Oqaluuserisassani immikkoortoq 50 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq: Inatsisartut Siulittaasuat Anders
Andreassen.
Peter Ostermann, apeqquteqartoq, Atassut:
Naalisassavara, allaganngorlugu
aamma agguaanneqareernikuummat. Tassa maanga nassiussimavara siunnersuut
apeqquteqaatinngorlugu inissinneqarsimasoq. Nalunngilarput nammineerluni
illuliat kommunal byggesĉt-inik taaneqartartut, tassa kommuninut sanaassanngorlugit
landskasse-mi atortusaat akilerlugit kommuninut tunniunneqartartut
qinnuteqartunut, kommunillu ilaatigut inuusuttunik suliffissaaleqisunut
suliffissaqartitsiniarnermut atatillugu nappartittagai inissiatullu
attartortittakkatut atortittarlugit, isumaqarama taama aaqqissuussineq tunngavigut
assorujorusussuaq pitsaasoq. Taava siunnersuutigisimavara meeqqanik
inuusuttuaqqanillu naliginnaasumik sullissinermi aamma
atorneqarsinnaasunngorlugit aaqqinneqassasut.
Daniel Skifte, Aningaasaqarnermut Ineqarnermullu
Naalakkersuisoq:
Siullermik qinnuigissavara
naalisaanissannut akuerineqaqqullunga agguaanneqareermat naalisangaatsiassavara.
Nammineerluni illuliassat kommuninit
sananeqartussat pillugit inatsisartuni ilaasortaq Peter Ostermann
pingasunngornikkut apeqquteqaateqarpoq isumaqarami nammineerluni illuliassat
kommuninit sananeqartarnerannik aaqqissuussineq annertusineqartariaqartoq,
taamaalillutik nammineerluni illuliassat meeqqanik inuusuttuaqqanillu
sullissinermi aamma atorneqarsinnaasunngortillugit. Inatsisartuni ilaasortap
oqaatigaa meeqqat inuusuttuaqqallu arlaannik ajornartorsiuteqartut
aalajangersimasumik saaffissaqartariaqartut toqqissisimallutik saaffigisinnaasaminnik.
Suliaqartitsiniarneq annertusarniarlugu naalakkersuisut 1991-miilli
suliniutigaat nammineerluni illuliassanut kommuninit sananeqartussanut
aningaasanik immikkoortitsisoqartarnissaa qinnuteqaateqartoqareerneratigut
kommuninut agguaanneeqartartussamik. Nammineerluni illuliassanut atortussat
aningaasartuutit 100 %-mik Namminersornerullutik Oqartussat akilertarpaat.
1991-miit nammineerluni illuliassat kommuninit sananeqartussat 209-t kommuninut
akuersissutigineqarsimapput. Inatsisartuni ilaasortap Peter Ostermann-ip
apeqquteqaataa naalakkersuisut ima paasivaat, eqqarsaatigigaa nammineerluni
illuliassat kommuninit sananeqartussat meeqqanut inuusuttuaqqanullu
orniguffigineqarsinnaasutut atorneqassasut, tassalu paaqqinniffeeqqatut
ilusilikkat. Illorput 2000 pilersaarusiugaavoq ineriartortitaallunilu
taamaallaat inissiassatut, tamannalu tunngavigalugu atortulersugaalluni
aaqqisuussaalluni.
Illut ineriartortitaapput
sumiiffinni atortorissaarusersuifferujussuanngitsuni inissitassatut. Illut
sannamikkut ukioq kaajallallugu imermik peqartussatut eqqagassanullu kuuffiligassatut
sanaajunngillat, taamaattumillu aallaavigalugu inissinneqartussaallutik
illuliorfissani tamakkuninnga attaviliinissamut piumasaqaateqarfiunngitsunut.
Illut sannamikkut masannartuleriffii atortorissaarusersugaanikkut pitsaassusii
naammanngillat meeqqanut inuusuttuaqqanullu orniguttarfittut
atorneqassagaluarunik. Illut piariigaapput imermut eqqagassanullu kuuffinnut
attavilerneqarnissaminnut, tamatumali nassatarissavaa illup akia annertujaamik
qaffanneqassammat illut initamigut ilusiligaanermigut inissiatut siunertap
saniatigut allatut atorneqarnissamut naleqqutinngitsoq nalilerneqarpoq.
Kisianni naalakkersuisut
misissorlugu aallartissavaat Illorput 2000 sannani tunngaviatigut sulisunit
ilinniarsimanngitsuni sananeqarluni nunaqarfimmi meeqqerivittut
atorneqarsinnaanersoq. Ilanngullugu oqaatigineqassaaq meeqqanut
inuusuttuaqqanullu orniguttarfinni tamatumani sulisussanik
atorfeqartitsisoqassappat sulisunik illersuinissamut inatsisiliani
piumasaqaatit soorlu qilaamut portussusissaq inillu angissusissaat illuni
taakkunani naammassineqarsinnaanngillat. Inatsisartuni ilaasortap Peter
Ostermann-ip siunnersuutaani siunertarineqartut naalakkersuisut isumaqatigaat,
tassa naalakkersuisut isumaqataammata meeqqat inuusuttuaqqallu saaffigisinnaasaannik
periarfissaqartinneqartariaqartut. Tamannalumi isumaginninnermi iluarsaaqqinnissamut
ataatsimiititaliarsuup kaammattuutaanut atalluinnarpoq.
Peter Ostermann, Atassut:
Akissuteqaammut qujavunga, kisianni
akuerinngilara. Takuuk maaniilluni Katuaq-mut iserluni ullaatungaaniit
meerarpassuit inuusuttuaqqat assigiinngitsorpassuarnik sammisallit, Hotel Hans
Egede kiileriani unnukkut siuleriiaartorsuullutik iserniuttut usornat. Kisianni
tamatuma siornatigut Katuaq siornatigut ilaa sumiittarsimagaluarpammitaava.
Takkuuk, sinerissami taamaappoq meerarpassuit ilaat mikisut unnuarsuarmut
aqqusinermi aneertarput, tassami sammisassaqannginnamik. Tassa tamakku
eqqarsaatigalugit assorsuaq piukkukkaluariga illunnguit tamakku portussusii
apeqqutaasariaqanngikkaluarput, inunnut inissiatut atorsinnaappata aamma
soorunami sullissivittut meeqqanut inuusuttuaqqanullu atorsinnaassapput,
kisianni kingusinnerusukkut uterfigeqqikkumaarpara isumaqarama sinerissami
assorujorujussuaq pisariaqartinneqartoq meeqqat arlaanni inussuttuaqqat
arlaannik ajornartorsiuteqarunik saaffigisinnaasaannik. Ullumikkut sullissineq
annertooq massakkut piumassuseq naapertorlugu annerusumik ingerlanneqarpoq,
taamaaginnarsinnaanngilaq.
Oqaluuserisaq naammassivoq.