|
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut arfersaneq tallimaat, pingasunngorneq 15. maj 2002 nal.
09:03
Mikael
Petersen, apeqquteqartoq, Siumut.
Kalaallit
Nunaat Inatsisartut suliariaasinni paragraf 36-at naapertorlugu
Naalakkersuisunut imaattumik apeqquteqarniarpunga. Uummannaq Seafood A/S-ip
qaleralinnik ukiumut 2000 tonsinik ukioq maanna 2002-mi, ukiunilu tulliuttuni,
tassa marlunni tassa 2003-mi 2004-milu, pisassinneqarnissaat Naalakkersuisunit
isumaliutersuutigineqalersaarnerluni.
Taamatut
apeqquteqarninnut siunnersuuteqarninnut tunngavigaara piginneqatigiiffiup
Uummannap kangerluani qaleralinnik pisassaasa ukiuni tulliuttuni pingasuni
ukiumut 2000 tonsinik qaffanneqarnerisigut ingelatseqatigiiffik qaleralinnik
nunami tunisassiorsinnaanerminut periarfissarissaarnerulissammat.
Aamma
paasillugu nuannerpoq Uummannaq Seafood-ip qaleralinnik tunisassiornermi
saniatigut nunami tunisassiorfissanik ingerlatsiniarnemini aalisakkat allat
ilanngullugit tunisassiariniarlugit pilersaaruteqarmat.
Tamanna
Naalakkersuinikkut anguniakkanut naapertuulluinnarpoq.
Pissusissamisuunngilluinnarpormi Uummannaq Seafood ingerlatseqatigiiffik
aalisartorpassuanik piumassusilinnik pigineqartoq aammalu nammineerluni 40
million kr-nit sinnerlugit ingerlataminut aningaasalersuereersoq
Naalakkersuinikkut pissutsinik aallaaveqartumik toqussallugu.
Tamanna
Naalakkersuisunikkut anguniagaanngilluinnarpoq. Tassami Naalakkersuisunikkut
siunertaammat namminersortut periarfissinneqarnissaat.
Uummannap
kangerluarni qalerallit ukiumut 6000 tonsit sinnerlugit pisarineqartarput.
Taakkunannga 3500-4000 tonsit tungaannut Royal Greenlandip
naammassisinnaasarpai. Sinnerilu 2000 tonsit Uummannaq Seafood-ip
iluarnaarutaasumik naammassisinnaallugit takutittareerpaa. Tamatumunngalu
ilanngullugu suli siunissami pitsaanerulersitsissalluni qalerallit kisiisa
pinnagit aalisakkat allat ilanngullugit nunami tunisassiariniaramigit.
Aalisarnikkut
tunisassiorfeqarnikkullu ineriartortitsineq nutaamik eqqarsarluni
peqqinnartumik paaseqatigiiffiusumillu unammilleqatigiinneq atorlugu
ingerlanneqartariaqalerpoq. Inuit ataasiaakkaat tunisassiorfiillu ataasiakkaat
naalagarsuanngortittaqattaarnagit.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Apeqquteqartumut
Mikael Petersenimut qujavugut. Taavalu maannakkut akissuteqassaaq
Aalisarnermut Naalakkersuisoq Hans Enoksen.
Hans Enoksen,
Aalisarnermut, Piniarnermut, Nunaqarfinnullu Naalakkersuisoq, Siumut.
Qujanaq.
Asasara Mikael Petersen Naalakkersuisunut ima apeqquteqarputit Uummannaq
Seafood A/S-ip qaleralinnik ukiumut 2000 tonsinik ukioq maanna 2002-mi,
ukiunilu tulliuttuni, marlunni tassa 2003-mi 2004-milu, pisassinneqarnissaat
Naalakkersuisunit isumaliutersuutigineqalersaarneqarpa. Apeqqut.
Aallaqqaasiullugu
oqaatigissavara aalisarneq pillugu Inatsisartut inatsisaanni paragraf 5
naapertorlugu ukiut tamaasa aalisarnermi pisassat Naalakkersuisut
aalajangersartarmatigit. Taamaalillutik pisassiissutit ukiunut arlalinnut
atuuttussatut Naalakkersuisut aalajangersarneq ajorpaat.
