Oqaluuserisassani immikkoortoq 14-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut aappaat,
ataasinngorneq 8. april 2002, nal. 14:02
Augusta Salling, siunnersuuteqartoq, Aningaasaqarnermut Naalakkersuisoq, Atassut.
Umiarsualivimmut akileraarutit pillugit
Inatsiartut inatsisaata allanngortinneqarneranik siunnersuut Naalakkersuisut sinnerlugit
matumuuna saqqummiutissavara.
Siunnersuutip saqqummiunneqartup
tunngavigaa umiarsuarni takornarianik angallassissutini ilaasunit
siusinnerusumiit annertunerusumik nunatta aningaasaqarneranut
akileeqataasarnerunissaat Naalakkersuisut kissaatigimmassuk. Aammattaaq
kissaataavoq umiarsuup takornarianik angallassissutip angallassinermini
illoqarfinnik assigiinngitsunik arlaqartunik tikitaqartarnissaanut
akileraarusiisarnerup akornutaannginnissaa.
Kiisalu Naalakkersuisut kissaatigaat
akileraarusiisarnerup umiarsuarnut takornarianik angallassissutinut tamanut
assigiimmik atuunnissaa. Tassa apeqqutaatinnagu umiarsuaatileqatigiiffiit
nunanit allaneersuunersut imaluunniit umiarsuaatileqatigiiffik Kalaallit
Nunaaneersuunersoq. Taamaattumik siunnersuutigineqarpoq umiarsuit takornarianik
angallassissutit umiarsualivimmiinnermut akileraarutinik
akiliisarunnaarnissaat, tassungali taarsiullugu umiarsuup Kalaallit Nunaanni
umiarsualivimmut umiarsualiviup avataani kisarsimaarfissaminut imaluunniit
sinerissami ilaasuminik nunnigussiffigisaminut tikinnermini ilaasuminut
akileraarummik ilaasumut ataatsimut 300,- kruuniusumik akiliisalernissaa.
Ilaasumut ataatsimut akileraarut 300 kruuniusoq Greenland Tourismip, Royal
Arctic Linep aamma Arctic Umiaq Linep isumasioreerlugit angissusilerneqarpoq.
Taakkumi tamarmik naliliipput taamak annertussusilimmik akileraarusiineq
pissutigiinnarlugu takornarianik angallassissutinik umiarsuaatileqatigiiffiit
nunanit allaneersut Kalaallit Nunaanik tikitaqarunnaarunnanngitsut imaluunniit
Arctic Umiaq Linep Kalaallit Nunaanni takornarianik angallassisarnini
unitsinnavianngikkai.
Avatangiisinik allanngutsaaliuinissaq
ilusitoqaanillu pilersitseqqinnissaq aamma takornariaqarnerup
aaqqissuunneqarneranut tapersiisarnissaq eqqarsaatigalugit Naalakkersuisut
tunngaviatigut isumaqarput ilaasunut akileraarutitigut isertitassat
pinngitsooratik taamaaliornissamut aningaasassatut immikkoortinneqassanngitsut.
Akerlianilli aningaasaqarnermut inatsimmi aningaasartuutissatut immikkut
nalunaakkatut aningaasaliisoqarsinnaassasoq taakkulu aamma ilaatigut
atorneqarsinnaassasut umiarsuit atorlugit takornariat tikinnerini sullissinerup
il.il. pitsanngorsarneqarnerannut. Taamatut aningaasaliinissaq assersuutigalugu
1,5 mio. kruuninik angissusilerneqarsinnaavoq, taakkulu Greenland Tourismip
peqataatinneqarneratigut agguataarneqarsinnaapput umiarsuit takornarianik
angallassissutit atorlugit tikittarnerisa aningaasatigut
iluanaaruteqarfiginissaat siunertariniarlugu.
Pinngitsoorani ilisimasortaqartartussaaneq
nalunaartussaanerlu pillugit aalajangersakkanik inatsimmut
ilanngussisoqarsinnaasimanngilaq. Ilisimasortassammi naammattumik
amerlassusillit maannakkorpiaq Kalaallit Nunaanni pigineqanngillat
nassuerutigisariaqarparput. Umiarsuit Kalaallit Nunaata imartaaniittut tamarmik
nalunaartussaanermik atuutilertitsinissaq pillugu Ineqarnermut, Attaveqarnermut
Pilersuinermullu Pisortaqarfiup qallunaat nunaanni Søfartsstyrelse suleqatigaa,
naatsorsuutigineqarporlu nalunaartussaanerup taassuma ukiut marluk pingasullu
ingerlaneranni atuutilersinneqarsinnaanissaa. Aammattaaq
innersuussutigineqassaaq umiarsuit takornarianik angallassissutit atorlugit
Kalaallit Nunaanni takornarianik angallassineq pillugu nassuiaat februar 2002
Inatsisartut Inuutissarsiorneq pillugu Ataatsimiititaliaanut
nassiunneqarnikuusoq.
Siunnersuummi aammattaaq ilaavoq
umiarsuaatileqatigiiffiit ilaasunik angallassisut, tassa maannakkorpiaq Arctic
Umiaq Line A/S Kalaallit Nunaanni umiarsualiviit akornanni aalajangersimasunik
ingerlaarfeqartut Namminersornerullutik Oqartussanik sullissinissamik
isumaqatigiissuteqartut umiarsuaataasa ilaasortaatit umiarsualivimmiinnerminnut
akileraarutinik akiliisarunnaarnissaanik allannguut. Naatsorsuutigineqarmammi
umiarsuaatileqatigiiffiup umiarsualivimmiinnermut akileraarutinut
akiliisassaguni akiliutissaraluisut annertutigisut sullissinissamik
isumaqatigiissutip aningaasartaanik ilanngaatigineqarumaartut.
