Oqaluuserisassani immikkoortoq 52 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Anders Andreassen, Ataatsimiinnermik aqutsisoq, Inatsisartut Siulittaasuat:
Taava tikissavarput immikkoortoq 52, Suleriaatsimi ' 41 naapertorlugu apeqquteqaat toqqammavigalugu oqallinneq, saniatigooralugu aalisarnermik inuutissarsiuteqartut qaleralinniarsinnaalerfissaannut siunnersuut. Tassani siunnersuuteqartoq Inatsisartunut ilaasortaq Manassa Berthelsen saqqummiigallassaaq.
Manasse Berthelsen, Siunnersuuteqartoq, Inuit Ataqatigiit:
Saniatigooralugu aalisarnermik inuutissarsiuuteqartut qaleralinniarsinnaalernissaannut siunnersuut.
Naluneqanngitsutut Naalakkersuisut sinerissami qanittumi qaleralinniarneq pillugu nalunaarusiorput, tassanilu saniatigooralugu qaleralinniartartut tunisisinnaanerat mattunneqarluni.
Tamannalu annertuumik illoqarfinni qaleralinniarfiusuni annertuumik kinguneqapiluttussaavoq, tassami ilaqutariippassuit ulluinnarni inuuniarnerminni naammattusaatitut atorluartarpaat. Ingammik ukiuunerani sikuutillugu inuuniarneq ilungersunartuusarpoq, nioqqutissat timmisartukkut tikisinneqartartut akisusaqimmata.
Pisanik killilersuiniarneq tassani siunertaagunarmat, tamaammat paasiuminaatsilluinnarpara, sooq sanitigooralugu aalisartut eqqorneqassasut. Pisanimmi killilersuiniaraanni qassusersorluni qaleralinniarneq siulliullugu inerteqqulaalersinneqartariaqarpoq. Taassumalu kingorna aatsaat takuneqarsinnaanngussaaq, ilumut annertuallaamik qaleralinnartoqarnersoq.
Aamma tulluartuunngilaq Tunumi qaleralinniarnerup siuarsarneqarnissaanut, saniatigooralugu aalisartut mattuneqassappata.
Taamammat Inatsisartunut siunnersuutigissavara, sinerissami qanittumi qaleralinniarneq pillugu Naalakkersuisut nalunaarutaanni nr. 6-mi sanatigooralugu aalisartut aamma qaleralinnik tunisisinnaanisaat ammaanneqarnissaa.
Uummannami nalunaarut aalassataasimaqaaq, siunnersuutinnut ilannguppara Uummannarmiut allagarisimasaat, Uummannami borgmesteri siuttoralugu. Aammalu ilisimavara Uumannami SIP atsiornernik katersisimasoq, maannamullu atsiornerit 340 sinnerlugit pissarsiarereersimallugit, kingornalu paasivarput Aalisarnermut Naalakkersuisumut atsiornernerit 1400-ut pallillugit tunniunneqareersimasut.
Neriullunga siunnersuutiga paasineqarluarluni suliarilluarneqarumaartoq.
Paaviaaraq Heilmann, Aalisarnermut, Piniarnermut Nunalerinermullu Naalakkersuisoq:
Inatsisartunut ilaasortaq Manasse Berthelsen saniatigooralugu aalisarnermik inuutissarsiuteqartut qaleralinniarsinnaallutillu tunisilersinnaanissaannut siunnersuummik saqqummiussaqarpoq.
Aallaqqaasiullugu nalunaarutigilara qaleralinniarnermik akuersissummik peqartussatitaanerup eqqunneqarnissaa 1. juli 1998-mut kinguartinneqarmat, tamanna pissuteqarpoq qarasaasiatigut paasissutisseeriaatsinik nutaanik qaleralinniartorpassuarnik akuersissuteqarnermut atorneqartussanik atuilernissaq kinguaattoormat, kinguaattoorneq taanna attorneqartunut tamanut nalunaarutigineqareerpoq.
Naalakkersuisut 1994-mi aalisarneq pillugu isumasioqatigiittoqarnerata kingorna qaleralinniarnermi malittarisassanik tamanut atuutunik eqqussinissamik suliniuteqarsimapput. Qaleralinniarneq ukiuni kingullerni 10-ni pingaartumik ukiut kingulliit 5-at ineriartupiloorsimavoq, 1980-kut qiteqqunneranni ukiumut 7.000 tons-it tulaanneqartarsimapput, ukiorlu kingulleq 21.000 tons-it tulaanneqarsimallutik. Ineriartorneq taanna piffissami saarulliup immattinnik qimagussimaffiani nuannaarutissaagaluartoq biolog-it ukiut kingullerpaani qaleralinniarnerup naleqqutinngitsumik ineriartornissaannik aarlerisaarisarsimapput.
Ugguuna biolog-it nunatta eqqaani aalisakkat pillugit siunnersuutaat issuaaffigissavara:
NAFO, tassa Atlantikup avannaani kitaani aalisarneq pillugu suleqatigiiffik, siunnersuivoq aalisarneq ukiuni kingullerni aalisarnermi anguneqartarsimasunit annerussanngitsoq aammalu sinerissamut qanittumi aalisarfiusartut pingasut immikkut TAC-mik pisassiiffiullutik killilersuiffigineqassasut. Sinerissamut qanittumi aalisarfiusartuni aalisagaqassutsip ajutuuinnissaannik malunnartoqanngilaq, kisiannili Qeqertarsuup tunuani Uummannamilu aalisarpallaalerneq malunnarsisimalluni, tassalu aalisarnerup annikillisinneratigut aalisakkanik pitsaanerusumik iluaqutiginninneq anguneqarsinnaavoq.
Kiisalu mianersorluni periaatsip malinneqarnissaa inassutigineqarpoq aalisakkanik iluaqutiginninnissamik iliuusissaq aaliangersarneqalerpat, tassami aalisarnermik tassannga paasissutissat pisut aalisarnerullu qanoq annertussusiata sanilliunnissaanut atorneqarsinnaasut suli amigaateqarmata.
1997-mi NAFO pisassat qaffasissusissannik siunnersuuteqanngilaq kisiannili oqaatigalugu Qeqertarsuup tunuani Uummannamilu aalisarpallaalerneq malunnarsisimasoq. Naalakkersuisut upernaaq manna sinerissamut qanittumi qaleralinniarneq pillugu nalunaarummik atulersitsipput, pingaarnerussutigut makkuninnga imalimmik:
Siullermik, inuussutissarsiutigalugu qaleralinniarnermi akuersissummik peqartussaatitaanerup eqqunneqarnera inuussutissarsiutigalugu aalisartut kisimik inuussutissarsiutigalugu qaleralinniarsinnaanermut akuersissummik pisinnaatitaapput, taamaattorli nammineq atugassanik aalisarnermi akuersissummik peqartoqarnissaa pisariaqanngilaq aammalu kikkulluunniit aalisarsinnaallutik.