Umiarsuarnik
tunitsiviliinissamut akuersissutit aamma ukiumut ataatsimut atuuttussatut
tunniunneqartarput. Taamaalilluni aamma umiarsuarnik tunitsiviliinissamut
ukiunut arlalinnut atuuttunik akuersissuteqartoqarneq ajorpoq.
Sinerissamut
qanittumik qaleralinniarnermut pisassanik aalajangersaasoqarsimanngilaq.
Naalakkersuisulli qaleralinnut tunitsivinnik umiarsualiisarneq maannamut ima
aquppaat umiarsuarnut tunitsivinnut ataasiakkaanut qaleralinnik tonsinik
qummut killilikkanik tunisisinnaanermik akuersissuteqartarlutik.
Oqareernittullu akuersissut taanna ukiumut ataatsimut atuuttarpoq.
Uummannap
kommuniani qaleralinnut umiarsuarnik tunitsiviliinissamut akuersissut
eqqarsaatigalugu tallimanngornermi septemberip ulluisa 28-anni 2001
Naalakkersuisut ima aalajangiipput.
Akuersissut
tunniunneqarmat Royal Greenland A/S-lu umiarsuaq tunitsivik Kristian Høy
atorlugu 2002-mi Uummannap eqqaani umiartut tunitsivittut kisiartaalluni
umiarsuarmut tunineqartussanut pisiortornissaanut ingerlatseqatigiffiup
2002-mi Uummannamut Qasigiannguanut Qeqertarsuarmut kiisalu Paamiunut
qaleralinnut tunngatillugu aaqqiissutissatut siunnersuummini oqaatigisaatut.
Akuersissutinik
pisariaqartitanut tunniussisoqassasoq Qeqertarsuup tunuani pingaarnerutillugu
Qasigiannguni suliffissuarmut tunisassiassanik pilersuissanik sisamanik
angallatiliisoqarnissaanut taamaaliornermilu aaqqiissutissamik
ilusiliisoqassasoq. Piginnittutut suliffimmilu ingerlatsisutut.
Aalisarnermut,
Piniarnermut, Nunaqarfinnullu Naalakkersuisup aammalu Royal Greenland A/S-ip
siulersuisa akornanni 27. September 2001-mi ataatsimiinnermi
oqaluuserineqarsimasutut. Ilusiliinerup pingaarnerusumik kingunerisussaavaa
Royal Greenland A/Sp isumagissagaat angallatinik pissarsinissaq kiisalu
najukkani aalisartunik suleqatigiinnissamut isumaqatigiissuteqarnissaq.
Taakku
siunissami piginneqataassutinik angallatinillu tigusinissaat siunertaralugu.
Tamatunnga taarsiullugu Royal Greenland A/Sp pisussaaffigissagaa qulaani
taaneqartunik 2002-mi suliffissuarnik suliassaqartitsinissaq aamma
nioqqutissiorneq kiisalu pingaartumik Uummannap eqqaani aalisartut
naammaginartumik tunisisarnissaminnut atugassaqartitaanissaat
qularnaassallugit.
2002-mi
Uummannap eqqaani aalisarneq tunisineq nioqqutissiornerlu pillugit ataatsimut
pilersaarusiornissap sulissutiginissaa qularnaaneqassasoq. Royal Greenland A/S-p
SIP-p kiisalu KNAPP-p akornanni ataatsimut pisussaaffiliisumik
isumaqatigiissuteqarnikkut.
2002-p
kingornatigut pissutsit taamatut aalajangiinerit Naalakkersuisut aalisarneq
pillugu nassuiaataata Inatsisartuni suliarineqarneranik tunngaveqarumaarput.
Nassuiaat Inatsisartut 2001-mi ukiakkut ataatsimiinneranni saqqummiunneqarpoq.
Tamatumunnga atatillugu nalunaarutigineqassaaq Naalakkersuisut aalajangernerat
pimmat aalisarneq pillugu Inatsisartut inatsisaanni normu 18. 31. oktober
1996-meersumi siunertatut aalajangersakkami isiginiagassat tunngavigalugit.
