Oqaluuserisassani immikkoortoq 37-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut tallimaat, tallimanngorneq septembarip 28-at nal. 14:40
Ataatsimiinnermik
aqutsisoq: Augusta Salling, Siulittaasoqarfimmi sinniisussatut ilaasortaq,
Atassut:
Lise
Skifte Lennert, Kultureqarnermut, Ilinniartitaanermut, Ilisimatusarnermut
Ilageeqarnermullu Naalakkersuisoq, Siumut:
Qujanaq.
Aamma uani ilisimatitsissutigilaassavara isummamigut allannguutaanngitsunik
agguaanneqareersimasumut naleqqiullugu aaqqiissuteqalaarsimagama.
Naalakkersuisut
sinnerlugit matumuuna tunngaviusumik atuarfiit namminersortut kiissalu
angerlarsimaffinni atuartitaaneq il.il. pillugit Inatsisartut inatsisissaattut
siunnersuut saqqummiutissavara. 1979-imi Inatsisartut ukiakkut
ataatsimiinneranni tamanna pillugu inatsisartunut ilaasortap siunnersuutaata
oqaluuserineranut atatillugu Naalakkersuisut oqaatigaat atuarfiit
namminersortut pillugit Inatsisartut inatsisissaattut siunnersuusiorniarlutik.
Taanna
maanna saqqummiunneqarpoq qulequtserlugu imatut, tunngaviusumik namminersortut.
Kiisalu angerlarsimaffinni atuartitaaneq il.il. pillugit Inatsisartut
inatsisissaattut siunnersuut.
Siunnersuutip
siunertaraa meeqqat atuarfiata pisortani ingerlanneqartup saniatigut
periarfissatut tunngaviusumi atuarfinnik namminersortunik, aammalu
angerlarsimaffinni atuartitsinermik ingerlatsisinaanermut inatsisitigut
killissarititanik pilersitsinissaq. Tamatumani ilanngullugu pisortat qanoq
annertutigisumik aammalu qanoq iliorlutik tunngaviusumik atuarfeqarnermik
meeqqat atuarfiata ataaniittumik tapersersuinissaannut killissarititat aamma
aalajangersarniarlugit.
Tunngaviusumik
namminersortunik atuarfeqarnermut killissarititat siunnersuummi
takuneqarsinnaasutut
danskit malittarisassaannut taamaangajattunut assingupput. Anguniakkat
pingaarnersaraat
qulakkiissallugu meeqqat atuartinneqartussaatitaasut atuartinneqarnissaat
nalinginnaasumik meeqqat atuarfianni piumasarineqartunut nallersuuttumik.
Tamanna kapitali 1-mi aalajangersakkani qulakkeerniarneqarpoq. Tassani
ilaatigut § 3-mi atuarfik pillugu Inatsisartut peqqussutissaattut
siunnersuummisulli atuartitsinermi oqaatsit atorneqartussat pillugit
piumasaqaatit
assingi aalajangersarneqarsimammata.
Taamaalilluni
aamma oqaatsitta oqaatsitut pingaarnertut atuartitsinermilu oqaatsitut
inissisimanerat tunngaviusumik atuarfinnut namminersortunut
aalajangiussimaneqarpoq. Kisiannili atuarfik pillugu Inatsisartut
inatsisissaattut siunnersuummisut kalaallit danskillu oqaasii
atuartitsissutitut atorneqarsinnaassallutik, atuartut ilitseqqutaminnik
oqaasii aallaavigalugit.
Kapitali
3-mi tunngaviusumik atuarfinni namminersortunik nakkutilliineq pillugu
aalajangersakkat, tunngaviusumik atuarfinnik namminersortunik
atuartitsinerup avataaniit nakkutigineqarnissaanik piumasaqaateqarfiusup
atuartitsinerup nalinginnaasumik meeqqat atuarfianni piumasarineqartunut
nallersuuttuunissaanik aammattaaq qulakkeerisuupput.
Tapiissuteqarnermut
aalajangersakkat danskit tapiissuteqartarnermut aalajangersagaannut
naleqqiullugit annertuumik pisariillisarneqarput. Tunngaviusumik atuarfinnut
namminersortumik ingerlatsinermut tapiissuteqartoqartassaaq
namminersornerullutik oqartussat kommuninut meeqqat atuarfianni atuartunut
ataatsimut tapiissutigisartagaannut naapertuuttumik.
Taamak
tapiissuteqariaaseqarnissamut naatsorsueriaatsimik pisariitsumik aamma
tapiissutit allaffissornikkut aqunneqarneranik akikitsumik kissaateqarnerit
tunngaviupput.
Kapitali
4-mi tapiissutisisinnaanermut piumasaqaatit aammalu tapiissutit
atorneqartarnissaannut malittarisassat aalajangersarneqarput. Danskit
malittarisassaat malillugit naalagaaffiup nalinginnaasumik ingerlatsinermut
tapiissuteqartarnera assiginagu siunnersuummi saqqummiunneqarpoq kommunini
atuarfiup ingerlanneqarfiani kommunalbestyrelse tassaassasoq ingerlatsinermut
tapiissuteqartussaq.
Tamanna
tunngaveqartinneqarpoq kommunit atuarfeqarnerup ingerlanneqarneranut
Namminersornerullutik
Oqartussanit ataatsimoortumik tapiissutinik pissarsisarnerannik.
Taamaaliornikkut
ataatsimoortumik tapiissutissutit atuartunut ataasiakkaanut tapiissutitut
malinnaapput.
Peqqussutissatut
siunnersuut piffissami septemberip 3-aniit 14-anut ukununnga
tusarniaassutigineqarpoq, KANUKOKA, Ilinniartitsisut kattuffiat IMAK, KIK, Ilinniartitaanermut
Ministeriaqarfik, Ministeriuneqarfik, Nuuk Internationale Friskole, Aningaasaqarnermut
Pisortaqarfik, Aqutsinermut Pisortaqarfik, Isumaginninnermut
Suliffeqarnermullu Pisortaqarfik aammalu Naalakkersuisut Allattoqarfianni
Inatsisileriffik.
Ministeriuneqarfik,
aamma ilinniartitaanermik Ministereqarfik kiisalu KANUKOKA, Nuuk International
Friskolelu, aamma Aningaasaqarnermut Pisortaqarfik
ataatsimeeqatigineqarsimapput.
Taamak oqaaseqarlunga inatsisartunut kajumittumik siunersuut
oqaluuserisassanngortippara.
Augusta
Salling, Siulittaasoqarfimmi sinniisussatut ilaasortaq, ataatsimiinnermik
aqutsisoq, Atassut:
Kultureqarnermut
Ilinniartitaanermut Ilisimatusarnermut Ilageeqarnermullu Naalakkersuisumut
qujavugut.
