Oqaluuserisassani immikkoortoq 41 |
|||
Siullermeerneqarnera | Aappassaanneerneqarnera | Pingajussaaneerneqarnera |
Pingasunngorneq
2. maj 2001, nal. 18:58.
(Inatsisartunut ilaasortaq Mads Peter Grĝnvold)
Ataatsimiinnermi aqutsisut: Inatsisartut Siulittaasuat Ole Lynge aamma Augusta Salling, Siulittaasoqarfimmi ilaasortaq.
Mads Peter Grĝnvold, Kattusseqatigiit:
Siullermik isumaqarpunga natsinni ilinniartoqarfiit Nunarput tamakkerlugu isigalugu immikkoortiterneqarneri nalilersorneqartariaqartoq, soorlu ilinniartoqarfiit ilaatigut Nuummut, Aasiannut, Sisimiunut, Ilulissanut, Narsamuta aammalu Qaqortumut inissinneqartarput.
Assersuutigalugu Niuernermut Ilinniarfik eqqarsaatigalugu Nuummut Qaqortumullu inissinneqarput, isumaqarpunga Nunatsinni ilinniartitaaneq eqqarsaatigalugu ininniarfiit siammarnerullugit inissinneqartariaqarluartut.
Isumaqarpunga ilinniartoqarfiit ilaat avannaanut nuunneqartariaqartut, tulluarnerpaatut Niuernermik Ilinniarfik nuunneqarpat ilinniartut avannaani najugaqartut atuarnerup nalaani ilaatigut illoqarfigisamut juullisioriartorsinnaanertik kissaatigisarmassuk aammalu avannaani niuernermut ilinniarfimmik immikkoortortaqalersinnaappat angalanermut aningaasartuutit annikinnerit atorneqarsinnaammata.
Isumaqarpunga ilinniartut avannaani najugaqartut aamma periarfissinneqartariaqartut sumiiffik qimappallaarnagu ilinniarnermik ingerlatsisinnaagunik isumaqarama pitsaasumik kinguneqassagaluartoq.
Taavalu aamma kaammattuutigaara avannaani Inuilip immikkoortortaqalernissaa isumaqarama pisariaqarluinnartoq Qeqertarsuup Tunuani Inuilip immikkoortortaqalernissaa ukiuni kingullerni ilinniartitaaneq eqqarsaatigalugu ilinniarniarlutik qinnuteqartut amerlasuut avannaaniik aallartinneqartarput, aammalu aningaasat angerlamut annertuut atorneqartarlutik. Taamaattumik isumaqarpunga tulluartuussagaluartoq aamma avannaani inuili immikkoortortaqalersinnaappat.
Inuili avannaani immikkoortortalerneqarsinnaappat isumaqarpunga ilinniarniarlutik qinnuteqartunut iluaqutaassagaluartoq, soorlu angalanermut aningaasartuutit annikillisinneqassapput, aammalu ilaquttat ajornannginnerusumik tikinneqarsinnaanerat aqqutissiuunneqassaaq.
Ilaatigut qinnuteqartut imaluunniit ilinniagaqartut meeraqarunik qaammatit arfinilinnik utoqqaassusilimmik, taava meeraq ilinniarfissamut ilagineqarsinnaanngilaq, isumaqarpungalu ilinniagaqarniartunut tamanna aamma ajornartorsiutaasoq.
Qulaani pineqartut tunngavigalugit isumaqarpunga eqqarsarluarnerussasoq pineqartut ilaata Qasigiannguanut inissinneqarsinnaappat, assersuutigalugu Qasigiannguani Royal Greenlandip suliffissuakua ilinniartitaanermut atorneqarsinnaavoq.
Aammalu sunngiffimmi asimilu sammineqarsinnaasut periarfissarpassuullutik illoqarfimmi pineqartumi, siunissami Nunatsinni ilinniagaqarlutik naammassisartut amerlanerusut pisariaqartinneqarput, tamanna tunngavigalugu isumaqarpunga tulluartuusoq pineqartut avannaani immikkoortortaqalernissaat.
Assersuutigalugu ukiuni kingullerni Nunatsinni ilinniarfiit STI-t illoqarfikkaartumik ingerlanneqarput aammalu ilaatigut illoqarfiit ilaanni ilinniartitsisut amigaatigineqartarlutik, taavalu ilinniaartut ilinniarnerminni ilaatigut ilinniaqqinniarnerminni ajornartorsiuteqartarlutik ilinniartitaanerminni ilinniartitsisut ilaatigut ilinniakkanut naleqqutinngitsunut, ajoraluartumik atorneqartarlutik allanik ilinniartitsisussaqannginneq tunngavigalugu.
Ilaatigut STI-ni ilinniartitaaneq qiviaraanni niuernermut, sanaartornermut, saffiuumut, amiisumut, igasumut meeqqerisumut tunngasut ilinniarneqartarput, immaqa aamma amerlanerusinnaapput piffiit ilaanni, inioqqatitigut tusarpara illoqarfiit ilaat STI-imut ilinniarfittut atorunnaartinniarneqartut, tamanna ilumoorpat isumaqarpunga peqqissaartumik ilinniartitaaneq pillugu Inatsisartuni eqqartorneqartariaqartoq siunissami ilinniartitaaneq qanoq ittoq atorneqarniarpa?
