Inatsisiliorneq inatsimmulluunniit atuuttumut allannguut Inatsisartunut ilaasortamit Inatsisartunulluunniit ilaasortanit arlalinnit Inatsisartuniluunniit partiit arlaannit siunnersuutit Inatsisartunit aalajangiiffigisassatut siunnersuutitut saqqummiunneqarsinnaapput.
Inatsisartut aalajangiiffigisassaattut siunnersuut Inatsisartut akuersissutigippassuk siunnersuummi pineqartutut imalimmik Inatsisartut inatsisaattut peqqussutissaattulluunniit ittumik siunnersuummik saqqummiussinissamik Naalakkersuisut siuartitsinissamik pisussaaffilerneqarput. Tassa imaappoq, Inatsisartut inatsisaattut peqqussutissaattulluunniit ittumik siunnersuummik ilusiliinissaq piumasaqaatiginagu inatsiseqarnermut tunngasumik siunnersuummik saqqummiussinissamut Inatsisartunut ilaasortaq periarfissaqartoq.
Inatsisartunilli aalajangiiffigisassatut siunnersuutinut ilaatigut ilusissamut piumasaqaateqartoqarpoq, soorlu, siunnersuut tunngavilersuuteqassasoq imalu ilusilimmik oqaasertaqassasoq Inatsisartut aalajangiisinnaallutik.
Siunnersuutip aningaasaqarnikkut allaffissornikkullu kingunissai tamatuma saniatigut aalajangiiffigissatut siunnersuummi nassuiarneqassapput.
Inatsisartuni aalajangiiffigisassatut siunnersuutit marloriarlutik suliarineqassapput, Inatsisartut aalajangiiffigisassaattut siunnersuut ataatsimiititaliamit suliassatut innersuukkumallugu Inatsisartut suliarinninnertik unitsikkallarlugu aalajangersinnaapput. Ataatsimiititaliaq suliarinnittoq isumaliutissiissusiussaaq, taava suliaq ingerlateqqinneqassaaq. Ataatsimiititaliallu oqaaseqaatai Inatsisartut siunnersuummik akuersissuteqarnissaannut naapertuunnersut oqaluuserineqareerpat siunnersuutip akuersissutigineqarnissaa taasissutigineqassaaq.