Oqaluuserisassani immikkoortoq 18-1
Oqaluuserisassani immikkoortoq 18-1 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ullut ataatsimiiffiusut qulingiluaat, ataasinngorneq oktoberip 8-at 2001,
Jonathan Motzfeldt, Naalakkersuisut Siulittaasuat, Siumut:
Tamatumani atuisartunut pisisartunut siunnersuisoqatigiit tuniniaasarneq nalunaaqutsersuisarneq, akit aamma atuisartunut pisisartunullu maalaaruteqartarfittut ataatsimiititaliaq pillugit Inatsisartut inatsisaata allangortinnissaanut Naalakkersuisut matumuuna saqqummiupaat.
Siunnersuutip imarai inatsimmi atuuttumi allannguutit marluk. Allannguutissatut taakku marluk atuisartunit siunnersuisoqatigiit kissaateqarnerat malillugu naammassineqarnissaa naatsorsuutigineqarpoq. Siullermik nunaqarfinni aqutsisut suleqatigalugit suliassaq atuisartunut siunnersuisoqatigiinnut inatsit malillugu ingerlatsivigineqartussanngortitat aaqqiiviginiarneqartarnissaannut atuisartunut siunnersuisoqatigiit periarfissinneqarput.
Naatsorsuutigineqarpoq tamatuma nassatarissagaa atuisartut pisisartullu sullinneqarnerisa nakuunerulersinneqarnerat. Siunnersuut tamanna Naalakkersuisut tapersersorpaat.
Aappaatut annikillisaatitut meqqit akikillisaatit qiortakkat ilaallu ilanngullugit pillugit maleruagassanik peqalernissaa siunersuutigineqarpoq. Immikkuullarissup taassumap inatsisitigut maleruagassiuunneqarnissaa atuisartunut siunnersuisoqatigiit kissaatigisimavaat. Nunatsinni ullumikkut aaqqissuussinerit atorneqartut pillugit naammagittaalliuutinik tigusaqareerluni. Atuisartut nioqqutissat akiisigut akikillisaanermik aaqqissuussinerit assigiinngitsut aningaasalesugarimmatigit maleruagassatut siunnersuutigineqartutigut qularnaarneqarpoq meqqit tamarmik katillugit 5 kr-nik taakkuluunniit qaangerlugit nalillit atuisartut piumasaqaateqarneratigut tunniunneqartarnissaat.
Akikillisaanermik aaqqissuussinerup ullumikkut ilisimatitsissutigineqareersup piumasaqaatinik nutaanik eqquutitsinngitsut isumatuumik atorunnaarsinniarlugit siunnersuutigineqarpoq siusinnerusukkut atuuttut tunniuteqquneqarsinnaassasut 2002-mi augustip qaammataata naanerata tungaanut.
Inatsisissatut siunnersuut tassungalu nassuiaatit innersuussutigalugit taamak oqaaseqarlunga inatsisartunit akuersortumik oqaluuserisassanngortippara.
Anders Andreassen, Siulittaasoqarfimmi ilaasortaq, Siumut:
Qujanaq. Maannalu partiit, Kattusseqatigiit attaviitsullu oqaaseqartussaat oqaaseqassapput.
Vittus Mikaelsen, Siumup oqaaseqartua:
Qujanaq. Atuisartunut pisisartunut siunnersuisoqatigiit tuniniaasarneq nalunaaqutsersuisarneq, akit aamma atuisartunut pisisartunullu maalaaruteqartarfittut ataatsimiititaliaq pillugit Inatsisartut inatsisaata allangortinneqarnerani Inatsisartut inatsisissaatut siunnersuut Siumumiit ima oqaaseqarfigissavarput.
Atuisartunut siunnersuisooqatigiit kissaateqarnerat malillugu inatsimmi pineqartumi allannguutissaq Siumumiit akuersaarparput. Nunaqarfinni aqutsisut aamma eqqarsaatigalugit. Allannguutissat taakkua sulinerannut oqilisaataasussaassaaq. Tassami nunaqarfinni aqutsisut inatsit manna atorlugu kommunip oqartussaasui aqqutigalugit suliassanullu ingerlatitsisinnaanngormata, Siumumiit paasilluarlugu taperserparput.
