Oqaluuserisassani immikkoortoq 16-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut sisamaat,
tallimanngorneq aprilip 12-aat 2002,
nal. 11:22
Hans Enoksen, Aalisarnermut,
Piniarnermut Nunaqarfinnullu Naalakkersuisoq, Siumut.
Qujanaq. Aalisarneq pillugu
inatsisip allannguutissaanut Inatsisartut inatsisaatut siunnersuut matumuuna
Naalakkersuisut sinnerlugit saqqummiutissavara.
Siunnersuut allannguutissanik
ukuninnga imaqarpoq:
Siulleq; raajarnianut
avataasiortunut sinerissap sinerissallu qanittuani aalisartut akornanni TAC-p
agguarneqarnera.
Aappaattut; aalisakkat
assigiinngitsut aalajangersimasut pillugit nalunaarutit avammut
saqqummiunneqartarnerini malittarisassanik aalajangersaaneq.
Pingajuattut; tunitsivinnik
tunisassiorfinnillu nutaanik pilersitsisoqarniarnerani tunisassiorfiillu
pioreersut allanik tunisassiornialerneranni Naalakkersuisut
akuerseqqaartarnissaanik aalajangersaaneq.
Sisamaattut; aalisarnermut
siunnersuisooqatigiinnut pisinnaatitsissutip allanngortinneqarnis-
saa.
Aalisarnermi inatsisissap
allanngortinneqarnissaanik siunnersuummi rejerniarnerup naleqqussarneqarnissaanik
ataatsimiititaliap suligasuartup inassuteqaatai tunngavigineqarput.
Sinerissap qanittuani
avataasiorlunilu rejernianut TAC-p agguarneqarnera inatsimmut ilanngunneqarnissaa
siunnersuutigineqarpoq. Taamaalilluni sinerissap qanittuani rejernianut 43%-it
aammalu avataasiorlutik raajarnianut 57%-it pisassanngortinneqartassallutik.
Agguaaneq KNAPK-p APK-llu decemberip
aqqarngani 2001-imi isumaqatigiissutaanik tunngaveqarpoq.
Tamannalu ilaatigut ukiorpassuarni
annertuumik ajornartorsiutaasarsimavoq. Naalakkersuisut kattuffiillu akornanni.
Tamakkulu qaangerniarlugit Naalakkersuisut siunnersuuteqarput
TAC-p agguarneqarnera inatsimmut
ilanngunneqassasoq.
Maannamut agguaasarneq ukiumoortumik
Naalakkersuisunit aalajangersarneqartarpoq inatsimmut ilanngussinermi tamanna
Naalakkersuisut allanngortikkusuppaat. Kattuffiit peqatigalugit
agguaasarnissamik aajalangersimasumik siunnersuuteqarlutik. Siunissami
taamaalilluni toqqissisimasumik paasiuminartumillu agguaasarnerup pinissaa
nalunaarutigineqassalluni.
Taamatut nalunaaruteqarneq piffissaq
sivisooq eqqarsaatigalugu aalisartut pilersaarusiortarnissaannut
aningaasaliisartullu tatiginninnissaannut kiisalu nunami suliffissaqartitsiniarnermut
pilersaarusiornissamut pingaaruteqarpoq. Taamaammat pisassat
agguaanneqarnissaannut tunngaviliisoqarnissaa ersarissarneqarpoq.
Sinerissap qanittuani pisassat
ilisimalluarnissaanut tunngaviliisoqarnissaa anguniarlugu siunnersuutigineqarpoq
pisassat avinneqartarnerat ersarissarneqassasoq. Tamannalu sinerissap
qanittuani rejerniarnerup naleqqussarneqarnissanut pingaaruteqarpoq
pisariaqarlunilu.
Avataasiortut
pilersaarusiornissannut tunngavissat ersarissarneqarput. Siunissamut
pilersaarusiornissap inatsisip allanngortinneqarneratigut
qularnaarneqartussanngormata. Tunumi pisassat tamakkiisumik avataasiortunut
pisassiissutigineqartarmata tamanna allanngortinneqassanngilaq.
Aammattaaq aalisakkat
assigiinngitsut aalajangersimasut pillugit nalunaarutip avammut
saqqummiunneqartarnerini malittarisassanik aalajangersaanissaq
siunnersuutigineqarpoq.
Tassa avammut saqqummiusseriaatsit
piffissaritinneqartoq pissutigalugu naleqqutinngimmata. Malittarisassat
taamaallaat atuutissapput aalajangersimasunik aalisartoqartillugu. Taakkunannga
aalisartut kikkuuneri nalorninartoqartillugu.
Piffissami killilimmi aalisarnerup
allanngortinneqarnerani aammalu aalisarnerup aallartinneqarsinnaaneranik
unitsinneqarsinnaaneranillu nalunaaruteqarnermi. Tassani anguniarneqarpoq
sukkasuumik nalunaaruteqarsinnaanermut periarfissat pitsanngorsarneqarnissaat.
Taamaalilluni ilaatigut kingusinaartumik nalunaaruteqartarnerit
pinngitsoorneqarsinnaanngussapput.
Soorlu aalisarnermi
unitsitsisarnerit eqqarsaatigalugit tassunga kapisilinniartarneq
assersuutigineqarsinnaavoq.
Naalakkersuisut allattoqarfianni
inatsisinik allaffiup innersuussuteqarneratigut taamatut siunnersuuteqartoqarpoq.
Kiisalu tunitsivinnik
tunisassiorfinnillu nutaanik pilersitsisoqarniarnerani tunisassiorfiillu
pioreersut allanik tunisassiornialerneranni Naalakkersuisut
akuerseqqaartarnissaanik aalajangersaanissap ilanngunneqarnissaa
siunnersuutigineqarpoq. Taamatut akuersissuteqartoqartarnissaa aalisariutit
umiarsuillu tunitsiviit eqqarsaatigalugit aalisarneq pillugu inatsimmi
maannakkut atuuttumi aalajangersagaqareerpoq.
Misilittakkat takutippaat
tunitsivinnik tunisassiorfinnillu taamatut aqutsilernissaq pisariaqartoq. Assersuutigalugu
kalaallit nunaata sineriaani arlalinnik tunitsiviliortoqarnikuuvoq. Tamassumalu
ilaatitigut kinguneraa pisassat sipporlugit sipporlugit,
naammaassisaqarsinnaassuserlu sipporlugu atuisoqalernera.
Tunitsiviit amerlavallaalernerat
aaqqissuussaasumillu aqunneqannginnerata kingunerisaanik sumiiffinni suliffiit
matoorarneqarput innuttaasut ilaanut kingunerluttunik.
Ataqatigiissaarisoqannginnera pissutaalluni angallatitaartornerit annertuumik
ingerlanneqarsimapput ilaatigut aalisartunut ilungersunartorsiornermik
kinguneqartunik. Tunitsivissat arlallit matoorarneqarsimanerat pissutigalugu.
Naalakkersuisut
pingaartilluinnarlugu oqaatigissavaat pisuussutit uumassusillit
aallaavigilluarneqartarnissaat pingaaruteqarluinnarmat qanoq annertutigisumik
pisuussutit uumassusillit nungusaataanngitsumik iluaqutineqarnissaasa
atorluarneqarnisaannut.
Taamatut aqutsilernissamut
pingaaruteqarluinnarpoq ersarissassallugu soorlu innaallagiaqarnermut
tunngasut imeqarnermut tunngasut sulisussaqarnermut tunngasut
ataqatigiissaarneqarnissaat taamatut ilusiliinikkut aaqqinniarneqarmat.
Taamatut ilusiliniiniarnikkut annertuumik qulaarnaarniarneqarpoq
aalisarnikkup politik-ip ataqatiissaarluartumik ingerlanneqarnissaa. Tassalu
aalisarnikkut tunitsivissaqarnikkut sulisussaqarniarnikkullu,
ataaqatigiilluartumik aaqqisooqartarnissa sapinngisamik inuussutissarsiortunut
tamanut iluaqutaasumik aaqqiisoqartarneratigut.
Naggataatigut
siunnersuutigineqarpoq, aalisarnermut siunnersuisoqatigiinnut piginnaatitsissut
allanngortinneqassasoq. Taamaalilluni siunissami Aalisartut Kattuffii,
sulisoqarfiillu aalisarnermut tunngasunik suliallit kisiisa
ilaasortaatitaqarsinnaalersillugit.
Aalisarnermut pisortaqarfiup imminut
siunnersortannginnissaannit kissaateqarnermit aalajangersagaq tunngaveqarpoq,
Aalisarnermut Siunnersuuisoqatigiit pisariaqartillugu soorunami pisortaqarfiup
aaliangersimasumik ataatimeeqataasarnissaa kissaateqarfigisinnaavaat.
Aalisarnermut Siunnersuisooqatigiit
tusarniaaffigineqartarnerini ilaasortat ataasiakkaat aamma
tusarniaaffigineqarsinnaaneri immikkoortoq 3-mi siunnersuutigineqarpoq.
Erseqqissaarneqassaaq aalisarnermut siunnersuuisooqatigiit ataatsimut
tusarniaaffigineqartarnissaat tunngaviusumik kissaatigineqarmat. Uani
pingaartumik eqqarsaatigineqarpoq piffissakilliorneq pissutigalugu
siunnersuisooqatigiit ataatsimiigiaqquneqarsinnaannginnerini ilaasortat
ataasiakkaat tusarniaaffigineqartarsinnaaneri.
Naggasiullugu malugeqqussavara uani
oqaluuserisap siuliani aamma eqqartorneqareersoq. Tassalu Inatsisissagut
siunnersuutip '
10, immikkoortoq 2-p aamma ' 32, immikkoortoq 1-ip kalaallisut qallunaatullu oqaasertaliorneri
nikingassuteqalaarmata. Tamanna ajuusaarutigaara.
Nikinganeri siunnersuutip aappassaaneerneqannginnerani
aaqqinneqarnissaat isumagineqassaaq. Neriuppungalu tamanna
akuersissutigineqassasoq. Oqaatigereerpara ajuusaarutigalugu taama pisoqarnera
sapinngisarpullu tamaat siunissami taamatut pisoqaqqinnginnissaa pinngitsoorniassavarput.
Qujanaq.
Anders Andreassen, ataatsimiinnermik
aqutsisoq, Inatsisartut Siulittaasuata tullia, Siumut.
Naalakkersuisuni ilaasortamut
qujavugut. Taava maannakkut partiit, Kattusseqatigiit attaviitsullu
oqaaseqartuannut nuuppugut. Siulliulluni oqaaseqassaaq Lars-Karl Jensen Siumut.
Lars-Karl Jensen, Siumup
oqaaseqartua.
Siullermik Naalakkersuisumut
qujavugut naqqiutit taakkua taammagit. Imaallaat oqaatsivut naalipput aamma.
Allannguutissatut siunnersuut manna ilaatigut
tunngaveqarpoq Kalaallit Nunaata kitaani raajanik pisassiisut tamarmik TAC-tut
taasakkatta maannakkut agguaanneqartarnerata allanngortinneqarnissaannik.
Tassalu maannakkut agguaasseriaaseq
atuuttoq imaappoq sinerissamut qanittunut raajarniutinut 40 procent-imik
pisassiisarnerup avataasiuutinullu 60 %-imik annertussuseqartup agguneqartarnerata
allanngortinneqarnissaannik imaalillugu. Sinerissami qanittumi aalisartunut
43%- inngorlugu avaataasiortunullu 57%-inngorlugu agguaassisoqatalissalluni.
Taamatut Naalakkersuisut
siunnersuuteqarnerat Siumumiit ilassilluarparput. Tamanna naleqquppoq
Inatsisartunit siusinnerusukkut oqallinnermi akuersissutigisatsinnut, tassalu
sinerissamut qanittumi raajarniutit akilersinnaasumik ingerlatsisinnaanerannut
aqqutissiuiunnaarnissaannik KNAPK-mit kissaatigineqartumik Siumut tungaanniit
akuereersimasatsinnut.
Tamanna isumalluarfigaarput.
Tamatuma malitsigisaanik angallatinik akunnattunik angissusillit
pisassiissutinik pigisat atorlugit namminneq tunisassiorlutik
aningaasarsiornikkut patajaallisinneqarnissaat anguniarlugu
suliniuteqarnissamut naapertuummat.
Siumumiit neriuppugut pisassat
agguaanneqartarnerannut allannguineq tamanna aalisartuniit angallatit
nutaanngilisut taarsersorneqarnissaanut ilaasalu pisassiissutit kattullugit
anginerusunik angallatitaarnissamut aqqutissatut atorluarneqarnerunissaannut
ammaassisuussasoq.
Naggataatigut inatsisip
allannguutissaattut paragraf allat siunnersuuteqarfiusut aalisarnermi pissutsit
patajaallisarnerannut attuumassuteqarmata taakkua annertunerusumik
oqaaseqarfiginagit Siumumiit akuersaaratsigut oqaatigissavarput.
Siumumiit taamatut oqaaseqarluta
allannguutissatut siunnersuutip aappassaanneerneqannginnerani Inatsisartut
aalisarnermut ataatsimiitsitalianut ingerlateqqinneqarnissaat inassutigaarput.
Anders Andreassen, ataatsimiinnermik
aqutsisoq, Inatsisartut Siulittaasuata tullia, Siumut.
Lars-Karl Jensenimut qujavugut. Maannakkut
oqaaseqassaaq Finn Karlsen, Atassut.
Finn Karlsen, Atassutip oqaaseqartua.
Aalisarneq pillugu Inatsisartut
inatsisaattut allannguinissamut siunnersuummut Atassummiit Imaanumut
oqaaseqassaagut.
Siullermik raajarniarnermut tunngatillugu
avataasiortut sinerissallu qanittuani aalisartut akornanni TAC agguaanneqarnera
siunissaq eqqarsaatigalu aalisartunut aalisartuinnaangitsunummi
aningaasalersueqataasinnaasut aamma eqqarsaatigalugit periarfissinneqarnerat
Atassumiit iluarisimaarlugu oqaatigissavarput.
***
Backup bċnd 19 naavoq
Johan Lund-Olsen, Inuit Ataqatigiit.
Qujanaq
Aalisarnermik inuussutissarsiuteqarneq
nunatsinni inuussutissarsiutit nunanut allanut tunisassiortut annersaraat
pingaarnersaralugulu. Taamaammallu inuussutissarsiutip aningaasatigut inissisimanera
ineriartorneralu nunatta aningaasaqarneranut inuiaqatigiinnullu pingaarutilerujussuuvoq.
Nunatta tutsuiginartumik patajaatsumillu
aningaasatigut ineriartornissaanut periarfissaqartitsiumalluta taamaattumik
aalisarnermik inuussutissarsiuteqarneq pitsaasumik inatsisitigut
sinaakkutassaqartittariaqarparput. Inuussutissarsiutip aningaasaqarnikkut
imminut napatissinnaanngorluni ingerlatsiviulerlunilu ineriartortitsiviunissaa
aamma angusinnaajumallugu.
Taamaamaakkaluartorli Inuit Ataqatigiit
qangaaniilli erseqqissartuartarparput, tamatumani inuuiaqatigiit ataatsimut
soqutigisaat aallaavigineqaqqusaratsigit pisuussutitta uumassusillit
akisussaassuseqartumik nungukkiartuutaanngitsumillu kingunissatsinnik aamma
iluaqutigineqartuarsinnaaqqullugit taamaammallu aamma inuit
ingerlatseqatigiiffiillu ataasiakkaaginnaat soqutigisinnaasaat
salliutinnaveertaartariaqaratsigit .
Ukiormi kingullermi aalisarneq
ajornartorsiorfiusimavoq, pingaartumik sinerissap qanittuani aalisarnermik
inuussutissarsiuteqarneq eqqarsaatigissagaanni. Ajornartorsiorneq suli qaangerneqaqqajanngilaq.
Ukunilu aggersuni suli naalakkersuinikkut aaqqiiniutissanik tunngavissarsiorlutalu
nassaarniartariaqarpugut.
Inuit Ataqatigiit pisinnaasagut
malillugit, tamatumanut peqataavugut. Piareersimajuarpugullu aalisarnermi
inuussutissarsiuteqarnermi ajornartorsiutit annertuut arlallit, ingammik
sinerissap qanittuani atugarineqartut eqqarsaatigalugit aaqqiiniaqataassalluta.
Naalakkersuisut ullumikkut Inatsisartunik
aalisarneq pillugu inatsimmut pioreersumut allannguutissamik
siunnersuuteqarput. Nunatta imartaani aalisarneq tamaat ataatsimut pinngikkaluarlugu,
raajarniarnerup naleqqussarneqarnissaannut tunngatinneqartumik.
Allannguutissatut siunnersuutigineqartut ataatsimiitsitaliap
suligasuartitaasimasup inassuteqatigisimasai tunnngavigalugit suliaasimasoq
ilisimassutigineqarpoq.
Saqqummiussissummili taasumalu saniatigut
inatsimmut allannguutissatut siunnersuummi erseqqinngilaq ataatsimiitsitaliaq
suligasuartinneqarsimasoq, sorleq pineqarnersoq. Ilisimaneqartutuummi ukiup
ataatsip ingerlanerinnaniunngitsoq aalisarnerup iluani Naalakkersuisutsigoortumik
marlunnik ataatsimiitsitalianik pilersitsisoqartarsimavoq.
Taamaattumik paasissutissaq tamanna
pingaaruteqartoq maqaasinarmat, siullermik Inuit Ataqatigiinniit
kissaatigissavarput tamanna Naalakkersuisunit erseqqissaqqaarallarneqassasoq
ataatsimiitsitaliaq suligasuartinneqarsimasoq tassaasimappat Enoksenudvalgimit
ukiaq taaguuserneqarluni aallartinneqarsimasoq Inatsimmut allannguutissatut
siunnersuutip inaarsarlugu suliarineqarnissaanut peqataanissatsinnullu
pisariaqartipparput, taasuma taagukkatta inassuteqataatigisimasaat tamakkiisut
agguaanneqaqqullugit. Inatsisiliortutummi tamatta aamma pingaartittariaqaratsigut
aaliangiiniarnissatsinni assigiimmik tunngavissaqarnissarput.
Nunatta imartaani
raajartarsiissutigineqartartut tamakkiisut TAC eqqarsaatigalugit tassalu
avataasiortunut 57%-inik sineriassiortunullu 43%-inik Inatsimmik
allassimanerluni agguaanneqalertalernissaat siunnersuutigineqarmat, Inuit
Ataqatigiit tunngaviatigut isumaqataaffigisinnaavaat,. KNAPK-p APK-llu tamanna
isumaqatigiissutigisimasaannik aamma tunngaveqarmat.
Tamaattorli agguaasseriaatsip
inatsisinngortinnera siunissami Inatsisartut allannguerusulersinnaanerannut
ajornakusoortittalersinnaassammat, Inuit Ataqatigiit kissaatigissavarput
tamanna Inatsisartut Aalisarnermut, Piniarnermut Nunalerinermullu
Ataatsimiititaliaaniit nalilersorneqarluarumaartoq.
Pisariaqassappallu Inatsisilerituut
immikkut ilisimasaqarluinnartut aamma aggersarneqarsinnaanerisigut
nalilersuiffigineqarumaartoq.
Inuit Ataqatigiit arajutsisimanngilarput
agguaasseriaatsip inatsisinngortinniarneqarnerata nassatarisaanik matuma kingorna
aalisartut anginerusumik piginnaaneqqortunerusunillu aalisariutitaaniartunut
taarsigassasinneqarnissaq eqqarsaatigalugu tamanna pitsannguallatsitsissasoq
ingammik sinerissap qanittup aalisartut eqqarsaatigalugit.
Taamaattorli suliap ingerlaqqinnerani
tamanna aamma ataatsimiitsitaliamit misissorneqaqqaassasoq
kissaatigissavarput. Aningaaseriviit aalisarnermut ataatsimiitsitaliamit aamma
paasiniaavigineqarnerisigut.
Inuit Ataqatigiit iluarisimaarparput,
Naalakkersuisut agguaasseriaatsimmik allannguineq uagutsitulli naalagaaffiup
arsaarinninneratut nalilersimanngimmassuk. Tamanna pingaaruteqarluinnarpoq
aaliangiusimajuassallugu. Inuit Ataqatigiimmi tunngaviusumik isumagiuarparput
pisuussutigut uumassusillit aammalumi uumaatsut ilanngullugit inuiaqatigiit
ataatsimut pigiuartariaqarigut, naassaanngitsorsuarmik inunnut
ingerlatsitseqatigiiffinnulluunniit ataasiakkaanut pigisassanngorlugit
tunniunneqarsinnaanngitsut.
Raajartarsiissutigineqartartut
eqqartortillugit Inuit Ataqatigiit pissusissamisoorsorivarput nunami
tunisassiorneq imaluunniit sinerissap qanittuani raajarniarnermi
nioqqutissarsiorneq aamma erseqqissaateqarfigilaassallugit. Nunamimi raajanit
aalisakkanillu allanit suliareqqiisarfiusuni suliffissaqatitsiuarnissaq Inuit
Ataqatigiit pingaartippaat, ukiunilu arlalikasinngortuni tamanna aamma
oqaatigiuartarsimallugu.
Ukioq mannamut raajartarsiissutit
qiviaraanni siornatulli amerlatigipputm, tassalu sinerissap qanittuani 36.000
tonsit, kiisalu avataani 48.000-50.000 tonsit missarpiaaniillutik.
Taakku nunami Royal Greenlandip maannamut
raajanut tunisassiorfiutigisaannut ingerlasunut, Maniitsumiittoq
matoreeraluartoq naammakutsoorput. Taamaammallu matusiniarnissamik
oqaluttarnerit tutsiuttarsimasut, soorlu ukioq Aasiammiut taamatut ernumatinneqaleraluartut
Inuit Ataqatigiit isumaat malillugu tunngavissaqanngilluinnarpoq.
Tamanna ajornanngilaq, naak sinerissap
qanittuani rajarniat namminneq imaani 7,5
tonsit tungaannut aamma tunisassiarilissagaluaraannikkulluunniit.
Tamanna qujanartumik ukioq manna
avataasiortut nunamut tulaassugassaasa kingumut qangatut 25%-iussasut
aaliangerneqarsimanerannit tunngavissinneqarpoq. Taamaamallu Inuit Ataqatigiinniit
isumaqarpugut suli tunngavissaqarluartoq kujataanik marlunnik imaluunniit pingasunik
raajaleriffeqarnissamut, qeqqani marlunnik kiisalu Aasianni aamma Ilulissani
raajaleriffeqartuarnissamut.
Tassungalu tunngatillugu Inuit
Ataqatigiinniit erseqqissarlugu aamma oqaatigissavarput kommunit, aalisartut,
sulisartut sumiiffinnilu ataasiakkaani namminersortut ataatsimoorlutik namminneq
tunisassiorfimmik ingerlatsiumalerlutik pilersitserusussinnaasut pisortat
tungaanniit qiimmassarlugillu suliniarnerini nikorfartortariaqaratsigit,
pisortammi kisimik isumallutigiinneqaannarsinnaanngimmata.
Piginneqatigeriaatsit nutaat
toqqaannarnerusumik innuttaasut tikivillugit oqartussaaqataallutillu
peqataasitsisut taamaatumik ikummarissartariaqarput.
Taamatut isumaqarnerput
saqqummiutereerlugu taamaatumik Naalakkersuisoq tamatumani qanoq
isummersorsimanersoq paaserusunnarpoq. Tassami apeqqut kommuninut sulisartunut
aalisartunut allarpassuarnullu pingaarutilerujussuuvoq.
Aalisakkat assigiinngitsut pillugit
nalunaarutit avammut saqqummiuneqarttarneqarnerini malittarisassanik
eqaallisaaniartoqarnera, kiisalu aalisarnermut siunnersuisoqatigiinnut tunngatillugu
siunnersuutigineqartoq Inuit Ataqatigiit pissusissamisoortutut
isumaqarfigimmatigit, taakku annertunerusumik oqaaseqarfigissanngilagut.
Sinerissami qanittumi aalisariutit
raajanik avataasiortunulli tunisassiorsinnaalernissaat akornutissaqatinnagu
oqaaseqarfigereerparput. Taamaatorlu periarfissat manna aqqutigalugu erseqqissartariaqarsorivarput,
tamanna Inuit Ataqatigiit peqataaffigisinnaagatsigut. Siullermik
rajartassiissutit tamakkiisut TAC nunami tunisassiorfinni annertunerpaamik
nioqqutissiarissinnaasaat aatsaat qaangeqagaangamikkit.
Kiisalu aappaattut minnerunngitsumik
tamanna sinerissap qanittuani raajaqassutsip navianartorsiortinneqalinnginneranni
kinguneqartumik aatsaat aaqqissuussiffigineqarsinnaappat.
Taamaattumik kingulleq taaneqartoq
eqqarsaatigalugu erseqqissartariaqarpoq Inuit Ataqatigiit ernumanartutut
isigissammassuk sinerissap qanittuani raajarniarnermi aalisartut avataasiortullu
angitigisunik kilisaassuarnik pitaartorlutik aalisalissagaluarpata. Imaluunniit
avataasiussuit APK-mi ilaasortaasut aamma sinerissamut tiffarterlutik
raajarnialissagaluarpata. Tassami pisuussutinik nungukkiartuutaanngitsumik
tamatta atuiniartariaqarpugut kingunissagut pissaqartittuarnissaat aamma
qulakkeerniarumallugu.
Taamaattumik sinerissap qanittuani
raajarniutit tunisassiorsinnaatitaasussat qanoq angitigissanersut aamma
aalisarnermut ataatsimiitsitaliami sukumiisumik eqqartortariaqarpagut. Aammalu
minnerunngitsumik kinguaariit siunissaat qulakkeerumallugu
iliuuseqartariaqarluta. Taamaatumik inuusuttut aalisalerumaartussat
eqqarsaatigalugit raajarniarnermi periarfissaat aamma
annertusarniartariaqarpagut inatsit aamma manna aqqutigalugit.
Allannguutissatut siunnersuutigineqartoq
kingulleq, tassalu tunitsivinnik tunisassiorfinnillu nutaanik
pilersitsisoqarniarnerani tunisassiorfiillu pioreersut allanik
tunisassiortinnialeraanni Naalakkersuisut akuerseqqaartarnissaannik
piginnaatitsilersussaq eqqarsaatigalugu, Inuit Ataqatigiit oqaatigissavarput
tamanna aamma ataatsimiititaliami sukumiisumik eqqartorneqallaqqugatsigu.
Taamaattorli oqaatigeriissavarput tamanna
aatsaat aqqutissiuunneqalernialermat, aalisakkanik allanik qalerualinillu
mannamut suli anikitsuaraannarmik iluaqutigisatsinnut atuilluanerulernermik
kinguneqarsinnaappat, tassami maannamut annikittuaraannarmik soorlu saarulliit
, uukkat, kapisillit, uiluiit, nataarnat, qeeqqat, tupissutit suluppaakkallu
nioqqutissiarivagut naak imartatsinni kangerlutsinnilu peqarluaraluartoq.
Taamaattumik tamakku taagorneqartut
aningaasarsiorfissanillu nutaanik pisariaqartiqisatsinnik
aallartitsinissatsinnut periarfissaalluartut eqqarsaatigineqarsimappata Inuit
Ataqatigiit allannguutissatut siunnersuutigineqartoq tunisassiorfinnullu
pioreersunut tunngasoq peqataaffigikutsoorsinnavarput.
Tassuungali tunngatillugu
eqqaassutigeqquvarput Inuit Ataaqatigiit taamatut sunniutaasinnaasunik
siunnerfeqartumik upernaakkulli siunnersuuteqartareersimagatta Inatsisartunik
tamarmiusunik tapersersorneqartumik tassalu aalisakkanik qalerualinnillu
tukertitsiviliorsinnaanermut pisarisuukkerivimmillu tassa bifangstbank
pilersitsilersinnaanermut periarfissiisunik.
Tassami ukiuni aggersuni aalisarnermut
atatillugu inuussutissarsiorfissat annertuut nutaallu iluatsinniartariaqarpagut
taamaalillutami aatsaat aningaasarsiornermut periarfissat raajat saattuat
qalerallillu saniatigut nutaat pilersissinnaanngussavagut.
Taamaattumik aalisarnermut inatsit
eqqartortillugu naggataarutaasumi Inuit Ataqatigiit oqaaseqarallarnitsinnik
kaammattuutigissavarput Naalakkersuisut siunnersuutigisaasa saniatigut
aalisarnermik inuussutissarsiuteqarnermut atatillugu misissuinerit
ineriartortitsinerillu annertusaavigineqaqqullugit.
Taamatullu oqaaseqareerluta Inuit
Ataqatigiit qilanaarpugut Inatsisartut aalisarnermut Piniarnermut
Nunalerinermullu Ataatsimiititaliaanni suleqataanissatsinnut. Qujanaq
Daniel Skifte, ataatsimiinnermik
aqutsisoq, Inatsisartut Siulittaasuat, Atassut.
Johan Lund-Olsenimut qujavugut. Maannakkut
oqaaseqassaaq Mads-Peter Grĝnvold, Kattusseqatigiit.
Mad-Peter
Grĝnvold, Kattusseqatigiit.
Aalisarneq
pillugu Inatsisartut inatsisaat
allanngortinneqarnissaannut inatsissaattut siunnersuut Kattusseqatigiinniit
siullermeerneqarnerani imatut oqassuunga.
Taamatut
inatsisitigut aaliangersaasarneq tunngavissiisarpoq qanoq annertutigisumik
sinerissap avataani aammalu sinerissap qanittuani pisassiisutit iluani
agguariaatsip inatsisitigut siunissami qulakkeerisinnaanera. Taamatut
inatsisitigut allanngortitsinerup kingunerissavaa ukiunut arlaqarnerusunut
sinerissap avataani aammalu sinerissap qanittuani aalisartut pisassiissutaasa
iluani agguariaatsip nalorninanngittumik takuneqarsinnaalernissaa.
Kattusseqatigiinniit
pingaaruteqarluinnartutut isigaarput sinerissap avataani aammalu sinerissap
qanittuani aalisarnerup imminut akilersinnaasumik siunissami
ingerlattuarneqarnissaata Naalakkersuinikkut qulakkeerneqartariaqarnera.
Inatsisitigut
pisassiissutit iluani agguariaatsip allanngortinneqarneriinnaasigut aalisarneq
imminut akilersinnaasumik ingerlanneqarnissaa qulakkeerneqarsinnaanngilaq.
Tassami apeqqutaalluinnartarmat tunisassiat avammut tunineqarnerani akiisa
qanoq inissisimanerat.
Sinerissap
qanituani raajat tunisat akiisa akii qiviaraanni ilaatigut aalisartunit
oqaatigineqartarpoq iminut akilersinnaanngitsumik sinerissap qanittuani
aalisarneq ingerlanneqartoq. Taamatumik pingaaruteqarluinnarpoq sinerissap
qanittuani raajarniarnermi angallatit atorneqartut imminut akilersinnaasumik
taarsersorneqartariaqarnerat.
Ukioq
manna Inatsisartunit aningaasanik inatsit qiviaraanni sinerissap angallatit
taarsersorneqarnissaannut aningaasaliissutit naammanngilluinnartutut oqaatigineqartariaqarput
tassami Kattusseqatigiinniit ESU-mut aningaasaliissutit eqqartorneqarmata
oqaatigaarput suli aningaasat amerlanerusut atorfissaqartinneqartut angallatit
imminut akilersinnaasunik taarsersorneqassappata.
Aningaasanut
inatsit ukioq manna qiviaraanni nutaamik angallatitaarniartut
tapiiffigineqarsinnaanngillat tassa Inatsisartunit aaliangerneqarsimammat
nutaanik angallatitaarniartut tapiiffigineqartannginnissaat. Isumaqarpunga
taamatut Inatsisartut aalajangersimanerat kukkunerusoq tassami ESU-kkut
periarfissiisoqanngippat kikkut sinerissap qanittuani aalisartut nutaanik
nammineerlutik angallatitaarsinnaappat. Sinerissap qnaittuani akit taamak
itsillugit sinerissap qanittuani aalisartut amerlanerusut akissaqanngitsut
oqaatigineqarsinnaammat.
Kattusseqatigiinniit
arajutsisimanngilarput nunarsuarmut raajat akiisa qaammatini kingullerni
pitsaannginnerat. Taamatut raajat ajorsiartuinnassappata illuatigut ukiumut
pisassiissutit tamakkerneqanngitsoortarsinnaalernissat ilimagisariaqarpoq
tassami aalisarneq imminut akilersinnaanngippat aalisartunut aalisarneq
ingerlatiinnarneqarsinnaanngitsoq oqaatigineqartarmat.
Assersuutigalugu
ukioq manna pisassiissutit qiviaraanni avataasiorlutik aalisartut pisassaat
annerusumik
qaffanneqanngillat soorlumi amma sinerissap qanittuani aalisartut pisassaat
aamma annertunerusumik qaffanneqanngitsut naak illuatigut Canadamiit
raajartassaat ukioq manna annertuumik malunnaatilimmik qaffanneqartut.
Ukioq
manna nutaamik angallatitaarniartumik 20 millionit aningaasaliissutigineqartut
taamatut aningaasaliinnermut eqqaamaneqartariaqarpoq sinerissap qanittuani
aalisarnerup ineriartortinneqarnissaanut aningaassaliissutit pineqartut
atorneqartussanngorlugit aningaasaliissutigineqarmata.
Tunitsiviit
nioqqutissiorfiillu nutaat pilersinneqassappata Naalakkersuisut
akilerissusitseqqaarlugit pilersinnneqartarnissaat
pinngitsoorneqarsinnaanngitsoq Kattuseqatigiinniit isumaqarpugut. Tunitsiviit
nioqqutissiorfiillu imminut akilersinnaasumik ingerlanneqassappata
tunisassiassanik pilersuisinnaasut aamma qulakkeerneqartariaqarput. Tassami
tunisassiorfiit pilersinneqarsinnaanngillat tunisassiassanik
pilersorneqarsinnaangikkunik.
Kattusseqatigiinniik
pingaaruteqarluinnartutut isigaarput piffissa ungasinnerusoq isigalugu
pisuussutinnut uumassusilinnik piuaarnartitsisinnaanerup naalakkersuinikkut
qulakkeerneqartariaqarnera. Tassami piffiit ilaat naalisarneq qiviaraanni
ilaatigut aalisarfiit annikitsut annertuumik
aalisarfigineqartarput.
Assersuutigalugu Ilulissat kangerluata saani qaleralinniarnermi qassutit
ukioq kaajallallugu atorneqarsinnaasunngorlugit Naalakkersuisunit
aalajangerneqarpoq, naak pineqartuni aalisartut piumasarigaat piffissap ilaani
qassutit atorneqarnissaat.
Tassami
piffiit ilaanni aalisapilunnerit kingunerisarmassuk aalisakkat
pisarineqartartut milliartulertarnerat. Taamaattumik Kattusseqatigiinniit
pingaaruteqarluinnartutut isigaarput aalisarnermi qassutit killilimmik
atorneqartarnissaat.
Kattusseqatigiinniit
Naalakkersuisunut kaammattuutigissavarput pisuussutit uumassusillit
piujuaannartitsinissaq eqqarsaatigalugu siunissaq ungasinnerusoq isigalugu
piniutit ilaannik piffissap ilaani killilersuisariaqarnerup eqqunneqartariaqarnera
pinngitsoorneqarsinnaanngimmat.
Taamaaliornikkut
nunatsinni aalisarnikkut inuussutissarsiuteqaannarsinnaaneq piffissaq ungasinnerusoq
isigalugu illersorneqassammat. Kattusseqatigiinniit Naalakkersuisut
piumaffigissavagut sinerissap qanittuani aalisarnermi aalisarfiit ilaanni
aalisartut aalisarfinngulersaattarnerat inatsisitigut
iluarsiiffigineqartariaqarmat. Aalisartut akornanni piffiit ilaanni aalisarfilerngusaattarnerit
iluarsisinnaanngippatigit.
Qeqertarsuup
Tunuani saattuarniarneq aallartinneqarmat siusinnerusukkut rejerniarluni aalisarfiusartut
saattuarniarnermi aamma aalisarfiusalerput. Taamaaliornikkut piffiit ilaanni
aalisarfilerngusaattarnerit ingerlanneqartalerlutik.
Taamaattumik
Kattusseqatigiinniit Naalakkersuisunut kaammaatuutigissavarput aalisartut
kattuffiata akornanni aalisartut aalisarfilerngusaattarnerat
iluarsineqarsinnaanngippat aalisarnermut pisortaqarfiup suliassaq
suliniutigisariaqaraa isumaqaratta.
Taamatut
oqaaseqarluta aammalu oqaaseqaativut innersuussutigalugit suliap aappassaaneerneqannginnerani
aalisarnermik piniarnermik nunalerinermullu ataatsimiititaliami pineqartup
suliarineqarnissaa Kattusseqatigiinniit innersuussutigaarput.
Otto
Steenholdt, attaviitsoq.
Immaqa
ullaap tungaa oqallinnitsinnut attuumagaluarnersoq. Taava inatsisit
allanngortinniarneqarneranni pitsaasaraluarpoq inatsisip allanngortitassap
qanoq isikkoqarsimagaluarnera ilanngullugu Inatsisartunut agguaattarlugu.
Oqaaseqatigiit imaluunniit paragraffiinnaalluunniit ikkutassat siuliminut
tulluuttuunersut allanngortitsinnaasunut tassa Inatsisartunut ilaalluni
takorusunnartarmata sanileriisillugit misissorlugit.
Immaqa
paasinerluisimagaluarnerlunga allannguutissatut siunnersuut '5,
immikkoortoq 2-p kingornanut ilanngunneqartussaq maani siunnersuutip qiterisaa
issuaaffigilaassavara. Issuaaffigilaassavara. @Kalaallit Nunaata
Kitaani raajanut TAC-p agguaanneqarnerani sinerissamut qanittumi aalisariutinut
43%-ii avataasiortunullu 57%-ii tunniunneqartassaaq. Oqaatigissavara taamatut
siunnersuuteqarneq isumaqatiginngilluinnarakku.
Sinerissami
qanittumi aalisariutit nunami suliffissuarnut tulaasuisussatut
takorloortuarpagut. Aallaallu piorneqarnissaat siunniuttarsimallugu.
Taakkuupput nunami suliffissuit ukiuni makkunani suliassaqanngimmatagooq
matooqqarneqartut. Imaluunniit matuneqassamaartunngooq. Suliffissuit matusut
matuneqalersullumi annaanniarlugit qanoq iliuuseqassagutta taakkuninnga
suliassersuisinnaasut siulliullugit pisassaannik amerlanerusunik
tunisariaqarpagut.
Eqqaamavara
aamma sinerissami qanittumi aalisarneq pillugu maani oqallissimasugu. Oqallinnermilu
qitiulluinnartoq nunami suliffissuit malersorneqanissaat, kisianni taanna
oqallisigitillugu aalisariutit ilaartorsinnaasut tassani takkuteriasaarput.
Taamaattumillu ippigisimavara massakkut siunnersuutaasoq.
Taamaattumik
Inatsisartut inanniarpakka siunnersuut itigartillugu minnerpaamik kisitsisit
paarlaateqqullugit. Tassa pisassat ima agguaanneqassasut sinerissami qanittumi
aalisartunut suliffissuarnullu tulaassuisussanut minnerpaamik 57%-i
tunniunneqassasoq, sinneralu 43%-i avataasiortunut tunniullugit.
Taamak
oqarninnut erseqqissaatigilluinnarpara nunami suliffissuit sullivinnik
sulisunik amerlasuunik suliffigineqartarneri kommuninut aningaasanik aamma
skattikkoortumik tunniussisarneri massakkut ikiliartormata suliffissuit
matooqqarnerisigut.
'22A aamma tassani issuassavara: @Tunitsiviit
nioqqutissiorfiillu nutaat Naalakkersuisut akuersissuteqartinnagit akuersissuteqaqqaartinnagit
pilersinneqassanngillat@. Tassunga naavoq. Suliffissanik
aallarnisaanissamut taamatut oqarneq tulluarsorinngilara. Issannguaq oqallisigaagut
aallarnersaasarnissat suliffissanik amerlanersunik siunissami peqassagutta
taanna tulluartuusorinngilara taamatut oqarneq.
Tassa
kikkulluunniit tunitsivissaminnik nassaarsimasut soorlu immaqa aaarullinnik
uukkanilluunniit tarajortikkanik periarfissaqartariaqarput tunitsivinnik
aallartitsinissaminnut. Suut tamaasa qulaaniit aqunneqartutuut
apersorusaaginnarnagit. Immikkoortoq 2-p suli tunisassiorniarneq
niuerniarsinnaanerluunniit ajornarnerulersippaa. Tunisassiornermut
niuerniarsinnaanermulluunniit Naalakkersuisut akuliutsinneqartarnerat ila
peerluinnartariaqarpoq. Namminneq inuussutissarsiortut namminneq ingerlalit
qulaaniit aqunneqarnatik.
Taamatuttaaq
ippoq '32-p oqaasertassaa. Ataatsimiititaliassat suliassanik
tamakkuninnga soqutigisaqarlutik ingerlatsisut namminneq Naalakkersuisunit
akuliuffigineqaratik nioqqutissiornerminnik ingerlatsiniarlik
ingerlatsilerlutillu. Neriuppunga Inatsisartut qulaani oqaatigisannut
paasinnillutik tapersiiumaartut, kisianni tusarnaareerlugit nalunngilara
tamarmik taanna siunnersuutaasoq tapersersoraat, kisianni erseqqissassavara
uanga taanna isumaqatiginngilluinnarpara.
Hans
Enoksen, Aalisarnermut, Piniarnermut Nunaqarfinnullu Naalakkersuisoq, Siumut.
Qujanaq.
Siullermik qujassutigaara Naalakkersuisut sinnerlugit naak qujaniartoqartarnera
maani ilaatigut isoriniarneqartaraluartoq takusinnaagakku partiit aammalu
Kattusseqatigiit isumaqatigiinnerat isumaqatigiilluarnerat qanoq annertutigisoq
inatsisissamut siunnersuutigineqartut qiviassagaanni, kisianni soorunami
ataasiakkaarlugit oqaaseqarfigissavakka isumaqataanngiffiit allallu
ersarissarniarsarissavakka maanngaaniit neriuutigalugu paasineqarluarumaartut.
Siullermik
siumuminngaaniit oqaaseqartup tassa Lars-Karl Jensenip nuannaarutigaara tamakkiisumik
inatsisissaq Naalakkersuisut saqqummiussaat isumaqataaffigalugu oqaaseqarmat.
Tassani aamma maluginiarluarneqarpoq kattuffinnik suleqateqarneq aallaavigalugu
siunnersuut suliarineqarsimammat tamakkiisumik tapersersorneqartoq.
Taavalu
ukua pingaartumik ukiuni kingullerni assortuussutigineqartarsimasut tassalu
pisassat rejet eqqarsaatigalugit avinneqarnissaannik tunngaviliinissaq aamma
Siumumit tamakkiisumik tapersersorneqarmat assut nuannaarutigaara.
Taavalu
taassumap saniatigut aamma siunnersuutigineqartut allat tassalu aalisakkat
assigiin-ngitsut aalisarneqartarnerat pillugu nalunaaruteqartarnermut
tunngasut. Aammalu tunitsivinnik tunisassiofinnillu nutaanik
pilersitsisoqarniartarneranut tunngasut. Taavalu aalisarnermut
siunnersuisooqatigiinni pisinnaatitsissutip allanngortinneqarnissaa
tamakkiisumik tapersersormassuk qujassutigaara. Neriuppungalu tassani aamma
aalisarnermut ataatsimiititaliami Siumut suleqataalluarumaartoq. Aamma
naatsorsuutigaara taamaattoqassasoq oqaaseqaateqarnerat tunngavigalugu.
Taavalu
Atassumminngaaniit oqaaserineqartut. Tassa annertunerpaamik aamma tapersiipput
inatsisissap taamatut isikkoqarluni naammassineqarnissaanut, kisiannili uani
tikkuarpaat ilaatigut pitsaanerussagaluannginnersoq suliffissuarnik
pilersitsiniarluni kommunit qanimut akuersissuteqartarsinnaanerit kommuninut
aalajangiiffigisassanngortinneqarsinnaaneranik isummersornerat soorunami
tunngaviatigut akerlerinngikkaluarlugu massakkut pissutsit qiviaraanni
taamatut inissiisinnaaneq aappaatigut uanga nangiarnartutut isigaara.
Tassa
pisassat killeqarnerat pissutigalugu aqussinnaanngisatsinnik
pilersoqarsinnaanera taanna aarleqqutigigatsigu Naalakkersuisuninngaaniit.
Tassa assersuutigiinnarlugu kommunit tamatta aamma kommunit tamarmik uagullu
tamatta Inatsisartuni sumiluunniit soqutigilluinnaqqissaartarparput
suliffissanik pilersitsinissaq. Aamma kommunit taamatut saaffigineqassagunik
soorlu rejeriffinnik qaleralinnik suliarinnittarfinnik saattuanik suliffinnik
allanillu saaffigineqarunik qularinngilluinnaqqissaarpara tamarmik
akuersillutik tikilluaqqusillutillu pissasut.
Aamma
taanna pissusissamisoorpoq apeqquserneqarsinnaananilu, kisianni tassani
Naalakkersuisuni ersissutigaarput taamatut pisoqassappat kommunit
aalajangiisartunngorlugit taava aqunneqarsinnaajunnaartumik ilaatigut
aallartoqarsinnaanera tassa pisassat taamak killeqartigitillugit ilaatigut
imminut akilersinnaanngitsumik ingerlanerit allallu aqqutissiuunneqarsinnaanngussapput.
Tamatumalu kingunerisaanik immaqa suliffiit arlalissuit matuinnarsinnaanerinik
kinguneqarlutik.
Taanna
Naalakkersuisuni uagut pinngitsoortikkusupparput. Sapinngisamik aalisarnermik
politikkip aaqqissuuteqqinnerani ataqatigiissaarluakkamik suliffinnik
matooraasinnaanerit killiliisinnaanerit pinngitsoorniarlugit, kisiannili
ataavartumik ingerlaannarnissaat anguniarlugu taamatut siunnersuuteqarpugut.
Soorunami
immaqa siunissami taamatut aaqqiiniarsinnaaneq tikinneqarsinnaanngussaaq kommunit
allallu kattussuunnerisa kingunerisaanik periarfissat aamma
suliffissaqartitsiniarnermut tunngasut allanngornissaanut sillimanissat
eqqarsaatigalugit, kisianni tassa massakkut uagut Inatsisartuni
inassutiginiarparput suliffissuarnik taanna pilersitsisoqarniarnerani
Naalakkersuisut tamatigut akuerseqqaartarnissaat Inatsisartunut
siunersuutiginiarlugu. Kisianni malugisinnaasakka malillugit tassa
amerlanerussuteqarluartut taamatut innersuussuteqarneq akuersissutigaat.
Soorunami
partiit ataasiakkaat taakku namminneq oqaatsitik aalisarnermut
ataatsimiititaliami aamma erseqqissassavaat tassanilu suliarineqarneranut
peqataalluarnissaat naatsorsuutigaara. Aamma uagut Naalakkersuisoqarfitsinni
tassalu aalisarnermut piniarnermullu pisortaqarfimmi qanimut suleqataanissarput
neriorsuutigissavaa aalisarnermut piniarnermullu ataatsimiititaliamut.
Taamaalilluni pitsaasumik aaqqiissuteqarniarsinnaanerput tassani
tikinneqarsinnaaniassammat.
Tassami
aamma Atassutip uani oqaatigisaa assortorneqarsinnaanngilaq aamma ilumoorluinnaqqissaarpoq
tassa suliffinnik suliffissuarnillu pilersitsiniartut namminneq
nalilersuisarput akilersinnaasumik ingerlasinnaaneq tassani annertuumik
aallaavigineqartarluni, kisiannili uagut Naalakkersuisuninngaaniit pisassat
taamak killeqartigitillugit taamak annertutigisumik ammaassinissaq nangiarnartoqartipparput.
Taavalu
Inuit Ataqatigiit oqaaseqaataat tassalu ilumoorluinnaqqissaarpoq ukiuni
kingullerni aalisarneq pingaartumik sinerissap qanittuani annertuumik
ajornartorsiorfiusimavoq. Aamma takussutissaqareerpoq aammalu qaammatini
kingullerni pisut qiviassagaanni assut ilunersunartumik inuiaqatigiinni
killissimagaluartugut.
Raajarniartut
aalisarnerminnik unitsitsisimapput, tunisassiorfiit ilaatigut
matusaqattaarnerinik kinguneqaleraluartunik. Tassuuna assut ilungersunartumik
atugaqarsimavugut. Taannalu ajornartorsiorneq qujanartumik massakkut
qaangikannerneqarpoq. Tassa ajornartorsiutit tamarmik
qaangerneqanngikkaluarlutik, ilaatigut qaangiisoqarpoq.
Taakkulu
pitsaasumik ingerlanissaanut tamatta suleqatigiinnissarput aamma uanga
pingaartilluinnarlugu oqaatigisssavara. Aamma qularinngilara Inatsisartuni
ilaasortat partiillu aamma taamatut isumaqarlutik maani pitsanngorsaanissamut
peqataaniartut.
Tassa
ataatsimiititaliaq uani saqqummiussinermi taagorneqartoq tassa
Enoksensudvalgimik taagorneqarluni qaammatini kingullerni taaneqaqattaartoq
aallaavigineqarpoq.
Immaqa
taamatut saqqummiussinnginneq ilaatigut kukkunertut taaneqarsinnaagaluartoq
kisianni neriuppunga taanna paasilluarneqarluni taamatut
isummersorneqarsimasugut, kisianni tassa taanna Enoksensudvalgimik taaguutillip
suliai malillugit ingerlanneqarpoq.
Aamma
nuannaarutigaara Inuit Ataqatigiit ukua pisassanik agguaassinissamut
tunngasunik isumaqataanertik oqaatigimmassuk. Tassa aamma uagut Inuit
Ataqatigiittulli isumaqarpugut sapinngisamik pisassat amerlanerpaat nunamut
tulaanneqassasut. Tassa nunami suliffissuarni suliarinnittarnissaq
sapinngisarput tamaat Naalakkersuisuni qularnaarniarsarivarput.
Aamma
taanna siunissami attatiinnassavarput. Sapinngisarput tamaat nunami suliffiit illersorneqassapput.
Pingaartumik aalisakkanik suliffissuit eqqarsaatigalugit. Tassami aamma kommuninut
pingaaruteqarluinnarput aalisakkanik suliffissuaqarfiusuni ataavartumik
ingerlatsisoqarnissaa.
Aammalu ukiaq manna ilaatigullumi ukioq
suaarutigineqaraluarpoq Aasianni suliffissuaq matuneqassasoq. Tamannalu
soorunami uagut Naalakkersuisuninngaaniit akuererusussimanngilarput. Aamma
akuersaarsinnaanngilarput arlaannaanulluunniit massakkut suliffissuarnik
matusisoqarnissaa. Sapinngisarpullu tamaat peqataaniarsarissaagut aamma
suliffiit ammaannarnissaannut.
Aammalu sapinngisamik
amerlisarneqarnisaannut soorunami piumassuseqarluarpugut, kisianni tassani
soorunami apeqqutaassapput imminut akilersinnaassuseq aammalu pisassat qanoq
annertutigisumik agguaanneqarsinnaanersut.
Taava taassumap saniatigut taakkua
nammineerlutik tunisassiulertussat massakkut ilaatigut pilersaarusiorlutik
ingerlatsisut naammasseriarunik Naalakkersuisunut utertinneqaqqittussaapput
tassanilu aalajangiunneqartussaapput qassit akuerineqassanersut, kisianni tassa
siunnerfigineqarpoq annerpaamik 10.000 tonsit akuersissutigineqassasut.
Taakkulu 25%-ii nunamut tulaanneqassasut.
Aamma uani assut iluarisimaarparput uagut
Naalakkersuisuninngaaniit isumaqatigiissut kingulleq malillugu avataasiortut
pisassaat 15%-iminngaaniit 25%-imut qaffanneqarmata. Taamaalilluni aamma
nunami suliffissuarnik suliassaqartitsiuarnissaq tassuuna aamma qularnaarneqarluni
peqataaffigineqarmat.
Taavalu aamma Inuit Ataqatigiit
apeqqutigaa tunisassiorfiit taavalu kommunit, sulisartut sumiiffinnilu
ataasiakkaani namminersortut ataatsimoorlutik nammineq tunisassiorfimmik
ingerlatsiumallutik pilersitserusussinnaasut qanoq isumaqarfiginerigut uagut
Naalakkersuisuninngaaniit.
Tassa taamatut isumallit
tunngaviatigut tapersersorpagut aamma tapersersortuassavagut. Tassa
inuiaqatigiinni nammineerusuttut annertuumik qiimmassarneqarlutillu
tapersersorneqartariaqarmata.
Assersuutigiinnarsinnaavarput
massakkut Maniitsumi suliffissuaq matuneqarsimasoq piginneqatigiinneq
aqqutigalugu aqqutissiuunneqarpoq aammalu aallartinneqartussanngussaaq.
Taavalu taassumap saniatigut aamma siunnerfigineqarpoq Naalakkersuinikkut Nuka
A/S-ip ingerlataasa eqaallisaaffigineqarsinnaanissaat aamma
eqaallisarneqarnissaat. Tassa sumiiffinni najukkani nunaqarfiit
eqqarsaatigalugit aamma taakku annertunerusumik peqataalersinnerisigut
pitsaasumik aallariarsinnaanerit tikinneqarsinnaanngussammata.
Aamma uppernarsaatissaqareerpoq
nunaqarfiit taamatut nammineq periarfissinneqarnerisigut ilaatigut soorlu
Qeqertami nunaqarfimmiut nammineernerulerneratigut tunisassiorfik
matoqqaannaraluartoq ammarneqarpoq. Taavalu tunisassiornerit
aningaarsarsiornerillu aallartinneqarlutik. Taava aamma oqaatsuni aamma
taamatorluinnaq. Siunissami aammat taamatorluinnaq ingerlariaaseqalernissaq
aamma Naalakkersuisunikkut siunnerfigineqarpoq.
Tassuuna tapiissutit
aallavigivallaanngikkaluarlugit, kisianni inuit nammineq peqataalersinnerisigut
aamma angusassat pitsaanerusut anguneqartarmata aqqutissaq tikinneqassaaq.
Aamma siunnerfigaarput Naalakkersuisuni sapinngisarput taamaattut
periarfissaannik ikiorlugit aallartinneqartassasut.
Taavalu Inuit Ataqatigiit ernumanartutut
isigimmassuk sinerissap qanittuani rejerniarnermik aalisartut
aavataasiortutulli angitigisunik kilisaassuarnik pisaartorlutik
aalisalissagaluarpata sinerissamut pulallutik. Taanna sapinngisarput tamaat
Naalakkersuisoqarfimmi pinngitsoortinniarsarivarput. Taakkulu aalisarnermut
tunngasortai karsinut tunngasortai KNAPK APK-lu peqatigalugit massakkut
ingerlanneqarput.
Aammalu aalisarfiit sorliit
ammarneqassanersut tassani oqaluuserineqarlutik. Taakku aamma
kingusinnerusukkut naammasseriarpata aalisarnermut ataatsimiititaliamut aamma
pinngitsooratik ilisimatitsissutigineqassapput. Tassami aalisarnermut
ataatsimiititaliaq aamma qanittumi malinnaatinneqarnissaa uanga aamma
pingaartilluinnarpara pitsaasumik aaqqiissuteqarnissaq. Tamatta angullugulu
siunnerfigalugulu kissaatigigatsigu.
Taavalu tassunga aamma ilanngullugu
eqqartorneqartussaapput sinerissami qanittumi rejerniutit qanoq
angitigissanersut tassa nammineq tunisassiulertussat. Taakkulu aamma
ilanngullugit soorunami saqqummiunneqarumaarput.
Taavalu uani aamma oqaatigisaat
tunitsivinni tunisassiorfinnillu nutaanik pilersitsisoqarnioarneranik
tunisassiorfiillu piorersut allanik tunisassiornialerneranik Naalakkersuisut
akuerseqqaartarnissaannik piginnaatitsilernissaq Inuit Ataqatigiit aamma eqqartullaqquvaa.
Taanna aamma
qularinngilluinnaqqissaarpara aalisarnermut ataatsimiititaliami sukumiisumik
eqqartorneqassasoq. Tassami pisuussutit pisassat killeqarput.
Assersuutigiinnarlugu umiarsuit tunitsiviit killeqanngitsumik arlallit
pulaniarsaripput nunatsinni. Taava aamma taassumap saniatigut saattuarniutit
arlallit nutaat pulaniarsaripput tassalu kommuninut tunitsiviit
tunniunneqassappata aqutsisinnaanissarput tassuuna qanoq
navianartigisinnaanera aamma ersereerpoq. Tassa aqussinnaanngitsatsinnik kommunit
akuersisalissappata taava naggataatigut pisassat pisuussutit uumassusillit
annertunerusumik illersorsinnaajunnaassavagut.
Soorlu tamakku aaqqinniarnissaannut
aalisarnermik ataatsimiititaliaq aammalu pisortaqarfik suleqatigiilluassasut
neriorsuutigissavara.
Taava Kattusseqatigiit
oqaaseqaataat. Malunnarpoq aamma taakku tamakkiisumik inatsisissamut
tapersersuisut. Kisiannili aamma arlalinnik eqqaasaqarput eqqartorneqartut avataatigut.
Tassalu ESU-mut tunngasut aamma tikillattaarneqarput. Aamma taanna tupinnanngilaq
aalisarnermut annertoorujussuarmik attuumassuteqarlunilu ullumikkut
pingaaruteqarluinnarmat.
Tamakku aaqqinniarnissaannut
massakkut Naalakkersuisoqarfik suliniuteqarluni siunnersuuteqartussamik
sulisitsivugut. Taavalu taakkua naammasseriarpata aamma
Naalakkersuisunukartinneqassapput. Taava soorunami Inatsisartut aamma taakkua
naammassiniarnissaannut peqataatinneqassapput. Pingaartumik
inuussutissarsiornermut ataatsimiititaliaq aamma tassani ilusilersuinermut
minnerunngitsumillu aamma aalisarnermut ataatsimiititaliaq attuumassuteqaqimmat
taakkua marluk peqataatinneqarnissannut ilusilersuinissamut aamma
neriorsuutigissavara malinnaateqqissaarneqassasut.
Tassa ESU-mut tunngasut ilumoorpoq
pingaaruteqartorujussuupput angallatit qanoq taarsersorniarnerannut aammalu
aningaasat ESU-mi aningaasaliissutigineqartut qanoq annertutigisinnaanerannut
tunngasumik oqaloqatigiinnissarput assut pingaaruteqartoq aamma uanga
kissaatigissavara qanittumi taanna suleqatigiissutigissagipput.
Taavalu ilaatigut 20 millionit
angallatitaarniartunut aningaasaliissutigineqartussat aamma
Kattusseqatigiinninngaaniit taaneqarput. Tassalu taakkua ataatsimiititaliami
rejerniarneq pillugu aaqqissuusseqqinnermi Enoksenip ataatsimiititaliaani
taaneqartumi aamma taakkua nalilersorneqarput qanoq atorneqassanersut, aammalu
sunut atorneqassanersut. Taakku uterfigineqaqqikkumaarput.
Taava nuannaarutigaara
Kattusseqatigiininngaanniit tunitsiviit tunisassiorfiit nutaat
pilersinneqarnissaannut Naalakkersuisut siunnersuutaat tapersersormassuk.
Aamma qujavunga taamak ersaritsigisumik oqaaseqarlusi tapersersuinersi
matumuuna takutikkassiuk.
Taavalu uani aamma oqaatigisarsi
Ilulissat kangerluata saani qaleralinniarnermi qassutit ukioq kaajalallugu
atorneqarsinnaanngorlugit Naalakkersuisunit aalajangerneqarsimasoq. Ilumoorpoq
taanna siusinnerusukkut taamatut aalajangiisoqarsimagaluarmat kisiannili
aalisartut taavalu kommunit kissaateqarnerat malillugu ukiorli
allanngortipparput. Tassalu eqqaamanerlunngikkukku aprilip 15-iata
majilluunniit 15-iata tungaanut atuuttussanngorlugu taanna aalajangerneqarpoq.
Tassa kivisittakkat qaleralinniutit
eqqarsaatigalugit taavalu septemberip aallaqqaataaninngaaniit aamma qaammatit
marluk ukiannerani taamatut atuuttussanngorlugit. Tassa aalisartut aammalu
kommunit kissaataat tassani annertuumik malinneqarput. Qujanartumik taanna
akerleriissutiginagu aaqqinneqarpoq.
Tassa ukioq naallugu qassusersorneq
atorunnaarpoq Ilulissat eqqaanni.
Taavalu ilumoorpusi tassuuna
pisussutit uumassusillit aamma mianerineqartariaqartut tassa qassusersorneq
eqqarsaatigissagaanni sukkasuumik aalisarnertut aamma isigineqartarpoq.
Tamassumap kingunerisarlugu pisuussutit uumassusillit atorneqarnerata
kingunerisaannik pisat minneruleriartortarlutik. Tassani aamma
sillimaffiginiarsarivarput siunissami sapinngisamik killilimmik
ingerlanneqartarnissaa.
Minnerunngitsumillu uumassusillit
illersorneqarnissaat tassani aallaavigineqartariaqarmat.
Taavalu aamma oqaatigisarsi
Kattusseqatigiinningaaniit piffiit ilaanni aalisarfilerngusaattarnerit tassalu
saattuarniartut aammalu rejerniartut akornanni. Taanna ilumoorpoq annertuumik
ajornartorsiutigineqartarpoq. Tassami aamma saattuarniartut piniutaat
aningaasarpassuarnik nalillit ilaatigut rejerniartuninngaaniit
aqqusaarneqarnerisa kingunerisaannik annaaneqartarput.
Taanna sapinngisamik
pinngitsoortinniartariaqarparput. Tamakkulu pinngitsoorneqassappata qanittumi
tassa taamatut aalisartut saattuarniartut rejerniartut kattuffiit
Naalakkersuisoqarfiillu qanittumi taamatut aaqqissuteqarniarnissamut
sulissuteqartariaqarput.
Masakkullu assagiarsunniarnerit
pillugit suleqatigiissitassaq aallartisarneqalermat aamma taakkua ilanngullugit
nalilersorneqarnissaat eqqunneqartussaavoq.
Tassa qanittumik kattuffiit
suleqatigineqassasut aamma Kattusseqatigiit taanna kissaatigisaat
malinneqartussaavoq. Ungasinngitsukkullu aallartissapput. Immaqa ilaatigulluunniit
aallartinnissalereerput.
Taavalu Otto Steenholdtip
aalisarnermut inatsisissaq tunngaviatigut isumaqatiginngikkaa paasisinnaavara
tassa nammineersinnaanerup annertuumik illersorneqarnissaa pingaartikkaa
takusinnaavara. Aamma taanna uagut minnerpaarpaamilluunniit
apeqqusernianngilarput. Tassa inuit nammineersinnaasut sapinngisamik pisortanit
tapersersorneqaratik ingerlasinnaasut aamma tamakkiisumik uagut
Naalakkersuisunit tapersersorusuppagut.
Kisiannilu uani pisassat
agguaanneqarnissaannut tunngatillugu tassa sinerissap qanittuani 43%-it
avataasiortunullu 57%-it tunniunneqarnissaannut Otto Steenholdtip
isumaqatiginninnginnera assut uanga ilungersunartutut isigaara. Pissutigalugu
ukiorpassuarni pisassat taakku avinniarneqartarnerat ajornartorsiutaasarsimavoq.
Ilaatigut annertunerusumik avataasiortut piY (bċnd nr. 42 uunga naavoq.)
**
Bċnd 44
... naalakkersuisoqatigiinni
isumaqatigiinngitsugut.
Daniel Skifte, Inatsisartut
Siulittaasuat, Ataatsimiinnermi Aqutsisoq, Atassut.
Finn Karlsenimut qujavugut.
Ingerlariaqqitsinnata ilisimasitsissutigissavara maannakkut oqaaseqartussat
naammassilermata aammalu Inatsisartut ataatsimiinnerat unikaallatsinneqarani
ingerlaannarluni pisussaammat.
Immikkoortumut allamut
nikeriannginnitsinni Inatsisartut maani issiavimminni najuuttut
amerlanerusariaqarput. Taamatut oqariarlunga Johan Lund-Olsen
pingajussaaniilerami naatsuararsuarmik oqaaseqassaaq.
Johan Lund-Olsen, Inuit Ataqatigiit.
Tassa naatsuaraannannguussaaq, tassa
Siumut oqaaseqartuanut una oqaatiginiarlugu januarimi tamani inatsiartut
aalisarnermut piniarnermut nunalerinermullu ataatsimiititaliaanut tunniunneqartoq,
tassaaginnarpoq Enoksenudvalgip suli sulisup inerniliukkallagai
ilisimatitsissutiginiarneqartut ataatsimiititaliamut.
Tassami naalakkersuisup
eqqaamaniarneqartutuut ukiaq Inatsisartut ataatsimiinneranni neriorsuuteqarpoq
Aalisarnermut Ataatsimiititaliaq qanimut malinnaatinniarlugu, tassalu taamaaliorpoq
januarimi februarillu aallartilaarnerani Enoksenip Ataatsimiisitaliaa suli
sulisoq sulilu suliassaqartoq sumut killiffia pillugu allakkatigut
ilisimatiutigaluta.
Taavalu kingornatigut aamma
ataatsimiititaliamit aggerluni aamma nassuiaateqarluni, kisianni suli ulloq
manna tikillugu tassa amigaatigivagut, taanna naammassereermat ilisimasakka
malillugit aammalu ilisimasitsissutigineqarmat uani inatsisissatut
siunnersuummi Enoksenip Ataatsimiisitaliaata inassuteqaatai tunngavigalugit
suliarineqartoq, taava inatsisiliornermi pissuserissaarneq, kisianni pissuserissaarneq
kisiat piinnarnaga, kisianni aamma inatsisiliortutut tamatta pisussaagatta
paasissutissat tamavimmik aalajangiiniarnitsinni tunngavissavut pisariaqarigut,
taava Enoksenip Ataatsimiisitaliaata suliani naammassivillugu naammassisimappagu,
taanna taamaassimagunarpoq, tassami inatsisissatut saqqummiussami taamatut
oqaatigineqarpoq.
Taava taakkua aamma ataatsimiititaliap
Inatsisartut ataatsimiititaliaata takusariaqarpai aammami ukiaq aalisarneq
pillugu nassuiaat annertoorujussuaq sukumiisorlu oqallisigigatsigu
naalakkersuisup taamani neriorsuutigereermagu inatsisartunut
ataatsimiititaliamut taakkua aamma tunniunneqarumartut suliartik
naammassiniariarpassuk.
Daniel Skifte, Inatsisartut Siulittaasuat,
Atassut.
Naggataarutaasumik Aalisarnermut Naalakkersuisoq,
Hans Enoksen, nalunaareersimavoq oqaaseqassaaq.
Hans Enoksen, Aalisarnermut, Piniarnermut
Nunaqarfinnullu Naalakkersuisoq, Siumut.
Qujanaq. Tassa ukua siullermik oqaaseqarninni
Inuit Ataqatigiit apeqquteqaataat, tassalu Enoksenip Ataatsimiititaliaanik
inassuteqaatit pillugit paasiumasaqarnerat.
Taanna assortuussutiginngilluinnarlugu
naammassineqassaaq, tassa Aalisarnermut Ataatsimiititaliamit paasissutissat
tamarmik tunniunneqassapput. Aamma taassuma saniatigut saattuerniarnermut
tunngasut, qaleralinniarnermut tunngasut suliarineqalerpatta aamma
malinnaateqqissaarnissarsi neriorsuutigissavara. Tassa
assortuussutissaqanngilagut tassuuna paasissutissat tamaasa tamakkiisumik
pissagassigit.
Ukulu 20 millioninut tunngasut; ilaatigut
ilumoorpoq aalisarnermut pissutsit assigiinngitsorpassuit
ajornartorsiorfiusut. Raajarniarnerinnaq kisimi ajornartorsiutaanngilaq,
kisiannili annertunerpaarpaamik raajarniarnikkut pisut ilungersunartut
annertunerpaajusut oqaatigissavara.
Tassanilu aamma aalisariutit
nutaanngilisimasut, nutaanngilisimaqisut ilaatigut ukiut 30-40-inik
pisoqaassusillit ingerlatinniarnerat assut piginnittunit akisusimasoq.
Tamakkununnga tunngasut aammalu ESU-mut akiligassanut tunngasut massakkut
suliaralugit nalilersorneqarmata 20 millionit taakkua sumut
atorneqarnissaannut tunngasut suli sukumiisumik massakkut
oqaatigisinnaanngikkallarpagut, kisianni aalisarnerup pitsanngorsarnissaannut
atorneqarnissaat piaartumillu naammassiniarneqarnissaat
neriorsuutigissavarput.
Taamatut 20 millionit atorneqassappata
Aningaasaqarnermut Ataatsimiititaliaq aamma aqqusaaqqaarneqartussaavoq.
Sapinngisamik tassa sukkasuumik uagut aamma suliniarsarigaluarpugut,
kisiannili Aalisarnermik Pisortaqarfimmi sulisut ikippallaarnerat pissutaalluni
suliassat ilaatigut arriitsuararsuarmik ingerlanneqartarput.
Taassuma saniatigut nunanut allanut
pisussaaffigut aalisarnikkut isumaqatigiissutit isumaqatigiinniarnerit allallu
ullumikkut suli ingerlanniarneqartut sulisunik arlalinnik aamma atuiffiusut
angalasaqattaarnerpassuarnik kinguneqartartut ingerlanneqarmata ajoraluartumik
sulisutigut killeqarpallaarneq pissutigalugu sukkanerusumik ilaatigut immaqa
aaqqinneqarsinnaagaluartut sulisukilliorneq pissutigalugu
kinguarsarneqartartoq taanna isortuussinnaanngilara maanngaanniit. Tassa aamma
Johan Lund-Olsenip oqaatigisaa inatsissamut tunngasoq ilumoorpoq. Taanna
uanga aamma nammineq inuttut akuersaarsinnaanngilluinnaqqissaarpara taamatut
pisoqarnera sapingisamik tulliani pinngitsoortinniarsarissavarput. Tassuuna
assortuus
sutissaqanngilluinnaqqissaarpugut tamatta
pitsaasumik paasissutissinneqarnissarput pingaartumik inatsisartunut ilaasortat
uanga pingaartilluinnarakku.
Taavalu Otto Steenholdtip aamma
oqaaseqarnermi ilaatigut oqaatigaa uutiterisut suliffissaqartitsinnguaratik
naammattunnguamik aningaasarsiornerarlutigit. Isumaqarpunga taamaattoqanngitsoq
aamma annertuumik taakkua suliffissaqartitsimmata annertuumillu aningaasarsiornermik
nunatsinni ikorfartueqataallutik. Taamaammat taamak ikatsigisumik
oqaatigiinnarneqarsinnaanngillat. Annertoorujussuarmik aningaasarsiornitsinnut
aamma avataasiortut kilisaataatillit pingaaruteqarput. Taakku aamma
pinngitsoorsinnaanngilagut.
Taava uani inuutissarsiutinik
aallartitsiniartut inatsisissami pineqanngillat, kisianniliuna uani pineqartoq
tunitsivinnik tunisassiorfinnillu nappaariarnissamut naalakkersuisut
akuerseqqaartarnissaannik pineqartoq. Tassa inuutissarsiornermik
aallartitsisaaniartut allallu minnerpaarpaamik uani inatsisissami
apeqqusersorneqanngillat aammalu eqqartukkattut soorlu saarulliit allallu
aallartinniarneqarpara taanna aporfissaqanngilluinnartoq oqaatigissavara.
Taavalu aalisariutit ikilisimaqippata sooq
amerlisarniarlugit iliuuseqannginnersugut ilaatigut oqaatigisat, tassa
aalisariutit nutaanngilivallaarnertik pissutigalugu annertuumik ikilisimapput,
taannalu aningaasarpassuarnik naleqarmat. Amerlisarniarnissaannut tunngasut
aningaasat annertuumik amigaatigineqarput aningaasaliisoqarnissaallu
Inatsisartut piumassuseqassappata assut aamma uanga aalisarnermi
naalakkersuisuttut nuannaarutigissavara.
Naggataatigut qujavunga taamak
isumaqatigiitsigisumik aalisarnermut inatsisissaq Naalakkersuisut sinnerlugit
saqqummiussara partiinik Kattusseqatigiinnillu akuersaarneqamat. Neriuutigaaralu
ataatsimiititaliami pitsaasumik aamma suliarineqarlunilu
naammassilluarneqarumaartoq. Qujanaq.
Daniel Skifte, ataatsimiinnermik aqutsisoq,
Inatsisartut Siulittaasuat, Atassut.
Aalisarnermut Naalakkersuisumut qujavugut.
Immikkut nappaavoq Otto Steenholdt. Pingajussaaniilerami
naatsuararsuarmik periarfissinneqarpoq.
Otto
Steenholdt, attaviitsoq.
Aalisarnermut
Naalakkersuisoq oqallisigisagut aamma oqalliserigaangatsigit tassunga tunngassuteqarorisagut
aamma ilannguttarpagut. Inuutissarsiutinik pilersitsiniarnermi oqallisigisagut
uunga aamma attuumassuteqarput. Avataasiortunut taamannak erseqqitsigisumik
oqaaseqarnera sanileriisiinnarpakka. Nunami sulisut qanoq
amerlalluinnaqqissaartigisut suliffissaarmata. Fabrikkit matooqqarmata
illoqarfinni tamakkua iluamik pissagaanngi tulaassuineq siulliuttariaqarpoq.
Sanileriisissinnaasuugukkit takussavatit qanoq tulaassuisut nunamut fabrikkinullu
tunioraasussaat amerlalluinnaqqissaartigisut aalisartunut sisamanut
naleqqiullugit. Ikippallaarpata piaarnerpaamik amerlisarniarlik
tulaassuisinnaasut amerlillugit fabrikkit suliassaqartilerlugit. Taanna
siunniunniarsiuk.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Otto
Steenholdtimut qujavugut.
Akineqartariaqarmat Aalisarnermut Naalakkersuisoq periarfissinneqarpoq
akissuteqaqqullugu.
Hans
Enoksen, Aalisarnermut, Piniarnermut Nunaqarfinnullu Naalakkersuisoq, Siumut.
Tassa Otto Steenholdtip
assortuussutaanngitsut assortuussutinngortinniarsarivatit. Minnerpaarpaamillluuniit
uagut inuutissarsiorniarnermik aallartitsisaaniartut maani inatsisiliorniarnikkut
mattunnianngilagut, kisiannili suliffissuarnik tunitsivinnillu nappaaniartut
taakkua naalakkersuisunit aqqusaareqqaartarnissaat uani siunnersuutigaarput,
tassa allaanerussutaa.
Taamaalilluni aamma pisussutit
uumassusillit aalisarnikkullu politikkip ataqatigiissaarluartumik ingerlanneqarnissaa
ullumikkutut pinnagu ullormiit ullormut aalajangiisaqattaarnerit tamakkua
siunissami qimakkusuppagut. Pisassat aalajangerusuppagut siunissami inuit
aalisartut eqqissillutik pilersaarusiorsinnaanissaannut aqqutissaq
ammarusukkatsigu. Aalisartut pitsaasumik bankit allallu suleqatiginissaanut
qularnaajaaqataaffigerusukkatsigt. Taakkulu massakkut saqqummiuppagut
inatsissakkut. Minnerpaarpaamilluunniit inuutissarsiornikkut allatigullu
periarfissanik mattussiniartoqanngitsoq naalakkersuisut sinnerlugit oqaatigissavara.
Qujanaq.
Daniel Skifte, ataatsimiinnermik
aqutsisoq, Inatsisartut Siulittaasuat, Atassut.
Taamaalilluni oqaluuserisassani imm.
16 suliarineqarpoq naammassillunilu, taavalu imatut inerneqarpoq; Siumup,
Atassutip, Inuit Ataqatigiit Kattusseqatigiillu tamarmik isumaqatigiillutik
suliassap aappassaanneerneqannginnerani Inatsisartut Aalisarnermut
Ataatsimiititaliaannut ingerlateqqinneqassasoq kissaatigaat. Taamatullu
suliassaq inerneqassaaq.
Immikkoortumut tullermut ingerlaqqinnginnitsinni
Inatsisartup Siulittaasuata tulliaqinnuigissavara ataatsimiinnermik
aqutsisilaaqqullugu.