Kukkunersiuinermut Ataatsimiititaliap suliassai
Kukkunersiuinermut Ataatsimiititaliap suliassai Inatsisartut aamma Naalakkersuisut pillugit Inatsisartut inatsisaanni § 18 aamma 19-imi allassimapput.
Kukkunersiuinermi aamma ataatsimiititaliap Nunatta Karsiata naatsorsuutaanik misissuisarnerani naatsorsuutit eqqortuunersut (aningaasaliissutinik kukkunersiuinerit), inatsisit malittarisassallu malinneqarsimanersut (inatsisit eqqarsaatigalugit isornartumik kukkunersiuineq) aamma Nunatta Karsiata aningaasaataanik atuinerit (ingerlatsinermik kukkunersiuineq) angusarineqartussatut kissaatigineqartunut atorneqarsimanersut qulakkeerneqarnissaat siunertarineqarput.
Kukkunersiuinermut Ataatsimiititaliap suliassai pingaarnerit:
Nunatta Karsiata naatsorsuutaasa kukkunersiorneqarnissaat nakkutigineqarnissaallu qulakkiissallugit
Namminersorlutik Oqartussat aktiatigut soqutigisaannik Naalakkersuisut suliaqarnerat nakkutigissallugu
Naatsorsuutit akuerineqarneranni ataatsimiititaliamit oqaaseqaatitalerlugit isumaliutissiissummik Inatsisartunut tunniussissalluni
Kukkunersiuinermut Ataatsimiititaliaq Inatsisartut kukkunersiuisussatut toqqagaannik, Nunatta Karsianik kukkunersiuisut, (Deloitte) qanimut suleqateqarpoq. Kukkunersiuinermut ilassutitut Kukkunersiuinermut Ataatsimiititaliap Nunatta Karsianik kukkunersiuisut misissueqqullugit qinnuigisinnaavaat. Misissuineq nalinginnaasumik ataatsimiititaliap ukiumoortumik isumaliutissiissutaanut ilanngunneqartarpoq aamma Naalakkersuisup inatsimmik eqqortumik aqutsisimaneranut imaluunniit aningaasaliissutini angusat siunertanut naammassinnittuunerannut tunngasinnaasarpoq. Nunatta Karsianik kukkunersiuisut nalunaarutaat allakkiaallu Kukkunersiuinermut Ataatsimiititaliap sulineranut tunngaviliisuupput.
Kukkunersiuinermut Ataatsimiititaliaq Inatsisartunut nalunaaruteqartarpoq
Kukkunersiuinermut Ataatsimiititaliap aningasaliissutinik ingerlatsinernillu angusat aamma kukkunersiuisut oqaaseqaataat ukiumut ataasiarlutik misissortarpaat naatsorsuutillu pissutissiinerat malillugit Naalakkersuisunut apeqquteqaateqartarpoq oqaaseqaateqartarlunilu. Apeqqutit oqaaseqaatillu aamma Naalakkersuisunit akissutit Kukkunersiuinermut Ataatsimiititaliap isumaliutissiissutaanut oqaaseqaatitalerlugit Naalakkersuisunut saqqummiunneqartarput.
Kukkunersiuinermut Ataatsimiititaliaq oqaaseqaatini aaqqiissutissanik tikkuaassineq ajorpoq. Oqaaseqaateqarnerni siunertarineqartut:
Inatsisartut aalajangigaat Naalakkersuisunit qanoq piviusunngortinneqarsimanersut aningaasaliissutillu akisussaaffigisatik qanoq aqussimaneraat Inatsisartunut paasissutissiissutigissallugit
Pissutsit isornartut Naalakkersuisunut iluarsitissallugit
Pissutsit ataatsimiititaliap isornartorsiorsimasai iluarsiniarlugit qanoq iliortoqassanersoq Naalakkersuisumut akisussaasumut nassuiaatigeqqullugit. Naammaginartumik akisoqanngippat aamma naammaginartunik pitsanngoriaateqartoqanngippat suliassaq Kukkunersiuinermut Ataatsimiititaliami iperarneqarunnanngilaq.
Inatsisartut Naalakkersuisut ingerlatsinerannik nakkutilliinerat Kukkunersiuinermut Ataatsimiititaliamit tunngavissinneqarpoq
Isumaliutissiissutip misissuinerulluunniit sunniutai ilaatigut tassaasinnaasarput Inatsisartunut ilaasortat apeqquteqaateqartarnerat, nassuiaasioqqusisarnerat aamma pissutsit Kukkunersiuinermut Ataatsimiititaliap isornartorsiugai pillugit apeqquteqartarnerat. Taamaalilluni Kukkunersiuinermut Ataatsimiititaliap sulinerata Inatsisartunut ilaasortat Naalakkersuisunik nakkutilliineranni suliassaannik tunngavissippai.
Kukkunersiuinermut Ataatsimiititaliaq Naalakkersuisunik pineqaatissiinissaminut periarfissaqanngilaq. Ataatsimiititaliamilli suliassami Inatsisartut aalajangeeqqullugit siunnersorneqarsinnaapput, kisianni Naalakkersuisumut politikkikkut kinguneqartumik suliassami Inatsisartut aalajangiisinnaapput.
Isumaqatigiilluni aalajangiisoqartarpoq
Naak Kukkunersiuinermut Ataatsimiititaliap politikkikkut partiit assigiinngitsut sinniisuuffigigaluarlugit ataatsimiititaliami tamarmiullutik isumaqatigiittoqartillugu oqaaseqaateqartoqartarpoq – tassa aamma Nunatta Karsianik kukkunersiuisut misissueqqullugit qinnuigineqaraangata.
Kukkunersiuinermut Ataatsimiititaliaq oqaaseqaateqaraangami, naak politikeriugaluarlutik assigiinngitsunillu isummertaraluarlutik, oqaaseqaataa Inatsisartuni, Naalakkersuisuni tamanilu pingaaruteqartarpoq.
Inatsisartut Kukkunersiuinermut Ataatsimiititaliami ilaasortassat toqqartarpaat
Kukkunersiuinermut Ataatsimiititaliami ilaasortat Inatsisartut Upernaakkut ataatsimiinneranni qinerneqartarput. Ataatsimiititaliami ilaasortat tassaapput politikerit Inatsisartuni ilaasortat. Nalinginnaasumik Siulittaasoq Naalakkersuisooqatigiinneersuusarpoq siulittaasullu tullia nalinginnaasumik illua´tungiliuttuninngaanneersuusarluni. Taamaalilluni partiit Inatsisartuni agguataarneqarneranni oqimaaqatigiinnissaq anguniarneqartarpoq.