Lars-Karl
Jensen, Siumup oqaaseqartua:
Nuummi
International friskolemik aallartitsiniarneq innuttaasut ilaannit 1999-imi
saqqummiunneqartoq taperserlugu inatsisartunut ilaasortamit Otto
Steenholdtimit oqaluuserisassanngortitaammat taamani eqqaamavarput inimi
maani Nuummilu innuttaasuni annertuumik oqallisigineqartoq. Ilaatigut meeqqat
atuartut pikkorinnernut pikkorlunnerusunullu avillugit
atuartittalerneqarnissaat annilaanngatigineqarluni.
Inuiaqatigiit
ineriartorneranni meerartatta pitsaasumik nunanullu allanut nallersuuttumik
atuartitaanissaat allatuulli Siumumiit annertuumik pingaartillutigu
suleqataaffigaarput. Periarfissarlu manna atorlugu oqaatigeqqaarusupparput
maannakkut atuarfitsialammik taallugu suliniutip killiffia assut
Siumuminngaaniit isumalluarfigigatsigu.
Naalakkersuisut
saqqummiussaatigut matumuuna takusinnaavarput atuarfiit namminersortut danskit
taamatut ingerlatsinerannut periarfissaat sanilliullugit taamatullu
Namminersornerullutik Oqartussat malittarisassaliorlutik oqartussaanerat
pillugu qulakkiigassat sukumiisumik paasiniaqqaarsimallugit maannakkut
saqqummiisut.
Tamatumap
malitsigissallugu angajoqqaat atuartittussaatitaasunit qitornallit
pisinnaatitaaffiisa ilanngullugit qulaajarneqarnerat. Tassa tunngaviusumik
atuarfimmik pilersitsisinnaaneq inatsisitigut tunngavilersinnaajumallugu
Naalakkersuisut taamatut suliaqarsimapput.
Siumumiit
aamma pingaartipparput inatsisissap Kalaallit Nunatsinni pissutsit immikkut
ittut naleqqussarfigalugit ilusiligaanissaa. Tassani pineqarput
qaffasissutsimit immikkoortiterineq nalilersuisinnaanermik aalajangersakkat,
oqaatsit ilitsoqqussaralugit pigisat atuartitsissutaanissaat il.il.
inatsisissakkut aamma qulakkeerniarneqassasut.
Siumutgruppe
isumaqarpoq atuarfinnik namminersortunik ingerlatsinissami meeqqat atuarfiat
oqilisaanneqarsinnaasoq, matumani atuartut piginnaasamikkut immikkut
tapersersorneqarnissaminnik pisariaqartitsisunut. Immikkut atuartitsinermut
immikkullu perorsaanermut tunngasutigut ikiorsertarualinnut. Kiisalu
atuartunut ilinniakkaminnik ataatsimik arlalinnilluunniit nalinginnaasumik
atuartitsinermut malinnaasinnaanngikkallartunut. Periarfissap tamatumap
sammititarisinnaanera eqqarsaatigalugu.
Uanili
tamanna imak paasineqassanngilaq taakkuinnaat aallaavigalugit atuarfinni
namminersortuni pilersitsisoqarnissaa siunertarigipput.
Siumumiit
ilisimavarput inatsisit tunngaviusut § 76 malillugu danskit naalagaaffianut
tunngaviusumik atuarfiit namminersortut angerlarsimaffimminnilu
atuartitsisinnaaneq periarfissaqartut. Tamanna aamma Siumup aqqutigalugu
anguniakkamini ammatitaraa. Taamatut periarfissaqarneq nunatsinni aamma
ammatitaammat inatsisiliornitsinni ammatinneqassasoq periarfissaqaqquvarput.
Taamaattumik
pisortanit qanoq tapersersorneqarsinnaanera aammalumi nakkutigineqarnissaanik
apeqqutit atuarfinni taamaattuni tikinngitsoorneqarsinnaanngillat. Atuarfiit
taamaattut pilersinniarneqarnerat minnerunngitsumik Nuummi aallaaveqartoq
tamatta ilisimavarput. Siunnersuummilu saqqummiunneqartuni tupinnanngitsumik
danskit atuarfinnik taamaattunik ingerlatsinerat tunngavigalugu
aaqqissuunniarneqarpoq.
Kisiannili
malugineqarsinnaalereerpoq nunatsinni meeqqat sunngiffimmi
susassaqartinnerannut
tunngasut inatsisit meeqqat atuarfianni nalinginnaasumik atugassat, atugassaat
pillugit allanngortitsinermi aamma kinguneqarumaartoq.
Atuarfiit
taamaattut pisortanit aningaasatigut tapiiffigineqartarnissaannik aamma
pisariaqartitsisoqassaaq, Namminersornerusut kommunini atuarfinnut
aningaasatigut tapiissutaat qiviassagaanni 2001-imut 309 millioniupput,
taakkununnga 112 millionit nunaqarfinni atuarfinni sammititaallutik. Allallu
197 millionit illoqarfinni atuartunut.
Aamma
takuneqarsinnaavoq nunaqarfinni atuartut arfinilinniit 17-nut ukiullit
2.556-inut naatsorsorneqarsimasut 8.986-illu taamatut illoqarfiit
atuarfiiniillutik. Naatsorsuutit kingulliit malillugit bloktilskudinik
nunaqarfinni meeqqamut ataatsimut 43.818 kronenik illoqarfimmilu ataatsimut
21.923 kronet naatsorsorneqarsimapput.
Taakkua
takussutissiat ilannguppagut, atuarfiit pineqartut aallarteralerpata
atuarfinnut ataasiakkaanut tapiissutit tamatumani
sunnerneqanngitsoornavianngimmata. Taannaannarluunniit taaginnarlugu aamma
malunnareerpoq Nuuk International Friskolemi
naammagittaalliuutigineqareersimasoq,
tassa nassuiaammi taanna ilanngullugu takusinnaagatsigu aningaasalersuinerit
atuutilerumaartunut takorluukkat taaginnarneqartut aallaavigalugit.
Siumup
paasisai naapertorlugit ilimagereertariaqarpoq atuarfiit taakkulu
ingerlatitaaneri iluarsaattarneri allinissaat il.il. isumaqatigiinniarnerni
suli annertunerusunik malitseqarumaartut naatsorsuutigisariaqartoq. Tassami
aamma ilinniartitsisut inissaat iluarsaattarnerilu tikinneqarumaarput,
tikinneqarumaartut naatsorsuutigigatsigit.
Naatsorsuinerit
takusinnaasavut malillugit atuartup ataatsip aallartinnissaanut ukiumut
nammineq
angajoqqaat akiliutissaat naatsorsorneqarsimavoq 40.000 - 42.000 kronenut
annertussuseqassasoq.
Tamakkua
taasariaqartutut Siumumiit isumaqarfigigatsigit imatut paasineqaqqunngilagut
nangaasaarisutut tunuarsimaartutulluunniit, kisiannili aningaasartuutissat
landskarsimullu attuisussaanerat erseqqissaannarparput.
Tunngaviusumik
atuarfiit namminersortut kalaallit qallunaallu oqaasii ilitsoqqussaralugit
oqaasiusut, oqaasiusutut isigalugit atorneqarnissaat ilinniartitsinermilu
inissisimanissaat Siumumiit tamanna isumaqatigaarput. Tamatumani meeqqat maani
najugaqavissut immikkut atuartitsineq aqqutigalugu kalaallit oqaasii
tamakkiisumik ilinniassagaat oqaatigineqarmat. Tamanna pissusisssamisoortutut
Siumumiit isigaarput.
