Kalaallit Nunaanni Inatsisartut

Oqaluuserisassani immikkoortoq 05-1		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Ullut ataatsimiiffiusut arfersaneq aappaat, tallimanngorneq, 10. maj 2002 nal. 16:10

 

Oqaluuserisassaq immikkoortoq 5

 

Aningaasanut inatsimmi kontumut 87.72.10-mut, Nuummi sulisunut inissiat, suliassat tunngavigisaata allanngortinneqarnerat pillugu Inatsisartut aalajangiiffigisassatut siunner­suut.

(Ineqarnermut, Attaveqarnermut Pilersuinermullu naalakkersuisoq)

(Siullermeernera)

 

Jørgen Wæver Johansen, Ineqarnermut Pilersuinermut Attaveqarnermullu naalakkersuisoq, Siumut.

Aningaasanut inatsimmi kontumut 87.72.10-mut, Nuummi sulisunut inissiat, suliassat tunngavigi­saata allanngortinneqarnerat pillugu Inatsisartut aalajangiiffigisassatut siunnersuut.

 

Naalakkersuisut Inatsisartut Aningaasaqarnermut ataatsimiititaliaat qinnuteqaateqarfiginikuuaat suliassamut pineqartumut tunngavigisat allanngortinneqassasut, aammalu Nuummi sulisunut inissialiornissamut atatillugu aningaasaliissutigineqareersut 2,5 mio.kr.-inik ilaneqassasut.

 

Aningaasaqarnermut ataatsimiititaliap suliap ingerlateqqinnissaa Inatsisartuni oqaluuserisassatut innersuussutigaa, tamatumani pineqartoq tunngavissiissuullunilu aningaasartuutissatigut anenrtugi­neqarmat.

 

Naalakkersuisullumi suliassaq matumani pineqartoq Inatsisartunut tamanna tunngavigalugu oqaluuserisassanngortippaat.

 

2001-imut Aningaasanut inatsimmut atatillugu aalajangiunenqarpoq sulisunut inissiat katillugit 93-it Nuummi Dronning Ingridip Napparsimavissuata eqqaani sanaartorneqassasut 113 mio.kr.-inik aningaasaliiffigineqarlutik.

 

Suliassap ilaa tassaavoq inissiat nutaat 77-it blokkini sananeqassasut.

Aappaa tassaavoq blokkimik pioreersumik piiagassaalersumillu piiaanissaq, taamatullu tassani inissianik nutaanik 16-inik sanaartortoqarnissaa.

 

Suliassat taakku marluk pilersaarusiornerat 2001-imi ingerlanneqarpoq, tassanilu paasinarsivoq inissiat sanaartorneqarsinnaasut amerlassusissaat Aningaasanut inatsimmi taaneqartut malillugit sanaartorneqarsinnaanngitsut.

 

Naalakkersuisullu Aningaasaqarnermut ataatsimiititaliamut tamanna pissutigalugu qinnuteqaateqar­put inissiat katillugit 75-it 115,5 mio.kr.-inik naleqartussat sanaartorneqarsinnaanissaat akuereqqul­lugu, pilersaarutaareeraluartutut inissiat 93-it 113 mio.kr.-inik naleqartussat pinangit. Naalakkersui­soqarfimmilu suliassat pineqartut teknikikkut siunnersuisartut peqatigalugit tamatuma kingorna nutaamik nalilersorneqarput assigiinngitsunillu misissuilluni ingerlatsisoqarpoq, tamatumani Inatsisartunut allatigut periarfissaasinnaasunik saqqummiussisoqarsinnaanissaa siunertaralugu.

 

Suliassap aappaa blokkini inissianik 77-inik sanaartortoqarnissaanik imaqartoq taamaasilluni nutaamik sukumiisumillu nalilersuiffigineqarpoq. Tassanilu paasinarsivoq pineqartoq tassa inissiat 77-it periarfissatut piviusorsiornerunngitsoq. Akerlianillu periarfissaatinneqarpoq inissiat 71-it sanaartorneqarsinnaanissaat. Inissiammi 77-iunissaat aalajangiusimaannarneqassappat suliassaq nutaarluinnarmik pilersaarusiorqqinneqartariaqassaaq ikinngeqisunik immikkut aningaasarttuute­qarfiusumik kinguattoorfiusussamillu, taamatullu inissiat arfinillit saniatigut sanaartorneqarsinnaa­nissaannut naapertuunnavianngitsunik, tassa aningaasartuutitai.

