Oqaluuserisassani immikkoortoq 46-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ataasinngorneq
7. maj 2001, nal. 19:41.
Ataatsimiinnermik aqutsisoq: Siulittaasoqarfimmi ilaasortaq Anders Andreassen.
Lars Karl Jensen, Siumut:
Uani arlariinnik suliffeqartunut akileraartarnermut allagartap ataasiinnanngorlugu akileraartarnissamik aqqutissiuussinissamut Inatsisartuniit Naalakkersuisunut peqqusinissaq siunnersuutigigakku makkuninnga tunngavilersorpara:
Inunnit arlalinnit saaffigineqartarpunga ukiuni makkunani suliffiit amerlaqisut minnerunngitsumik aalisakkanik suliffissuit sulisussaalatsisarneranni, sulifimmik avataasigut sulerusukkaluarlutik uniffigisarsimallugu suliffiup avataatigut suliffeqarnermi ilanngaatitaqanngitsumik akileraartussaaneq.
Kallallit Nunatsinni akileraartarnerup eqqunneqarneranniit akileraartarnermut periaaseq ullumimut atorneqarpoq, tassani inuit ataasiakkaarluta akileraartarnerput eqqarsaatigaara, tassalu aalajangersimasumik suliffeqarnermi isertitat aallaavigalugit ilanngaasikkanik akileraartussaaneq, saniatigullu suliffeqarnermi isertitat ilanngaateqanngitsunik akileraarutigineqarnissaat.
Saaffiginnittartut oqaloqatigisarneranni malunnarpoq arlariinnik suliffeqarnermi akileraartarnermut allagartap ataasiinnanngortinnera anguneqarsinnaappat tamatuma kingunerissagaa sulisinnaasut amerlanerulernissaat pisussaaffitullu akilersukkanut akissaqarnerulernissaq.
Inuit suliffivimmik saniatigut allanik suliffeqarnissamut nukissaqartut kajumissuseqartullu inuiaqatigiit iluatigisariaqarpavut, minnerunngitsumik ukiuni makkunani sulisinnaasunik noqqaanitta nalaani, akileraartussaanermut periutsip allanngortinneratigut.
Taamatut oqaaseqarlunga Inatsisartuni suleriaaserput malillugu, arlariinnik suliffeqartunut akileraarnermut allagartap ataasiinnanngortillugu akileraartarnermut atuutilersinnaaneranik Naalakkersuisut peqquneqarlutik aqqutissiuussinissaannik siunnersuut saqqummiuppara.
Josef Motzfeldt, Aningaasaqarnermut Naalakkersuisoq:
Siunnersuummik saqqummiussisup siunnersuutaata teknikkikkut piviusunngortinneqarsinnaanissaa Naalakkersuisut ajornartuusoraat. Aamma Naalakkersuisut isumaqarput taamak siunnersuuteqarneq akileraartarnermi siumoortumik nalunaarsuisarnermut tunngasunik, tamatumalu kingunerisaanik akileraartarnermik allagartamik ilanngaasersuisarnermik paatsuuisimanermik tunngaveqartoq.
Siumoortumik nalunaarsuisarnerup siunertaraa ukiup aningaasarsiorfiusup ingerlanerani akileraarutinik akilerneqarsimasut sapinngisamik akileraarutissavittut angissuseqarnissaat. Taamaaliornikkut inuup pineqartup akileraarutissat sinnerinut akiligassaqalinnginnissaa qulakkeerneqassammat. Tamanna ilaatigut anguneqartarpoq inuup pineqartup siumoortumik nalunaarsuiffimmi aningaasarsiat B-t isertitariumaagassani akileraarutitigullu ilanngaatigiumaagassami annertussusiinik nalunaarsuineratigut.
Pineqartoq siumoortumik nalunaarsuiffimmik nassiussaqarsimanngikkaangat kommunimi akileraaruserisunut B-tut aningaasarsiaasinnaasut akileraarutigullu ilanngaatissat angissusilertarpai. Taakku tunngavigalugit akileraarutitut ilanngaatissat angissusilerneqartarput, akileraartarnermilu allagartanut akileraartartunut tamanut nassiussuunneqartartunut nalunaarsorneqartarlutik.
Naluneqanngilaq assigiimmik akileraartitseriaaseq atugarigipput, taamaattumillu aningaasarsiat B-t akileraarutigullu ilanngaatissat siumoortumik nalunaarsorneqarsimasut eqqortumik angissusilerneqarsimassappata ukiup ingerlaneranik akileraarutaasimasut akileraarutissaviit assigisussaavaat, pineqartup aningaasarsiaasa A-t annertussusaat apeqqutaatinnagu.
Aningaasarsiortup pingaarnertut sulisitsisuata aningaasarsianik A-nik tunniussilernerni tamani aningaasarsiortup akileraartarnemi allagartaani, hovedkort-iani, akileraarutitigut ilanngaatissat qaammammut, sap. ak. marlunnut, sap. ak. ataatsimut ullormullu naatsorsorneqarsimasut tunngavigalugit akileraarutit A-t unerartittartussaavai. Aningaasarsiortullu akileraartarnermi allagartaa paarisussaallugu.
Aningaasarsiortoq ataatsimik arlalinnilluunniit saniatigut suliffeqaruni, B-kortini sulisitsisuminut taakkununnga tunniuttussaava. B-korti akileraartarnermi allagartaavoq taamaallaat akileraarutinut A-nut procent-imik qanoq annertutigisumik ilanngaanissamik paasissutissiisoq, taannalu akileraarutigut ilanngaatitaqanngilaq.
B-kortip akileraarutitigut ilanngaateqannginneranut patsisaaginnarpoq aningaasarsiortoq qanorluunniit amerlatigisunik saniatigut suliffeqaraluarpat, akileraarutitigut ilanngaatissaasa annertussusiat allanngornavianngimmat. B-korti atorunnaarsinneqassagaluarpat sulisitsisullu arlaqartut aningaasarsiortup hovedkortia malillugu akileraarutinik A-nik ilanngaassisalissagaluarpata, aningaasarsiortoq akileraarutitigut ilanngaatissami marloriaataanik, pingasoriaatanilluunniit ilanngaaserneqarsimassagaluarpoq. Tamatumalu kingunerisaanik ilanngaassisutaavallaartut akileraarutitaattut amerlatigisunik akileraarutissat sinnerinut akiligasanittussanngussagaluarluni.
