi suliassasi taakkua paarinnginnassigit. Taamatut
soorlu nipilimmik. Naagga aamma Naalakkersuisut namminneq saqqummiisussaapput.
Uannut
akissutigineqartoq qujassutigissavara tassa illunut tunngasut erseqqissumik
oqatigigakku uanga illut assigeerluinnaat isikkivii ajunngitsut iluani aamma
pequteqarsinnaapput ajunngitsunik assigeerluinnaat assigiinngitsunik
akeqartinneqarnissaat uanga isorisarakku. Akissaqassuseq aallaavigalugu aamma
najugaqarsinnaaneq Nunatsinni eqqunneqartariaqarmat. Illussaarsuarmut
soorluluunniit oqarta Naalakkersuisut Siulittaasuata illua
sulisartukulunnguamut tunniunneqassaguni qanoq naalliunnartigissava. Immaqa
saniatigut illuliorluni assersuanik assigiimmik akeqassammat aappaa taamatut
akiliisoq aappaalu akiliivallaarani.
Kalaallit
eqqarsartaasiannut tamakkua suli ikkuutinngillat. Qallunaatut
oqaluttorsuanngormat oqaannassaanga aamma maani atortagarput suli
ingerlassammat tassa Anĉring efter tĉring@.
Kalaallisut taanna qanoq nutserneqartarnersoq, pisinnaasaqassuseq
aallaavigalugu aamma najugaqarsinnaaneq illunik oqallinnermut
eqquttariaqarmat.
Ataatsimeersuartarnerit
tikkuarneqarpallaartarneri isumaqatigivallaartuunngilakka. Ataatsimeersuarnerit
maani oqallinnitsinni issuarneqartarput, tassani una akuerineqarpoq, ila
soorlu Inatsisartulluunniit oqaasissaarutimisaartaraat taamatut
oqartoqartaleraangat.
Ataatsimeersuarnerit
Inatsisartut aqutassarinngilaat. Isumasiuinerupput isumassanik tunisisinnaasut
kisianni ataatsimiittarfinni aalajangiisussasatut allaat nipilerlugit
oqaatigineqartarneri taanna isumaqarpunga qimakkiartuaartariaqartoq.
Tusarniaasarnerit
ajunngillat kisianni toqqammavissatungajak allaat nipilerlugit saqqummiunneqartarneri
inissamisuunngilaq.
Apeqqutigisara
ingerlatsinermut akissaajaatit uteqatttaarusaartuakkagut aningaasat
pileraangatisigit massakkunaasiit tikippagut. Ersarivissumik
siunnersuutigigaluarpara Naalakkersuisumut, ataatsimiititaliuunniartigit
taakku taanna kisiat oqallisigisussanngorlugu. Ataatsimiititaliarlu
naammassiguni Inatsisartunut saqqummiussiniarli.
Kisianni
Naalakkersuisup akivaa, taavami namminneq soorlu tunuarsimaffigalugu,
Inatsisartunngooq qanoq isumaqarpat? Ilissarsiorpunga
ilassarsiorpunga partiit tamaasa Kattusseqatigiillu taanna uatsinnut
tunniussaq massakkut ersarissumik akitigu aappa Naalakkersuisoq ataatsimiititaliorit.
Neriuppunga
oqaaseqartussat tulliisa taanna eqqaamassagaat.
Aamma
nuannerivallaanngikkaluarlugu aajuna oqaatigineqartoq Atassutip pingaartumik
oqaatigimmagu tassa ingerlatsinermut aningaasartuutit pillugit,
oqaatigimmagu tassa sinnattuaqinertut oqarataarnertullu allaat Atassutip
nalilerpaa taamatut uteqattaartuagarput. Isumaqarpunga ilumoorluinnartoq,
taamaattumik millileriniarneqarsinnaassappat taanna uteqattaartuagarput
sinnattuaqinertut oqarataarnertulluunniit allaat tikkuartuligarput,
ataatsimiititaliornissamut pissutissaqalersivippaatigut
uteqattaartuarunnaarlugu suliassanngorlugu.
IA-p
oqaaseqartuanut paatsooruttoriga nunarsuaq inuppalaarnerusoq
Aningaasaqarnermut Naalakkersuisup paasilluinnarpaa, uanga naamik
paasinngilara anorlilillaraangat immaqa taanna innuuppalaarnerunerpoq
imaluunniit qatsungallaraangat taamaannerpoq immaqaakua inuit tassani
najugaqartut pitsaasumik atugaqarnissaat taassumap iluaniittoq. Tassami
silaannaqaratta nammineq uagut susinnaanngilluinnakkatsinnik.
Erngup
kallerup inneratalu tunisassiorfinni atorneqartup qanoq pingaaruteqassusia
oqaaseqarfigitsiarneqartoq isumaqarpunga malersoqqittariaqassasoq.
Saqqummiussinermi erseqqissarneqarmat avammut tunisinerput
aningaasarsiornitsigut qanoq pingaruteqartigisoq.
Uangalu
oqaaseqarninni aamma sanileriisippakka avataaniit pisiarisartakkagut
avammullut tunisartakkagut suli avataaniit tikisittakkatsinnit amerlarnerusut.
Tassa avataaniit tikisittakkavut suli amerlarnerusut. Taamaattorli taakku
imminnut qanilliartortut nuannaarutigalugu oqaatigaara.
Neriulluinnarpunga
taanna oqallisigineqassasoq, tassa imaappoq erngup tunisassiornermut tassa
kallerup innerata qanoq pingaaruteqartigissusia qanoq
iliuuseqarfigisariaqarparput tunisassiornerput aningaasarsiorfipput taamak
pitsaatigisumik siunissaqartikkusukkatsigu.
Ilumoorpoq
sanaartorneq angummassinnaanngitsoq ilungersunaqaaq. Atassutip oqaluttuata
sakkortuumik uparuartuleraluarpaa. Kisianni qanoq iliussaagut
aningaasasssaqarteriikkagut sulisussaqarniarneq pissutigalugu
angummassinnaanngikkutta. Taanna ilungersunartuuvoq illussaaleqineq
imannarsuaq oqallisigigatsigu taamaattumik sanaartorneq aningaasassaqareersoq
qanoq ilillugu sukkanerusumik ingerlassinnaassagutsigu, kisianni
sannarlutaanngitsunik, taanna ilungersuullugu aqqutissiuuttariaqarpoq.
Tassa
taanna oqaaseq nuannarinngisara, utoqqatseraluarpunga Atassut
illersorpallaaqigakku, pisariaqarmat partii imannak oqarfigineqassanngilaq
ajortussaannarnik ujarliinnarlunigooq oqaluttarfimmukartoq. Naamik
illuatungiliuttut kikkulluunniit iluarinngisaqarunik ajortussaannarnik
ujarlernatik tikkuartuisariaqarput kisiannimi aamma puigornagu
oqaaserineqartut taakkununnga.
Taamatut
uparuartuiinnarasi siunnersuuteqalaartarniaritsi uparuartugarsi una qanoq
ililluni suleqatigiiffiulluni aaqqiisinnaassanersoq. Naggasiullugu
oqaatiginiarpara sulisartunik piginnaanngorsaaqqiinnnerit
taakkartorneqartut.
Danmarkimi
taanna atornerlunneqarpallaarujussuaqaaq tassa oqarlutik aa'
sulisinnaanngortinniarpagut. Kisiannili tamatigut paasineqartarluni tamakkua
suliffinnut uteqqinngisaannartut. Taamaattumik tamakkua nunatsinnut
pinaveersaartinnissaat Danmarkimisut ileequnagit eqqumaffigilluinnassaaq.
Taanna
naggasiullugu taamatut oqaatigaara Danmarkimi pissutsit
assiginaveersaaqqullugit inuit sulisinnaasut utertinneqartartut sullivinnut
ikippallaarput taannalu uagut Nunatsinni aqqutiginaveersaassavarput.
Daniel
Skifte, Atassutip
oqaaseqartua:
Qujanaq.
Aningaasaqarnermut Naalakkersuisup kiisalu partiit aammalu ataasiakkaat
oqaaseqartut tamaasa angumerisinnaassagukkit oqaaseqarfiginiarpakka.
Aningaasaqarnermut
Naalakkersuisoq siullermik, maluginiarpara oqarmat partiit peqataarusunnermik
oqariartuuteqartut aammalu upalungaarsimanissaq tassa aningaasaqarnitta taanna
ujartoraa. Tassuuna Tuusi isumaqatigilluinnaqqissaarpara.
Atassut
peqataarusuppoq sulili aningaasatigut upalungaarsimanissaq
allisinniarlugulusooq ukiuni tulliuttuni sinneqartoorutissatut
takorloorneqartut taakkua annikigaagut. Soorlu aamma oqartoqarpoq uagut
oqariartuuteqanngippallaartugut immaqa isorinniinnartugut. Takuuk,
akileraartarneq aaqqissuunneqaqqittariaqartoq oqariartuutigaarput. Tassa
taanna Naalakkersuisut ataasiaratik saqqummiuttagaat. Ukiamut
kinguartinneqarmat aamma ajorinngilarput isumaqatigiingaaratta.
Aamma
isumaqarpunga pissusissamisoortoq oqassalluni siunersuuteqartannginnitsinnik
oqarneq eqqunngilaq. Taanna kingusinnerulaartukkut uppernarsaatitalimmik
oqaaseqarfigissavara.
Kisianni
imatut aallartippoq Atassut neriuppunga titarnerit marlussuinnaammata
akuerissagimma, Atassut aallartippoq, issuaaneq: ANaalakkersuisut
siorna saqqummiutaat siunissamut takorluugaq atuagaq taanna Atassutip
iluringaarpaa, taamaattumillu Naalakkersuisut isumaqatigilluinnaqqeqqissaarlugit
politikikkut naleqqummat@,
issuaaneq naavoq.
Taava
sukkut ajortoqarpa? Taamatut eqqarsassalluni ajorami naagga
isumaqatigiippugut. Ingerlatsinermut aningaasartuutit pineqarmata tassani
ilaatigu taagorneqarput ammit akii. Aalisartut akisiarisartagaat,
angallannermik akit allarpassuillu. Atassut isumaqarpoq taakku kisimik
pisuunngitsut akit qaffakkiartuaartinneqarnerinnai, tassami uani qitiusoq
unaavoq, Naalakkersuinermi ingerlatsinermi qanoq iliuuseqartarneq imaluunniit
iliuuseqanngitsoortarneq tasaavoq ajornartorsiutit qitigisartagaat. Kisianni
Tuusi taamatut immaqa uparuarpasikkaluarlugu ugguuna annertoorujussuarmik
isumaqatigaara, Tuusi oqarpoq neriulluni sanaartornermut nutarsarinissamullu
aningaasaateqarfik assersuutigalugu ukiut tulliuttut, ukiut qaangiuttut marluk
367 mio.-inik aningaasartalik tamakkua ingerlatsinermut
atorneqartassanngitsut.
