Kalaallit Nunaanni Inatsisartut

Oqaluuserisassani immikkoortoq 16-1

Ataatsimiinnerit Tilbage Op Nĉste
Siullermeerneqarnera Aappassaanneerneqarnera Pingajussaaneerneqarnera

Ataasinngorneq 7. maj 2001, nal. 19:40.

Oqaluuserisassani immikkoortoq 16.

Aningaasarsianik akileraarutit pillugit Inatsisartut inatsisaata allanngortinneqarneranik Inatsisartut inatsisissaattut siunnersuut.

(An ingaasaqarnermut Naalakkersuisoq)

(Siullermeernera)

 

Ataatsimiinnermik aqutsisoq: Anders Andreassen, Siulittaasoqarfimmi ilaasortaq.

 

 

Josef Motzfeldt, Aningaasaqarnermut Naalakkersuisoq:

Aningaasarsianit akileraarutit pillugit Inatsisartut inatsisaata allannguutissaatut siunnersuut Naalakkersuisut sinnerlugit matumuuna saqqummiutissavara.

 

Nunatsinni inuutissarsiortut akileraarutissat tamangajalluinnaasa maannakkorpiaq kinguartittar­matigit akileraarutitigut nalikilliliisinnaanerit maannakkut atuuttut killeqanngivissullu arlaatigut killiliivigineqarnissaannik aammalu akileraarutissani maannakkornit siusinnerusukkut akiliisaler­nissamut aappiullugu akileraartitseriaatsip unammillersinnaanerulernissaa siunertaralugu selskabit akileraarutaannik appaasinnaanermik siunnersuumtinik Naalakkersuisut saqqummius­sissamaarput, ilaatigullu aamma avataasiorlutik raajarniartut pisarisinnaasaasa amerlineqarneran­nut atatillugu suliffeqarfiit ataasiakkaat pisortanit tassalu inuiaqatigiinni aalisarsinnaanermut periarfisssinneqarnerminnut akiliuteqartarnerisigut isertitassat ilassutissaannik naleqquttumik annertussusilimmik siunnesuuteqarnissartik Naalakkersuisut siunniuppaattaaq.

 


Naalakkersuisulli akunnerminni avataaneersunillu tusarniaareerlutik aalajangerpaat 2001-imi ukiakkut Inatsisartut ataatsimiinnissaannut allannguutissatut siunnersuuteqarnissaq siunertaralu­gu siunnersuutit taakku marluk inuussutissarsiuteqartunik taakkulu siunnersortaannik suleqate­qarluni oqallisigilluarneqaqqaassasut.

 

Taamaattorli 2001-imi ukiakkut ataatsimiinnissami allannguutissatut siunnersuutigineqaru­maarussat taaneqareersut akornutiginagit upernaaq manna ataatsimiinnissamut allannguutissatut siunnersuutinik pisariaqartunik saqqummiussinissartik Naalakkersuisut kissaatigaat.

 

Patsisaasut pingasuupput:

 

Siullermik, Naalakkersuisut pissusissamisoortuusoriunnaarpaat aktietillit akileraaruteqaataann­gitsumik aningaasanik aktieselskabimiit tigusiinnarnissaanera, taamaattumillu siunnersuutigine­qarpoq selskabip aktiatigoortumik aningaasaataasa ikilisitaanerannut atatillugu aningaasat aktiaatillip pissarsiaasa aamma aktieselskabimut pilersitsisuusumut tunineqarneranni pissariaasa iluanaarutisiatut selskabimit ilanngaatigineqarsinnaasutut isigineqalernissaat. Periarfissap taassumap maannangaaq mattunneqarnissaa Naalakkesruisut pingaartippaat taamaattumillu siunnersuutigalugu aalajangersakkap februarip 23-ani 2001-imiit atuuttuulernissaa, tassa ulloq taanna siunnersuutip tamanut tusarliunnerqarfia tusarniaassutigineqarfialu.

 

Tamatumunnga ilanngullugu kinguaariit nikinnerannut atatillugu maleruagassat ajornartorsiuti­tarisinnaasaasa 2001-imi ukiakkut ataatsimiinnissap tungaanut naliliiffigineqarnissaat Naalakker­suisut piarersimaffigaat.

