Kalaallit Nunaanni Inatsisartut

Oqaluuserisassani immokkoortoq 33-2-2

[ Ataatsimiinnerit ] [ Tilbage ] [ Op ] [ Nĉste ]

Siullermeerneqarnera Aappassaanneerneqarnera Aappassaanneerneqarnerata nanginnera Pingajussaaneerneqarnera

Pingasunngorneq 29. oktober 1997 nal. 18.06

 

Oqaluuserissaq immikkoortoq 33:

 

Radiukkut fjersynikkullu aallakaatitsineq pillugu Inatsisartut peqqussutaata allanngortin­neqarneranik Inatsisartut peqqussutissaannut siunnersuut.

(Kultureqarnermut Ilinniartitaanermullu ataatsimiititaliap siulittaasua, Kultureqarnermut, Ilinniartitaanermut Ilageeqarnermullu Naalakkersuisoq)

Aappassaaneerneqarnera.

                                                                

 

 

Ataatsimiinnermik aqutsisoq: Anders Andreassen, Inatsisartut Siulittaasuat.

 

Konrad Steenholdt, Kultureqarnermut, Ilinniartitaanermut Ilageeqarnermullu Naalakkersuisoq:

Radiukkut fjernsynikkullu aallakaatitsisarneq pillugu Inatsisartut peqqussutaata allanngortinne­qarneranik Inatsisartut siunnersuummut nassuiaatit.

 

Nassuiaatit tamanut tunngasut:

Radiukkut fjernsynikkullu aallakaatitsisarneq pillugu inatsisartut inatsisaanni ' 10, imm. 3 naapertorlugu Kalaallit Nunaata Radiuata (KNR-ip) siulersuisuini ilaasortat toqqarneqartassap­put ukiuni sisamani ilaasortaasussatut. Inatsisartut 1997-imi upernaakkut ataatsimiinneranni naalakkersuisut Inatsisartut siulittaasoqarfiannut siunnersuutigaat KNR-ip siulersuisuini ilaasortat Inatsisartunit toqqagaasut soraarsinneqassasut soraarsinneqareerpatalu ilaasortassanik nutaanik toqqaasoqassasoq. Tamatumunnga pissutaavoq naalakkersuisut KNR-ip 1996-imut ukiumoortumik naatsorsuutai tunngavigalugit paasimmassuk KNR-ip siulersuisui aningaasanik aqutsinermi sakkortuumik akisussaaffimminnik sumiginnaasimasut.

 

Naalakkersuisulli siulittaasoqarfiat isumaqarnerarpoq siulersuisuni ilaasortat ukiuni sisamani ilaasortaasussatut toqqagaammata siulersuisuni ilaasortassanik nutaanik toqqaasoqassappat pisariaqassasoq radiukkut fjernsynikkullu aallakaatitsisarneq pillugu Inatsisartut peqqussutaat allanngortissallugu. Tamanna pissutigalugu naalakkersuisut siunnersuutaat akuerineqanngilaq.

 

Siunnersuutikkut ugguuna pingaarnerutillugu qularnaarniarneqarpoq KNR-ip siulersuisui ilaasortaqartinneqassasut inunnik, tamarmik tusagassiuutinut, kulturimut, siulersuinermut inuussutissarsiornermullu tunngasunik paasisimannittunik. Tamatumuuna siunertarineqarpoq siulersuisut suliassaminnut pikkorinnerulernissaat sungiussisimarpalunnerulernissaallu.

Nutaajuvoq siulersuisuni ilaasortat tamarmik - siulittaasoq kisiat pinnagu - inassuteqartoqarnera tunngavigalugu naalakkersuisunit toqqagaasarnissaat. Aamma nutaajuvoq TV-utileqatigiit radioqarfiutileqatigiillu kattuffiata siulersuisuni sinniisuutitaqalernissaat, sulisorineqartullu sinniisuutitaqarnerat nukittorsarneqarpoq KNR-ip sinerissami immikkoortoqarfiisattaaq siulersuisuni ilaasortassamik inassuteqartalernissaatigut.

 

Siunnersuutikkut ugguuna tulliutillugu siunertarineqarpoq naalakkersuisut periarfissinnissaat siulersuisuni ilaasortatut toqqagaasut allanik taarsertarnissaannut, siulersuisuni ilaasortaq siulersuisuni ilaasortaanini pissutigalugu akisussaaffimminik sumiginnaarujussuarsimappat allatulluunniit siulersuisuni suliaminik ingerlatsinissaminut naleqqukkunnaarsimappat.