 

Soorlu siuliani taaneqareersutut suliassap aappaa tassaavoq pioreersumik piiaasoqarlunilu inissisimaffimmi imaluunniit sumiiffimmi pineqartumi nutaamik nappaasoqarnissaa. Tassani inissiat 16-it uiggiunnissaat / pilersinnissaat inissaqartinneqanngilaq. Suliaq pilersaarutaasoq malillugu inissiat naapertuussaruminartutut aaqqissuussat, pisriaqartitsineq malillugu blokkimi tassani arfineq-marluussanersut imaluunniit aqqaneq-marluk angullugit amerlassuseqassanersut toqqarneqarsinnaassaaq, matumanilu aqqaneq-marluunissaat taaneqarsimalluni. Ilutigalugulu nalilerneqarpoq qaavatigut 0,5 mio.kr.-inik aningaasaliissuteqaqqittoqarnissaanik qinnuteqarsima­galuarneq pisariaqassanngitsoq atussallugu.

 

Misissuinerit taamaalillutik ataatsimut takutippaat inissiat 83-it 115 mio.kr.-inik akeqartussat Dronning Ingridip Napparsimavissuata eqqaani sanaartorneqarsinnaassasut. Tassalu sulisunut inissiat 83-it pisariaqartinneqaqisut taamatullu Nuummi pisortat suliffeqarfiutaasa eqqaanni qitiusumik inissisimasussat.

 

Taamatut oqaaseqarlunga Inatsisartunut Naalakkersuisut sinnerlugit qinnuteqaatigaara missinger­suutinut ilanngussassaq 2 mio.kr.-inik aningaasartalik ilanngunneqartoq Inatsisartut 2002-imut ilassutitut aningaasaliissutinut inatsisissaannut ilanngunneqassasoq.

 

Matumanissaaq teknikimut tunngasunik nassuiaasiaq innersuussutigissavara, oqaluuserisassamut matumunnga atatillugu aamma agguaanneqartoq.

 

Aammattaaq Inatsisartunut ilisimatitsissutigissaara inissiat pineqartut 71-it napparneqarnissaasa kingunerissammassuk Qaqiffiup maanna illuutaata piiarneqarnissaa, taamaasilluni nutaamik illusitinneqarnissaanut atatillugu malitsigisaasunik aamma aningaasartuuteqartoqartussaassaaq. Sulili aaqqiivigineqanngilaq nutaamik illusititsinissaq qanoq aaqqinneqassanersoq.

 

Imaassinnaavoq illumik pioreersumik pisisoqarlunilu nutarterisoqartoq imaluunniit nutaarluinnar­mik sanasoqartoq. Taassumalu saniatigut inaarutaasumik aaqqiissuteqartoqarnissaata tungaanut illumik utaqqiisaagallartumik attartortoqartariaqassaaq.

 

Nutaamillu sanaartottoqarnissaanut imaluunniit pisisoqarnissaanut / nutarterisoqarnissaanut aningaasartuutissat 8-9 mio.kr.-it missaaniissangatinneqarput. Utaqqiisaagallartumillu illusisitsinis­saq ilimagineqarpoq qaammammut 60.000 kr.-inik akeqarumaassasoq. Pineqartut pillugit erseqqinnerusumik aaqqiissuteqarnissaq Peqqinnissamut Pisortaqarfiup 2003-mut Aningaasanut inatsisissatut siunnersuutissamut atatillugu tulleriiaarinermut ilanngukkumaarpaa.

 

Matumani siunnersuut Inatsisartut akuersissutigissappassuk inissiat pineqartut aqqaneq-marluk suliarinnittussarsiuunneqartsinnaalisapput, sanaartornerlu 2002-imi augustusip qaammataani aallarnerneqarsinnaassalluni.

 

Inissiat allat 71-it pineqartut nutaamik naleqqussarlugit pilersarusiuunneqassapput, taamatullu augustusip qaammataani suliarinnittussarsiuunneqarsinnaassallutik, tassa 2003-imi sanaartornissaat siunertaralugu. Taamatut taamaalillunilu piffissaliussat nikinnerat pineqartut atulersinnissaannut sunniuteqarnavianngilaq, tassami suli naatsorsuutigineqarmat tamanna 2004/05-imilu pissasoq.