Atuarfiit
pineqartut nammineerlutik ingerlasussat soorunami namminneq
siulersuisoqassasut siunnersuutaavoq malittarisassat kiisalu
siulersorneqarnerannut aningaasalersorneqarnerannullu tunngasut nunatsinni
Naalakkersuisuni akuerineqartarnissaat pissusissamisoorpoq. Tamanna Kommunit
Kattuffiat KANUKOKA paaseqatigalugu ingerlanneqarpat.
Siumumiit pingaartipparput atuarfiit pineqartut meeqqat atuarfiinut allanut suleqatiginninnerisa erseqqissumik ilusilersimanissaat. Taamaaliornikkut pisariaqanngitsumik arlaatigut pisarissersuisoqaqqunagu. Kommunalbestyrelsit pisussaaffigimmassuk meeqqat atuarnerisa pissusissamittut ingerlanerat. Taamaattoqanngippat piaartumik taakkua ilisimatitaanissaat piumasaqaataasassoq Siumumiit isumaqarpugut.
Taamatuttaaq atorfinitsitsisarnerup akissarsiallu tungaasigut malittarisassat pisortanit atorneqartut najoqqutaralugit iliuuseqartoqartarnissaa naatsorsuutigaarput.
Naggataatigut Siumumiit oqaatigissavarput manna isumaqanngilagut nunatsinni atuarfiit atuartitsisullu ima isikkoqalersimasut tunngaviusumik atuarfiit namminersortut sumi tamaani pisariaqalersimallutik. Nunatsinni atuarfigut atuartitsisullu tatigaagut. Aammalu illoqarfinni nunaqarfinnilu sulineri imatut isigalutigit, sapinngisaminnik meerartatta ilinniagassaat sulinerminni naammassiniaraat.
Maanilu taamatut periarfissiinermut Siumumiit akuersaarpugut naatsorsuutigigatsigu tamanna meeqqat atuarfiata nunatsinni sanngiillissutiginagu, kisiannili nukittorsaatigalugu periarfissamisut atorumaaraa. Angajoqqaat taamatut kissaateqartut tunngavigalugit suleqatigalugillu.
Taamatut oqaaseqarluta Siumumiit oqaluuserisassaq manna siullermeerneqarnera oqaaseqarfigivarput. Naggaterpiaatigullu Siumumiit isumaqarpugut atuarfinnik namminersortunik pilersitsinissaq pillugu inatsisissap upernaamut 2002-mut aappassaaneerneqarnissaa pitinnagu tamanna susassaqartunut tamanut annertunerusumik tusarniaassutigisariaqartoq, siunnerfissanik ersarinnerusunik sukumiisunillu pissarsinissaq siunertaralugu.
Naimanngitsoq Petersen, Atassutip oqaaseqartua:
Atassummiit nuannaarutigaarput tunngaviusumik atuarfiit namminersortut atugaalersinnaanerannut periarfissiisoqassammat. Ullumikkut killiffipput isigissagaanni aamma pisariaqarpoq atuarfiit namminersortut nunatsinni ammaatissallugit. Pisortat ingerlataat kisiisa isumalluutiginagit ingerlatsisoqalersinnaanera Atassummiit soqutigilluinnarparput.
Inatsisip atortuulersinneqarnissaa, inississinnaanera, teknikikkullu aaqqinneqarsimanera ajorinngilarput, aammalu iluarisimaarlutigu atuarfiit namminersortut innuttaasunit aammalu angajoqqaat sinniisaanniit soraarutigineqarmata, Atassummiit ingerlaannartumik siunertamut tapersersuinerput tamanut ammasumik nalunaarutigisimavarput.
Atassummiit isumaqarpugut tupinnartuliaanngitsoq angajoqqaat namminneq aalajangikkaminnik qinigassaqartitaajuarnissaat. Ullumikkut meeqqat atuarfiata inissisimaneq tunngavigalugu pissusissamisoorpoq angajoqqaat periarfissanik allaanerusumik aallartitsisoqassappat, kisiannili eqqaamasariaqarpoq meeqqat atuarfianni ataatsimoortumik piumasaqaatinik piumasaqaataasartunit allannerunngitsumik, ajornerunngitsumik aaqqissuussiniarneq tunngavilerneqartariaqarpoq.
Naalakkersuisut tapiissutinik qanoq ingerlatsisoqarsinnaaneranut tunngasumik siunnerfiat Atassummiit tamakkiisumik taperserniarparput. Aningaasanut tunngasortaa eqqarsaatigalugu annerusumik tikinnianngilarput. Atassummiit pingaartipparput kommunit inatsisitigut akuliusimatinneqarlutik pisussaaffiligaassammata soorlu atuarfeqarnissaq, ilinniartitsisut ineqartinneqarnissaat eqqarsaatigalugit.
Atassummiit nuannaarutigaarput suliariniakkap tusarniaassutigineqarsimanera nunatsinni soqutigisaqartunut assigiinngitsunut Namminersornerullutik Oqartussat iluanni, aammalu kommunillu sinniisoqarfii, kiisalu Danmarkimi oqartussaassuseqartut arlaqartut tusarniaaffigineqarsimammata. Taamatut oqaaseqarluta inatsisissap inatsisartuni aappaassaaneerneqannginnerani Inatsisartut atuartitaanermut ilinniartitaanermullu ataatsimiititaliaani suliarineqarnissaanut Atassummiit inassutigaarput.
Johan Lund-Olsen, Inuit Ataqatigiit oqaaseqartuat:
Qujanaq. Meerartatta
meeqqat atuarfiani atuartinneqarnerat tamatta pingaartipparput. Oqaluuserisap
siuliani sammisatsinni tassalu meeqqat atuarfiat pillugu peqqussutissatut
siunnersuummi atuarfitsialammillu taaguuserlugu annertuumik
iluarsartuussiffigissallugu aamma pingaartitatsinni tamanna
uppernarsareerparput.
Siunnerfigiumavarput
atuarfik pitsaasoq. Atuartut ilinniartitsisullu nunatsinni
sumiikkaluarunilluunniit
pitsaasunik nuannersunillu atugaqarfigisassaat. Angajoqqaat
akisussaaqataanermik annertuumik misigisaqarfigisassaat pilersinniarusullutigu
atuarfik pisortanit ingerlanneqartoq atuartuutiminnik qitiutitsilluni ukiuni
aggersuni iluarsartuussiffigineqarsimalluni aamma atuartitsiviusussaq.
