Inatsisartut Allattoqarfiat oldfruemik/sullissinermut akisussaasumik Inatsisartunut ilaasortanut Allattoqarfimmilu sulisunut sullissinermik pitsaasumik tunniussaqarsinnaasumik sulisussarsiorpoq.
Atorfimmi sullissinissaq qitiuvoq, ulluinnarnilu apeqqutinut pissutsinullu nalinginnaasunut atatillugu pingaarnertut attaveqaataassallutit.
Nalinginnaasumik ulluinnarni suliassanik suliaqartassaatit, kisiannili aamma allaffissornermut tunngasunik suliassaqartassallutit. Assersuutigalugu allaffinni atortussanik inniminniisoqartassaaq, atit allagartaannik suliaqartoqarluni, oqarasuaatit nalunaarsorsimaffiannik nutarterisoqartarluni sulisullu qaqugu sulinissaannut pilersaarusiortoqartarluni.
Peqatigitillugu atorfissaqartipparput sulisoq allaffitsinnik ininillu allanik isumaginnissinnaasoq tamatigullu eqqiaasoqartariaqarneranik, taarsigassaqarneranik, kaffiliorfiit atorsinnaanerisa qularnaarneqarnissannik, ataatsimiinnernut sutugassaqartarnissamik, taamatullu aamma sulisut ilaasortallu kingusissukkut sulisut nerisassaqarnissaannik tamatigut eqqumaffiginnissinnaasumik. Taamaattumik aamma nammineq nalinginnaasumik igasinnaaguit iffiorsinnaallutillu ajoqutaanavianngilaq.
Sullissinermut akisussaasutut init atortuvullu nakkutigeqqissaassavatit, taamaattumillu pingaaruteqarluni ingerlaavartumik eqqianerit, iluarsaassinerit assigisaasalu aallartinneqarnissaannut nammineq suliniuteqarsinnaanissat. Suliassat ilaat nammineq isumagisinnaasariaqassavatit suliassallu allat illorsuarmi eqqiaasunit, sanasunit ass. isumagineqartassallutik. Tamatuma saniatigut sullissinermut immikkoortortami sulisut allat marluupput, taamaalillunilu suliassat isumagineqarnissaannut katillugit pingasuullusi.
Sullissinermut akisussaasoq nutaaq suleqatigiinnik aqutsisumut assingusumik inissisimassaaq, ulluinnarni suliassat aqullugillu agguataartassallugit, namminerli sulisoqarnermut akisussaassuseqarani. Sullissinermut akisussaasup Sulisoqarnermut Allaffissornermullu pisortaq, immikkoortortamut qulliunerusumik akisussaasoq, qullersarissavaa.
Inatsisartut ataatsimiinnerisa nalaanni unnukkut sapaatip akunneratalu naanerani suliassaqartassaaq. Tamatumunnga ilaatigut ilaapput ataatsimiinnerni sutugassaqarnissaanik isumaginninneq, pappiaqqanik atugassanik agguaassineq assigisaalu.
Sullissinermut akisussaasup nutaap tamakku eqqarsaatigereerlugit sullissinermut immikkoortortami sulisarnissamut pilersaarusiortoqarnissaa qularnaassavaa, namminerlu aamma sulinerusarnissaq piffissallu nalinginnaasumik suliffiusartut avataanni sulisarnissaq naatsorsuutigisariaqarlugu. Inatsisartut ataatsimiinnerinut atatillugu Sullissinermut immikkoortoq aalajangersimasumik sulisut saniatigut suli marlunnik sulisoqartarpoq nalinginnaasumik suliassanut tamanut ikiuuttartunik.
Inuttut piginnaasat:
Ammasuussaatit, sullisserusussuseqarlutit ataatsikkullu suliassanik assigiinngitsunik arlalinnik aqutsisinnaassuseqarlutit. Nammineersinnaassaatit ataqatigiissaarisinnaanermullu pitsaasunik piginnaaneqassallutit. Inuttut qanimaatsuussaatit naaggaarnissannullu qunusuussanak.
Microsoft Office (Word aamma Excel) aamma Outlook atornissaannut atuisut misilittagaqassaatit.
Suliffeqarfimmi amerlavallaanngitsunik sulisoqartumi ataatsimullu isigalugu nutaaliorusussutsimik pitsanngorsaatissatullu siunnersuutinut naaggarneq ajornermik ilisarnaateqartumi sulilissaatit. Qiimasuullutillu eqeersimaartuuvutit ulluinnarnilu nuannaarnermik tunniussaqartarlutit. Siusinnerusukkut atorfeqarfigisimasanit assingusunik misilittagaqareernissaq pingaartinneqarpoq.
Ilinniartitaanikkut aalajangersumik tunuliaquteqarnissat naatsorsuutiginngilarput, kisiannili kalaallisut qallunaatullu oqalullutillu allassinnaanissat piumasaqaataalluni.
Atorfeqarnermi atugassarititat:
Piginnaasat misilittakkallu tunngavigalugit immikkut isumaqatigiissuteqarfigalutit atorfinitsinneqassaatit. Atorfik nalinginnaasumik suliffiup avataatigut suliartoqquneqaratarsinnaanermik ilaqarpoq, tamatumunngalu atatillugu tapisiaqartitsisoqassalluni.
Sapaatip akunneranut nalunaaquttaq akunneri suliffiusartussaq 40-uupput.
Pequtsersugaanngitsumik inissaqartitsisoqarsinnaavoq malittarisassat atuuttut malillugit ineqarnermut akiliuteqarfiusartussamik. Atugassarititaasut isumaqatigiissutinut atuuttunut naapertuuttut malillugit atorfininnermut soraarnermullu atatillugu angalasoqarsinnaavoq pisariaqarpallu pisassat nuunneqarnerat ilanngullugu akilerneqarsinnaalluni.
Attaveqarusukkuit:
Atorfik pillugu apeqqutissaqaruit pisortamut Ellen Kolby Chemnitzimut oqarasuaatip normua 34 61 04 imaluunniit e-mail ekc@ina.alla.gl atorlugit attaveqarnissannut tikilluaqqusaavutit.
Qinnuteqarneq:
Atorfiup ulloq 15. februar 2022 sukumiinerusumilluunniit isumaqatigiissuteqarnikkut inuttalerneqarnissaa kissaatigineqarpoq. Qinnuteqarnissaq ulloq 1. februar 2022-mut killeqarpoq, qinnuteqaatillu e-mailimut uunga nassiunneqassallutik: ina@ina.alla.gl.