Ilumut
sanaartornermut atorneqassapput ingerlatsinermut atorneqaratik.
Ingerlatsinermut atulerutsigit taava ingerlatsinermut atukkagut
qaffakkaluttuinnassapput. Aammalu assigiinngitsunik equtitsisoortassallutik.
Taamaattumik
oqaaqqissaarneqarnerpullusooq ilaatigut tikkuartuilluni ajortuinnarnik
oqaluttumik taaneqarnerput utertikkusuppara. Tkkuartuisarsimavugut
ataasianngivilluta. allaallu siunnersuuteqartarluta. Assersuut 1999-imi
maannakkut Naalakkersuisooqatigiit ingerlaneranni peqqinnissaqarfimmi
pissutsit ajorseruttormata Atassut quppernernik 17-inik allakkiorluni
tunniussivoq oqarluni uagut qanorluunniit pisoqassagaluarpat peqataarusuppugut
suleqataarusuppugut.
Piffissami
allami oqaatiginikuuvara taanna akissuteqarfigineqarnikuunngilaq. Taanna
qisuariarfigineqanngilaq. Taamaakkarluartorli maluginiarparput
siunnersuutitta ilai atorneqartut. Taava taamatut iliortoqassappat Atassut
aamma akisussaaqataajumavoq. Taamaattumillu oqaatigineqassanngilaq
ajortuinnarnik tikkuartuisoq. Tassani qiteqatigiittariaqarpugut. Taamaattumik
taamanikkut neqerooruterput tigoqqikkumaneqassagaluarpat immaqalu
silattuallalluni suleqatiserinninnermik partiit pitarlugit piumasoqassappat
Atassut piareersimavoq nukissaqarpugut taamaaliussalluta, isumaqaratta
partii imaluunniit partiit pingaarnerunngitsut kisianni ajornartorsiut
Nunatsinniittoq taanna aaqqiiffigisariaqavissoq.
Tassunga
atasumik isumaqarpunga aamma Aningaasaqarnermut Naalakkersuisup oqaasia
kiisalu ilaatigut Inuit Ataqatigiit oqaluttuisa ilaata oqaasia peqqutigalugu
imatut apererusunnarpoq maannakkut Naalakkersuisuusut ukiunut tallimanut
qulikkaanullu pilersaarusiortalersimammata taanna qangamitaava Siumup
akuersaarsimaneraa.
Aalisartunut
akeqarnerliortitsineq uparuartoratsigu tassani pisuussutit assigiinngitsut
aamma taavagut. Uuliap akiata qaffannera, erngup akiata qaffannera,
innaallagissap akiata qaffannera minnerunngitsumillu Royal Greenlandip EDB-nut
mio.-nerpassuit atugai tamakkua kingunerai ilaatigut regninngit
nassiuteqqinneqarmat.
Tamatumalu
kinguneraa ajornartorsiut pilersoq tamannalu iluarinnginnatsigu
tikkuartuivugut tikkuartuineq imatut nipilik ajorpoq, ajorpoq, ajorpoq,
ajorpoq, tassa Naalakkersuisup oqaatigisaa.
Taanna
akissuteqarfiissagutsigu imatut oqaannassaagut Naalakkersuisut periaasiat
siunissamut takorluugaq, taanna isumaqatigaarput taanna ajorami. Imaluunniit
aamma Atassut oqarpoq qupperneq 3-mi. Atassutip paatsoorneqarumanani
erseqqissassavaa Naalakkersuisut Nunatta karsiata
sinneqartooruteqalaartarnissaanik siunniutaat akerlerinngilluinnarmagu.
Erseqqissusia
taavali tassunga atatillugu naggasiullugu oqaatigiinnassavara, ilumoorpoq
tamanna pingaaruteqarpoq paasissallugu, naak isummersoriaatsitsigut
assigiinngissuseqaraluaqaluta ataaseq sulissutigigatsigu tamatta tassalu
Nunatta pitsaanerpaamik ineriartortinnissaa.
Isummersoriaatsigulli
kisiisa assigiinngissutiginngilagut aamma maannarpiaq aningaasaqarnikkut
Nunatta inissisimanera assigiinngitsumik isumaqarfigaarput. Tassalu inuit
kiffaanngissuseqarlutik isummersinnaanerannik aammalu
aalajangersinnaanerannik aallaaveqartoq.
Naggataatigut
oqatigisariaqarpara Atassutip tikkuartugai tassaammata siunissamut
takorluuinermi 15 mio.-inik sinneqartoornissaq annikigaarput Naalakkersuisut
aaqqiiniuteqartariaqarput soorlu ingerlatsinermi aningaasartuutit
millisarlugit.
Pitsaasumik
ingerlanissaq aamma oqariartuutigaarput akit politikikkut
qaffakkaluttuinnarnerat. Soorlu isumaqatigiinniarnerni karsi
ammartoorpallaarpat kigaallassimatinneqarsinnaasoq, taanna
aamma tikkuartorparput apeqqutillu allat, nalunnginnatsigu ukiuni
kingullerni qulini Kalaallit Nunaanni aningaasarsiornerup alliartortitaanera
soorlu nalunaarummi aamma ersersinneqartoq unittooqqavoq
aallariartoqartariaqarporlu. Aallariarnissami Atassut piareersimavoq.
Naggaterpiaatigut
Aningaasaqarnermut Naalakkersuisoq qutsavigissavara, qutsavigissavara ugguuna
oqaaseqarnermini Atassut, Atassut imaluunniit Daniel Skifte eqqartungaarmagit
alla eqqaanngilara soorlu fjernsynikkut ippassaanikkunni takusara maajip
aallaqqaataani Poul Nyrup Rasmussennikkut aammalu allat Naalakkersuisut
socialdemokratineersut Anders Fogh Rasmussen kisiiviat fjernsynikkut
reklamerermassuk.
Uanga
taamatut reklameereerneqarnissatsinnut pisariaqartitsinngilanga. Kisianni
maluginiarpara oqariartuuterput annertuumik aalassaassutaasoq. Soorunami
tamanna uagut ajorisinnaanngilarput.
Inuit
Ataqatigiinnut oqaaseqassaanga Inuit Ataqatigiit inassutai siunnersuutaalu
arlaqartut isumaqatigilluinnaratsigit assersuutigisinnaavara ilaatigut apeqqut
pingaartoq tassaasoq sulisut nooqattaarsinnaanerisa pisariillisarnissaanut
tunngavilik aamma aningaasanik naleqartussaq taanna
suliniutigineqartariaqartutut inassutigimmassuk uagut taperseerusuppugut.
Aamma
taassumap saniatigut naatsorsuutit Kalaallit Nunaata karsiata naatsorsuutai
naleqqunnerusumik Nunatsinnut suliarineqartalissappata nutaaliorneq tassani
isumaqatigaarput. Soorlu taaneqarpoq GRAM-mi taassuma ingerlateriarnissaanut
Naalakkersuisut kaammattorneqarnerat Inuit Ataqatigiinninngaaniit Atassutip
isumaqatigaa, aammalu taanna periaaseq aamma ilisimasaqarfigigamiuk
ajorinagu.
Naggataatigut
Otto Steenholdtip oqaaseqarnermini suleqatigiissitaliornissamut tunngasumik
isumaa taperserparput taamaalillutalu aamma Naalakkersuisut aamma ujartugaat
uagut nalunaarutigaarput tapersiilluta taamaaliortoqarsinnaaneranut.
Aamma
Mikael Petersenip Siumuminngaaniit toqqavissumik apeqqutigaa aatsanganeq
suunersoq nassuiarnerulaaqqullugu. Aap taamaaliussaanga taamaaliortinnanga
oqaatigissavara issuarneqarpugut Atassutip annertuupilorujussuarmik
aatsanganeq pilersoq oqaatigigaa. Naagga taamatut oqanngilagut erseqqivissumik
aatsanganeq pillugu imatut oqarpugut issualaarusupparalu. "Ukiuni
kingullerpiani imminnut ataqatigiigunnaariartorlutik, tassa naatsorsuutivut
aatsangaquteqaleriartortinneqarput. Sulili aatsangaqut annertunerulissaaq
ukiup uuliap siorna akitsornera ilanngunneqarlunilu
ersersinneqaraluarpat", issuaaneq naavoq.
Tamaattumik
uagut oqaaserinngisatsinnik oqartinneqassanngilagut. Taanna kissaatigaara.
Aamma ilisimatitsissutigissavara aatsanganeq taanna oqallisigineqaqqaarmat
Kalaallit Nunaannilu annertunerusumik siaruarluni 1996-imi ukiakkut Qassimi
ataatsimeersuarnermi Siumup taamanikkut siulittaasuata kalaallisut
oqaatigimmagu taanna aatsanganeq tassalu taanna isertitat anisitallu
mumillutillusooq nikikkaluttuinnarnerat tassani pineqarpoq.
Taamaalillunga
Siumukkormiut eqqaaseqqilaarpakka.
Taava
Peqqinnissaqarfimmi Naalakkersuisoq oqaaseqarfigilaassavara. Ukiuni
kingullerni atuisoortarneq aatsaat tusarnartaalinngilaq, aamma uagut
Naalakkersuisooqataanitta nalaani pingaartumik peqqinnissaqarfiup iluani.
Maannakkut annertunerusumik tamakkua eqartussanngilakka Nunatta karsiata
naatsorsuutai ukiaru kukkunersiuinermut atasumik erseqqinnersumik
iserfigisussaammata.
Kisianni
taamatut oqarnerit nivinngaanerillu peqqutigalugit erseqqissassavara
assersuutigalugu Sanami 300 mio.-it missaanik aningaasanik ingerlatsinermi
atuisoorneq 21,6 mio.-iuvoq. Qujanartumilli annikillisinneqarpoq taanna
sinerissami atunngitsuukkat peqqutigalugit. Taamaattumik oqaatsikka
aalajangiusimavakka. Asuli oqalunnerunngillat. Eqqorput.
Siimuup
apeqqutaanut aalisarnermut ajornartorsiutit Atassutip peqataaffigissanerai
tamakkua tamakkua qaangerniarneqassappat,
aap ippassaani kigani oqalugiaatiga Siimuumit tusaaneqartoq
innersuussutigiinnassaavara Atassut peqataaniarpoq.
