Oqaluuserisassani immikkoortoq 06-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
pingasunngorneq
17. april 2002
Ataatsimiinnermik
aqutsisoq: Daniel Skifte, Inatsisartut Siulittaasuat, Atassut.
Jonathan
Motzfeldt, Naalakkersuisut Siulittaasuat, Siumut.
Naalakkersuisut
sinnerlugit matumuuna Atuisartunut pisisartunullu siunnersuisoqatigiit,
tuniniaasarneq, nalunaaqutsersuisarneq, akit aamma atuisartunut pisisartunullu
maalaaruteqartarfittut ataatsimiititaliat pillugit Inatsisartut inatsisaata allanngortinnissaanut
siunnersuut saqqummiutissavara.
Inatsisaaqqaartoq
1986-imeersuuvoq. Aammalu inatsit pilersinneqarmalli tamanikkut niuernermut
angallannermullu pisortaqarfiusimasoq aamma nunatsinni inuussutissarsiummik
ingerlataqartut peqatigiiffiat FANG atorunnaarsinneqarput. Kiisalu kalaallit
niuerfiat aggulunneqarluni. Siunnersuut taamaattumik peqatigiiffit
ingerlatseqatigiiffiillu taakkua ullumikkut taagutaannik taarserneqarnerannik
imaqarpoq.
Inatsisissatut
siunnersuummi atuisartunut pisisartunullu maalaaruteqartarfittut
ataatsimiititaliap inuttalersugaanerata ataatsimiititamiluunniit pisisartut
inuussutissarsiortullu soqutigisaasa akornanni oqimaaqatigiinnerup
allanngortinneqarnissaa siunertaanngilaq.
Manna
tikillugu atuisartunut pisisartunullu maalaaruteqartarfittut ataatsimiititaliap
allattoqarfia siulittaasumiissimavoq. Atuisartunut pisisartunullu
siunnersuisoqatigiit allattoqarfiat januarip aallaqqaataa 2000
aallarnerfigalugu unammilleqatigiinnermut ataatsimiititaliamut aamma
atuisartunut pisisartunullu siunnersuisoqatigiit ataatsimoorussamik
allattoqarfiata pilersinneqarneratigut sulianut tunngasutigut tamakkunatigut
patajaallisarneqarpoq.
Tamanna
pillugu atuisartunut pisisartunullu maalaaruteqartarfittut ataatsimiititaliamut
allattoqarfiup maannakkut ataatsimoorussamik allattoqarfimmut
inissinneqarnissaa siunnersuutigineqarpoq.
Atuisartunut
pisisartunullu maalaaruteqartarfittut ataatsimiititaliami siulittaasoq taamaalilluni
ataatsimiititaliap ataatsimiittarnerisa aqunnissaannut aallussinerunissaminut
periarfissinneqassaaq.
Naalakkersuisut
neriuutigaat allanngortitsinikkut atuisartunut pisisartunullu
maalaaruteqartarfittut ataatsimiititaliap sulinera pisariillisarneqarumaartoq.
Inatsisartut
inatsisaata maannakkut atuuttup tamakkerluni misissoqqinnissaa
Naalakkersuisunit pilersaarusiorneqarpoq. Misissueqqinnisssaq tamanna soorunami
atuisartunut pisisartunullu siunnersuisoqatigiit taakkualu allattoqarfiat
suleqatigalugu pissaaq.
Tamanna
tunngavigalugu ataatsimiinnermi matumani taamaallaat allannguutissatut
siunnersuut inatsisip pisoqqap suli atorsinnaaneranut pisariaqartinneqartut
Naalakkersuisunit saqqummiunneqarput.
Naalakkersuisut
matumuuna inatsisissanut siunnersuut Inatsisartut kajumittumik suliarissagaat
kissaatigaat.
Daniel
Skifte, ataatsimiinnermik aqutsisoq, Atassut.
Naalakkersuisut
Siulittaasuannut qujavugut. Taava maannakkut partiit Kattusseqatigiit
Attaviitsullu oqaaseqartuinut nuuppugut.
Per Rosing-Petersen, Siumup
oqaaseqartua.
Qujanaq. Siumumiit imatut
Naalakkersuisut aalajangiiffigisassatut siunnersuutaanut oqaaseqarumaarpugut.
