Oqaluuserisassani immikkoortoq 30-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Pingasunngorneq
2. maj 2001, nal. 13.04.
Ataatsimiinnermik aqutsisoq: Mikael Petersen, Siulittaasoqarfimmi ilaasortaq.
Lise Skifte Lennert, Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq:
Naalakkersuisut
sinnerlugit matumuuna saqqummiutissavara meeqqat atuarfianni ilinniartitsisussanik
ilinniartitsineq pillugu Inatsisartut peqqussutaata allanngortinneqarneranik
Inatsisartut peqqussutissaattut siunnersuut.
Meeqqat atuarfianni ilinniartitsisussanik ilinniartitsineq pillugu Inatsisartut peqqussutaanni atuuttumi iluarinanngitsut arlallit Naalakkersuisut malugisimavaat.
Ilinniartitsisussatut ilinniarnissamut siammartitamut ilinniartunngornissamut pimasaqaatit erseqqissarneqarnissaasa kissaatigineqarnera siunnersuummut tunngaviuvoq. Peqqussummi atuuttumi ' 3, imm. 2 naapertorlugu qinnuteqartut allamik naleqquttumik atugarsornertalimmik ilinniagaqarsimasut ilinniartitsisussatut ilinniarnissamut siammartitamut ilinniartitsisunngornialersinnaatitaapput, taamaattorli ' 3, imm. 1-imi ilinniartitsisussatut ilinniarnissamut siammartitamut tiguneqarnissamut tunngasumi atuagarsornertalimmik ilinniagaqarsimanissaq piumasarineqanngilaq. Taamaammat ilinniartitsisussatut ilinniarnissamut siammartitamut ilinniartunngornissamut piumasaqaatit aammalu ilinniartitsisussatut ilinniarnissamut siammartitamut ilinniartunngornissamut kikkut tiguneqarsinnaanerat erseqqissarneqartariaqarput, tassungalu atatillugu Naalakkersuisut kissaatigaat ilinniartitsisussatut ilinniarnissamut katersuutsitamut siammartitamullu ilinniartunngornissamut aqqutaasartut pisariillisarneqarnissaat.
Inatsisartut peqqussutaanni atuuttumi piumasarineqarpoq ilinniagarisimasap naleqqussusianik Naalakkersuisut pisuni ataasiakkaani tamani akuersissuteqartartussaassasut. Taamaattorli qinnuteqartut ilinniagarisimasaasa naleqqussusiat Ilinniarfissuup nalilersortarsimavaa, Naalakkersuisullumi isumaat naapertorlugu taamaattariaqarpoq.
Inatsisartut peqqussutaat atuuttoq malillugu qinnuteqartut kikkut ilinniartitsisussatut ilinniarnissamut siammartitamut ilinniartunngortitaassanersut ilinniartitsisut rċdiat isumasioqatigeriarlugu aatsaat rektorip aalajangiiffigisinnaavaa. Siunnersuutikkut matumuuna ilinniarfiup pisortaa qinnuteqartunik tigusisarnermut kisimiilluni oqartussaalerpoq, tassa tiguneqarsinnaatitaasut kiisalu atasiakkaarlutik naliliiffigineqarnermikkut tiguneqarsinnaatitaasut tiguneqarnissaannut. Tamatuma kingunerisaanik ilinniarfiup pisortaata nammineq aalajangissavaaa ilinniartitsisut rċdiat aalajangiinermi qanoq annertutigisumik peqataatinneqassanersoq.
Naalakkersuisut isumaqarput ilinniarfiup pisortaata ilinniartussanik tigusisarneq akisussaaffigisariaqaraa, tassami ilinniarfiup pisortaa allaffissornikkut ilinniartitsinerullu tungaasigut Naalakkersuisunut akisussaammat. Oqartussaaffiit akisussaaffiillu ataqatigiittariaqarput.
Taamatut oqaaseqarluta siunnersuut akuersortumik Inatsisartunit oqaluuserisassanngortipparput.
Ruth
Heilmann, Siumup
oqaaseqartua:
Siumumit
pingaartipparput Nunatsinni ilinniartitsisunik Nunatta nammineq
pilersorsinnaalernissaa anguniarlugu iliuutsit annertusarneqarnissaat
pitsanngorsarneqarnissaallu ingerlanneqartuartariaqartoq.