 

Anders Andreassen, ataatsimiinnermik aqutsisoq, Siulittaasup tulliata aappaa, Siumut.

Ja qujanaq. Maannalu Partiit, Kattusseqatigiit, Attaviitsullu oqaaseqartussai oqaaseqasapput, siulliulluni oqaaseqassaaq

 

Mikael Petersen, Siumut:

Qujanaq. Nuummi siunissamut inissaliornissaq pillugu 2002-mut aningaasanut inatsikkut tunngavigisat allanngortinneqarnissaat pillugu aalajangiiffigisassatut siunnersuut Ineqarnermut, Attaveqarnermut Pilersuinermullu Naalakkersuisunut saqqummiunneqartoq Siumumiit imaattumik oqaaseqarfigissavarput.

 

Aalajangiiffigisassatut siunnersuut saqqummiunneqartoq Naalakkersuisup oqarneratut Aningaasa­qarnermut Ataatsimiititaliamit sammineqarsimavoq, Inatsisartunullu piumasaqaatitalimmik ingerlateqqinneqarnissaa Aningaasaqarnermik Ataatsimiititaliamit suliarineqarsimalluni.

 

Naalakkersuisut matumani saqqummiussami tunngavilersuutigisaat Siumumiit paasilluarpagut  taamaattumillu siunnersuutip aappassaaneerneqannginnerminit Aningaasaqarnermut Ataatsimiitita­liamit nalilersorneqarluarnissaa piumasarissallutigut.

 

Suliap ingerlanneqarnissaanni Siumumiit Aningaasaqarnermut Ataatsimiititaliamut makku ilanngullugit misissoqqissaaqqullugit inassutigissavagut.

 

Sanaartugassatut pilersaarutaasussa­tut siunnersuutigine­qartut kvadratme­teritut naligisinnaa­saata naliliiffigillu­arnissaa misissoq­qissaaqqussavarput.

SANA-p eqqaani sanaartugassat ilaa­tigut kingunerissa­vaat Qaqiffiup ullu­mikkut atorluarne­qaqisup isaterneqar­tariaqalernera. Ta­mannalu pillugu Siumumiit kaam­mattuutigissavarput nutaamik Qaqiffim­mik pilersitsinissa­mut periarfissat Nuup Kommunea peqatigalugu naam­massiniaqqullugit.

Ilanngullugu Siu­mumiit piumasaris­savarput inissiassat 83-iusut naammas­sippata piginneqati­giilluni inissiann­gortinneqarsinnaa­nerat ilanngullugu Naalakkersuisut misissuiffigissagaat.

 

Taamannak oqaaseqarluta aalajangiiffigisassatut siunnersuutip aappassaaneerneqannginnermini Aningaasaqarnermut Ataatsimiititaliamit suliarineqarnissaa inassutigaarput.

 

Anders Andreassen, ataatsimiinnermik aqutsisoq, Siulittaasup tulliata aappaa, Siumut.

Qujanaq. Tulliulluni oqaaseqassaaq Jakob Sivertsen, tulliukkumaarpoq Johan Lund Olsen Inuit Ataqatigiit.

 

Jakob Sivertsen, Atassutip oqaaseqartua.

Qujanaq. Naalakkersuisut aalajangiiffigisassatut siunnersuut saqqummiussaat nukinganartutut pingaaruteqartutullu Atassummiit nalilerlugu matumuuna akuersaarnissarput oqaatigeriissavarput.

 

Suliap manna Inatsisartut Aningaasaqarnermut Ataatsimiititaliaanni suliassanngortinneqarsimagalu­arpoq, Ataatsimiititalialli Inatsisartunut aalajangiiffigisassanngortinneqarnissaannik piumasaqarsi­manera Atassummit paasilluarparput.

 

Sulisunut inissialiassat aningaasarpassuarnik nalillit tunulequtaqarluartumik aalajangiiffigineqarnis­saat assut pingaaruteqartutut Atassummit nalileratsigit.

 

Taamaattumik Ineqarnermut, Attaveqarnermut Pilersuinermullu Naalakkersuisut suliassap matuma pingaaruteqaqisup Inatsisartut upernaap manna ataatsimiinnitsinni naammassillugu suliarineqarnis­saa saqqummiummagu Atassummit pissusissamisoorsoraarput.