Aappassaannik, angallatit angissusiinik killiliineq Qeqertarsuup tunuani Uummannallu pigisaani amerlanerusunik aalisartoqalersinnaaneranik killilersuinerup eqqunnera, tassa inuutissarsiutigalugu aalisartut killiliffigineqarnerat.
Pingajussaanik, qassutinik kivisittakkanik atuinerup 1. januar 2000-mi ajornartitaalernissaa. Biolog-lli siunnersuinerat sukannerulissagaluarpat qassutit atornissaannut inerteqqutit eqquunnissaa siuartinneqarsinnaalluni, taanna Kattuffinni oqaloqatiginninnermik tunngaveqarpoq.
Sisamassaanik, pisanik nalunaaruteqartarnerup aallartinneqarnissaa tunioraasunik nakkutiginninnermut atorneqartussaq, kiisalu periaatsip kingusinnerusukkut aalisakkanik killilersuinermut ineriartortinneqarsinnaasut atulertinneqarnissaa.
Siulianiittut najoqqutaralugit takuneqarsinnaavoq nalunaarummut eqqorneqartut tassaajunnanngitsut saniatigooralugit aalisartut, assersuutigineqarsinnaavoq angallatit kujataaneersut maannakkut Qeqertarsuup tunuanut qaleralinniariartorsinnaajunnaarmata, nalunaarummi erseqqissumik siunertarineqarpoq ukiuni makkunani ineriartornerujussuup killilersimaarnissaa aammalu Naalakkersuisut isumaqartut tamanna taamaallaat pisinnaasoq killilersuinerit uani taaneqartut eqqunneqarpata.
Naalakkersuisut pingaartippaat qalerallit iluaqutigineqarnerata piuartitsinissaq tunngavigalugu ingerlanneqarnissaa. Naalakkersuisut qaleralinniarnerup ingerlanera malittarijuarniarpaat aammalu Naalakkersuisut pisariaqartutut isigisaat malillugit naleqqussaasarniarlutik. Naalakkersuisut maannakkut saniatigooralugu aalisartut qaleralinnik aalisarnissaannut tunisassanullu akuersisarnissaminnik eqqarsaateqanngillat, taamaattorli Naalakkersuisut nalunaarutigissavaat misissorlugu aallartinneqarmat inatsisit iluanni saniatigooralugu aalisartut ukiuunerani qalerannik aaliangersimasumik amerlassusilinnik aalisarlutillu tunisissinnaanerannut periarfissaqarnersoq, tamanna tunisinermi pissutsit ajornartinngippassuk.
Naalakkersuisulli erseqqissaatigissavaat naleqqussaanerit tamarmik inuussutissarsiutigalugu aalisartut suleqagalugit piujuassammata.
Anders Andreassen, Ataatsimiinnermik aqutsisoq, Inatsisartut Siulittaasuat:
Siunnersuutigissavara ataatsimiinneq massakkut unikkallassasoq taavalu ataatsinut nangeqqinneqarluni. Tassa soorlu taamak isumaqatigiissutigereeripput ataatsimiinnerup aallartinnerani. Ataatsimiinneq unikkallarpoq.
Anders Andreassen, Ataatsimiinnermik aqutsisoq, Inatsisartut Siulittaasuat:
Ataatsimiinneq nangeqqippoq, taamatullu aamma immikkoortoq 52, tassalu Suleriaatsimi ' 41 naapertorlugu apeqquteqaat toqqammavigallugu oqallinneq: Saniatigooralugu aalisarnermik inuussutissarsiuteqartut qaleralinniarsinnaalernissaannik siunnersuut oqallisigineqarnera nangissavarput. Maannalu partiit kattusseqatigiillu oqaaseqartussai oqaaseqassapput, siulliulluni oqaaseqassaaq Lars Karl Jensen, Siumut.
Lars Karl Jensen, Siumup oqaaseqartua:
Saniatigooralugu aalisarnermik inuutissarsiuteqartut qaleralinniarsinnaalernissaannik Inatsisartunut ilaasortap Manasse Berthelsen-ip siunnersuutaa Siumut-miit soqutigalugu annertuumik oqallisigaarput. Siunnersuutip qulequtaa qiviaraanni apererusunnarpoq kikkut saniatigooralugu aalisarnermik inuutissarsiuteqarpat? Qulequtaq oqallissutaasinnaagaluarpoq, uanili pineqartoq najukkani sikusartuni ukiuunerani suliffissat ajornarsineranni tapertaralugu aalisartut qalileralinnik suliffissuarnut tunisisinnaanissaat pineqarmat Siumut-miit paasilluarparput, tunisisinnaanerullu aqqutissiuunneqarnissaa Siumut-p Naalakkersuisunut inassutigaa.
Siulliullugu oqaatigilara Siumut-p tunngavigatigut anguniartuarmagu inuttaasut pisussutinik uumassusilinnik assigiimmik atuisinnaatitaanissaat periarfissaqartitaassasoq kisianni tamatumani pingaartillugu tamatuma pisuussutinut nungusaataanngitsumik ingerlanneqarnissaa.
Aalisarneq inuutissarsiutaavoq taamaallaat piniarnermik tapertaqartinneqartoq tamannalu aamma ullumikkut aalisarnermi killiffipput eqqarsaatigalugu inuutissarsiutaavoq taamatut pissuseqarneranit avissaartikkuminaatsoq, taamaakkaluartorli aamma puiortariaqanngilaq maannakkut nunatsinni suliffeqartut inuutissarsiutimik saniatigut nammineq atugassaminnik aalisarnermi piniarnermilu ingerlatsinissamik pisinnaatitaaffeqarnerat.
Maannakkut nunatta avannani qaleraleqarfissuit siunissami ullumikkutut annertusiartuinnartumik aalisarfiussappata tamatuma kingunerisassai mianersuuttariaqarlersutut nalilerneqarput tamanna Naalakkersuisut saqqummiussaqatigut takuneqarsinnaavoq tamannalu aamma avaqqukkuminaappoq, sinerissamummi qanittumi qaleralinniarneq sukkasuumik annertusiartorsimavoq tamatumalu nassatarisaanik angallatit aalisarnermi atorneqartut ima amerlisimatigaat allaat aalisarneqarsinnaasunut sanilliussinissaq pisariaqarlerluni.