Una inatsisitigut teknikkikkut
allannguutaanerummat ilaatigut KNI-p tunineqarnerata kingunerisaanik
aallaaveqartoq annertunerusumik oqaaseqarfiginagu Siumumiit taamatut
isikkoqartillugu akueraarput.
Naggasiutigaluguli
oqaatiginngitsoorusunngilarput soorunami tapersernartutut isigigatsigu
allaffissornikkut eqaallisaanerup kingunerisaanik massakkut aamma
allannguinerit ilagimmagu atuisartuni pisisartunillu siunnersuisooqatigiit
unammilleqatigiinnermullu ataatsimiititaliaq allaffissornikkut kattunnerat
taamaasillutillu allarpassuarnik maligassiuilluarlutik.
Jakob Sivertsen, Atassut.
Qujanaq. Inatsisip
allanngortinneqarnissaanut peqqutaatinneqartut soorlu FANG-ip inuutissarsiummik
ingerlataqartut atorunnaarsinneqarsimanerannik kiisalu Kalaallit Niuerfiata
aggulunneqarneratigut taaguutaasa inatsimmut ilannguttariaqarnerat imaraa.
Kiisalu pisariillisaanissat
eqqarsaatigalugit unammilleqatigiinnermut ataatsimiititaliamut aamma
atuisartunut pisisartunullu siunnersuisoqatigiit ataatsimoorussaminnik 2000-mi
januarip aallaqqaataaniit allaffeqalernerisigut eqaallisaasimanermut
atatillugu atuisartunut pisisartunullu maalaaruteqartarfittut
ataatsimiititaliamut allattoqarfiup ataatsimoorussap ilanngunneqarnissaa
siunnersuutigineqartoq tamakkiisumik taperserparput.
Inatsimmut allannguutissaq teknikkekkut aaqqiiniarnerummat
annertunerusumik oqaaseqarfiginagu tamakkiisumik taperserparput. Kiisalu
Inatsisartut inatsisaata maannakkut atuuttup misissoqqissaarneqarnissaanik
atuisartunut pisisartunullu siunnersuisoqatigiit allattoqarfiat suleqatigalugu
pilersaarutaasoq oqaatigineqarmat Atassummit tamakkiisumik tapersiinerput
matumuuna oqaatigaarput.
Pisariaqassappallu allannguutissaq
ataatsimiititaliami misissoqqissaarneqarnissaanut peqataassaagut. Taamatut
Atassummit oqaaseqarluta inatsisissamut siunnersuut taperserparput. Qujanaq.
Maliinannguaq Markussen-Mĝlgaard, Inuit
Ataqatigiit.
Qujanaq. Inuit Ataqatigiinniit atuisartut
pisisartullu siunnersuisoqatigiivinut allanngortinneqarnissaanut siunnersuut
paasilluarparput. Tassami siunnersuisoqatigiinni ilaasortaatitat kikkuunissaat
ullumimut naleqqukkunnaarsimapput aaqqiivigineqalerlutillu.
Taassumap saniatigut siulittaasup
allaffissornikkut inissisimanerata allanngortinniarnera Inuit Ataqatigiinniit
isumaqartigaarput. Tassami ukiuni kingullerni atuisartut
siunnersuisoqatigiiffiata saqqumilaanngippallaarnera malunnarsimavoq.
Ullumikkullu nunarsuarmi pissutsit qiviassagaanni atuisartut
illersorneqarnisaat qanoq pingaaruteqaraluttuinnartigisoq ilisimavarput.
Nunatsinni angallannikkut aningaaseriveqarnikkut
ineqarnikkut nioqqutissiatigullu pissutsit suli
eqqummaariffigineqarnerusariaqartut Inuit Ataqatigiinniit isumaqarpugut.
Ulluinnarni atuisartut inissisimanerat eqqarsaatigalugu pisiniarfinni akit
erseqqinnerusumik paasissutissiissutigineqartarnissaat suli annertunerusumik
kalaallisut allassimanissaat aammalu akuutissat ulorianarsinnaasut
eqqummaariffiginerunissaat pisariaqartoq Inuit Ataqatigiinniit isumaqarpugut.