Peqqussutissaq
atuarfitsialammik taaguuserlugu aallaaveqartumik suliaasoq maani nunatsinni
peqqussutiliortarnitsinni aammalu inatsisiliortarnitsinni nutaaliaavoq
imaannaanngitsoq, tassaagami nunatsinni pisariaqartitat pingaartitat
nunatsinnilu pissutsit aallaavigalugit taakkununngalu peqatigitillugu nunani
allani ilisimatusarnikkut paasisassat nutaanerpaat atorlugit suliaq. Suliaavoq
nunatsinni atuisut peqatigalugit peqqissaartumik, siunissamillu meerartata
nunarsurmioqataallutik inooqataalernissaannut ammaassisussaq pingaartitsisorlu.
Naatsumik oqaatigalugu torrallataq aasinaasiit Danmarkimi pissusiusunit
issuaanerinnaanngitsoq.
Atuarfik
taanna piuviusunngortinneqartussaq isumalluarnangaartorlu pisortat
ingerlatarivaat inatsisillu tunngaviusumik aalajangersakkat malillugit
akiliuteqartitsinertaqanngitsumik ingerlanneqassalluni.
Naalakkersuisut
ulluni makkunani aviisini naqitanngorlugu siammartitigaanni atuarfitsialak
imaattunik oqaaseqarfigineqarpoq, tassa uani issuaaneruvoq. "Meeqqat
atuarfiat pillugu pilersaarummi atuartut ataasiakkaat ilikkagaqarsinnaanerat
qitiutinneqarpoq. Pingaaruteqarporli tamatumunnga ilutigitillugu
peqatigiinnermik paasinnissinnaanerup atatiinnarnissaa, taamasilluni
atuarfiit ataasiakkaat ineriartornissaannut tamakkiisumik
periarfissinneqassapput. Taamallu inoqatinut allanut paasinnissinnaaneq,
soqutiginninneq, akisussaassuseqarnermik misigineq, kiisalu ataqqinninneq
inerisarneqassallutik.
Inuiaqatigiit
suli tunngavigaat ataatsimoorussamik meeqqat atuarfianni iluatinnaatit uku:
Kulturinik allanik paasinnissinnaaneq, pinngortitamik ilisimaarinninneq, inuit
pisinnaatitaaffii kiisalu oqartussaaqatigiinneq.
Atuarfitsialaap
tassa aallaavii atuartunut tamanut misilitassanik inuttullu ineriartornermik
imaqartut", issuaaneq naavoq.
Maannali
inatsisissatut siunnersuummi nunatsinni inatsisitigut siullerpaamik
tunngavissiisoqartussanngulerpoq, pisortat aamma tapiissuteqarnerisigut
atuarfiit namminersortut pilersinneqarsinnaanerinut aasinaasiit Danmarkimi
pissutsit aallaavigiinnarlugit issuaaneruinnartoq. Tamannami siunnersuummi
erseqqissumik nassuerutigineqarpoq.
Siunnersuut
akuersissutigineqassappat atuarfiit taakku pisortat ingerlassaasa saniatigut
akiliuteqartitseqqaarnikkut aatsaat meeqqanik
atuartuuffigineqarsinnaassapput. Allatut oqaatigalugu atuarfinni
namminersortuni meeqqat artuartinneqarsinnaassanngillat angajoqqaat tamanna
akissaqartinngippassuk. Kingunerissavaalu inuiaqatigiinni atugarissaarnerusut,
akimarngit assigisaasalu meeraasa atuarfinni taamaattuni
atuartinneqartalerumaarnissaat.
Oqaatsit
uku issuaanermiittut peqatigiinnermik paasinnissinnaanerup atatiinnarnissaanik
imaqartut tamatumani taava sumiippat? Taamatuttaarlu oqaatsit makku, tassa
aamma issuaanernerminngaanniit: "Inoqatigiinnut allanut
paasinnissinnaaneq, soqutiginninneq, akisussaassuseqarnermik misigineq,
kiisalu ataqqinninneq sumiissimalerpat?"
Inatsisissatut
siunnersuut akuerineqarpat nunatsinni malunnik atuarfiit eqqarsaatigalugit
taamaalilluta neqerooruteqalissaagut, aappaa akeqanngitsoq, Atuarfitsialak,
oqaatigeriikkattut ukiuni aggersuni annertuumik pitsanngorsaavigineqartussaq.
Aappaa atuarfik angajoqqaanik, angajoqqaalluunniit sinnerlugit meeqqanik
nakkutiginnittuusunik qaammammut akiliiffigineqartartussaq.
Inatsisissatut
siunnersuummi aqqutissiuussiniartoqarpoq atuarfinnut taamaattunut
ingerlatsinermut tapiissuteqartoqartalissasoq Namminersornerullutik
Oqartussat kommuninut meeqqat atuarfianni atuartumut ataatsimut
tapiissutigisartagaannut naapertuuttumik.
Nunatsinni
atuartumut agguaqatigiissillugu tapiissutaasartoq maannakkut 26.772 kronenik
annertussuseqarpoq. Tassalu taannaavoq meeqqat ataasiakkaat isaasalerlugu
siunissami atuarfitsialammit atuarfimmut namminersortumut nassartaligassaat,
angajoqqaavisa aalajangersimanerat malillugu atuarfimmi namminersortumi
meeraq atuartussanngortinniarneqarsimappat.
Ingerlatsinermut
tapiissutaasartussap saniatigut Naalakkersuisut kommunalbestyrelsellu aamma
piginnaatinneqartussaapput atuarfiit namminersortut sananeqarnerinut
tapiissuteqarsinnaassallutik, imaluunniit taarsigassarsisinnaassallutik.
7Inuit
Ataqatigiit aalajangersakkat takku eqqarsarnartoqartippagut. Tunngaviusumimmi
siunertanut taamaattunut tassalu angajoqqaat akileeqqaarlutik meeqqamik
atuarsinnaanerannut aaqissuussinermik kinguneqartussanut pisortat
akulerusimasariaqanngitsut isumaqarpugut.
Nuummi
atuarfimmik namminersortumik pilersitsiniaqatigiit qanittukkut aviisini
naqitatigut oqaatigivaat naatsorsuutigineqartoq Nuummi atuarfik taamaattoq
280-inik atuartuuteqarsinnaassasoq. Atuartut taamak amerlassusillit
naatsorsuutigissagaanni imaappoq, pisortat ingerlatsinermut ukiumut
tapiissutigisassagaat 7,5 millionit.
Atuarfimmik
namminersortumi atuartussat 400-simappata ukiumut ingerlatsinermut
tapiissutigineqartussat
10,7 millioniussapput. Nuummi pilersaarutigineqartumi meeqqat
allatsinnerinnaanut
angajoqqaat kr. 25.000-it akiliutigeqqaassavaat, inatsisissatullu
siunnersuummi
aamma atuarneqarsinnaavoq atuarfimmik namminersortumik pilersitsiniaqatigiit
naatsorsuutigigaat nammineerluni akiliutaasartussat, tassalu angajoqqaat
atuartumut ataatsimut akiliutigisartagassaat qaammammut 3.333 kronet
imaluunniit 3.500 kronet missaannik amerlassuseqartartussaassasut.