Isumaqarpunga siunissami Nuuk kisiat pinnagu aamma avannaani ilinniartitaaneq piorsarneqartariaqartoq. Nuummi ajornartorsiutit assigiinngitsut naammareerput, isumaqarpunga suli ajornartorsiutaasinnaasut annertuninngorniarlugit kinguneqartitsisinnaasut Nuummi pinngitsoortinneqartariaqartut. Nalunngilarpummi Nuummi qanoq annertutigisumik ilinniartut aamma Nuummi najugaqartu inissaaleqisut.
Lise Skifte Lennert, Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq:
Inatsisartut 1999-imi upernaakkut ataatsimiikkamik inuussutissarsiutinut ilinniartitaanerit, inuussutissarsiutinullu pikkorissartitsisarnerit pillugit Inatsisartut peqqussutaat, aamma STI-mi ilinniartitaanerit pillugit nassuiaat akuersissutigaat.
1998-imi ukiakkut ataatsimiinnermi ilinniartitaanernik inuussutissarsiuutinillu paasissutissiisarneq ilitsersuisarnerlu pillugit nassuiaat akuersissutigineqartoq peqatigalugu akuersissutigineqartut tamakku inuussutissarsiutinut ilinniartitaanerit iluarsartuussivigineqaqqinnerannut tunngaviliisuupput.
Soorlu siunnersuuteqartup ilisimagaa STI-mi aturfinnut arlalinnut ilinniartitsisut piginnaaneqartut pissarsiariniarneqartarnerat ajornartorsiutaasarpoq, pissutsit taamaannerat ilanngullugit ilinniartorineqartartut ikittuinnaasarnerat, atuaqatigiillu ikittuinnaasarnerat, atuartitsinerup pitsaasumik ingerlanneqarnissaa attakkuminaattartoq, ineriartortikkuminaattarlunilu.
Taamaammallu ilinniartitaanerni pitsaassuseq, ilinniakkallu imaqarluarnissaat angujuminaattarluni. Pissutsit taamaannerisa aammattaaq nassataraat ilinniarfiit ingerlanneqarnerat pisariusarmat akisusarlunilu.
Taamaammat iluarsartuusseqqinnermut suleqataasut, tassa atuarfiit, ilinniartitaanermut ataatsimiititaliat aammalu kaatuffiit inuussutissarsiutinut tunngaviusunik ilinniartitaanerit allanngortitertariaqarnerat tikkuarpaat.
Allanngortitsinerup kingunerisaanik STI-mi atuarfinni sulianut aalajangersimasunut ilinniartitsisarnerit atorunnaarsinneqassapput. Sulianut aalajangersimasunut ilinniartitsinerit siunissami qitiusumik ilinniarfinni ingerlanneqartalissapput.
Niuernermik ilinniarfinni aammalu sanaartornermi ilinniarfimmi nukiit killeqarmata taakkunani ilinniartitsinerit ilaat nunat immikkoortuini ilinniarfinnut siammarneqassapput.
Tassa niuernermit allaffissornermillu ilinniartitaanerni ukiut siulliit marluk, kiisalu sanaartornermi ilinniartitaanerit ukiuat siulleq nunap immikkoortuini ilinniarfinni ingerlanneqartassapput.
Aammattaaq isumaginninnermi ikiortinngorniatut ilinniartitaanerit nunap immikkoortuini ilinniarfinni ingerlanneqartarnissaat naatsorsuutigineqarpoq.
Niuernermik allaffissornermillu ilinniartitaanerit, kiisalu sanaartornermik ilinniartitaanerit eqqarsaatigalugit kommunit ilinniarfeqarfiusussat isumaqatigiissuteqarfigineqarsimapput. Illoqarfinnik toqqaasoqarmat makku isiginiarneqarput.
Siullermik inuttaasut amerlassusiat, tassa ilinniartorineqartussat amerlassusaat eqqarsaatigalugu, suliamik sungiusarfigineqarsinnaasut amerlassusiat, ilinniartitsisussanik pissarsinissamik periarfissat, kiisalu aappassaanik kommunit ilinniarfinnik ilinniartullu inaannik pissarsiniaqataasinnaassusiat.
Niuernermik allaffissornermillu ilinniartitaanerit Ilulissani, Sisimiuni, Nuummi Qaqortumilu immikkoortortaqarfeqassapput. Sanaartornermik ilinniartitaanerit, Aasianni, Sisimiuni Nuummilu immikkoortortaqarfeqassapput.
Ilinniartut amerlassusiat kujataani ilinniarfiup immikkoortartaanik pilersitsinissamut aalajangiisuussaaq. Ilinniakkat taakku marluusut Tasiilami immikkoortortaqarfeqarsinnaanersut misissorneqassaaq.
Immikkoortortat qitiusumik ilinniarfiit immikkoortortaasut isigineqassapput, qitiusumimmi ilinniarfiit ilinniartitaanerup pitsaassusianut ingerlaneranullu akisussaammata.
Inuussutissarsiutinut tunngaviusumik ilinniartitsinerup saniatigut naatsorsuutigineqarpoq immikkoortortat ilinniartitseqqittarnermik pikkorissartitsisarnernillu ingerlatsisassasut.
