Oqaluuserisassat matuma kinguliani allassimasutut ilusillit Inatsisartuni oqaluuserineqarsinnaapput 

Siunnersuutinut apeqquteqaatinullu Inatsisartunit suliarineqaqqullugit kissaatigineqartunut Inatsisartut Suleriaasianni ilusiliinissamut piumasaqaatinik arlalinnik aalajangersagaqarpoq, katersuunnerullu ingerlanneqarnissaa sioqqullugu suliassanut Inatsisartunit sulineqartussatut kissaatigineqartunut atatillugu naqitigassanik ilioqqaanissamut, naqitigassat amerlassusissaannut assigisaannullu ilassutitut piumasaqaatinik Inatsisartut Allattoqarfiat suliaqartarpoq.

 

Oqaluuserisassat, Inatsisartut oqaluuserisassaattut ilanngutitikkumasat, Inatsisartut Suleriaasianni § 40, imm. 1, malillugu kingusinnerpaamik Inatsisartut ataatsimiinnissaata pineqartup aallartinnissaa sapaatip akunnerinik tallimanik sioqqullugu piumasaqaatit naapertorlugit saqqummiunneqassapput, Inatsisartulluunniit Siulittaasuannut tunniunneqarlutik.

 

 

Ilusissaannut piumasaqaatit

Oqaluuserisassat ataatsimiinnissamut aggersumut ilannguteqquneqartut ilusissaannut piumasaqaatit pillugit maleruagassat erseqqinnerusut uku Inatsisartut Siulittaasoqarfiata Inatsisartut Suleriaasianni § 4, imm. 5 naapertorlugu aalajangersarpai.

 

 

Tunniussinissamut killigititaq

Suleriaatsimi § 40 naapertorlugu oqaluuserisassat, Inatsisartut oqaluuserisassaannut ilanngunneqartussatut kissaatigineqartut kingusinnerpaamik Inatsisartut ataatsimiinnissaata pineqartup allartinnissaa sapaatit akunnerinik tallimanik sioqqullugu piumasaqaatigineqartutut iluseqartillugit saqqummiunneqarsimassapput tunniunneqarsimallutilluunniit. Oqallisissiatut siunnersuutit inatsisartut ataatsimiinnissaannut sapaatit akunneri marluk sioqqullugit tunniunneqassapput.

 

Inatsisartut suleriaasianni § 41 naapertorlugu Inatsisartut Siulittaasoqarfiat killissarititaasunik allanngortitsisinnaavoq, tamatumanili pissutsit immikkut illuinnartut siumullu naatsorsuutigineqarsinnaasimanngitsut piumasaqaataapput. Suleriaatsimi § 40-mi tunniussinissamut killissaritinneqartoq eqquutsinneqarsinnaanngippat sooq immikkut akuerineqarnissaq qinnutigineqarnersoq tunngavilersorlugu Inatsisartut Siulittaasoqarfiannut immikkut akuerineqarnissamik qinnuteqartoqassaaq.
 
Ilaasortat siunnersuutaannik suliaqarneq
Ilaasortat inatsisissatut aalajangiiffigisassatut aammalu oqallisissiaq aallaavigalugu siunnersuutit tamarmik oqaatsit marluk atorlugit inaarutaasumik naammassineqareerlutik ataatsimiinnissaq sapaatip akunnerinik tallimanik sioqqullugu, ullormi kingusinnerpaamik tunniussiviusumi kingusinnerpaamik nal. 12.00 piareersimassapput.
 
Ilaasortat siunnersuutaannik partiit suliarinninneranni partiit allatseqarfiisa nalinginnaasumik ataqatigiissaarisuunerisigut ilaasortat siunnersuutaasa suliarineranni paasissutissanik pissarsiniarnerup siunnersuutinillu ilusilersuinerup siusissukkut pinissaat naatsorsuutigineqarpoq.

 

Ilaasortat siunnersuutaannut atatillugu Inatsisartut Allattoqarfiannit sullinneqarnissaq kissaatigineqassappat kaammattuutigineqarpoq tamanna piffissaalluartillugu qinnutigineqartassasoq. Siunnersuutinik pitsaasumik piareersaanikkut Inatsisartuni pitsaasumik suliarinninnissap pitsaasumillu isummersorfigineqarnissaasa qulakkeerneqarnissaat naatsorsuutigineqarpoq.