Inuit
Ataqatigiit arajutsisimanngilarput angajoqqaaqarmat ullumikkut meeqqat
atuarfiannik naammaginninngitsunik. Meeqqat atuarfianni ajornartorsiuteqarput,
aap. Ajornartorsiutilli taakkuupput ukiuni pingasunngulersuni maannamut
annertuumik iliuuseqarfiginiarlugit Atuarfitsialak aqqutigalugu
aaqqiivigineqartussanngortut. Siuliani oqaluuserisatsinni tamanna
uppernarsivarput.
Suliniutillu
ingerlateqqittariaqarpagut peqatigiinnermik paasinnissinnaanerup
atatiinnarnissanik inoqatinut allanut paasinnissinnaaneq, soqutiginninneq,
akisussaassuseqarnermik misigineq kiisalu ataqqinninneq qitiutillugit.
Taamaattumik 2002-mi upernaap tungaanut eqqarsarluartariaqarpugut.
Inuiaqatigiit kalaallit taamak ikitsigitilluta maannakkut
siunnersuutigineqartutut meeqqat atuarfiata pioreersup saniatigut
piviusunngortitsinissamut akissaqarpugut?
Inuiaqatigiit
taamak ikitsigitilluta inuiaqatigiinni nukiit aningaasallu taamak aamma
killeqareertigisut inatsisitigut tunngaviliissaagut inuiaqatigiinni
avissaartuunnermik suli annertuneruinnartumik sorlaliiginnarsinnaasumut.
Apeqqutit tamakku tunngaviusut peqqissaartumik isummersorfiusariaqarput.
Inuit
Ataqatigiit apeqqutit arlallit inuiaqatigiinnut
oqallisigisassanngortiutigalugit taamaattumik upernaap tungaanut
Inatsisartut kultureqarnermut ilinniartitaanermullu ataatsimiititaliaannit
apeqqutit makku aamma ilanngullugit sukumiilluinnartumik
misissorneqaqqaassasut imissutigerusussavagut. Siullermik atuarfiit
namminersortut pilersinneqarsinnaanngorneri, tassa akuersissutigineqassappat,
Atuarfitsialammi suliniutigineqartunut sanilliullugu qanoq sunniuteqassappat,
aningaasaqarnikkut, imarisaatigullu?
Aappassaanik
kommunit nammineersinnaatitaanerannut tunngatillugu ingerlatsinermut
tapiissutaasartussat qanoq inissisimappat. Kommunit nammineersinnaatitaanerat
inatsimmi tunngaviusumi aamma erseqqissumik allassimavoq.
Pingajuattut
meeqqat atuarfianni ataatsimoortitsilluni atuartitsinermut tassa
integrationsord- ningimut maannamut ingerlanneqartumut atuarfiit
namminersortut qanoq sunniuteqassappat? Kiisalu aamma atuarfiit namminersortut
nunatsinni meeqqat atuarfianni ilinniartitsisussaaleqinerujussuarmut qanoq
sunniuteqarsinnaappat?
Allatut
oqaatigalugu naggataarutaasumillu Inuit Ataqatigiit ullumikkut
piareersimanngilagut inatsisissatut siunnersuut manna tamakkiisumik
tunuliaqusersornissaanut. Kissaatigivarpullu upernaap tungaanut
eqqarsarluartoqarlunilu inuiaqatigiinni aamma annertuumik oqallinneqarumaartoq.
Mogens Kleist, Kattusseqatigiit oqaaseqartuat:
Tunngaviusumik siunnersuut ataatsimut isigalugu Kattusseqatigiinniit
isumaqatigaarput. Aammalu inatsisit tunngaviusut tassalu grundlovi malillugu
kikkulluunniit meeqqaminnik atuartitsisinnaanerat tassalu friskole
privatskolenilu pisinnaatitaaffigimmassuk grundlovimi § 76 malillugu.
Taannalu Danmarkimiinnaq atuuppoq, taamaattumik inatsisit
tunngavigissagutsigit Inatsisartut inatsisisitigut pisinnaatitaaffiit
nunatsinni atuutsinneqassappat Hjemmestyrelovimi § 4 malillugu
aaqqiivigineqaqqaartariaqarput.
Ilanngullugu oqaatigissavarput oqalunnguatuarluta nunarsuarmioqatitsinnik
nallersuussinnaalernissarput ilinniartitaanerup iluani taava
avatitsinniittut isiginngitsuusaaginnarsinnaanngilagut ineriartornerup
ingerlanerani.
Nunani allani annertuumik aammalu ukiorpassuarni misilittagaqalereersimapput.
Friskoleqarneq aammalu privatskoleqarneq eqqarsaatigalugu. Imaannerput
avatitsinniittut isiginnaavinnassanerigut ilinniartitaanerup qaffasarnerat
nalaani. Tamatta eqqarsarsinnaasugut nalunngilarput friskolet privatskolemik
aallartitsoqassappat ilinniartitaaneq atuarfeqarfinnut unammillernertut
isigilissagatsigu.
Soorunami atuarfeqarfik unammillerteqaleruni ulluinnarni ilinniartitsineq
eqqarsaatigalugu qaffatsissinnaanissaa naatsorsuutigisinnaavarput tamatta.
Aammalu soorunami illuatungaa isiginiartariaqarparput, tassalu angajoqqaat
pissaqarnerusut meerartaat immaqa kisiinnangajammik immaqa annerpaamik
periarfissinneqassammata, atuartuutiminnik friskolenut privatskolenut
atuartuuteqalernissaminnut.
Illuatungaanilu pissakinnerusut periarfissaat annikinnerunissaat
takusinnaallutigu aningaasatigut inissisimanerit eqqarsaatigalugit.
Pilersaarusiortunit oqaatigineqartut ilagaat atuarlertartussanit
sisamararterutaat nalinginnaasumik akissarsiallit meeraannik
atuartuuteqalersinnaanissaq tigusinnaallugu. Tamanna nuannaarutaasssagaluarpoq
taamaattoq aningaasatigut inissisimalluartut annerpaamik
periarfissinneqartussaasut takusinnaavagut.
Ullumikkut meeqqat atuarfiini tattorliuunnerit iluarsagassanut
aaqqissuutassanullu ilinniartitsinermilu aningaasarpassuit
oqilissaanneqarsinnaanerat isiginngitsuusaarneqarsinnaanngilaq. Pinngitsoorani
atuarfinni ataasiakkaani inissat annertunerusut atorneqalersinnaanissaat
takorloorsinnaavagut, atuartut ilaasa privatskoleni atualeraluarpata.
Ilinniatitsisoqarnerup tungaatigut ilanngullugu oqaatigissavarput
friskoleqalernikkut ilinniartitsisunik atorfinitsitsisarnermut tunngasut
equngassutaasinnaasullu tassunga attuumassuteqartut Naalakkersuisuniit qanoq
annertutigisumik eqqumaffigineqarnersut.
Tapiissuteqartarnerit eqqarsaatigalugit Kattusseqatigiinniit
oqaatigissavarput tamatta inuiaqatigiit anguniaratsigu meerartatta
pitsaanerpaamik atuarnerminni atugassaqarnissaat. Taamaattumik sooq
inuiaqatigiinni meeqqat ilaat tapiiffigineqassanngillat allanik
atualissagaluarpata, tassa immikkoortiterineq.