Ilulissani immikkoortortaq takornariartitsinermut tunngasunik ineriartortitsivigineqassaaq. Immikkoortortarlu Aasianniittoq inersimasumik ilinniartitsinermik ingerlatsisussatut isumaliutigineqarpoq.
Tassalu Mads Peter Grĝnvoldip Avannaani qitiusumik ilinniarfiliortoqarnissaanik kissaataa tamakkiisuunngikkaluamik naammassineqassaaq. Ilinniakkat pineqartut Avannaani amerlasuunik ilinniartussaqarput.
Allaffimmiutut niuertarfimmiutullu ilinniartut, ilinniarnerisa ukiuisa pingajuat sisamaallu aammalu sanaartornermik ilinniartut ilinniarnerisa ukiuisa aappaat pingajuallu qitiusumik ilinniarfimmi ingerlanneqartussaanerat ilumoorpoq.
Taamaattorli qitiusumik ilinniarfimmiittarnerat piffissami killilimmi pisartussaavoq, tassa sapaatip akunneri qulit tikillugit.
Inuilip ilinniartut tamaasa tigusinnaavai, taamaammallu sumiiffinni allani immikkoortortaqalernissaanik pilersaaruteqartoqanngilaq.
STI-mi atuarfiit maani atuuttut eqqarsaatigalugit erseqqissarneqassaaq, taakku arlaannaalluunniit atorunnaarsinneqarnissaat Namminersornerullutik Oqartussat pilersaarutiginngimmassuk.
Akerlianilli inuussutissarsiutinut ilinniartitaanernik iluarsartuusseqqinnikkut inuussutissarsiutitigut ilinniartitaanerni suliat allat pilersinneqartariaqalissapput.
Tamatumali saniatigut suliffeqarneq eqqarsaatigalugu suliffissaqartitsiniutinik aallarnisaasoqarnissaa pisariaqarluinnalersimavoq.
Ilinniartitaanernut inuussutissarsiutinullu piareersarnerit siunnersuisarnerillu pillugit nassuiaat taaneqareersoq, piareersarfiit ukiumik ataatsimik sivisussusillit pilersinneqarnissaat pillugu pilersaarutinik imaqarput.
Piareersarfiit taakku atuartut meeqqat atuarfiannik naammassinnereerlutik ilinniarfinnut imaaliallaannarlutik isersinnaanngitsut piginnaasaannik piareersimassusiannillu pitsanngorsaaviussapput, imaluunniit ilinniartut ilinniakkaminnik naammassinninnatik unitsitsisimasut piginnaasaminnik piareersimassusiannillu pitsanngorsaaviussallutik.
Misileraanerit maannamut ingerlanneqarsimasut takutippaat, ingerlatat taamaattut illoqarfinni allani aallartissallugit ilumut atorsinnaalluartuusut.
STI-mi atuarfiit iliuutsinut taama ittunut aallaavissaqqilluinnarput, ilinnianerup suliamillu misiliinerup ingerlanerani atugarisat pitsanngorsarneqarsinnaanerat pillugu Inatsisartuni ilaasortap Olga Poulsenip apeqquteqaataanut Naalakkersuisut akissuteqaamminni tamakku itinerusumik nassuiareerpaat, imaluunniit nassuiassavaat kingusinnerusukkut.
Taannalu paasisaqarluarumasunut innersuussutigineqassaaq.
Qitiusumik ilinniarfiit illoqarfinni assigiinngitsunik suliassaqartassapput, tassaassapput ilinniartunngortussanik siunnersuinerit, ilinniartussanik tigooraanerit, sapaatip akunnerinik marlunniit sisamanut ilinniartitaanernik ilisarititsinerit, suliamik misiliiffissanik akuersisarnerit, suliamik misiliiffissamik ujaasinerit, suliamik misiliisunik ataatsimeeqateqartarnerit kiisalu nalunaarsuinerit.
Suliassat tamakkua STI-mi atuarfinni ingerlateqqinneqarnissaat pissusissamisoorpoq.
Qitiusumik ilinniarfiit piumaffigineqarsimapput pikkorissartitsisarnitik ilinniartitteqqittarnitillu ajornangippat illoqarfinni pisariaqartitsiffiusuni ingerlattaqqullugit.STI-mi atuarfiit tamatumani periarfissaalluarput.
Aammattaaq Isumaginninnermut Pisortaqarnermullu suliffeqarfik suliffissaaleqinermik akiuiniutinik aallarnisaanissaminik pisariaqartitsivoq. Tamatumanissaaq STI-mi atuarfiit periarfissaqqivipput.
Kommunalbestyrelsit nutaat inissitsitereeriarpata Kultureqarnermut, Ilinniartitaanermut Ilisimatusarnermullu Ilageeqarnermullu Pisortaqarfik aamma Isumaginninnermut Suliffeqarnermullu Pisortaqarfik kommuninut tamanut angalaartitsissapput pilersaarutit taaneqareersut pillugit, erseqqinnerusumik ilisimatitsiniarlutik.
STI-mi atuarfiit ataasiakkaat siunissami suliarisartagassaat kommunit peqatigalugit pilersaarusiorneqassapput.