 

Aammalu inissaliassat siunnersuummi oqaatigineqartut pillugit Ineqarnermut, Attaveqarnermut Pilersuinermullu Naalakkersuisoqarfiup Teknikkikkut siunnersuisartut peqatigilluinnarlugit nutaamik misissuilluarlutik nalilersuisimanerat Atassummit iluarisimaarparput. Taamaalilluta erseqqinnerusumik isummernissatsinnut tunngavissinneqarsimalluarluta.

 

Saqqummiussami aamma oqaatigineqarpoq inissaliassat siulliit 71-it napparneqarnissaannut Qaqiffiup illuutaata peerneqartariaqarnissaa kingunerisussaagaa.

 

Qaqiffiup peerneqarnissaannut tunngatillugu matumuuna Atassummit piumasarissavarput piffissaagallartillugu Qaqiffiup taartigisinnaasaanik ujartonissaq assut pingaartikkatsigut, matumuuna Atassummit oqaatigaarput. Ullumikkummi Qaqiffik taama atorluarneqartigisoq taarteqassanngippat tamanna inunnut katsorsartikkusuttunut kimutoornermik kinguneqarataarsin­naanera aarleqqutigigatsigut.

 

Ilanngullugu Naalakkersuisumut Qaqiffiup taartigisinnaasaannik Nuummi pissaqassanngikkaluar­pat illoqarfiit ilaanni periarfissanik misissuisoqarnissaa Atassummiit kaammattuutigaarput.

 

Taamatut oqaaseqarluta missingersuutimut ilanngussat 2 million kr.-inik aningaasartalik Inatsisartut 2002-mut ilassutitut aningaasaliissutinut ilanngunneqarnissaannik Naalakkersuisup qinnuteqaataa Atassummiit akuersaarparput, Aningaasaqarnermullu Ataatsimiititaliami suliareqqinneqarnissaa inassutigalugu. Qujanaq.

 

Anders Andreassen, ataatsimiinnermik aqutsisoq, Siulittaasup tulliata aappaa, Siumut.

Qujanaq. Tulliullunilu oqaaseqassaaq Asii Chemnitz Narup Inuit Ataqatigiit.

 

Asii Chemnitz Narup, Inuit Ataqatigiit oqaaseqartuat.

Qujanaq. Inuit Ataqatigiit aalajangiiffigisassatut siunnersuut manna, pingaartumik maani Nuummi inissaaleqinerujussuaq nanertuutaaqisoq aamma akiorniarumallugu taperserniarparput, kisiannili Ineqarnermut, Attaveqarnermut Pilersuinermullu Naalakkersuisoqarfik aamma uparuarumanngitso­orumanagu, taasumami pilersaarusiornerlunnersuata taamatut qinnuteqartariaqarneq aamma pilersissimammagu.

 

Pilersaarusiornerlunneq qalleqqillugulu sooq aamma kiisarsi tusarlerneqarpugut pilersaarusiorluar­nerup aamma malitsigisaanik inissiat pineqartut napparneqarnissaannut atatillugu imigassaajartittar­fik Qaqiffik aamma piiarneqartariaqalissasoq taamaalillutalu aamma aningaasarpassuarnik 8-9 million kr.-nik 2003-mut Aningaasanut Inatsisissaq suliarilerutsigut immikkoortitsisariaqalissalluta.

 

Inuit Ataqatigiit tamanna assuarnartutut isumaqarfigaarput, sakkortuumillu Naalakkersuisunut piumasaqaatigissallugu Ineqarnermut, Attaveqarnermut Pilersuinermullu Naalakkersuisoqarfimmit pissutsit immikkut alaatsinaaqqullugit siunissami taamatut pisoqaqqinnginnissaa anguniarlugu.

 

Ataasialinngilagummi kingusiinnakkut tusarleqartarluta pilersaarusiornerluttarnerup kingunerisaa­nik aningaasaliisariaqartarnitsinnik.

 

Soorlumi 1990-ikkut aallartilaaginnartut Sarfannguani tunisassiorfiliortoqallarmat imilersornissaa aamma puigorluinnarlugu taamatut iliortoqartoq Qorlortorsuarmi eqalunnik tukertitsiviliortoqarmat allarpassuartigullu.

 

Pissutsit tamakku assuarnarluinnartut inniutaasimanngitsut paasinarpoq. Tamanna ajuusaarnarpoq, Naalakkersuisullu inakkumavagut suli pitsaanerusumik pilersaarusiorniartaqqullugit, pisariaqanngi­larmi kukkuluttuutit uteqattaartuarnissaat.