Saniatigut suliffeqarnermi isertitat akileraarutitigut oqilisaassiffigineqarnissaat Naalakkersuisuni pilersaarutigineqanngilaq, taamaattumillu siunnersuut tapersersorneqarsinnaanngilaq.
Per Berthelsen, Siumup oqaaseqartua:
Inatsisartunut ilaasortaq Lars Karl Jensen siunnersuuteqarpoq akileraarnermut allagartamik ataasiinnarmik atuisoqalernissaa aalajangiuteqqullugu. Tassanilu ilaatigut tunngavigiliuppaa aalisakkanik suliffissuit sulisussaalatsineranni ataasiakkaat suliffimmi avataatigut sulerusukkaluarlutik uniffigisaraat, taamatut iliornermik ilanngaatitaqanngitsumik akileraartussaaneq.
Siumumit pingaartitaraarput inuk peqqissoq piumassuseqartorlu imminut napatinniarnermini sapinngisamik periarfissagissaartinneqartariaqartoq. Siumumillu aamma isumaqarpugut anguniarneqassasoq akileraartitsinermi ingerlatseriaaseq eqaannerpaasoq, sulerusussutsimut kaammattuutaanerpaasoq ingerlanneqarnermigullu atoruminarnerpaajullunilu akikinnerpaajusoq.
Taamaattumillu kaammattuutiumavarput Naalakkersuisut siunnersuut itigartiinnarnagu sukumiisumik nalilersussagaat, Siumumimmi isumaqaratta siunnersuutigineqartoq itigartinnagu iluamik tamuaarilluassallugu iluatinnaateqartoq.
Takornartaanngilaq nunani allani, assersuutigiinnarlugu soorlu Islandimi inuit arlaqartunik suliffeqarsinnaasarnerat, tassani namminneq piumassusertik nukissaqarnertillu aalajangiisuutillugit, tamannalu qularnanngitsumik inummut imminut napatikkumasumut periarfissaqartillugu peqqinnartuuvoq. Taamaammallu naammaginartumik tunngavissinniassallugu iluatinnaateqartuulluni.
Siumumit ilisimanngilarput, soorlu assersuutigalugu Islandimi akileraartitsisarnikkut aaqqissuussisimaneq qanorpiaq ittuunersoq, Siumumiillu aamma piariikkamik maanna siunnersuutissaqanngilagut ingerlatseriaatsip siunnersuutaasoq qanillisarlugu qanoq aaqqinneqarsinnaaneranik tikkuussisumik. Tamatumami ajornartorsiuteqarnissaa takusinnaalluaratsigu, soorlu tamanna aamma Naalakkersuisunik ersarissumik nalunaarutigineqartoq.
Kisianni tassa Siumumit kaammattuutigiumavarput siunnersuut aallaavigalugu sukumiisumik nalilersuinissaq pissasoq. Tassanimi eqqumaffigilluagassat ilaginngitsoorsinnaassanngimmassuk ataatsimik suliffeqarnerup kajumernartuujuartuunissaa, mattunnaguli inuiaqatigiinni sulisussanik pisariaqartitsineq aallaavigalugu saniatigut sulinissamut kajumissuseqartut maannamit ornigineqarnerusumik akileraartarnerup iluani aaqqissuussiffigineqarsinnaanissaat.
Taamatut oqaaseqarluta Siumumit Naalakkersuisut pineqartoq pillugu nalunaarusiornissaat piumasarissavarput, inassutigalugulu aappassaanerinnissap pitinnagu oqaluuserisap Inatsisartut Akileraartarnermut Ataatsimiititaliaanut suliassanngortinneqassasoq.
Godmann Jensen, Atassutip oqaaseqartua:
Inatsisartuni ilaasortap Lars Karl Jensenip siunnersuutigaa arlaqartunik sulisitsisoqarnermi skattekortip ataasiinnaap atorneqartalernissaa. Siunnersuut peqqissaartumik misissorluareerlugu Atassummiit imaattumik isummerfigalugulu oqaaseqarfiginiarparput.
Nalunngilarput ullumikkut sumiikkaluaruttaluunniit assigiimmik akileraartussaatitaalluta. Tamannarpiarlu tunngavigalugulu siumoortumik immersuinissarput pisariaqartarluni piumasarineqartarlunilu. Siumoortumillu nalunaarsuisarnerup siunertarisarpaa ukiup aningaasarsiorfiusup ingerlanerani akileraarutit akilerneqarsimasut sapinngisamik akileraarutissavittut angissusilerneqarnissaat. Taamaaliornikkut akileraartartut kingusinnerusukkut akiligasseqqinneqarsinnaanerat pingitsoorneqartarmat. Aammattaaq nalunngilarput assigiimmik akileraartitseriaaseq atugarigipput, taamaattumillu aningaasarsiat B-t akileraarutitigut ilanngaatissaat siumoortumik nalunaarsorneqarsimasut eqqortumik angissusilerneqarsimassappata ukiup ingerlanerani akileraarutaasimasup akileraarutissaviit assigisussaavaat pineqartup aningaasarsiaasa A-t annertussusaat apeqqutaatinnagu.
Atassummiit isumaqarpugut ullumikkut akileraartartutut kommunikkaartumik inissisimanitsinni akileraartarnikkut malittarisassaqartitaanikkullu akileraartartutut atugassaqartitaanerput pitsaasuusoq. Taamaattumik Atassummiit siunnersuuteqartup siunnersuutaa isumaqatiginngilarput.
Atassummiit taamatut isumaqarnitsinnut peqqutitta ilaattut taasinnaavarput siunnersuutigineqartutut skattekortip ataasiinnaap atulerneratigut B-korti atorunnaarsinneqassagaluarpat sulisitsisut arlaqartut aningaasarsiortup hovedkortia malillugu akileraarutinik A-nik ilanngaasiisalissagaluarpata aningaasarsiortoq akileraarutitigut ilanngaatissamik arlaleriaataanik ilanngaaserneqarsinnaalissammat, tamatumalu kingunerisinnaallugu ilanngaatigineqartut amerlaqataannik akileraarutitigut tapertussanngortitaaneq.