Kommunit ilaanni isumaqartoqarpoq ilinniartitaanerit sulianut aalajangersimasunut sammisut atorunnaarsinneqarnerat kinguariarnerusoq, kommuninilu sulianik taamaatitsinermik kinguneqartussaasoq.
Naalakkersuisut neriuutigaat akissuteqaatikkut matumuunakkut tamatuma ilumuunnginnera ersersinneqarsimasoq, tamatumani pineqartut tassaapput, allanngortiterinerit pisariaqartut, ilinniartitaaneq qitiutillugu kisiat pillugu ingerlanniarneqartut.
Ruth
Heilmann, Siumup
oqaaseqartua:
Oqaatigilaassavara
oqaaserisassakka annikitsunnguamik ilassuteqartinnikuugakkit, taanna
agguaatamiinnginnami maluginialaassavarsi.
Taamatut
Inatsisartunut ilaasortaq Mads Peter Grĝnvold, Kattusseqatigiit
oqallisissamik Inatsisartunut saqqummiutaqarnera Siumumiit paasilluarparput.
Nalunngilarput illoqarfimmi ilinniarfimmik pilersitsisarneq illoqarfiup
kommunillu ineriartoqqinnissaanut pitsaasumik tunngaviliisartoq.
Tamanna
illoqarfiit ilinniarfinnik pilersitsivigineqarsimasuni takussutissaqarpoq,
qanoq atsigisumik ineriartortinneqarneranut iluaqutaassuseqartiginersut,
aammalu najugaqarfigissallugit qanoq aamma inuusuttunit
kajungerineqartiginersut, soorlu oqaluuserisassamik siunnersuuteqartumit
tamanna aamma ersersinniarneqartoq.
Aammalu
Siumumiit ilanngullugu eqqaasariaqarsoraarput Namminersornerusut
ingerlatseqatigiiffiinik inissiisarneq illoqarfiup aningaasarsiorneranut,
suliffissaqarnikkullu sunniutigisinnaasai qanoq illoqarfimmut
uummarissaataallutillu siuariartornerannut isumaqartigisarnerat.
Illuatungaatigullu
oqaatigisariaqarpoq aalisarnerinnarmik tunisassiorfeqarnerinnarmillu tungavilimmik
illoqarfiit nunaqarfiillu ineriartortitaasut aalisakkat tammakarnerini
aningaasarsiornikkut toqqammaviusoq ingerlaannaq malunniuttartumik
inuutissarsiornikkut peerunneratigut kinguariartulerneranik
kinguneqartarluni.
Ilumoorpoq
Nunarput isorartoqaaq, ilinniagaqarfinnullu ilinniariartarneq
ajornaatsuinnaasanngilaq, pingaartumik ilaqutaqalereersimasuni,
ajoraluartumik avissaartuunnermik aamma kinguneqartumik arlalippassuartigut
naammattuugassaqartarluni.
Aamma
inooqatigiinnut meeralinnut ingerlaavartumik ajornartorsiortitsilersartumik.
Taamaattumik
nunagisaq qimannagu ilinniartitaanerit ingerlaavartumik piorsarneqarnissaanik
isumaq Siumumiit tapersersorluinnarparput.
Taamaattumik
aamma Naalakkersuisut akissutaanni STI-qarfiusut piusut pisariaqartitaasuni
suli atorluarneqarnissaannik siunnerfeqartoqarnera Siumumiit
iluarisimaarparput.
Aammalu
paasilluarparput ilinniarfinni ilinniartitsisunik, minnerunngitsumillu
immikkut ilisimasaqartunik atorluaanissaq aammalu ilinniartut amerlanerusut
pissarsiaqarluartarnissaat qiteralugu ineriartortitseqqinnerup
sammivilerniarneqarnera oqaatigissavarput Siumumiit tapersersorlugulug
paasilluaratsigu.
Taamaakkaluartoq
Siumumi isumaqarpugut illoqarfiit aalajangersimasut kisiisa alliartortinneqarnissaminnut
periarfissitaaniarnerannik siunnerfik nalilersortuartariaqartoq,
ataqatigiissaartumillu ineriartortitsinissamik aallaaveqartumik
pilersaarusiornerup ingerlateqqinnissaanik tamanna oqimaalutarnissaa
pisariaqartoq.
Tamannalu
KANUKOKA peqatigalugu sukumiisumik eqqartuiffigineqarnissaa Siumumiit
pisariaqartutut isigaarput,
Taamatut
Siumumit oqaluuserisassiaq oqaaseqarfigaarput, tunngaviatigut isumaa
paasilluarlugu.
Godmand
Jensen, Atassutip
oqaaseqartua:
Inatsisartuni
ilaasortap Mads Peter Grĝnvoldip oqallisissiatut apeqquteqaatigisaanut,
tassalu Nunatsinni ilinniarfiit, qanoq inissisimaneri pillugit,
nalilersuinissamik siunnersuut.
Siunnersuut
misissorluareerlugu, Atassummiit imatut oqaaseqarfigissavarput.