Siunertatut
aalajangersagaq ima oqaasertaqarpoq. Paragraf 2. Inatsisip siunertaraa
aalisakkat naleqquttumik ilisimatuussutsikkullu illersorneqarsinnaasumik
iluaqutigineqarnissaasa qulakkeerneqarnissaat.
Immikkoortoq
2. Inatsisip matuma atortinnerani aalisagaqartuarnissaa
kinguaassiortuarnissaallu aamma aaqqissuulluakkamik ukiullu qanoq ilinera
apeqqutaatillugu uumasunik ilisimatuut nalinginnaasumik siunnersuinerat
naapertorlugu pitsaanerpaamik iluaquteqarnissaq pingaartinneqassapput. Aammalu
inuiaqatigiit allamut saassinnaanerannut pisariaqartitsineq.
Immikkoortoq
3. Inatsisip matuma atortinnerani inuussutissarsiutigalugu aalisarneq
eqqarsaatigalugu aalisarneqarsinnaasut aalisariutillu pisarisinnaasaasa
imminnut naleqquttuunissaat kiisalu aalisarnermik inuussutissarsiuteqarnermi
suliffissuarni suliareqqiisarfiusuni inuussutissarsiutinillu allani
inuussutissarsiummut attuumassuteqartuni aningaasarsiornikkut
suliffissaqartitsiniarnikkullu isiginiagassat pingaartinneqassapputtaaq.
Taamaalillutik
Naalakkersuisut suliassami tasssani suliassaqartitsiniarneq pingaartissimavaat.
Naggasiullugu pissutsit tulliuttut isiginiaqqussavakka neriullunga
paasilluassagitit.
Tunisassiorfinni
assigiinngitsuni aalisakkanik tunisassiornerup ingerlanneranut
tunisassiassanik pissarsisarneq tupinnanngitsumik apeqqutaasorujusuusarpoq.
Tunisassiassat pissarsiarineqartarnerat ukiup ingerlanerani allanngorartaqaaq.
Ilaanni tunisassiassat ikittuinnaat pissarsiarineqarsinnaasarput
soqanngivissiinnasarluniluunniit. Ilaanni tunisassiassat amerlangaalertaramik
tunisassiorfik malinnaasinnaajunnaartarpoq.
Aningaasaqarneq
isiginiarutsigu piffissani tunisassiassaqanngingajavinnerani
tunisassiassaqanngivissorneraniluunniit tunisassiorfiit ammatiinarnissaat
akilersinnaanngilaq. Taamaakkaluartorli tunisassiorfiit ammatiinnarneqartarput
neriuutigalugu tulaassuilluarnerup nalaani sinneqartoorutit ima
amerlatigissasut annaasat tulassuilluarnerup nalaani matuneqarsinnaasallutik. Tassalu
Uummannami pissutsit taamaapput.
Unammilleqatigiittoqassappat
tamanna naligiiffiusumik atugassaqartitaanikkut pissaaq. Naligiiffiusumik
unammilleqatigiittoqarnavianngilaq arlaat ukioq naallugu pingaartumik ukiukkut
amigartoornarnerani nunami tunisassiorfinnik ingerlatsiinnartarpat. Aappaalu
aasaanerinnaani umiarsuarnik tikisitsiinnartarluni. Tunisassiassallu
amikkisaarutaaleraangata tammaannartarluni.
Tassalu
Naalakkersuisut maannakkuugallartoq Uummannaq Seafood A/S-ip 2002-mi aammalu
ukiuni tulliuttuni 2003-mi 2004-mi 2000 tonsinik qaleralittassilersaanngilaat.
Naalakkersuisut
aalisarnikkut ingerlatsinerit assigiinngitsut Uummannaq Seafood A/S-imit
ingerlanneqarsinnaasut misissorsimavaat. Ingerlatseqatigiiffik periarfissamik
neqeroorfigineqarsimavoq neqeroorutigineqartorlu
piviusunngortinneqarsinnaasimanngilaq.
Uummannap
eqqaani qalinnik tunitsiveqartitsineq Royal Greenland A/S-imut
tunniunneqarsimavoq Naalakkersuisullu isumaqatigiissut taanna
aalajangiusimavaat.