Taama oqaaseqarlunga
umiarsualivimmiinnermut akileraarutit pillugit Inatsisartut inatsisissaata
allanngortinneqarneranik siunnersuut Naalakkersuisut sinnerlugit Inatsisartunut
suliassanngortippara aammalu Akileraartarnermut Akitsuutinullu
Ataatsimiititaliamit suliarineqareerpat aappassaaniigassanngortillugu. Qujanaq.
Mikael Petersen, Siumup oqaaseqartua.
Umiarsualivimmiinnermi akileraarutit
pillugit Inatsisartut inatsisaata allanngortinneqarnissaanik Naalakkersuisut
siunnersuutaat Siumumiit isumaqatigalugu ilassilluarparput.
Siunnersuutip imarisai siunertaalu
siusinnerusukkut Siumumiit ujartortarsimavagut, taamaattumillu massakkut
saqqummiunneqarmata iluarisimaarlutigit. Siumumiilli piumasarissavarput
Akileraartarnermut Akitsuusiisarnermullu Ataatsimiititaliap
misissoqqissaassagaa taamatut umiarsuarnik takornarianik angallassissutinik
akileraarutissiissutaasartussap 300 kruuniusussatut siunnersuutigineqartup
annertusiallatsinneqarsinnaanera. Tassami umiarsuit takornarianik
angallassissutaasartut nunatta imartaani annertuumik mingutsitsisinnaanerat
ilanngullugu upalungaarsimaffigineqartariaqarmat aammalu umiarsuarnik
nunatsinniik sullissisarnerit isumannaatsumik torersumillu
ingerlanneqartarnissaat ersarissumik siunertarisariaqarmat.
Ilanngullug Siumumiit
kaammattuutigissavarput umiarsuit pinngitsooratik
ilisimasortaqartussaatitaasarnissaanut tunngasup massakkut inatsisissatut
siunnersuummut ilanngunneqarsimanngitsup naliliiffigineqaqqinnissaa. Ilumut
massakkut taamaaliornissamut periarfissaqanngippat taava kingusinnerusukkut
taamaaliortoqalersinnaanissaanut periarfissiisinnaanerup eqaatsumik
aaqqiinikkut periarfissinneqarsinnaanera ilanngullugu misissoqussavarput.
Taamannak oqaaseqarluta inatsisissatut
siunnersuutip aappassaaneerneqannginnermini Akileraartarnermut
Akitsuusiisarnermullu Ataatsimiititaliamit suliarineqarnissaa inassutigaarput.
Godmann Rasmussen, Atassutip oqaaseqartua.
Naluneqanngitsutut Inatsisartut ukiakkut
2001-mi ataatsimiinneranni qulaani eqqartorneqartoq
misissugassanngortinneqarsimavoq. Inatsisartunut allannguutissaq ersarimmat
paasinarluarlunilu annertunerusumik oqaatsit atugassaasorinanngimmata
Atassummiit imatut oqaaseqarfigissavagut.
Siunnersuummi tupinnanngitsumik
takornarissat tikittartut nunatta karsianut akileeqataasalernissaannut
siunniussisimaneq Atassummiit iluarisimaarparput. Maannakkut
akileraarusiisalernissaq pitsaaquteqassaaq umiarsualivimmut talittarfimmut
talinngikkaluarluni pisalersussaammat. Takornartarinngilagummi takornarissat
umiarsuaat avasissumi kisaqqasarnerat. Taamaalilluni soorunami ikaarartarneq
tikitami annertunerusumik paasisaqarnissamut aamma killiliisaqaaq.
Oqaaseqaammilu susassaqartuni qanimut oqaaseqartitsisimanerup pitsaasortai
takoreerpagut. Kiisalu eqqaaneqartup takornarissanik sullissinerup
pitsanngorsarneqarnissaa Atassummiit tamakkiisumik taperserparput.
Naluneqanngilarmi qangaaniilli sinerissami nunatsinni aningaasarsiornikkut
ikorfartuutissatut takornariaqarneq isumalluutit ilagilluinnarmassuk. Tamannalu
Atassummiit siusinnerusukkut uparuartorlugulu innersuussutigisareersimavarput.
Aappassaaneerneqartinnagu
Akileraartarnermut Ataatsimiititaliamut innersuussutigalugu taama naatsumik
oqaaseqarpugut. Qujanaq.
Olga Poulsen, Inuit Ataqatigiit oqaaseqartuat.
Qujanaq. Ukiakkut 2001-mi Inatsisartut
ataatsimiinnerminni takornariaqarnermik inuussutissarsiuteqarneq aamma nunami
inuussutissarsiutit siuarsarneqarnissaat pillugu Inatsisartut inatsisissaattut
siunnersuummut isumaliutissiissuteqarput. Inatsisartut
isumaliutissiissuteqarnerminni Naalakkersuisunut kaammattuutigaat nunat
allamiut umiarsuaasa takornarianik angallassissutit
akileraarusiiffigineqarsinnaanerat Naalakkersuisunit misissorneqassasoq.
Inatsisartut taamatut kaammattuuteqarnerannik Naalakkersuisut
naammassinninnerat Inuit Ataqatigiinniit qujassutigaarput.
Inatsisissap kingunerisassaanut ilaassaaq
ilaasartaatit nunatsinneersut umiarsualivimmiinnerminni
akileraaruteqartarunnaarnissaat. Taassumap kingunerissavaa ilaasartaatit
ullumikkornit annertunerusumik illoqarfinnut tulattalernissaat taamaasillunilu
nunatsinni angallattunut sullissineq pitsanngoriaateqassasoq
naatsorsuutigisariaqarpoq.
