Allattoqarfik sulisoqarnermut allaffissornermullu immikkoortortamut nutaatut pilersinneqartumut immikkoortortami pisortassamik pissarsiorpoq.

 

Immikkoortortami pisortaq Allattaaneq toqqaannartumik pisortaralugu qullersaqarfimmi inissisimassaaq.

Atorfik pillugu

Sulisoqarnermut allaffissornermullu immikkoortortaq suliffeqarfiup aaqqissuussaaneranut tamarmut attuumassuteqassaaq ulluinnarnilu suleqataasunut assigiinngitsunut amerlasuunut attaveqassalluni. Sullissinermut immikkoortortami suleqataasut sisamaasut immikkoortortami nutaatut pilersinneqartumi inissisimassapput.

 

Ilaatigut suliffeqarfiup aaqqissuussaanera akimorlugu suliassat makku immikkoortortami pisortap suliassarissavai:

• Immikkoortortani assigiinngitsuni sulisussarsiortarnermut ikiuuttassaaq.
• Sulisoqarnikkut nalinginnaasumik aqutsinermut sulisunullu tunngasumik inatsisilerinikkut suliassanik suliarinninnermut ikiuuttassaaq.
• Sulisut kattuffiinik isumaqatigiinniaqateqarnerni ikiuuttassaaq.
• Aningaasarsiassanik suliaqarnermi, aningaasarsiat pillugit missingersuusiornerni soraarnerussutisianillu suliaqarnerni ikiuuttassaaq.
• Immikkoortortani tamani piffissamik suliffiusumik nalunaarsuinermik isumaginnittuussaaq.
• Sulisoqarnikkut pisortaqarnikkullu ineriartortitsinermut ikiuuttassaaq, matumani aamma pikkorissarnernik ilinniaqqinnernillu aaqqissuussisassalluni.
• Aqutsineq pillugu paasissutissanik suliaqartassaaq, sulisoqarnikkut aaqqissuussaanermik ineriartortitsillunilu ingerlaavartumik nutarterissaaq sulisoqarnikkullu pissutsit pillugit pisortanut suleqataasunullu nalinginnaasumik siunnersuisassalluni.
• Allattoqarfiup allakkanik nalunaarsuiffianik allagaateqarfianillu ineriartortitseqqinnissamik qulakkeerinnissaaq.
• Sulisut Inatsisartunullu ilaasortat sullinneqarnerinik ingerlaavartumik ineriartortitsinermik qulakkeerinnissaaq.
• Suleqatigiinnermut Ataatsimiititaliami allatsitut atuuffimmik, suliffimmik naliliisitsisarnernik, suleqataasut atugarissaarnerannik kiisalu suliassanik napparsimanernik uippakajaarnernillu iliuuseqarfiginninnernut tunngassuteqartunik isumaginnittuussaaq.

 

Pingaarnertut suliassatit

• Sulisoqarnikkut sulisoqarnermilu allaffissornermik siamasissumik isigisumik aqutsineq ineriartortitsinerlu. 
• Suleriaatsinik allattoqarfimmi pisortanik allanik suleqataasunillu aammalu Inatsisartunut suleqataasunik suliffeqarfinnillu taakkununnga attuumassuteqartunik pitsaasumik nalittorsaataasumillu suleqateqarnermik qulakkeerisunik ineriartortitsineq.
• Atugarissaarneq suliffimmilu avatangiisit pingaarnerpaatillugit immikkoortortami ulapaarfiusumi suleqatigiinnermik pitsaasumik salliutitsineq sinaakkusiinerlu. 

Piginnaasassatit

Attuumassuteqartumik qaffasissumik ilinniagaqartuussaatit suliassaqarfillu sulisoqarnermut tunngassuteqartoq patajaatsumik pikkorissuseqarfigissavat. 

 

Inatsisartut Allattoqarfiat namminerisamik aningaasarsiat pillugit isumaqatigiinniuteqarfiusarpoq, sulisoqarnermullu pisortatut sulisut kattuffiinik isumaqatigiinniaqateqarnerni illuatungiliuttuusassaatit. Taamaammat isumaqatigiissutit pillugit ilisimasaqarneq pingaarutilerujussuuvoq.