 

Naalakkersuisut aalajangiiffigisassaraat siulersuisuni ilaasortaq ataaseq arlallilluunniit ukiut ilaasortaaffiusussat naatinnagit allamik imaluunniit allanik taarserneqassanersoq/taarserneqas-sanersut. Aalajangiineq pisortatut oqartussaasunut allanut naammagittaalliuutigineqarsinnaan-ngilaq.

 

Siunnersuut akuerineqarpat tamatumuuna aalajangerneqassaartaaq siulersuisuni ilaasortamik ilaasortaaffissaq naatinnagu taarsiisoqarsinnaassasoq aatsaat siulersuisuni ilaasortaq taanna aalajangersakkami taaneqartut marluusut arlaannik pissuseqarsimappat. Taamaattumik naam­manngilaq taassuma naalakkersuisunit imaluunniit partiimit inassutiginnittumit tatigineerussi­manissaa allatulluunniit iluarineerussimanissaa. Tassa aalajangersakkakkut qularnaarniarneqar­poq siulersuisuni ilaasortamik taarsiisarnerup KNR-p siulersuisuini pisinnaatitsinermut naalakkersuinikkut akuliunniarnermut sakkugineqannginnissaa. Tassa nammineersinnaassuseq inatsisartut peqqussutaatigut KNR-imut patajaallisaatiginiarneqartoq siunnersuutikkut killiler­suiniarnermik siunertarisaqanngilaq.

 

Siunnersuutip akuerineqarnissaa ilimagineqanngilaq aningaasatigut allaffissornikkulluunniit annertuumik sunniuteqartussatut. Taamaattorli siulersuisut marlunnik amerlinerat aningaasar­tuutaanerulissaaq siulersuisut akissarsiaannut aningaasartuutinullu allanut siulersuinermut tunngassuteqartunut.

 

Aalajangersakkanut ataasiakkaanut oqaaseqaatit:

' 1)-imut:

Imm. 1-imi aalajangerneqarpoq siulersuisut tamarmik naalakkersuisunit toqqarneqartassasut. Siulittaasoq maannamutut naalakkersuisunit toqqarneqartassaaq. Ilaasortat allat toqqarneqartas­sapput inassuteqaatigineqartut tunngavigalugit, naalakkersuisullu Inatsisartunit, TV-utileqatigiit radiuujutileqatigiillu peqatigiiffiisa kattuffiannit, KNR-ip sinerissami immikkoortortaqarfiini atorfilinnit KNR-illu maani immikkoortortaqarfiani atorfilinnit inassutigineqartut malinnissaat pisussaaffigaat. Inassuteqartut qularnaarniartassavaat inuit siunnersuutigineqartut aalajanger­sakkami taaneqartunik ilaannik ataatsimik arlalinnilluunniit paasisimasaqarnerat. Naalakkersui­sut isumaqarunik inuk inassutigineqartoq erseqqissunik piukkunnaateqanngitsoq, inassuteqartoq qinnuigissavaat inummik allamik siunnersuuteqaqqullugu. Qinnuiginninneq tunngavilersorluar­neqassaaq.

 

Imm. 2-mi aalajangerneqarpoq toqqagaaffiup sivisussusia allanngorani ukiunik sisamanik sivi-sussuseqartoq siulersuisut sulinerat allanngorakulanani ingerlasinnaaqqullugu, taamalu aamma KNR-ip siulersugaanera. Toqqagaaffik siulleq aalajangerneqarpoq 1. november 1997-imit 31. oktober 2001-imut, tassa siulersuisunngortussat katitigaallutillu toqqagaasinnaaqqullugit 1997-imi ukiakkut ataatsimiinnermi, taamalu siulersuisuni ilaasortassanik nutaanik siunissami pisarsinnaaqqullugu Inatsisartut ukiakkut ataatsimiinneranni.

 

Imm. 2-p oqaasertaliugaaneratigut paasinarluartumik oqaatigineqarpoq siulersuisuni ilaasortat, aamma siulersuisut tamarmiusut, taakkununngalu sinniisussat ilaasortaalersut soraarsitaasinnaa­nerat toqqagaaffitsik naanngitsoq. Taamaalilluni illuatungaatigut naalakkersuisut periarfissinne­qarput siulersuisunut ilaasortat allanik taarsertarnissaannut, tamatumunnga pissutissaqaraangat, illuatungaatigullu siulersuisunut ilaasortat qularnaariffigineqarput pissutissaviusunik pissute­qanngitsumik allanik taarserneqartannginnissaannut, taamalu siulersuisut KNR-illumi nammi­nersortumik ingerlatsinerisa killilersuiffigineqannginnissaannut.