Maannakkut qaleralinnik killiersuinissaq inuutissarsortunit tapersersorneqarpoq naak killilersuisoqalerpat eqqorneqartussat siulliit tassaasut inuutissarsiutigalugu aalisartut, tamakkuuppummi aamma allatulli inuuniarnikkut aammalu angallatiminnik akilersuinissamut malinnaasariaqartut taamattumillu allaat aamma ukiuunerani sikukkut aalisarnermik ingerlatisartut akilersukkanut angummanniarlutik. Aamma eqqaamasariaqarpoq sumiiffiit ilaanni suliffissuit naammassisinnaasaat qummut qaangerlugit tulaassuisoqartarmat taamatullu aamma suliffissuit sulisussaaleqilertarnerat pissutigalugu tulaassorneqartut killilersorneqartarmata.
Taamatulli oqareeraluarluta uani oqaluuserineqartumik siunnersuuteqartup avannaani inuuniarnikkut pissutsit tikkuagai Siumut-mit paasilluaraluarlugit, siunnersuuteqartup oqaatigisaa qassutit atorunnaarsinnissaannik imaqartoq tassanngaannaq eqqunneqartussatut pineqassappat Siumut-mit tamanna isumaqatiginngilarput, tassami qassutit atorunnaarsikkiartorneranut atasumik qaleralinniarnermi ningittakkat annertusiartortumik eqqukkiartuarneqarnissaat tutsuiginarnerusutut isigalugu Inatsisartuni akuersissutaareernikuummat.
Taamatullu aamma Siumut isumaqarpoq sinerissap qanittuani qaleralinniarneq pillugu nalunaarut maannakkut atuuttoq ima qeratatiginngitsoq kikkunnik tamanik mattussisutut isigineqarsinnaalluni, ippassaaninnguarmi aalisarnermut inatsisip allannguutissaa akuersissutigigatsigu aamma tassani ilanngullugu akueraarput inuit aalisarnermut attuumassuteqarnikuusut aammalu aalisartungorniartut aalisarsinnaanermut akuersissummik pissarsisinnaanerat periarfissaqartinneqassasoq.
Nunatta aningaasatigut inissisimanera pillugu ippassaq oqallinnermi Siumut-mit pingaartillugu tikkuakkatta ilagaat aningaasarsiornikkut tunngavigisatta tassalu aalisakkat tulaassorneqartut avammut tunitsivissaqarnerisa oqimaaqatigiissumik ingerlanneqarnissaat qanoq pingaaruteqartigisoq, matumani oqaluuserineqartumi aamma pingaartipparput suliffimmik saniatigut tapertaralugu qaleralinniartut tunisisinnaanerat periarfissinneqarpat siuliani oqaaserisagut aallavigalugit tamatuma oqimaaqatigiissaarinerup pingaartinneqarnissaa aammalu tunisinermi killilersuisoqartillugu inuutissarsiuteqartut aalisarnissamik salliutitaanissaat pingaartinneqassasoq.
Siumut-miit taamatut oqaaseqarluta inassutigissavarput sikusartumi tapertaralugu aalisartut ukiuunerani qaleralinnik tunisisinnaanerisa periarfissarsiuunnerat maannakkut Naalakkersuisut misissorlugu aallartissimasaat peqqissaarullugu ingerlanneqassasoq tamatumani tapertaralugu aalisarnermik ingerlatsisut qaleralinnik suliffissuarnut tunisinnaalernissaat siunertaralugu.
Siverth K. Heilmann, Atassut-ip oqaaseqartua:
Inatsisartuni ilaasartap Manasse
Berthelsen-ip saniatigooralugu aalisarnermik inuussutissarsiuteqartut
qaleralinniarsinnaallutillu tunisisinnaalernissaannut siunnersuutaa
Atassut-miit imatut oqaaseqarfigissavarput.
Atassut-miit tupiginngilluinnarparput
siunnersuuteqartup sinerissamut qanittumi saniatigooralugu qaleralinniartartut
tunisisinnaanerisa mattunneqarnerat qisuariarfigimmagu, qaleraleqarfiusunimi
ilaqutariippassuit inuuniarnermikkut aningaasarsiornikkullu tapertaralugu
iluaqatigilluarmassuk. Soorlu aamma kitaata kujasissuani
aalisagaqarluarallarmat pisuussutivut tamanit iluaqutigineqarluarsimasut.
Atassut-miit pingaartipparput piniakkat
suulluunniit soorlu nunatta avannaani qalerallit kikkunnilluunniit
iluaqutiginiarneqartariaqarnerat, kisiannili tunisassiorfitsigut pisassanillu
killilersuisoqartariaqarlertillugu qularutigineqartariaqanngilaq
inuutissarsiutigivillugu aalisartut tamatigut salliutinneqartariaqarmata,
tamannalu Atassut-miit pingaarluinnartutut isigaarput.
Siuliini oqaatigisavut aallaavigalugit,
Naalakkersuisut sinerissamut qanittumi qaleralinniarneq pillugu nalunaarutaat immikkoortut
sisamat Atassut-miit itisileqqinngikkaluarlugit taperserpagut.
Inatsisartut 1996-ip ukiaanerani, tassa
taamanikkut katersuunnitsinni, aalisarneq pillugu Inatsisartut
inatsisissaattut siunnersuutip suliarineqarnerani, Inatsisartut Aalisarnermut,
Piniarnermut Nunalerinermullu Ataatsimiititaliaa SIK-mut tusarniaanikuuvoq,
taamanikkullu inatsisissatut siunnersuutip ' 1-ip pineqartup oqariartuutaa imaattoq,
issuassavara AInatsimmi
pineqarput Kalaallit Nunaanni imaanilu Kalaallit Nunaata aalisarnikkut
oqartussaaffigisaani inuussutissarsiutigalugu inuussutissarsiutiginagulu
aalisarneq, kiisalu oqartussaaffigisap avataani kalaallit
inuussutissarsiutigalugu aalisarnerat@, issuaaneq naavoq.
Taamanikkut paatsoorneqarsinnaanngitsumik
SIK-ip ilaasortani sinnerlugit sulisartut killilersiuffigineqalernissat
akuerisinnaanngilluinnarlugu oqaatigaat, SIK-ip erseqqisaatigimmagu sulisartunit
annerpaamilluunniit nungusaataasumik aalisartoqannginnera, kisiannili SIK-ip
ajoriffissaqartinnagu oqaatigaa killilersuisoqartillugu ilaasortamik
suliffissuarnut tunisinissaannut mattunneqarsinnaanerat.
