Kalaallit Nunaanni Inatsisartut

Oqaluuserisassani immikkoortoq 27-1		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Ullut ataatsimiiffiusut aqqarnat, sisamanngorneq 25. april 2002

 

 

Oqaluuserisassani immikkoortoq 27

 

 

Grønlands Tekniske Organisationi pillugu Inatsisartut peqqussutaata allanngortinneqarni­neranik Inatsisartut peqqussutissaattut siunnersuut.

(Ineqarnerm­ut, Attaveqarnermut Pilersuinermullu Naalakkersuisoq)

(Siullermeernera)

 

Ataatsimiinnermik aqutsisoq: Daniel Skifte, Inatsisartut Siulittaasuat, Atassut.

 

 

Jørgen Wæver-Johansen, Ineqarnermut, Attaveqarnermut Pilersuinermullu Naalakkersuisoq, Siumut.

Qujanaq. Grønlands Tekniske Organisation pillugu Inatsisartut peqqussutaani allaqqavoq, erngup akii atuutilinnginnerini Inatsisartut aningaasaqarnermut ataatsimiititaliaannut akuerisassanngorlug­it saqqummiunneqaqqaartassasut.

 

Naalakkersuisullu siunnersuutigaat erngup akiisa allanngutaat, aningaasaqarnermut ataatsimiititaliam­ut akuerisassanngorlugit saqqummiunneqartarunnaassasut.

 

Taamaammat Grønlands Tekniske Organisation pillugu Inatsisartut peqqussutaata iluarsiissutissaan­ik siunnersuuteqartoqarpoq.

 

Allanngortitsineq pillugu akuersissuteqartarnermik eqaannerulersitsiqataassaaq aammalu innaallagissap erngup ungasissumiillu kiassarneqarnerup akiisa akuersissutigineqartarnerannut malittarisassa taamaalillutik assigiilersinneqassallutik.

 

Taamalu Inatsisartut killiussanik pilersitsisartuussapput, Naalakkersuisullu taakkuninnga immersuinissaminnut piginnaatinneqassapput.

 

Innaallagissap ungasissumiillu kiassarneqarnerup akiisa allannguutaat Inatsisartut aningaasaqarnerm­ut ataatsimiititaliaannut, saqqummiunneqartarnerat pillugu malittarisassat 1997-imi nukimmik pilersuineq pillugu Inatsisartut peqqussutaat akuersissutigineqarmat atorunnaarsinne­qarpoq.

 

Peqqussutissatut siunnersuut aningaasatigut Pisortanut kinguneqarnavianngilaq. Peqqussutissat­ut siunnersuutikkut allaffissornikkut oqilisaanneqassaaq, akimmi allannguutaat aningaasaqarnermut ataatsimiititaliamut saqqummiunneqartarnerat suliassersuutaajunnaassamma­t.

 

Akit allanguutaanik Naalakkersuisut suli akuersisassapput, taamaalillutillut qularnaartassallu­gu akit innuttaasut suliffeqarfiit aammalu ingerlatsisut eqqarsaatigalugit isumannaatsumik naleqquttu­millu qaffasissuseqarnissaat.

 

Taamaalillunga oqaluuserisassaq Inatsisartunit akersortumit suliarineqarnissaa neriuutigalugu oqaluuserisassanngortippara.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Ineqarnermut Naalakkersuisumut qujavugut. Taava maannakkut partiit, Kattusseqatigiit attaviitsul­lu oqaaseqartuinut nuuppugut, siulliullunilu oqaaseqassaaq Ruth Heilmann, Siumu­t.

 

Ruth Heilmann, Siumup oqaaseqartua.

Qujanaq. Tassa Naalakkersuisut siunnersuuteqarput erngup akiisa allannguutaannik suliaqarnerm­ut atatillugu Inatsisartut aningaasaqarnermut ataatsimiititaliaanut akuerisassanngorlug­it saqqummiun­neqartarnerat atorunnaarsinneqassasoq.

 

Peqqussutip atuuttup allanngortinneqarneratigut tamatumani pineqarpoq, akit allanngortinneqartussaatillug­it eqaannerusumik assigiimmilu suleriaaseqarnissaq.