 

Aappassaattut, siunnersuutigineqarpoq amigartoorutit ukiuni tulliuttuni ilanngaatigineqarsinnaa­nerinut periarfissat killiliivigineqarnissaat, tassa amigartoorutit ilaat akileraarutitigut nalikillilii­nerunermik pissuteqartut ukiuni tulliuttuni ilanngaatigineqarsinnaajunnaarsillugit. Patsisaasup erseqqissut saniatigut aammattaaq siunnersuutikkut anguniarneqarpoq killeqanngitsumik nalikilliliisinnaanerit siunissami killilersugaalersinnaanerannik iluanaarniuteqarsinnaanerup akiornissaanut illesuutitut maleruagassaqarnissaq.

 


Inatsisartut Ombudsmandiata kissaateqarneratigut pingajussaatut siunnersuutigineqarpoq akissarsianit akileraartitsisinnaatitaanerup kommunimi inissisimanerata erseqqissarneqarnissaa. Aalajangersakkami maanna atuuttumi taaneqartumut akileraartarnermi oqartussaassumut taarsiullugu taassumap aaqqissuusaanini naapertorlugu suliassap naleqqunnerpaamut, soorlu aningaasaqarnermut immikkoortortaqarfimmut imaluunniit akiliisitsiniartarfimmut inississin­naammagu.

 

Taamatut oqaaseqarlunga aningaasarsianut akileraarutit pillugit Inatsisartut inatsisaata allanngor­tinneqarneranit Inatsisartut inatsisissaannut siunnesuut Inatsisartunut suliassanngortippara Akileraartarnermullu Ataatsimiititaliami oqaluuserineqareerpat aappassaaniigassanngortillugu.

 

Hans Enoksen, Siumup oqaaseqartua:

Aningaasarsianik akileraarutit pillugit Inatsisartut inatsisaata allannguutissaatut Naalakkersuisut saqqummiussaat imak Siumumiit oqaaseqarfigissavarput.

 

Nunatsinni inuutissarssiortut aktiaatillit imaluunniit anpartselskabit anpartiutillilluunniit aki­leraartarnerisa assigiinnginnerujussuata assigiinnerulernissaat anguniarlugu akilaartarnermut tunngasut suliarineqalernissaat anguniarlugu Naalakkersuisut killiliinissamik saqqummiussaqar­nerat tunngaviatigut isumaqatigalugu Siumumiit oqaatigissavarput, tassami periarfissat ilaatigut killeqanngitsumik taaneqarsinnaasut, soorlu nalikilliliisarneq aammalu iluanaarutinik akileraaru­teanngitsumik tigusisiinnartarneq eqqarsaatigalugu allanngortittariaqarmata.

 

Tassami pissusissamisuunngilaq innuttaasut ilaat annertuumik akileraartut ilaalli akileraanngivil­lutik annertoorujussuarmik aningaasarsiortut tamassumalu allanngortinneqarnissaannik saqqum­miussineq tamakkiisumik Siumumiit tapersersorparput.

 

Naalakkersuisut isumaqatigalugit oqaatigissavarput pissusissamisuunngitsoq aktiatillit aningaa­sanik akileraaruteqanngitsunik tigusiinnartarnerat tamannalu killilerneqartariaqartoq. Soorunami suliffissaqartitsiniarnikkut annertuumik ingerlatsinerat ilisimalluarparput aamma lu ilisimaaralu­gu oqaatigissavarput inuiaqatigiit pisuussutaat aallaavigalugit aningaasarsiorneq taakkuninnga ingerlanneqartoq inuiaqatigiinnik annerusumik iluaqusiinerusariaqartoq Siumumiit oqaatigissa­varput.