Qulaajagassat arlalissuupput taamatut privatskolemik friskolemik
pilersitsiniarnermi misissugassallu ilagaat maannakkut atuarfitsialammut
peqqussutissamut siunnersuutip tunulliunneqarnissaa. Tassami nuna
tamakkerlugu anguniakkat ammattaaq privatskole-mit
malitsinniarneqartussaammata.
Tassunga tunngatillugu Naalakkersuisut qanormitaava eqqarsaateqarpat. Friskolet pilersinneqarnissaanut aningaasartuutissat kiap akilissavai? Namminersortut aallartitsiniartut nammineq aningaasartuutissaat qanoq annertutigissappat? Namminersornerullutik Oqartussat aningaasatigut missingersuusiornermi aningaasartuutaasinnaasunut qanoq inissisimappat? Akissaqarpugut? Kommunit ataasiakkaat aningaasartuutissaannut qanoq eqqumatigaat, tassa privatskole eqqarsaatigalugu?
Aammalu ilinniartitsisoqarnikkut inissaqartitsinermi suut malinneqassappat? Aammalu qanoq aaqqiisoqarsinnaava? Apeqquterpassuit qulaajagassat suli annertoqaat. Taamaattumik Kattusseqatigiinniit oqaatigissavarput pilersaarut nunatta karsianut aammalu minnerunngitsumik kommuninut ataasiakkaanut qanoq annertutigisumik eqquisinnaanersut paaseqqaarusukkatsigit.
Isuma tapersersornaraluarpoq, taamaattorli ullumikkut nunatta aningaasaqarniarnera eqqissisimatittariaqarparput tuaviinnaq imatut aaliangiissanngilagut suut tamaasa qulaajaqqaartinnagit. Taamatut oqaaseqarluta Kattusseqatigiinniit oqaatigissavarput siunnersuummut paaserusutavut qulaajaqqaarlugit aalajangeeqataaniaratta, akuersaarniarluta imaluunniit itigartitsissanerluta.
Soorunami oqallinnissamut
ilaassaagut, aammalu amerlarnerussuteqartut inimi maani piumasarissappassuk
taava ataatsimiititaliamut, kultureqarnermut ilinniartitaanermullu
ataatsimiititaliamut aamma innersuussutigissagatsigu sukumiisumik
misissorneqarnissaanut. Qujanaq.
Per
Berthelsen, attaviitsoq:
Qujanaq.
Tunngaviusumik atuarfiit namminersortut aamma angelarsimaffinni atuartitaaneq
il.il. pillugit Inatsisartut inatsisissaattut siunnersuut tunginnit assut
tikilluaqquvara. Upernaarmi piorsarsimassutsimut ilinniartitaanermullu
Naalakkersuisoq pineqartumut akerliorpaluttumik nipeqarluni avammut kiinnermat
assut akunnattoorpunga. Taamatut nipeqarneq Inatsisartut piorsarsimassutsimut
ilinniartitaanermullu ataatsimiititaliaata tamatumap nalaani
siulittaasuugallarfigisama
isumaqatigiilluni isummiussaanut naapertuutinngilluinnarmat.
Taamaattumik
nuanaarutigaara maanna pineqartoq tunngaviusumi inatsimmi ammatinneqareersoq
pillugu inatsisissamik siunnersuut saqqummiunneqarmat taamallu
pilersinniarlugu pilersaarutigineqartoq siulleq ingerlariaqqissinnaanissamut
aqqutissalerniarneqalermat.
Isumaqatigaara
pineqartumi qallunaat nunaannut pineqartumut malittarisassiaasut
malikannerlugit
allaallumi atoruminarnerusunngorsarsarlugit ilusiliiniartoqarmat. Tamannami
tunngaviusumik inatsimmut attuumassuteqartumut atatillugu anersaarissallugu
tulluuttuummat. Aammalu isumaqarama tunngaviatigut aningaasat
tunniunneqartartussat meeraq malillugu ingerlassappata suleriaaseq
naapertuunnerpaasussaassasoq.
Isumaqataalluinnarpungalu
siunnerfigineqarmat atuareernerup kingorna sunngiffimmilu atuartunut
neqeroorutaasartut aamma atuarfiit namminersortut atuartuinut
taakkununngatulli akeqanngitsumik neqeroorutitut tiguneqarsinnaasutut
inissinniarneqarmata. Tamannami naapertuulluinnartuusussaavoq meeqqat
pineqartut allatorluinnartulli najgarisaminni ilaquttatillu innuttaasuummata.
Taamaammallu najugarisaasumi neqeroorutaasunut nalinginnaalluinnartumik
neqerooruteqarfigineqartariaqarlutik.
§
18, immikkoortoq 2-mut, tassalu atuarfiit sanaartugaannut Naalakkersuisut
kommunalbestyrelsellu tapiissuteqarlutillu taarsigassarsisitsisinnaanerannut
atatillugu Nuummi namminersorlutik atuarfiliorniartut qisuariaataat uanga
paasilluarpara. Tassani kissaatiginartinneqarmat nammineq aamma atuarfittut
allatuulli sanaartukkaminnut tapiiffigineqarlutillu
taarsigassarsisinneqarsinnaanissartik,
soorlu 104.050-imik taallugu aaqqissussaasoq atorlugu.
Uanimi
pineqartoq taariikkattut tunngaviusumik inatsimmi periarfissaatitaavoq,
taamaammallu isumaqarluinnarpunga pisortat taamatut ittumut allanit
allaanerusumik pissuseqarnissaminnut tunngavissaqanngilluinnartut.
Nuannaartunarluinnartutut
isigaara tuluit oqaasiisa ilinniartitsissutitut atorneqarsinnaanerat
neriuutigaaralu siunissami aggersumi tamanna aamma uagut tunngaviusumi
atuarfitsinni aqqutissatut aamma ammaanneqarumaartut ilagiumaaraat.
Tuluimmi
oqaasiisa nunarsuatta sinneranut matuersaataanerat kialluunniit ullutsinni
akerlilerniarsinnaanngilaa. Isumaqatigilluinnagaq
takisuuliuutaasariaqanngimmat nalunaarutigeqqiinnassavara qamannga pisumik
nuannaarutigigakku nunatsinni maanna atuarfiit namminersortut
pilersinneqarsinnaanerat tunngavissiuunneqalermat.
Isumaqarpunga
tamanna nunatta avataaniit isigineqarneranut pitsaasumik nukittorsaataassasoq.
Naggasiullugulu taaqqikkumaanarpara neriuutigigakku sanaartukkanut atatillugu
pisortat tunissuteqarlutillu taarsigassarsisitsisinnaanerat namminersorlutik
atuarfinnut aamma atuuttussanngortinneqarnissaa siunnersuusiami
qulakkeerneqassasoq.
Lise
Skifte Lennert, Kultureqarnermut, Ilinniartitaanermut Ilisimatusarnermut
Ilageeqarnermullu Naalakkersuisoq, Siumut:
Qujanaq.