Ole
Lynge,
Inatsisartut Siulittaasuat:
Aap
qujanaq Daniel Skiftemut. Una oqaatigilaarlara tassa partiit tamarmik
maannakkut oqaaseqartut malillugit malunnarmat una nassuiaat tamakkiisumik
tusaatissatut tiguneqartoq. Taamaattumik tullinnnguuttut aamma suli
arlaqarmata oqaluuserisaq nalunaaquttat akunneri sisamat ingerlatereeratsigu
allallu immikkoortut suli qulit oqaluuserisissassarigatsigit ullumikkut
naammassiniagassagut eqqaasissuteqalaarpunga.
Steffen
Ulrich-Lynge,
Ineqarnermut, Attaveqarnermut Pilersuinermullu Naalakkersuisoq:
Qujanaq.
Aallaqqaammut oqaatigissavara Otto Steenholdtip saqqummiussaanut tunngatillugu
erseqqissaatit immaqa paatsoornermik aallaaveqarsinnaammata
oqaatigilaassallugit. Tassa imaammat inissiat eqqarsaatigalugit, tassa
inissiaqatigiit boligafdelinginik taaneqartartut imminnut siunissami
kaavittussaapput.
Tassalu
inissiat assigiippata taava aamma soorunami assigiimmik
akiliisoqartartussaassaaq. Kisianniliuna ugguunartaatigut allannguut ittoq
tassa tapiissutit oqarta Aujaqqamiikkunnaarlutik@
inummut tuttussaammata. Taamaalillutik inuit isertitai aallaavigalugit
tapiissutit ingerlanneqalertussaammata. Taanna sukumiinerusumik
kingusinnerusukkut oqaluuserisussaagatsigu tassunga killiinnarpara.
Taavalu
aamma Ottop saqqummiussinermini aamma taagamigit imermut tunngasut taavalu
aamma kiassarnermut tunngasut sarfamullut tunngasut immikkut imatut
paasineqarsinnaasoq immaqa aalisakkerivinni massakkorpiaq akitsuiniartugut.
Kisianni taamatut siunertaqanngilagut Naalakkersuisuni.
Kisianniuna
immikkut siunissami allatut aaqqissuussamik iliuusissatsinnik ujartuisugut,
aammalu siunnersuuteqarallartugut kisianni suli aalajangiussaanngitsumik.
Taava
Atassumminngaaniit aammalu Kattusseqatigiinninngaaniit aammalu allaninngaaniit taaneqarput sanaartornermi kinguartoornerit, taakkulu aamma
uterfigeqqittussaagatsigit ataasinngorpanngooq taakku massakkut arlaatigut
oqaaseqarfigissanngilakka.
Immikkut
taalaarusuppakka marlussuit, tassalu Siumuminngaaniit saqqummiunneqartut,
annerusumik erngup nukii atorlugit nukissiorfiliornissamut tunngasut. Taakku
soqutigalugit soorunami suliarput annerusumik aallutilissagatsigu.
Saniatigullu
immikkut aamma taaneqarpoq angalassineq eqqarsaatigalugit umiarsuit
atorunnaariartornissaanut immaqa assartuutitut taaneqarsinnaasut. Kisiannili
massakkut oqartariaqarpugut tassa 60 mio.-it missaanik qaangilaarlugit
isumaqatigiissuteqarpugut Arctic Umiaq Linemut ukiuni sisamanut atuuttussamik.
Tassani
ippoq arlaatigut sukasaaneq, tassa imatut paasillugu iluanaarutai taassumap
Arctic Umiaq Linep Namminersornerullutik Oqartussat taavalu aamma taassumap
selskabip iluminni avittartussaammassuk. Taavalu aamma siunissami soorunami
assigiinngitsutigut timmisartunik angallassineq aamma nukittorsariartornissaa
tassani aamma ittussaavoq.
Inuit
Ataqatigiinninngaanniit kaammattuut una qallunaatut taallugu Atĉnketank@
eqqarsaqatigiittartussanik pilersitsisinnaanissaq taanna soqutiginartutut
tiguara aammalu saniatigut tassani maluginiarpara
suliariumannittussarsiuussisarneq eqqarsaatigalugu immikkut piusaqaataasinnaasumik
aamma sulisoqarnissaa tassa ilinniartitaanerit eqqarsaatigalugit. Taakku
soorunami aamma suliassatsinniissapput.
Lars
Karl Jensenip inissianut tunnasumik taasaa soorunami aamma tusaavara massakkut
najugaqarfigineqarneq ajortut arlaatigut iliuuseqarfigineqarsinnaanissaat.
Taanna soorunami aamma suliassaq ingerlatissavarput. Qujanaq.
Asii
Chemnitz Narup,
Inuit Ataqatigiit oqaaseqartuat:
Qujanaq.
Tassa annerusumik kisermaap Otto Steenholdtip oqaasiinut
nassuiaateqalaarusuppunga. Ilaatigut Otto Steenholdtip oqaaseqarnermini
tupigikulukkamiuk Inuit Ataqatigiit partiitut namminersortunngorsaanermut
tunngasunik suliuniutinut peqataasinnaagatta. Naluara sunartaa taamarsuaq
tupinnarsimatiginersoq.
Kisianni
kingumut qiviarutta ilumoorpoq Inuit Ataqatigiit tungaaninngaaniit pisortat
ingerlatsinerat annertuumik illersortarsimavarput maannamut. Aamma
isumaqartuartarsimagatta tassuuna ilaatigut inuit naligiinnerusumik
atugaqartinneqalernissaat qulakkeernerusinnaagatsigu.
Inuit
Ataqatigiinni soorunami aamma pissuserivarput imaluunniit suleriaaserivarput
inuiaqatiittut ingerlariaaserput nalilersortuartarlugu. Aammalu
ineriartornermi killiffik nalilersortarparput. Taamaattumik aamma pisortat
ingerlatsinerat ataatsimut isigalugu nalilersortariaqarsimavarput. Ilaatigullu
aamma nassuerutigineqartariaqarsimalluni tassani pisortat ingerlatsinerat
assigiinngitsutigut nutarsartariaqartoq, nutaanngorsartariaqartoq, ilaatigut
soorlusooq inuit piumassuseqaraluarlutik piumassusiat taanna
ipitinneqarlutik ittarmat aammalu inunnik peqataatitsinera annikippallaaqimmat.
Kiisalu
aamma oqartariaqarpugut iluaqutissartaqarpoq taanna namminersortunik
namminersortunngorsaaneq. Tassani ilaatigut iluaqutissartaa uaniissinnaagami
unammilleqatigiinnikkut akit pisisartunut apparsimmata. Tassani
iluaqutissartaa iluatigisinnaaqaarput. Uagut nalunngilarput aamma allat
Naalakkersuinikkut suliniartut allat namminersortunngorsaaneq illersortaraat
inuit ataasiakkaat pigisaqartorujussuit suli pigisaqarnerulernissaat
illersorlugu.
Uagut
taannartaa illersunngilarput. Kisianni illuatungaatigut iluatinnartortai aamma
takusinnaagatsigu sua tungaaniittut. Taamaattuminguna aamma aallaqqaamut
saqqummiinitsinni oqartugut killeqanngitsumik unammilleqatigiissinnaaneq
Nunatsinnut naleqqussagaq taanna ujartortariaqarparput.
Tassami
tassaniimmat iluaqutiginiarneqarsinnaasut inuiaqatigiinni kalaallinut. Aamma
malugeqqussavarput amerlasooriarluta una oqaatigisaratsigu, inuit
ataasiakkaat kisimiillutik ingerlatsinissaat taanna kisimi
aqqutissaanngimmat. Kisianni inuit peqatigiillutik ataatsimoorlutik ingerlatseqatigiissinnaanerat
taanna iluatigigatsigu.
Taamaattumik
aamma arlaleriarluta taanna ujartortarparput. Aamma ullumikkut Naalakkersuisunut
apeqqutigivarput taannarpiaq. Naalakkersuisut siuarsarusunneraat inuit
ataatsimoorlutik peqatigiinnikkut aningaasarsiorsinnaanissaat.
Isumaqarpunga
aamma Otto Steenholdtip nammineq soorlu nalunngilarput namminersortunngorsaaneq
qangalili illersugarivaa aamma taanna oqaatigivaa nammineq. Aamma
ullumikkorpiaq oqaaseqarnermini oqaatigivaa illuatutungaatigut aamma
inuutissarsiutinut pisortaninngaaniit tapiissarneq tamakkiisumik
peertariaqanngitsut. Imaappoq Otto Steenholdti uagutsitulli aamma
oqimaalutaasarpoq periaatsit qanoq ittut sunut suliniutissanut qanoq ittunut
tulluarnerunersut.
Uagut
aamma taamatorpiaq suliniuteqarpugut. Aamma tassani ajornakusuulaartarpoq
ilaatigut soorlu pisortat ingerlatsinerat ataatsimorsuaq eqqartussallugu.
Ingerlatseqatigiiffiit ilaat iluatinnarput aamma ilaat
nutaanngorsartariaqarput. Imaanngilaq ingerlatseqatigiiffiit pisortanit
pigineqartut tamaavissuarmik eqartorujussuarmik ineriartorfiunngitsumillu
ingerlatsisut.
Ingerlatseqatigiiffimmiit
ingerlatseqatigiiffimmut tassani naliliisariaqassaagut. Aamma uagut
imaanngilaq pisortat ingerlatseqataanerat tamarsuat iperarneqarnissaat
orniginartillugu suliniutigilersaaripput, taamaanngilaq.
Otto
Steenholdti isumaqativarput oqarmat inuussutissarsiutinut
tapiissuteqartarnerit ilaat taakkua paariinnassavagut. Assersuutigalugu NUKA
A/S-imut aningaasaliissutigineqartartut 70 mio.-it assersuutigissagutsigit
ilisimaneqarpoq taakkua ukiut qaangiunneratigut 170 mio.-inik 60 mio.-inik
kaaviiaartitsinermik nassataqartarmat. Aammalu saniatigut NUKA A/S 61 mio.
kr.-inik nalilinnik akissarsititsisarmat. Imaappoq finanslovi quppiinnarlugu
takugaangatsigu ingerlatseqatigiiffiit aammalu inuussutissarsiutinut
tapiissutit ima angitigisut arraa aningaasartuuterpassuit.
Nalunngilarput
aamma taakkua aningaasaliissutik aningaasanik aamma pilersitseqqittarmata.
Taamattumik nalilersugassat annertupput aammalu suliaq aallartippoq
ingerlatseqatigiiffiit ataasiakkaat aqaguaguminngaaniit
eqqartortussanngoratsigu pissangavugut aamma oqalliseqataajumaarpugut.