 


Siumumiit isumaqarpugut akileraartarnermut tunngasut aktiaatillit eqqarsaatigalugit pitsaasumik aaqqinneqarnissaat anguniartariaqartoq aammalu Naalakkersuisut isumaqatigalugit oqaatigissa­varaput Inatsisartut ukiamut ataatsimiinnissaannut allannguutissamik siunnersuuteqarniarnerat tassami inuutissarsiuteqartut siunnersortallu peqatigalugit allannguutissamik suliaqarniarnerat Siumumiit isumaqatigalugu oqaatigissavarput.

 

Unalu saqqummiunneqartoq upernaaq manna naammassineqarnissaa isumaqatigaarput Naalak­kersuisullu siunnesuutaat tassalu 23-ani februar 2001 atuuttussanngorlugu siunnesuutigineqartoq taperserparput, ukiamullu allannguutissamik saqqummiussisoqarpat suleqataanissarput nerior­suutigalugu, tassami aningaasarsiornerup pitsaasumik inuiaqatigiinni ingerlanissaa Siumumiit soqutigallugu tapersersugaraarput kusanartumillu aaqqinneqarnissaa anguniarlugu suleqataaffi­gissavarput.

 

Akiliisitsiniartarnermut tunngasut erseqqissaaffigineqarnissaat ilanngunneqartoq tamakkiisumik taperserparput, taamatullu Siumumiit oqaaseqarluta Akileraartarnermut Ataatsimiititaliami aappassaaneerneqarnissaminut nalilersorluarneqarnissaa innersuussutigalugu suliarineqarnissaa innersuussutigaarput. Qujanaq.

 

Naimanngitsoq Petersen, Atassutip oqaaseqartua:

Naalakkesuisut akileraarutit pillugit Inatsisartut inatsissaata allannguutissaattut siunnesuutaat nalilersorluareerlugu Atassummiit imatut naatsumik oqaaseqarfigissavarput.

 

Siunnersuutigineqartut isumaqatigaarput siunnersuuteqarnermut patsisaasut pingasuussut aamma tamaasa Atassutip aaqqivigineqartariaqartutut isumaqarfigai.

 

Inatsisissap atuutilerfissamut tunngatillugu ulloq saqqummiussivigineqaqqaartoq aallaaviginiar­neqarmat aamma ajorinngilarput, tassami siunertaanngitsutut ajornartorsiortoqalissagaluarpat akileraartartoq skatterċdimut immikkut saaffiginnissinnaavoq, taanna immikkut aalajangiisinnaa­nermik inatsisitaassamik piginnaatitsissummik tunineqartussaammat.

 


Inatsisissatut siunnersuut ataatsimut isugalugu akileraartarnermut inatsisaareersup iluani aaqqis­suteqarfittut isigivarput taamalu suliassaq aappassaaneerneqannginnermi Akileraartarnermut Ataatsimiititaliami suliareineqaqqaarnissaa inassutigalugu.

 

Lars Sĝrensen, Inuit Ataqaigiit oqaaseqartuat:

Aningaasarsianik akileraarutit pillugit Inatsisartut inatsisaata allannguutissaatut siunnersuut Naalakkersuisunit saqqummiunneqartoq allannguutissanik pingasunik imaqarpoq.

 

Siullermik Inuit Ataqatigiit oqaatigissavarput akileraarutitigut nalikilliliinnerit pillugit ilaatigut selskabit akileraarutaata %-iata appartineqarnissaanik imaqartoq aammalu avataasiorluni raajarniarnermut akitsuut pillugu naleqquttumik annertussusilinnik isertitassat ilassutissaanik tunngasoq Naalakkersuisut Inatsisartut 2001-imi ukiakkut ataatsimiinnissaannut Inatsisartunut allannguutissanik siunnersuuteqarniarnerat maannakkuugallartoq tusaatissatut tigugatsigu.

 

Siunnersuutit taakkua marluk inuutissarsiortunut taakkulu siunnersortaannik suleqateqarluni oqaloqatigiilluareerpata Naalakkersuisut saqqummiussiniarnerat suleqatigiinnikkusussermik pineqartunut takutitsisutut Inuit Ataqatigiit nalilerparput.