 

Inatsisartut peqqussutaata allannguutissaanik Naalakkersuisut saqqummiussaat Siumumiit paasilluarlutigu akersissutigaarput. Taamaaliornikkut innaallagissamut ungasissumiillu kiassarneqarner­up ilaalu ilanngullugit akiisa akuersissutigineqartarneranni Naalakkersuisut pisinnaatitaareernerat atuutereersoq, aamma matumani erngup akiisa allanngortinneqarsinnaanerann­ik suliaqarnermi Naalakkersuisut malittarisassatigut assigiimm­ik suleriaaseqarnissaat anguneqartussaammat.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Ruth Heilmann qutsavigaarput. Tulliulluni oqaaseqassaaq Gudman Jensen, Atassut.

 

Godmand Jensen, Atassutip oqaaseqartua.

Inatsisartut upernaakkut ataatsimiineranni oqaluuserisassani immikkoortoq 27 tassaasoq Grønlan­ds Tekniske organisation pillugu Intsisartut peqqussutaata allanngortinneqarnissaanik Naalakkersuisut siunnersuutaat Atassummiit peqqissaartumik misissorsimavarput.

 

Peqqussutissap allannguutissaanik siunnersuut misissorluarnerani paasisimavarput, siunnersuutigineqartukk­ut anguniarneqartoq tassaasoq Grønlands Tekniske Organisationip sullinneqartullu akornanni suleqatigiinnerit pitsaanerusumik toqqaannarnerusumillu ingerlalerniss­aa siunertarineqartoq.

 

Naalakkersuisut siunnersuutaani ersarissumik takuneqarsinnaavoq allannguutissatut siunnersuut­ip siunertarigaa erngup, aammalu ungasissumik kiassarneqarnerup akiisa, suliarineqartarneran­ni aammalu akilersugaanerisa allannguuteqartinneqartarneranni aningaasaqarnerm­ut ataatsimiititaliaq aqqutiginngikkaluarlugu, Naalakkersuisut aalajangiisinnaanissa­at anguniarneqarluni.

 

Allannguutissatut siunnersuummi ersarippoq taamatut peqqussummik allannguineq Pisortanut aningaasatigut sunniuteqartussaanngitsoq. Allaffissornikkullu sulinermik ilaatigut kinguarsaataasartum­ik millisaasussaalluni.

 

Atassummiit oqaluuserisassani taamatut oqaaseqarfigalugu Naalakkersuisut allannguutissatut siunnersuutaat tamakkiisumik taperserparput.

 

Daniel Skifte, ataatsimiinnermik aqutsisoq, Inatsisartut Siulittaasut, Atassut.

Godmann Jensen qutsavigaarput. Tulliulluni oqaaseqassaaq Paninnguaq Olsen, Inuit Ataqatigiit

 

Paninnguaq Olsen, Inuit Ataqatigiit oqaaseqartuat.

Grønlands Tekniske Organisation pillugu Inatsisartut peqqussutaata allanngortinneqarnera pillugu, Inatsisartut peqqussutissaattut siunnersuut pillugu Inuit Ataqatigiit ima oqaaseqassaagu­t.

 

Siullermik apeqqutigerusupparput Grønlands Teknisk Organisation aamma naalisarlugu qanga GTO-mik taaneqartartoq ullumikkumut atuuttutullusooq qulaquttatut taaguuteqartinnersoq.

 

Naalakkersuisut siunnersuutigaat erngup akiisa allannguutaat aningaasaqarnermut ataatsimiititaliam­ut akuerisassanngorlugit saqqummiuttarunnaarneqassasut.

Tamatuma kingunerisaani allaffissornikkut oqilisaassineqassaaq, taamaakkaluartorli Naalakkersuis­ut akuersisartut inissisimanerat allanngissanngitsoq saqqummiussissummi oqaatigineqarpo­q.

 

Taamaattumik Inuit Ataqatigiit annertunerusumik oqaaseeqarata allannguutissatut naatsumik ersarissumillu saqqummiunneqartoq, taamatut isikkoqartillugu aappassaaneerneqarnissaanut ingerlateqqinneqarnissaa akuerseqataaffigissavarput.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut..

Paninnguaq Olsen qutsavigaarput. Tulliulluni oqaaseqassaaq Mogens Kleist, Kattusseqatigiit.

 

Mogens Kleist, Kattusseqatigiit oqaaseqartuat.

Qujanaq. Naalakkersuisut saqqummiussaanut oqaatigissavarput, suliatigut oqilisaanissap anguniarneqarnera paasisinnaakutsooratsigut.

 

Taamaattorlu Kattusseqatigiinniit oqaatigissavarput, ullumikkut suliffeqarfissuarnut assersuutigalu­gu Royal Greenlandimut tunngasut qanoq sukumiisumik Inatsisartuniit malinnaavigineqarsinnaanissa­at sukumiisumik paaserusukkatsigu.

