Inatsisartunut ilaasortanut aamma Inatsisartut Allattoqarfianni immikkoortortanut allanut sullissisussamik allaffimmi fuldmægtigimik Inatsisartut Allattoqarfiat pissarsiorpoq.
Sullissilluarusussuseqartuuit? Oqaloqatikkuminarlutillu imminut tatigisuuit? Iliuuseqartuusarlutillu akisussaaffimmik tigusisuusarpit? Piffissaq suliffiusoq equngalaarsinnaasartoq ajorinngiliuk? Taamaappat sullissinermut immikkoortortami allaffimmi fuldmægtigitut atorfimmut inuttassarsiuussatsinnut tulluussimassaatit.
Inatsisartut ilaasortaannut allattoqarfiullu sulisuinut allaffissornikkut suliassanut pissutsinullu nalinginnaasunut apeqquteqartoqartillugu sullissinermut immikkoortortami allaffimmi fuldmægtigitut attaveqaatitut inissisimassaatit.
Ataatsimiinnerit nalaanni ilaatigut ilaasortat inissaminnut iserternerannut akissussaasuusassaatit, ilaasortat inaat pillugit suliassat tigummisassallugit, partiit allattoqarfii aamma Inatsisartut Allattoqarfiat kiisalu suliassat allaffissornermut tunngasut assigiinngitsut isumagisassallugit.
Saniatigut ulapinnerup nalaani immikkoortortami suliassanut nalinginnaasunut ikiuuttarnissat naatsorsuutigineqarpoq.
Sullissinermut immikkoortortami Inatsisartut ilaasortaasa Inatsisartullu Allattoqarfianni sulisuisa ulluinnarni sulinerannut isumaqarluartumik suliassanik nalinginnaasunik allaffissornermillu isumaginninnermut peqataassaatit.
Sullissinermut immikkoortortami ilaatigut suliassat:
- Inatsisartut ataatsimiinnerata nalaani ilaasortat inissaannik isumaginninneq
- Inatsisartuni Inatsisartullu Allattoqarfianni qarasaasiaqarnikkut pissutsit
- Ilaasortat, partiit allattoqarfiisa, Inatsisartut Allattoqarfiatalu inissaannut tunngasut
- Suliffeqarfimmi illup iluani aserfallatsaaliineq eqqiaanerlu
- Qarasaasiatigut pappialakkullu allakkianik ilanngussanillu amerlangaatsiartunik Inatsisartut ilaasortaannut agguaassineq
- Pisiniarneq
- Ataatsimiittunut sutugassat
- Allattoqarfimmi allakkianik nalunaarsuineq
- Sulilertunut nutaanut allaffiit atortussallu piareersarneri tikilluaqqusinerlu
- Suleqatigiinnut aaqqissuussamik suliaqarnerit
- Inatsisartut initaasalu takujuminartuutinnissaannut iseruminartuutinnissaannullu qulakkeerisoq
Suliassat suliffiup iluani suliarineqassapput, ilaanni avataaniit ikiortinnertaqartarluni.
Assersuutigalugu pisattanik nutserisunik sanasunillu imitsisarnissat eqqiaasunullu attaveqartarneq suliassavit ilagissavaat.
Ulluinnarni sulinermi Sullissinermut immikkoortortaq Inatsisartut Allattoqarfiata ilagaa. Maanna immikkoortortaq sisamanik sulisoqarnissamut naatsorsugaavoq, Inatsisartut ataatsimiinneranni marlunnik pingasunilluunniit ikiorteqartarluni. Allattoqarfimmi Sullissinermut immikkoortortami sulisut tamarmik Sulisoqarnermut allaffissornermullu immikkoortortami pisortaq qaninnertut qullersaraat.
Namminerisannik ineriartortitsiviusumillu suliat ingerlaarnissaanik, atorfiit allaaserinerinik, sulinissanik pilersaarusiornermik il. il. aalajangersaanermut peqataassaatit. Pingaarnertut ilaasortat immikkoortortallu sulisuisa sullinnerannut suleqataassaatit, saniatigut immikkoortup iluani aamma allattoqarfiup immikkoortortaani allani sullissinerup ingerlaavartumik pitsanngoriartortinnissaa ineriartornissaalu peqataaffigissallugit.
Inuttut piginnaasat:
Ammasuussaatit, sullisserusussuseqarlutit suliassanillu assigiinngitsunik arlalinnik ataatsikkut aqutsisinnaassuseqarlutit. Nammineersinnaassaatit ataqatigiissaarisinnaanermullu piginnaaneqarluassallutit. Inuttut qanimaatsuussaatit naaggaarnissannullu qunusuussanak.
Microsoft Office (Word aamma Excel) aamma Outlook atornissaannut atuisut misilittagaqassaatit. Allakkianik nalunaarsuinermut periutsinik misilittagaqarneq iluaqutaassaaq piumasaqaataananili.
Suliffeqarfimmi amerlavallaanngitsunik sulisoqartumi, nutaaliorusussuseqartumi, pitsanngorsaatissatullu siunnersuutinut ataatsimut isigalugu ammanermik ilisarnaateqartumi sulilissaatit. Qiimasuullutillu eqeersimaartuuvutit ulluinnarnilu nuannaarnermik tunniussaqartarlutit. Siusinnerusukkut atorfeqarfigisimasanit assingusunik misilittagaqareernissaq ilinniakkatigullu tunuliaqutitit pingaartinneqarput.
Atorfininnermi atugassarititaasut:
Piginnaasat misilittakkallu tunngavigalugit immikkut isumaqatigiissuteqarlutit atorfinitsinneqassaatit. Atorfik nalinginnaasumik suliffiup avataatigut suliartoqquneqaratarsinnaanermik ilaqarpoq, ataatsimiittoqarnerata nalaani qaangiuttoornerpassuit pisarmata, taakku immikkut akissarsiaqaataasarput.
Isumaqatigiissut malillugu aallartittoqassaaq – kisianni sukkanerpaamik kissaatiginarluni.
Malittarisassat atuuttut naapertorlugit akilerneqartussamik pisatsersugaanngitsumik ineqartitsisoqarsinnaavoq. Atugassarititaasut isumaqatigiissutinut atuuttunut naapertuuttut malillugit atorfininnermut soraarnermullu atatillugu angalasoqarsinnaavoq pisariaqarpallu pisassat nuunneqarnerat ilanngullugu akilerneqarsinnaalluni.
Qinnuteqarneq:
Qinnuteqarfissaq pingasunngornermut 10. aggusti 2022-mut killeqarpoq, oqaloqatiginninnerilli ingerlaaginnassallutik.
Taamaammat sukkanerpaamik qinnuteqaatit ilinniakkannut suliffiginikuusannullu paasissutissartalik, allagartat assilineri, uppernarsaatit il. il. ilanngullugit, uunga nassiutikkit:
Inatsisartut Allattoqarfiat
Postboks 1060, 3900 Nuuk Grønland
emailikkulluunniit inatsisartut@inatsisartut.gl
Paasisaqarnerorusukkuit:
www.inatsisartut.gl -ikkut Inatsisartut aamma Inatsisartut Allattoqarfiat paasisaqarfiginerusinnaavatit.
Atorfik pillugu apeqqutissaqaruit pisortamut Ellen Kolby Chemnitzimut oqarasuaatikkut 34 61 04-mut imaluunniit emailikkut ekc@ina.gl -imut attaveqarnissannut tikilluaqqusaavutit.