Oqaluuserisassani immikkoortoq 25-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut tallimaat,
ataasinngorneq 15. april 2002
Daniel Skifte, Ataatsimiinnermi aqutsisoq, Atassut.
Ilagiinni atorfinitsitsisarnerit pillugit
Inatsisartut peqqussutaata allanngortinneqarneranik Inatsisartut
peqqussutissaattut siunnersuut.
Tassani siullermeerneqarnera pissaaq
Naalakkersuisut siulittaasuat.
Jonathan Motzfeldt, Naalakkersuisut siulittaasuat, Siumut.
Ilagiinni atorfinitsitsisarnerit pillugit naalakersuisut
peqqussutaata allanngortinneqarneranik Inatsisartut peqqussutissaattut
siunnersuut, tassa provstinik atorfinitsitsisarnerit siullermeerlugu
saqqummiunneqarnissaa, matumuuna Naalakkersuisut sinnerlugit
saqqummiutissavara,
Tassa Inatsisartut peqqussutissaattut
siunnersuut provstinik atorfinitsitsisarneq taanna Inatsisartut 2001-mi
upernaakkut ataatsimiinneranni Inatsisartunut ilaasortap Assii Narup Chemnitzip
ilagiinnut atorfinitsitsisarneq pillugu Inatsisartut peqqussutaata
allanngortineqarnissani aalajangiiffigisassatut siunnersuutaa
akuersissutigineqarpoq.
Akuersissuteqarpugut Inatsisartut Kultureqarnermut
Ilinniartitaanermullu ataatsimiititaliaa tamanna pillugu isumaliutissiissummi
isumaqatigiissimaneq tunngavigalugu. Siunnersuutip akuersissutigineqarnerani
Naalakkersuisut peqquneqarput ilagiinni atorfinitsitsisarnerit pillugit
Inatsisartut peqqussutaata allanngortinneqarnissaanut siunnersuuteqartup
tamatumunnga siunnersuutaa naapertorlugu siunnersuummik saqqummiusseqqullugit.
Naalakkersuisut taamaalillutik
peqqussummik allanngortitsinissamut peqquneqarput taamaalillutillu
provsteqarfimmi ilagiit sinniisaat ilaasortassatut qinigaasimasut provstitut
atorfinitsitsinermi atatillugu oqaaseqaateqarsinnaatitaalissallutik.
Peqqussut maannakkut atuuttoq
naapertorlugu palaseqarfimmi provstip palasiuffigisassaanni ilagiit
sinniisaannut ilaasortassatut qinigaasimasut kisimik oqaaseqaateqartussaapput.
Inatsisartut Kultureqarnermut Ilinniartitaanermullu ataatsimiititaliaanut
isumaliutissiisummi siunnersuummi tunngavigisatut oqaatigaa provsteqarfimmi
ataatsimi ilagiit sinniisaat attuumassuteqartut tamarmik qinnuteqartut sorliit
provstimut piukkunnerlugit assigiimmik oqaaseqaateqarsinnaasariaqartut, tassami
taakku tamarmik provstimit sullinneqarmata.
Matumuuna siunnersuut saqqummiunneqartoq
aalajangiiffigisassatut siunnersuutip imaa naapertorlugu suliarineqarpoq,
nassuiaat siunnersuummut tunngassuteqartoq innersuussutigalugu siunnersuut matumuuna
Inatsisartunut oqaluuserisassanngortippara.
Daniel Skifte, Ataatsimiinnermi aqutsisoq, Atassut.
Naalakkersuisut siulittaasuanut qujavugut,
taavalu massakkut partiit, Kattusseqatigiit, kiisalu attaviitsut
oqaaseqartuinut killippugut, siulliullunilu oqaaseqassaaq Laannguaq Lynge,
Siumut.
Laannguaq Lynge, Siumut.