Atassummiit taamatut oqaaseqarluta siunnersuuteqartup siunnersuutaanut isumaqataanngilagut Naalakkersuisullu akissuteqaataanut tapersiinerput nalunaarutigaarput.
Asii Chemnitz Narup, Inuit Ataqatigiit oqaaseqartuat:
Nunatsinni akileraarutaasussap tunngaviusumik annertusissaanik aalajangersaaneq Inatsisartunik aalajangersorneqartarpoq. Taamatut aalajangersaatitaarnermi Inatsisartut aalajangersimavaat Nunatsinni assigiimmik akileraariaatsinik tunngaveqarluta ingerlassasugut. Tamannalu tunngavigerpiarlugu Nunatsinni aningaasarsiortut qanorluunniit aningaasarsiamikkut nikingatigisumik inissisimasimagunik assigiimmik akileraartussaatitaapput.
Taamatut akileraartussaatitaanerup iluani aaqqissuussagaqarpugut inunnut akileraartartunut iluaqutissamik taaneqarsinnaasumik, tassalu siumoortumik nalunaarsuisarneq. Siumoortumik nalunaarsuinerup inuit amerlaqisut ukiup naanerani akileraarutigisimasamik qaavisigut akileraatinneqartarnerat tamatigoorluinnangajak pinngitsoortittarpaa. Isumaqarpugut taamatut aaqqissuussaqarneq akileraartartunut toqqissisimanartuusoq.
Tunngaviusumik akileraartussaatitaanitsinnut allagartarisatta suliffinnut arlalinnut atatillugu atugarilissagutsigu qularisassaanngitsoq tassaavoq akileraarutinik naammattunik akileereersimanerup saniatigut akileraanngippallaarsimanermut akiligassinneqartalernissarput. Tamanna akileraartartunut toqqissisimanarnavianngilaq.
Taamatut oqaaseqarluta Naalakkersuisup akissuteqaataa taperserlugu siunnersuuteqartup siunnersuutaa itigartipparput.
Mads Peter Grĝnvold, Kattusseqatigiit oqaaseqartuat:
Aalajangiiffigisassatut siunnersuut peqqissaartumik misissoreerlugu Kattusseqatigiinniik imatut oqaaseqarfigissavarput. Kattusseqatigiinniik siunnersuuteqartoq paasisinnaalluinnarparput taamatut ujartuimmat, ukiuni kingullerni ilaatigut sumiiffiinni ilaanni sulisussaaleqinerit tusarsaajuartarmata. Taamatut Kattusseqatigiinniik isumaqarpugut inuit sulerusuttut periarfissiuunneqartariaqartut akileraartarnerup tungaatigut pitsanngorsaavigineqarnissaannut.
Kattusseqatigiinniik taamatut akileraartarnermut allagartap ataasiinnanngortinneqarsinnaanera maannangaaq itigartitsissutigineqarnissaa tulluartutut isiginngilarput. Taamaattumik arlalinnik sulisitsisoqartilluni akileraartarnermut allagartap ataasiinnanngortinneqarsinnaanera peqqissaartumik misissorneqarnissaa Kattusseqatigiinniik kaammattuutigaarput.
Kattusseqatigiinniik isumaqarpugut akileraartarnermut allagartap maannakkornit annertunerusumik misissuiffigineqartariaqartoq. Tassami assersuutigalugu Islandimi akileraartarnermut allagartaq ataasiinnaq atorneqartarpoq. Taamaattumik Kattusseqatigiinniik isumaqanngilagut siunnersuut maannangaaq itigartitsissutigineqartariaqartoq, soorlu maannakkut Naalakkersuisunit piumasarineqartoq siunnersuutip itigartitsissutigineqarnissaa.
Kattusseqatigiinniik nalunngilarput inuit ilaasa sulerusukkaluarlutik akileraartarnermut tunngasut uniffigalugit sulerusukkaluarnertik pinngitsoortittaraat. Taamaattumik siunnersuutip periarfissiuunneqarsinnaanera Kattusseqatigiinniik kaammattuutigaarput. Kattusseqatigiinni isumaqarpugut Nunatsinni Nunatta nammineernerulernissaa anguneqassappat inuit sulisinnaasut maannakkornit annertunerusut ujartorneqartariaqartut, soorlu aamma Islandimi taamatut akileraartarnermut tunngatillugu aaqqissuussisimasut.
Taamaattumik Kattusseqatigiinniik piumasaraarput Islandimi akileraartarnermut periuutsit qanoq nunamut kinguneqarsinnaanerat peqqissaartumik misissorneqartariaqartoq, siunnersuut itigartitsissutigineqannnginnerani. Taamaattumik Kattusseqatigiinniik siunnersuutip Akileraartarnermut Ataatsimiititaliami nalilersorluarneqarnissaa kaammattuutigaarput, siunnersuutip iluatinnaateqarnera eqqarsaatigalugu.
Otto Steenholdt, attaviitsoq:
Siunnersuut misissuataartillugu assut eqqarsarnartoqartissimavara, tassa pappiararsornipilorujussuaq aamma ilaatigut aallaavigalugu. Aappaatigut aamma eqqaasarpara parteeqatinik itigartinneqarnerup nakeriallannartassusia. Taamaattumik tupigikuluppara siunnersuuteqartoq Naalakkersuisoqatigiinni ilaammat, taavalu itigartitaaneq avataaniik tupigineqarsinnaassaaq.
Naalakkersuisoqatigiit sakkutuui qanoq ataatsimoortinneqarsimatiginerpat, imaluunniit siunnersuuteqartoq paasisimasalinnik qanigisaminut apeqquteqarnissaminik kajumigisaqanngiinnarsimanerpoq, tassami paasitinneqajaarsimasuuguni qularnanngitsumik siunnersuutini itigartinneqartussaasoq immaqa siunnersuuteqarsimanavianngikkaluarmat.