 

Qaqiffik eqqartortillugu Inuit Ataqatigiit naggasiutigalugu Naalakkersuisunut aamma apeqqutiginn­gitsoorusunngilarput qaqugu Frederiksberg Center-imik suleqatiginninnerput unitsissaneripput. Ilisimaneqartutuummi taasuminnga isumaqatigiissuteqarsimaneq akikitsuinnaasimanngitsoq tusarlerneqartarpugut, isumaqatigiissutittarpiaa kontrakt-i qanorpiaq imaqarnersoq ullut manna tikillugu suli naak aamma takusimanngikkaluarlutigut.

 

Naalakkersuisup apeqqummut tassuunga akisussaasoq Inuit Ataqatigiit naatsorsuutigivarput naammaginartumik akissuteqarsinnaajumaartoq.

 

Taamatulli oqaaseqarluta apeqquteqareerlutalu Inuit Ataqatigiit Naalakkersuisut qinnuteqaataat manna akuersaarparput.

 

Anders Andreassen, ataatsimiinnermik aqutsisoq, Siulittaasup tulliata aappaa, Siumut.

Qujanaq. Tulliulluni oqaaseqassaaaq Anthon Frederiksen Kattusseqatigiit.

 

Anthon Frederiksen, Kattusseqatigiit oqaaseqartuat.                         

Nuummi sulisunut inissiat katillugit 93-it sanaartorneqarnissaannut tunngatillugu 2001-mi Aningaasanut inatsisip suliarineqarnerani Kattusseqatigiinniit ilaatigut Dronning Ingrid Napparsi­mavissuani aaqqissuusseqqinnermut atatillugu sulisoqarniarnerup pitsaanerulersinneqarnissaa siunertaralugu suliniutinut paasinnilluta aningaasaliissutissanut akuerseqataanikuuvugut.

 

Siullermik erseqqissassavarput Kattusseqatigiinni pingaartilluinnaratsigut Inatsimmi aningaasaqar­nikkut pitsaasumik tutsuiginartumillu aqutsineq ingerlatsinerlu soqutigisatta pingaartitattalu aamma ilagilluinnarmassuk. Taamaammat suliassanut assigiinngitsunut tunngatillugu pilersaarusiorluarnis­saq aammalu pilersaarutaareersut sapinngisamik attatiinnarnissaat siunniusimasariaqarnissaallu pingaartipparput.

 

Taamaammat pilersaarutinik sunilluunniit kipusoortoqannginnissaa aammalu pilersaarusiornermi akisussaasut pissutsinik piviusunik pilersaarutit aallaqqaataaniilli tamakkiisumik Naalakkersuiner­mik suliaqartunut paasissutissiisarnissaat assorujussuaq Kattusseqatigiinniit pingaartipparput, tassami taamaattoqanngippat pilersaarutit ilaasa piviusunngortinneqarsinnaanerat aammalu sanaartornermi kinguaattoornerat suli annerusut pisarsinnaanerat aarleqqutigisariaqarmat.

 

Taamaattumik Kattusseqatigiinniit pakatissutigaarput Aningaasanut inatsisip akuersissutigineqar­neraniit qaammatit marlussuinnaat qaangiutiinnartut Naalakkersuisut Inatsisartut Aningaasaqarner­mut Ataatsimiititaliaannut suliassat tunngavigisaasa allanngortinneqarnissaat pillugu qinnuteqaate­qareersimagaluarmat.

 

Kattusseqatigiinniit tupiginngilluinnarparput Inatsisartut Aningaasaqarnermut Ataatsimiititaliaata suliaq Inatsisartunut aalajangigassanngorlugu ingerlateqqinnissaa innersuussutigisimammassuk, tassami Kattusseqatigiinniit isumaqarpugut pilersaarutit annertuut siunissami imaaliallaannarlugit allanngortitertalissagutsigit tamatuma aningaasatigut sanaartornermullu qanoq sunniuteqapiloorsin­naanera kialluunniit eqqarsarlualaarsinnaasup takunngitsoorsinnaanngimmagu.