Siunnersuuteqartup
oqallisissiatut siunnersuutaa paasilluarsinnaavarput, tassami ilinniarfiit
siammarnerullugit aaqqissuussinissaq eqqarsaatigimmagu. Ilinniarfimmi
ataatsimoorpallaarnerisa siammasinnerusunngortinneqarsinnaanerat
siunertaralugu, ilaatigut aamma eqqarsaatit ilagimmassuk, suliffiusinnaasut
Nunatta sinneranut siammarnerunissaat, tamannalu tunngaviatigut
paasilluarsinnaavarput.
Taamaakkaluartorli
nalunngilarput, siusinnerusukkulli Inatsisartuni, aammalu Naalakkersuisuni
suliaqartoqartoq, Inatsisartut piumasaqaataat aallaavigalugit,
Ilinniarfeqarfinnik naleqquttumik, aammalu Ilinniarfiit pigineqareersut
aallaavigalugit siammarsaanissamik.
Tamannalu
1999-imi upernaakkut, Inatsisartut ataatsimiinneranni akuersissutigineqarpoq.
Inuussutissarsiutaasinnaasut
pillugit pikkorissartitsisarnerit, aammattaaq eqqarsaatigalugit. Tassanilu
eqqarsaatigineqartunut ilaapput, STI-mi ilinniartitaanerit ataatsimoortut.
Atassummiit
isumaqarpugut, ilinniarfiit pitsaasumik siammarsarneqarnissaat siunertaralugu,
Inatsisartut peqqussutaatigut 1998-imi ukiakkut, aammalu 1999-imi upernaakkut,
Inatsisartuni peqqussutissatut akuersissutigineqartukkut, ilinniarfinnik
siammarterinissamut periarfissiisoqarsimasoq.
Aammalu
ilanngullug maluginiarparput, siunnersuuteqartup aamma STI-mi atuarfiit
matoorarneqartualernerat annilaangassutigigaa. Ilaatigummi ilinniarititsisut
amigaataanerat pingaarnerpaatut oqaatigimmagu.
Atassummiilli
ilisimavarput ilaatigut aamma ilinniartunngorniartartut ikippallaalernerat,
patsissaasut ilagilluinnaraat.
Atassummiillu
taamatut oqaaseqarluta, siunnersuutaasoq tunngaviatigut paasilluaraluarlugu,
Naalakkersuisut akissuteqaataannut isumaqataanerput nalunaarutigaarput.
Paninnguaq
Olsen, Inuit
ataqatigiit oqaaseqartuat:
Nunatsinni
ilinniarfiit inissisimasarnerat pillugu apeqquteqaat allaavigalugu
oqallinnissamik siunnersuut, tassungalu ilanngullugu ilinniarfiit
siammarneqarnissaat pillugu oqallinnissamik Mads Peter Grĝnvoldip
siunnersuutaanut Inuit Ataqatigiit ima oqaaseqassaagut.
Naatsumik
oqaatigalugu Inuit Ataqatigiit Naalakkersuisup siunnersuuteqartumut
akissuteqaataa tamakkiisumik iluarisimaarlugulu akuersaarparput.
Tassalu
1998-imi upernaakkut 1999-imilu ukiakkut Inatsisartut ataatsimiinneranni
inuussutissarsiutitigut ilinniartitaanerit
iluarsartuussivigeqqinneqalernerannut tunngaviliisut Inatsisartunit aamma
akuersaarneqarsimasut, suliallu ullumikkut ingerlareersut pillugit.
Inuit
Ataqatigiit pitsaasutut isigaarput allaffimmiutut niuertarfimmiutullu
ilinniartitaanerit illoqarfinni pineqartuni aammalu sanaartornermik
ilinnniartitaanerit illoqarfinni pineqartuni immikkoortortaqarfeqassammata.
Taamaalilluni
Nunatsinni ilinniarfiit siammasilluartumik aammalu illoqarfinnut sanilerisanut
akunnaatsumik inoqassutsimullu naleqqiullugit ilinniariartartunit
susassaqarfiulluartut saatassaqarluartullu ilinniariarfiusinnaassammata.
Inuit
Ataqatigiit manna iluatsillugu Ilinniartut Kattuffiat kaammattussavarput
ilinniartunut ullumikkornit annertunerusumik ataatsimoortitsisarnerit
ilinniartut pisariaqartitsinerat aallaavigalugu aaqqissuussisaqqullugu.
Ilanngullugu
kaammattuutigissavarput nalliuttorsuarni ilinniartut illoqarfigisaminnut
nalliuttorsioriarsinnaanngitsut ilinniarfigisaminnilu ilaqutaqanngitsut
ilaqutariinnut piumassutsiminnik ilinniartunut @ilaqutaarusuttunut@
periarfissiuullugit aqqutissiuunniaqqullugit.
Inuit
Ataqatigiit ilisimagatsigu kalaallit ilaqutariiussusermik pingaartitsillutillu
angerlarsimaffimminnut ilinniartunut nalliuttuni suli
tikilluaqqusisinaalluartut.
Inuit
Ataqatigiit taamatut oqaaseqarluta Ilinniartitaanermut Naalakkersuisup
siunnersuuteqartumut akissuteqaataa akuersaarparput.