Kisianni
tassa taamatut pivoq. Siumoortumik aamma nalunaarsuiffimmik nassiussaqanngikkaanngatta
naluneq ajoratsigu B-tut isertitassagut aamma kommunip nammineq
iluarisannguaminik, oqarta taamatut aaqqittarai. Kisianni taamatut
eqqarsaateqaraluartillunga, tassa siunnersuummut akissutigineqartoq
isumaqarpunga tapersertariaqassasoq.
Aallaqqaammulli
eqqarsarnera suli unitsiinnarusunngilara, tassa pissanganartikkakku aamma
oqaaseqartikkakku ilaasa Islandimi pissutsit taakkartormatigit assut
takorusussavara siunnersuutip uuma ingerlaqqitsilluni ataatsimiititaliamut
tunniunneqarnissaa, tassanilu nalilersorneqarluareerluni Landstingimut
utertinneqarluni qanoq isikkoqarnissaa uanga massakkuminngaaniit tassa
pissanngatigalugu utaqqiinnarusuppara.
Tassalu
oqaatigalugu Naalakkersuisut akissutaat massakkut isumaqatigigallariga.
Josef
Motzfeldt,
Aningaasaqarnermut Naalakkersuisoq:
Tassa
oqaaseqartut ataasiakkaat eqqarsaatigalugu paasinarpoq, Siumup oqaaseqartuata
itigartivinnagu taamaattoq misissugassaqqitsikkaa. Aamma
Naalakkersuisuninngaanniik Akileraartarnermut Ataatsimiititaliap
misissuinissaata saniatigut soorunami iluarsaaqqinnissamik isertitagut
akileraarutinik tunngasunik iluarsaaqqinnissamik suliassanut
ilaatinneqarsinnaasut misissugassat ilagisinnaavat. Kisianni una
siunnersuutaammat aalajangiiffigisassatut massakkut Akileraartarnermut
Ataatsimiititaliamut sammineqartariaqarpoq.
Aamma
Naalakkersuisut takorluunngilaat akileraarutitigut iluarsaaqqinnissaq
tassaassasoq tipigissaatit akitsuutaasut peerneqarneratigut, taanna
iluarsaaqqinnermik taaneqarsinnaanersoq naluara. Kisianni inuiaqatigiit
isertitamikkut akileraarutitigut inatsit toqqammavigalugu naligiinnerusumik
atugaqarsinnaanissaat malunnarpoq partiinik amerlanerusunik
ornigineqartinneqartoq.
Naalakkersuisut
akerlerinngilluinnarpaat inuit ataasiakkaarlutik imminut napatikkususerput
attattuartariaqarerput. Kisianni saniatiguunik arlalinnik suliffeqarnikkut
imminut napatikkusussuseq qaariarneqartussaanngitsoq Naalakkersuisut
isumaqarfigivaat.
Taamaammat
paasivara Atassutikkut Inuit Ataqatigiillu Naalakkersuisut akissuteqaaterput
toqqaannartumik tamakkiisumik tapersersoraat, taamaattullu aamma Otto
Steenholdtip maannangaaq tapersersorallarlugu akissuteqarfigineqarnissaanik
Akileraarnermut Ataatsimiititaliamin-ngaanniik qamagallarniarlugu.
Kisianni
aamma apeqqutaavoq akileraarutitigut inatsisikkut oqilisaassivigineqartussat
kikkuunersut immaqa ataatsimut nalilersussallugu. Saniatigut peqqissuullutik
suliffeqarsinnaasut amerlanerusunik isertitaqarusuttut maani gangimi
aamma takusarpagut, suliutigalutik suliffeqarnermik avataatigut unnukkaangat
asaanikkut asaasutut saniatigut aningaasarsiortut arlaannik anguniagaqaraangamik
aningaasatigut, taanna isumaqarpunga piumassutsimik nammineq takutitsinerusoq.
Kiisalu
Nunatsinni ullumikkut koruunip kingulliup pissarsiarineqartup akileraarutitaa
nunanut allanut sanilliutissagutsigu appasissorujussuuvoq. Nunatsinni
akileraartarnermi procenti agguaqatigiissillugu 42-miippoq, nunani allani
koruuni kingulleq pissarsiarisaq 65-70 % tikillugu allaat akileraarutaasartoq.
Taamaammat oqilisaanneqartussat kikkorpiaappat.
Naalakkersuisuninngaanniit
eqqarsaatigisinnaasatsitut taakkarsortakkatta ilagivaat ilanngaataasinnaasut
tamakkerutsigit 40, aappariikkaani 40-40, 8-8 taava 5 B
5, tassa imaappoq 106.000 kr.-it missaani tassa isertitaqartut taakkua
isertitaqarsinnaapput akileraaruteqaratik. Taannali sulerusussutsimik
killiliisuusinnaanera eqqartortariaqartut ilagivaat. Imaammat ilaasa 106.000
kr.-it qaangernaveersaartarpaat akileraartitaalerniaqigamik. Tassani
killeqarfimmiittut aningaasatigut akileraartarnermut inatsit aqqutigalugu
oqilasaanneqarsinnaanerat isumaqliutigineqarsinnaasoq tulluarnerusoq
Naalakkersuisut nalileramikku siunneersuutigineqartoq itigartippaat.
Kisianni
tassa Kattusseqatigiit oqaaseqartuata oqarneratut misissugassaqqitsinneqarpoq,
taamatut aamma Siumuminngaaniit Islandimi pissutsit imaasiallaannaq
akisinnaanngilakka, taamaattumik akileraartarnermut ataatsimiititaliami
misissuinissami tamakku ilangutissagai naatsorsuutigaara.
Lars
Karl Jensen,
Siumut:
Aap
akissutigineqartut taakkua tamaasa immikkut oqaaseqarfiginngikkaluarlugit
siullermik Otto Steenholdtimut una eqqaasissutigissavara ullumi
oqaaseqarnernut oqaaserisat assorsuaq eqqaagakku. Tassa
naalakkersuisuutitaqartut Naalakkersuisut isummernerannut imaluunniit peqqusinerannut
anngaaginnarpallaartut.