Nunatsinni
ilinniarsimasunik ilinniartitsisussaaleqineq suli annertoqaaq, taamaattumik
nunagisaq qimannagu ilinniartitsisussanik ilinniartitaanerit
aallartinneqarnerat Siumumit pisariaqartutut siunissamilu
ingerlanneqartuartariaqartutut isigaarput.
Meeqqat
atuarfianni ilinniartitsisut ilinniartitaanerisa pitsaasuutinnissaanik
nakkutiginnittuarnissaq Siumumit pingaartitaraarput, aammalu
minnerunngitsumik ilinniartitsisut misilittagaqarluartuunissaasa
atorfimminnullu naleqquttuunissaasa qulakkeersimaneqartuarnissaa.
Ilinniarnissamut
isissutissamut naleqquttumik ilinniagaqarsimanissamik piumasaqaammut
allannguuteqartitsinissaq uani pineqarpoq, tassalu atuagarsornikkut
ilinniagaqarsimanissamik oqaasertaqartumik taarserneqartussaalluni, tamanna
Siumumiit pissusissamisoortutut isigalugu akuersaarparput.
Peqqussummi
uani eqaatsumik anguniarneqarpoq rektorip nammineq ilinniartussami qanoq
ittunissaanik qinnuteqartunut nalilersuillunilu tigooraasinnaanissaminut
pisinnaatitaaffeqartitaalernissaa. Soorunami ilinniartitsisut
siunnersuisoqatigiivinik qanimut suleqateqarluni aalajangersaasarnissaminik
siunnersorneqarnermigut periarfissaqartinneqartussaammat Siumumit tamanna
akornutissaqartinnagulu pissusissamisoortutut isigaarput.
Taamatut
Siumumit oqaaseqarluta peqqussutissamik allannguuteqartitsilaarnissamik
siunnersuut akuersaarparput, taamatullu isikkoqarluni
aappassaaneerneqarnissaminut ingerlaqqinnissaa innersuussutigalugu.
Augusta
Salling, Atassutip
oqaaseqartua:
Meeqqat
atuarfianni ilinniartitsisussanik ilinniartitsineq pillugu Inatsisartut
peqqussutaata allanngortinneqarneranik Inatsisartut peqqussutissaattut
siunnersuut saqqummiunneqartoq Atassummiit misissorluareerlugu
allanngortinneqarnissaanut siunnersuut akueraarput.
Allanngortinneqarnerata
kingunerissavaa ilinniartunngornissamut piumasaqaatit paatsuugassaanngitsumik
imminnullu naapertuuttumik peqqussummi aalajangersaavigineqarnerat, tamatumalu
pisariaqarnera avaqqunneqarsinnaanngilaq.
Taamatullu
Ilinniarfissuup pisortaata ilinniartussanik tigusisarnermut
akisussaasunngortinneqarnissaa Atassummiit tamakkiisumik taperserparput.
Tulluanngilarmi peqqussummi aalajangersagaqassalluni Aakuerisaasumik@
malitsinneqanngitsumik, soorlumi Naalakkersuisoq oqartoq: AInatsisartut
peqqussutaanni atuuttumi piumasarineqarpoq ilinniagarisimasap naleqqussusianik
Naalakkersuisut pisuni ataasiakkaani tamani akuersissuteqartartussaassasut.
Taamaattorli qinnuteqartut ilinniagarisimasaasa naleqqussusiat Ilinniarfissuup
nalilersortarsimavaa, Naalakkersuisullumi isumaat naapertorlugu
taamaattariaqarpoq.@
Naalakkersuisut
Atassummiit isumaqatigaagut peqqussut pissusiviusunut iluarsineqartariaqartoq
isumaqarmata aammami pissusissamisoorpoq ilinniartussanik tigusisarneq
Ilinniarfissuup pisortaanut akisussaaffigitissallugu.
Taamatut
naatsumik oqaaseqarluta peqqussutissatut siunnersuut taperserparput,
siunnersuutigaarpullu peqqussutissatut siunnersuut taama isikkoqarluni
aappassaaneerneqarnissaminut ingerlaqqissasoq.