Aamma
Otto Steenholdti aatsaannguaq oqaaseqaqqinnermini paatsuungassutaa una
nassuiaateqarfigilaarusussinnavara. Aningaasarsiorneq siuarsarnissaa
eqqarsaatigalugu aammalu oqallisigineqaraangat nunarsuarmioqataanerput
taanna aamma eqqaaneqartuaannartarpoq.
Inuit
Ataqatigiit tungaaninngaaniit pingaartipparput erseqqissassallugu
nunarsuarqataaneq aningasaniinngimmat taamaallaat.
Aningaasarsiornerinnarmiinngilaq aamma taanna tikkuarpaat inuit 7.000-init
sinnillit Brasiliami naapisimaaramik ataatsimeersuarlutik nunarsuarmik tamarminngaaniit
aggiallutik. Tassa oqariartuutaat pingaartoq uagutsinnut tamatsinnut.
Aningaasarsiornerinnavik
aallunniaraanni annaassat annertoorujussuupput pilliutissat amerlavallaaqaat.
Taamaattumik taakkua oqariartuutaat uani issuarniarsimagaluarparput
pikkorliussagutta utoqqatsissuugut imaallaat erseqqissaatigilaassavarput
qujanaq apeqqutigigakku.
Tassa
uani oqaatiginiarneqartoq unaagami nunarsuarmioqatigiittut inooqatigiinneq
qanoq ittoq pilersikkusupparput. Uani ujartorneqarpoq inuit tamatta
sumiikkaluaruttaluunniit inuiassuartut susassareqatigiilluta
inooqatigiissuugut. Tassa isumaq taanna isumaqaratta tusaanngitsuusaaginnarsinnaanngikkipput,
taamaattumik apuupparput Inatsisartut oqaluttarfiatigut.
Aamma
uagut namminersortunngorsaanermut aammalu aningaasarsiornikkut ingerlatsineq
nutaq peqataaffigerusupparput aap. Tassunga aamma atatillugu
maluginiaqqussavara ingerlatiinnaq oqallinnermi pingaartittuartaratsigu
erseqqissassallugu taamaakkarluartoq inuuniarnikkut atukkat
naligiinnerulertariaqarput.
Aamma
ingerlatsinerup nutaap taassumap qanoq ittuugaluarnersut isertitaqarnersut
equngassutit aaqqeeqataaffigissavai. Imaappoq anguniakkagu tunngaviusut
iperanngilluinnarlugit kisiannilu aningaasarsiornikkut periutsit nutaat
ujartueqataaffigivagut.
Naalakkersuisunut
tamanut oqaaseqarsimasunut aamma qujarusuppugut. Aamma nuannaarutissaavoq
maluginiarlugu arlallit oqaatigimmassuk akileraartarnikkut periutsit nutaanik
aaqqissuunneqartariaqarnerannik nipi aninneqarmat. Aammalu Naalakkersuisunit
ilassilluarneqarmat maluginiarparput.
Taamaalilluta
Inuit Ataqatigiit tungaaninngaaniit neriuuteqarnerulerpugut akileraartarnermut
periutsit nutaanngorsarneqarnissaannut periarfissarissaarnerulissalluta
ikioqatigiilluta maani inimi.
Taava
oqaasissaqqalaarama suli. Maluginiarneqarsimassooq aamma Inuit Ataqatigiit
tungaaninngaaniit oqaaseqarnitsinni suliniutit alloriarnerit annikittunnguit
tikkuussiffigimagatsigit aningaasarsiornitta suli siuariartornissaanut
aqqutissaasinnannasut. Tassani oqaatigisinnaavara Naalakkersuisut
saqqummiinerminni ilaatigut oqaatigimmassuk una, inuiaqatigiit
aningaasaqarnerata malunnaatilimmi qaffariartornissaa imaaliallaannarluni
ilimagineqarsinnaanngitsoq. Tassa oqaatsit taakku toqqammavigisimavagut.
Taavalu
oqarluta taamaakkaluartoq qanoq iliorluta eqqarsaqatigiikkutta alloriarnerit
pissutsinik piviusunik aallaaveqartut ulluinnarni inuunitsinni sorlaqartut
taakkua iluaqutiginiarsinnaavagut. Taamaattumik aqaguagunnguaq
mumisitsinersuarmik pisoqarnissaa takorluunngilarput.
Kisianni
isumaqarpugut kimeqartoq aamma taamatut suleqataassalluni alloriarnerit
annikitsut kisianni kinguneqarluarsinnaasutut takorloorsinnaasagut. Qujanaq.
Jonathan
Motzfeldt,
Naalakkersuisut Siulittaasuat:
Imaanngilaq
annertunerusunik ilassutissaqartunga Naalakkersuisut maannamut saqqummiussaannik.
Tassali ilumoortoq una aallaavigineqartoq qularissanngilarput siorna
inuiaqatigiit aaqqissugaanerat eqqarsaatigalugu strukturhandlingimik
taaneqartartoq suliarineqarmat taanna malillugu Naalakkersuisut suliniarnertik
maannakkut ingerlappaat - aallartippoq.
Tassanilu
nalunaarummi annertoqisumik takuneqarsinnaavoq sisamat maannamut tassani
inuiaqatigiit aaqqissugaanerat pillugu suliniutit sisamat aallartinneqartut,
tassa usinik angallassinermut tunngasut, taavalu socialreformimut
tunngatillugu ineqarnermut akiliutit, inunnik isumaginninnermut
suliffissaqarnermullu tunngasut, taavalu aamma innaallagissamut allanullu
akiliutit.
Taakku
sisamat maanakkut Naalakkersuisut suliniutinik taakkunani aallartippaat.
Taakkunanilu suliniutini finanslovimut ilaatigut tunngassuteqartut
taamaalillugit aallartinneqarlutik. Tassa taamaalilluni suliassat tassunga
ingerlavoq.
Aamma
qularutigineqassanngilaq aaqqissuussinissami siunnerfigalugu siorna
tunniussarput taanna malillugu suliassat maanakkut ingerlallugit aallartipput.
Taamaattumik tassuunakkut siornali akuersissutigineqarmat annertunerusumik
uterfigisassat ullumi taaneqartut oqaluuserisassat avataaniittut amerlaqaat.
Taamaattumik
marlussuit kisiisa oqaaseqarfigilaassavakka tassunga siunissamut tunngatillugu
tunngassuteqarluinnarmata ingerlaqqinnissatsinnut.
Una
apeqqut ataaseq tikeqqilaassavara administrationitsinni Hjemmestyrip
administrationiani tassa suliffeqarfissuarni sulisut ilinniartitaanerat aamma
apeqqutigineqarpoq tassani. Taanna
ingerlavoq. Tassani ingerlatsinermi pingasut immikkut pilersaarusiorlugit
maannamut ingerlapput sulisut ilinniarteqqinneqarnerat. Tassa
allaffissornikkut taavalu sagsbehandlingit tungaatigut pikkorissartitaanikkut.
Tassa suliassiissutinut inerisarnikkut, sagbehandling, taavalu aamma
ledelsesuddannelse tassa imaappoq pisortatut ilinniartitaanerit.
Taakku
pingasut aalajangersimasumik ingerlanneqarput taannalu Hjemmestyremi
sulisuinut tamanu ingerlatitaavoq. Taassumap saniatigut soorunam
naalakkersuisoqarfiit namminneq iluminni sulisuminnik pikkorissaanerat aammalu
ingerlaqqinnissaanut sammisitsinerat taanna aamma ingerlanneqarpoq. Taanna
erseqqissaatigilaarpara malugigakku allannerusunik ilaatigut
paasiniarneqartoq.
Soorunami
aamma tassunga ilaapput allat ulluinnarni aftenskoletigut allatigullu
nikissaqarfigigaanni aamma ilinniarnikkut pikkorissarfigineqarsinnaasut
allallu.
Aalisarneq
pillugu oqallinnissarput piffissami allamiittutut isumaqarfigigakku
annertunerusumik oqaaseqarfiginngikkallassavara. Nuannaarutigalugu maannakkut
sinerissap qanittuani aalisartut, taamak taapput, kisianni aamma uagut KNAPK
siulittaasuat aamma peqataammat tassuunakkut oqaloqatiginninnerit
ingerlaqqissinnaalernerat naammaginartutut isumaqarfigaarput.
Soorunami
piumasarisaat tamakkerlugit pineqarsinnaannginnerat tamatta ilisimavarput.
Kisianni naaperiarfissatsinni ujaasinissarput taanna pingaaruteqarpoq.
Aningaasaqarnermut Naalakkersuisup nassuiaatimini erseqqilluinnartumik
oqaatigivaa silarsuarmi akit unammilleqatigiinnerit tunngavigalugit aamma
Royal Greenlandip ingerlanissaa aaqqiivigineqartoq, siusinnerusukkulli aamma
taamak aaqqiineqarsimasoq avammut tuniniaasut tuniniaasartullu akornanni,
tunioraasut immaappoq tulaassuisut avammullu niuertut.
Tassani
akit minnerpaaffissaanik minnerpaaffissaanik killiffigisaq sapaatiummat tassa
ippassaq ulloq sapaammut iserfigineqartoq unnuakkut isumaqatiginninniarnitta
nalaani Canadami tamatumap nalaani akigitinneqartut raajanut angisuunut,
taavalu aamma mikinerusunut, Kalaallit Nunaanninngaanniit akit minnerusut
taakani atorpaat unammillertitta annerpaat ilaasa. Imaappoq arfininngorneq
tikillugu tassani Canadami maaniluunniit akigitinneqartuni minnerusumik
akilerlugit raajat pisiarineqarput.
Norgemi
aamma arfininngorneq tikillugu nalunaarutigineqarpoq, minnerpaaffissani allaat
akit Norgemi atorunnaarsinniarneqartut, akit appariartuinnarneri
pissutigalugit.
Taamaattumik
ima paaseqqunanngeqaaq Royal Greenlandip naapitsiumannginnermik imaluunniit
ikiukkumannginnermik tamakkua tassunga killitsikkaat, taamaanngilaq.
Silarsuarmi unammillernerit imaannaanngitsut akornanniippugut, aammalu allat
pilluarneq ammut aallaraangat tamarmik atortarpaat aammalu qummut aallaraangat
tamatta nuannaaruteqartarluta. Kisianni taamaakkaluartoq
naapitsiniarnissatsinnut taanna periarfissaqarnissarput innersuukkumavara
oqallinnissami tunngaviujumaartoq.
Kisianni
ussernartut amerlangaluaqaat maannakkut ullumikkut oqallinnermi pisassat,
kisianni piffissami allami akineqarumaarput.