 

Suliffeqarfimmi naalakkersuinikkut aqunneqartumi aqutsinikkut suliassanik suliaqartarneq aqutsinikkullu suliassanik annertuumik ‘siamasissusilinnik’ suliaqartarneq misilittagaqarfigaat.

 

Periuseqarnikkut aaqqissuussinikkullu pitsaasumik paasinnittaaseqarputit taamatullu periusissiat iliuusissatullu pilersaarutit naapertorlugit aaqqissuussinernik, sulianik ingerlatseriaatsinik suleqataasunillu ineriartortitsisinnaaneq pingaartillugu.

 

Sulisoqarnikkut ineriartortitsinermik siunniussaqarputit siamasissumillu isiginneriaaseqarlutit - pisortat suleqataasullu pitsaasumik suleqatigalugit - suliffeqarfik tamaat akimorlugu ineriartortitsinermi sunniutilimmik tapiuteqarsinnaallutit.

Sulisoqarnikkut allaffissornikkullu immikkoortortami aqutsinermi piginnaasassat pitsaasut:

• Illorsuarmi naalakkersuinikkut pissaaneqarnikkullu aggornilersukkami isumannaatsumik aqutsisinnaavutit.
• Tunngavilersorluarlutit, pissutsinik piviusunik saqqummiussillutit pitsaasumillu oqaloqatiginnillutit suleqatiginnillutillu soqutigisaqartunik attuumassuteqartunik sunniisinnaassuseqarputit.
• Isumaqatigiinniarnissamut piginnaasaqarluarputit.
• Isumaqatigiinniarnerni pisarialik naapertorlugu piginnaatitsissummik pissarsiniarnermi ujartuisinnnaassuseqarlutillu attaveqarsinnaassuseqarputit.
• Qullersaqarfimmik pisortanillu siunersiueqateqallaqqissuuvutit.
• Pitsaassutsimik qaffasissumik qulakkeerinissaq, suliassanik pikkoriffiginnittuuneq suliassanillu patajaatsumik ingerlaavarsinnaassusiliilluni naammassinnittarneq pingaartippatit.
• Suliassap sammivia eqqarsaatigalugu erseqqissuliorsinnaassuseqarputit suleqataasunillu siunersiueqateqallaqqissuuvutit.
• Suleqataasut piginnaasaannik ineriartortitsinissaq pingaartippat suleqatillu imminnut ikorfartoqatigiissinnaalersillugit suleqatigiinnermik pilersitsinissaq pikkoriffigaat.
• Nassuiaasinnaanermut piginnaasaqarluarputit taamaalillutit ajornartorsiutit katitigaasut pillugit suliffeqarfimmi namminermi avataanilu siunniussanut assigiinngitsunut naatsumik eqqortumillu nassuiaateqarsinnaallutit.
• Persuarsiorpalaanngitsumik quiasaariumatussuseqartumillu saaffiginnittaaseqarputit suleqataasullu assigiinngissutaannik inissaqartitsilluarlutit.

 

Inuttut allanullu attaveqartarnermut piginnaasaqarnissaq

• Attaveqarnermi piginnaasaqarluarneq, tatiginassuseqarneq suliffeqarfimmilu tamanut qanilaassuseqarneq.
• Suliffeqarfimmi tamarmi suliassaqarfiit akimorlugit tatigeqatigiilluni suleqatigiinnermut tapertaasumik annertuumik tutsuiginassuseqarluni inuttut patajaatsuuneq atorfimmi iluatsilluassagaanni piumasaqaataavoq.
• Aaqqissuussaanikkut inuillu akornanni aaqqiagiinnginnernik piginnaasaqarfiginnilluni piviusorsiorlunilu iliuuseqarfiginnissinnaaneq.
• Ataatsimut isiginnissinnaassuseqarneq. Ulluinnarni ingerlatsinermi politikkerisat, aalajangiinerit malittarisassallu malinneqarnissaannik pingaartitsisuuneq.
• Eqaatsumik suleriaaseqarneq, suliassaq qitiutillugu suleqatigiinnillunni kiffartuussiumatussuseqarlunilu suleriaaseqarneq.
• Torersumik pissuseqarneq suleqatigiiaanullu assigiinngitsunut atugassarititaasunik taakkulu unammilligassaanik immikkut ittunik paasinnittuuneq.

