Inatsisartut siulittaasoqarfiata allattoqarfiani pisortatut atorfimmut ajornanngippat inatsisilerituumik (cand. jur.) piukkunnaateqarluartumik pisortallu inatsiseqarnerannik, tassunga ilanngullugu naalagaaffimmut inatsisinik aammalu pisortat ingerlatsineranni inatsisinik minnerunngitsumillu sulisoqarnikkut inatsisinik kiisalu aningaasanik aqutsilluarnermik ilisimasalimmik pissarsiorpugut. Siulittaasoqarfiup allattoqarfiani Inatsisartut allattaanerata ataani immikkoortoqarfiusumi sulisorineqarput allattoqarfimmi pisortaq, Inatsisartut siulittaasuata allattaa ilinniagartooq, allatsi nittartagalerisorlu.

 

Inatsisartut Siulittaasoqarfiannik inatsisilerinikkut ulluinnarnilu suliassat pillugit siunnersuineq pingaarnertut suliassarissavat. Aammattaaq makku suliassarissavatit:

• Inatsisartut Siulittaasoqarfiannut allattoqarfiuneq.
• Atorfeqarnermi pissutsit inatsisitigut pitsaasuunissaannik qulakkeerineq (atorfinitsitsinerit soraarsitsinerillu kiisalu atorfeqarnermut atatillugu isumaqatigiinniarnerit).
• Inatsisartut suliniutaanni ingerlaavartuni assigiinngitsuni peqataaneq.
• Inatsisartut siulittaasoqarfiata oqartussaaffianut tunngasut iluini maleruagassiassanik missingiusiorneq.
• Inatsisartut missingersuutaasa suliarineqartarnerannut malitseqartinneqartarnerannullu qulliunerusumik akisussaaneq.

Inatsisartut missingersuutaannik suliaqartarneq missingersuutillu malitseqartinneqartarnerat Allattoqarfiup Aningaasaqarnermut Immikkoortortaa, toqqaannartumik allattaanerup ataaniittoq, suleqatigalugu pisarpoq. Immikkoortoq marlunnik sulisoqarpoq ataatsimillu ilinniartoqarluni.

Atorfimmut atatillugu inuttut suliatigullu annertuumik ineriartornissamut periarfissaqartoqarpoq.

 

Suleqatiginnillaqqissuseqarnissat naatsorsuutigaarput. Ulluni ataatsikkut suliassarpassuaqarfiusuni sulinikkullu annertuumik piumasaqarfiusuni uippalliaatsuunissat ilanngullugu naatsorsuutigaarput. Sulerusussuseqartuunissat, ilisimasanik ingerlatitseqqillaqqissuunissat piffissamilu ulapaarfiunerpaami kajumissuseqarlutillu nikallujaatsuunissat pingaartipparput.

 

Annertuumik namminersortumillu suliaqarnissat piareersimaffigisariaqarpat aammalu annertuumik qaangiuttoortarnissat naatsorsuutigisariaqarlugu. Minnerunngitsumik Inatsisartut ukiumut marloriarlutik ataatsimiinnerisa nalaanni. Kalaallit Nunaanni avataanilu angalasarnissaq naatsorsuutigineqarsinnaavoq.

 

Allattoqarfik suliffeqarfiuvoq ingerlalluartoq, 34-nik agguaqatigiissillugu sivisuumik sulisorisimasanik sulisoqartoq. Suliffimmi avatangiisit qeratavallaanngillat, sulisut tunniusimallutik ataatsimut anguniagaqarnermi: Inatsisartut sulinerannut ingerlalluartunik killissaqartitsissallutik sapinngisamillu pitsaanerpaamik aalajangiinissanut tunngavissaqartitsissallutik.

 

Isumaqatigiinniarneq piginnaasallu malillugit akissarsiat atorfeqartitaanermilu pissutsit aalajangersarneqassapput. Suliassat atorfimmullu atatillugu akisussaaffik aallaavigineqassapputtaaq.

 

Qinnuteqartunik nalilersuinermi aqutsinermik, sulisoqarnikkut inatsisinik ilisimasaqarneq ilanngullugu, misilittagaqarneq aammalu suleqatiginnillaqqissuseqarneq inuttullu inerisimaneq immikkut isiginiarneqassapput. Taamatuttaaq inatsisartoqarnermi allaffissornikkut sulisimaneq imaluunniit nunat tamalaat akornanni suliniaqatigiiffimmi sulisimaneq iluaqutaassapput. Taamatuttaaq pisariaqarpoq aningasanut tunngasunik aqutsillaqqinnissat missingersuusiornermillu ilisimasaqarnissat.

 

Pisattavit maanna najugarisannit Nuummut nuunneqarnerannut aningaasartuutit Inatsisartut allaffeqarfiannit akilerneqassapput. Malittarisassat atuuttut naapertorlugit akilersorneqartussamik pequsersorneqanngitsumik ineqartitsisoqarsinnaavoq.

 

Atorfik pillugu paasissutissat avammut saqqummiunneqartussaanngitsut Allattaanermut Ellen Kolby Chemnitzimut, mobil (+299) 48 43 03, saaffiginninnikkut pissarsiarineqarsinnaapput. (Danmarkimi nalunaaquttap akunnernik sisamanik siulliunera pissutigalugu nal. 12.00-ip kingorna saaffiginnittoqassaaq). Aammattaaq e-mailikkut uunga saaffiginnittoqarsinnaavoq: ekc@inatsisartut.gl

 

Qinnuteqaat soraarummeersimanermut uppernarsaatinik tamanik CV-millu ilallugu allakkatut e-mailitulluunniit uunga nassiunneqassaaq:

 

Inatsisartut Allattoqarfiat
Postboks 1060
3900 Nuuk
inatsisartut@inatsisartut.gl

 

Qinnuteqaat kingusinnerpaamik ulloq 5. oktober 2015 Inatsisartut Allattoqarfiannit tiguneqareersimassaaq. Allakkat puuat/qarasaasiakkut allakkat ima nalunaaqutserneqassapput "Allattoqarfimmi pisortaq".