Umiarsuit takornarianik ilaasullit
akileraaruteqanngitsumik umiarsualivinnut tulattalersinnaanerisa aamma
kingunerissavaa takornariat amerlanerusut illoqarfinnut niullutik niuernermut
annertunerusumik iluaqutaalersussaanerat.
Aningaasat takornariaqarnermik
akileraarusiisarnermit isertinneqartussat aningaasanut inatsisikkoorlugit
takornariat tikinneranni sullissinermut pitsanngorsaataasinnaasunik
suliniutinut atorneqarsinnaasunngortinniarneqarneri tapersersorparput.
Aammattaarli avatangiisinut allanngutsaaliuinissamut suliniuteqartuarnissamut
aningaasanik immikkoortitsisoqartuarnissaa pingaaruteqarluinnartutut
isigisariaqartutut isumaqarfigigatsigu taassumap aamma aaqqiivigineqarnissaa
piumasaqaatigissavarput.
Pinngitsoorani ilisimasortaqartussaanermik
kissaatigisap naammassineqarsinnaannginnera ajuusaarnartutut isigivarput.
Tassami ukiorpassuit ingerlaneranni nunatsinni umiartornermik ilinniarfik aqqutigalugu
imarsiorsinnaasunik aammalu sineriassiorsinnaasunik ilinniartitsisarsimavugut.
Taamatut ilinniagaqarsimasut nunatsinneersut ilisimasortatut
atorneqarsinnaalernissaannut periarfissanik misissuisoqarnissaa Inuit
Ataqagiinniit piumasarissavarput.
Pinngitsoorani nalunaartussaatitaanermut
suliat ingerlanneqartut pingaaruteqarluinnartutut isigaarput pimoorullugulu
pitsaasumik suliarineqarnissaa kissaatigissallugu.
Oqaatigineqareersutuut nunatsinni
ilaasartaatit umiarsualivinnut akileraaruteqartarnerat unittussaavoq
takornariallu ataasiakkaarlutik 300 kruuninik akileraartalissapput. Tassunga
tunngatillugu apeqqutigerusunnarpoq nunatsinni ilaasartaatit takornarianik
ikisitsissagaangamik taamaaliornermi aamma akileraarutinik akiliisitsisoqartassanersoq.
Tassani eqqarsaatigaagut takornariat timmisartukkut tikittut
ilaasartaassuarnulli ikinatik nunatsinni sinersortaatinut ikisut.
Inuit Ataqatigiinniit
siunnersuutigissavarput Inatsisartut inatsisissaattut siunnersuutip
atuutilernerminiit ukiut marluk qaangiunnerini nalilersoqqinneqassasoq
taamaasilluni inatsisip takornariaqarnermut qanoq sunniuteqarsimanera
malinnaaffigineqartuaannaqqullugu.
Taamatut oqaaseqarluta
innersuussutigissavarput inatsisissap Inatsisartut Akileraartarnermut Akitsuusiisarnermullu
Ataatsimiititaliaani suliarineqassasoq.
Mads-Peter Grønvold, Kattusseqatigiit oqaaseqartuat.
Qujanaq. Kattusseqatigiinniit siullermeerneqarnerani imatut oqaaseqassaagut.
Umiarsuit takornarianik ilaasoqarlutik nunatsinnukartartut ukiuni kingullerni amerliartuinnartut oqaatigineqarsinnaapput. Taamaattumik Kattusseqatigiinniit tulluartutut isigaarput umiarsuarnut ilaallutik nunatsinni takornariartartut akileraaruserneqartalernissaannik Naalakkersuisut isummersimanerat. Soorlumi ukiuni kingullerni nunatsinni takornariartartut qiviaraanni takuneqarsinnaasut nunatta avataaniit umiarsuit atorlugit nunatsinnut takornariartartut amerliartuinnarnerat, taamatullu nunatta takornarissanik tikinneqartarnera ajunngilluinnartoq Kattusseqatigiinniit isumaqarpugut.
Kisiannili eqqarsarnartoqartipparput nunatsinni taamatut avataaniit umiarsuit atorlugit takornariartoqartartillugu annerusumik nunatsinnut umiarsuarnut ilaallutik takornariartartut aningaasanik isertitsissutigineqarneq ajormata. Taamaattumik Kattusseqatigiinniit isumaqarpugut pingaaruteqarluinnartut nunanit allanit umiarsuit atorlugit nunatsinnut takornariartartut nunatta iluani aningaasaqarnikkut iluaqutigineqarsinnaanerisa ujartorneqartariaqarnerat pinngitsoorneqarsinnaanngitsoq Kattusseqatigiinniit isumaqaratta.
Ukiuni siusinnerusuni soorlumi aamma maannakkut anguniarneqarpoq nunatsinnut takornarissat tikittartut suli maannakkornit amerlanerusut nunatsinnut tikisinneqartarnissaat. Aammalumi akunnittarfinni unnuisartut soorlu aamma amerliartornissaat kissaatigineqartartoq. Qanorli iliornikkut umiarsuarnut ilaallutik nunatsinnut takornariartartut maannakkornit annertunerusumik nunatsinni aningaasarsiorfigineqarsinnaappat? Kattusseqatigiinniit isumaqarpugut umiarsuarnut ilaallutik nunatsinnut takornarissat tikittartut maannakkornit annertunerusumik iluaqutigisinnaasariaqalersut, soorlumi piffiit ilaanni umiarsuit taamatut takornariartaatsit illoqarfiit eqqaannut kisarlutik umiarsuup inuttai illoqarfinnut pineqartunut takornariartinneqartartut, naak immaqa pineqartunit takornariaqarnermut sullissisut suleqatigalugit umiarsuarnut ilaallutik takornarissat pineqartunit takornariartartinneqarnissaat anguneqarsinnaagaluartoq.