Aamma taamanikkulli Aalisarnermut
Ataatsimiititaliaq isumaqatigiissup erseqqissaatigaa, aalisagartassanik
immikkut akuersissuteqaqqaarluni aalisarsinnaanermut piumasaqaatitallit aammalu
aalisakkat suulluunniit killilersorneqartut taamaallaat
inuussutissarsiutigivillugu aalisartunik aalisarneqartarnissaat
sanioqqunneqarsinnaanngitsoq.
Atassut-miit Naalakkersuisut
isumaqatigilluinnarpagut, qalerallit iluaqutigineqarnerata piujuartitsinissaq
tunngavigalugu ingerlanneqarnissaa aammalu qaleralinniarnerup ingerlanerata
malittariuarnissaa naleqqussaajuarnissarlu avaqqunneqarsinnaanngitsoq
erseqqissaatigimmagu. Aammalu siusinnerusukkut Atassut-minngannit aalisarneq
pillugu oqallittarnitsinni eqqaasarsimavarput qaleralinniarnermi, tassa
qassusersorluni, atorunnaartitsinissamik isummamik Atassut-minngaanniit
erseqqissumik oqaatigisarsimagatsigu, qassusersornerup
atorunnaarsikkiartorneqarnissaa isumaqatigalutigu kisiannili
nigittagarsornerup aammalu atortorissaarutaasut tamakku isumannaaqqaarlugit
aamma atorunnaarsitsinissaq atsaat piumaartoq.
Taamaattorli aamma Naalakkersuisut
inatsisit iluanni saniatigooralugu aalisartut ukiuunerani qaleralinnik
piffissami aalajangersimasumi aalisarlutillu tunisisinnaanerannut
periarfissaqarnersoq misissorumammassuk Atassut-miit iluarisimaarparput.
Taamatut naatsumik oqaaseqarluta
Naalakkersuisut siunnersuummut akissuteqaataat isumaqatigalugu Atassut-miit
nalunaarutigaarput.
Johan Lund Olsen, Inuit Ataqatigiit oqaaseqartuat:
Avannaani qaleralinniarnermi
saniatigooralugu aalisarnermik inuussutissarsiortariaqartut maannamut
pisinnaatitaaffigisaminnit Naalakkersuisunit killilersuiffigineqarlutik
tunisisinnaajunnaarsinniarneqarnerata allanngortittariaqarneranik
siunertaqarluni Inatsisartunut ilaasortap Mannarsi Berthelsen-ip
siunnersuuteqarnera Inuit Ataqatigiit tunngaviatigut imaattunik oqaaseqarluta
taperserusupparput.
Siunnersuuteqartoq ilumoorluinnarpoq
oqarmat; qaleralinniarneq ilaqutariippassuarnit aasaanerinnaani
suliffeqarsinnaasunut aningaasarsiutitut tapertarineqarluartarmat -
pingaartumillu ukiukkut sikuunerata nalaani ulluinnarni inuuniarnermi
ilaqutariinnut ikinngeqisunut aamma isumalluutaasarmat.
Taamaattumik aamma tupigissassaanngitsumik
Sulinermik Inussutissarsiuteqartut Kattuffiata Naalakkersuisut
iliuuseriniagaannut akerliunerminnik takutitsiniarlutik Aalisarnermut Naalakkersuisumut
atsiornerpassuarnik apuussaqarput TV-kkut aamma isiginnaarsimasatsinnik,
neriutigivarpullu tamanna maanna siunnersuuteqartoqarneratigut
saniatigooralugu aalisartut ukiuunerani qaleralinnik aalisarlutillu kingumut
tunisisinnaanissaannut aamma aqqutissiussisumik sunniuteqarumaartoq.
Tamanna soorluuna Aalisarnermut,
Piniarnermut, Inuussutissarsiornermut Nunalerinermullu Naalakkersuisumit aamma
ammaffigineqartoq, siunnersuuteqartumut akissuteqaateqarluni oqaatigimmagu
misissornerarlugu, issuarparalu: Ainatsisit iluanni saniatigooralugu aalisartut ukiuunerani qaleralinnik
aalajangersimasumik amerlassusilinnik aalisarlutillu tunisisiinnaanerannut
periarfissaqarnersoq, tamanna tunisinermi pissutsit ajornartissanngippassuk@, issuaaneq naavoq.
Soorunami tamanna
naammagisimaarsinnaagaluarlugu Inuit Ataqatigiit oqartariaqarpugut
misissuiinnarnissaq orniginartinngilluinnaratsigu, siunnersuuteqartummi
eqqortumik oqaatigereerpaa ingammik ukiuunerani sikuutillugu inuuniarneq
ilaqutariinnut ilungersunarluinnartartoq - pingaartumik aamma nioqqutissat
akisuvallaarnerisa nalerpiaani, tassami tamakku timmisartukkut
tikiseqqaartariaqartarmata.
Taamaattumik ilungersortumik
kaammattuutigerusussavarput pissutsit tamakku aamma Naalakkersuisunit
isigimaniarneqarlutik aaqqiissuteqartoqaqqullugu - tassungalu atatillugu qaleralinniarnermi
qassutinik kivisittakkanik atuisariaqarnerup siusinnerusukkut
ajornartitaalersinnaanissaa ilanngullugu aamma nalilersuiniartoqaqqullugu.
Maannamummi ukiut kiisa arlerpai qassusersortariaqarnerup
qimakkiartulertariaqarneranut oqalorusaarnersuarmut - naak aamma Qeqertarsuup
tunuani Uummannamilu qaleralinniarnermi mianersoqqusisoqareeraluartoq.
Taamatuttaaq nalilersuinermi
akissaatikinnerpaat periarfissaminnit mattunneqannginnissaat siunertaralugu
isertitaqqortussuseq aallavigalugu qaleralinniarsinnaatitaanermut taamatullu
tunisiuarsinnaanissamut ammaassisumik aaqqissuussiniartoqassasoq Inuit
Ataqatigiit-niit isumaliutigeqqussavarput, kommunit qaleraleqarfiusut
aningaasarsiornikkut periarfissaannik akornusiivallaanngitsumik aamma tamakkiinerusumik
iluarsiiniartoqarsinaaqqullugu.
Taamatullu oqaaseqareerluta Inuit
Ataqatigiit siunnersuuteqartoq tunngaviatigut isumaqatigigatsigu
nalunaarutigivarput.