Uanili
oqaatigineqartunut tunngatillugu ataaseq Naalakkersuisuni aamma KNI
tikikkutsigu, inatsisit taakkua allannguutissai tikikkumaarpagut. Ataaseq
aamma naalakkersuinikkut alaatsinaatassarput tassa, Kalaallit Nunaanni
aningaasalersuinerit suulluunniit aallartinnissaat. Kalaallit Nunaat
ammarlugu, inuiaqatigiit ammarlugit avammut pinissarput
sapiissuseqarfigineqarparput?
Maannaakkut
Nunatsinnut aatsaat tikissimasut ukiut marluk maaneereeraangata imaluunniit
ukiut qassit taava aallarniinissaanut allanullu periarfissaanik
ammaattarpagut.
Qularnanngiivippoq
piffissaq una takusarneqartoq siulleq aqagu KNI-mi aamma oqallinnermi
atatillugu ammarneqassaaq, piumasarisat tamakku qasukkaallatsinnissaat
Naalakkersuisut aamma siunnerfigaat. Taamaalilluni avataaninngaanniit aamma
piginneqataallutik aningaasaliiniartunut Kalaallit Nunaat
kajungernarnerusunngorlugu ammaaffiginissaa aamma eqqarsaatini
tamakkunaniimmata. Taamaattumik aamma tassani siunissami periarfissagut
tassaniittut alaatsinaalluinnarnissaat pisariaqarpoq.
Partiinut
ataasiakkaanut tunngasumik oqaaseqanngikkaluarlunga, una oqaatigilaarlara
ataatsimiititaliortarluta aamma ingerlanerput ataatsimeersuariartarlutalu
pissutsit suleriaatsitsinnut ilaapput, nuannarigaanni
nuannarinngikkaanniluunniit taakkua suliassanut ilaasarput. Kisianni aamma
ataatsimeersuarnerit pisariaqavinnersut Ottop oqarneratut
nalilerneqarsinnnaapput, aamma ataatsimiititaliap suliassaq taanna allap
ingerlaareersup suliarisinnaappagu aamma nalilerniartariaqarparput taanna,
taamaalilluni ataatsimiititaliap aamma kinguarsaataasarnerat isumaqarpunga
aamma alaatsinaattariaqartoq taamaalisoqaqqunagu apeqqummi uani.
Naatsumik
oqaatigalugu Naalakkersuisut uani saqqummiussaat, qujaqqusaanngikkaluarluta,
aamma uanga qujassutiginiarpara maani taamatut ilassilluartutut misigimagakku, taamaattumik qujaqqusaanngikkaluarlunga
partiit oqaaseqartuinut aamma uanga Naalakkersuisut sinnerlugit taamatut
qujassuteqassaguma tupigineqassanngilaq.
Isumaqarpunga
ingerlaqqinnissatsinnut taakkua sisamat maannakkut aallartittagut ukiunilu
tulliuttuni aamma allanik ilasassagut aallaavigalugit maannakkut
iluarsaaqqinniarnermut alloriarnerput ilassilluarneqartoq. Tamannalu suli
ataasiarlunga qujassutigeqqippara.
Josef
Motzfeldt,
Aningaasaqarnermut Naalakkersuisoq:
Siullermik
akissuteqarnerma kingorna oqaatigineqartut tikitsinnagit, partiit
oqaaseqartuisa oqaaseqarnerminni siullermik oqaasiisa ilaat
oqaaseqarfiginngitsuukkakka oqaaseqarfigilaassavakka.
Assersuutigalugu
sanaartornermi sulisut Nunatsinniittut suliaqartut sinerissami sumiiffinni
najugaqarfimminniit Nunatta ilaanut allanut nuttarsinnaanerannut
aningaasaateqarfeqarsinnaanermik Inuit Ataqatigiit siunnersuutaat,
Naalakkersuisuni oqaluuserisakkatta ilagivaat. Tassanilu kisimiilluta taanna
aaqqissinnaanngilarput. Sulisitsisut tamakkulu sanaartornermik ingerlataqartut
peqatigalugit taanna nalilersortariaqarpoq piviusunngortinneqassappat
aningaasartaqassammat taamatut nuukkasuarsinnaaneq.
Kisianni
nammineq naammassisaqarsinnaassuseq takusarlugu ilaanni soorunami
tupigusuallannalaartarpoq Tasiilaminngaanneersut Qaanaami sanasinnaasut
takusarlugit aammalu Kangaamiuninngaanneersut Upernaviup eqqaani
sanaartornermik ingerlataqartartut takusarlugit. Taanna nammineq
ingerlakannereersutut isikkoqarpoq, kisianni pisariaqarsinnaavoq maani
oqaatigineqartut aamma ilumoormata Nunatta ilaani qartoralersumi
sanaartugassani ingerlatassani inuttassaaruttut Nunatta sinnerani allani
sanaartornermik ingerlataqartut suliassaaleqisarnerat taamatut
qaangerniarneqassappat.
Una
aalisarnermut tunngatillugu aaqqiissutaasinnaasuunik ulluni makkunanerpiaq
pisut taavalu aamma ungasinnerusoq eqqarsaatigalugu piumaartussat
aaqqinniarnerini Inatsisartut massakkut oqaaseqallattaapput, aamma taanna
Naalakkersuisut ilassilluarparput. Nalilersuilluinnaleruttali eqqaamasassarput
tassaajumaarpoq kingunerisassai tuniluullutik aningaasat nalikilliartornerata
kingunerisassai isumaqatigiinniarnernut tunngasut aamma Inatsisartut
nalilersorumaarmatigit.
Aningaasaqarnermut
Naalakkersuisutut siulima nammineq eqqaamassavaa 1998-imi ukiakkut kattuffik
ataaseq, kattuffimmi ataatsimi ilaasortat iluaqusiivigineqarnerat
isumaqatigiissuteqarnikkut ukiuni ukunani isumaqatigiinniarnerni 1999-imi
2000-imilu isumaqatigiinniarnerni aaqqinniartariaqarsimagatsigu. Karsimi
ammaarujussuarsimaneq 1998-imi ukiumi kingullermi 1999-imi 2000-imilu
isumaqatigiissutitigut aningaasanik nalikilliartortitsinermi assut annertuumik
sunniuteqarsimavoq. Aningaasat pisissutaasinnaanerat
qarajarneqarujussuarsimavoq, kattuffik ataaseq kisiat taamaaliorsimassagutsigu
eqqunngitsuliornerussaaq, kattuffiit allat tamarmik takkupput, uagut aamma
taamatut pineqarumavugut.
Taavalu
Otto Steenholdtip aamma ilaatigut oqaatigivaa Naalakkersuisut Inatsisartuni
ilaasortaatitatik naalakkisaartittarsimassagaat. Nammineq taanna
misigisartagarisimasaminik oqaluttuarneranik nalilerneqassappat taanna
ajorinngilara, kisianni suleriaatsigut uanga parteera nammineq
eqqarsaatigalugu naalakkersuisuutitaqartutut Naalakkersuisuni ilaasortatut
Inatsisartuni ilaasortaatitagut naalakkisartissimassagutsigit Otto
Steenholdtip takorluuineratut taama aqitsiginngillat, nammineq isumaqarput,
nammineq isummersuutitik Naalakkersuisuutitaqaraluarunilluunniit
illuatungilersupatarnartarpaat.
Kiisalu
illut assigeeqqinnaat assigiinngitsumik akilersortinneqalernissaanik Ottop
tatamiiaarutaa Sanaartornermut Ineqarnermullu Naalakkersuisup
akissuteqarfigereeraluaraa, isikkivik ataaseq, illu ataaseq, angissuseq
ataaseq, pisoqaassuseq ataaseq assigiinngitsuninngooq akilersortinneqassasoq.
Sanaartornermut Ineqarnermullu Naalakkersuisup oqarneratut, ikiorsiissutinuku,
meeraqassuseq, isertitaqassuseq najoqqutaralugit boligsikringi ullumikkumut
tunniunneqartarpoq. Massakkut
pitsannguallatsinneqassaaq akiliut toqqammaviusoq assigiissaaq, kisianni Otto
Steenholdt meeraqqortussuseq isertitakissuserlu najoqqutaralugit taakkua
asattuukkusunngippagit, taanna Otto kisimiikkami taamatut maani Inatsisartut
oqariartuutiginnguariarliuk.
Tapiissuteqartarnertigut
pisariaqartitsisut ikiorsiivigineqartariaqarput, tassalu taanna Naalakkersuisut
aaqqiiniutitsinni Inatsisartuni siusinnerusukkut amerlanerit
oqaatigisarsimasaanik toqqammaveqarluta aaqqiiniutissatut
saqqummiutiligarput.
Kiisalu
ileqqaarniarnermut suliniuteqartussamik ataatsimiititaliornissaq
Naalakkersuisut Inatsisartunut isummerfigeqqullugu Otto Steenholdtip
siunnersuutaa, amerlanerusunik tunuliaqutaqarpoq Otto Steenholdt
siunnersuutaa. Inatsisartut Siulittaasoqarfiata ataatsimiititat suut
qaqugukkut pilersinneqassanersut isumagisassaraa. Qanorli
Naalakkersuisuninngaanniit qalliunialeraluarutta
apeqqummi tamatumani qanoq uparuarneqassagaluarpugut. Naalakkersuisut
Inatsisartunut aqutsisuunngillat.
Kiisalu
Daniel Skiftemut ullumikkut oqaasii uanga oqaaseqarninni/akissuteqarninni
toqqammavigaakka, siusinnerusukkut oqaatigisarsimasai ullumikkut
pineqanngillat. Ullumikkut oqallinnermi oqaatigineqartut oqaaseqarninni
siullermi akissuteqarninni toqqammavigaakka. Ilaatigut peqqinnissaqarnermi
tamakkiisumik aaqqiissuteqarnissamik siunnersuuteqarsimapput
1999-imioqqooqaaq. Tamatuma kingorna taanna Naalakkersuisut namminneq
ingerlassinnaasutut siunnerfeqaraangat taanna ingerlanniaannarsimagaat uanga
paasivara.
Kiisalu
Daniel Skiftep ilanngullugu apeqqutigaa, Aningaasaqarnermut Naalakkersuisutut
Naalakkersuisut sinnerlugit oqarama, ukiut 5-it, 10-it 15-illu angullugit
sanaassat annertussussai najoqqutaralugit nunap immikkoortuini sumi qanoq
ittunik sanasoqassanersoq Siumukkunngooq qanga taanna akuerigamikku.