Ilagiinnut atorfinitsitsisarneq uani pineqartumi provstimik domprovstimillu atorfinitsitsisarneq pillugu Inatsisartut peqqussutaata allanngortinneqarnissaanut siunnersuut Naalakkersuisunit siunnersuutaaneratut isikkoqartillugu akuersissutigineqarnissaa Siumumiit inassutigissavarput, tamatuma kingunerisassaraa atorfinitsitsisarnissat siunissami ilagiit sinniisaasa atorfinitsitsisarnerni oqaasissaqaqataanerulernissaat, taama naatsumik oqaaseqarluta Siumumiit allannguutissatut siunnersuut aappassaaneerneqannginnermini Inatsisartut Kultureqarnermut Ilinniartitaanermullu ataatsimiititaliaanut oqaluuserineqarnissaa inassutigaarput.
Daniel Skifte, ataatsimiinnermi aqutsisoq, Atassut.
Laannguaq Lynge qutsavigaarput, maanna oqaaseqassaaq Jakop Sivertsen, Atassut
Jakob Sivertsen, Atassut.
Qujanaq, Ilagiinni atorfinitsitsisarnerit pillugit Inatsisartut peqqussutaat nr. 8, 30 oktober 98-meersup allanngortinneqarnissaanik siunnersuut.
Inatsisartut 2001-mi upernaakkut ataatsimiinitsinni Inatsisartunut ilaasortap Asii Chemnitz Narup ilagiinni atorfinitsitsisarnerit pillugit Inatsisartut peqqussutaata allanngortinneqarnissaanik siunnersuutaa Inatsisartunit akuersaarneqartup, peqqussutip allanngortinneqarnissaata kinguneraa, aamma siunnersuut Inatsisartuni oqaluuserineqarmat Atassummit tapersersimagatsigu peqqussutip allannguutissa akuersaassavarput.
Atassummi nunatsinni illoqarfinni nunaqarfinnilu ilagiinni sullissinerup pitsanngorsartuarneqarnissaa politikkeraarput, taamaattumik nunatsinni ilaginni sullissinerup minnerpaannguakkulluunniit ikiorfartorneqarnissaa tapersersugaraarput tapersertuassallugulu, peqqussutip allannguutissaata imaraa palaseqarfinni domprovstip, provstilluunniit suliffigisaani ilagiit sinnisaattut qinikkat sapinngisamik qinnuteqartut pingasut pillugit oqaaseqaateqartarnissaat matumani anguniarneqarpoq.
Atassumit isumaqarpugut ullumikkut nunatsinni ilagiit sinniisaasa sapaatini nalliuttorsuarni ulluinnanilu ilagiinni sullissinermi ikorfartuiqataanerat assut palaseqarfinni iluaqutaasoq tulluusimaarutigisariaqaripput. Taamaattumik ilagiinni atorfinitsitsisarnerni ilagiit sinniisaasa tusarniarneqartarnissaannik peqqussummut ilanngussinissaq Atassummit pissusissamisoortutut nalilerlugu peqqussutip allannguutissaanik siunnersuut taperserparput, aammalu ataatsimiititaliami suliarineqassappat suleqataanissatsinnut piareersimalluta, qujanaq.
Daniel Skifte, ataatsimiinnermi aqutsisoq, Atassut.
Jakop Sivertsen-mut qujavugut, tulliullunilu oqaaseqassaaq Maliinannguaq Markussen Mĝlgaard, Inuit Ataqatigiit.
Maliinannguaq Markussen Mĝlgaard, Inuit Ataqatigiit.
Qujanaq, Siorna 2001-mi upernaakkut Inatsisartunut ilaasortap Assii Chemnitz Narup ilagiinni atorfinitsitsisarnerit pillugit Inatsisartut peqqussutaata allanngortinneqarnissaanik alajangiiffissatut siunnersuutaa aamma palasit ataatsimeersuarneranni taperserneqarsimasoq isumaliutissiissusiornermi Inuit Ataqatigiinniit tapersersorparput.
Tamatumani patsisaavoq atorfinitsitsinissami provstip atorfinitsinneqartussap najugarisassaani tusarniaanerit kisimik pinnatik aamma provstip sumiiffiani nunap immikkoortuani ilagiit sinniisaasa tusarniarneqartarnissaat kissaatigineqarmat.