Kattusseqatigiinniit Naalakkersuisut siunnersuutaat ilaasumut ataatsimut 300 kruuninik akileraarusiisalernissaq tapersersorparput. Tusarniaanermi taamatut akileraarusiisalernissamik takornariartitsinermik suliaqartut pineqartut tapersersorneqarsimanera iluarisimaarparput. Taamatut umiarsuarnut ilaallutik nunatsinnut takornariartartut annerusumik nunatsinnut akileraaqqaaratik takornariartarnerat allanngortinneqartariaqalersoq Kattusseqatigiinniit isumaqarpugut. Soorlumi maannakkut nunanit allaniit umiarsuit atorlugit nunatsinni takornariartitsisartut kisimik umiarsuarnut ilaallutik nunatsinni takornariartartut annerusumik aningaasarsiutigisaraat.
Umiarsuarnut ilaallutik nunatsinni takornariartartut suli annertunerusumik aningaasarsiutigineqarsinnaasut Kattusseqatigiinniit isumaqarpugut. Umiarsuarnik nunatsinni takornariartitsisartut suli maannakkornit annertunerusumik suleqatiginerisigut piffiit ilaanni umiarsuarnut ilaallutik takornariartartut sammisassaqartinneqarsinnaapput, taamaaliornikkut piffiit ilaanni pineqartut aningaasarsiutigineqarsinnaammata. Nunani allani umiarsuit atorlugit takornariartitsisarnermi piffiit tikinneqartartut tiimini aalajangersimasuni takornariartinneqartarput. Taamaaliornikkut pineqartut aningaasarsiorfigineqartarput. Taamaattumik Kattusseqatigiinniit isumaqarpugut nunatsinni takornariaqarnermik suliaqartut periarfissat taamaattut atorluarnerusariaqaleraat.
Suli annertunerusumik nunatta avataanit umiarsuit atorlugit nunatsinnut takornariartartut aningaasarsiorfigineqarsinnaapput tamakkua atorluaraanni. Kattusseqatigiinniit pingaaruteqarluinnartutut isigaarput taamatut umiarsuit atorlugit nunatsinni takornariartitsisarnermi pinngitsooratik umiarsuit atorneqartut piffinnik ilisimasaqartunik ilisimasoqartarnissaat pinngitsoorneqarsinnaanngitsoq Kattusseqatigiinniit isumaqaratta.
Taamatut Kattusseqatigiinniit piumasaqarnitsinnut tunngavigaarput umiarsuit sapinngisamik ajutooratik sineriatsinni angalasarnissaat, naak Naalakkersuisunit oqaatigineqaraluartoq ilisimasortassanik maannakkorpiaq naammattunik amerlassuseqartunik nunatsinni peqannginnera nassuerutigineqartariaqartoq. Ukiuni siusinnerusuni angallatit naalagassaattut ilinniagaqarsimasut amerlasuut nunatsinni pigineqartut Kattusseqatigiinniit ilisimavarput. Soorlumi aamma taamatut ilinniagaqarsimasut suli annertunerusumik ilaatigut atorluarneqanngitsut oqaatigineqarsinnaasut.
Taamaattumik Kattusseqatigiinniit Naalakkersuisunut kajumissaarutigissavarput angallatit naalagassaattut ilinniagaqarsimasut nunatsinneersut ilisimasortassatut atorluarneqarsinnaammata. Soorlumi aamma oqaatsit tungaatigut pineqartut pisariaqartitsinerat tunngavigalugu pikkorissarneqarsinnaasut.
Taamatut oqaaseqarluta aammalu oqaaseqaatigut innersuussutigalugit Naalakkersuisut umiarsualivimmiinnermut akileraarutit pillugit Inatsisartut inatsisaata allanngortinneqarnissaanut siunnersuutaa Kattusseqatigiinniit taperserparput, suliallu aappassaaneerneqannginnerani Akileraartarnermut Akitsuutinullu Ataatsimiititaliami suliarineqarnissaa Kattusseqatigiinniit innersuussutigalugu. Qujanaq.
Otto
Steenholdt, Attaviitsup oqaaseqartua.
Siunnersuut saqqummiunneqartoq takornariarnermut attuumassuteqartunut oqaaseqarfigitereerlugu saqqummiussaq imaasiallaannaq akerlilersugassaanngilaq.
Taamaattoq ilisimasortat uanga eqqarsaatigineruvakka umiarsuannik tulatsitsisartut Danmarkimi atorneqarluartut ikkannerit pingaartumik aamma ilaatigut ornittarlugit. Taakku eqqarsaatigalugit suliffissanik taamannak suugaluartunilluunniit ujarlertigaluta periarfissatsiarsuaq una suli piareersimaffiginngikkipput paasigakku assut ajasoorutigaara.
Taakkua tulatsitsisartut inupparujussuusussaanngillat, taamaattumillu aamma ilinniarnissaat eqqarsaatigalugu atuarfiliuunnissaalluunniit eqqarsaatigisariaqarani. Atorluaaniassagaanni Danmarkimi inuit taamaattut umiarsuarnik tulatsitsisartut qanoq ilillugit ilinniartinneqartarfiat nassaareriarlugu piukkutanik aallartitsivigineqarniarlit ilinniartillugit tassani Danmarkimi taamatut tulatsitsisartut qanoq piumaffigisarnerat paasillugu ilinniarfianni ilinniartillugit inuppassunngitsunik oqareerama imaasiallaannaq nunatsinnut utersinnaapput ilinniagaqareerlutik ajukkunnarunnaarlutik.