Naalakkersuisut sinnerlugit uanga oqaaseqarpunga, naluara illit
Naalakkersuisuugallaravit immikkut tamassi immikkoorlusi isumaqarlusi
oqaaseqartarsimanersusi. Naalakkersuisooqatigiit massakkut taamaanngillat.
Taamaattumik
una karsip ammartoortarneranik oqarneq oqaaseqarfigereerakku, taanna annertunerusumik
tikeqqissanngilara. Kisiannili Atassutip oqaaseqartuata uparuartorneqarnertik,
tassalu anguniakkat tikkuussisinnaanngissuseq imaluunniit aqqutissanik
tikkuussisinnaanngissuseq takoqusaarutitut tanngassimaarutissamisut
isigineqarumappat Atassumminngaanniit naalakkersuinikkut
Naalakkersuisuininngaanniit tamanna erloqissutaanngilaq, kisianni
Inatsisartoqarnermut kusassaataanngilaq.
Taamatut
Naalakkersuisut siunissami takorluukkamikkut ukiarmi saqqummiutaat
annertunerusumik tikeqqinngikkaluarlugu Mogens Kleistip aamma oqaasiinut
utertitsiffigilaassavara. Tassalu sulisitsisup oqaasii, imatunngooq imatullu
oqarmata, sulisitsisup oqaasii ilumoorput. Mogens Kleist nammineq
annertunerusumik isummersunngilaq, taakkua taamatut oqarmata, tassa
ilumoorput.
Ilaannikkut
qinikkatut isummat suulluunniit saqqummiunneqartut pisussaaffigaagut
nalilersussallugit misissussallugit, ilisimasagut najoqqutaralugit
pisariaqarput illuatungilersussallugit.
Akileraartarneq
Inuit Ataqatigiit Siumullugooq kisimik taanna niaqorluutissaraat Kattusseqatigiinngooq
susassaqanngillat apeqqummi tassani utaqqiinnassapput. Uagut taanna suliassaq
isumaginiarparput, aamma Atassutikkut paasivakka peqataajumasut
nutarteriniarnissami. Suliassat tulleriaartariaqarsimavagut massakkut ukioq
manna aallutavugut ineqarnermut, usinut assartuinermut akinut tunngasuupput.
Massakkut tullinnguullugu suliarinialigarput tassaavoq akileraartarnermut
tunngasunut apeqqut, taannalu Inatsisartunut soorunami saqqummiutissaqqaarparput.
Aamma
Mogens Kleist siullermik oqaaseqarnermini oqaatigaa, Ilisimartusarfiup
annertusarneqarnissaa ikittuinnarnut iluaqutissatut nalileritsik namminneq.
Inuiaqatigiinnut tamanut, naluara inuiaqatigiit 56.000-iugattami
ikittuinnaavugut. Kisianni inuiaqatigiit ataatsimut isigalugu inuiaqatigiinnut
ataatsimut iluaqusiinissaq tamatumunnga siunnerfigineqarmat
Mogens Kleistip arajutsisimassanngilaa.
Kisianni
pingaaruteqartoq tassaavoq aamma oqaaseqartut arlallit oqaaseqarneratut
Naalakkersuisunut pingaaruteqartoq tassaavoq, kiffartuussineq,
kiffartuussineq kiffartuussinerinnaq qimallugu massakkut tunisassioriaatsinik
nutaanik inuussutissarsiutinik ingerlatsinissaq naleqarnerulersitsineq
Inatsisartunut qujanartumik amerlanernit ujartorneqartoq Naalakkersuisut
paasivaat. Taannalu uagut ingerlanniakkatsinnut ikorfarissavarput.
Kiisalu
naggaterpiaatigut Daniel Skiftemut Atassut sinnerlugu oqaaseqartumut
oqaatigissavara isertitat Landskarsip isertitaasa ingerlatsinermilu
aningaasartuutit akornanni aatsaraluttuinnarneq assigiinngissut
alligaluttuinnartoq uparuartormagu innersuussutigerusuppara, aningaasarsiorneq
pillugu nalunaarusiami quppernerit 17-ianni tabel 2.2.3-mik
nalunaaqqutserneqarsimasoq, tassani takuneqarsinnaavoq 1996-imingaanniit
1999-imut Naalakkersuisut siulitta ingerlatsinerisa nalaanni isertitat
tamakkiisumik annikinnerusimasut ingerlatsinermi aningaasartuutininngaanniit.
Annertunerpaaq
tassaasimavoq 1998-imi taamanikkut Aningaasaqarnermut Naalakkersuisoq
Naalakkersuisullu allaapput, ingerlatsinermut aningaasartuutit taamanikkut
5,9%-imik qaffariarsimapput isertitat taamaallaat 3%-imik qaffariarsimasut.
2000-imi
Naalakkersuisut nutaat naatsorsuuteqarfiat siulleq eqqarsaatigissagaanni
ingerlatsinermut aningaasartuutit taamanikkut 1%-imik qaffariarsimapput,
taavalu isertitat 4,6%-imik qaffariarsimallutik. Taamaammat
ajornartorsiuterujussuartut Daniel Skiftep eqqaasaa ukiuni kingullerni
aaqqinniarsarineqartut ilaatigut Inatsisartut missiliuutinut inatsisaata
atulernerata kingornatigut aaqqinniarneqarput, Naalakkersuisut
ilungersuutaannut eqqunngilluinnartumik naliliineruvoq, taannalu Daniel
Skiftep nassuiartariaqarpaa sumik taanna toqqammaveqarluni uparuaaneq
uparuaassutiginerlugu.
Jĝrgen
Wĉver Johansen,
Isumaginninnermut Suliffeqarnermullu Naalakkersuisoq:
Kattusseqatigiit
oqaaseqartuat Mogens Kleist paasinnilersimammat qujavunga. Aamma qujavunga
suliassaqarfik tamanna maannamiit annertusarneqarnissaa pillugu
suleqataarusunnertut paasisara ersersikkakku qujanarujussuaq.
Atassutip
oqaaseqartua Daniel Skifte paasivara sulisussat nooqattaarsinnaanerisa
pisariillisarneqarnissaa pillugu tamatuma aaqqissuunneqarluni
piviusunngortinneqarnissaa taperseraa.
Malunnarpoq
partiit tamarmik tamanna kissaatigigaat, taamaattumik suliassaq
aallartisarneqassaaq.
Otto
Steenholdtimut oqaatigerusuppara ukiuni kingullerni qulingajanni Qallunaat
Nunaanni suliffeqarnermut politiki ingerlanneqarsimasoq iluatsilluarpoq.
Qanorluunniit Qallunaat Nunaanni naalakkersuisut isumaqarfigigaluaraanni
tassani iluatsilluartumik ingerlatsipput, kisianni tamanna
assortuussutigissanngilarput tamaani. Aamma piginnaanngorsaaqqinnikkut
ingerlataat ajortuinnaasimanngimmata angusaqarfiupput. Ataaserli, taannalu
pingaarnerpaavoq, ataaserli qularissanngilat aamma tamanna neriuppunga
maluginiarumaarit Naalakkersuisut piginnaanngorsaaqqinnermut siunnersuutaat
atuarukku, tassalu peqqussutissatut siunnersuut Nunatsinnut tulluussarlugu
ilusilersugaammat.
Otto
oqarfigissavara uanga pissuserissaarnertut isigaara qujasinnaaneq, aamma naak
qujarukkaluarlugu siunnersuerusuttarnerit misigisimanngilanga
pisariaqartillugu ilitsersorneqassallunga sunik qanorlu oqaluttarfik manna
atorlugu oqaaseqassanerlunga.
Aamma piffissaajaaneq aperilaarlanga, kikkut isaanni? Kikkut naliliinerat toqqammavigalugu? Kinamita piffissaajaanerua? Uanga tamanna nalilersorusunngilara, qujanaq.
Ruth
Heilmann, Siumut:
Naatsunnguamik
aamma oqaaseqalaarusuppunga. Tassa naalakkersuinikkut aningaasarsiornikkut
ingerlatsineq pillugu nalunaarummi aningaasarsiornikkut suli pitsaanerusumik
inissisimalernissarput anguniarlugu annerusumik aalisarnikkut aamma
suliffissuaqarnikkullu ullumikkut pissusiulersut pitsaanerusumik
alloriarfigineqarnissaannik iliuusissanik siunnerfiusussanillu
Naalakkersuisunut Inatsisartut arlalinnik
arlippassuarnik isummersuutinik aamma isumaqatiginartunik saqqummiutaqarput.
Aamma
Naalakkersuisut oqarput kissaatigalugu aqqutit nutaat aamma periutsit nutaat
atorlugit ingerlaqqittariaqartugut. Uangaana maqaasilaaringa, tassa
takornariaqarnikkut massakkut killiffigisarput aamma aningaasarsiornikkut
qanoq pingaaruteqartigisumik inissisimanerani uani annerusumik
eqqaaneqarpallaannginnera. Annikitsumik eqqaaneqarsimavoq, kisianni taamatut
ukiuni kingullerni aamma inuutissarsiornikkut sukat sisamaattut aamma
takornariaqarneq isumalluutigalugu ingerlaqqinnissatsinni, tassami
takornariaqarneq aamma suliffissaqartitsinikkut pingaartumillu aamma
qularnanngitsumik piginnaanngorsarnikkut iluaqutaasussaavoq.
Akunnittarfinnik
inerisaaneq aammalu tassanilu suliffeqarnikkut aamma inerisaaneq, pingaartumillu
nunaqavissut tassani peqataatinneqarnissaat annerusumik aamma qanittukkut
takornariaqarnermi isumasioqatigiinnermi kissaatigineqartoq angisooq aamma
saqqummiunneqarpoq. Aamma takornarissat amerlasuut tikisinneqartarneranni
niuertarfinni tunisaqarnerunermut soorunami aamma tassuunakkut
aningaasarsiornikkut iluaqutaasussaapput.
Mittarfiit
pilersissimavagut akisuut aammalu angallanneq akisooq massakkut ingerlallugu.
Taamaattumik takornarissat avataniit tikisitassagut amerlanerunissaannik aamma
inuutissarsiornikkut tassuunakkut iluaqutaasussaanerat eqqarsaatigalugu suli
annerusumik takornariaqarnerup sammineqarnissaa kissaatiginarpoq.
Takornariaqarnerlu ilumut inuutissarsiutitut akuerineripput aamma
kissaatigaat, qanittukkut isumasioqatigiittut annertuumik
oqallisigisariaqartutut isigalugu inuiaqatigiit akornanni, aamma
inuutissarsiornikkut iluaqusersuutaalluarsinnaanera tassani eqqaaneqarluni.