 

Taamaattumik allannguinissamik Naalakkersuisut siunnersuutaat Kattusseqatigiinniit imaaliallaan­narlugu akuersaaruminaatsipparput. Illua tungaatigullu kukkunermut pilersaarusiornermullu suna pissuterpiaanersoq ersarissumik nassuiaateqarfigineqarnissaa suliap aappassaaneerneqannginnerani Ataatsimiititaliami susassaqartumi sukumiisumik misissuiffigineqarnissaa piumasaqaatigaarput. Tamatuma saniatigut Qaqiffiup inissisimaneranut tunngasut tamakkiisumik paasissutissiissutigine­qarnissaat aamma piumasaqaatigaarput.

 

Taamatut naakkaluamik oqaaseqarluta suliap aappassaaneerneqannginnerani Aningaasaqarnermut Ataatsimiititaliami sukumiisumik suliarineqarnissaa inassutigaarput.

 

Anders Andreassen, ataatsimiinnermik aqutsisoq, Siulittaasup tulliata aappaa, Siumut.

Qujanaq. Tulliulluni oqaaseqassaaq Otto Steenholdt Attaviitsoq.

 

Otto Steenholdt, Attaviitsup oqaaseqartua.

Siunnersuut soqutiginartoq pilersaarutaanerusunillu imaqartoq tusaatissatut tiguinnarnagu annikitsoralaannguamik apeqquteqarlungalu siunnersuuteqarfiginiarpara.

 

Ukiuni makkunani sanaartukkat sannarlutaanerujussuat ineqartunit naammagittaalliuutigineqartuar­poq massa inissiat ilaat nutaarsuugaluartut. Uninngaaffiginerusassara tassa inissiat quleriinni qulliit uffarfiiniit imeq ininut alliunerusunut kuuttarnerani naammagittaalliuteqartuarneq uanga nammineq paasiniaallatsiarnera aallaavigalugu Danmarkimi sanaartornermut tunngatillugu maanna inatsisaa­lerpoq uffarfiit allalluunniit naqqi masattartussat sanaat ussissarneqartalermata ernup pitarsinnaann­gisaannik tassa ilaatigut taaguuteqarpoq qallunaatut Avåderumssystem@, tassani  ussissaat mimbram pineqarluni. Taanna nutaaliaavoq tassalu oqaatigineqarpoq siunissami Danmarkimi inissianik sanasut inatsisikkoortumik taanna atortassagaat.

 

Naalakkersuisumut inassutigissavara sanaartornermi isumannaalliliinissaq pissutigalugu Danmarki­misut qulaani taasara tassa Avåderumssystemmimbram@ inatsisitigut aamma nunatsinni atortuuler­neqarnissaa piaartumik isumaginiaqqullugu. Tassami nunatsinni sanaartorneq ukiuni makkunani nukingiussaq pitsaanerusumik ilaatigut inerneqartalernissaa siunertaralugu.

 

Sanaartukkat sivisunerusumik pigissagaanni uani oqaatigisara aaqqinneqartinnagu qisuttat aannerannik aaqqissoqqinnissaannilu akisoorujussuanngortussat asu eqqarsaatigalugit taamatut Naalakkersuisoq inussiarnersumik saaffigaara, neriullunga taanna oqaatigisara aamma atorfinittami­gut qanoq iliuusigiffigeqquniarlugu. Pingaaruteqarluinnartutut isigigakku nutaarsuarmut inimut iseraluarluni qulaaninngaanniit kuuffigineqartuarnermik oqalunneq pingaarnerpaamik unitsittaria­qalermat.

 

Anders Andreassen, ataatsimiinnermik aqutsisoq, Siulittaasup tulliata aappaa, Siumut.

Qujanaq. Maannalu akissuteqassaaq Ineqarnermut, Attaveqarnermut Pilersuinermullu naalakkersui­soq.

 

Jørgen Wæver Johansen, Ineqarnermut, Attaveqarnermut Pilersuinermullu naalakkersuisoq, Siumut.