 

"Sinniisussaq ilaasortaalersoq" paasineqassaaq tassaasoq sinniisussaq siulersuisunut ilaasortatut sulisarsimasoq siulersuisunut ilaasortaq sinniisussaaffigisani ataatsimiinnerni peqataanissamut pisinnaanngikkaangat.

 

"Siulersuisutut akisussaaffimmik sumiginnaarujussuarnermik" oqarnikkut isumagineqarpoq siulersuisunut ilaasortanik siulersuisutut sulinerannik pissuteqartumik soraarsitsineq taamaallaat pisinnaasoq suliaminnik ingerlatsinerat ima naammaginanngitsigisimappat mianersuaallior­nerinnartut naatsorsuunneqarsinnaanani. Tassa aalajangersagaq atorneqarsinnaassaaq suniann­gilluinnarpallaarujussuartoqartillugu (assersuutigalugu iliuuserisanik inatsisinik tunngaveqann­gitsunik imaluunniit aningaasartuutissanik aalajangeriikkanik peqqussutinik tunngaveqanngitsu­mik qaangeerujussuartarnernik unitsitsinianngitsoqaraangat) siulersuisunullu ilaasortaq peqataa­sarsimagaangat iliuuserisassanik inatsisinik tunngaveqanngitsunik akisussaassuseqanngitsumil­luunniit aalajangiinerni.

 

"Allat pissutigalugit siulersuisuni ilaasortaanissamut naleqqukkunnaarsimanermik" oqarnikkut isumagineqarpoq naalakkersuisut periarfissinnissaat siulersuisuni ilaasortap siulersuisut sulinerisa avataanni iliuuserisartakkani pissutigalugit siulersuisuni suliaminik ingerlatsiinnarnis­saminut naleqqukkunnaaraangami soraarsittarnissaanut. Tassani eqqarsaatigineqarnerupput pinerluttuliornerit, pingaartumik eqqarsaatigalugit aningaasanut tunngasutigut pinerluttulior­nerit, soorlu tillinnikkut naatsorsuutini amigartoornerit, peqquserlulluni salloqittaanerit, piginnaatitaanermik atornerluinerit il.il. Allamilli pinerluttuliornerup suussutsiminik pissute­qartumik aamma kingunerisinnaavaa pinerluttuliortup naalakkersuisunut ilaasortamit tatigine­qarunaarnera tatiginninnermik toqqaanermut pissutaasimagaluartumik. Pinerluttuliorneq allamik taarteqartitsinissamut pissutaassanersoq naalakkersuisut kisimik aalajangerniagassaraat. Pinerluttuliornerit saniatigut siulersuisunut ilasortaq aamma soraarsinneqarsinnaavoq naleqqut­tutut isigineqanngikkuni, tassa iliuuserisartakkamigut imaluunniit iliuuseqartannginnermigut erseqqissumik takutikkuniuk siulersuisut soqutigisaat malillugit sulinissamut piumassuseqann­ginnini imaluunniit piginnaaneqannginnini. Taamaattorli naalakkersuisut imaluunniit siulersui­suni ilaasortassatut siunnersuutiginnittup soqutigisaat malillugit sulinissamut piumassuseqann­ginneq piginnaaneqannginnerluunniit imminni pissutissaanngillat soraarsitsinissamut.

 

Imm. 3-mi aalajangerneqarpoq siulersuisunut ilaasortat tamarmik siulittaasoq kisiat pinnagu sinniisussaannik toqqaasoqartassasoq, taakkulu siulersuisunut ilaasortaq sinnerlugu ilaasortann­gortassasut siulersuisunut ilaasortaq tunuarpat, soraarsitaappat, tak. imm. 2, imaluunniit sivisuumik sulisimanngippat. Maannamut toqqaasoqartarsimavoq taamaallaat ilaasortat inatsisartunit toqqagaasut sinniisussaannik, sinniisussallu ilaasortanngortarput aatsaat siulersui­sunut ilaasortap tunuarnerani. Sivisuumik sulisimannginneq paasineqassaaq tassaasoq siulersui­sunut ilaasortap qaammatini arlalinni siulersuisut sulineranni peqataanissamut akornuteqarsima­nera. Sinniisussarli ilaasortanngorsinnaanngilaq siulersuisunut ilaasortaq ataatsimiinnermi ataatsimi peqataasinnaanngippat. Sinniisussanik toqqaaneq pisassaaq siulersuisunut ilaasortassa­nik toqqaaneq peqatigalugu. Imm. 1-imut innersuussinermi aalajangerneqarpoq sinniisussanik toqqaanermi periaatsip assigissagaa siulersuisunut ilaasortassanik toqqaanermi periaaseq.