Tom
Ostermann,
Kattusseqatigiit oqaaseqartuat:
Inatsisartunut
ilaasortap Mads Peter Grĝnvoldip Nunatsinni ilinniarfiit inissisimanerat
aammalu ilinniarfiit siammarnissaat pillugu oqallinnermi Kattusseqatigiinniit
imatut oqaaseqaateqarniarpugut.
Kattusseqatigiit
isumaqarpugut ilinniarfiit sumiiffikkuutaartumik
nalilersoqqinneqartariaqalersimasut, ilami ajornartorsiutit piureersut
eqqarsaatigalugit, aammalu ajornartorsiutaajuarsimasut, soorlu ilinniartut
inissaaleqineri aammalu ilaqutariit qimallutik ilinniariartortarneri
eqqarsaatigalugit iluarsiiffigineqassappata pinngitsoorsinnaanngilagut
nutaamik ilinniarfiit nalilersoqqinnissaanik.
Tamakku
aamma ilagisinnaavaat ilinniakkaminnik unitsitsiinnartartut
ikilisinneqarsinnaammata.
Ilami
ilaatigut unitsitsiinnartarnerup ilagisarmassuk ilaquttat qimallugit
ilinniariartortarnerit, taamaalillunilu imaaliallaannaq
tikinneqarsinnaannginnerup nassatarisaanik angerlarsilertarnerit, taassumalu
kingorna ilinniakkamik taamaatititsiinnartarneq.
Kalaallit
Nunarput isorartoorsuummat aammalu ilaatigut angallavigiuminaaginnarani,
taassumalu saniatigut angallannikkut pissutsit qiviaraanni nalunngilarput
ullumikkut silaannakkut angallanneq akisoorujussuusoq.
Taamaammat
ilinniartut ilaqutaqalereersimasut aningaasatigut
periarfissaqanngilluinnarlutik ilaquttaminnik tikeraarnissaminnut.
Kattusseqatigiinniit
isumaqarpugut INUILI-p avannaani immikkoortortaqalerneratigut Kalaallit
nerisassaatitta sumiiffiit aallaavigalugit eqaatsumik aammalu pissanganartumik
misilittaatigineqartarsinnaammata.
Soorlu
ullumikkut naluneqanngitsoq INUILI-p Narsamiittup annertuumik savap neqaanik
allarpassuarnillu assigiinngitsunik misileraallutik nutaanik
nerisassiortalersimammata.
Tamakku
tunngavigalugit isumaqarpugut pissusissamisoortoq Avannaani INUILI-p immikkoortortaqalersinnaanera,
ilami kalaalimerngit eqqarsaatigalugit Avannaani aammalu Kujataani
pissarititaasut assigiinngeqimmata.
Konto
pingaarneq 40.11.21 Inatsisartut Aningaasanut Inatsisaanni takuneqarsinnaavoq
INUILI-mi aningaasaliissutit 2001-imiit 2004-p tungaanut 8,3 mio. kr.-iusut,
kiisalu taassumap saniatigut immikkut ilinniartut angalanerannut
aningaasartuutit, tassa konto pingaarneq 40.13.60 aammalu 40.13.61 katillugit
26 mio. kr.-iummata.
Tassani
erseqqissaatigilaassavara ilinniartut tamarmik aningalasarnerannut
tunngassuteqarmat taanna.
Kisitsisit
Kalaallit Nunatta Naatsorsueqqissaartarfianeersut takuneqarsinnaavoq,
inuussutissalerinermik ilinniarlutik qinnuteqarsimasut 1998 aammalu
1999-imilu 130-usimasut, taakkunanngalu 93-it, tassa angutit 37-t kiisalu
arnat 56-it ilinniarnissaminnik aallartissimallutik.
Ilinniartitaanermut
Naalakkersuisup akissummini oqaraluarpoq INUILI-mut qinnuteqartut tamarmik
tiguneqarsimasut, tamanna eqqunngimmat apeqqutigerusunnarpoq suut tunngavigalugit
qinnuteqartut 37-t tiguneqarsimannginnersut.
Aammattaaq
akissutigineqartut ilaat, tassalu Kommunalbestyrelsit nutaat
inissitsitereerpata Kultureqarnermut Ilinniartitaanermut kiisalu
Suliffeqarnermut Pisortaqarfik peqatigalugit tusarniaaniarnerit
isumalluarfigaagut.
Kattusseqatigiinniit
isumaqarpugut siunnersuuteqartup siunnersuutigisaa ilumoortortaqarlunilu
iluatinnaateqartoq, kiisalu qulaani taakkartukkagut sumiiffikkuutaartumik
toqqammavilersuutit isumaqarpugut siunissami nalilersuinermi
ilannguttariaqartut.
Taamatut
oqaaseqarluta Inatsisartut Kultureqarnermut, Atuartitaanermut
Ilageeqarnermullu Ataatsimiititaliaanut siunnersuutigineqartoq
nalilersugassanngorlugu inassutigaarput.
Otto Steenholdt, attaviitsoq:
Inatsisartunik oqallisiginneqqusisup ersarissumik oqallisigeqquvaa, Nunatsinni ilinniarfiit inissisimanerat allanngorlugu sinerissamut siammarneroqqullugit.
Uangattaaq isumaqarpunga oqallisigeqqusaq tunngavissaqarluartoq, ilami ilinniarfiusinnaasut, oqarta tamangajammik Sisimiuniit Kujataata tungaanut inissitsiterneqarsimammata.