Inuit Ataqatigiinniit neriuutigaarput
atuisartut siunnersuisoqatigiiffiata unammilleqatgiinnermut ataatsimiititap
allaffeqatigilerneratigut sulinera suleqatigiinnikkut
ingerlalluarnerulerumaartoq. Aammalu siunissami inuiaqatigiinni sullissinera
malunnaatilimmik saqqumilaarnerulerumaartoq. Ullumikkullu allaffissornikkut
atorluaanerunissaq ikioqatigiinnerunissarlu pingaaruteqartoq aamma Inuit
Ataqatigiinniit isumaqarfigaarput.
Taamatut oqaaseqarluta peqqussutissatut
siunnersuut Inuit Ataqatigiinniit tapersersorparput neriuutigalugu atuisartut
siunnersuisoqatigiiffiat ullumikkornit saqqunilaarnerulissasoq tassami
isumaqaratta siunnersuisoqatigiiffik ullumikkut inuiaqatigiinni oqallinnermi
peqataanngippallaartoq.
Tom Ostermann, Kattusseqatigiit
oqaaseqartut.
Naalakkersuisut Siulittaasuata matumani
atuisartut pisisartullu siunnersuisoqatigiivi pillugit Inatsisartut
inatsisaannik atuutereersumik naleqqussaanermik allannguiniarnerat
Kattusseqatigiinniit imatut oqaaseqarfigissavarput.
Kattusseqatigiit pingaartipparput aammalu
oqaatigiuarparput Inatsisartut inatsisaat tamatigut pissutsinut
naleqqussarneqartarnissaat aammalumi iluarisimaarparput matumani pisisartut
siunnersuisoqatigiit aammalu unammilleqatigiinnermut ataatsimiititaliap
ataatsimoortumik allaffeqalernissaannik siunnerfeqarneq iluarisimaaratsigu.
Aammalu sulisunut amerlisaasoqarneranut
atatillugu aningaasatigut inissisimaneq pitsanngorsavigineqarsimalluni.
Kattusseqatigiit tikkuartortuarsimavarput
allaffissornikkut eqaallisaanerit pissutsinut piviusunut naleqquttut. Aammalu
allaffissornerujussuup sutigut tamatigut millisarneqarnissaa aqqutissiuunneqarnissaanik
iliuuseqartoqartassasoq. Taamaammat iluarisimaarnarpoq siunnersuutip matumap
taamatut nassatalimmik siunnerfeqarnera.
Kattusseqatigiit arajutsisimanngilarput
atuisartut pisisartullu maalaaruteqartarfiit kommunikkaartumik
ataatsimiititaliaqartut aammalu nunaqarfinniit ilaasortaqarfigineqartunik.
Taamaattorli ilaatigut ataatsimiititaliat sanngiiffigisinnaasaasa
ilaginnguatsiarpaat aningaasatigut killilimmik periarfissaqartinneqarnerat.
Siullermik atuisartut pisisartullu
siunnersuisoqatigiivi aammalu ataatsimiititaliani kommunikkaartuni
ilaasortarineqartut pikkorissarneqartarnissaat aqqutissiuunneqartariaqartoq.
Ilaatigummi atuisartut pisisartullu maalaaruteqarnissaminnut iliuusissatik nalusarmatigit.
Taamaammat pisariaqarluinnartutut
isigaarput paasisitsiniaanerit annerusut pisariaqartut. Kattusseqatigiit
isumaqarpugut nunatsinni atuisartunut pisisartunullu atugassarititaasut nunatta
isorartunerujussuani pissutilimmik assigiinnngitsorujussuusoq. Soorlu makku
eqqarsaatigalugit nioqqutissatigut pilersorneqarnerit eqqarsaatigalugit
imaammat avannamut Sisimiut killigalugit sikusartoqarfiit ukiukkut pisiassat
eqqarsaatigalugit allaanerusaqimmata.
Ilaatigut takornartaaneq ajorpoq
nioqqutissat tuniniarneqarsinnaanerminnut piffissaritinneqartumik
qaangeereersimagaluartut tuniniarneqartarneri. Matumani KNI tuniniagai soorlu
immuit allallu immunnik akullit aammalu nioqqutissat allat
tuniniarneqarsinnaanerminnik qaangeereersimagaluartut immikkut
akuerineqarlutik tuniniarneqartarnersat eqqarsaatigalugu.
