Inatsisartunut ilaasortanut aamma Inatsisartut Allattoqarfianni immikkoortortanut allanut sullissisussamik allaffimmiumik Inatsisartut Allattoqarfiat pissarsiorpoq.
Sullissilluarusussuseqartuuit? Suliassat allanngorartut nuannaraagit? Piffissaq suliffiusoq equngalaarsinnaasartoq ajorinngiliuk? Taamaappat sullissinermut immikkoortortami atorfimmut inuttassarsiuussatsinnut tulluussimassaatit.
Sullissinermut immikkoortortami Inatsisartut ilaasortaasa Inatsisartullu Allattoqarfianni sulisuisa ulluinnarni sulinerannut isumaqarluartumik suliassanik nalinginnaasunik allaffissornermillu isumaginninnermut peqataassaatit.
Sulisussatta nutaap suliassarisartagassai ilaatigut ukuupput:
- Ilaasortat, partiit allattoqarfiisa aamma Inatsisartut Allattoqarfiata init atugassaat piareersarlugit
- Suliffeqarfimmi illup iluani aserfallatsaaliineq
- Qarasaasiatigut pappialakkullu allakkianik ilanngussanillu amerlangaatsiartunik Inatsisartut ilaasortaannut agguaassineq
- Illuutinut akisussaaneq, tassa Namminersorlutik Oqartussani illuutinik nakkutilliisunut attaveqaataaneq
- Oqarasuaatinut allattorsimaffiit nutartertarneri assigisaalu
- Inatsisartoqarfiup takujuminartuutinnissaanut iseruminartuutinnissaanullu qulakkeerineq
- Torersaaneq aserfallatsaaliinerlu
- Pisiniarneq
- Allattoqarfimmi allakkianik nalunaarsuinermut ikiuussinnaaneq
Suliassat suliffiup iluani suliarineqassapput, ilaanni avataaniit ikiortinnertaqartarluni.
Assersuutigalugu pisattanik nutserisunik, sanasunik il. il. imitsinermut ikiuussinnaaneq suliassavit ilagisinnaavaat.
Ulluinnarni sulinermi Sullissinermut immikkoortortaq Inatsisartut Allattoqarfiata ilagaa. Immikkoortortaq ullumikkut sisamanik sulisoqartussaavoq, Inatsisartut ataatsimiinneranni marlunnik pingasunilluunniit ikiorteqartarluni. Allattoqarfimmi Sullissinermut immikkoortortami sulisut tamarmik Sulisoqarnermut allaffissornermullu immikkoortortami pisortaq qaninnertut qullersaraat.
Inuttut piginnaasat:
Ammasuussaatit, sullisserusussuseqarlutit suliassanillu assigiinngitsunik arlalinnik ataatsikkut aqutsisinnaassuseqarlutit. Qiimasuullutillu eqeersimaartuuvutit ulluinnarnilu nuannaarnermik tunniussaqartarlutit.
Siusinnerusukkut assingusunik niuernermut imaluunniit allaffissornermut tunngasunik ilinniagaqarsimanissat aamma/imaluunniit misilittagaqareernissat pingaartinneqarpoq.
Atorfininnermi atugassarititaasut:
Piginnaasat misilittakkallu tunngavigalugit immikkut isumaqatigiissuteqarlutit atorfinitsinneqassaatit. Atorfik nalinginnaasumik suliffiup avataatigut suliartoqquneqaratarsinnaanermik ilaqarpoq, ataatsimiittoqarnerata nalaani qaangiuttoornerpassuit pisarmata, taakku immikkut akissarsiaqaataasarput.
Isumaqatigiissut malillugu aallartittoqassaaq – kisianni sukkanerpaamik kissaatiginarluni.
Malittarisassat atuuttut naapertorlugit akilerneqartussamik pisatsersugaanngitsumik ineqartitsisoqarsinnaavoq. Atugassarititaasut isumaqatigiissutinut atuuttunut naapertuuttut malillugit atorfininnermut soraarnermullu atatillugu angalasoqarsinnaavoq pisariaqarpallu pisassat nuunneqarnerat ilanngullugu akilerneqarsinnaalluni.
Qinnuteqarneq:
Qinnuteqarfissaq pingasunngornermut 10. aggusti 2022-mut killeqarpoq, oqaloqatiginninnerilli ingerlaaginnassallutik.
Taamaammat sukkanerpaamik qinnuteqaatit ilinniakkannut suliffiginikuusannullu paasissutissartalik, allagartat assilineri, uppernarsaatit il. il. ilanngullugit, uunga nassiutikkit:
Inatsisartut Allattoqarfiat
Postboks 1060, 3900 Nuuk Grønland
emailikkulluunniit inatsisartut@inatsisartut.gl
Paasisaqarnerorusukkuit:
www.inatsisartut.gl -ikkut Inatsisartut aamma Inatsisartut Allattoqarfiat paasisaqarfiginerusinnaavatit.
Atorfik pillugu apeqqutissaqaruit pisortamut Ellen Kolby Chemnitzimut oqarasuaatikkut 34 61 04-mut imaluunniit emailikkut ekc@ina.gl -imut attaveqarnissannut tikilluaqqusaavutit.