Eqqumiitsuliorneq
aammalu assarsorneq sammineqarluartut nalunngilagut, aamma eqqaaneqarput
utoqqalisut susassaqartinneqarnissaat tassani aamma qiviarneqarluni.
Isumaqarpunga aamma utoqqalisut assarsornikkut kiisalu eqqumiitsuliornikkut
annertuumik piginnaanerat atorluarneqartariaqartoq. Nalunngilarput Thue
Christiansen sinerissami angalaarpoq aamma iluaqutaasumik eqqumiitsuliornikkut
siunnersuineq annertooq ingerlallugu.
Isumaqarpunga
aamma ammerinikkut suli annerusumik qularnanngitsumik tassuunakkut immaqa
tapertalerlugu aamma siunnersuineq annerusoq aamma
ingerlanneqartariaqaraluartoq, tamanna uanga eqqarsaatissatut massakkut
tunniukkusuppara.
Aamma
aappaatut eqqaalaarusuppara inissianik sanaartugassanik pilersaarusiortarnerup
massakkut pisariuallaartumik ingerlanneqartarnera assorujussuaq kommunini
erloqissutaammat. Tassa kinguartooruteqarneq pissutaaqataasarpoq
aqqusaagassarpassuit aqqusaaqqaarneqaqqaartarnerat. Kommunimi teknikkeqarfik
INI-p immikkoortortaqarfia, INI-p qullersaqarfia, direktoratit,
Naalakkersuisut aamma Aningaasaqarnermut Naalakkersuisoq kiisalu
Aningaasaqarnermut aamma Inatsisartuni Ataatsimiititaliaq. Taamaattumik
eqaannerujussuarmik immaqa aaqqissuussisoqarsinnaagaluarpoq aamma
sanaartorneq pilersaarusioriigaasoq pitsaasumik ingerlatissappat. Kiisalu
aamma aningaasaliiffigineqartartut taakku iluatsittumik ingerlassappata
isumaqarpunga pilersaarusiorneq suli ullumikkornit eqaannerusoq aamma
pisariinnerusoq ingerlanneqartariaqartoq, qujanaq.
Michael
Petersen, Siumup
oqaaseqartua:
Siullermik
Naalakkersuisut akissuteqartut akissuteqaataannut qujanaq, tassa
qujajuassaagut.
Kultureqarnermut
Ilinniartitaanermullu Naalakkersuisup akissuteqarnermini oqaatigaa, saqqummiussarput
naammassiniarniarlugu, tassa Aalisakkerinermut Ilinniarfiup aammalu
ilinniartitaanerup nutaamik aaqqissuuteqqinneqarsinnaanera pillugu, tamanna
nuannaarutigaarput.
Kisiannili
paatsuulaarsimagunarpaatigut, tassa ilanngullugu oqaatigigatsigu Sisimiuni
Sanaartornermut Ilinniarfiup allilerneqartariaqarnera pissutigalugu
Sanaartornermi Ilinniarfimmi ilinniakkat nutaat assigiinngitsut
aallartissimammata, aammalu massakkut inissaaleqineq aallartereerluni, aamma
kollegiat eqqarsaatigalugit. Taamaattuminguna inassuteqartugut Naalakkersuisut
misissoqqissaartariaqaraat Sanaartornermut Ilinniarfiup pisariaqartitsinera
avatangiisimigut annertusaaffigineqarnissamut aammalu ilinniartut ineqarnerat
eqqarsaatigalugu.
Taassuma
saniatigut akissuteqaatigineqartut assigiinngitsut assorujussuaq
nuannaarutigaagut, tassa ilaatigut Sanaartornermut Naalakkersuisup Steffen
Ulrich-Lyngep erngup nukinga atorlugu sanaartugassatut pilersaarutaasut
eqqartorneqartartullu, taakkua naammassiniarneqarnissaannut Naalakkersuisut
sulinertik sakkortusiniaraat oqaatigimmagu.
Kiisalu
Simon Olsen Aalisarnermut Naalakkersuisup ilanngullugu akissuteqaataa
assorsuaq aamma nuannaarutigaarput, tassa nutarterinissani assigiinngitsuni
piumasaqaateqarnerput aamma ilassilluarlugu suliallu aallartinneqarnissaat
avaqqunneqarsinnaanngitsoq ilanngullugu oqaatigimmagu.
Naggasiullugu
oqaatigiinnassavara Aningaasaqarnermut Naalakkersuisup akissuteqarnermini
akissuteqaatigeqqitai ilanngullugit tusaatissatut tigugatsigit.
Simon
Olsen,
Inuussutissarsiornermut Naalakkersuisoq:
Tassa
Uummannamut tunngatillugu akinialuusaartarnermut tunngatillugu
oqaatigissavara, sivisuumik maannakkumut sulilu aalajangeruminaatsumik
inissisimavugut, tassa nunami suliffiit pingasut, tassa Qeqertarsuaq,
Qasigiannguit taavalu aamma Paamiuni pujoorivik pissutigalugu
suliassaqartitsiniarneq tassani Naalakkersuisoqarfitsinniinnaanngitsoq suliaq
taanna ingerlanneqarmat, taannalu neriuppunga paasilluarneqassasoq, qujanaq.
Daniel
Skifte,
Atassutip oqaaseqartua:
Aningaasaqarnermut
Naalakkersuisoq suli malersuiniakujummat una erseqqissassavara. Naalakkersuisut
nalunaarutaat oqaaseqarfigaa Atassutip, taava Aningaasaqarnermut
Naalakkersuisup akivaa ilaatigut oqaatsit makku atorlugit: ASiunnersuuteqanngilasi ajorpoq, ajorpoq, ajorpoq@.
Taava Aningaasaqarnermut Naalakkersuisoq taamatut paasinnissimassappat uanga
akisussaatut pisariaqarpoq oqaaseqarfigissagakku erseqqissassallugulu.
Taamaattumik Naalakkersuisumut ilaasortap taamatut paasinnissimanera
erisarpara igamut ikeriaannanngorlugu, una allatut
paasineqartariaqassanngilaq, taava igaarput immaqaana sakkortunaalaarsimagipput/kimittunaalaarsimagipput,
taamaattumillu paasinninnissaq eqqortuugaluartoq eqqortuunngitsunngortikkaa,
tassami uagut aamma oqaaseqaqqinnitsinni oqarpugut, isumaqatigiissutigut ila
arlaqaqisut. Tamakkulu erisaanermik oqarninni tunngavigaakka, qujanaq.
Otto Steenholdt, attaviitsoq:
Aap tassa Inatsisartut uanga inattornianngilakka qujaneq puioqqullugu, taamaanngilaq ingasaanneqaleraangamiuna tusarnaarlugulu ikinngutaannarnut qujanersuaq qattunnarsisartoq, taanna paasinerlunneqassanngilaq, aamma akerliusut qujatsavigineq ajornanngillat isumassanik kusanartunik tunisippata, taannalu aamma maani atortarparput.
Tassaana uanga ukua Naalakkersuisut partiitik oqaluttorisarmatigit taanna pinngitsoorneqarsinnaanngilaq, oqaluttorisarpaat anguniakkatik anguniarlugit, taamaattumillu mianersorfigisariaqarpoq utoqqatserpunga illuatungiliuttuninngaanniit taamatut oqassagama, mianersorfigisariaqarpaat suleqatigiinniarlutik imminnut akerleriilinnginnissaat maani inimi, uagut illuatungiliuttugut atorluarsinnaagatsigu piaanerpaamik taasisitsinermik kingunilimmik, taanna mianersuutigalugu Naalakkersuisut Inatsisartuni ilaasortaatitatik oqarfigisarpaat, una isumaqatigiissut ingerlatissavarsi.
Taavalu ataatsimiititaliornissamik eqqartuinera taanna sanimut iliinnarneqanngitsutut paasivara, ilungersunaqimmat ingerlatsinermi aningaasartuutit amerligaluttuinnarneri uteqattaartuaratsigu.
Qanormitaava issagaluarpa ukiamut Naalakkersuisut saqqummiussisinnaasuuppata tamannarpiaq pillugu Inatsisartunut immaqa alloriarnerussagaluarpoq siulleq kusanartoq aningaasaqarniarnitta naalliunnartuisa ilaat taamaalillugu oqallisigisinnaassagaluaratsigu.
Tassa Iniuit Ataqatigiit oqaluttua qutsavigissavara nassuiarmagu taanna silarsuaq inuppalaarnerusoq, tassa paasivara nassuiaataa ataatsimiinnermi Nunatta avataani pisimasumi taanna qulequtsiunneqarsimasoq, paasivara, tassa imannaguna uangaasiit pigaluarakku, immaqaaku inuit pigaat, silarsuaq pinnagu, ajunngilaq tassa paasivara.
Godmand
Rasmussen, Atassut:
Una
oqallinneq uanga nalilerusuppara imatut, allaanngiivippugut
iggarinneqqusaattut, taamaavimmik pitsaanerpaarpaamik inuit imminnut
takkorliuttaqattaarput. Nuanniittorlu uaniippoq illuatungiliuttuulluni
illuatungiliuttutut oqaaseqarsinnaatitaaneq ataqqineqannginnera uanga taanna
aporfigisaqaraa.
Kiserngaassilluni
naalakkersuisorusunnerup ersiutaa tassani ersarittaqaaq uani, taanna kialluunniit
paatsoorsinnaanngilaa. Naalakkersuisut Siulittaasuata aningaasaqarnermut
erseqqissumik oqaatigisaa una uniffigilaarpara, issualaassavara
naatsunnguummat: Aukiuni
kingullerpaani aningaasaqarnerput qaffakkiartorsimagaluartoq Naalakkersuisut
isumaqarput inuiaqatigiit aningaasaqarnerata malunnaatilimmik
qaffakkiartornissaa imaaliallaannarluni ilimagineqarsinnaanngitsoq@.
Takuat oqaatsit takisuut atorneqarsinnarlutik annilaanganeq ersarissoq tassani
erserpoq. Taamaattumik oqartoqarsinnaanngilaq suna tamarmi kusanarluinnartutut
ingerlasoq, ilaatigut oqaluttup ilaatigut taanna ersersinneqaqattaaqimmat.
Aamma
maqaasivara una Nunatta iluani ingerlatseriaatsimi allannguiniarnermi,
maqaasisaqarpunga ataatsimik. Nunatta iluani takornartaajunnaarpoq
pingaartumik avannaatungaani aalisarneq suli ukiorpasissorsuaq
unitsinneqartarmat assartuineq. Naalakkersuisunut
taanna isumassatut tunniuterusuppara. Suli periarfissarissaartorujussuusoq
Nunatta iluani aningaasarsiorneq umiarsuarnik assartuisinnaaneq
unitsinneqartarpoq, oqartussaaneq Nunatsinniippoq.