Qujassutigaara una saqqummiunneqartoq Siumup, Atassutip kiisalu Per
Berthelsenip tungaaninngaaniit akuersaartumik tunngaviatigut atuarfiit
namminersortut kiisalu angerlarsimaffinni atuartitaaneq il.il. pillugit
Inatsisartut inatsisissaattut siunnersuut oqaaseqarfigimmassuk.
Paatsuungaffigaaralu
Kattusseqatigiinniit Mogens Kleistip oqaaseqarnermini aallaqqaataani
oqaatigisinnarlugu taamatut tapersersorlugu, kisiannili aamma marloqiusamik
oqaqarluni oqaluttarfimminngaaniit oqariartuutigimmagu taamatut aallaqqaataani
tapersersueriarlutik, kisiannili naggataatigut erseqqissorujussuarmik
akuersaassanerlugu imaluunniit itigartissanerlugu oqaatigimmagu.
Kiisalu
Inuit Ataqatigiit oqaaseqartuata Johan Lund-Olsenip aamma ilaatigut taavaa
maani Nuummi taamatut atuarfimmik aallartitsiniartut akiliutissaat
3.333-minngaanniit 3.500 kronemik aallaaveqarmat, kisianni tassa
paasissutissat uanga tigusimasakka tunngavigalugit imaappoq
taakkuninngaaniit angajoqqaat taakkua maani atuarfimmik taamaattumik
pilersitsiniartut oqaatigivaat qaammammut akiliutaasartussaq 1.500-1.600
kr-niillu qaffasinnerussanngitsoq, taamatut pilersitsiniarneq piviusumik
tunngaveqarluni ingerlanneqarsinnaassappat.
Aamma
misissoqquneqartut arlallit Inuit Ataqatigiinninngaaniit kissaatigineqartut
ukua kultureqarnermut ilinniartitaanermullu ataatsimiititaliamit apeqqutit
taakkua mississullaqquneqartut, aamma innersuussutigissavakka
ataatsimiititalianut taakkununnga apuunneqarnissaat.
Aammalu
tunngaviatigut, aamma Per Berthelsenimut imatut aamma apuutaqarusuppunga.
Tikilluaqqusinerit aamma maluginiarpara kisiannili tulliullugu eqqaagakku
Naalakkersuisup pineqartumut akerliorpaluttumik nipeqarluni avammut
kiinnersimanera. Taanna taamatut paasineqarsimassappat qallunaatuuani
qallunaatut apersorneqarninni paasineqarsimappat taamatut, soorunami
ajuusaarutigaara, kisiannili aallaqqaataanili akerliusimanngisaannarpunga.
Isuma
saqqummermalli suliassatullu inatsisartuninngaaniit tunniunneqarmat
pimoorullugu pisortaqarfinni suliniutigisimavara. Aammalu tassa taamaalillunga
takutippara akerliunanga piviusunngortinneqarnissaanullu sinaakkutissatut
aammalu inatsisitassaa sulissutiginiarlugu. Taannalu
massakkut pivoq.
Neriuppunga taanna paatsoornertut isigineqassasoq. Tassami kalaallisoortaani
aamma apersorneqarama erseqqissumik tapersiinera oqaatigisimagakku. Qujanaq.
Mogens Kleist, Kattusseqatigiit oqaaseqartuat:
Naalakkersuisumut aatsaannguaq oqaaseqaataanut oqassuunga tunngaviusumik
siunnersuut ataatsimut tungitsinninngaaniit isumaqatigigatsigu. Imanngilaq
akuersaaripput, oqaaseq taanna isumaqatigiinneq akuersaarnerlu
assigiinngitsuupput. Isumaq taanna ajungitsutut isigaarput kisianni
naliliiffigisassat assigiinngitsut taakku uagut naliliiffigeqqaarusuppagut
sukumiisumik angissanerluta naagaassanerlutaluunniit.
Tassa taassumap oqaatsip aamma assigiinngissutaa. Akuersaarneq
isumaqatigiinneq naaggaarnerlu. Tassa taakku oqaatigerusuppakka.
Taamaattuminguna tungitsinninngaaniit oqartugut qulaajagassat
qulaajaqqaarlugit taakkua uagut naliliiffigissavagut. Imaanngitsoq
itigartikkivut. Qujanaq.
Per
Berthelsen, attaviitsoq:
Qujanaq.
Malunnarsereermat amerlanerussuteqartut tapersiisut takisuulioqqissanngilanga.
Imaluunniit takisuuliussanngilanga, kisianni siullermik nuannaarutigaara
Naalakkersuisup ersarissaataa aamma nuannaarutigalugu tiguara ingammillu
nuannaarutigalugu sunaaffami isumaqatigiittuarsimalluta.
Ila
oqallinnikuunngeqigatta aamma taalaarusuppara Inuit Ataqatigiinninngaanniit
oqaatigineqartoq aasinaasiit qallunaat nunaanni pissutsit malillugit
ingerlatsisoqartoq. Tassunga apeqqutigiinnassavara sunami ajorpa tamanna
iluatsilluartuusimappat? Taava pisariaqanngilaq aamma itisuumik puugutaq
nutaamik nassaareqqissallugu.
Taavalu
aamma ujartorpara Inuit Ataqatigiit tungaaninngaaniit sakkortuumik
uparuartuineq. Tassami uani pineqartoq tassaavoq tunngaviusumik inatsimmi
periarfissaatitaasoq. Aamma uani pisuni quitsaatiginngitsoorsinnaanngilara
aammalu ujartorumallugu naak Inuit Ataqatigiit tungaaninngaaniit tunngavimmik
inatsimmut ataqqinninneq oqallinnerni allani issuaaffigalugulu
aallerfigiumaneqartaqisoq puigunngisaannarakkumi ilinniartinneqallarama
upernaaq demokratimut attuumassuteqartunut siunnersuutikulunnguanni.
Uani
pineqartoq pinngitsaaliissutaanngilaq neqeroorutaavoq. Taamaattumik aamma
eqqumiigikulussinnaavara Kattusseqatigiit tungaanninngaanniit taamak
marloqiusaasumik Naalakkersuisup taasaatut inissisimaffeqarneq.
Inuit
Ataqatigiit oqaaseqartuat uterfigeqqilaarusuppara aamma tassani ilaatigut
taaneqarmat assersuusiarineqarluni ukiumi aningaasartuutissat meeqqat imatut
imatullu amerlatigippata qanoq annertutigissasut. Oqaannarusuppunga taavami
uani pineqartoq tassaassaaq inuiaqatigiinni naleqartoq ingerlaavartussaq,
aammalu pisariaqartitsineq aallaavigalugu pisariaqartillugu
aggersaasariaqarnermi tunngavissiisussaq nukittorsaataasumik.
