NUTSERISUT OQALUTSILLU

 

ulloq 1. september 2011 isumaqatigiissuteqarnikkulluunniit

atorfinittussat

Inatsisartut Allattoqarfianit

atorfinitsikkumaneqarput

 

 

Naalakkersuinermut tunngasumik suliffimmut qanimut attaveqarusussinnaavit?

 

Naalakkersuinermik suliallit aalajangiisarfianni 'pisut qeqqanni' ulapaarfiusumi peqataarusuppit? Suliassanik ajornakusoorsinnaasartunik suliaqarnissamut kajumissuseqarpit piffissarlu annikitsoq atorlugu paasinarluartunik pilersitseqataarusuppit?

 

Suleqatit tunniusimasut suliumassuseqarluartullu ilisimasanik aviffigeqatigerusuppigit?

 

Nutserisoqarfiup sulisoqarnikkut patajaallisarneqarnissaa Inatsisartut Allattoqarfiata kissaatigaa, taamaammallu sulisunut peqataalluartunut suleqataalersussanik nutserisunik oqalutsinillu marlunnik ulloq 1. september 2011 isumaqatigiissuteqarnikkulluunniit atorfinittussanik pissarsiorluni. Inatsisartut Allattoqarfiat nutserisunik oqalutsinillu piginnaaneqarluartunik immikkuullarissunillu paasisimasaqarluartunik atorfeqartitaqarpoq maannalu nutserisunik oqalutsinillu piumassuseqarluartunik piginnaaneqarluartunillu marlunnik pissarsiorluni. Atorfinitsitassat Inatsisartut ataatsimiinneranni toqqaannartumik oqaluttaasarnissartik piareersimaffigalugulu ilimagissavaat. Tuluttut oqaaseqarlutillu allassinnaaguit iluaqutaassaaq tamannali piumasaqaataanngilaq.

 

Atorfinitsikkusutarput illiuppat, sullivimmi Kalaallit Nunaanni naalakkersuinermut tunngasunik suliaqarnikkut ineriartortitseqataaffiusumi sulinissamut soqutiginnittuuvutit. Ulluni ulapaarfiusuni uippalliasuunnginneq qiimasumillu pissuseqarneq pingaartippavut soorluttaaq ulapinnarnerpaaffimmi sulinissamut piumassuseqarluartuunissaq naatsorsuutigiuarneqarsinnaanissarlu pingaartikkipput.

 

Inatsisartut ataatsimiititaliaat peqatigalugit - Kalaallit Nunaanni avataanilu - atorfimmut atasumik angalasarnissaq naatsorsuutigineqassaaq.

 

Inatsisartunut ilaasortat, ataatsimiititaliat, Inatsisartut Siulittaasoqarfiata, Folketingip, nunat avannarliit allat inatsisartuisa, Nunat Avannarliit Siunnersuisoqatigiivisa aammalu Nunat Avannarliit Killiit Siunnersuisoqatigiiffiata attaveqarfigineqartarnerat Inatsisartut Allattoqarfiata allattoqarfittut isumagisaraa kiisalu suliassat Kalaallit Nunaanni Inatsisartunut attuumassuteqartut assigiinngitsorpassuit isumagisaralugit.

 

Inatsisartut Allattoqarfiat oqaluttaanermik nutserisuunermillu, allattaanermik, kiffartuussinermik, naatsorsuuserinermik qarasaasialerinermillu suliaqartunik 28-inik sulisoqarpoq, taakkunanngalu qulit annertunerusumik Inatsisartut ataatsimiititaliaannut ataavartunut siunnersuinermik allattaanermillu suliaqarput.

 

Inatsisartut ukiumut sapaatit akunneri 20-t tikillugit sivisussusilimmik ataatsimiittarput, ataatsimiinnerillu nalaanni suliassat nalinginnaasumit amerlanerusaqalutik.

 

Atorfiup imarisai suliassallu suunerinik paasissutissat Ole Heinrichimut, oqarasuaammut 34 62 48-imut saaffiginninnikkut pissarsiarineqarsinnaapput.

 

Atorfinitsitsineq akissaateqarfik lr. 30 skalatrin 43 naapertorlugu pissaaq, tamatumalu saniatigut suliartoqquneqaratarsinnaanermut tapisiaqartitsisoqassaaq.

 

Malittarisassat atuuttut naapertorlugit akilerneqartussamik ineqartitsisoqarsinnaavoq. Isumaqatigiissutit atuuttut naapertorlugit pigisat nuunneqarnerat akilerneqarsinnaavoq. Nuummi inissaaleqinerujussuaq pissutigalugu inissamik tunineqarnissap tungaanut utaqqingaatsiarnissaq naatsorsuutigineqassaaq.

 

Qinnuteqaat paasissutissanik tamatumunnga attuumassuteqartunik ilallugu uunga nassiunneqassaaq:

 

Inatsisartut Allattoqarfiat

Postbox 1060 * 3900 Nuuk

E-mail: Inatsisartut@inatsisartut.gl

 

Qinnuteqaat Inatsisartut Allattoqarfiannit kingusinnerpaamik ulloq 5. august 2011-mitiguneqareersimasussanngorlugu nassiunneqassaaq. Qinnuteqaat nassiunneqartoq allakkatut A-tut nassiunneqartariaqarpoq taakkulu immikkut akeqartinneqarput.