Ulloq ataatsimiiffik siulleq, tallimanngorneq septembarip 21-at 2001, nal. 11.03

Oqaluuserisassani immikkoortoq 5

Inatsisartut Siulittaasussaanik qinersineq.

 

Otto Steenholdt, attaviitsoq, ataatsimiinnermik ammaasoq:

Inatsisartut suleriaasianni § 3-mi immikkoortoq 1-imi 2-milu aalajangersakkat naapertorlugit siulittaasutut qinigaassagaanni piumasaavoq Inatsisartuni ilaasortaanissaq, aammalu ilaasortat najuuttut affaannit amerlanernit taaneqarnissaq.

Inatsisartut Siulittaasuattut inissisimaffimmut qinigassanngortittussatut siunnersuuteqartoqaqqullugu maanngaanniit qinnutigissavara.

Qinigassanngortittoq ataasiinnaagaluarpalluunniit taasisitsisoqassaaq partiit angissusertik malillugu ilisimatitsissutigissavaat kina siulittaasussatut qinigassanngortinnerlugu. Tassunga tunngatillugu tulleriiaarneri oqaatigilaarlakka. Tassa partiit Siumut, Atassut, taavalu Inuit Ataqatigiit. Kattusseqatigiit taakkununngalu aamma ilanngullara attaviitsoqalersimammat aamma soorunami taakku siunnersuutissaqarnersut aperineqarumaarmata.

Taamaasillunga kissaatigissavara partiit siunnersuutigisaminnit massakkut nalunaaqqullugit, maani allattussagatsigit.

Nalunaarutigineqareersimasutut allanneqarsimasut ukuupput: Partiit Siumut, Atassut Inuit Ataqatigiillu, kiisalu Kattussaqatigiit attaviitsullu. Taamaalillungalu Siumuminngaaniit Ruth Heilmann oqaaseqaqqullugu kaammattussavara.

 

Ruth Heilmann, Siumup oqaaseqartua:

Qujanaq. Tassa inatsisartuni Siumup gruppea sinnerlugu tikilluaqquneqarnerput qujassutigaara uummammit pisumik.

Aammalu Inatsisartut siulittaasussaatut siunnersuutigineqartoq Ole Lynge aamma uagut akuersaarparput.

Augusta Salling, Atassutip oqaaseqartua:

Uaguttaaq Atassutip gruppeaninngaaniit tikilluaqquneqarnerput qujassutigaarput.

Atassutip gruppeaninngaaniit siulittaassussatut siunnersuutigaarput Finn Karlsen.

 

Lars Sørensen, Inuit Ataqatigiit oqaaseqartuat:

Inuit Ataqatigiit inatsisartuni ilaasortaatitaasa maannamut Inatsisartut Siulittaasuat Ole Lyngep ingerlaqqinnissaanut inassuteqarpugut.

 

Mads-Peter Grønvold, Kattusseqatigiit:

Soorlu siorna naluneqanngitsoq Inatsisartut Siulittaasoqarfiannut allagaqarsimavugut matu­muuna ilisimatitsissutigalugu nalunaarutigissavarput Inatsisartut suleriaasiat § 27 naapertorlugu Atassut Kattusseqatigiillu inatsisartuni ilaasortaatitaasa isumaqatigiissutigimmassuk Inatsisartut ataatsimiitititaliaannut inissitsiternermi taaseqatigiittassallutik. Taannalu 14. september Siulittaasoqarfimmut tunniunneqarneqarnikuuvoq.

Taanna naarpertorlugu inassutigaarput Anthon Frederiksen Siulittaasoqarfimmut. Siulittaasussarsiornermut inassutigaarput Finn Karlsen.

 

Otto Steenholdt, attaviitsoq:

Qujanaq. Taavalu aamma soorlu oqaatigereeriga attaviitsut tungaanninngaanniit, tassa uanninngaanniit, oqaatigissavara qinigassanngortitsinnginnama. Taava naluara aamma Per Berthelsen tamatumunnga oqaasissaqarnersoq.

 

Per Berthelsen, attaviitsoq:

Aap qujanaq. Uanga Inatsisartut iluanni inissisimanera ikerinnarsuarmiinnikuummat sivisuumik taamaattumik aaqqiinerlu aaqqiivinnerlu aatsaat ulloq kingulleq pinikuummat, tunginninngaaniit aalajangiussineq taamaattumik immikkut siunnersuutissaqanngilanga, kisianni aamma uani nalunaarutigiinnassavara kinaluunniit pineqaraluarpat taaseqataassannginnama.