Taamatut naatsunnguamik oqaaseqatsiarpunga innersuullugulu taanna siunnersuut akuersaarneqarluinnartariaqartoq. Taamaattoq tulatsitsisartut ilungersuunnerullugit suliniutigileqqullugu.
... nangitaq Augusta Salling, Atassut:
annertusineqarsinnaaneranik tunngassuteqartoq, tassa soorunami ataatsimiititaliaq qanorluunniit sulinermini misissuissaguni taanna periarfissaalluarpoq.
Aamma uagut annertussusissaanut tunngassuteqartoq soorunami misissorluarsimavarput, aammalu takornariartitsinermik suliaqartut maani nunatsinneersuinnaanngitsut oqaloqatigalugit angissusissaq nassaariniarneqarsimavoq, aamma pingaaruteqarluinnaqqissaarmat taamatut akitsuusiinermi nunatsinnut takornariat tikittartut ikilisinneqannginnissaat taanna pingaartorujussuusoq isumaqarfigigatsigu. Taamaattumik 300 kr. taanna tikinneqarsimasoq, massakkut isertittartariikkatsinnut, tassa havneafgif aqqutigalugu isertittakkatsinnut aamma ikinnerusunik pissarsissutigisussaanagu takusinnaareerparput, taamaattumillu una aallartissutitut taanna tiguneqartutut oqaatigisariaqartoq, kisianni nassuerutigisariaqarparput aamma uagut kisitseq annerusoq eqqartornikuugaluaratsigu aallaqqaammut, kisianni isumaqarpunga pingaarnerpaarpaajusoq takornarissat aamma massakkut soorlu aamma saqqummiussatta pappiarartaani takuneqarsinnaasoq, taamatut ataasiaannarlutik akiliisinneqarnermikkut illoqarfiit amerlanerujussuit tikissinnaalerpaat, immikkut akileeqqeqqaarnatik, taanna aamma isumaqarpunga akeq pitsanngoriaataasussaasoq taamaalluta takornarissat illoqarfinnut ikittuinnarnut pinnatik, kisianni immaqa illoqarfiit nunaqarfiillu amerlanerusut aamma tikissinnaalissavaat taamaaliornermikkut.
Taava sorliit akitsuummik akiliisassanersut aamma apeqquteqaatigineqarpoq Inuit Ataqatigiit tungaanninngaanniit imaluunniit uku tassa imaappoq. Takornarissanik angallassisut sinersortut, imaluunniit sinersorlutik illoqarfinnut tikeqattaartut, taakkua soorunami nunatta - nunatsinnut appakaannerminni akiliisussanngortussaapput, taavalu takornarissat aamma amerleqqissagunikkit illoqarfinni arlaanniluunniit, taava amerlississutsit taakku aamma soorunami qaavatigut akilertussanngussavaat.
Uku sinersorlutik sinersortaammut ilaasartut taakkua, tassami Royal Arctic Line akiilisarunnaassaaq, taamatut havneafgift-imik, kisianni takusinnaareerparput akiliisittassagutsigu uagullu tapiisartareerluta, taamatut umiarsuit sinersornissaanut, taava tapiissutit qaavinut taakku ilineqaannartussaagaluarmata pisariaqanngitsutut taanna nalilersimavarput. Aammalu oqilisaanerusutut taamatut iliornissaq.
Taavalu ilisimasoqartarnermut tunngatillugu ilumut isumaqarnarsinnaagaluarpoq, taamatut umiartornermi ilisimasaqartoq nunatta sineriaani angallassissallutik ilisimasaqartut amerlasoorujussooreersut, ukiorpassuit ingerlanerani taamatut ilinniartitsisoqarsimanera tunngavigalugu.
Kisianni innersuussutigiinnarusuppara aamma nassuiaat, umiarsuit takornarianut angallassissutit atorlugit Kalaallit Nunaanni takornarianik angallassineq pillugu nassuiaat februarimi agguaanneqarsimasoq, tassani aamma - tassa tamakku aamma misissorneqareersimapput qanoq periarfissat isikkoqarnersut, tamannalu pissutigalugu massakkut piareersimasutut aamma piareersimanngitsugut taamatut piumasaqaateqarnissamut. Tassami ajornarnerpaassaaq piumasaqaatigalugulu ilisimasortaqarnissaat, taava ilisimasortamik tunisinnaanagit aporfeqalissagutta. Piumaqaagut umiarsuit takornarissanik nassarlutik nunatsinnut annguttarnissaat, taanna aamma pingaartutut isigaara.
Qujanaq.
Daniel Skifte, ataatsimiinnermik aqutsisoq, Inatsisartut siulittaasuat, Atassut.
Aningaasaqarnermut Naalakkersuisumut qujavugut, maannakkut oqaaseqassaaq Lars-Karl Jensen, partiimi oqaaseqartitap avataatigut.
Lars-Karl Jensen, Siulittaasup tulliata pingajuat, Siumut.
Tassa una ilisarnarmat, aamma allamorujussuaq sangusariaqanngimmat suliassaq naammasilerneqartoq uanga Naalakkersuisup saqqummiussaa nuanaarutigivara. Soorlu aamma Siumumi oqaaseqartoq taamak oqartoq.
Umiarsuit takornarissanik angallassisartut, umiarsuarujussuit ilaatigut 1.000 tikillugit ilaasunik angallassillutik sinerissatsinni angalaartartut pillugit oqallinnitta ilaatigut siorna oqaatigivara, sillimaniarneq eqqarsaatigalugu tamakkua umiarsualivissinnaveersaarlutik umiarsualivimmut akileraarut akilernaveersaarlugu illoqarfiit saavini kisaannarlutik pisarnerat iluarinartinnagu, isumaqarama nunatsinni imaatigut angallannermi annaassiniartussaanermut tamanna tulluanngitsoq, arlaatigut pisoqassappat aamma taakkua akileraaruteqarsinnaanerat tamakkunuuna inerisaanitsigut iluaqutigisariaqaratsigu.