 

Selskabit aningaasaataasa ikilisinneqarnerannut atatillugu kiisalu aktiat anpartillu selskabimut pilersitsisuusumut tunniunneranni aningasat aktiaatillit anpartiutillilluunniit pissarsiai iluanaaru­tissatut isigineqartalernissaannut Naalakkersuisut siunnersuuteqarnerat Inuit Ataqatigiit pissusis­samisoortutut isigaarput. Tamanna tunngavigalugu Naalakkersuisut allannguutissatut siunnersuu­taat tapersersparput pingaartumik kinguaariit nikinnerannut atatillugu maleruagassat ajornator­siutitaqarsinnaanissaasa naliliffigineqarnissaat Naalakkersuisut ilanngullugit piareersimaffigim­massuk.

 

Aappaattut allannguutissatt siunnersuut, tassalu amigartoorutit ukiuni tulliuttuni ilanngaatigine­qarsinnaanerinut periarfissat killilerneqarsinnaanissaat, pingajuattullu allannguutissatut siunner­suut Inatisartut Ombudsmandiata kissaateqarnera akissarsianit unerartitsisinnaatitaanerup kommunimi inissisimanerata erseqqissarneqarnissaanut tunngasoq Inuit Ataqatigiit Naalakker­suisut allannguutissatut siunnersuutigisaat akuersaarpavut.

 


Taamatut oqaaseqarluta aningaasarsianik akileraarutit pillugit Inatsisartut inatsisaata allanngor­tinneqarnissaannik Inatsisartut inatsisissaanut siunnersuut aappassaaneerneqartinnagu Inatsisartut Akileraartarnermut Ataatsimiititaliaani suliarineqarnissaa aamma akuersaarparput.

 

Mads Peter Grĝnvold, Kattusseqatigiit oqaaseqartuat:

Kattusseqatigiinni peqqissaartumik misissoreerlugit imatut inatsisissap allanngortinneqarnissaa­nut siunnersuut siullermeerneqarneani oqaaseqassaagut. Siullermik Kattusseqatigiinniit Aningaa­saqarnermut Naalakkersuisoq paasisinnaalluarparput taamatut aningaasarsiat akileraarutaanik isertinneqarsinnaasut pitsanngorsarniarlugit Naalakkersuisut maannangaaq suliniuteqarnerat.

 

Nunatsinni inuutissarsiortut tamangajalluinnarmik akileraarutissatik maannakkorpiaq kinguartit­tarsimagaat Naalakkersuisup saqqummiussissutaasigut Kattusseqatigiinniit paasivarput, taamaat­tumik Kattusseqatigiinniit Naalakkersuisut maannangaaq suliniuteqarnerat tapersersorparput.

 

Kattusseqatigiinni isumaqarpugut pissutsit iluarsiivigineqartariaqartut, soorunami aamma taamatut akileraarutitigut Nunatta karsianut isertinneqarsinnaasut sapinngisamik piaartumik pissarsiarineqartarnissaat Kattusseqatigiinniit isigigatsigu.

 

Ukiuni kingullerni Nuatsinni aningaasarsiorneq eqqarsaatigalugu Kattusseqatigiinnit isumaqar­pugut sutigut tamatigut peqqissaartumik aningaasarsiornerup siunissami ingerlanneqartuarnissaa Naalakkersuisunit aammalu Inatisartuni ilaasortanit qulakkeerneqartariaqartoq. Assersuutigalugu suliffeqarfiit namminersornerullutik Oqartussanit pigineqartut ilaatigut imminnut pisiareqattaar­tarnerat kattusseqatigiinni akuersaarsinnaanngnnatsigu.

 

Kattusseqatigiinniit aktiaatillit akileraaruteqaataanngitsumik aningaasanik aktieselskabiniit akileraaruseqqaarnagit tigusisarnerata assut eqqarsarnartoqartikkatsigu, taamaattumik Kattusse­qatigiinni isumaqarpugut Aningaasaqarnermut Naalakkersuisoq aammalu Inatsisartut Akileraar­tarnermut Ataatisimiititaliaat peqqissaartumik maannakkut misissuisariaqartut.