Taamaammat Kattusseqatigiit
inassutigissavarput oqaaserisimasagut innersuussutigalugit siunnersuutip
matumap aappassaaneerneqannginnermini ataatsimiititalianut susassaqartuni
suliarineqarnissaa.
Otto
Steenholdt, attaviitsoq.
Tassa
erinigillarlugu kiisami oqallisissiaq manna nerriviup qaanut qaqinneqarpoq.
Inatsisissatunaasiit siunnersuut allanngortinneqarnialermat soorlu aatsaat
taamaattumik sulisoqarsimagaluartumik tusagaqarlutalu paasisaqalersugut.
Ila
siunnersuisooqatigiinnik taallugit sulisitat tusarfigineq imaluunniit
tusarfigineqarneq ajornavimmata.
Siunnersuisoqatigiit
maalaaruteqarnissamik utaqqiinnarnermik namminneq suliniuteqanngitsutut
taasariaqarput. Inuttalersuisarneq tassani allanngortinneqassanngilaq una
saqqummiussaq malillugu. Tamanna qularutissaanngilaq pissusitoqqat atorlugit
parteeqatinik kammalaatinillu inuttalersugaasimasoq.
Taamaattumik
innuttaasunit kikkuugaluarnersunit allanngortitsinnginnissaq ima
paasisariaqarpoq suliaq manna tikillugu toqungasutut ingerlasoq allanngorani
ingerlaannassasoq.
Allattoqarfik
eqqartorneqarpoq. Sulisussanngorlugit toqqakkat allattoqarfimmit anillutik
suliniarlik, soorunaliuna saqqummiussamik oqartoqaraluaqili, issuarpara @Ataatsimiititaliamut
siulittaasoq ataatsimiititaliap ataatsimiittarnerisa aqunnissaannut
aallussinerunissaminut periarfissinneqassasoq. Kiisalu ataatsimiititaliap
sulinera pisariillisarneqassasoq@.
Taannaqa
oqarpoq. Isumaqarluinnarpunga atuisartut pisisartullu taakkunannga
sullinniarneqarnerigaluat akuersaarneqarsinnaanngitsoq pingaartumik
soorluluunniit kalaaliaqqani pissutsit eqqarsaatigalugit.
Kalaallit
nerisassaannik piumasaqartuarneq tuniniaasunit naaperiarneqarneq ajorpoq.
Ataatsimiititaliaq ersarissumik aamma taakkunani suliassaminik suliaqarneq
ajormat.
Nunatsinni
innuttaasut aningaasanillu aamma sipaaruteqartuartut illersugaanerunissaat
pisariaqarluinnarpoq. Atuisartunik pisisartunillu siunnersuisoqatigiinnit
pisiffinnut takkuttartunik. Sinnikkatillu tassa inuiaqatigiit illersorlugit
piumasaqartartut ukiuni makkunani pisariaqarluinnalerput.
Taavalu
ilaasortarpassuit toqqarneqarsimasut saqquminerusut innuttaasunit
piumasaraarput.
Allannguutissaq
siulleq paragraf 2-mi oqaatigineqarpoq inatsisit nakkutigineqarnera
atuisartunut pisisartunullu siunnersuisoqatigiinnit aamma Naalakkersuisunit,
imaluunniit taamaaliornissamut Naalakkersuisut
piginnaatitaanik isumagineqassasoq.
Taavalu
paragraf 2, immikkoortoq 4 ima aamma nutarterneqarniarpoq. Taamatuttaaq
pisinnaavoq nagganuna pisinnaavoq uanga inatsiserpalaanngilluinnaqqissaartutut
nalilertariga. Sinnaavoq, inatsimmi matumani kapitali 9-p nakkutigineqarneranik
isumaginnittuusoq. Tassa paragraf 2-p oqaasertaa Naalakkersuisut suliassaannut
suliassanut ilaatigut namminneq toqqagaasigut qilersoraluarpai. Uanga
oqaaseqarninni suliassamik ilungersuussillutik sulisimasorinanngitsut.
Paragraf
27 immikkoortoq 1-p ilaasortassaanik innersuussivoq. Isumaqarpunga qulaani
sulianik nakkutiginninnerunissaq pillugu oqaatsikka naleqartinneqassappata
manna tikillugu ilaasortaasimasut allanik taarsertariaqartut.
Minnerunngitsumillu kisaatiginassaaq siunnersuisooqatigiit namminneerlutik
ilartik siulittaasussatut toqqassagaat.