 

Otto Steenholdt, attaviitsoq:

Soorlu maanna Inatsisartuni tusarneqareersoq, Inatsisartut Siulittaasussaattut qinigassangortinneqartut marluupput, tassalu Atassumminngaanniit aammalu Kattusseqatigiinnin-ngaaniit Inatsisartuni ilaasortaq Finn Karlsen Inatsisartuni Siulittaasussatut siunnersuutigineqarpoq. Taannalu siulliullugu taasissutigissavarput.

Taava Inatsisartut qinnuigissavakka siunnersuutigineqartup aappaanut, Finn Karlsenimut, isumaqataasut nikueqqullugit.

11.

Taavalu Inatsisartut qinnuigissavakka siunnersuutigineqartumut akerliusut maanna nikueq­qullugit.

18.

Taavalu aamma kingulliullugu apeqqutigissavara kikkut isumaqataallutik isumaqataanatilluunniit taaseqataanngitsut nikueqqullugit.

2.

Taava Inatsisartut qinnuigissavakka siunnersuutigineqartup aappaanut, Ole Lyngemut, isumaqataasut nikueqqullugit.

18.

Taavalu aamma apeqqutigissavara siunnersuutigineqartumut akerliusut qassiunerat takorusullugu taamaattumillu nikueqqullugit.

11.

Taavalu aamma massakkut kingumut apeqqutigissavara massakkut taasissutigineqartoq tassa Ole Lynge pillugu taasinngitsoortut nikueqqullugit.

2.

Taamaalilluni soorlu Inatsisartut massakkut takoreersinnaagaat Inatsisartuni Siulittaasuusimasoq, imaluunniit Siulittaasuusoq massakkut aamma qinigaaqqimmat. Tassalu Ole Lynge Inatsisartut ataatsimiinneranni matumani Siulittaasutut qinerneqarpoq. Ole Lynge, pilluarit.

Inatsisartut Siulittaasussaannut maanna qinersereeratta 2001-imi ukiakkut ataatsimiinnermi oqaluuserisassaq tulliuttoq tassaassaaq immikkoortut arfernat, Inatsisartuni Siulittaasup tullissaanik sisamanik, taakkualu sinniisissaannik qinersineq.

Qinersineq ingerlanneqassaaq suleriaatsitsinni § 3-mi immikkoortoq 3-mi aalajangersakkat malillugit, tassa qanoq amerlatigineq tunngavigalugu qinerseriaaseq malillugu.

Qinigassanngortinniakkanik taakkulu sinniisissaannik nalunaaruteqartoqarnissaa qinnutigissavara. Inatsisartut malittarisassaanni § 3-mi immikkoortoq 4-mi aalajangersagaq malillugu Siulittaasoqarfimmi ilaasortat tamarmik sinniisoqartussaammata ilanngullugu qinnutigissavara aamma Siulittaasunngortup sinniisissaanittaaq nalunaaruteqartoqaqqullugu.

Taamaalilluni partiit oqaaseqartui qinnuigissavakka siunnersuutissaminnik oqaluttarfimminngaanniit nalunaaruteqaqqullugit.

 

Ruth Heilmann, Siumup oqaaseqartua:

Siumuminngaanniit Siulittaasup Tulliisut qinigassanngortinniarpavut Anders Andreassen, sinniissussaralugu Mikael Petersen aamma Lars-Karl Jensen sinniissussaralugu Per Rosing Petersen.

 

Augusta Salling, Atassutip oqaaseqartua:

Atassumminngaanniit Siulittaasup Tulliatut qinigassanngortinniarparput Finn Karlsen, sinniisussaatullu Augusta Salling.

 

Mads-Peter Grønvold, Kattusseqatigiit oqaaseqartuat:

Kattusseqatigiinninngaanniit siunnersuutigaarput Anthon Frederiksen, sinniisussaralugu Mogens Kleist.

 

Maliinannguaq Markussen-Mølgaard, Inuit Ataqatigiit oqaaseqartuat:

Inuit Ataqatigiinninngaanniit Siulittaasoqarfimmi sinniisussatut uagut siunnersuutigaarput Lars Sørensen.

 

Otto Steenholdt, attaviitsoq, ataatsimiinnermik aqutsisoq:

Siunnersuuteqartut tamarmik nalunaaruteqareerput, taamaattumik akuerisassatut siunnersuutigineqartunut akuersisut qinnuigissavakka nikueqqullugit.

29.

Siunnersuutigineqartunullu akerliusut nikueqqussavakka nikueqqullugit.

0.

Kingulliullugulu taasinngitsoortut aamma qinnuigissavakka nikueqqullugit.

2.