Kalaallit Nunaanni Inatsisartut

Oqaluuserisassani immikkoortoq 05-1		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Ullut ataatsimiiffiusut arfernat, marlunngorneq 11. marts 2003,

 

 

Oqaluuserisassani immikkoortoq 5

 

 

Pisuussutit uumassusillit nungusaataanngitsumik atorneqarnerat pillugu, nunat tamarmik ataatsimeersuartinneqarnissaat Nunat Avannarliit Killiit siunnersuisoqatigiiffiata aalajangigaata normu 2, 2001-imi, inatsisartuni isumaqatigineqarnerani inatsisartut aalajangiiffigisassaattut siunnersuutigineqarpoq.

(Inatsisartut aallartitaasa siulittaasuat)

(Siullermeernera)

 

Jonathan Motzfeldt, Inatsisartut Siulittaasuat, Siumut.

Aamma nunat taakku pineqartut, tassa Island, Savalimmiut Kalaallit Nunaallu septemberimi 2001-imi ataatsimiinnerminni aalajangigaq ilanngullugu nassiussaq akuersissutigaa.

 

Tassuunalu Nunat Avannarliit Killiit siunnersuisoqatigiiffiata Savalimmiut naalakkersuisuinut Kalaallit Nunaanni naalakkersuisunut, Islandimilu naalakkersuisut inassutigaat, pisuussutit uumassusillit pillugit nunat tamat ataatsimeersuarnissaat aaqqissuuteqqullugu.

 

Ataatsimeersuarnermi peqataasut tassaassapput qinikkatut aalajangiisartuusut, ingerlataqartut kiisalu soqutigisaqaqatigiiffiit susassaqartut allat. Matumani nunat tamat akornanni avatangiisinik illersuiniaqatigiiffiit ilanngullugit eqqarsaatigalugit.

 

Siunertarineqartoq tassaassaaq illua tungeriit tamarmik akornanni ilusilersorluagaasunik oqaloqatigiinnissaq pisariaqarneranik, nassuerutiginnilluni ammasumik isornartorsiortumillu oqallinnermik pilersitsineq.

Nunat Avannarliit Killiit pisuussutinik uumassusilinnik pinngitsuuisinnaanngilluinnarput. Aamma taamaattuaannarsimapput. Piniarneq Nunani Avannarlerni Killerni kultureqarnikkut kingornussarsiat ilagaat. Nunanilu Avannarlerni Killerni inuuttaasut inuuniarnerminni tunngavigalugu.

 

Taamaattumik pisuussutitta uumassusillit nungusaataanngitsumik atorneqarnissaat Nunat Avannarliit Killiit tunngaviusumik soqutigisaraat. Taamaalillutik uumasuutigut kinguaariinnut tulliuttunut piuinnartinneqarsinnaaqqullugit.

 

Inuttusiartorneq aamma piniutinik angallatinullu ineriartortitsinerup nassatarisaanik pisarineqartartut amerliartornerisa, nunani suliffissuaqarfiusuni mingutsitsinermik ilaqartumik toqunneqartartut suli amerlanerulersissimavaat.

 

Taamalu aamma nunat ataasiakkaat uumasuisa assigiinngitsut ataasiakkaat allanngorarnerannik sukumiisumik malinnaaviginninnissaq pisariaqalersissimallugu. Uumasut piunerinut ilungersunartumik ulorianartorsiortitsisunut piffissaagallartillugu akuliussinnaaneq siunertarineqarpoq.

 

Uumasunilli assigiinngitsunik ataasiakkaanik nungutsisarneq Nunat Avannarliit Killiit piniarnikkut ileqqutoqaannut kisimi ulorianartorsiortitsisuunngilaq.

 

Pissutsinik Nunani Avannarlerni Killerni piniarnermut tunngasunik paatsuuinerit ilisimasaqanngippallaarnerlu, ilaanni Nunat Avannarliit Killiit piniarnermik inuuniuteqarnermik tunngaveqarnerannut aamma taamatut ilungersunartigisumik ulorianartorsiortitsisuusarput.

 

Kalaallit Nunaanni puisinniarneq assortorlugu paasisitsiniaanerit Islandimiut arfanniutaanik kivisitsineq, Savalimmiunilu niisarnarniartarnermut akornusersuinerit tamakku pillugit alianartutut assersuutissaapput.

 

Piniarnermut nungusaataanngitsumik inuppalaartumillu tunngaveqarluni ingerlanneqartumut killilersuiniarnerit pillaaniarnerit akornusersuisumillu paasisitsiniaanerit pinngitsoortinneqartariaqarput.

 

Taamaattumik pisuussutinik uumassusilinnik atuinermi ileqqutoqqagut, taamaakkaluartoq suli uummaarissumik ingerlanneqartut, pillugit paasissutissanik paarlaateqatigiinnerup qulakkeerneqarnissaa. Tamatumunngalu tunngatillugu peqatigitillugulu uumasuutitsinnut assigiinngitsunut ulorianartorsiortitsinerit pisariaqarnerat eqqumassigineqarnerisa qulakkeerneqarnissaat Nunat Avannarliit Killiit soqutigisaraat.

 

Pisuussutinik uumassusilinnik nungusaataanngitsumik atuineq pillugu nunat tamat ataatsimeersuarnerat tamatumunnga ilassutaasinnaavoq naleqarluartoq.

 

Taamaattumik ataatsimeersuarnerup taassuma suliassaqarfimmi tassani ilisimatusaqqinnissat tunngavissat tamatumani pilersitseqataaffigisinnaavaat.

 

Kiisalu Atlantikup avannarpisissuani pinngortitap pisuussutaanik nungusaataanngitsumik atuineq pillugu apeqqutinut ataatsimoortumik isummertarnissamut pilersitseqataassalluni.

Aamma taanna inatsisartuni ilalerneqassasoq kaammattuutigineqarpoq.