Ajorniutiginagu oqaatigisariaqarpara Landsrċde-toqqamili ileqqorineqartarmat qinersivigisaq sapinngisamik sanaartugassat eqqarsaatigalugit pissarsissunniarneqartarluni.
Tamatumunnga tunngatillugu, naak ilinniarfiunani suliffiugaluartoq, assersuutigisarpara Nunatsinni ammeriviup kisiartaasup Kujataanut inissinneqarnera. Ataasiarnangalu amminik assartorneq asiutitsiumananilu inissiisarfiit pissutaallutik ameerutinik asiusoortarneq pillugu Avannaani ammeriveqalernissaanik siunnersuuteqartarsimagaluarlunga.
Inuusuttut Avannaani najugaqartut, aamma nalliuttorsuit nalaanni angalaniapiloortarnerat siunnersuuteqartumit eqqaaneqartoq ilumoornerarsinnaavarput.
Ilinniarfiusinnaasut sanaartukkallu aamma allat sikuneq ajortumiittariaqarnerattut isigineqarnerat, timmisartut angallatigineqartualernerisigut siunissami allanngortiterneqartariaqarpoq.
Nuummi najugaqartualernerup kinguneraa, suut suliat allallu Nuummut katersugaavallaarnerat, maani Landstingimut assuarineqaraangat isumaqataarpiassananga.
Maanili oqallinnermi siunnersuuteqartoq isumaqatigalugu Naalakkersuisut nattorumavakka sanaartugassat aamma ilinniartitaanermut tunngasut sinerissap kujataatungaannaanut katersornagit siunissami sinerissamut siammarterneroqqullugit.
Oqartoqaraluarpoq ataatsimut katersuinikkut ilinniartitsisunik atuilluarnissaq aqqutissiunneqartartoq.
Akissuteqaammi STI-mi atuarfiit sammineqarnerugaluarput, oqaatigineqarlunilu sulianut aalajangersimasunut ilinniartitsisarnerit atorunnaarsinneqassasut, aamma tamatumunnga sinerissap avannaatungaani atorunnaarsitsinissat illoqarfinni misigineqassapput.
STI aallartinnginnerani Danmarkimi niuernermik ilinniarfiit Nunatta inuusuttaanut ilinniarfigineqartinneqarsimapput, isumaqartuarpungalu taakkunani ilinniarsimasut ullumi ulloq tikillugu Nunatsinni pitsaasumik iluaqutigigigut.
Ilinniarfiit tamakku pitsaassusiat taakkartorlugu Nunatsinni STI-t atorneqalerput, tamatumunnga tunngatillugu oqaatigisariaqarpoq, taamani inuusuttortatta atuarfiit, imaluunniit ilinniarfiit, Danmarkimiittut suliamullu qaatuussaqarluartunik ilinniartitsisullit assut ilikkarfigisimagaat.
Maannalu STI-t matooqqarniarneqalernerannut tunngatillugu eqqarsaatigisarpara, maani STI-ni ilinniartitsisut atukkat Danmarkimi ilinniartitsisutulli ukiorpassuarnut ilinniakkanut misilittagaqarsimanngitsut, immaqalu aamma ilinniartunut piumasaqaatit maani sakkukippallaarsimasut, tassalu tamakkorpiaat STI-t ingerlalluannginnerannut pissutaarpiarsimasut.
Niuernermik ingerlatsivinni suli ulloq manna tikillugu qallunaaginnaasavinnik qullersaqarneq ingerlajuaannassanngippat, inuusuttagut niuernermik ilinniagaqarusuttut qangatut Danmarkimut ilinniariartortarnissaat aqqutissiuttariaqarlerpoq.
Naak akissummi oqaatigineqaraluartoq niuernermik ilinniarfinni aammalu sanaartornermik ilinniarfinni nukiit ilinniartitsinerillu ilaat nunap immikkoortuinut ilinniarfinnut siammarneqassasut.
Ilinniartitaanerit pillugit kommunit oqaloqatigineqarneri aallartissimapput. Piumasaqaatillu taakkartorneqarsimallutik, soorlu ilinniartut inissaqarnissaat aamma isumagineqartariaqarluni, taamaasilluni apeqquteqartup ujartugai piviusunngorsinnaalerunarput.
Naggasiullugu kissaatigissavara STI-ni atuarfiit siunissami sumut atugaanissaat kommunit peqatigalugit oqallisigineqalerpata, atuarfiit suulluunniit sinerissami eqimattakkuutaarlugit katersorneqartarneri sinerissamut siammaanneqarneroqqullugit.
Mads Peter Grĝnvold, Kattusseqatigiit:
Siullermik qujassutigissavara Ilinniartitaanermut Naalakkersuisup akissutigisaa, tassa ujartukkamma ilagisaat, niuernermut tunngatillugu ilinniartitaanermi immikkoortortaqarfiliinissaq nunap ilaani aaqqinneqarniartoq oqariartuutigineqarpoq.
Kisianni uani siunnersuuteqarninni ujartorpara ilinniartitaanermi naammassiartornermi immikkoortortaqarsinnaaneq aamma Avannaani. Imaanngitsoq naammassiartussagaanni ukiup pingajuani sisamaanilu Kujataanukaqqaartariaqarluni.