Uagut
Siumumiit Inatsisartunut ilaasortaasugut innuttaasut suliakkiutaat
Naalakkersuisuutitatsinnut apeqqutigiartoqqaarutigineq ajorpagut qanoq
isumaqarfigineraat. Apeqqutigineqartut suliakkiutigineqartullu
qinersisartuninngaaniit ilusilersoriarlugit saqqummiuttarpagut Inatsisartuni
suleriaaserput imaammat, Inatsisartut aalajangertussaagaat taakkua
ataatsimiititaliamut imaluunniit allamut ingerlanneqassaanersut, imaluunniit
maani oqaluuserineqaratik apeqquteqaatitut ingerlanneqaannassanersut.
Taamaattumik
uani nuannaarutigivara siullermik
Naalakkersuisup nassuiaateqaqqinnerminni aammalu siullermeerluni
akissuteqaateqarnerminni ersersitaat, tassa paasinarmat inuppassuarnik
ilisimaneqanngitsoq qanoq aaqqissuussisoqarsimanersoq ukiuni taamannani
atukkatsinnik. Qaammarsaatigineqarnera akileraartarnerup
annertuigisassaanngitsoq tamatta nalunngilarput.
Tamatta
nalunngikkaluarparput ukiumut siumoortumik nalunaarusiortussaalluta, kisiat
amerlanerpaatigut nalunaarusiornermi immaqa immikkoortinneqartartut
tassaapput ataatsimik suliffeqarutta tassani suliffitsinni ukiumut
saniatigut isertitaqalaarsimagutta saniatigut isertitamininguagut. Taakkulu
pituttoreertarput, soorlu qinersisartut ilaannik oqaloqateqartarnerma taanna
paasiuminaatsinneqartartoq. Suliffinillu arlaqarnerusunik suliniaraluarluni
akileraarutip allagartaata suliffeqarfimmi inissisimanera peqqutigalugu
taamarujussuaq B-korti malillugu akileraartarnermik kinguneqartarluni.
Uani
nuannaarutigivara Siumut aamma Kattusseqatigiit Inatsisartuni suleriaaseq
ataqqillugu Naalakkersuisut inassuteqaataat naalaannarnagu
iluatinnartoqartimmassuk siunnersuutigisara, taamaalillugulu aamma
Akileraartarnermut Ataatsimiititaliamut misissorneqarnissaa inassutigineqarmat.
Kattusseqatigiit
ilumoorput, aammalumi Siumut, nunat sanilerisatta ukiorpaalunni uagutsinninngaaniit
siulliullutik akileraarutinik ingerlatsiffiusut ineriartortinneqarnerani
taassumap akileraartarnerup inuiaqatigiinnut sukkut aamma taanna
pitsaaqutaasinnaanera kiisalu aamma qularnanngitsumik amerlanerusunik
aningaasanik kaaviiartitsisinnaanermik nassatarisinnaasai nalilersorlugit
iluarsaasseqqinnertigut ingerlattarsimavaat.
Aamma
qilanaarnarpoq Naalakkersuisunut ilaasortap, Aningaasaqarnermut
Naalakkersuisup ilaasortap Josef Motzfeldtip oqaatigisaa iluarsaaqqinnissamik
suliassat imaattariaqanngitsut taamaallaat akitsuutinut tunngasut, kisiannilu
aamma inunnut ataasiakkaanut akileraartarnermut tunngassuteqartut
suliareqqinneqarnissai kajoriminarnerutikkai pillugu uani oqaaserineqartunut
qujavunga.
Lars
Sĝrensen, Inuit Ataqatigiit:
Tassa
erseqqissaatigiinnassavara tassa Inuit Ataqatigiit Akileraartarnermi
Ataatsimiititaliami ilaaasortatut oqaatigilaarusukkigaana Inatsisartut
immikkoortoq 15-imi, tassa 2002-mut akileraarutitigut ilanngaatit
ilaallu ilanngullugit aalajangersorneqarnissaa taanna oqallisigereernikuuvaat.
Tassanilu aalajangerneqareernikuuvoq 2002-imi januarip
aallaqqaataaninngaanniik ilanngaat ukiumut, tassa kisimiittumut, 4.000
kr.-iusussaasoq.
Ilaatigullu
aamma sulerusussusermut tunngatillugu oqaatigineqartariaqarpoq, taanna
ilanngaat siumoortumik nalunaarsuinikkut sisamanik assigiinngitsunut
suliffeqarfinnut aaqqinneqarsinnaavoq, tassa piumagaanni oqarlunilu uani
10.000 kr.-imik akissarsisussaagama uunga ilanngaat tunniutissavara,
illuatungaanut aamma taamaaliortoqarsinnaavoq. Tassanili taamaallaat piumasaqaatigineqarpoq
siumoortumik suliffinnut nalunaarsorsimanissaq.
Taamaattumik
aamma uanga Akileraartarnermut Ataatsimiititaliami ilaasortatut siunnersuutip
qanoq ilillugu piviusunngornissaa maannakkumi eqqarsartariaatsikkut
pulatissinnaanngilara. Pissutigalugu periarfissaareermat suliffeqarfinni
assigiinngitsunut skattekortip aaqqisssornissaa, taannalu oqareernittuut
siumoortumik nalunaarsuineq tunngavigalugu aaqqinneqarsinnaavoq.
Daniel
Skifte, Atassut:
Unaana
erseqqissaatigilaaginnarniarlugu Akileraartarnermut Naalakkersuisup
tipigissaat tipigissut amerlunnermullu tarngutit il.il., taakkua
eqqarsaatigalugit, soorlu tassa Atassutip akileraartarnermut
allanngortitsiniartoq, naamik taamaanngilaq. Erseqqissaatigissavara
eqqaassutigalugulu Atassutaannaanngitsup, kisianni Atassumminngaaniit
siunnersuut Akileraartarnermut ataatsimiititaliami suliarineqarami
ingerlateqqinneqarpoq. Taamaalilluni upernaaq manna akileraartarnermut
inatsisip allanngortinnissaa siunertaralugu aamma taanna suliarineqaqqullugu.