Inuit Ataqatigiinniillu matumani saqqummiunneqartumi maluginiarparput tusarniaanerni arlallit akerliusimasut tassami tamatumani ilagiit qullersaata Biskop-ip avannaanilu provsteqarfiup peqqussutissatut siunnersuut ilalernartissimanngilaat kiisalu qallunaat nunaanni ilageeqarnermi ministereqarfik oqaaseqaateqarsimalluni tamanna qallunaat nunaanni atugaanngitsoq.
Inuit Ataqatigiinni isumaqarpugut ilagiinni sulisut paaseqatigiittumik ingerlaqatigiinnissaat pingaaruteqartoq suleriaatsillu tamanut sapinngisamik suleqatigiilluarnermik aallaveqartariaqartut, taamaattumik Inuit Ataqatigiinniit suliap peqqissaartumik naammassineqarnissaa aallaavigalugu kaammattuutigissavarput ilagiinni atorfinitsitsisarnerit pillugit Inatsisartut peqqussutaata allanngortinneqarnissaanik siunnersuut aappassaaneertinnagu Kultureqarnermut Atuartitaanermut Ilageeqarnermullu ataatsimiititami suliarineqassasoq, tassani tusarniaasimanerit misissorneqartariaqarput aammalu attuumassuteqartut soorlu nunatta biskopia aggersarlugu tusarniaaffigineqartariaqartoq
Inuit Ataqatigiinniit isumaqarpugut, ilagiinni atorfinitsitsisarnerit pillugit peqqussutissatut siunnersuut Inuit Ataqatigiinniit taamatut oqaaseqarfigalugu Inatsisartut Kultureqarnermut, Atuartitaanermut, Ilageeqarnemullu ataatsimiititamut ingerlanneqarnissaa innersuussutigaarput.
Daniel Skifte, ataatsimiinnermi aqutsisoq, Atassut.
Maliinannguaq Markussen Mĝlgaard-mut qujavugut, tulliulluni oqaaseqassaaq Mogens Kleist Kattusseqatigiit
Mogens Kleist, Kattusseqatigiit.
Qujanaq, naatuarannguamik oqaaseqassaagut,
Inatssisartunut ilaasortap Asii Chemnitz Narup siornatigulli
aalajangiiffigisassatut siunnersuutiginikuusaa kiisami ullumikkut
naalakkersuisut piviusunngortinnialerpaat, Kattusseqatigiinniit
annertunerusumik oqaaseqarata aalajangiiffigisassatut siunnersuut
tamakkiisumik taperserlugu oqaatigissavarput, aammalu ataatsimiititaliamut
attuumassuteqartumut innersuussutigerusullugu suliap
aappassaaneerneqannginnerani, qujanaq.
Daniel Skifte, ataatsimiinnermi aqutsisoq, Atassut.
Taava maannakkut Naalakkersuisut
siulittaasuat oqaaseqassaaq.
Jonathan Motzfeldt, Naalakkersuisut Siulittaasuat, Siumut
Oqaaserineqartut tunngavigalugit
oqassaanga Inuit Ataqatigiit isumaqatigigikka, illuatungiliuttut suliassaq una
Ilageeqarnermut Kultureqarnermullu ataatsimiititaliami
misissoqqissaarneqassasoq, ilumoormat isummat ilagiit qullersaaninngaanniit
nalliussimasut tamarmik hallilujamik imaqanngillat. Immaappoq
isumaqatigineqanngillat tamakkiisumik, kisiannili misissortariaqartunik
ilaqarlutik, tamaattumik kissaatigissavara udvalgemi tassani peqqissaartumik
aammalu ammasumik ilaatigut ilagiinni qullersaasut udvalgemut
qaaqquneqarsinnaanerat aamma ammatillugu oqaloqatigiinnerit tassani
inaarsarneqaqqullugit, isumaqarama maani aalajangigassaq sapinngisamik ilagiit
qullersaallu aamma paaseqatigiinnikkut paaseqatigiissutaasinnaasut
anguniartariaqartut.