Olga
Poulsen, Inuit
Ataqatigiit oqaaseqartuat:
Inuiaqatigiinni
suniluunniit ineriartortuni, ineriartornermut pitsaasumut tunngaviliisussaq
tassaavoq ilinniagaqartuusimanissaq. Inuiaqatigiit
ilinniagaqartuusimanissaannut aqqut siulleq aammalu ineriartornissamut
tunngaviulluinnartoq tassaavoq meeqqat atuarfiat.
Meeqqat
atuarfiata inuiaqatigiinnik pitsaasumik ilinniagaqarsimasunik
pilersitsisinnaanissaminut sakkussai pitsaanerpaat tassaapput ilinniartitsisut
ilinniarluarsimasut, angajoqqaanik suliffeqarfinnillu atuarfiup
avataaniittunik suleqateqartut.
Sumiiffik
qimannagu ilinniartitsisunngorniartarnerup piumasaqaataasa Ilinniarfissuarmiit
naammagisimaarneqaratik maluginiarneqarsimanerat Inuit Ataqatigiinniit
paasilluarparput.
Sumiiffik
qimannagu ilinniartitsisunngorniartarneq taaguutimigut pissusissamisoornera
sungiunneqarsimaneralu tunngavigalugu taaguutip taassuma
aalajangiusimaneqarnissaa pisariaqartutut isigaarput.
Aammattaaq
isumaqarpugut meeqqat atuarfianni pitsaasumik ilinniartitsisuusinnaassagaanni,
atuagarsorsinnaanermik piginnaasaqarneq pingaaruteqarluinnartunut ilaasoq,
tassami atuagarsornerup iluani paasissutissanik katersinissamut
sakkuusussaammat.
Ilinniartitsisunngorusullutik
qinnuteqartartut, tunngaviusumillu inuussutissarsiutitigut ilinniagaqareersimasut
tiguneqartalernissaannut Naalakkersuisut aqqusaaqqaartarunnaarnissaat Inuit
Ataqatigiinniit pissusissamisoortutut isigaarput. Tassami Ilinniarfissuup
pisortaata, pisariaqartitsinerlu naapertorlugu ilinniartitsisoqatigiit
isumasioreerlugit ilinniartussanik tigusisalersinnaanissaa suliamut,
minnerunngitsumillu allaffissornermut oqilisaataalernissaa
naatsorsuutigigatsigu.
'
10, imm. 2-tut ikkunneqartussamut tassalu Naalakkersuisut ilinniartitaanerup
ilusaata aaqqissuussaaneralu pillugit malittarisassanik
aalajangersaasinnaanissaannut tunngatillugu, Inuit Ataqatigiinniit
pingaartipparput taamatut suliaqalernermi atuisut pitsaasumik
tusarniarneqartarnissaat, taamaasilluni ilinniartitsisunngorniartarnerup
ilusissaa, inuiaqatigiinnut tulluarnerusoq amerlanerpaanillu
peqataaffigineqartoq pilersinneqaqqullugu.
Taamatut
oqaaseqarluta ilinniartitsisussanik ilinniartitsineq pillugu peqqussutip
allannguutissaanut siunnersuutaasut, Inuit Ataqatigiinniit tunngaviusumik
taperserpagut, ataatsimiititaliamullu susassaqartumut peqqissaartumik
suliareqqullugu ingerlateqqillugit.
Mogens
Kleist,
Kattusseqatigiit oqaaseqartuat:
Meeqqat
atuarfianni ilinniartitsisussanik ilinniartitsineq pillugu Inatsisartut
peqqussutaata allanngortinneqarnissaanut Naalakkersuisut siunnersuutaannut
Kattusseqatigiinniit imatut oqaaseqaateqassaagut.
Naalakkersuisut
saqqummiussai tamakkiisumik taperserpagut, tassami peqqussutip allanngortinneratigut
ilinniartitsisunngorniartut ersarissumik maleruagaqalissammata
qinnuteqarsinnaasut eqqarsaatigalugit, minnerunngitsumillu qinnuteqartartut
sullinneqarnerat sukkanerusumik aammalu allaffissornikkut
oqilisaaffigineqartalernissaat takusinnaagatsigu.