Kisianni
qaqinnnut peqqutima aappaa unaavoq. Inioqqatitigut tusarparput, kisiannili
aamma Sermitsiami atuarlugu Naalakkersuisut akileraartarnermut
allannguinissami siunnersuutaat tusarniaassutigineqarmat kattuffiit
peqatigiiffiillu assigiinngitsut oqaaseqarfigisimagaat. Taannalu
tunngavigalugu Naalakkersuisut suliassaq taanna ukiamut kinguartissimagaat.
Taannalu
ilisimallugu oqarpugut, aamma Akileraartarnermut ataatsimiititaliap
suliassiissutaata ilaa puigorneqaqinammat Anders Nilssonimik
saqqummiunneqarsimasoq eqqaasissutigaara. Taamaattumik Atassut taamak
akikitsigisumik, taamalu anikitsigisumik allanngortitsinianngilaq,
ataatsimoortuminguna allanngortitseqataajumasugut, kisianni nuannaarutigaara
taanna ilassilluarneqarmat, ataatsimoortumik allanngortitsisoqartariaqartoq.
Aamma
naggataatigut paasivara naqqiiffiginerallaqullungalu kukkusimaguma
ersarivissumik amerlanerussuteqartut itigartitaat ataatsimiititaliamut
ingerlateqqinniarneqarpoq. Tassani IA arfineq marluusoq, Atassut arfineq
marluusoq Otto Steenholdt, ataasiusoq, tassani inuit 15-nit itigartitsipput.
Taavalu Simon Olsen Jonathan Motzfeldtilu maani issianngitsut sinneri ukuusut
taasitinneqassappata, taava amerlanerussuteqartut itigartippaat. Taavalu
ataatsimiititaliamut ingerlateqqinneqarput. Taanna kukkusimasumik
paasisimassagukku, taasakkalu aallaavigalugit akissuteqallaqquvara
Naalakkersuisuninngaanniit. Isumaqarpunga isummiut amerlanerussuteqartut
itigartikkaat.
Anders
Andreassen,
Siulittaasoqarfimmi ilaasortaq:
Qujanaq,
erseqqissaatigissavara taasisoqanngimmat aamma maani isersimasut aamma ilai
amigaataapput. Arfineq marluk arfineq marluunngillat, Atassutikkut aamma Inuit
Ataqatigiit tassa amigaateqarput. Kisianni tassa partiit oqaaseqartuisa
taavalu taakku tunuliaquttatik aamma ilagalugit, tassa amerlanerussuteqarput.
Tassalu Siumukkut aqqaneq marluk taavalu Kattusseqatigiit sisamat, tassa
16-nit.
Taamaallutik
aamma paasivara kisimiittoq aamma akornusissaqartinngikkaa
ataatsimiititaliamut ingerlaqqinnissaa. Kiisalu aamma Naalakkersuisut aamma
akornutissaqartinngikkaat ataatsimiititaliamut ingerlaqqaarallarnissaa.
Taamaattumik sangoqattaarnissaq pinaveersaarniarlugu isumaqarpunga tassani
piumasarineqartut ilaatigut misissugassat aamma arlaqarmata iluatinnaateqartoq,
taassumap ataatsimiititaliamut ingerlaqqinnissaa, ingammillu Naalakkersuisut
aamma akornutissaqartinngimmassuk.
Per
Berthelsen,
Siumut:
Anikitsuararsuussaaq.
Uani qaqivunga immaqa, qaqininnut patsisigineruvara Akileraartarnermut
Ataatsimiititaliami siulittaasutut oqaatigilaarusukkakku una.
Ataatsimiititaliaq aamma suleriallaqqissuusoq, una suliassaq
imaannaanngitsoq niaqorlunnartuusinnaasoq immaqalu aaqqinneqarsinnaanngitsoq,
unammisassatut tiguneqassasoq qularinnginnakku.
Uani
Siumumi oqaaseqartutut tassa pingaartitara uaniiginnarpoq, suna
ajornakusoortutut isikkoqartoq imaassanngimmat ajornakusoortutut
isikkoqarmat, taava illikartiinnarneqassasoq. Isumaqarpunga maani Nunatsinni
ingerlatsiniarnermi pingaartuusoq aamma uagut Inatsisartutut qunusuilluta
aamma misissugassanik iluatinnarsinnaasunik naak immaqa takuinnarlugit ajornakusoortutut
isikkoqaraluartunik uniinnarata misissuisinnaanissarput.
Tassalu
taaneqarpoq soorlu Islandimi takornartaanngilluinnartoq allaat ilaatigut
pingasunik suliffeqartarneq. Nassuerutigineqarpoq aamma ersarissumik Islandimi
akileraartarnikkut aaqqissuussineq qanoq ittuunersoq ilisimaneqanngitsoq.
Taamaattumik isumaqarpunga aamma allatsera isussukuluffigaara ikani, oqarlunga
immaqa siunertaqassaaq ataatsimiititaliap taava arlaatigut
qinnuteqarsinnaanera paasiniaalluni angalanissamulluunniit.
Tassa
taanna aallaavigalugu anersaaralugu una oqaatigivara parteeqatigiinneq taanna
aallaaviginngilluinnarlugu, kisiannili iluatinnaateqarnera taanna aammalu
anersaaq una ajornakusoormat imatut unitsiinnarneqarnissaa uanga
isumaqatiginnginnakku. Kisianni Naalakkersuisut saqqummiussaat paaseqaakka,
niaqorlunnartuuvoq una.
Kisianni
uani aamma Aningaasaqarnermut Naalakkersuisup oqarnera tassalu maani pissutsit
nunalu allanut pissutsinut sanilliutiinnavillugit akileraartarnermut
procentiusoq aallaavigaligalugu, taanna aamma akueriuminaatsippara
iiginnassallugu. Patsisigalugu puigussannginnatsigu aamma Nunatsinni
inuuniarnermi aningaasartuutit naliginnaasumik isigalugu qanoq allanut
sanilliullugu qaffasinnerutigisarnerat.