Taanna taamatut udvalgemut innersuusineq
isumaqatigalugu suliassap taamalilluni ingerlaqqinnissa taperserpara.
Daniel Skifte, ataatsimiinnermi aqutsisoq, Atassut
Maannakkut allanik
oqaaseqarumasoqanngimmat taamaalilluni immikkoortoq 25 taassuma
siullermeerneqarnera naammassivoq, imatullu inerneqarluni,
Suliassaq aappassaaneerneqannginnermini
Kultureqarnermut Atuartitaanermullu ataatsimiititaliamut
ingerlateqqinneqassaaq.
Tassalu ullormut oqaluuserisaassagut
naammassivagut. Taava aqagu ataatsimiinnissatsinni marlunngorneq ualikkut
ataatsininngaannit ukua suliarineqassapput pingaartumik Partiit oqaaseqartui tusarnaarlualaaqquakka,
tassa allakkatigut saaffiginninneq tunngavigalugu piginnaatitaareermata
taamaaliornissamiinnut, imatut tulleriiaarneqassapput normuinnai taagussavakka
9, 96, 13, tassa 13, 96-ilu paarlaapput, sinneri taamaaginnarput 93, 91, 49, 61-ilu
erseqqippoq, qujanaq, taamaalilluni ataatsimiinneq naammassivoq.
Ullut ataatsimiiffiusut arfernat,
marlunngorneq 16. april 2002, nal. 13:00
Daniel Skifte, ataatsimiinnermik
aqutsisoq, Atassut:
Ataatsimiinneq ammarpoq.
Siullermik nalunaarutigissavara Jens
Napatoq Inatsisartunut ilaasortaq Mikael Petersenimut sinniisussatut ulloq 17.
april ilanngullugu ingerlaannassaaq.
Taavalu ullormut oqaluuserisassanut
nassuiaat. Naalakkersuisut kissaateqarnerat naapertorlugu immikkoortoq 26.
tassalu inuussutissarsiutitigut ilinniagaqarnermut sulisitsisut akiliutaat
pillugit Inatsisartut inatsisaata allanngortinneqarneranik Inatsisartut
inatsisissaatut siunnersuut. Aamma immikkoortoq 36. tassalu
inuussutissarsiutinik ilinniartitaanerit inuutissarsiutinullu pikkorissartitsisarnerit
pillugit Inatsisartut peqqussutaata allanngortinneqarneranik Inatsisartut
peqqussutissaattut siunnersuut. Inatsisartut ataatsimiinneranni matumani
ullormut oqaluuserisassanit peerneqarput.
Immikkoortut Inatsisartut ukiakkut 2002-mi
ataatsimiinneranni piumaarpoq, tassunga kinguartinneqarluni.
Kultureqarnermut Ilinniartitaanermullu
Ataatsimiititaliap qinnuiginninnera naapertorlugu immikkoortoq 29. tassalu
atuarfik pillugu Inatsisartut peqqussutissaattut siunnersuutip aamma immikkoortoq
30-p tassalu tunngaviusumik atuarfiit namminersortut aamma angerlarsimaffimmi
atuarfitaaneq il.il. pillugit Inatsisartut inatsissaattut siunnersuutip
oqaluuserineqarnissaat ullormit 25. aprilimiit ullormut 3. maj 2002-mut
nuunneqarput.
Immikkoortumut 34-mut tassalu
Kukkunersiuinermut Ataatsimiititaliap oqartussaaffiisa allanngortinneqarnissaat
aalajangiiffigisassatut siunnersuummut Inatsisit Atortinenqarnerannut
Ataatsimiititaliap isumaliutissiissutaa suli tigunngilarput.
Taamaattumik immikkoortup
oqaluuserineqarnissaa ulloq 17. april pisussaagaluartoq ulloq 25. april 2002-mi
pisussanngorlugu kinguartinneqarpoq.