Bjarne Kreutzmann, Akulliit Partiiat:
Paasivara, saniatigooralugu aalisartut
qaleralinnik aalisarnissaannut tunisisarnissaannullu akuersisarnissaminnik
Naalakkersuisut maannakkut eqqarsaateqanngitsut, aamma Naalakkersuisut maanna
misissuilersut, saniatigooralugu aalisartut ukiuunerani qaleralinnik
aalajangersimasumik amerlassusilinnik aalisarlutillu tunisisinnaanerannut
inatsisit iluanni periarfissat suunersut - tassa tamanna tunisinermi pissutsit
ajornartissanngippassuk.
Taakkua taamatut paasillugit
taamaalillunga saqqummiunneqartoq tusaatissatut tiguara.
Anthon Frederiksen, Kattusseqatigiit:
Upernaaq manna ataatsimiinnitsinni
oqaluuserisassani immikkoortoq 25, tassalu aalisarneq pillugu Inatsisartut
inatsisaata nr. 18, oktober-ip 31-ni 1996-meersup ilaatigut ' 6, immikkoortoq 5 nr. 2-ip 3-llu
allanngortinneqarnerisigut piumasaqaatit qasukkarneqarnissaat akuersissutigineqarpoq.
Matumanilu apeqqutaaginnarpoq
Naalakkersuisut piumasaqaatinik qasukkaanissami nalunaarusiornikkut qanoq
piumassuseqartiginersut.
Nunatsinni aalisarneq inuutissarsiutit
suli pingaarnersaraat, taamaattumik aalisarnerup isumannaatsumik
aaqqissuunneqarnissaa Kattusseqatigiit-niit aamma aalisartut isumaat
tunaartaralugu ingerlanneqassasoq pingaartipparput, minnerungitsumik aamma
aalisagaqassutsimut naapertuuttumik aalisarnerup ingerlanneqarnissaa siunertaralugu.
Taamaattumik imartatsinni aalisakkat
ilaatigut ikiliartornerat taamaakkallartillugu Kattusseqatigiit-niit
akuersaaruminaatsipparput aalisarneq killeqanngitsumik kikkunnut tamanut
aammaallugu ingerlanneqassasoq. Soorunami aalisarnermik inuutissarsiuteqartut
sutigut tamatigut salliusariaqarput, kisianni qaleralinniarnermut
tunngatillugu, inatsisartuni ataasiarnanga, aamma upernaaq manna
oqaatigisarpara; inuutissarsiornerup ajorsinerani, tassalu ukiukkut,
pingaartumik avannaani sikusartumi qaleraleqarfiusuni, raajaleriffiit
suliffissuit matunerisigut sulisartut suliffissaaruttartut, piffissami
suliffissuit matoqqanerisa nalaanni, ningittakkersorlutik
inuutissarsiortarnerisa mattunneqannginnissaat illersorneqarsinnaasariaqartoq.
Ilanngullugulu oqaatigilara inatsisip
pineqartup siusinnerusukkut allangortinneqarneranut tunngatillugu
Kattusseqatigiit-ninngaanniit oqaatigisarsimasakka tusaniarneqarsimasuugaluarpata
maannakkut allanngortitsiniarnermi siunnersuut
saqqummiunneqassanngikkaluarmalluunniit.
Taamaaliornikkut inunnik isumaginninnermut
aningaasartuutit, tamatta sapinngitsamik ikinnerpaaffissaaniitikkusutavut,
tamattalu aalisartuugutta sulisartuuguttaluunniit akileeqataaffigisartakkavut,
sipaarneqarsinnaammata qularanngitsumik kissaatigaarput, taamaattumik
ingasattajaarussilluni killilersuinerup aappaatigut annertuumik
apeqqusertariqarnera aamma ilanngullugu eqqarsaatigeqquara.
Tamaammat Inatsisartunut ilaasortap Manasse
Berthelsen-ip siunnersuutaa, pingaartumik aamma ukiuunerani inuit
suliffissaaruttartut eqqarsaatigalugit aammaarlunga taperserpara.
Paaviaaraq Heilmann, Aalisarnermut, Piniarnermut,
Nunalerinermullu Naalakkersuisoq:
Immaqa partiit oqaaseqartui Kattusseqatigiit-llu
oqaaseqartuat ataatsimoortumik akisinnaavakka, - immaqaanngitsoq,
akisinnaavakka.
Tassa Naalakkersuisuni akissuterput
aammalu Inuit Ataqatigiit-niit Johan Lund Olsen-ip oqaaseqartup TV-kkut
saqqummersimaneq pillugu innersuussutaa aamma innersuussutigalugu
oqaatigisimagakku Naalakkersuisuniit
ammaffigigipput ukiuunerani, aasakkut ukiuunerani suliffissaaruttartut
sulisartut periarfissinneqarnissaannik aaqqiinissaq. Taannalu aamma siunniupparput
aamma atuutilerfissarigalua maj-ip aallaqqaataa nalunaarutip nutaap
atuutilerfissaa juli-ip aallaqqaataanut kinguartissimavarput, akuersissutinik
agguaanissamut periarfissat kinguaattoorutaaneri pissutigalugit.
Naalakkersuisut sukaterisimaneq
tunngaveqartippat 1994-mi, soorlu aamma akissuteqarninni oqartunnga, 1994-mi
aalisarneq pillugu isumasioqatigiinnermi, tamatumalu kingunerisaanik aamma
aalisarnerup annertusiartorsimanera aammalu aalisakkanik misissuisut ukiup
kingulliup siuliini nalunaarutigisimasaat, ukiut kingullermi
nalunaarutaasuninngaanniit sakkortunerujussuit tunngavigalugit nalunaarusiassaq
suliarisimavaat. Kisianni nalunaarutip naammassineranut, qujanartumik,
qaleralinnut aalisakkanik misissuisut nalunaarutaat siusinnerusuminngaanniit
qasukkarsimavoq, imaluunniit pitsanngoriarsimavoq qaleraleqassuseq isigalugu
oqassagaanni. Taamaattumik tassa taamatut ammanerulernermi Naalakkersuisut
oqariartornerat, tassa ukiuunerani saniatigooralugu qaleralinniartartut aamma
tunisisinnaalernissaat taanna sikutinnagu aaqqiiffigissagipput, taanna matumani
neriorsuutigissavara.
Annerusumik immikkut partiit
oqariartorfigerusunngilakka, tassami akissuterput Naalakkersuisuniit partiinit
qanillattorneqarmat, imaluunniit taperserneqarmat amerlanernit. Aammalu oqareernittut
neriorsuutigigatsigu Naalakkersuisuniit sikutinnagu tamatumap aaqqiiviginissaa
isumagissagatsigu.