Umiarsualivimmut akileraarnaveersaarneq taamaalillugu aaqqinneqartussaammat, taanna nuannaarutigalugu oqaatigiinnarsinnaagaluarpara, kisiannili uani ilanngutinngitsoorusunngilara aamma imarsiorneq pillugu inatsisitigut killiffigisatsinnut oqallinnitsinni aamma ilisimasortaqartarneq imaluunniit umiarsualivissitsisarnermi talitsitisartunik oqalunneq pigatsigu eqqaanikuuarput, taassuma nunatsinni imarsiornerup iluani inatsisip sukkut naalagaaffeqatigiinnermi atuunnerani aamma nunatta nammineq sukkut oqartussaaffeqarnerani sanngiissutaasut ilagigaat inatsiseqannginnatta nammineq imarsiornerup iluani, oqartumik umiarsualivimmut tulannissamut imaluunniit imartatsinni angalanissamut pinngitsoorani ilisimasortaqarnissamik piumasaqaateqartumik. Tassa inatsit taanna aaqqittariaqassaaq Naalakkersuisullu suleriaqqinnissaaanik ataatsimiititaliallu immaqa taanna eqqaamaqquinnarpara, pinngitsoorani nuna nammineq taamatut nipeqartumik inatsiseqartariaqarmat ilisimasortanik piumasaqaateqartumik.
Uani ilisimasortassarsiornissamik ajornartorsiuteqarsinnaaneq takorlooruminaatsippara, oqaluttut ilaata oqarneratut aamma Imarsiornermik Ilinniarfik tamakkuninnga kiffartorluarsinnaasunik naammassisaqartarmat.
Qujanaq.
Jørgen Wæver Johansen, Ineqarnermut Avatangiisinullu Naalakkersuisoq, Siumut.
Siullermik partiit Kattusseqatigiit, Attaviitsullu oqaaseqartuisa saqqummiussaannut qujarusuppunga, aamma ilisimasortaqartarnermut tunngatillugu saqqummiussat oqaatigerusuppara tusaatissatut tigorusukkatsigit, malunnarmammi Inatsisartunit kissaatigineqartoq ilisimasortaqartarnermut tunngatillugu Naalakkersuisut aaqqiissutissamik saqqummiussaqaqquneqartut.
Taamaattumik neriorsuutigissavara suliassaq taanna Naalakkersuisoqarfinni suliarineqassammat, kingusinnerusukkullu ilaatigut Inatsisartut Ataatsimiititaliaa peqatigalugu uterfigineqassammat.
Olga Poulsen, Inuit Ataqatigiit oqaaseqartuat.
Tassa una siullermik Naalakkersuisup apeqqutigisatsinnut tunngatillugu akissutaani paasivarput kikkut akiliisassanersut akileraarutinut. Uanili paasiuminaatsikkatsigu sineriassorluni Royal Arctic Line angallatai, assersuutigalugu uani ersernerlutsitsisumik immaqa naluara taanna qiviaqqusinnaanerlugu nalinginnaasumik oqaaseqaatini, qupperneq 3 kalaallisuaani imannak allaqqasoqarami:
AUmiarsuaq ilaasartaat aalajangersimasumik ingerlaarunnaarallarluni takornarianik sinerissami angallassissalluni aallartippat, umiarsuaq takornarianik angallassissutitut isigineqassaaq@.
Tassani imannak paasissanerparput, tassa Royal Arctic Line nalinginnaasumik angallassigunnaarallarnermi nalaani, taava taamatut isigineqaleruni taava takornarianik ilaasoqarluni aamma akileraarutinik aamma akiliisitsisassooq. Taamatut una paasineqarsinnaavoq.
Kisianni assersuutigalugu New York-iminngaanniit Kangerlussuarmukarlutik timmisartorlutik takornariat tikerarunik immaqa qulit, assersuutigiinnavillugu, taavalu krydstogtskibenut tamakkununnga ikinatik, tassa tassunga ikissagunik taava akileraassapput, taanna paasinarpoq, aamma taanna paasivarput, kisianni Royal Arctic Line angallataanik ikigunik tassani qanoq pisoqassava ? Taanna apeqqut ersinnginnami taanna apeqqutigigipput.
Taavalu Siumukkut oqaaseqaataannut tunngatillugu Naalakkersuisup akissuteqaataa tassani taperserparput, isumaqaratta mianersuuttariaqaripput taamatut aallarteqqaarnermi akiliutip inissinneqarnera taanna mianersuuttariaqartoq, taamaattumik aamma siunnersuutigivarput oqaaseqaatitsinni ukiut marluk qaangiutereerpata taava inatsit taanna nalilersorneqassasoq, takujumallugu taamatut akiliuteqartitsisarneq takornariaqarnermut qanoq sunniuteqarsimanersoq.
Godmand Rasmussen, Atassutip oqaaseqartua.
Unaana qaqinninnut pissutigigiga Naalakkersuisup Jørgen Wæver Johansen-ip oqaatigimmagu taanna ilisimasortaqartarsinnaaneq misissugassaqqigalugu. Siunnersuutiginiariga ukiuni siusinnerusuni Danmarkimi umiarsualivinni ileqquuvoq, umiarsualivinni formandeqartarpoq atuarsimasunik, aquttutut imaluunniit naalakkatut. Tamakkulu pisussaaffeqartitaapput aamma nunatsinni annertoorujussuarmik atugaaleraluarnikuuvoq, umiarsualivinni formandi atorfinitsinneqartarlutik naalakkatut atuarsimasut.