 

Uagut pilluta

Inatsisartut Allattoqarfiat Kalaallit Nunaanni Inatsisartut allaffeqarfigaat.

 

Inatsisartut ukiumut marloriarlutik nalinginnaasumik ataatsimiittarneri aaqqissuuttarpagut, Inatsisartunut ilaasortat 31-usut taakkulu ataatsimiititaliaat sulissutaraagut.

 

Maannakkut sulisut 30-t missaannik amerlassuseqarpugut, taakkunannga qulit qaffasissumik ilinniagaqartut ataatsimiititalianut allattaallutik.

 

Qinnuteqaat uunga nassiuteqquneqarpoq:

Inatsisartut Allattoqarfiat

Postboks 1060

3900 Nuuk

Kalaallit Nunaat

 

Imaluunniit mailikkut uunga; inatsisartut@inatsisartut.gl

 

CV-t soraarummeersimanermullu uppernarsaatit, ilinniagaqarnermi alloriarnerni tamani angusat qaffasissusaannut nalunaarsuutit qinnuteqaammut ilanngullugit nassiuteqquneqarput.

 

Qinnuteqarnissamut killiliussaq: 1. maj 2021.

Atorfininnissaq pissaaq 1. Juni 2021 isumaqatigiissuteqarnikkulluunniit.

 

Pisortani atorfigisamit allamit sulinngiffeqarallarnissamut periarfissaq:

Naalagaaffimmi imaluunniit Danmarkimi kommunimi atorfeqarpit?

 

Naalagaaffimmi atorfillit aammalu AC-mik isumaqatigiissutit arlallit malillugit atorfeqartinneqartut Namminersorlutik Oqartussani atorfinitsinneqarnermut atatillugu akissarsiaqarnatik sulinngiffeqarsinnaatitaapput. 

 

Atorfimmut atatillugu inissaqartitsisoqarsinnaavoq maleruagassat atuuttut malillugit akilersorneqartussamik.

 

Taamaattorli Nuummi inissaaleqineq pissutigalugu ataavartumik inissiamik innersuussisoqannginnerani utaqqiisaasumik sivikinnerusumik ineqartinneqarnissaq naatsorsuutigineqartariaqarpoq.

 

Isumaqatigiissut atuuttoq naapertorlugu atorfinikkiartorluni angalanermut pisattallu angallanneqarnerinut akiliussisoqarsinnaavoq.

Akissarsiat atorfinitsitaanermilu atugassarititaasut pillugit paasissutissat

Atorfinitsitsineq allaffimmi pisortat pillugit Naalakkersuisut qaffasissumillu ilinniagallit kattuffiisa akornanni isumaqatigiissut kiisalu DJØF-ip Inatsisartullu Siulittaasoqarfiata akornanni isumaqatigiissut atuuttoq naapertorlugit pissaaq.

 

Atorfiup imarisai imaluunniit pissutsit allat annertunerusumik paasisaqarfigerusukkukkit uunga saaffiginninnissamut tikilluaqqusaavutit:

 

Allattaaneq Ellen Kolby Chemnitz, e-mail ekc@ina.alla.gl

 

Paasisaqarnerujumaguit

Inatsisartut Inatsisartullu Allattoqarfiat pillugit uani annertunerusumik paasisaqarsinnaavutit; www.inatsisartut.gl 

 

 

 

Ilanngussaq

 

Qullersaqarfimmut tunngatillugu – anguniarparput

Allattoqarfiup allaffissornerata makkuninnga ilisarnaateqarnissaa qullersaqarfimmit kissaatigineqarpoq:

• Inatsisartunut ilaasortanut piginnaasaqarluarluni sunniutilimmillu sullissineq
• Innuttaasunut ammasumik pissuseqarneq
• Allaffissorneq nutaaliaasoq.