Lars Karl Jensen, Siumut:
Uani ersarissaatigilaaginnassuara
Siumut-minngaanniit oqaaseqaatitsinnut tunngatillugu qassutit eqqagatsigit,
taakkua atorunnaarsikkiartornissaannik aaliangiussisimaneq Siumut-minngaanniit
ataqqerusupparput peqqutigalugu Inatsisartut Aalisarnermut Ataatsimiititaliaata
isumaliuutissiissummini annertuumik taakkua sammereernikuummagit.
Taavalu aamma nuannaarutigivara
Naalakkersuisup naak akissuteqarnini uunga oqaluuserisassanngortitsisumut
taareeraluaraa ukiuunerani suliffissat ajornarsitillugit tunisisinnaanermut
periarfissiinissaq mianersukannersumik ingerlatikkusukkaa paasigakku.
Qassutit uterfigeqqissagukkit qassutinik
kivisittakkanik atuineq taanna sinerissami assigiinngittutigut soorunami
misilittagaqarfiuvoq iluaqutaaneri illersorneqartarput ajoqutaanerilu aamma
assortorneqartarlutik.
Maannakkumut kommunit qaleraleqarfiit
aamma ilaat, Upernaviup kommunea, kommunalbestyrelsip aaliangersagaasigut
maleruagaqqusaasigut taamaattumik peqareerput. Uani siunnersuuteqartoq
assortornianngikkaluarlugu, tassalu Manasse Berthelsen-i, qassutinik
tunngasumik oqaaseqarnera isumaqarpunga kommunimi aalisartut uagut
ataqqiniarsimagigut kattuffiup oqariartuutaa aallaavigalugu, Aalisarnermut
Ataatsimiititaliaminngaanniit, tassa qassutit ullormiit ullormut
atorunnaarsinneqarpata taarsiineqarnissaa avaqqunneqarsinnaangitsoq, kisiat
atorunnaarsitsiartuaarnikkut taakkua oqilisaanneqartussaapput aamma piniutinik
nikisitsisussat.
Qularnanngilaq Uumannami taanna
piumasaqaataalluinnarpoq aamma Namminersornerullutik Oqartussat inatsisaat
utaqqinngikkaluarlugu atuutilernissaa, taassuma kommunalvedtĉgt-kkut,
peqqussutikkut eqqunneqarsinnaanerpoq. Oqaaserisatsinnik taakkua
ersarissaatigilaaginnarpakka.
Manasse Berthelsen, Inuit Ataqatigiit:
Siullermik qujassutigissavakka
siunnersuutinnut partiit kattusseqatigiillu oqaaseqareernermin- ni
tamakkiisumik tapersiillutillu affarmik tapersiinerat.
Inuit Ataqatigiit-ninngaanniit
oqaaseqarnitsinni ilanngullugu agguaapparput Uummannap illoqarfiani
ataatsimiisitsisimanermik tusagassiutitsigut nalunaarutaasimasoq, tassani
allassimavoq Ataamaalilluni
kommunip naatsorsuutigisinnaavaa annertunerusumik isumaginninnikkut
aningaasartuuteqalernissaq nalunaarutip nutaap atuutilernerata nassatarisaanik@.
Tassani apeqqusertariaqarpoq
killilersuiniarnermi suut salliutinneqassanersut, inuiaqatigiit ataatsimut isigalugit
imaluunniit inuutissarsiuteqartut ataatsit isigiinnarlugit, imaluunniit
kattuffik ataasiinnaq isigiinnarlugu. Tassani oqimaaqatigiissaarineq
isumaqarpunga nalilersorneqaqqittariaqartoq, taamaalilluni inuiaqatigiinnut
tamanut isiginnilluni killilersuineq ingerlanneqarsinnaasuuppat. Uani
killilersuinermi siulliullugit saniatigooralugit aalisartut eqqorneqarput,
kisiannili qiviarneqarsimanngilaq annerusumik qassusersorluni kivisittakkanik
aalisarneq.
Taanna Inuit Ataqatigiit oqaaseqarnermini
oqaatigaat qangalili eqqunniarneqaraluartoq, kisiannili kinguartitseriarnikkut
taavalu aatsaat massakkut 2000-i aallaqqaataata tungaanut kinguartinneqarluni.
Kisiannili soorlu Lars Karl Jensenip
oqaatigisaa kommunini marlunni massakkut qassusersorneq inerteqqutaatinneqarpoq,
tassa Upernavimmi tunumilu Tasiilami. Taakkua kissaatigisimanngilaat
aalisakkanik aalisarneqapilunniissaat. Taamaattumik paasiuminaatsippara sooq
taamak tunuarsimaarfigineqartsigisoq naalakkersuisuniit qassusersornerup
piaarnerusumik atorunnaarsinneqarnissaata. Tassani ilaatigut pasinarsinnaavoq
kattuffik ataaseq isiginerullugu isummersimaneq inuiaqatigiit ataatsimut isiginagit.
Aamma Lars Karl Jensenip oqaaseqarneranik
tupigikujuppara ippassaani nunatta aningaasaqarnikkut ingerlaneranut
tunngatillugu oqaaseqarnermini erseqqissumik oqaatigaa qaleraleqarfiusut
qaleraleqarluartut annertunerusumillu aalisarneq ingerlanneqarluarsinnaasoq
ilimagalugu.
Naalakkersuisumut apeqqutigissavara ukua
iliuuserineqartut sisamat saqqummiussai, tassa angallatit pisaqarsinnaassusaat,
tassa aalisariuteqarnerup pisaqarsinnaassusaat unitsinnerarlugu, tassani
aperisariaqarpoq aamma nutaanik anginernik angallatitaarnissaq
unitsinniarneqarnersoq? Tassami taamaaliortoqanngippat takusinnaanngilara qanoq
killilersorniarneqarnersoq imaluunniit pisaqarsinnaassutsip
uninngatinniarnissaannut?
Paaviaaraq Heilmann, Aalisarnermut, Piniarnermut,
Nunalerinermullu Naalakkersuisoq:
Ilumulli siunnersuuteqartartut ilaat
atuagassatik atuariarlugit siunnersuuteqartartuugunik tusarnaagassatillu
tusarnaareersimallugit siunnersuuteqartartuugunik taava pisariaqanngitsunik
oqallinneq pisassanngikkaluarpoq.