 


Aktieselskabinik piginnittut aningaasanik akileraaruseqqaarnagit tigusisarnerat maannangaaq unitsinneqassappat pineqartunut qamoq kinguneqarsinnaanera misissorneqartariaqartoq Kattusse­qatigiinni isumaqarpugut. Taamatut piumasaqarnitsinnut tunngavigaarput selskabit pineqartut ilaatigut suliffeqarfittut ingerlaqqinniarnerannut qanoq kinguneqarsinnaaneri eqqarsaatigalugu.

 

Ilanngullugu siunnersuutigineqarpoq amigartoorutit ukiuni tulliuttuni ilanngaatigineqarsinnaa­nerinut periarfissat killiliivigineqarnissaat akileraarutitigut nalikilliliinnerit ukiuni tulliuttuni ilanngaatigineqarsinnaajunnaarsinniarneqarlutik Naalakkersuisuniit siunnersuutigineqarpoq.

 

Siullermik Kattusseqatigiinniit pisariaqarluinnartutut isigaarput taamatut Naalakkersuisut piumasaqassappata pineqartunut qanoq kinguneqarnissaa peqqissaartumik misissorneqartariaqar­toq.

 

Naggataaaatigut Inatsisartut Ombudsmadiata kissaataa Kattusseqatigiinniit annertunerusumik oqaaseqarfiginagu tapersersorparput.

 

Inatsisissap qaqugu atuutilernissaa Akileraartarnermi Ataatsimiititaliami nalilersorluarneqarnis­saa kaammattuutigigaarput inatsisissap aappassaaneerneqannginnerani ataatsimiititaliamut susassaqartumut ingerlanneqarnissaa kaammatuutigalugu.

 

Otto Steenholdt, attaviitsoq:

Saqqummiussissumi takusinnaavara Naalakkesuisut pingaartikkaat, tassalu aamma tusarniaareer­lutik aalajangersimanerat, isumaqarluinnarama isumatusaarnerusoq, tassa oqallisigineqarluarnis­saat kissaatigalugu taamatut siunnersuuteqarmata.

 

Allannguutissatut siunnersuutinik pisariaqartunik saqqummiussinerat isumaqatigara, tassa patsisaasut taaneqartut pingasut tassani taaneqartut isumaqatigilluinnarakkit.

 

Annerusumik oqaaseqarnanga akuersaarniarpara Akileraartarnermulli Ataatsimiititaliamut ingerlateqqinneqarnissaa aamma akuersaarlugu.

 

Josef Motzfeldt, Aningaasaqarnermut Naalakkersuisoq:

Ullumikkut maajip arfineq-appaat ulloq naanngitsoq suli qilaap ataani tupinnartunik suli pisoqar­tarmat qujanaqaaq nalaapparput partiini oqaaseqartut tamarmik isumaqatigiillutik Naalakkersui­sut saqqummiussaat ilalermassuk, taanna maluginiagassavoq. Kiisalu taamaallaat Kattusseqati­giinninngaaniik tamakkiivissumik imaaliallaannaq sanninngaarlugit iiniarneqanngitsoq paasivar­put, aamma taamatut paasinarpoq. Taamaattumillu Kattusseqatigiit piumasarisaattut naatsorsuu­tigilluinnarparput Naalakkersuisuninngaanniik misissuilluarnerit, tusarniaanerit pisariaqartinne­qartut Akileraartarnermut Ataatsimiititaliami ingerlanneqassasut, pisariaqartinneqassappallu Naalakkersuisut sinnerlugit aamma uanga annertunerusumik paasissutiinissamut peqataasinnaal­lunga matumuuna nalunaarutigissavara.

 

Anders Andreassen, Siulittaasoqarfimmi ilaasortaq:

Qujanaq, taamaalilluni ullumikut oqaluuserisassaq immikkoortoq 16 suliarineqarnera siullerme­erlugu tamaanga killeqarallarpoq. Taavalu aappassaaneerneqartinnani Akileraartarnermi Ataatsi­miititaliami suliarineqaqqaarallassaaq, tamatumalu kingorna maanga utertinneqaqqikkumaarpoq aapassaaneerneqarumaarlunilu.