Kalaallit Nunaanni Inatsisartut

Oqaluuserisassani immikkoortoq 99

Ataatsimiinnerit Tilbage Op Nĉste

Siullermeerneqarnera Aappassaanneerneqarnera Pingajussaaneerneqarnera

Ataasinngorneq 7. maj 2001, nal. 17:30.

Oqaluuserisassani immikkoortoq 99.

Sisimiuni talittarfiup pitsanngorsarneqarnissaa pillugu apeqquteqaat.

(Inatsisartunut ilaasortaq Godmand Rasmussen)

Ataatsimiinnermik aqutsisoq: Siulittaasoqarfimmi ilaasortaq Lars Karl Jensen.

 

Godmann Rasmussen, Atassut:

Tassa Sisimiuni umiarsualiviup tallineqarneratigut pitsanngorsaavigineqarnissaa siunertaralugu misissueqqissaarnissamut aningaasartuut 2002-mi aningaasanut inatsimmi ilanngunneqarsinnaa­neranut periarfissaq pillugu, Naalakkersuisunut apeqquteqarsimavunga.

 

Naluneqanngitsutuut Sisimiuni kilisaatinik, aalisariutinillu qangaaniilli tulararfissuupput, tassa Sisimiut, usingiartartuullutillu. Ukiunili makkunani atuuttuni ilami qangali umiarsualivik annertoqisumik ajornartorsiutaalernikuuvoq. Tassami talittarfik ullutsinni naleqqukkunnaavissi­mammat, soorlu Royal Arctic Linep paasissutissiinerata takutikkaa 1999-imi umiarsuit 445-it tulattarsimasut. Taamaattorli amerlaqisut allatut ajornartumik pingaartumillu Nuummut usingi­ariartortariaqartartut, tassa allamik taleqqasoqarnera pissutigalugu. Nuummilu usingiareeraanga­mik uterlutik poortuutissanik aalleqqitariaqartarlutik, tamanna eqaatsumik aningaasarsiornermut kigaalaqutaavoq annertooq, akuersaaruminaatsorlu. Naluneqanngitsutuut ukiarluarnerani avannaani suliffissuit matusarnerat takornartarinngilarput. Pineqartut matunerini qangali ileqquu­voq avannaatungaani aalisariuterpassuit maani tassa Sisimiuni ukiisarnerat. Umiarsualivilli taamak periarfikitsiginera pissutaalluni angallatit akisoqisut tartorliuunnermikkut ilisimaneqartu­tuut aserfallakkiartuutigisaqaat. Pineqartoq tamanna Sisimiuni qangali inuutissarsiornermi ataatsimiititaliami eqqartortareerparput, taamaattumillu ajornartorsiut angiusuujuvoq aaqqittaria­qarlunilu. Naluneqanngitsutulli siunissami oliesiorneq eqqarsaatigissagaanni pineqartuni Sisimiut tulararfittut avaqqunneqarsinnaanngilluinnarput.


Taamaattumik neriuutigaara 2002-mi misissueqqissaarnissamut aningaasamik immikkoortitsiso­qarsinnaassasoq, imarpikkoortaatit talittarfiat kangimut tallisissanerlugu periarfissaqareermat. Qujanaq.

 

Steffen Ulrich-Lynge, Ineqarnermut, Attaveqarnermut Pilersuinermullu Naalakkersuisoq:

Qinnutigissavara naannerulaartumik allakkaninngaanniit akilaassallunga.

 

Tassa uani pineqartumi massakkut pisortaqarfimmi suliarineqarput inuiaqatigiit tamanut iluaqu­tissaattut atortulersuutinut piumasaqaataat tunngavigalugit talittarfeqarnerit, teknikikkut ingerlan­neqarnerisigut, aningaasaqarnerisigullu misissueqqaarnerit.

 

Talittarfiit taakku tamakkiisumik isigalugit ataasiakkaallu misissueqqissaarnerini umiarsualivinni umiarsuaatilillit aamma KNAPK KANUKOKA-lu qanimut suleqatigineqarput, saniatigullu aamma talittarfinni atuisut allat pisariaqartitsineq naapertorlugu ilaatinneqartarlutik.

 

Siumut isigisumik massakkut suliaq ingerlavoq, tassa ukiut tallimat imaluunniit ukiut 10-15-it isigalugit pilersaarusiorneq massakkut ingerlalissaaq. Tassani Sisimiuni talittarfimmi atugassari­titaasut misissueqqissaarnermi ilaatinneqassapput, taavalu misissueqqissaarnerullu inernera aallaavigalugu talittarfiit allineqarnissaannut, nutarterneqarnissaannut iluarsaanneqarnissaannul­luunniit pisariaqartitsippata pilersaarusiornerit siulliit suliarineqalissapput.

 

Godmann Rasmussen, Atassut:

Tassa Naalakkersuisut akissuteqaataanut qujavunga. Tassa neriussuunga taamak misissueqqis­saarnermi sallersanut aamma ilanngunneqarumaartoq. Qujanaq.

 

Lars Karl Jensen, Siulittaasoqarfimmi ilaasortaq:

Taamaalillugu apeqquteqaat taanna naammassivoq, taavalu ingerlaqqissaagut.