Tamanut ammasumik siunersiuinerit


Inatsisartut Suleriaasianni § 19, imm. 4 naapertorlugu siunersiuinissanut matoqqasunut imaluunniit tamanut ammasunut aggersaasoqarsinnaavoq. Tamanut ammasumik siunersiuinermut aggersaasoqarpat ataatsimiinnermi kikkulluunniit najuussinnaapput.

 

Tamanut ammasumik siunersiuinerit

 

Siunersiuineq suua?

Ataatsimiititaliap pissutsit eqqumaffigilikkani naammaginngisaniluunniit nassuiaateqarfigineqarnissai kissaatigigunigit Naalakkersuisunut ilaasortamik siunersiuinissamut qanoq ilisukkulluunniit aggersaasinnaavoq. Aammalu assersuutigalugu inatsisissatut siunnersuummut saqqummiunneqartumut paasissutissanik pissarsiniarluni siunersiuinissamut aggersaasoqarsinnaavoq. Kiisalu ataatsimiititaliap pineqartup Naalakkersuisunullu ilaasortap suliassaqarfiisa iluanni nalinginnaasunut imaluunniit aalajangersimasunut tunngatillugu naalakkersuinikkut oqallisiginninnertut siunersiuinerit ingerlanneqarsinnaapput.

 

Siunersiuinerit taamaattut aqqutigalugit Naalakkersuisoqarfimmi isumaliutigineqartut pillugit ataatsimiititaliaq malinnaasinnaavoq (immaqalu sunniuteqarfiginnissinnaalluni). Ataatsimiititaliap nammineq aalajangiinera malillugu siunersiuineq tamanut ammasutut matoqqasutulluunniit ingerlanneqarsinnaavoq. Tamanut ammasumik siunersiuinermi kikkulluunniit najuussinnaapput. Akerlianilli matoqqasumik siunersiuinerit tamanit najuuffigineqarsinnaanngillat.

 

Siunersiuineq tamanut ammasuugaangat

Ataatsimiititaliaq tamanut ammasumik siunersiuinermut aggeqqusissalluni aalajangerpat, tamanna Inatsisartut nittartagaanni “Nutaarsiassat” ataanni allagarsiunneqassaaq. Tassani aamma ilaassapput siunersiuinermut qulequtaritinneqartoq siunersiuinissamullu apeqqutit.

 

Tamanut ammasumik siunersiuisoqartillugu kikkulluunniit siunersiuinermut malinnaanissamut periarfissaqarput. Inatsisartunili inissakilliorneq pissutigalugu siunersiuinermut inuit amerlanerpaamik 15-it najuussinnaapput. Tamatuma saniatigut inissat tallimat tusagassiortunut immikkut atugassiissutigineqarput. Inissat Inatsisartut Allattoqarfiannut inatsisartut@inatsisartut.gl-imut imaluunniit 34 50 00-imut saaffiginninnikkut inniminnerneqarsinnaapput, tamatumani siulliullutik saaffiginnittut inissanik pissarsisinnaallutik.

 

Siunersiuinermut najuussinnaassagaanni inissamik inniminneereernissaq pisariaqarpoq. Tusarnaariartut siunersiuinissaq kingusinnerpaamik minutsinik 15-inik sioqqullugu Inatsisartut saaffiginnittarfiannut apuutereersimassapput. Tassani allagartat saqqarmiut Inatsisartuniinnerup nalaani ersarissunngorlugit atorneqartussat tunniunneqassapput.

 

Siunersiuineq kalaallisut danskisullu malinnaaffigineqarsinnaassaaq.

 

Malittarisassat

Siunersiuinissamut tusarnaariat inissamik neqeroorfigineqarsimasut malittarisassat uku malissavaat:

 

  • Siunersiuinissamut tusarnaariat ersittumik saqqarmioqassapput. Inatsisartut Allattoqarfiat inissamik innersuussisimappat tusarnaarianut saqqarmioq saaffiginnittarfimmit tunniunneqassaaq.
  • Tusarnaariat siunersiuinerup nalaani nipaarsaassapput.
  • Siunersiuinermi nipimik assinillu immiussisoqarsinnaavoq, tamanna siunersiuinermi peqataasunut akornutaanngippat.
  • Oqarasuaatit angallattakkat nipaarutsinneqassapput.
  • Tusarnaarianut tusagassiortunullu sassaalliisoqassanngilaq.
  • Siunersiuinerup kingorna naalakkersuinermik sulialinnik apersuineq inimi tusagassiortunut atugassiissutaasumi ingerlanneqassaaq.
  • Siunersiuinerup kingorna innuttaasut tusagassiortullu inimi tusagassiortunut atugassiissutaasumi naalakkersuinikkut suliaqartunik apersuinngitsut sullissinermut immikkoortortamit saaffiginnittarfimmukaanneqassapput.
  • Ataatsimiinnermi peqataasut akornusersorneqaqqunagit siunersiuinerup aallartereernerani innuttaasut siunersiuinermut isersinnaanngillat.
  • Tusarnaariat siunersiuinermik kalaallisut danskisullu malinnaasinnaanngorlugit atortulersuutinik atugassinneqassapput. Teknikikkut atortulersuutit pisariaqarneratut qajassuunneqassapput.

 

Apeqqutit

Tamanut ammasumik siunersiuineq pillugu una aqqutigalugu apeqquteqartoqarsinnaavoq: inatsisartut@inatsisartut.gl