 

Nalunaarutigineqareersutut tunniussinissamut piffissarititaasoq tassaammat ataatsimiinnissaq pineqartoq sapaatit akunnerinik tallimanik sioqqullugu nal. 12.00, Inatsisartut Allattoqarfianni allatseqarfiup ilaasortat siunnersuutaannut ataasiakkaanut tunngatillugu pitsaanerpaamik ikiuussinnaanissaa qulakkeerneqarsinnaaqqullugu maannamiit aammalu ulloq kingullertut tunniussivissaq ullunik 14-inik sioqqullugu ikiorneqarnissamik qinnuiginninnissaq pissasoq piumasaqaataavoq. Ataatsimiititaliat allattaat sulinngiffeqarsinnaammata, angalasinnaammata il.il. teknikikkut ikiorserneqarnissamik kissaateqarneq ekc@inatsisartut.gl-imut tassungaluunniit paarlattaasumut qarasaasiakkut allalluni pisinnaavoq.

 

Inatsisartunut ilaasortat ataasiakkaat Inatsisartut Allattoqarfiannit sullinneqarnissaq kissaatigissappassuk Inatsisartut Allattoqarfiata Inatsisartunut ilaasortanik ataasiakkaanik sullissisarnini allanngortinnagu ingerlatiinnassavaa. Ullorli tunniussivissaq sioqqullugu partiit allattoqarfiisa annertunerusumik akuutinneqarnissaat suli anguniarneqarpoq. Taamaalillutik partiit allatseqarfii pisussaaffeqarput, siunnersuutit ilusilersuinermut tunngatillugu ikiorneqarnissamik qinnuteqarluni Allattoqarfimmut nassiunneqannginnerini, piareersaateqarlutik suliarinninnissaminnut. Inatsisartut Allattoqarfiata partiit allattoqarfiinut Inatsisartunullu ilaasortanut sullississutai imarisamikkut assigiissapput.

 

Naalakkersuinermut tunngasortaa Inatsisartunut ilaasortap nammineerluni isumagissavaa, taamaakkaluartorli ataatsimiititaliami allatsimit siunnersuummut imaluunniit apeqqummut tunngatillugu siunnersorneqarlunilu ilusilerneranut atatillugu ikiorneqarsinnaavoq. Taakku tassaasinnaapput siunnersuutinut apeqqutinullu ilusiliinissamut tunngasumik paasissutissat; tassungalu atatillugu siunnersuut imaluunniit apeqqut ilusissatut piumasaqaatinut naapertuuttungortikkumallugu Inatsisartunut ilaasortaq ikiorneqarsinnaavoq. Tamatumunngali piumasaqaataavoq siunnersuutip naammassipajaareerlugu suliarineqarsimanissaa.

 

Aammattaaq pineqartumi aalajangersagaareersinnaasut pillugit kiisalu sammineqartoq pillugu piffissami kingullermi siunnersuummik apeqqummilluunniit Inatsisartunut saqqummiussisoqarsimanersoq pillugu paasissutissiisoqarsinnaavoq. Aammattaaq siunnersuutissatut kissaatigineqartup assersuutigalugu Inatsimmut tunngaviusumut, Namminersorneq pillugu inatsimmut, nunat tamalaat akornanni isumaqatigiissutinut Kalaallit Nunaata akuerseqataaffigisimasaannut imaluunniit inatsisinut allanut akerlioratarsinnaanersoq Inatsisartunut ilaasortap naliliiffigitissinnaavaa soorluttaaq siunnersuutip allatut ilusilerneqarsinnaaneranut siunnersuisoqarsinnaasoq.

 

Aalajangiiffigisassatut siunnersuut suleriaatsimi § 33, imm. 1 naapertorlugu siunnersuutip piviusunngortinneqaruni aningaasatigut allaffissornikkullu kingunerisassaasa sukumiisumik allaaserinerinik aamma imaqassaaq. Siunnersuutit piumasaqaatinik taakkuninnga naammassinninngitsut Siulittaasoqarfimmit itigartitsissutigineqarsinnaapput. Siunnersuutip suliarineqarnera ima kingusitsigisukkut aallartinneqarsimappat allaat iliuuserisassap suulluunniit aningaasaqarnikkut kingunissai pillugit § 37 tunngavigalugu apeqquteqaatikkut Naalakkersuisuniit itisiliivigitinnissaa angumerineqarsinnaanani, siunnersuutip kingusinnerusukkut katersuunnermi aatsaat saqqummiunneqarsinnaanera aallaaviuvoq.

 

Oqaluuserisassanut atortussanik tunniussisarnermut tunngatillugu

Ilaasortat siunnersuutaat tamarmik kalaallisut danskisuullu allallugit kingusinnerpaamik ullormi tunniussivissami tunniunneqassapput.  Oqaluuseritinniagaq qarasaasiakkut unnga nassiunneqassaaq: inatsisartut@inatsisartut.gl.