Manna
tikillugu Naalakkersuisut toqqarsimasaata suliassani iluamik
paarisimanngimmagu.
Jonathan
Motzfeldt, Naalakkersuisut Siulittaasuat, Siumut.
Siunnersuummut
tapersiillutik oqaaseqartut qutsavigaakka partiit Kattusseqatigiit aamma
Attaviitsoq. Taavalu ilaasortalersorneqartarneranut tunngatillugu
oqaatigissavara taanna ilaasortat qulingiluanik ilaasortaqartussaammata.
Tassalu
oqaatigineqarpoq inatsimmi paragraf 27-mi allannikuupput. Ilaasortat sisamat
atuisartunut pisisartunut ilaasortanik taakkuluunniit sinniisussaasa akornanni
toqqakkat. Ilaasortaq ataaseq toqqarneqassasoq arbejdsgiverorganisation for
handel service og transporterhvervelig grĝnland HST-mik naalisarneqartartumik.
Ilaasortaq
ataaseq toqqarneqartassasoq sulisitsisut peqatigiiffiannit GA, ilaasortaq
ataaseq toqqarneqassaaq Kalaallit Nunaanni Brugsenit KNB, ilaasortaq ataaseq
toqqarneqassaaq Pisiffik aamma Pilersuisoq ataatsimoorullugit taakku
toqqaasartassallutik. Taavalu piumarineqarluni ataaseq aamma
inatsisilerituujussasoq. Naalakkersuisoqarfimmit akisussaasumit toqqarneqarsimasoq.
Tassa
taakku katiterneri eqqaasitsissutigaakka aamma Attaviitsup taakkua pillugit
oqaaserisai tunngavigalugit.
Aamma
oqaatigissavara partiinit oqaaserineqartut ilaatigut kaammattuutigimmassuk
taassumap suliaata saqqumilaarnerusumik ingerlanernissaanik toqqaanerit
partiinit oqaaseqartut ilaanninngaaniit aamma oqaatigineqartut taakkua aamma
maluginiarpakka.
Taavalu
aamma saqqumilaarnerulernissaannik kissaatigisaqarnerit taakkua akornanni
illuatungiliuttut aamma oqaaseqartuat Malînánguak' Markussen Mĝlgaard aamma
tassuuna noqqaassuteqarnera.
Allaat
ilaatigut Kattusseqatigiit oqaaseqartuanit aamma taaneqarsoraara
maluginiarlugulu immikkut kursuseqartinneqarlutik pikkorissartinneqarlutillu
iliuuseqarfigineqarsinnaanerinik aamma oqariartuutinik ilaqartinneqarmata.
Taakkualu
aamma soorunami oqariartuutit taamatut ittut apuunneqarnissaat aamma oqaaserineqartunut
ilanngullugit ingerlateqqikkumaarpagut.
Tassa tapersiinernut
qujassuteqarpunga.
Otto
Steenholdt, attaviitsoq.
Ajuusaarutigilluinnarpara
uanga maanngaanniit ersarissumik oqaatigisara ataatsimiititaliat pitsaanerusarpu
namminneq akunnerminni pitsaanerusorisartik toqqartoraangassuk. Maanna
Naalakkersuisuninngaaniit akuliulluni siulersuisussanik toqqaasarneq
assuarnarpoq soorlu uanga oqaatigigiga, taanna peertariaqarpoq
Naalakkersuisunit toqqagaq uanga tassaasorigakku suliamik iluamik
paarinninnginnermut aallaaviulluartoq. Ajuusaarutigaara taanna akineqanngimmat.
Tassa uanga aamma kissaatigissavara maani oqaatigineqartut, oqaaserineqartut
inatsisit pillugit ataatsimiititaliap nalilersuinissaa pisariaqarluinnalersoq.
Daniel
Skifte, ataatsimiinnermik aqutsisoq, Atassut.
Otto
Steenholdt qutsavigaarput. Taavalu maannakkut allanik oqaaseqarumasoqanngilaq.
Taamaattumik inatsisissatut Inatsisartut inatsisissaat taanna siunnersuut
aappassaaneerneqannginnermini inuussutissarsiornermut ataatsimiititaliamit
suliarineqaqqaassaaq. Taava immikkoortoq 8-mut killippugut.