 

Imm. 4 naapertuuppoq peqqussummi atortuusumi ' 10-mi imm. 6-imut.

 

Imm. 5 peqqussummi atortuusumiittumiittup assigaa.

 

' 2)-mut:

Ulloq atortuulerfissaq siunnersuutigineqarpoq siulersuisut nutaat siunnersuut naapertorlugu sapinngisamik piaartumik toqqarneqarnissaat pissutigalugu. Siulersuisut nutaat toqqarneqar­nerat peqatigalugu maannamut siulersuisuusut tunuassapput. 

 

Ruth Heilmann, Siumup oqaaseqartua:

Radiukkut fjersynikkullu aallakaatitsisarneq pillugu Inatsisartut peqqussutaata allanngortinneqar­neranik Inatsisartut peqqussutissaannut siunnersuummut aappassaarinninnermut tungatillugu Naalakkersuisup saqqummiinera tamakkiisumik isumaqatigigatsigu inatsisissap taamatut isikkoqarluni pingaajussaaneerneqarnissaanik tapersersuinerput Siumumiit matumuuna erseqqis­saatigissavarput.

 

Anders Nilsson, Atassutip oqaaseqartua:

Radiukkut fjersynikkullu aallakaatitsisarnerit pillugu Inatsisartut peqqussutissaattut siunersuum­mi saqqummiuneqartumi KNR-TV-mi siulersuisuini toqqaasarnermi maleruagassat, Naalagaaffe­qatigiinnerup iluani allani malittarisassanut atorneqartunut naapertuutunngortinneqassapput.

 

Ukioq ataasinngulersumi ajornartorsiutaasimasoq allanngortinneqarpoq, tassa siulersuisuni ilaasortat Inatsisartunit toqqarneqartarlutik Naalakkersuisullu qulliunerusunik siulersunik akisussaasunillu suliaannik nakkutilliisuusussallutik siulersuisuni ilaasortaannat qanoq inuttaler­sugaanerannik sunniuteqanngitsumik.

 

Oqartoqartaraluarpoq kingumoortumik atuuffilimmik inatsisiliulersugut. Taamaanngilaq, inatsisiliulerpugut ullormit peqqussutip atortussanngortinneqarnerani atuutilersussamik. Peqqus­sutip akuersissutigineqarneratigut siulersuisuni ilaasortaannaat kingumoortumik taarsersinnaann­gilavut. Siulersuisut sulissutigisimasaat sulissutigisimanngisaalluunniit atorunnaarsissinnaanngi­lavut aammalu immaqa ajoraluartumik ilaasortaasimanngitsutut isigisinnaanagit.

 

Imaaliallaannavilluta allanik taarsersinnaanngilavut. Siulersuisuni ilaasortatut sulineq Naalakker­suinermik suliaqarnermitulli ippoq. Tatigisatut suliffiuvoq. Tatigineerukkaannilu taava taarseqar­sinnaasariaqarpoq. Taannarpiaavorlu peqqussutip allanngortinneqarnerani pineqartoq.

 

Taamatut oqaaseqarluta Atassummiit siunnersuut saqqummiunneqartoq tapersersorparput, tassalu Radiukkut fjernsynikkullu aallakaatitsisarnerup pillugu Inatsisartut peqqussutaata allanngortinneqarneranik Inatsisartut peqqussutissaannut siunnersuut.

 

Manasse Berthelsen, Inuit Ataqatigiit oqaaseqartuat:

Suliaq aappassaaneerneqaqqaarnerani peqqussummut allannguutissaq nutaavissuaq saqqum­miunneqarnerani Inuit Ataqatigiinniit tamatuma ataatsimiititaliamit nutaamik isummerfigineqar­nissaa naatsorsuutigilluinnarsimagaluarparput.

 

Naalakkersuisummi siullermik saqqummiussaanit siunnersuutigineqartoq allaanerulluinnarmat. Taamaammat Inuit Ataqatigiinniit eqqarsarnartoqartipparput tamatumuuna saqqummiusaq nutaaq ataatsimiititaliamiit misissorneqaqqaanngimmat. Naak Siumumiit, Naalakkersuisunut ilasortamiit ataatsimiinermilu aqutsisumiit ataatsimiititaliamut innersuussutigineqaraluartoq.