 

Tassami ullumikkut nalunngilarput suliffeqarfissuit Namminersornerullutik Oqartussanit ilaat imermut akiliutigisartagaasa aaqqiivigineqarsimaneri nalunnginnatsigit.

 

Ilanngullugu Kattusseqatigiinniit paaserusupparput aningaasaqarnermut ataatsimiititaliaq suliamut tunngatillugu qanoq isumaqarnersoq nakkutilliivissaq eqqarsaatigalugu paaserusukkatsig­u. Taamaammat takusinnaagaluarlugu suliassap allaffissornikkut oqilisaataassas­oq paaserusupparput kingunerisinnaasai aningaasaqarnermut ataatsimiititaliam­ut misissoqqullugit.

 

Taamatut naatsumik oqaaseqarluta aaliangiivinnissarput utaqqeqqaarusupparput paasissutissat sukumiisut pitinnagit. Qujanaq.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut..

Mogens Kleist qutsavigaarput. Tulliulluni oqaaseqassaaq Otto Steenholdt, attaviitsoq.

 

Otto Steenholdt, attaviitsoq.

Tassa piareersarninni takusimavara ataatigut allaannarsimallugu, aap. Taamaattumik taanna naggataa kisiat isiginiarpara.

 

Inatsisartunut akuersortumik suliaralugu oqaluuserisassanngortitaq angerpara.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Taavalu akissuteqassaaq Naalakkersuisunut ilaasortaq, Jørgen Wæver-Johansen.

 

Jørgen Wæver-Johansen, Ineqarnermut, Attaveqarnermut Pilersuinermullu Naalakkersuisoq, Siumut.

Oqaaseqartunut tamanut qujarisuppunga, aammalu taamatut siunnersuuteqarnitsinnut tapersiinissinnu­t.

 

Apeqqutigineqartut pingasut akissuteqarfigilaassavakka, siullermik Inuit Ataqatigiit oqaaseqartua­ta Paninnguaq Olsenip apeqqutigaa GTO-mut tunngasoq sooq suli atorneqarnerso­q. Taanna siusinnerusukkut Inatsisartuni eqqartorneqartareerpoq, aammalu ukioq manna Inatsiseqarnermut ataatsimititaliamut nassuiaatigaarput taanna qanoq paasisariaqarnerso­q, aammalu tassani qanoq siunnerfeqarnersugut.

 

Naatsumik oqaluttuarissagukku imaappoq, peqqussut una taarserlugu nutaanik marlunnik sanannissarput naatsorsuutigaarput. Taamaalilluni taaguutaa taamaalilluni atorunnaarsinneqarsinnaaniassaamma­t.

 

Taamaattumik taakkua aamma Inuit Ataqatigiit ilaasortaatitaqarmata Inatsiseqarnermut ataatsimiititaliam­ut allakkiat nassiunneqareersimasut innersuukkusuppakka.

 

Kattusseqatigiinnut tunngatillugu tassa suliffeqarfissuarnut immikkut akigititaqartoqarpoq, Fiskeindustritakstimik taaneqartartoq. Taannalu aalisakkerinermik suliaqartunut tamanut atuutsinneqarpoq assigimmik.

 

Soorunami Inatsisartuniit siunnersuusiortoqarsinnaanera takorloorneqarsinnaavoq Naalakkersuis­ut peqquneqassasut, taanna akigitinneqartoq appartinneqarnissaanut.

 

Kisianni taamatut siunnersuusiornermi taava peqatigisaani aamma eqqarsatigisassat tassaavo­q, taamatut siunnersuusiussagaanni taava Nukissiorfinnut taamatut ingerlatsinermik isumagisaqartun­ut taamaalilluni, aningaasat isertussaagaluit ilai taava tapiissutinut tunniunneqartariaqalissammat­a.

 

Finansudvalgi taamatut saqqummiussaqarneq pillugu aperineqaqqaarnissaanik Mogens Kleist­ip siunnersuutaanut tunngatillugu oqaatigerusuppara, 1999-imi Aningaasaqarnermut Ataatsimiititalia­mi siulittaasuugallara­ma aningaasaqarnermut ataatsimiititaliap siunnersuutigaa taamani, taamatut aaqqiineqassasoq. Taamaattumik tassani Inatsisartut aningaasaqarnermut ataatsimiititaliaat taamatut aaqqiinissamut taamanili tapersersuinera ilisimavarput. Qujanaq.