Naalakkersuisullu
aammaarlutik Uummannaq Seafood A/S-ip ingerlatsiffigisinnaasaanik
periarfissarsiuuteqqinniarpaat Royal Greenland A/S aaamma Uummannaq Seafood
A/S toqqaannartumik naapisinnerisigut. Tassanilu aalisakkat allat
qaleraliunngitsut nunatta avannaani qaleraleqarfiusuni atorluarneqarnissaat
siunertarineqassaaq.
Naalakkersuisut
pingaartippaat ingerlanniakkat aallartitsinnagit akit allallu aalisarnermut
tunitsiveqarnermullu aaqqissuussinerit pisariaqartut
isumaqatigiissuteqareersimanissaat. Qujanaq.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Naalakkersuisunut
ilaasortamut qujavugut. Taavalu maannakkut apeqquteqartoq oqaaseqaqqilaassaaq.
Mikael
Petersen, apeqquteqartoq, Siumut.
Siullermik
erseqqissaatigilaarusuppara Naalakkersuisup akissuteqaammini oqaatigimmagu
Uummannap kangerluani pissutsit pillugit nassuiaateqarnermini neriulluni
paasilluassagikka. Isumaqarpunga immaqa maani inimi isersimasunit Uummannap
kangerluani qaleralinnermik aalisarnermik pissutsit nalunnginnerpaavakka.
Ukiuni 20-ni 1980-miit massakkumut Uummannap kangerluani aalisarnermut pissutsit sammisimaqaakka. Aamma kommunalbestyrelsimi ilaasortatut ukiuni 14-ni. Royal Greenland A/S-ip taamanikkut guutiujugallartup tunisassiorfinnik nutaanik sanaartornissamik Namminersornerullutik Oqartussat aalajangernerat tunngavigalugu tassa landskarsip akiligaanik nuaqarfinnut tunissassiorfiit ingerlanneqarsimapput. Uummannamilu aamma fabrikki taamatut.
Taamanikkulli
Royal Greenland A/S ineriartortitsimanngilaq. Siuarsaasimanngilaq ullumikkumut
qerititsiviit taakkua taamaattuaannarput. Naammassisaqarsinnaassuseq
ineriartortinneqarsimanngilaq. Taamaattuminguna aalisartorparujussuit
pisaminnik eqqaaginnaleramik Royal Greenland A/S tusanik eqqaaginnalermat
ukiumut 100 tonserpassuit eqqarneqaannalermata aalisartut umiarsuartaartut
tunitsivissaminnik.
Ullumikkut
pissutsit allanngunngillat qerititsiviit taakkuupput Royal Greenland A/S
ineriartortitsinngilaq.
Aamma eqqarsartoqarsinnaanngilaq Uummannap kangerluaninngaaniit Paamiut Qasigiannguit Qeqertarsuaq pilersortuarneqaannassasut. Aalisakkat allat takkutilerput saarullissuit takkutilerput. Paamiuormiut periarfissanik ulikkalerput Qasigiannguarmiut Qeqertarsuarmiut ulikkaalerput.
Ila
periarfissarpassuit takkutilerput.
Taamaattumik
qaleraliinnaq isumalluutigineqarsinnaanngilaq. Naamerluinnaq pissutsit allatut
isigalugut eqqarsartariaqalerpugut. Unali nuannaarutigaara Naalakkersuisut
Uummannaq Seafood pillugu massakkut ammarmata.
Mattusimaannarnagu
siornali qinnuteqarput suli ataasinnguamilluunniit akineqanngillat.
Ataatsimiinnerpassuit ingerlassimavaat. Uummannap kommunia allaat
pingasoriarluni Naalakkersuisunut oqaloqateqarsimavoq. Aalisartorpassuit
atsiorneri Naalakkersuisunut ingerlanneqarsimapput susoqanngilaq.
Taamaannak
ingerlatsisoqarsinnaanngilaq. Taamaattumik nuannaarutigaara massakkut
Naalakkersuisut alloriarmata Royal Greenlandilu ataatsimeeqatigisinniarlugit
pissutsinik piaarnerpaamik aaqqiinissaq siunertaralugu. Kaammattuutigissavara
piaarnerpaamik ullut 14-t qaangiutsinnagit ataatsimeeqatigiisitsineq pissasoq.