Naalakkersuisuniit nuannaarutigalugu maluginiarparput amerlanerussuteqangaartut siunnersuut taperserlugu oqaaseqarmata, oqaaseqartullu ataasiakkaarlugit oqarfigilaarusuppakka. Siullermik Siumup oqaaseqartua Mikael Petersen-imut tunngatillugu paasilluarsinnaavara aappassaaneerne­qannginnerani finansudvalgimit suliarineqarnissaa aamma kissaatigimmagu, ilaatigullu finansudvalg-imut suliarineqarnissaanut atatillugu paasissutigisinnaavara ataatsimut katillugit kvadratmeterit uani pineqartut 6.981-inik amerlassuseqarmata, taannalu aningaasaliissutinik 115 million-inik dividere-qarpat takuneqarsinnaassaaq uani kvadratmeter-imut aki 16.000 sinneqalaartut pineqarmat. Soorunami nalilersorsimagaluarparput aamma sannaap akitsornerata nalaani imminut akilersinnaanerunnginnersoq. Nutaamik pilersaarusiorneq, kisianni matumani oqaatigineqassaaq pilersaarusiornermut maakkut 6 million-it atorneqareermata, taamaattumik taakkua 6.400 missaanik ilanngaatigineqassappata taava kvadratmeteri uani pineqartoq massakkut oqaatigineqarsinnaassaaq 5.600 missanniittoq. Tassa pilersaarusiornermut aningaasartuutit ilanngaat unammillersinnaasumik nutaamik pilersaarusiortoqassappat taava pinngitsoorani taassuminnga akikinnerusariaqassapput.

 

Taannalu nalilersuinitsinni piviusorsiunngitsutut nalilersimavarput pingaartumik sumiiffik taanna eqqartorneqartoq eqqarsaatigalugu.

 

Qaqiffimmut tunngassuteqartut taakkua aamma Siumuminngaanniit Nuup Kommunea ilaatigut peqatigalugu aaqqiivigineqarnissaa naammassiniaqquneqarpoq. Tassuunga tunngatillugu oqaatigerusuppara aallaqqaataaniilli Qaqiffiup nalaani sanaartornerit taakkua ingerlanneqarnissaa pilersaarutaammat.

Taamaattumik aallaqqaataaniilli aamma pilersaarutigineqarpoq naluneqaranilu taakkua karate-tarfik taannalu uumasunik qimarnuvik taavalu Qaqiffik piiarneqartariaqassasut.

Taamaattumik taakkua tupaallatigineqartariaqartutut isiginngilagut Naalakkersuisuniit.

 

Siumup saqqummiussaa una inissiat pilersinneqareernerasigut periarfissaqassanerluni piginneqati­giilluni illuutilinnut tunisinnaanissaat taanna assut soqutiginarpoq, aamma misissoqqinneqartaria­qartunut ilaalluinnarpoq.

 

Atassut sinnerlugu Jakob Sivertsen-ip oqaaseqaataannut aamma qujarusuppugut maluginiarpara Atassummiit iluarisimaarneqartoq maannangaaq taamatut saqqumiussisoqarnera, aammami oqaluuserisassani immikkoortuni siuliini tamatta ugguutigalugit saqqummiunneqanngitsoorsimasut itisuumik oqaluuseraagut, matumanilu pineqartoq tassaavoq siusinaarluni saqqummiussineq, taannalu nuannaarutigineqarmat maluginiarneqarmallu nuannaarutigaara.

 

Qaqiffimmut tunngatillugu Atassutip oqaaseqaataat tassaavoq Nuuk kisiat misissuiffiginagu aammli kommunit allat piumappata periarfissaqarnersoq taanna ilanngullugu misissuinernut ilaatinneqartariaqartoq. Taanna pillugu Peqqinnissaqarfimmut Naalakkersuisoq oqaaseqarnissaa naatsorsuutigaara.

 

Pilersaarusiornerlunneq Inuit Ataqatigiit oqaaseqartuata Asii Chemnitz Narup-ip oqaaseqarnermini oqaatigaa siusinnerusukkut aamma ullumikkut ilaatigut eqqartorpakka suut tunngavigalugit pilersaarusiorneq nutaaq januar-ip 1.-ni atuutilersinneqartoq malittarisassat suut tunngavigalugit massakkut ingerlanneqartussanngortoq, aammalu eqqaallugu kommunit immikkut isumaqatigiissu­siornissaminnut periarfissaqarmata. Taamaaliornikkut neriuutigaarput aamma maannakkut januar-ip1.-ninngaanniit Sanaartornermut Pisortaqarfik aningaasanik nukittorsaanissaminut atortussaminik ilaatigut aningaasaliiffigineqarmat taakkua aqqutigalugit pitsaanerusumik pilersaarusiortarneq angusinnaasoraarput.

 

Taava aamma maluginiarpara Inuit Ataqatigiit qinnuteqaatigineqartoq akuersaarniarlugu nalunaaru­teqarmata.