Akikillisaanerit meqqit il.il. pillugit atuisartut siunnersuisoqatigiivisa pitsaanerusumik atortinneqarlutillu naammassineqartassasut qularnaarniarmagu aamma Siumumiit iluarisimaarparput.
Pingaarneruvorli piumasaqaatit eqqortumik atortinneqarnissaannik siunnersuutit siunnersuutitut atortinniarneqarnerat, maani allannguutissami pineqarmata tamanna Siumumiit maluginiarparput tapersersorlugulu.
Jakob Sivertsen, Atassutip oqaaseqartuat:
Qujanaq. Atuisartunut pisisartunut siunnersuisoqatigiit tuniniaasarneq nalunaaqutsersuisarneq, akit aamma atuisartunut pisisartunullu maalaaruteqartarfittut ataatsimiititaliaq pillugit Inatsisartut inatsisaata allangortinneqarnerani Inatsisartut inatsisissaatut siunnersuutip siullermeerneqarnerani Atassumiiit imatut oqaaseqarniarpugut.
Nunatsinni innuttaasut illoqarfinni nunaqarfinnilu najugaqarneq apeqqutaatinnagit nioqqutissanik pitsaasunik ullutsinnullu naleqquttunik pilersorneqarnermikkut isumagineqartuarnissat Atassummit assut pingaartipparput.
Nassuerutigisariaqarparput nunaqarfiit ilaanni ullumikkut nioqqutissanik pilersorneqarneq naammaginavissumik ingerlanneqarneq ajormat. Pingaartumik nunaqarfiit sikusartuni avin-ngarusimasunilu inissisimasut tamatumani eqqarsaatigalugit.
Tamaattumik pingaartuuvoq ullumikkut nunatsinni illoqarfinni nunaqarfinnilu innuttaasut ulluinnarni nioqqutissanik assigiinngitsunik pinngitsuuisinnaajunnaarsimasut naammaginartumik nioqqutissatigut pitsaanerpaamik isumagineqarnissaannik qularnaariffigineqarsimanissaat. Pingaartumik nunaqarfiit tamatumani eqqarsaatigalugit.
Matumuuna Atassummit nunaqarfinni nioqqutissatigut pilersorneqarnerup innuttaasunillu qaninnerusumik suleqateqarnissaq pitsanngorsaaffiginiarlugu nunaqarfinni qinikkat tassa nunaqarfinni aqutsisut peqatigalugit nioqqutissanik pilersorneqarnermut tunngasunik naammaginngisaqartoqarpat atuisartunut siunnersuisoqatigiinnut ingerlatseqqissinnaaneq peqqussutip allannguutissaanik periarfissinneqalermat.
Tamanna Atassummit alloriarnertut pingaartutut isigalugu tamakkiisumik taperserparput. Kiisalu mærk-inik katersiniaasaartarnersuaq pisisartunit naammagittaalliuutigineqartaqisoq mærk-it marlunngoraangata aningaasanngorlugit pisisartunut tunniunneqartalernissaannik allanngortitsiniarneq Atassummit qujarupparput. Innuttaasugummi tamatta aningaasannguaq qanorluunniit annikitsigigaluarpat pinngitsoorsinnaajunnaarsimagatsigu.
Matumuuna Atassummit atuisartunut pisisartunullu siunnersuisooqatigiit sulilluarneratigut pisisartunit naammagineqanngitsut eqqummaariffigalugit suliniarluarsimanerisa kingunerannik aaqqiiniartoqalermat qujassuteqarfigigatsigit.
Taamatut oqaaseqarluta inatsisip allannguutissaanik siunnersuut Atassummit tamakkiisumik taperserparput pisariaqassappallu ataatsimiititaliami misissoqqissaarneqarnissaa kissaatigalugu. Qujanaq.