Taamaattumik
isumaqarpunga Nunatsinni nukittorsaataasinnaasoq aammalu piumassutsimut
arlaatigut eqeersaataasinnaasoq, arlaatigut nassaartoqarsinnaappat
kajungersitsilersumik nukiit tamakkerlugit inuiaqatigiinni iluamik
kaaviiaartitsiniarneq naammaginartumik sullissineq anguniarlugu
peqataanissamut. Taanna iluatinnartutut Siumuminngaanniit isigaarput, taannalu
aallaavigalugu tassa oqaaseqarpugut.
Imaassinnaavoq
allaat pisariaqassasoq B-kortit marluk atorneqalernissaat, suli taanna
naluarput. Saniatigut suliffeqarnermi B-kortit siulleq imaassinnaavoq
annikinnerusumik akileraarutitaqartoq aappaaninngarnit, naluara.
Imaassinnaavoq aaqqinneqarsinnaanngitsoq kisianni neriuppunga oqaatigisakka
ukua aallaavigalugit ataatsimiititaliap siornatigut suliassanut qununani
eqeersimaartumillu suleriaaseqarluni takutittarsimasai aamma uani
unammiuassami atorneqarumaartut.
Otto Steenholdt, attaviitsoq:
Atassutip siulittaasuanut oqaatigissavara uanga erseqqissumik oqaatigigakku iluatigalugu Akileraartarnermut Ataatsimiititaliamut uuma oqallisigineqartup ingerlateqqinneqarnissaa. Tassa tassani misissorneqareerpat uanga imatut uannut inissikkama. Tassani missorneqareerpat iluatigigakku nalileeqqissinnaanissara.
Aamma pissusissamisoorsoringilara Inatsisartuni oqallinneq inioqqatitigut tusakkat aallaavigalugit ingerlanneqassappat. Taamaattuunngitsut kisianni Naalakkersuisuninngaanniit tusakkagut aallaavigilluarlugit oqallisigineqartussaassapput inioqqatitigoortinnagit, taamak oqarpunga isumaqarluinnarama taamatut uppernarsarneqarsinnaanngitsunik Inatsisartut oqallisiginnissaguni tulluartuunngitsoq.
Siunnersuuteqartup appisaluutilaarpaanga, kisianniuna uanga pingaartikkiga aamma naalakkersooqatigiinni pingaartinneqartarmat sapinngisamik ilaasortatik illersorniassallugit. Aamma siunnersuuteqartup siunnersuutini naak parteeqatimi akerlileraluaraat akueriniaannassappagu piaarnerpaamik illuatungiliuttut upattortussaavaat, allanillu ilaqassappat taava Naalakkersuisut ikinnerussuteqalaartittarlugit.
Massakkut malugisinnaavarput Naalakkersuisuni ulorianaateqanngitsoq, kisitsinermik aallartereeraluarpoq qanoq iliorluni Naalakkersuisut piumasaat itigartinneqarsinnaanersoq. Taannaminiinnannguaq ullumikkut, kisianni Naalakkersuisut tunuartitaanissaanut annerusut taamatut parteeqataasup Naalakkersuisuniit ilaasortaatitaqartup parteeqataaninngaaneersup taamaalioriataartarneri Inatsisartuni qulliunerusuni ulorianartorujussuartoq isigineqartarmata.
Tassa uanga illuatungiliuttutut ilaagama oqaaqqissaarisariaqanngilanga, immaqali oqaannartariaqarlunga ajorneruleraangata illuatungiliuttut upattortarpaat Naalakkersuisunit tunuartitsinissamik pingaartumik tamakkua kinguneqassappata. Taannaana mianersoqqutigilaaginnariga immaqa uffa susassarinngivillugu.
Lars Karl Jensen, Siumut:
Qujassuteqaannarsinnaagaluarpunga naatsunnguamik. Uani ersersissimanngikkukku ajuusaarutiga aneqqaalaassavara. Tassa naatsorsuutiginngilara una oqaluuserisassanngortinngikkakku 2002-mut akileraarnissamut aaqqiissutaasussatut naammasseriissasoq. Kisianni akileraartarnikkut inissisimanitta misissuiffigineqarnissaanut tunngatillugu Naalakkersuisut suliaqarnissaattut ilanngullugu oqaatigineqarmat assorujussuaq tuppalliutigaara.
Taavalu aamma neriuppunga Akileraartarmut Ataatsimiititaliami niaqorluppallaaratik suliassaq suliariumaaraat.
Josef Motzfeldt, Aningaasaqarnermut Naalakkersuisoq:
Tassa siunnersuuteqartup aappassaanioqqooqaaq oqaaseqarnermini akileraartarnermut pissutsinik Naalakkersuisut paasisitsiniaaneq annikippallaartoq ingerlasimagaannik oqarniamisaannguatsiarpoq.
Inatsisit akuerineqaraangata Naalakkersuisut atuuttussanngortitsisarput, atuuttussanngortullu atuisunut siammarneqartarput. Soorunami isertitatigut akileraarutitigut inatsit 1975-imili Nunatsinni atuutilersimasoq, ukiuni 26-ini naammattumik paasisitsiniutigineqarsimannginnera Naalakkersuisutut taamanikkut Naalakkersuisoqanngikkaluartugut, kisianni Naalakkersuisoqalernerup kingorna Naalakkersuisunit paasisitsiuneqarsimannginnera oqarluartaarutigineqarsinnaavoq.
Nunatsinni kommuneqarpoq 18-t, kommunit tamarmik akileraarnermut allaffeqarfeqarput, akileraarnermut inspektĝreqarput tamarmik, akileraarnermut siunnersorteqarput. Kommunit borgmesterillu arlallit maaniimmata suliassaq taamaattoq innuttaasunut pisussaaffimmisut inatsit atuuneranut nassuiaqataasussatut pisussaaffiattut uanga eqqaasikkusuppakka.
