Oqaluuserisassani immikkoortoq 04-1 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ullut ataatsimiiffiusut arfernat, marlunngorneq 11. marts 2003
Jonathan
Motzfeldt, Inatsisartut
Siulittaasuat, Siumut.
Isumaqatigiisutaasimasut
taakku apeqqutit 4, 5, 6 immikkoortut suliassat tulleriissut taakku
tulleriisillugit saqqummiunneqassapput.
Aammalu
taakku ataatsimoortillugit oqaaseqarfigineqarsinnaapput imaluunniit
tulleriisillugit.
Siullermik
immikkoortoq 4, Nunat Avannarliit Killiit piniarnikkut ileqqutoqaasa
uppernarsaasersorneqarnissaat pillugu, Nunat Avannarliit Killiit
Siunnersuisoqatigiiffiata aalajangigaa nr. 1, 2001-p inatsisartuni
isumaqatigineqarneranik inatsisartut aalajangiiffigisassatut siunnersuut.
Taanna
Nunat Avannarliit Killiit siunnersuisoqatigiiffiata septemberimi 2001-imi
ataatsimiinneranni aalajangigaq ilanngullugu nassiunneqartoq akuersissutigaa.
Tassuunalu Nunat Avannarliit Killiit siunnersuisoqatigiiffiata Savalimmiut
naalakkersuisuinut, Kalaallit Nunaanni naalakkersuisuinut, Islandimilu
naalakkersuisunut, inassutigaa Nunat Avannarliit piniarnikkut ileqqutoqaasa
uppernarsaasersorneqarnissaat sulissutigeqqullugu.
Tamaalillutik
tamatumunnga tunngasumik ilisimasat kingulissanit pigiinnarneqarsinnaaqqullugit.
Piniarneq
Nunat Avannarliit Killiit innuttaasa inuuniarnerminni tunngavigiuarsimammassuk,
taamaattumik Nunat Avannarliit Killiit piniarnikkut ileqqutoqaat kulturitta
ilagaat.
Kulturikkullu
pisartut suulluunniit allat assigalugit Nunat Avannarliit Killiit piniarnikkut
ileqqutoqaat oqaluttuarisaanermi nikerarnernit
sunniivigineqanngitsoorsimanngillat.
Teknologikkut ineriartorneq sunniuteqarsimavoq. Naalikkat nuffillu aallaasinit taarserneqarsimapput, umiatsiaaqqat aquuteralaat qajaq uniarlu taarsersimavaat, qamuteralaallu najukkani arlipparssuarni qamutinik qimminik qimuttulinnik taarsiisimallutik.
Najukkani ataatsiakkaani ileqqutoqqat suli piniarniartoqartarpoq. Avanersuarmi Qaanaami eqqaanilu qajaq qilalukkanik qernartarniarnermi suli atugaavoq.
Kujataani minnerunngitsumik Nanortalimmi, Alluitsup Paani il.il. aasakkut suli kippartoqartarpoq. Ukiumullu peqqumaatissanik katersinermi ileqqutoqqat periaaserineqartartut atugaallutik.
Kingulissatsinnut pigitiinnarneqarnissannik iliuuseqartoqanngippat ileqqutoqqat atorlugit piniartut kulturiannik, ilisimasavut nungutitaanissaminnut ulorianartorsiortinneqartut isumaqarfigineqarpoq.
Taamaattumik ileqqutoqqat malillugit piniarnermi periaaserineqartartut suli atugaatillugit utoqqartaasaluunniit eqqaamasaaniitillugit, oqaatsit assilissallu atorlugit atuakkatigut filmitigut allatigulluunniit periaaserineqartut taakku allaaserisariaqarput.
Piniarnermi periaaserineqartuinnaat eqqarsaatiginagit aammali amernik assigiisaannillu passussinermi periaaserineqartut ilanngullugit. Allatut oqaatigalugu piniartutut kulturitoqaq tamarmi pineqarpoq.
Taamatut suliniuteqarnerup piviusunngortinneqarnissaa pilersaarusiornissaq, aningaasatigut tunngavigisassaanik pissarsinissaq kiisalu najukkani oqartussaasuni kattuffinnillu suleqateqarluarnissaq pisariaqarput.
Qularineqanngilarlu suliassaat taakku suleqatiginnikkusussuseqarluarutta naammassisinnaagigut.
Nunat Avannarliit Killiit siunnersuisoqatigiiffiat piniarneq pillugu Atlantikup avannarpasissuaniittuni ingerlaartumik saqqummersitsinermik suliniuteqarsimavortaaq, imaluunniit suliniuteqarsinnaavortaaq. Atortussat saqqummersitsinermi atugassatut katersat aallaavissaqqilluarput, uppernarsaasersuinermut ingerlatamut taamaattumut aallaavigissallugit.
Nunat Avannarliit Killiit inuiaqatigiivinut annaasaqaataassaaq allassimavoq. Kulturikkut kingornutatta ilaa taama pingaaruteqartigisoq kingulissatsinnut kingornutassiissutigineqarnerani nunguinnassappat.
Taaamaattumik aalajangigaq taanna aamma inatsisartunut ilalerneqassasoq aallartitat ilassutigisimavaat.