Paninnguaq Olsen, Inuit Ataqatigiit oqaaseqartuat:
Inuit Ataqatigiit nuannaarutigaarput atuisartunut siunnersuisooqatigiit kajumissaaruteqareernerasigut atuisartut sinniisaasa sulineranni nunaqarfinni aqutsisut ilanngutitinneqarnissaminnut Inatsisartut inatsisaata allanngortinneqarneratigut periarfissaqalermata.
Inuit Ataqatigiit nunaqarfinni aqutsisut sulinermut pingaaruteqartumut peqataasinnaalerneranni tikilluaqqujumavagut suleqatigiilluartoqarnissaanillu kissaassilluta. Qularutissaanngitsumik allannguineq manna atorlugu nunaqarfinni aqutsisut suliassanik atuisartutsiunnersuisooqatigiivinut suliassanngortitsisinnaalernerisigut sullissinermik pitsaanerusumik, aammalu pissutsit piffimmilu ilisimaarineqartut aallaavigalugit atuisartut pisisartullu aaqqiissutissarsiornissaminnut aqqutissaqalerput.
Nunaqarfinni aqutsisuttaaq kommunimi atuisartut sinniisaat aqqutigalugit suliassanngortitsisinnaalernerat pisinnaatitaalerneruvoq ajunngitsup tungaanut alloriarneq.
Akikillisaanermik aaqqissuinerup atuisartut siunnersuisooqatigiit inatsisitigut maligassiuunneqarnissaannik kissaatiginnissimanerit atuisartut naammagittaalliuuteqarnerannik aallaaveqartoq Inuit Ataqatigiit pissusissamisoortutut isigalugu Naalakkersuisut akissuteqaataat naatsumik taamak tapeserlugu suliap aappassaaneerneqannginnermini sukumiisumik ataatsimiititami susassaqartumi misissoqqissaarneqarnissaa inassutigaarput.
Mads-Peter Grønvold, Kattusseqatigiit oqaaseqartuat:
Kattusseqatigiinniit inatsisissatut siunnersuut misissoreerlugu imatut naatsumik oqaaseqarfigissavarput. Atuisartunut sullissinerup pitsaanerusumik ingerlanneqarsinnaanera qularnaarneqassammat taamatut inatsisissap allanngortinneqarnissaa annerusumik oqaaseqarfiginagu Kattusseqatigiinniit taperserparput.
Taamatut naatsumikoqaaseqarluta siunnersuutip aappassaaneeneqannginnerani inatsiseqarneq pillugu ataatsimiititaliami nalilersorneqarnissaa Kattusseqatigiinniit kissaatigaarput.
Jonathan Motzfeldt, Naalakkersuisut Siulittaasuat, Siumut:
Inatsisissamut siunnersuut ilassilluarneqarmat partiinit tamanit, aamma Kattusseqatigiinniit nuannaarutigaara qujassutigalugulu.
Ilumoorpoq nunaqarfinni oqartussaasut maannakkut sulinermi matumani ilanngunniarneqarmata. Tamatumanilu tassa erseqqissaatigissavara Kalaallit Nunaanni atuisartut siunnersuisuisa kissaatigimmassuk nunaqarfinni siulersuisut aamma pisiassat tungaasigut ingerlatsinermi akuulersinneqassasut.
Tassa kommunimi forbrugerudvalgi suleqatigalugu nunaqarfinni aamma pissutsit naammaginngisatik suut tikitaqarfiusut ingerlateqqinneqarsinnaalissammata akisussaasunut.
Udvalgimi suliarineqarnissaani neriuppunga suliassaq taanna aamma ingerlalluartumik paaseqatigiiffiusumillu ullumikkut ingerlanneqarumaartoq.
Anders Andreassen, Siulittaasoqarfimmi ilaasortaq, Siumut:
Qujanaq. Tassa allamik oqaaseqartoqarnianngimmat taamaalilluni suliaq immikkoortoq 18 siullermeerneqarnera tamaanga killeqarallarpoq. Aapassaaneerneqartinnanilu ataatsimiititaliami, tassa inuussutissarsiutit pillugit ataatsimiititaliami suliarineqaqqaarnissaa inassutigissavara. Ajorineqanngilaq. Kingusinnerusukkullu taanna uterfigineqaqqikkumaarpoq aappassaaneerlugulu.