Ilinniarfissuup
pisortaa oqartussaaffimmik annertunerusumik tunineratigut Ilinniartitaanermut
Pisortaqarfiup aammalu Ilinniarfissuup akornanni suleriaaseq annertuumik
oqilisaaffigineqassammat Kattusseqatigiinniit taperseerusuppugut peqqussutip
allanngortinneqarnissaanut.
Taamatut
naatsumik oqaaseqarluta peqqussutip allanngortinneqarnissaanut akuersaassaagut.
Otto Steenholdt, attaviitsoq:
Allannguutissatut siunnersuut tassa ' 2 itinerusumik nassuiaaserneqartariaqarpoq, tassa oqaatigineqartoq qinnuteqartut allamik naleqquttumik ilinniagaqarsimassasut, taakkua tiguneqarsinnaapput, itinerusumik taanna nassuiarneqarnissaa pisariaqassaaq. Immaqa ilinniakkat ilaat atorsinnaanngitsutut nalilerneqaratarsinnaammata.
Kiisalu aamma '-imi tassani imm. 3, tassa ilinniarfiup pisortaata aalajangissagaa qinnuteqartut kikkut Qitiusumik Ilinniartitsisunngorniarfimmi ilinniartunngorsinnaanersut, aamma taanna isumaqatiginngilara.
Utoqqatserpunga aatsaat IA-p oqaaseqartuata taanna killormut saatinnguatsiarmagu, tassa uani siunnersuummi ilinniarfiup ittua kisimi aalajangiisussatut innersuunneqarmat.
Ukiuni makkunani Nunatsinni nepotismimik taaneqartartoq, tassalu qanigisanik, parteeqatinik kammalaatinilluunniit atorfiusinnaasunut siullinngortitsisarneq atugaaleraluttuinnarpoq. Taamaattumik ilinniarfiup pisortaata nammineq, tassa piumaguni ilaquttami, parteeqatimi allakkulluunniit attaveqarfigisani sumik ilinniagaqarsimanerat, oqarta immaqa apeqqusernagu ilinniartunngortitsiualissappat tamanna uanga tulluarsorinnginnakku.
Nassuiaammi oqaatigineqareeraluarpoq Naalakkersuisut pisuni ataasiakkaani akuersissuteqartartuussasut. Ajuallatitsissutiginiarnagu oqartariaqarpoq immaqa nepotismimik atuinerpaat ukiuni makkunani oqaatigisariaqartut tassaasut Naalakkersuisugut.
Rektorit soorlu seminariani Danmarkimiittuni ilinniartitsisuutitassaminnik ilinniartunngortissallugit piukkunnartunik aalajangersaasarnerat eqqortuunerusoraara, kisermaassilluni aalajangiinerit isornartorsiorneqarsinnaasut eqqarsaatigalugit rektorip aalajangeeqatini, tassa ilinniartitsisut nukittoqutigisussaammagit. Tassa peqqussut atuuttoq uanga pitsaanerusoraara, tamatumanilu isumaqarlunga allanngortitsisariaqanngitsoq.
Taamattaaq ilinniartunngortitaanermut tunngavissat 1-imiit 5 ilanngullugu aamma nassuiarnerusariaqarput, soorlu 4-mi oqaatigineqartoq, tassa paatsoorneqarsinnaammat pineqartoq pilersuisuusimassasoq angerlarsimaffimminik qimatsinissamut ajornakusuulersitsisunik. Uani pineqannguatsiaraluarpoq nunaqarfimminik illoqarfimminilluunniit, kisiat angerlarsimaffik tassaammat illu meeqqat najugaat, taanna tassunga qimatsinissamut ajornakusuulersitsisunik, oqassagutta illuni qimannavianngimmagu.
Oqaaseqatigiit kingulliit piukkunnartoq ilinniariartortissinnaajunnaarpaat angerlarsimaffini qimakkumassanngippagu, taanna nassuiaammi aaqqinneqalaarniarili.
Ilinniartitsisussarsiorpugut sakkortuumik pilerisaaraluta, allaat inuusunnermik nalaani ilinniartitsisunngorusunnatik allanik ilinniagaqarsimasunik. Inuit tamakku atuarfimmi sulinermik pilerisaartillugit atuarfiup suliffissap ilinniartitsisuisa ukiuni makkunani ajornartorsiutaat isertornagit aamma taakkununnga ilinniartitsisunngorniarniarlutik pilerisuttunut imaluunniit pileritsattunut, tassa suli naluppatigit ersarissumik aallaqqaammulli iliorniarnermik aallartitsinnginneranni sakkortuumik suliffigiligassap qanoq ittuunera paasisitsiniutigisariaqarpoq.