Aammalu taanna naammassisaqarfiulluni angusqarfiussasoq. Qujanaq.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Apeqquteqartumut
Mikael Petersenimut qujavugut.
Tassa
immikkut kuersissuteqarsinnatitaavunga akisuteqalaarnissamut. Kisianni tassa
oqaaseqareeruit matussavara Naalakkersuisunut ilaasortaq Aalisarnermut
Naalakkersuisoq Hans Enoksen.
Hans
Enoksen, Aalisarnermut Piniarnermut Nunaqarfinnullu Naalakkersuisoq, Siumut.
Tassa
Naalakkersuisut ilaatigut oqaatigineqarput sunianngitsut. Kisianni
oqaatigereerparput Inatsisartunut aamma maani oqaluttarfimminngaaniit
Uummannaq Seafood periarfissarsiuunneqartoq massakkullu aamma taakku
ingerlappagut.
Taamaammat
oqartoqarsinnaanngilaq susoqanngitsoq. Tassa taanna Mikael Petersenip
siunnersuutigisaa piaartumik naammassineqassasoq ilumoorpoq taanna
piaarnerpaamik uumap sapaatip akunnerata ingerlanerani naammassineqassaaq
ataatsimeeqatigiinnissaq. Qujanaq.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Aalisarnermut
Naalakkersuisoq qujavugut. Oqaluuserinninnissamut piffissaritinneqarumalluni
saaffiginnissumik Siulittaasoqarfik tigusaqarsimanngilaq. Taamaattumik
ataatsimiinnermi aqutsisutut naliliivunga pissutsit immikkut ittut matumani
atuutinngitsut. Taamaattumillu apeqquteqartoq aammalu Naalakkersuisut uani
apeqqummi kisimik oqaaseqarsinnaasut.
Taamaalilluni
immikkoortoq 100 naammassineqarpoq.
Ingerlariaqqitsinnata
ilisimatititsissutigissavara Naalakkersuisunut ilaasortaq Hans Enoksen
Siumumeersoq nalunaarmat immikkoortoq 100 taanna naammassiniariarpat
maannakkut ataatsimiinnerminngaaniit peqataasinnaanani. Tassa
arfanniarnissamut tunngasumik Japanimut ataatsimeersuarnissamut
peqataajartortussaagami. Taanna tunngavigalugu taamaalilluni Hans Enoksen
sulinngiffeqarnissaa Siulittaasoqarfiup akuerisimavaa.
Qinigaasinnaanerup
misilinneqarnissaanut ataatsimiititaliap Siumukkut sinniisussaata arfineq
pingajuat Karen Banke Petersen taassumap qinigaasinnaassusia akuerisimavaa.
Matumuuna inassutigissavara Karen
Banke Petersen Hans Enoksenimut sinniissussatut Inatsisartut
ataatsimiinneranni ulloq 15. maj peqataanissaa Inatsisartut
akuersissutigissagaat. Akerliusoqarnerluni. Naamik
Karen
Banke Petersen qinnuigissavakkit Inatsisartuni inissannut ingeqqullutit
tikilluarit.
Paarlaannerat
aamma iluatsillugu aamma Inatsisartunut ilisimatitsissutigissavara uani
assiliisoq tassaammat tassaammat aviisiliortoq immikkut saaffiginnissimasoq uani
assiliisinnaanerluni. Taamatut oqarninnut tunngavigaara ippassaani
ataatsimiinnitsinnut eqqartuinerput. Inimi
uani angalaartut pillugit.
Taavalu
naggataatigut ullumikkut ataatsimiinneq kingulliummat taavalu maannakkut
ajunngitsumik isikkoqaraluartoq piffissaq aalajangersimasoq naammassissasugut
taava ilaasortat ilaata ullup qeqqata missaani aallartariaqarnera peqqutigalugu
suleriaatsisinni paragraf 43. immikkoortoq 3, malillugu immikkoortoq 12, 5-milu
paarlaanneqarnissaat siunnersuutigineqarmat aqutsisutut akuersivunga.