Una oqaatigerusuppara Kattusseqatigiit oqaaseqaateqaataanni oqaatigineqartoq taanna atuarsimanermi umiartornermi ilinniarfimmi atuarsimasuni ilisimasortaqarsinnaaneq, aamma una paaseqqulaaqquara inatsit aamma killeqarpoq. Atuarsimasut takorloorneqassanngillat tamarmik sulilluni ingerlatsisinnaanerat. Pappialaq piumasaqaataa angoqqaarniarneqartarpoq ukiut qassit umiartorsimanermi. Aatsaat taakku naammatsissimagaanni inuutissarsiutitut taanna akuerineqarsinnaasarpoq, soorlu biilini aamma allagartaqarneq taamaattoq.
Uanga uani isersimasuni aamma misilittagaqarfiginerpaarpaanikuuara umiarsuarni nunalitsisarneq. Eqqaamaqqissaarpara 1969-imi qasussutigigaluarnikuugakku Maniitsoq tikillugu sikorsuaqallarmat, ullu unnuarlu ataavartumik tulatitseqattaartarneq, Sisimiuni taanna atorneqartartorujorujussuuvoq umiarsualissuusarallarmat, aamma oqaatigissavara akikitsuunngilaq ilisimasortaaneq inuussutigineqarsinnaalluarpoq.
Umiarsuaq ataaseq 1.500 kr. akeqartarpoq, taamaattumik umiarsuaqarluartillugu aamakorsuusarput.
Taanna uanga aappaatigut assorujussuaq tapersersorujusuppara tunngavigalugu, Naalakkersuisugoortillugu una misissugassaqqigivara umiarsualivinni atorfinitsitsinermi piumasaqaataalerniarli atuarsimasut tassani aamma saniatigut atorneqarsinnaanerat. Taava taamaalilluni ilisimasortassamik ajornartorsiuteqarsinnaaneq taamaalilluni ajornartorsiutit appakariarnissaanut ajornartorsiut taanna qaangeriarnissaanut sakkussaq pingaartuusussaassaaq.
Taamak naatsunnguamik nassuiaateqarfigilaaginnarpassi. Qujanaq.
Augusta Salling, Aningaasaqarnermut Naalakkersuisoq, Atassut.
Inuit Ataqatigiinninngaanniit Olga Poulsen-ip apeqquteqaataanut tunngatillugu oqaatigissavara, tassa ilumoorpoq Royal Arctic Line-p umiarsuaa takornarissanik angallassisunngorluni ingerlaalissaguni, taava allatorluinnaqqissaaq taamatut avataaninngaanniit umiarsuit takkuttut, takornarissanik angallassiniartutut isigineqalissooq, taamaalillunilu takornarissat amerlassusaat najoqqutaralugu akiliisussanngussalluni.
Kisianni sinersortaammik ilaasutut angalaniartut nalinginnaasumik sinersortaatitut angalanerani angalaniartut, taakkua tassa taakkununnga immikkut umiarsualivimmut talittarnermut akiliissuteqartassanngilaq, pissutigalugu naatsorsuutigineqarmat soorlu oqareersunga taamatut umiarsualivimmut talittarnermut akiliisitsisoqartassappat, sinersornermi nalinginnaasumik nunatsinni taanna tapiissuteqarfigineqartartareersumik, taava taakku tapiissutit amerlassutaanut ilanngutiinnartussaasut imaluunniit amerleriarneranik isumaqaannartussaasoq isumaqarfigineqarmat, taava oqilisaassutitut taakkua peerneqarnissaat siunnersuutigineqartoq.
Mads Peter Grønvold, Kattusseqatigiit oqaaseqartuat.
Soorunami nunatsinni angallatit naalagassaattut ilinniarsimasut nikagineqartariaqanngillat, periarfissinneqartariaqarput. Arlalippassuit nunami suliliinnartarput periarfissaqannginnamik avataani angallatinik naalakkatut ilinniarsimasaminni atorfeqalernissaminnut.
Taava aammalu pingaaruteqarluinnarpoq ilisimasortatut angallatsinik takornariartaatinik ilaassagaanni tuluit oqaasianik ilisimasaqarnissaq, soorlu tamakku periarfissiunneqarsinnaapput pikkorissarnermik allatigullu, soorlu Naalakkersuisut ilaata suliassaq taanna tiguniarlugu oqaatigigaa. Taanna Kattusseqatigiinniit iluarisimaarparput, tassami suliassaq aallartinngikkaanni taamatut ilinniarsimasut atorluarneqarsinnaasut atorneqalersinnaanngimmata.
Aammalu uani takornariartitsinermi isumannaallisaaneq inatsisitigut qanoq inissisimavoq ukiuni kingullerni. Assersuutigalugu qiviarutsigu Ilulissat saani takornariat amerlasuut angallateeqqanik ilaatillugit iluliarsuit saanut takornariartinneqartarput, allaat iluliarsuarnut talillutik. Ajutoortoqarpat takornariaqarnikkut sunniuteqarnerluttupilussuupput tamakkua. Taamaattumik inatsisitigut ersarissumik tamakkua qanoq isumannaallisaaneq eqqarsaatigalugu piumasaqaateqarnersoq ersarissarneqartariaqalerput.
Iluliarsuarnut talilluni takornarissanik takornariartitsisarneq isumaqarpunga isumannaallisaaneq eqqarsaatigalugu naleqqutinngilluinnartoq, taamaattumik ajutoortoqannginnerani taamannak angallassisarnerup pinngitsoortinneqanngissaa pisariaqarluinnarpoq. Talinnani takornariartitsisinnaaneq pitsaalluinnartuuvoq, tassami iluliarsuaq assallariarpat angallat imaaliallakkunikku pavaningaatsiamiitissinnaavaa.