 

Nutaamik siulersuisunik toqqaasalerneermut tunngavigitinniarneqarpoq, siulersuisuulertussat tusagassiuutitsigut allatullu ingerlatsereersunik misilittagalimmik inuttalerneqartarnissaat. Tamanna Inuit Ataqatigiinniit toqqaasarnitsinni tunngavigisuaannanikuuvarput. Naalakkersuiso­oqatigiit tamak siunnerfeqalerniarnerat nuannaarutissavoq.

 

Inuit Ataqatigiinniillu Naalakkersuisunut inassuteqaatitsinni aamma taamatuttunngaverqarluta iliortarumaarpugut.

 

KNR-imi sulisut amerlanerit kiisalu FTV-R-imilu toqqakkap ilanngunnissaa siulersuisunut isernissaat Inuit Ataqatigiinniit tapersersorparput.

 

Tamaammat annertunerrusumik oqaseqarfiginagu Kultureqarnermi ilinniartitaanermullu ataatsi­miititaliami misissorluaqqaarnissaa Inuit Ataqatigiinniit kaammattuutigissavarput.

 

Bjarne Kreutzmann, Akulliit Partiiat:

Siullermeerinninnermi Akulliit Partiianni oqaaserisakka innersuussutigalugit, tassa oqallinnermi allamik quliqutalimmi siunnersuutigisakka eqquillugit uani immikkoortumi 33-mi allannguutis­satut tiguneqarmata qujassutigalugit akueralugillu, taamatut suliap maani taamatut isikkoqarluni ingerlaqqinnissaa innersuussutigaara.

 

Athon Frederiksen, Kattusseqatigiit:

Kattusseqatigiinniit siullermeerinninnermi oqaaseqaatikka innersuussutigalugit maannamullu allannguutissatut siunnersuutigineqartoq ilanngullugu akuerseqataaffigissavara.

 

Konrad Steenholdt, Kultureqarnermut, Ilinniartitaanermut Ilageeqarnermullu Naalakkersuisoq:

Qujavunga oqaaseqartunut tamanut. Tassa paaseqatigiinnikkut una allannguutissatut siunnersuu­taasoq paasivara oqaaseqartunit tamanit tapersersorneqartoq.

 

Inuit Ataqatigiit kissaatigisaat una ataatsimiititaliami misissorneqarsinnaanissaa soorunami taanna periarfissaavoq pingajussaaneerneqartinnagu. Isumaqarpungalu uani siulersuisunut ilaasortanngorumaartussat qanoq katiterneqartarnissaannut assortuuttoqanngimmat, annertuumik akornutiviusumik nassaartoqarnavianngitsoq.

 

Taamaattumik innersuussutigiinnassavara ataatsimiititaliami pingajussaaneerneqannginnermini nalilersorneqarnissaa. Taanna katersuuffigisinnaagutsigu.

 

Manasse Berthelsen, Inuit Ataqatigiit oqaaseqartuat:

Uani peqqussummut allannguutissatut siunnersuummi nutaarluinnarmik ilanngunneqarsimavoq, november-ip aallaqqaataaniit nutaamik siulersuisunik toqqaanissaq 2001-ip tungaanut atuuttussa­mik.

 

Taanna Siumukkut siunnersuutaanni ilaasimanngilaq. Taamaammat kingunissat, kiisalu aamma KNR-imi siulersuisuni ilaasortat amerlisussaapput. Ilisimasavullu naapertorlugit siulersuisuni ilaasortat akikitsuunngillat. Qanoq kinguneqassava KNR-imut siulersuisut amerlinerulerneri. Tamakkuupput assigiinngitsut ataatsimiititaliami nalilersugassaqqissut.

 

Finn Karlsen, ataatsimiinnermik aqutsisoq:

Taamaalilluni oqaluuserisassaq immikkoortoq 33, radiukkut fjernsynikkullu aallakaatitsisarneq pillugu Inatsisartut peqqussutaata allanngortinneqarneranik Inatsisartut peqqussutissaannut siunnersuut aappassaaneerneqarnerata oqaluusserineqarnera naammassivoq.

 

Ajorineqanngitsoq paasivara pingajussaaneerneqartinnani ataatsimiititaliami sammineqaqqaar­nissaa.

 

Taamaattumik taamatut isikkoqarluni pingajussaaneerneqannginnermini ataatsimiititaliamut ingerlatinneqarnissaanut isumaqataasut nikuissapput. 29.

 

Oqaluuserisaq naammassivoq.