 

Sulisoqarnikkut suliassaqarfimmut tamarmut tunngatillugu ineriartortitsinissamik sunniuteqarnissamillu anersaaqarnissaq piumasaqaataavoq, matumani sulisoqarnermut allaffissornermullu immikkoortortaq, sulisoqarnikkut allaffissornermi ineriartortitsinermilu, immikkoortortanik tamanik tapertaanermigut ammasumillu suleqatiginninnermigut suliffeqarfik tamaat akimorlugu atuuffeqartuulluni.

 

Taamaammat sulisoqarnermut allaffissornermullu immikkoortortamut pisortassamik piginnaasaqarluartumik, qullersaqarfik peqatigalugu sullissinikkut suliassanillu suliarinnittarnikkut ineriartortitsinissamik pingaartitsisumik peqatigitillugulu immikkoortortap sulisoqarnikkut suliassaqarfimmi sunniutilimmik suleqataalernissaa anguniarlugu ineriartortitsinissamut akisussaaffimmik tigusisinnaasumik pissarsiorpugut.

 

Tamatuma saniatigut allattoqarfimmi pisortaqatigiit tamarmik periuseqarnikkut sammivimmik aalajangersimasumik ilusiliiniarlutik pilersitsiniarlutillu ataatsimoorussillutik pissusilersorlutillu atuuffeqarnissaat qullersaqarfimmit pingaartinneqarpoq.

 

Immikkoortortamut tunngatillugu - anguniarparput

Sulisoqarnermut allaffissornermullu immikkoortortami pisortap nutaap sulisoqarnikkut patajaatsumik iliuuseqarnermik aqutsilluarsinnaanera, sulisullu atuuffiinik ineriartortitsisinnaanera pingaaruteqarpoq, matumani aamma qullersaqarfimmut aalajangernissamut tunngavissianik suliaqarsinnaanera pisortanillu allanik angusaqarusussuseqartumik nalittorsaataasumillu suleqateqarnissamik ujartuisinnaanera angusaqarsinnaaneralu.

 

Ataasiakkaat pisortaagunik suleqataasuugunilluunniit – suliffeqarfimmik tamarmik tamakkiisumik ataqqinnillutik – namminneq suliaminnut annertuumik sunniuteqarnissaat allattoqarfimmit kissaatigineqarpoq, taamaalillutik inuttut piginnaasaq atorneqarlutillu ineriartorsinnaaqqullugit.

 

Matumani aamma sulisoqarnikkut, suleriaatsikkut aaqqissuussaanikkullu ineriartortitsinerup saniatigut missingersuutitigut killiliussat iluini nukissanik agguataarineq eqqortoq pineqarpoq.

 

Pisortatut sammivisseereeruit suliassanik suliarinninnermut akisussaaffimmik suleqatinnut tunniussinissaq sapinngilat. Misilittakkavit nammineq suliassanik ujartuillutik aqutsisinnaalersippaatsit, tamanna aamma atuisut isiginneriaasiannik isiginneriaaseqarlutit.

 

Misissueqqissaallaqqissuuvutit nalittorsaataasumik suleqatigiinnermik pingaartitsisuullutit ilisimasaqassutsillu suliffeqarfimmut tamarmut siammartertuullugu.

 

Qanoq oqaloqatigiilluni attaveqarnernerup suliffeqarfimmut annertuumik malinnaaffigineqartumut assigiinngitsorpassuarnillu soqutigisaqartumut pingaaruteqartiginera ilisimavat. Qanoq nammineq immikkoortortavillu suliffeqarfimmut tamarmiusumut pitsaasumik tunniussaqarsinnaanera eqqumaffigaat inuillu illit pillutit oqartarput tunniusimasuullutit tusarnaallaqqissuusutit iluarsiissutinillu nassaallaqqissuusutit.