Tamakkua inatsisitigut soorunami malittarisassaqassapput angallassisartut aamma, tamakku aamma isiginiarneqarnissaat isumaqarpunga pinngitsoorneqarsinnaanngitsoq.
Naalakkersuisup akissutaanut qujavugut, aammalu neriulluta taamatut akitsuusiineq iluatsilluarumaartoq.
Daniel Skifte, ataatsimiinnermik aqutsisoq, Inatsisartut siulittaasuat, Atassut.
Mads Peter Grønvold-imut qutsavigaarput, inuuvissiorneranilu pilluaqqullugu.
Mikael Petersen, Siumup oqaaseqartua.
Aap, takornariamut ataatsimut 300 kr.-inimik akileraarusiisalernissamut siunnersuut taanna soorunami ajorinngilarput Siumumiit, kisianni misissoqqissaartariaqarpoq annertusiallatsinneqarsinnaanersoq, soorunami takornariartitsinaveersaarnianngilagut, aamma mattussinianngivippugut.
Kisianni apeqqutigilaassavara sivitsorsaanianngikkaluarlunga, ilisimasortassaqartitsinissamut tunngatillugu taanna eqqunneqassappat, suminngaanniit aningaasat aaneqassappat. Ilisimasortat kiap akilissavai, ilisimasortat soorunami aamma aningaasarsiaqartariaqassapput, taamaattumik soorunami umiarsuit ilisimasortaaffigineqartut akiliutaasigut aamma ilisimasortat akissarsiaat akilerneqartariaqassapput.
Aamma aningaasarpassuunavianngillat sivikitsunnguamik pulatitsiinnartussaassapput talittarfinnut, talittarfinnut talissinnaappata, tassa taanna, aamma pisariaqartinneqarpata ilisimasortat aatsaat atorneqartussaassapput.
Taamaattumik 300 kr.-qartitsisinnaagutta immaqa 350 kr.-qartitsisinnaavugut 400 kr. angujuminaassooq. Kisianni nalilersugassaapput tamakku, nalilersoqqissaarniartigit. Taava paasigutsigu 300 kr. naammaattoq aamma qaffassinnaanagu taava aamma taanna akuerissavarput.
Isumaqarpunga suna tamaat ajornartorujorujussuartut isigalugu oqallittarnigut aamma ingerlattarigut, talittarfinnut talititsiniarnerit ilisimasortaqartitsiniarnerit Lars-Karl Jensen oqarneratut pioreerput taakku, aamma tuluttut immaqa pisariaqanngikkaluarpoq oqalulluni pulajartussalluni. Soorunami immaqa umiarsuit naalagai oqaloqatigilaarneqarsinnaagunik nuannissooq, kisianni pulatitsillunilu anillatitsiguni inussiarnisaarlunilu pissuseqarluni tamanna ajunngilluinnartussaavoq.
Isumaqarpunga ajornartorujorujussuartut isiginaveersaartariaqarigut aaqqissuussinerit, qiimalluta inussiarnerluta pissuseqarfigalugit aamma inooqatigisinnaavagut umiarsuit, immaqa tuluttut oqalulluta pulajartunngikkaluarluta, soorunami pisinnaaneq taanna ajunngilaq, aamma pimasaqaataappata naammassiniassavagut.
Akileraartarnermut ataatsimiititaliap isumaqarpunga misissoqqissaassagaa taakkua, taamaalilluni takussavarput qanoq isumaliutissiissummi piumasaqarumaarnersoq.
Daniel Skifte, ataatsimiinnermik aqutsisoq, Inatsisartut siulittaasuat, Atassut.
Mikael Petersen qutsavigaarput, kingulliulluni oqaaseqarumavoq Olga Poulsen, pingajussaaniilerami naatsunnguamik.
Olga Poulsen, Inuit Ataqatigiit oqaaseqartuat.
Naatsukullammik.
Siullermik Aningaasaqarnermut Naalakkersuisup akissuteqaataanut qujavunga, aamma paasinarpoq suna siunertaanersoq. Uani Royal Arctic Line-ip taamatut takornarianut kisimi ilaasoqalertilluni, taava tassa paasivarput taakkua ilaasut akileraarutinik tassa akiliisassapput, ajunngilaq, taava Nunatta karsia akileraarutitigut aningaasanik isertitsissooq, taanna qujanarpoq. Taamaattorli isumaqarpugut mianersuutigineqartariaqartoq ukiut aamma arlaqanngitsut annertuumik nunatsinni misigisarput ilikkarfigisariaqarippullu, tassalu nalinginnaasumik ilaasussat takornariat amerlasuut ilaasortaatinut ilaasussaanerat peqqutigalugu, kingulliunneqartarnerat aammalu inissaarunneqartarnerat taanna isumaqarpunga aamma mianersuunneqarnissaanik ataatsimiisitaliami aamma eqqarsuutersuutigineqartariaqartoq.
Daniel Skifte, ataatsimiinnermik aqutsisoq, Inatsisartut siulittaasuat, Atassut.
Olga Poulsen qutsavigaarput. Maannakkut allanik oqaaseqarumasoqanngimmat taamaalilluni Inatsisartunit suliarineqarnera immikkoortoq 14-i naammassivoq, taavalu ingerlatseqqinneqassalluni aappassaaneerneqannginnermini Inatsisatut akileraartarnermut akitsuusiisarnermullu ataatsimiisitaliaat.
Tulliupporlu apeqquteqaat