Taava Atassutip oqaluttua maanga oqaluttarfimmi oqaqqippoq inioqqatitigut tusarsimallugu kattuffiit tusarniareerlugit Naalakkersuisut siunnersuumminnik tunuartitsigallarsimasut. Unneqqarissumik taanna oqaatigereerparput, tusarniaanermi eqqugaasussat arajutsisimasinnaasagut imak pinartigisumik isigigutsigit Naalakkersuisut mamianartutut isiginngilaat siunnersuutimi attuisussanut eqqugaasussatut sunniutissaasa sukumiinerusumik misissorneqarnissaa ingerlatissallugu. Taanna aamma unnungaatiallartorlu ajortutut isigineqalissappat tupinnakuluttorujussuuvoq.
Kisianni tassa Atassutip oqaluttuata tooruminassusia ullumikkut tuullatsiaaqattaatoorakku ajuusaarutigaara. Massakkut tipigissaatit 3 mio. kr.-it Landskarsimut nalillit, taakkua akileraartarnermut akitsuusiisarnermilu iluarsaaqqinnissamut Atassutip tassa tunngavigisai inuttaasut uagut isumaqaraluartugut, isumaqaraluartugut innutaasut atugaasa naligiinnerulernissaannut iluarsaaqqinneq siunertaqassasoq. Ilaatinneqassaaq soorunami iluarsaaqqinnissami misissugassani.
Kiisalu Siumup oqaluttuanut oqaannassaanga. Soorunami niaqorluutissarsiorneq siunertaralugu maani suligutta, niaqorluutissagut naammalluinnaqqeqqissaartut maaniipput. Naalakkersuisulli una apeqqut niaqorluutissat mikinerpaarpaarpaartaatut isigaat. Islandimi pissutsit innersuutigeriarlugit koruuni kingulleq nunami maani nunanilu allani Naalakkersuisut aamma assersuutigaat, assersuussiniarnerat imaannaanngitsuupput pissutsit atugarititaqartut nunani tamani assigiinngeqimmata.
Naalakkersuisulli Islandimi pissutsit misissoqquneqarpata, misissorumagatsigit taanna akuersaareerparput. Aamma tamanna isumaqarpunga suliassatsialaasoq Akileraarnermut ataatsimiititaliami partiit marluk inunnik 16-inut tunuliaqutaqartooqqooqaat taamatut kissaateqarmata. Tassani naalakkersuisooqataasutut Naalakkersuisut partiiata taamatut siunnersuuteqarnera naatsorsuutigigakku naalakkersuisuutitat aamma peqatigalugit ilusilerneqassasoq.
Godmann
Rasmussen, Atassut:
Uanga
naatsuararsuarmik. Paatsuungasunaanga qanoq iliortoqartarnerpoq. Pisartut
siulliit eqqarsaatigalugit isumaqarpunga pitsaasuunngitsumik aqutsisorput
naliliisoq. Tassa uani erseqqilluinaqqissaarpoq una siullermeerneqarpoq, aana
erseqqilluinnarpoq Naalakkersuisut itigartitsinerat.
Siumukkut
aqqaneq marlunnik nalilerpatit, kisianni Naalakkersuisuniippat qassit
Siumukkunnit qinikkat, tassa amerlanerussuteqareerpugut. Uani
taasisoqartussaanngilaq siullermeernerani. Isumaqarpunga paatsoorsimaguma
utoqqatserujussuassaanga, isumaqarpunga amerlanerussuteqareersut.
Una
tunngavigigatsigu misissuisoqassappat aappaatigut, tassami nuannissaaq
pissusissaqarsimappat. Allakkap immaqa ingerlateqqinneqarsinnaagaluarpoq
allakkut piffissakkut. Massakkut ikinnerussuteqartoqareerpoq.
Assigiinngitsunik
akileraartarneq taanna misilittagaqarfigereerparput. Uanga maani inimi
isersimasuni aamma nalunngisaqarpunga uatulli, uanga ukiut kingulleq
assigiinngitsut tallimat ataatsikkut akileraarfigivakka. Taanna
niaqorluutaanngilaq innumut, isumaqarpunga pissusassaannaasoq taanna
atuuttoq.
Kisianni
apeqqutiga una erseqqissumik akineqallaqquvara. Siorna pisoq Naalakkersuisut
taperseeqataammata amerlanerussuteqalerpugut, taanna massakkut qanoq
paasisariaqarpa? Saqqummiisuni IA, Siumut Naalakkersuisullu itigartippaat,
amerlanerussuteqanngilagut tassani? Soorlu aamakkut ilaareersut qinikkatut
Naalakkersuisuni, aamma tassani Jĝrgen Wĉver Johansen tassani
akuerseqataasimassaaq partiimi. Taannaana pigiga.
Anders
Andreassen,
Siulittaasoqarfimmi ilaasortaq:
Godmann
Rasmussenip paasisimanngippagu erseqqissassavara Naalakkersuisut aatsaannguaq
oqaatigimmassuk akornutissaqartinnagu ataatsimiititaliamut ingerlaqqeqqaarnissaa.
Ersarippa? Taamaattumillu aamma maani isersimasut uanga takusinnaasakka
malillugit, tassa amerlanerussuteqartut kissaatigaat ataatsimiititaliamut
ingerlaqqeqqaassasoq. Kisissinnaasakka takusinnaasakkalu malillugit, taanna
isumaqarpunga assortuussutissartaqanngitsoq aammalu taamaalilluni allanik
oqaaseqartussaarummat, taava immikkoortoq taanna tassalu immikkoortoq 46
siullermeerneqarnera taamaalilluni naammassineqarpoq. Taavalu
aappassaaneerneqarnissaminut ingerlaqqitsinnani Akileraartarnermut
Ataatsimiititaliamut suliarineqaqqaarallassaaq, tassanilu isumaliutissiissummik
sanasoqareerpat taava aappassaaneernerani saqqummiussisoqarumaarpoq.
Taamaalilluta
immikkoortumut tullermut ingerlaqqissinnaanngorpugut. Tassalu immikoortoq 40,
Aningaaserivinni sipaakkat erniaasa akileraaruteqaataajunnaarnissaasa
Naalakkersuisunit sulissutigineqarnissaa Inatsisartuni
aalajangiiffigineqarnissaannik siunnersuut, tassani siunnersuuteqartuuvoq
Inatsisartuni ilaasortaq Jakob Sivertsen, Atassut.