Avannaa
tungaa Uummannakkut qanoq iliorpat ukioq manna? Aatsaat sikuinnartoq
suliffissuit matoorarpalulerput ulikkaarlutik Ilulissakkut Upernavikkut.
Nunatsinni
aningaasarsiorneq eqaallisassagutsigu tappiffigisinnaasagut tamakku
pissusitoqqanut maggutiinnarata allanngortillugit massakkut
eqaallisarnerusariaqalerpagut.
Sinneqartoorsinnaaneq
aningaasanik eqqartorneqarnera nuannerpoq, kisianni aamma maqaasisaqarpunga.
Massakkut soqutaanngilaq akineqanngikkaluarluni kingusinnerusukkut
akineqartussamik Naalakkersuisut uanga aperiniarpakka.
Oqaluttarfimminngaanniit maangaanniit takornartaajunnaarpoq selskabit maani
ilaasa ingerlanerisa pitsaavallaannginnerat. Angallannermut pisut
eqqarsaatigigutsigit, Angallannermut Ataatsimiititaliaq neriorsorneqarpoq 30
mio. kr.-inik sinneqartuussasugut, kisianni paarlattuanik 30 mio. kr.-inik
amigartoorpoq.
Royal
Greenland qanoq piva, milliarderpassuit kaavitikkamigit 11 mio. kr.-it
sinnerlugit sinneqartoorpoq. Pissutsit taamaattut Naalakkersuisuni
ingerlaannassappat? Inuit aqutsinermik ilinniarsimanngitsut taamaattut
aqutsisuujuaannassappat?
Ataatsimut
isigalugu annernassagaluarpalluunniit oqassaanga, tamakkuninnga
atorfinitsitsisarnermi inuttarsiuineq peerniarli. Inuk pingaarnerunngilaq
inuiaqatigiit pingaarnerpaapput pitsaasumik ingerlanissaat, taanna
eqqarsaatiginiarsiuk.
Ussernartoqarnaraluaqisoq
taama naatsunnguamik oqaaseqaannarpunga.
Ole
Lynge,
Inatsisartut Siulittaasuat:
Tassa
una oqaatigisariaqarpara aqutsisutut soorunami inuit aperineqarlutik
isornartorsiorneqarlutik oqaaseqarfigineqaraangamik aamma akeqqittarnissaat
maanngaanniit aqutsisuniit isumaginiartaratsigu. Massakkut nalunaaquttap
akunneri tallimat immikkoortoq ataaseq oqaluuserereeratsigu
naammassinialiassavarput. Tullinnguuttut naattukullaannik oqaaseqarnissaat
kissaatigissavara oqaluuserisap naammassinissaa siunertaralugu.
Ruth
Heilmann, Siumut:
Unaana
Siumuminngaanniit isummerfigeqquneqartoq aamma Aningaasaqarnermut Naalakkersuisup
kiisalu Ottop siunnersuutigimmagu tassa allaffissornikkut ingerlatsineq
aaqqissuusseqqinnissaq pillugu suleqatigiissitaliamik pilersitsinissamut
saqqummiutaa.
Kisianni
aamma nammineerluni oqaatigivaa una Naalakkersuisut kissaateqarfigalugit
ukiamut saqqummiissasut allaffissornikkut qanoq ingerlatsinermik ullumikkut
aaqqissuussisoqarnera. Taanna Siumuminngaanniit isumaqatigaarput, tassami
ukiuni kingullerni annertuumik allaffissornikkut aaqqissuusseqqinneq
allaffissuarmi maani ingerlanneqarsimavoq, siunnersuisunik aammalu
assigiinngitsunik immikkut ilisimasalinnik ikiorteqarlutik taamatut
ingerlanneqarsimalluni. Taamaattumik piffissanngorsoraarput aamma
Siumuminngaanniit taanna pillugu Naalakkersuisut saqqummiussaqarnissaat,
taannalu kissaatigaarput ukiamut naammassiniarneqaqqullugu.
Mogens
Kleist,
Kattusseqatigiit oqaaseqartuat:
Tuusimununa
oqaaseqarniarlunga akileraartarnermut tunngasut oqaatigivara Siumukkut Inuit
Ataqatigiikkullu taanna isumaqatigiissutigisimasaat taamatut
Naalakkersuisunngortitsinerminni taanna taakkartorpara. Imaanngilaq uagut
ilaaffiginianngikkipput, soorunami ilaaffigissavarput.
Aammalu
sulisitsisunut tunngatillugu oqaaseqarama oqarpunga, sulisitsisut taamatut
oqarsimasut imaanngitsoq uanga aalajangereerlunga tassa taamatut sulisisisisut
uanga toqqammavigissagikka, oqaannartungaana sulisitsisut ima oqarput,
imaanngilaq uanga taamatut oqartunga. Oqaaserisimasaanuku toqqammavigalugit
aammalu Ilisimatusarfissamut tunngatillugu. Uagut akerlerinngilarput
taassuma Ilisimatusarfiup pilersinneqarnissaa, aningaasartai taamatut
aningaasatigut inissisimanerput toqqammavigalugu uagut imminnut
artukkersinnaanerput taanna mianerisassatut oqaatigerusukkatsigu.
Aammalu
utoqqalinersiutillit ukiut qulit qaangiuppata taakkartorneqartuninngaanniit 70
mio. kr.-it tikillugit taakkununnga aningaasaliisassagutta
maannakkuminngaanniit ileqqaartariaqarpugut ersarissumik aqutsinermik
aningaasarsiornikkut pilersaarusiornermi.
Josef
Motzfeldt, Aningaasaqarnermut
Naalakkersuisoq:
Tassa
oqareernittut Naalakkersuisuni aalajangissanngilarput/naalagaaniarfigissanngilarput
aamma Inatsisartut sunik ataatsimiititalianik pilersitsissanersut.
Eqqaasitsissutigiinnassavara
Naalakkersuisuninngaanniit Inatsisartut inatsisaat najoqqutaralugit ullumikkut
aningaasatigut ingerlatsineq oqallisigaarput, tassani suut sipaarutaasinnaasut
partiit periarfissaraat tikkuartussallugit.
Ukiakkut
ataatsimiinnermi aningaasanik ingerlatsinermi nassuiaat budgetredegĝrelse
nalunaarut oqaluuserisarparput, partiit tikilluaqquneqarput
inerteqqutaanngilaq partiini tikkuartuissalluni suut tassani
sipaarutaassanersut.
Ukiakkut
qaammatit marluk aningaasanut inatsisissaq suliarisarparput sipaarutissanik
tikkuartuisoqassappat periarfissanik ulikkaarpoq. Taamaattumik allaanngilaq
oqartussaarutiinnarneq pillugu ataatsimiititaliornissaq taalutsiullugu
ingerlatsiniartugut. Massakkut Inatsisartut aningaasanut inatsisaanni pisariillisaanermut
aningaasaliisoqareerpoq Inatsisartut akuerisaannik, tassani allaffissornermi
sipaarniutaasinnaasut, ingerlatsinermilu
naliginnaasumi sipaarniutaasinnaasut tassani aningaasaliinikkut sulisut
ingerlappaat piviusunngortinniarsaralugit. Taassuma saniatigut
allaffissornerit immikkut sammineqarnera ASukaq@
taama atserlugu suliaq ingerlanneqarpoq. Taamaattumik ilaatigut
ataatsimiititaliornerit pisariillisaataanatik pisarissersuutaannaasarmata
massakkut suliniutigineqarsinnaasut periarfissaat taamatut
Naalakkersuisuninngaannit Inatsisartunut eqqaasitsissutigilaarpara.
Naggaterpiaatigullu
oqaatigissavara aningaasanut inatsimmi ukioq mannamut atuuttumi, ukioq manna
35 mio. kr.-inik sinneqartooruteqarnissarput tassa aalajangiusimaneqarpoq,
ukiuni missingersuusiorfiunni 15 mio. kr.-iugallarput. Kisianni kiap Atassut
inertissavaa 15 mio. kr.-inik sinneqartooruteqarnissaq sullugiguniuk
aningaasanut inatsisissami sulinermi ukiamut augustip
aallartinneraninngaanniit ingerlanneqartussami, Atassut siunnersuuteqassappat.
Naalakkersuisuninngaanniit taanna tusarusuttorujorujussuuarput. 15 mio.
kr.-ininngaanniit amerlanerusunik sinneqartooruteqarnissaq Naalakkersuisut
suliniutigalugu ilungersorput. Ullumikkut Atassut tikkuagaqanngilaq
sullugiinnarpai.
Atuarfeqarnermut
ilanngaassuugut? Napparsimaveqarnermik ilanngaassaagut? Ilinniartitaanermut
ilanngaassaagut? Sumi ilanngaassaagut 15 mio. kr.-ininngaanniit taanna
tusarusupparput. Tikilluaqqusaavusi aningaasanut inatsisissamut siunnersuutip
suliarinerani sipaarutaasinnaasut sinneqartoorutaasinnaasullu
amerlisarnissaanut akuerineqarsinnaasunik tikkuaassagussi. Taamatut
peqateqarusoqaagut taamatut eqqarsartunik.
Ole
Lynge, Inatsisartut
Siulittaasuat:
Tassa
una erseqqissalaaginnassavara oqaluuserisani nassuiaatit maani inimi
oqaluuserineqartillugit aalajangiisoqarneq ajormat, taanna
erseqqissaatigilaarpara suleriaatsitsinni kapitalip 10-at '
34, imm. 8 najoqqutaralugu.
Tassalu
taamaalilluta suli oqaaseqarumasoqaraluartoq tamaanga suleriaatsigut
najoqqutaralugit oqaluuserisaq tamaanga naammassissagipput siunnersuutigaara,
taannalu akuerineqaqqullugu.
Daniel
Skifte, Atassut:
Qujanarujussuaq,
naatsuararsuarmik oqassaanga.Ujartorneqartoq Naalakkersuisuminngaanniit
kingulleq siunnersuuteqarnersugut, assersuutitut taaginnassavara
ippassaanerpiarpiaq Ilisimatusarfissarsuaq eqqartorneqarmat taava
ingerlatsinermut aningaasartuutissat 40 mio. kr.-it aallaavigalugit
siunnersuuteqaraluaratta itigartitaavugut, tassa tusarusutat, qujanaq.
Ole
Lynge, Inatsisartut
Siulittaasuat:
Qujanaq,
tassalu immikkoortoq 12 2001-imi aningaasaqarniarnikkut ingerlatsineq pillugu
nassuiaat tamaanga naammassivoq.