Aamma oqaaseqartoq kingulleq
eqqarsaatigalugu siunnersuuteqartoq Manasse Berthelsen kattuffik ataaseq,
kattuffik kisiat aallaavigalugu tusarniaaneq pisimasoq, imaluuniit piumasaqarnera,
aamma eqqaamasaqarpugut maani inimi siunnersuuteqartup partiiata
pingaartilluinnagarigaat kattuffiit tusarniarneqartarnissaat. Taanna imminut assortuutilaarpoq.
Aammalu oqaatigivaa kingulliip
oqaaseqartup eqqorniarneqartut siulliit tassaasut saniatigooralugu,
isumaqarpunga Manasse-ip nalunaarut atualaartariaqaraa, eqqorneqartussat
annertunerpaamik tassaasut aalisarnermik inuutissarsiuteqartut. Aalisanermik
inuutissarsiuteqartut kattuffiata inooqataaffigivaa ilaasortatik
killilerneqassammata qaleralinniaqataasinnaalersussat, tassa kattuffik
akisussaassuseqartumik iliortoq, taamaattumik nuannaarutigaara, kattuffik
tassuunakkut ilaasortatik eqqorneqaraluartut. Kisianni piffissaq sivisunerusoq
eqqarsaatigalugu qaleralinniarnerup aamma iluaqutigijuarnissaa
eqqarsaatigalugu ilaasortanilluuniit eqqorneqaraluarpata taamatut
inooqataarusummata killiliinissamik. Inuutissarsiuteqartut
qaleralinniarniarnermik ingerlatsisinnaasut aalisartut killilerniarpagut uani
aamma killilerneqarput.
Oqimaaqatigiissarineq sunaava,
oqimaaqatigiissarineq tassani aamma oqaatigineqassappat eqqaamaneqartariaqarput
aatsaaginnaq oqaatsikka, aalisartut tassaapput uani sakkortunerpaamik
eqqorneqartut.
Qassutit eqqarsaatigalugit aamma
Lars Karl Jensenip Siumut-meersup oqaatigisaa tassa ilumoorpoq qassutit
atorunnaariartornissaat tassuunakkut Naalakkersuisut siunniussaqarsimammata,
tassunga tunngatillugu oqaatigissavara ukiorpassuarni, uku Naalakkersuisut aamma
sioqqullugit, aammalu Inatsisartut uku massakkut ilaasortaasut sioqqullugit,
inimi maani oqallittoqartarsimammat qassutit pillugit. Aamma nalunngilara
gruppet ataatsimiitarfianni annertuumik oqallinneq tassunga tunngasoq
pisarsimasoq, kisianni inerneqanngitsumik siunnersuuteqanngitsumik
aaliangiussaqanngitsumik siunniussaqanngitsumik.
Massakkut Naalakkersuisut ukua,
Naalakkersuisoqatigiit, siunniussaqarput taasaqarlutik kattuffinnik
oqaloqatiginnereernermikkut, januarip aallaqqaataani 2000 qassutit kivisittakkat
qaleralinniarnermi atorunnaassasut. Taannalu kattuffinni aamma
oqaloqatiginninnikkut pisimavoq. Aammalu tassunga tunngatillugu oqaatigissavara
qaleraleqassuseq suli taamanikkornissamut ajornerulissagaluarpat taava
siusinnerusukkut qassutit kivisittakkat atorneqartarneri atorunnaarsinnissaat
periarfissaasoq.
Aamma eqqaasissutigissavara qassutit
eqqarsaatigalugit manna tikillugu qassutinik ESU aqqutigalugu atukkiisarsimaneq
pisarsimavoq, aamma takkua inuutissarsiutigut suliluunniit assigiigissutigut
killilersuisoqartussaatillugu taava aamma inuutissarsiortut eqqorneqartut
periarfissinneqarnissaat isiginiarneqartarpoq. Uani taanna isiginiarsimavarput.
Taamaattumik neriuppunga
siunnersuuteqartoq aamma naluaarut atuarluariarlugu matuma kingorna aamma
isummersoqqikkumaartoq.
Naalakkersuisut siunniussatik tassa
siullermik qassutit eqqarsaatigalugu januar-ip aallaqqaataa ukioq 2000-ju
paasivara partiit siusinnerusukkut aamma maani annertunerusumik eqqartorneqartareersimammat,
ilaleraat taanna suli siunniunneqassasoq amerlanerusut. Taavalu ukiup tungaanut
Naalakkersuisut nalunaarummik allannguinissamik siunniussaqarnerat
taperserneqartoq aamma paasivara, taamaattumik taakku tunngavigalugit
sulissaagut Naalakkersuisuni.
Anders Andreassen, ataatsimiinnermik aqutsisoq,
Inatsisartut Siulittaasuat:
Isumaqarnerput Naalakkersuisut
akissuteqarnerminni piumassuseqarpaluttumik nipeqartut aammalu suliap
ingerlanerani aamma malinnaanissaminut, taavalu aamma misissuilluarnissamik
neqerooruteqartut.
Siverth K. Heilmann, Atassut:
Maanga qaqivunga neriuutigigakku
oqallinnerujussuaraasiit pissanngitsoq isumaqarpunga aamma Naalakkersuisunut
ilaasortaq akissutigisai uteqqittariaqanngitsut, erseqqilluinnaqqissaartumik
paatsorneqarsinnaanngitsumillu tamatta siunnerfigisariaqarparput
paasigaluarlugu siunnersuuteqartup tunngavia, kisiannili tunisassiassat
pisassat tunitsiviillu imatut killeqartigitillugit kikkut illersussagatsigit
salliutillugit? Inuutissarsiutigivillugu aalisartut taakkuuku siulliullutik
salliutinneqartariaqartut, taanna kialluunniit assortartariaqanngilaa.
Soorunami ukiuunera aqqutissiuussinearneq
aamma taanna uteqqinngikkaluarlugu tamatta taperserparput, pisassat nunguppata
kikkut eqqorneqassappat? Tassaapput aalisartut. Aamma qassusersornermi
aaqqissuussineq oqallisigijuagarput kommuneni assigiingitsuni ilaatigut
piffinni assigiingitsuni qassusersorneq inerteqqutaasareerpoq aamma
atorunnaarsikkiartorneqarneranut Aalisarnermut Ataatsimiititaliaminngaannit
oqaatigisagut taakku piviusungussaqqaarput. Aalisartut piniartullu kattuffiat
allallu tassani suleqataasariaqarput, suleqataajumaarpullu
isummersueqataajuarlutillu.
