Inatsisartut, Kalaallit Nunaata inatsisiliortuisa, Allattoqarfiat ataatsimiititaliap allattaanik ilinniagartuumik piffissami killilimmi atorfeqartussamik sulisussarsiorpoq.

 

Ujarpagut
Ilinniagartuut pisortani sulinissamik soqutigisallit, naalakkersuinikkullu ataatsimiititalianik Inatsisartunit pilersinneqarsimasunik namminersortumik partiillu arlaannut pituttorsimanngitsumik sullissisinnaasut.

 

Ataatsimiititaliap allattaatut naalakkersuinikkut aalajangiiniartarnerit qaninnerulersinnaanagit sulissaatit. Sanaartornermut Ataatsimiititaliap Inatsisartuniluunniit ataatsimiititaliap allap aalajangersimasumik sullinneqarneranut akisussaasuussaatit, taamaattumillu aamma avatangiisini naalakkersuinikkut aqunneqartuni sullissinissamut soqutigisaqartuussaatit.

 

Ataatsimiititalianik sullissinermut ilaapput qinikkanik immikkut tunngavilersorluakkamik, illuinnaasiunngitsumik ilisimasaqassutsimillu tunngavilimmik siunnersuisuuneq, tamanna qanoq nammineq naalakkersuinikkut isummerneq apeqqutaatinnagu, ataatsimiititaliat isumaliutissiissummut missingiusiaannik, tusagassiutinut nalunaarutaannik allatassaataannillu allanik suliaqarneq. Taamaammallu pingaartumik nunap aaqqissuussaaneranut tunngaviusumik inatsisinik, pisortat ingerlatsinerannut inatsisinik kiisalu nunap aningaasaqarnikkut ingerlatsineranik annertuumik ilisimasaqarnissat misilittagaqarnissallu pisariaqarpoq. 

 

Suliassat assigiinngitsut soorlu ataatsimiititaliat ataatsimiinnissaannut, suliassaannik assigiinngitsunik kiisalu ataatsimiititaliat angalanissaannut pisinnaasunut piareersaateqartarneq ataqatigiissaarisarnerlu  sullissinermut aamma ilaapput. Taamaammallu tamatigoortuussaatit namminersorlutillu sulisinnaaneq piginnaasaqarfigissavat.

 

Inuttut sunniuteqarsinnaanissat suleqateqarsinnaanissallu pisariaqarpoq, kiisalu naleqquttumik  qaffasinnerusumik inuiaqatigiilerinermi ilisimatusarsimasutut naammassisaqarsimassaatit. Sulianik peqqissaarullugit sunniuteqartumillu suliarineqartunik takutitsisinnaanerit, taamalu allattariarsornikkut paasiuminartunik kukkuneqanngitsunillu saqqummiussisinnaanerit pingaartipparput.

 

Sulianik arlalinnik ataatsikkut ingerlatsisinnaassaatit, ingammillu Inatsisartut ukiumut marloriarlutik ataatsimiinnerisa nalaanni - suliat naammassereerfissaannut killiliussat sivikippallaartut - sulinerillu (sivisuallaartut) aamma sapaatip akunnerisa naanerini - artussanngilatit.

Atorfik naalakkersuinikkut suliaqartumut qanittumiluunniit sammisaqarsimasumut tulluartuunngilaq.

 

Pisortani atorfimmit allamit allaffissornikkut misilittakkat pitsaasuussapput.

 

Tusagassiortunik sammisaqarnermik ilisimasaqarneq taamatuttaaq iluaqutaassaaq.

 

Paasisaqarnerorusuppit?
Paasissutissat sukumiinerusut nittartakkatsinni imaluunniit allattaanermut Ellen Kolby Chemnitzimut allattoqarfiulluunniit pisortaanut Nikolai Sten Christensenimut saaffiginnilluni pissarsiarineqarsinnaapput.

 

Aningaasarsiaqartinneqarnermi atorfeqartinneqarnermilu atugassarititaasut, taakkununnga ilanngullugit immikkut atorfeqarnermut tapiissutisisinnaaneq, atorfininnermut soraarnermullu atatillugu akiliunneqarluni angalasinnaaneq, pisattat assartorneqarnerinut akiliunneqarneq ineqartinneqarnerlu Inatsisartut Siulittaasoqarfiata DJØF-illu akornanni isumaqatigiissutit malillugit pissapput.

 

Suiaassuseq, kikkunnit kingoqqisuuneq, sunik upperisaqarneq innarluuteqarnerluunniit apeqqutaatinnagit naligiissitsinermik siuarsaanissaq Inatsisartut Allattoqarfiata kissaatigaa. aamatuttaaq inuunermik misilittagaqarneq inuttullu inerisimassuseq iluaqutaassapput, taamaammallu qassinik ukioqarneq apeqqutaatinnagu qinnuteqartoqarnissaa kaammattuutigaarput.

 

Qinnuteqartoq allagartamik pillagaasimannginnermik uppernarsaasumik saqqummiussisinnaassaaq.

 

Qinnuteqarfissaq 14. januar 2014-imut killeqarpoq.

 

Atorfik 1. februar 2014-imiit 31. oktober 2014-ip tungaanut inuttassarsiuunneqarpoq. Taamaattorli 1. februarip kingorna atorfimmut ikkussinnaaneq isumaqatigiissutigineqarsinnaavoq.

 

Siusinnerusukkut suliarisimasanut soraarummeersimanernullu uppernarsaatit tamaasa qinnuteqaammut ilanngunneqassapput. 

 

Inatsisartut
Postboks 1060
3900 Nuuk - Grønland
Tlf . +299 345000
Fax: +299 324606
www.inatsisartut.gl
inatsisartut@inatsisartut.gl

 

Inatsisartunut ilaasortat 31-it inatsisartut ukiuata ingerlanerani ukiumullu katersuuttarnerini marlunni, upernaakkut ukiakkullu, ataatsimiititaliat allattaannit ilinniagartuunit aqqanilinnit, annertuutigut imminnut ilisimasatigut suliassatigullu, ikioqatigiittunit sullinneqartarput.