Nunatsinniinnaanngitsoq ilinniartitsisuuneq ukiuni makkunani ornigineerukkiartorpoq, ilinniartitsisutut sulineq qangatut naqisimaneqarani akornusersorneqaranilu ilinniartunut ilikkagaqarusuttunut ilisimasassanik tunniussiniarneq ajornarsiartuinnarpoq.
Klassini annerni pissutsit ajorsiartorput, ilinniartitsisoq ilisimasassanik ilinniartitamut tunniussiniaraluartillugu meeqqat ilaqartualerput akornusersuiuartunik ilinniartitsisup qanoq iliorfigisinnaanngisaanik. Ilinniartut ataasiakkaat ilinniartitsiniaraluarneq tamaat aserorluinnartalerpaat, taamaattumut ilinniartitsisoq sakkussaqanngilaq.
Angajoqqaat attavigineqarsinnaapput, angajoqqaalli ikiuukkumagaluit meeqqatik naalanngitsut ungasianiit aqussinnaanngilaat. Angajoqqaalli allat aamma ilumoorutivillugu isumaqartalerlutik meeqqamik naalannginnerannut ilinniartitsisoq pisuusoq. Ilinniartitsilluarumasoq piareersarfissaaruppoq, tamatumalu nassatarilerpaa meeqqat pissanganaateqanngitsumik soqutiginaateqanngitsumillu ilaatigut meeqqanik ilinniartitsiniaraluarneq.
Ataatsimiinnerparujussuit, meeqqat atuanngitsoorneri tamarluinnarmik naatsorsoqquneqarput, kikkut aningaasanik ilinniartuunersiutinik pisartakkaminnik arsaarneqassanersut, kikkullu atuarfimmiit anisinneqassanersut, karakterilersuinerparujussuit allarpassuillu. Tamakku taatsiakkakka qaammatit tamarluinnaasa ilinniartitsisup piffissaajaatigeqalugit isumaginiagassarai.
Meeraaqqanullu ilinniartitsisuusut suliassakinnerunngillat, ilami meeqqat kigutaasa salinneqarnissaat, ilinniartitsisup ilinniartitsinissaraluaminut allaat taarsiullugit suliassaanut ilanngunneqarsimammata.
Integrationimik taaneqartoq eqqartuleraluarukku naaffeqanngitsumik maani qeqassaanga. Qallunaatut oqaluttunut klassit nungukkiartorput sinnerilu marlunnik oqaasilinniittoq, oqarta Nunatsinni amigaataaqisunit atuartinneqarluni ilinniartinneqassapput, tassa marlunnik oqaasilinnit. Tiimi ilinniartitsiffiusussaagaluaq ilinniartitsisup nutsererusaarnermut kalaallisuumiit qallunaamut, qallunaamiit kalaallimut atuinnartariaqalerpaa.
Ilinniartitsineq sumiippa?
Atuartitsinermut Naalakkersuisoq paasigaluarpara ilinniartitsisussaaleqinerujussuaq ikiorserniarlugu saqqummiussaq manna qanoq iliuuseqarniarnerusoq, kisianni uanga isumaqarpunga uku saqqummiussani pineqartut ilinniartitsisunngorpata Nunatsinni meeqqanut ilisimasariaqartunik tunniussisinnaaneq ullumikkut Kalaallit Nunaata ilinniartitsisuisa piareersassallugu piffissaqarfigiunnaagaat ullumikkornit pitsaanerulernavianngitsoq, Ilimmarfissallu, taamatut taaneqarmat, kalaallinik ilinniartussaaleqinissaa qularnaateqanngitsoq ullumikkumiit oqaatigisariaqarpoq.
Tassa oqaatigisakka isumaqatiginngisakka ilaatigut naatsumik taamatut oqaatigaakka.
Lise Skifte Lennert, Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq:
Partiit Kattusseqatigiillu tapersiinerannut qujavunga taavalu taamaalilluni aappassaaneerneqarnissaanut ingerlateqqinnissaa naatsorsuutigalugu.