 

Kattusseqatigiinnut tunngatillugu maluginiarpara qinnuteqaatigineqartoq akuerseqataaffiginianngik­kaat, aammalu assut pakassissutigigaat maannangaaq qinnuteqartoqareermat, kisiannili tassa finansudvalg-ip piumasaqarnera najoqqutaralugu qinnuteqaateqarpugut, aamma soorunami taamatut iliortariaqarneq uggornaqaaq, kisianni massakkut sanaartorneq kinguaattooqqissanngippat taava qinnuteqartariaqarneq pivoq.

 

Otto Steenholdt-ip teknik-imut apeqquteqaatai pillugit imaluunniit siunnersuutai pillugit neriorsuutigissavara taanna kingusinnerusukkut inuttaanut allakkatigut akissuteqarfigissagakku maanngaanniit massakkorpiaq akisinnaanagu misigisimagama.

 

Anders Andreassen, ataatsimiinnermik aqutsisoq, Siulittaasup tulliata aappaa, Siumut.

Qujanaq. Tulliullunilu oqaaseqassaaq Peqqinnissamut Avatangiisinulllu naalakkersuisoq.

 

Edvard Geisler, Peqqinnissamut Avatangiisinuullu naalakkersuisoq, Atassut.

Qujanaq. Uani Qaqiffiup qanoq aaqqiivigineqarnissaannut tunngassuteqartut pillugit partiinit allanillu oqaatigineqarmat taanna soqutiginaateqarpoq, tassami inuuiaqatigiinnut pingaaruteqartu­mik iluaqutaasumillu sunniuteqalereerluartoq Qaqiffik ingerlateqqissallugu avaqqunneqarsinnaann­gilaq.

 

Taamaattumik taasuma arlaannut inissinneqarnissaannut tunngatillugu Nuup Kommunea kisiat pinnagu, kisianni kommunit allat soqutiginnissinnaasut aperineqassapput Qaqiffik sumi ingerlanne­qarsinnaassanersoq. Tassuungakkut pingaaruteqarmat tamatumap isumaginnilluartuusup ingerlateqqinneqarnissaa aamma aqqutissiuutissallugu soqutiginarmat.

 

Taamaattumik taanna isumagissavarput, misissussavarput tamatumani qanoq pitsaanerusumik aaqqiisoqarsinnaanera ujartussallutigut, inissaa eqqarsaatigalugu. Maangaanartinnianngilarput kisianni misissussavarput. Qujanaq.

 

Anders Andreassen, ataatsimiinnermik aqutsisoq, Siulittaasup tulliata aappaa, Siumut.

Qujanaq. Tulliulluni oqaaseqaqqinniarpoq Anthon Frederiksen Kattusseqatigiit.

 

Anthon Frederiksen, Kattusseqatigiit oqaaseqartuat.

Erseqqissaatigiinnarusuppara uanga Kattusseqatigiit tungaaninngaanniit itigartitsivilluta oqannginnatta, kisiannili eqqarsartoqarnartillugu. Taamaatumillu aamma pilersaarut annertoqimmat taasuma sukumiisumik Ataatsimiititalimit misissuiffigineqarnissaa soorlu aamma Siumup oqaaseqartuata oqaatigigaa. Taanna pingaartipparput tassani immaqa paasinngisatta ilai aamma qaqilerneqarsinnaasutut eqqarsaatigigatsigit.

 

Anders Andreassen, ataatsimiinnermik aqutsisoq, Siulittaasup tulliata aappaa, Siumut.

Qujanaq. Tassa allanik oqaaseqartoqarnianngilaq. Uani erseqqissaatigilaassavara oqaluuserisassa­mut tullermut ikaarsaariarnissatsinnut maani isersimasut amigarmata, qinnuigissavakkalu ilaasortat inissaminnut ingikkiartoqqullugit.

 

Oqaatigissavara immikkoortoq 5-i, tassalu:

Aningaasanut inatsimmi kontomut 87.72.10-mut, Nuummi sulisunut inissiat, suliassat tunngavigi­saata allanngortinneqarnerat pillugu Inatsisartut aalajangiiffigisassaattut siunnersuut.

 

Tassa siullermeerneqarnera massakkut naammassimmat, aappassaaneerneqartinnanilu Aningaasa­qarnermut Ataatsimiititaliami suliarineqaqqaarallassaaq.