Ilinniartut agguaqatigiissinnerani Avannaani niuernermi ilinniartunngortartut annertupput. Taamaattumik tulluartuussagaluarpoq qitiusumik immikkoortortaqarfeqassalluni avannaani.
INUILI-mut tunngatillugu, annertuumik Kattusseqatigiinniit piareersarluarsimarpasittumik oqaaseqartup oqaaseqarnera assut iluarisimaarpara. Imaanngitsoq Kattusseqatigiummat. Kisianni paasiniagassat assigiinngitsut peqqissaartumik misissorsimavai, angalanermikaningaasartuutit qanoq annertutigisumik Nunatsinni atorneqartarnersut aamma ilanngullugit.
Isumaqarpunga tamakkua iluarsartuutissagaanni aamma periarfissaasinnaasut assigiinngitsut misissorneqartariaqartut, aammalu Ilinniartitaanermut Ataatsimiititaliami oqariartuutigisara nalilersorluaqqinneqarnissaa isumaqarpunga pitsaassagaluartoq.
Taamatut annerusumik oqaaseqarnanga akissutigineqartut naammagisimaarpakka.
Lise Skifte Lennert, Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq:
Siullermik siunnersuuteqartup ujartugaanut, nalilersuilluaqqinnissaq ajartorakku, tassani soorlu akissuteqaatinni aamma oqaatigigiga kommunit inissitsiteriarpata taamatut pisortaqarfinninngaanniit aammalu Jĝrgen Wĉver Johansenip pisortaqarfianinngaanniit angalasoqassammat.
Taamaalilluni kommunit qanittumik tikillugit aaqqiissutaasinnaasut tassani nalilersoqqinneqassammata, neriuppunga taanna akissutiga siunnersuuteqartup Mads Peter Grĝnvoldip naammagissagaa.
Kiisalu partiit oqaaseqartuinut annikitsunnguanik oqaasissaqalaarpunga. Siumup oqaaseqartuanut, Ruth Heilmannip ilanngussaanut, paasilluarpara, taamaalillutillu Siumuminngaanniit tapersiinersi qutsatigalugu.
Kiisalu aamma KANUKOKA peqatigalugu sukumiisumik eqqartartuiffigineqarnissaa Siumumiit pisariaqartutut isigineqarmat, tassa taanna suliaq tamaat KANUKOKA peqatigeqqissaarlugu ingerlassimavarput. Kissaatigineqartorlu tigussavarput.
Atassutip oqaluttuanut Godman Jensenimut, akissuteqaatinnut isumaqataanerat qujassutigivara.
Inuit Ataqatigiit oqaaseqartuanut Paninnguaq Olsenimut, tapersinnerannut qutsatigaara, aammalu maluginiarpara ilinniartunut kaammattuinersi, aammalu kaammattuutisi aappaa isumassarsialattut isigalugu.
Kiisalu Kattusseqatigiit oqaluttuanut Tom Ostermannimut, erseqqissumik ujartugaqaravit aamma apeqquteqarlutillu ima oqassuunga, INUILI-p ilinniartuisa angalasarneranut paatsoorneqarsinnaammat. Katillugit angalasarnerit 26 mio. kr.-it sinnerlugit taggikkakkit. INUILI-mi angalasarnerit annerpaamik 3,5 mio. kr.-inik naleqarput.
Akissuteqaatinni oqaatiginngilara qanoq amerlatigisut INUILI-mi isertinneqarsimanersut, kisiannili INUILI-mi ilinniarfiup tassuma tigusinnaasai tamarmik isertinneqartarput.
Tom
Ostermann,
Kattusseqatigiit oqaaseqartuat:
Kisitsisit
pissarsiarisimavakka Naatsorsueqqissaartarfiup 2000-imi nalunaarutigisimasai.
Taanna ilisimatitsissutigilaarpara.
Taassuma
saniatigut erseqqissarniarsarigaluarpara, immaqa ikkappallaalaamik
akissuteqalerama, taakku aningaasat suminngaanneernerat tunngasut eqqaagakkit.
Assigiinngitsut
oqaluttut aamma eqqaavaat, Atassutikkormiut oqaluttuat oqannguatsiarpoq, STI
atuarfii matuneqarnissaanut tunngasunik, taavalu ilinniartitsisussaaleqisarnerit
eqqartorneqarlutik aamma.
Una
sukumiisumik paaserusunnaraluarpoq, illoqarfinni mikinerusuni STI-qarfiit
matuniarneqarnersut. Taanna sukumiisumik paaserusukkaluarpara.
Lise
Skifte Lennert,
Kultureqarnermut, Ilinniartitaanermut, Ilisismatusarnermut Ilageeqarnermullu
Naalakkersuisoq:
Apeqquteqaatinnut
kingullermut imatut akisinnaavunga, STI-nik matusiniartoqanngilaq sumiluunniit,
neriuppunga akissuteqaatinni taakkua siunissami STI-p iluani suliassatut
eqqarsaataasut tulleriaarsimasakka maluginiaqquvakka.
Augusta
Salling,
Siulittaasoqarfimmi ilaasortaq: