Oqaluuserisassani immikkoortoq 17-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut pingajuat,
pingasunngorneq aprilip 10-at 2002
Ataatsimiinnermik aqutsisoq: Daniel Skifte, Inatsisartut
Siulittaasuat, Atassut.
Jĝrgen Wĉver-Johansen, Ineqarnermut Attaveqarnermut
Pilersuinermullu Naalakkersuisoq, Siumut.
Qujanaq. Matumuuna naalakkersuisut
sinnerlugit illuliortitsinermut aningaasalersuineq pillugu Inatsisartut
peqqussutissaattut siunnersuut saqqummiuppara.
Peqqussutissatut siunnersuut
Kalaallit Nunaanni ineqarnerup tamakkiisumik nutarsarneqarneranut
ingerlanneqartumut atasumik saqqummiunneqarpoq. Kingullermik pisortat
inissiaataannik attartortittakkanik akiliutinik allanngortitserineq
ingerlanneqarpoq.
Tamatumani ilaatigut
siuneratarineqarluni akissaqarnerusut nammineq ineqalernissamut kajumissaarneqarnissaat
aammalu nammineq inissamik aningaasalersuinissanmut ileqqaarniuteqarnissap
siuarsarneqarnissaa.
Peqqussutissatut siunnersuut
aqqutigalugu pisortat aningaasaataat atorlugit inissianik amerlanernik
peqalernissamik aammalu inissianik namminerisamik pilersitsinissaq pillugu
maanna suliniutit ingerlateqqinneqarput.
Taamaalilluni pisortat
inissiaataannik attartortittakkanik pisariaqartitsineq annikillisinneqassaaq.
Taakku inunnut nalinginnaasumik initaarnissanut allattorsimaffianniittunut
ineqarnermullu tapiissuteqarnissamut pisariaqartitsisunut
tunniunneqarsinnaaniassammata. Peqqussutissatut siunnersuut manna
ilaqutariinnut akunnattumik imaluunniit isertitaqqortuunut nammineq
illuliorusuttunut aammalu suliffeqarfinnut ingerlateqqatigiiffinnulluunniit
namminersortunut sulisorisanut inissianik pisariaqartitsisunut aammalu
aningaasaliissuteqartartunut attartortittakkanik inissialiorusuttunut
sammitinneqarpoq.
Aammattaaq inuit allat ataatsimoorlutik, assersuutigalugu
ilaqutariinnut marlunnut illunik uiguleriaanik illunilluunniit ataqatigiiaanik
sanarusuttut pineqarsinnaapput.
Sanaartukkanut
taarsigassarsisitsisinnaaneq aningaasalersueriaatsinut ilisimariikkanut assersuutigaagut
60/40 atorlugu illulianut piginneqatigiilluni inissianut, nunaqarfinni
inissianut, nammineerluni illulianut aammalu kommuunit illuutaannut
katerseriaannarnut atatillugu tapertliassatut isigineqarsinnaavoq.
Peqqussutissatut siunnersuummut
saqqummiunneqartumut nassuiaatit allatigut innersuussutigalugit
illuliortitsinernut aningaasalersuineq pillugu Inatsisartut peqqusutaata
allanngortinneqarneranik Inatsisartut peqqussutissaattut siunnersuut
inatsisartunut akuersaartumik oqaluuserisassatut ingerlateqqippara.
Siunnersuutigineqarpoq siunnersuutip
aappassaaneerneqannginnerani Attaveqarnermut Pilersuinermullu aamma
Ineqarnermut ataatsimiititaliami oqaluuserineqaqqaarnissaa.
Daniel Skifte, ataatsimiinnermik aqutsisoq,
Atassut.
Partiit, Kattusseqatigiit
attaviitsullu oqaaseqartuini siulliussaaq Siumup oqaaseqartussaa Tommy Marĝ,
Tommy Marĝ pereerpat Godmand Rasmussen, Atassut.
Tommy Marĝ, Siumut.
Qujanaq. Immikkoortoq eqqortoq
atuassavara, saqqummiutissavara. Illoliortitsinermut aningaasalersuineq
pillugu Inatsisartut peqqussutaata nr. 4-p 31. okt. 1998-imeersup
allanngortinnissaanik Naalakkersuisut Inatsisartut peqqussutissaatut
siunnersuuteqarnerat imaattumik Siumumiit sukumiisumik nalilersorluareerlugu
oqaaseqarfigissavarput.
Siullermik eqqaasissisutigalugu
erseqqissaasutigissavarput nuannaarutigigatsigu ukiakkut 2001-imi Inatsisartut
katersuussimanerisa nalaani Siumumiik kissaatigisagut aallaavigalugit peqqussutip
naapertuuttumik Naalakkersuisut allannguutissanik saqqummiussinerat
iluarisimaaratsigu.
Siumumi suli isumaqarpugut
inissianik amigaateqarneq ullumikkut killiffigisatsinni nunatamakkerlugu
ajornartorsiutaasoq annertooq. Taamaattumillu pisariaqartuartoq ullumikkormiik
annertunerusumik inissaqartitsiniarneq minnerunngitsumillu inuit namminerisamik
initaarsinnaanerisa nutaaliortuarnikkut eqaallisaanikkullu
aqqutissiuttuarnissaat.
Illuliortiternermut
aningaasalersueriaaseq aammalu illuliortiternermi illup angissusissaanik
killigititaasumit eqaallisaaneq aammalu inuit ataasiakkaat kisiisa pinnagit
suliffiutilinnulli aamma sammititamik minnerunngitsumillu illup
sananeqarnissaanik m2-mut killiliineq
Siumumiit pitsaasutut innuttaasullu
kissaataat malillugit aaqqiiniarnertut nalilerparput.
Peqqussutissatut Naalakkersuisut
siunnersuuteqarnerminni apeqqutini assigiinngitsuni ersarissaallutik
sinaakkusersuinerat iluarisimaarnarpoq, eqqaamassavarpummi peqqussutip 1998-imi
illuliortiternermut aningaasalersueriaaseq atuutilersinneqarmat innuttaasunit
minnerunngitsumillu kommunerpassuarnik annertuumik
paatsuungassutigineqartarsimammat qujanartumilli maana tamanna aaqqinniarlugu
aammalu peqqussutip eqaalisarlugu Naalakkersuisut iliuuseqarnerat
iluarisimaarnarmat.
Taamaattorli Naalakkersuisut
peqqussutissatut siunnersuutaat Inatsisartuni aappassaaneerlugu
oqaluuserinnginnerani Siumumiit pingaartipparput Ineqarnermut, Attaveqarnermut
Pilersuinermullu ataatsimiitsitaliamit nalilersorluaqqaarnissaa.
Ilaatigu Siumumiit
eqqarsaatigilluaqqussavagut peqqussutissatut allannguinermi ilaatillugu
immikkoortoq 8-mi, '
10, imm. 1-imi allassimasumi tassalu
illuliornissamut taarsigassarsiniarnermi killiliussap martsip aallaqqaataanut
killiliisimanerup nutaamik naliliiffigineqarnissaa.
Siumumi isumaqarpugut ukioq
kaajallallugu qinnuteqarsinnaaneq periarfissiuunneqartariaqartoq. Ukiumi
pineqartumi aningaasaliissutit iluanni, tassanimi Namminersornerullutik
Oqartussat aamma kommunet aningaasaliissutissatik immikkoortereertarmatigit
ajornartorsiutissatut isigisariaqanngimmat.
Ilanngullugu nalilersoqqussavarput
immikkoortoq 3, ' 4,
imm. siulliup tassalu Naalakkersuisut kommunalbestyrelselu sananermi
aningaasartuutissanik 40 %-inik taarsigassarsititsisinnaanerannut tunngasup
ersarinnerulersinneqarnissaa tassani eqqarsaatigeqqussallugit kommunet aningaasaliinissaminnut
periarfissaalatitsisut taarsigassarsiniartunut eqquinnginnissaa pinerullugu
aaqqiissutaasinnaasumik allaqqasoqartariaqarmat.
Naggasiullugu Siumumiit Naalakkersuisut
peqqussutip allanngortinneqarnissaata atuutilerfissaaniik ulluliisimanerat
tamakkiisumik taperserparput.
Siumumiit taamatut oqaaseqarluta
illuliortiternermut aningaasalersuineq pillugu Inatsisartut peqqussutaata
allanngortinneqarneranik Inatsisartut peqqussutissaattut Naalakkersuisut
siunnersuutaat aappassaaneerneqannginnerani Inatsisartut Ineqarnermut,
Attaveqarnermut Pilersuinermullu ataatsimiitsitalianut ingerlatinneqarnissaa
innersuussutigissavarput.
Daniel Skifte, ataatsimiinnermik aqutsisoq,
Inatsisartut Siulittaasuat, Atassut.
Tullinnguuppoq Atassutip
oqaaseqartussaa Godmand Rasmussen.
Godmand Rasmussen, Atassut.
Naalakkersuisut inerqarnermut
siunnersuutaannut Atassumiit imatut oqaaseqaateqassaagut: Peqqussutitut
siunnersuut nunatsini tamakkiisumik nutarterneqarnissaa annertuumik oqallisaauartarsimavoq,
ukiut siusinnerusut kingumut qiviassagaanni nunatsinni ineqarnikkut pisortat
kisimik isumalluutaanerata qanoq killeqartiginerat Atassutip takusinnaasimavaa,
naak aamma siusinnerusukkulli inuit ilaanni namminerisamik illoqalersarneq
takornartaanngikkaluartoq.
Atassutip qangaaniilli
pingaartitariuartarsimavaa pingaartittuassallugulumi inuup nammineq
akisussaaffigalugu ineqarsinnaanera. Una periaaseq eqqunneratigut pitsaasumik
ammaassinerussaaq siusinerusukkut atugaasimasuuppat qanga aalisarneq
pissarsiorfiulluarnerata nalaani qularinngilarput periarfissaq arlalinnik
atorneqarsimassagaluartoq.
Ukiuni makkunani tikissimasarput
ajoraluartumi arlalinnik takussutissaqarpoq akiliisinnaassuseqaraluarlutik
inissisimasunik kisiannili piumasarineqartunut naammassinnissinnaanngitsunik
uumali peqqussutip atuutilerneratigut inuit nammineq akisussaassuseqarnerusumik
misigisimalersippagit sorlaliineq siunissamut akisussaassuseqarnermut qanortoq
aqqutissaagili atauartumik ingerlanneqarluni.
Taamaattumik tamakkiisumik Atassumiit
taperserparput taama oqaaseqarluta aappassaaneerneqartinnagu
ataatsimiitsitaliamut ingerlanissaa siunnersuutigaarput.
Daniel Skifte, ataatsimiinnermik aqutsisoq, Inatsisartut
Siulittaasuat, Atassut.
Tullinnguutissaaq Inuit Ataqatigiit
oqaaseqartussaat Ole Lynge.
Ole Lynge, Inuit Ataqatigiit oqaaseqartuat.
Illuliortiternermut aningaasalersuineq
pillugu allannguutitut siunnersuut saqqummiunneqartoq annertornerpaatigut Inuit
Ataqatigiit tapersermassuk oqaatigissavara.
Saqqumiussissumi oqaatigineqartut
nunatsini ineqarnerup tamakkiisumik nutarsarneqarneranut ingerlanneqartumut
atasumik saqqummiussaavoq siunertarineqartutut Inuit Ataqatigiit isumaqatigaat
akissaqarluarnerusut nammineq ineqalernissamut kajumissuseqalernerunissaat
namminerlu inissamik aningaasalersuinissamut ileqqaaruteqarsinnaanerup
siuarsarnissaa.
Peqqussutissatut siunnersuumi
periarfissiissutaasut atuutilersinneqarnissaat tassa julip aallaqqaataa 2002
aallarnerfigalugu atuutilersussap siunertarineqartutut qanoq
atorluartigineqarnissaa pissanganassaaq tassami sinerissami ilaqutariinnut
aamma akunnattumik isertitalinnut imaluunniit isertitaqqortuunut
suliffeqarfinnut ingerlatseqatigiiffinnulluunniit namminersortunut sulisorisanut
inissianik pisariaqartitsisunut kiisalu inuit allat ataatsimoorlutik
inissialiorusussinnaasunut sammitinneqarpoq.
Peqqussutissap sanaartukkanut aningaasalersuinissamut
piumasaqaatigiumagassaasa atugassarititassai pillugit paasissutissanik aammalu
tamakku kinguneqaatigisinnaasaannik pissarsinissaq Inuit Ataqatigiit
pisariaqartutut isigaat taamaattumik inassutigissavarput peqqussutissap aappassaanerneqartigani
Inatsisartut Ineqarnermut il.il. ataatsimiitsitaliaanit aningaasaliissutissanut
kingunerisinnaasaat pillugit itinerusumik paasissutissiisoqassasoq.
Tamatumunnga ilanngullugu
eqqaasitsissutigissavarput Inatsisartuni ilaasortap Josef Motzfeldip
oqaluuserisassani imm. 94-itut aaliangiiffigisassatut siunnersuutaa
peqqussutissatut siunnersuummut attuumassuteqarsinnaammat taamaattumillu
siunnersuutip ' 2-aatut
inissinneqarsimasumi illup tunngavissaata 105 m3-sut killiliinermi
tunngaviusup aningaasartuutinullu tamarmiusunut m3-mut 13.500 kruuninut
killiliussineq ataatsimiitsitaliap naliliivigisariaqaraa isumaqarluta.
Allatigut nassuiaatit ersarimmata taamatut
siullermeerinermi oqaaseqarallarluta siunnersuutip aappassaaneerneqartigani
Ineqarnermut ataatsimiitsitaliamut suliassanngortinneqarnissaa inassutigaarput.
Daniel Skifte, ataatsimiinnermik aqutsisoq, Inatsisartut
Siulittaasuat, Atassut.
Taavalu Kattusseqatigiit oqaaseqartussaat
tullinnguuppoq. Mogens Kleist, takanna.
Mogens Kleist, Kattusseqatigiit oqaaseqartuat
Qujanaq. Peqqussummut siunnersuut
tapersersorusupparput. Oqaatigineqareertutuut peqqussutissap ammaassinissaa
innuttaasunut periarfissiinissat inissianik tamanik piginneqataalersinnaanissaannut.
Aammali inissianik nutaanik
sanaartoqqissinnaalernissamut ammaassinissaq pitsaasoq anguneqarsinnaalissammat,
taamatut peqqussutip allanngortinneratigut minnerunngitsumillu innuttaasut
inissianik utaqqisut ikilisarnissaat anguniarneqassammat peqqussutissap
allanngortinneqarnissaa aamma taperserparput.
Ukiuni kingullerni Nuup Kommuuniata
anguniagaa, tassalu attartortuniit piginnittunngorsaaniarneq pitsaasutut
isigaarput.
Ullumikkummi nalunngilarput
illuliorniarnermut aporfissat assigiinngitsut amerlaqisut, taamaattumik
peqqussutissap ammaassinissaa Kattusseqatigiinniit taperserusupparput.
Aningaasallu isertinneqartussat
qanoq aaqqiivigineqassanersutsuli taakkartorneqanngimmata ataatsimiititaliamut
attuumassuteqartumut, tassalu Ineqarnermut ataatsimiititaliamut innersuussutigerusupparput
sukumiisumik misissorneqarnissaat. Tassami kommuunit ataasiakkaat NamminersornerullutikOqartussallu
akornanni aaqqiinissat pingaaruteqarmata sanaartoqqinnissamut tunngatillugu.
Aammattaaq takusinnaavarput suliffeqarfinnut
ataasiakkaanut annertuumik iluaqutaanissaat naatsorsuutigisinnaagatsigu.
Ullumikkummi suliffeqarfiit ataasiakkaat aningaasanik annertuunik atuinikkut
sulisutik ineqartittaramikkit, tassa vakantinut. Aningaasallu
tapiutigineqarsinnaasut annertussusissaat pitsaasumik naliliiffigineqarnissaat
Kattusseqatigiinniit kaammattuutigerusupparput. Killiliunneqarsimasut
ullumikkut naleqqunnersut eqqarsaatigalugit. Taamatut oqaaseqarluta
ataatsimiititaliamut attuumassuteqartumut innersuussutigissavarput. Qujanaq.
Daniel Skifte, ataatsimiinnermik aqutsisoq,
Inatsisartut Siulittaasuat, Atassut.
Taava attaviitsoq, Otto Steenholdt,
tullinnguuppoq.
Otto Steenholdt, attaviitsoq.
Aallaqqaasiutigalugu Naalakkersuisunut Naalakkersuisumullu apeqqutigerusuppara taamatut inatsimmik saqqummertoqarnissaa sioqqutilaarlugu Danmarkimi kreditforeningiminngaanniit kalaaleqaterpassuagut atorsimapput. Aamma qujanartumik illussaaleqinermik assut ikiuulluarlutik, kisianni tamatuma kinguninngua kinguningaatsiarsua paasilerpaat taakku aningaasat atukkat erniapalaarsui assorujussuaq oqimaatsut.
Taamaattumik qasseeriarlunga Naalakkersuisunut nikittaattunut aamma apeqqutigisarsimavara aammalumi neriorsorneqarsimallunga taamatut illuliorsimasut atukkami, aningaasanik atukkami erniaannut oqilisaaffigineqarumaartut.
Tassa qutsavigalugit inissaqarniarnermi taama ilungersunartigisumi namminneerlutik siulliullutik sassarlutik taamatut iliorsimanerat qutsatigalugulusooq taamatut oqilisaaffigineqassasut, kisianni naalakkersuisup ullumikkulluunniit taanna akisariaqassanngilaa, tassa allaganngorlugu paaserusullugu ullaaq manna naalakkersuisunut apeqqutinngorlugu tunniutereersimagakku. Taanna oqaatigitsiaannarpara.
Inatsit allannguutissanik allanik ilaartorlugu saqqummersinneqartoq annerusumik oqaaseqarfigisariaqanngilaq. Saqqummiunneqaqqaarmalli pitsaagalugu uanga maanngaanniit aamma oqaaseqareersimagama.
Illunilli
anginerusunik aamma kalaallit ukiuni kingullerni najugaqarusuttalernerat
naalakkersuisunit arajutsisimaneqartariaqarsorinngilara. Tassani pivara '2-mi
oqaasertaliussaq imatut issuarusutara: AImm. 1 naapertorlugu
illuliortitsinermit taarsigassarsisitsisoqarsinnaavoq, illup qanoq angitiginera
apeqqutaatinnagu, annertunerpaamik illup toqqammavissaa 105 m3". Issuaaneq tassunga naavoq.
Tassami imaassinnaavoq aamma
teknik-ikkut ingerlaaseq imaalersoq. Illupiluunerujussuarmik sanasoqarsinnaasoq
toqqavikitsoralaannguamik. Taama paasisariaqannguatsiarpoq. Naggataagut aamma
eqqaasitsissutigissavara oqaloqatigiissutitta siuliani illuutinik attartortut
paarsilluarnerusariaqarneranni oqarnera. Inatsisissakkut ugguuna tamanna
isiginiarneqassasoq iluaralugu paasivara. Tassa '5, imm. pingajuani oqaasertaasigut.
Taanna taamak oqaaseqarlunga
allannguutissat annerusumik oqaaseqarfiginagit oqaaseqatsiarpunga.
Daniel Skifte, ataatsimiinnermik aqutsisoq,
Inatsisartut Siulittaasuat, Atassut.
Qujanaq. Maannakkut Ineqarnermut, Attaveqarnermut Pilersuinermullu Naalakkersuisoq akissuteqassaaq. Jĝrgen Wĉver-Johansen, takanna.
Jĝrgen Wĉver-Johansen, Ineqarnermut, Attaveqarnermut Pilersuinermullu Naalakkersuisoq, Siumut.
Qujanaq. Siullermik qujarusuppunga tamanna taperserneqarmat saqqummiunneqartoq.
Uangattaaq partiiniit assigiinngitsuniit saqqummiunneqartut Inatsisartut ataatsimiititaliaanni misissoqquneqartut isumaqatigaakka siulianilu oqaatigeriikkakka ataatsimiititaliami isumasioqateqarumik soorunami sukkulluunniit piareersimagatta takkunnissatsinnut.
Maluginiarpara oqaaseqartut amerlasuut uniffigigaat killiunneqarsimasut ilaatigut m3-imut aammalu akigitinneqartunut. Tassa m3-imut killiussaq imatut paasineqassaaq qanorluunniit angitigisumik ...
**
atortorissaatutitigut ajutoorneq
nalingata angissusaanut tapiiffigineqartarsinnaasoq, kisianni 105 km2 tikillugu taamatut inissinneqarnissaa kissaatigaarput. Siunnersuutigaarpullu 13.500,- kruunit Inatsisartunit ukiaq kissaatigineqarmat ersarissunik killiliisoqassasoq, ilaatigut aamma sanaartornikkut akigitinneqartut qaffakkaluttuinnartut unitsinneqarnissaannut atorneqarsinnaasunik.
Ukiaq akueraarput andelsboliginut qaffasinnerpaamik km2-mut akigitinneqartoq 15.000,- kruuniusinnaasoq. Taannalu qaffasinneruneranut tunngaviuvoq, illuliortut attartornermi erniatik skatitigut ilanngaatigisinnaavaat, kisianni andelsboligni najugaqartuusugut attartornitta erniai ilanngaatigisinnaanngilagut.
Taamaattumik taakkua nikingassuteqalaarput, kisianni tassa imatut paasisariaqarput, aamma piumagaanni 18.000,- kruunilimmik km2-mut sanaartortoqarsinnaavoq, kisianni pisortat tapiissuta at taamaallaat 13.500,- kruunimut killeqarpoq.
Per Berthelsenip oqaluuserisassap siuliani apeqqutigisaanut tunngatillugu, inissialioriaatsit suugaluartulluunniit pineqarput, punkthusiuppata rĉkkehusiuppata allaappataluunniit, taakkua tamarmik inissianut sanaartornermut qinnuteqaatit tamarmik naliliivigineqassapput, tamarmillu periarfissaqartinneqassapput, soorunalimi Namminersornerullutik Oqartussat tungaaninngaanniit tapiissuteqarsinnaanigut Inatsisartut qanoq ataatsimut katillugit annertussuseqarsinnaaneri aalajangertussaavaat.
Maluginiagassap aappaa tassaavoq siornatigut inuit ataasiakkaat kisimik tapiiffigineqarsinnaagaluaramik taamatut, massakkut firmat, ingerlatseqatigiiffiit allat aamma aningaasaleeqataarusuttut inissianik sanaartornermut, taakkua aamma assinganik periarfissinneqarput.
Lars-Karl Jensen, ataatsimiinnermik aqutsisoq, Siulittaasoqarfimmi ilaasortaq, Siumut.
Allamik nappaasoqanngimmat oqariartuutigineqartut malillugit suliassaq Inatsisartut Ineqarnermut, Attaveqarnermut Pilersuinermullu Ataatsimiititaliaanut ingerlateqqinneqassaaq.