Attaviitsumut Otto Steenholdtip aatsaannguaq oqaasiinut annikitsunnguamik oqaaseqarusuppunga. Tassalu ukua uparuartugai assigiinngitsorpassuit peqqussutissamut attuumassuteqanngitsut oqaaseqarfigissanngilakka, kisiannili imarisaanut tunngatillugu oqaaseqaatigisaanut imatut akissuteqarusuppunga.
Rektorip sukkulluunniit ilinniartitsisoqatigiit isumasiorsinnaavai aammalu taamaammat tassa taanna naatsorsuutigilluinnaqqissaarparput pissasoq.
Taavalu aamma erseqqissartariaqarpara rektori sulivoq Naalakkersuisunut akisussaalluni.
Aamma ilinniagaqarniarluni itigartinneqartoq sukkulluunniit KIIIP-imut maalaaruteqarsinnaavoq.
Olga Poulsen, Inuit Ataqatigiit oqaaseqartuat:
Attaviitsumuna Otto Steenholdtip oqaatigisatsinnut tunngatillugu soorlulusooq paasinerluisimasutut inissiiniarnera naqqilaarniariga.
Siullermik Naalakkersuisup saqqummiussaani qupperneq 2-mi ersarilluinnartumik nassuiarneqarpoq rektorip nammineerluni aalajangiisinnaasunngortitaanerata qanoq aamma malitseqarsinnaanera, tassalu pisussaaffeqarpoq aamma peqqussut naapertorlugu pisariaqartitsinerlu naapertorlugu ilinniartitsisoqatigiinnik isumasiuissalluni. Taanna aamma peqqussutissamut nassuiaammi qupperneq 2-mi aamma allaqqavoq.
Aamma uagut Inuit Ataqatigiinninngaanniit naatsorsuutigivarput nammineq rektorip pisariaqartitani naapertorlugit ilinniartitsisoqatigiinni isumasiuisarnissani taanna pissusissamisut tigummillugu akisussaaffittullu isigalugu ingerlakkumaaraa.
Otto Steenholdt, attaviitsoq:
Tassa naatsorsuutigaara saqqummiussissut una assigiimmik naqinnilik tamatta pisimassagipput, tassani qupperneq 2-mi uangattaaq atuagara paasinerlussimanerpara, atualaarlara:
AInatsisartut peqqussutaat atuuttoq malillugu qinnuteqartut kikkut ilinniartitsisussatut ilinniarnissamut siammartitamut ilinniartunngortitaassanersut, Ailinniartitsisut rċdiat isumasioqatigeriarlugu aatsaat rektorip aalajangiiffigisinnaavaa, siunnersuutikkut matumuuna ilinniarfiup pisortaa qinnuteqartunik tigusisarnermut kisimiilluni oqartussaalerpoq.@A Taannaana uanga aallaavigiginga, allaat naviagalugu kisimiilluni oqartussaanera sumut atorneqaratarsinnaanera eqqaallugu.
Taamaattumik uanga una siornatungaanniittoq ataannallaqqugiga, tassa ilinniartitsisunik ilaqarluni taanna aalajangiiffigisassagaa, inuk ataaseq saassutarineqartoq oqarsinnaassammat uku ilagalugit taamatut aalajangiivunga, taanna pitsaanerusoralugu. Taannaana aallavigalugu taamatut oqartunga.
Mikael Petersen, Siulittaasoqarfimmi ilaasortaq:
Peqqussutip allannguutissaatut Naalakkersuisuninngaanniit siunnersuutigineqartoq partiinit amerlanerussuteqartunit taamatut isikkoqarluni aappassaaneernissaminut ingerlaqqinnissaa innersuunneqarpoq. Kisianni taamaakkaluartoq Inuit Ataqatigiinninngaanniit kissaatigineqarpoq ataatsimiititaliamut susassaqartumut ingerlateqqinneqassasoq. Apeqqutigissavara tamanna attatiinnarneraat, taamaappoq.
Taamaalilluni peqqussutissatut siunnersuut aappassaaneerneqannginnermini Kultureqarnermut Ilinniartitaanermullu Ataatsimiititaliamut ingerlatinneqassaaq.