Annertuuliutigingikkaluarlugu
eqqaasissutigaara aamma IA-ip Aalisarnermut Ataatsimiititaliaani
suleqatigilluartagarput isumaliuutissiissut <96-mi Aalisarnermut Ataatsimiititaliami
suliarigatsigu atsioqataanikuuvoq uanga issuakkannik aatsaanginnaq kattuffinni
tusarniaanitsinni, qanoq SIK-ip isummersimanera paatsorneqarsinnaangitsumik,
taannalu uteqqissanngilara, tassa paasilluarmassuk.
Allatut ajornartillugu
killilersuisoqartariaqartalertillugu taava aalisartut taakku salliutinneqassammata.
Isumaqarpunga taannaluunniit naammakkaluartoq.
Manasse Berthelsen, Inuit Ataqatigiit:
Naalakkersuisunut ilaasortamut
ilisimatitsissutigissavara aap nalunaarut atuarnikuuvara taannalu
tunngavigalugu siunnersuuteqarsimallunga.
Una aatsaannguaq eqqaasara, nalilersuineq
oqimaaqatigiissaarineq, pisanik killilersuiniarnermi tulleriiaarinissami
sorliinukua sakkut atorlugit killilersimaartitsisoqassanersoq uanilu qassutit
kivisittakkat eqqaasimavakka, ilumut naapertuilluarneruvaa? Tapertaralugu
aalisartut siulliullugit eqqorneqassappata qassusersortut ingerlatiinnarlugit?
Qassusersorunnaaraluarunimmi aamma aalisartut suli pisaqartuartussaapput.
Taamaammat siammasinnerusumik iluaqutaanissaat tassani ujartorpara.
Apeqquteqaatiga siullermik oqaaseqarama
Naalakkersuisup akinngimmagu apeqqutigeqqissavara, tassa aalisarsinnaassutsip
Ilulissani Uumannamilu nikisinneqannginnissaa, tassa imatut isumaqarnerluni
umiatsiaararsortut angallammik anginermik aalisarsinnaanerusumik pisaqarsinnaanerusumik
pinissaat mattunneqarnersoq taamaalilluni?
Taamaammat aamma
assersuutigilaaginnassavara Naalakkersuisup oqarnera Naalakkersuisoqatini ukua
massakkut aaliangertut, aap aaliangersimapput qangalili
kinguartittaqattaarluguli. Kisiannili kommunit qujanartumik ilaqarpugut
paasinnissimasumik ajornartorsiummik, tassa qassutit kivisittakkanik
Upernavimmi qangalili atorneqarunnaarsimapput aamma Ammassalimmi
qaleralinniarneq aallartimmat takusinnaareersimavaat qanoq taakkua aalisariutit
qassusersorluni ajoqutaasinnaanerat paasillugu inerteqqutaalersisimallugit.
Paaviaaraq Heilmann, Aalisarnermut, Piniarnermut,
Nunalerinermullu Naalakkersuisoq:
Sakkut sorliit atorlugit killilersuineq
imaluunniit pisanik pisaqarsinnaanerup killiliiffigineqarsinnaanera, taanna
isumaqarpunga siusinnerusukkut akereeriga taanna uterfigeqqissanngilara. Unali
soorlu angallateerarsortut anginerusumik angallataarniarluni
qaleralinnuumminik, taanna pisaarniartoq, taanna apeqqut tassunga tunngatillugu
oqaatigissavara, licens-lersuineq eqqunniarparput juli-ip aallaqqaataani.
Tassuunakkut aqqussinnaassavagut qinnuteqartut ataatsiakkaarlugit kikkut
qaleralinniarnermut qanoq ittumik angallamik atorlutik iserniarnersut. Taakku
aqutsissutaassapput siusinnerusukkut, imaluunniit manna tikillugu
kikkulluunniit imaalitsiaannaq qaleralinnialersinnaapput.
Taannaana aalisartut taakkua
killilerniarigut imaalitsiaannaq qaleralinniarnermut akuulersarput. Ilaatigut
soorlu assersuutigalugu immaqa 20 tons-eq raajarniut pisassiissaminik
tunisisimappat taava imaalitsiaannaq massakkut periarfissaqarpoq qaleralinniarnissaminut
akuulersinnaasaminut. Taakkua matulerliarlugit aqussinnaalerniarlugit
tassuunakkut aqussavagut.
Taamaattumik qaleraleqassutsip
nalilersortuarneqarnerani nalunaarutaasut aammalu aalisartut namminneq
nalunaarutigisaat kattuffitsik aqqutigalugu, taakkua
malinnaaffigeqqissaarneqassapput. Aammalu sumiiffinni
qaleralinnialersinnaanermi akuersissummik pisaarniartut aalisartut
peqatigiiffii aqqutigalugit kattuffiillu aamma aqqutigalugit
nalilersortartussaavagut, taamaattumik tassuunakkut aqunneqalereertussaapput.
Taavalu oqaaseqartup kingulliup aamma
oqaatigisaa, siunnersuuteqartup, kommunit ilaat paasinnissimapput, taava
kommunit ilaat paasinnissimanngillat. Qassusersorneq eqqarsaatigalugu.
Naalakkersuisuni pingaartissimavarput atuisut aammalu ESU-mi
akilersugassarsillutik qassutitaarsimasut tamakkua periarfissinneqarnissaat,
massakkut ESU kalerrinneqarpoq Naalakkersuisut imaattumik siunniussaqarput,
januar-ip aallaqqaataani 2000-mi qassusersorluni qaleralinniarnerneq
inerteqqutaalissasoq. Taava ESU-ip soorunami eqqarsaatigisariaqarpaa ilumut
aalisartoq qassutinik akiligassarsissanerlugu, nalunagu uffa januar-ip
aallaqqaataani 2000-mi qassusersorneq atorunnaartussaasoq.
Taamaakkami tassuunakkut Naalakkersuisuni
isumaqarpunga akisussaasuseqartumik aammalu aalisartut aalisarnermik
inuutissarsiuteqartut tassuunakkut periarfissillugit aaqqisimaneq, neriuppunga
nutaamik assortuussutigineqaqqissanngitsoq.
Anders Andreassen, Ataatsimiinnermik aqutsisoq, Inatsisartut
Siulittaasuat:
Taamaalilluni ullumikkut oqaluuserisassaq
immikkoortoq 52, tassalu saniatigooralugu aalisarnermik
inuussutissariuteqartut qaleralinniarsinnaalernissaannik siunnersuut
oqaluuserineqarnera naammassivoq.
Oqaluuserisaq naammassivoq.