Taamaattumik
sumilluunniit taakkua isumaqarpunga aningaasat taamatut ernumarpaluttumik
taakkartortariaqanngitsut. Assersuutigalugulu taanngitsoorusunngilara
ungasinngitsukkut naak tamanna ikiorniakkanit allaat
kissaatigineqanngikkaluartoq imaaliallaannarluta benzinamut
eqqaamanerliunngikkukku 9 millioninik tunniussaqaratta qaammatini
marlussuinnarni atuuttussamik. Tamakku tassaapput asuli tipimiutitsisut.
Annertunerusumik kinguneqanngitsut, uani pineqartoq naleqartuuvoq
inerikkiartortussaq nunatsinni iluaqutaajartortussaq.
Johan
Lund-Olsen, Inuit Ataqatigiit oqaaseqartuat:
Qujanaq.
Tassami soorunami uagutsinnut ajuusaarnaraluarpoq maani siullermeerinninnermi
Inuit Ataqatigiit aammalu Kattusseqatigiit tassalu taamaalilluta inatsisartuni
31-usunit aqqaniliinnaalluta uani siullermeerinninnermi una inatsisissatut
siunnersuut ilalersunnginnatsigu taanna soorunami ajuusaarnaraluarpoq,
kisianni neriuutigaarput soorunami inuiaqatigiinni aamma manna
siunnersuutigineqartoq suli annerusumik oqallisigineqarumaartoq. Tassami
inuiaqatigiinni suli annertuumik oqallittoqanngilaq meeqqat atuarfiat
eqqarsaatigalugu immikkoortiterisoqaqqissanersoq.
Siornatigut
tamakku aamma misilittagaqarfigisimavagut immikkoortiterisarnerit. Tamakku
qimakkumallugit Atuarfitsialak massakkut annertuumik sulissutigineqarpoq.
Uterfigineqaqqissannginnamik immikkoortitsisarsinnaanerit. Tamakku massakkut
inatsisissatut siunnersuut akuersissutigineqassappat, tassa upernaamut taanna
piumaarput, takussavarpullu akuersissutigineqassanersoq.
Taannali
akuersissutigineqassappat oqaatigeriikkattut aqqutissiuussissaaq
pigissaarnerusut meeraasa immikkoortinneqarlutik akissaqarmatami taakkua
immikkut atuartinneqarsinnaalernissaat. Tassa taanna isummerfigisassaq.
Neriuppugullu soorunami inuiaqatigiit tamanna aamma
oqalliseqataalluarfigiumaaraat.
Naatsorsuinerit
ilaatigut uparuartorneqarput. Naatsorsuinerit tassa saqqummiussinitsinni uagut
aallaavigisavut tassa uani inatsisissisatut siunnersuumminngaaneersuupput.
Inatsisissisatut siunnersuummi kalaallisuuani qupperneq, inatsisissatut
siunnersuutivittaani qupperneq qulinganni naatsorsuinerit taakkua
takuneqarsinnaapput.
Taamaalillutik
ilaatigut issuarpara, matut allassimasoqapoq, tassa Nuummi International
Friskole-mi suliaqartut naatsorsuinerat aallaavigalugu ilimanarpoq tassa uani
qupperneq 10-mi KIIIP-i tassa pisortaqarfik imatut inerniliigallarsimasoq.
Issuarparalu, "tamakku tunngaviliullugit nammineerluni
akiliutaasartussat atuartumut ataatsimut ukiumut 40.000-42.000 kronet
missaannik amerlassuseqartartussaapput, tassa ukiumut.
Ilisimaneqartutut
ukioq qaammatinut arfineq marlunnut agguagaammat qaammammut akiliutaasartussat,
ukua naatsorsuinerit inatsisissatut siunnersuummiitttut tunngavigissagutsigit
angajoqqaat akiliutigisartagassaat tassaapput, 3.333 kronet imaluunniit 3.500
kronet qaammammut.
Attaviitsunngorsimasup
Per Berthelsenip uparuagaa, inatsimmi tunngaviusumi § 76, tassa imaappoq,
soorunami taanna immikkoortunik marlunnik imaqarpoq. Siullermik imarivaa,
pisortat meeqqat atuarfiannik ingerlatsissapput, angajoqqaat
akileeqqaarlutik meeraasa malinnaavigisinnaasassaat, kisiannili ilumoorpoq
friskoleqarneq imaluunniit privatimik namminersortumik atuarfeqarsinnaaneq
tassani akornutissaqartinneqanngilaq. Ilumoorputit, kisianni inatsimmi
tunngaviusumi, § 76-imi, aalajangersarneqanngilaq pisortat tapiissuteqassasut
imaluunniit tapiissuteqassannginnersut. Isumaqarpunga, Per Berthelsenip aamma
eqqaamanialaartariaqaraa. Taannalu neqeroorutigeqqissavara siusinnerusukkut
maani Inatsisartuni aamma Per Berthelsenimut neqeroorutigereersimasara.
Massakkut
aamma Per Berthelsenimut atukkiukkusussinnaavara Danmarkip naalagaaffiata
inatsisai tunngaviusut nunatsinni aamma atuuttut, massakkut naqitanngorlugu
angisuunik kalaallisut allannillit atorusukkukkit takannarsuaq, uannut
saaffiginniinnarsinnaavutit.
Pisortat
tapiissuteqarsinnaanerat immikkut inatsisiliornikkut
aqqutissiuunneqartussaavoq, maannakkullu tamanna sammivarput. Inatsit
tunngaviusoq malillugu tapiissuteqarnissaq imaluunniit tapiissuteqannginnissaq
inatsimmi tunngaviusumi § 76 malillugu taamaaliuinnarsinnaanngilagut,
aatsaat immikkut inatsisilioqqaarnikkut tamanna pisinnaavoq.
Taannalu
massakkut pivoq, taamaammat Naalakkersuinikkut aalajangigassaavoq inimi maani
tapiisoqassanersoq imaluunniit tapiisoqassannginnersoq; pisuut meeraat
immikkoortinneqassanersut imaluunniit immikkoortinneqassannginnersut, tassa
Naalakkersuinikkut aalajangigassaq, tamassumalu pinissaa maani
amerlanerussuteqarluta kissaatigaarput; tamannalu ajuusaarnarnerpaavoq.
Jonathan
Motzfeldt, Naalakkersuisut Siulittaasuat, Siumut:
Ullumikkut
oqallinnerit tusarnaarlugit meeqqat atuarfiannut tunngasut
isumaqarnarsinnaagaluarpoq meeraalluni assorujorujussuaq Kalaallit Nunaanni
mersernartunik suliassanik piumaffigineqalernerup nalaaniilluni maannakkut
inuusoqalersoq.
Kisianni
isumaqarpunga piumasarisat nunatsinni aamma piumasarineqartut maannakkut
ammasumik taamaalillugit oqallisigineqarnerat pissusissamisoortoq. Una
tunngaviusumik atuarfiit namminersortut periarfissaqartitaanissaanut
tapersiinerit aamma oqaaseqarfiginninnerit Naalakkersuisuninngaaniit
suliarineqassasut Ilinniartitaanermut Naalakkersuisoq neriorsuuteqareerpoq.
Aammalu taakku suliariniarneqassapput.
Maani
oqaaserineqartut tunngavigalugit oqartariaqarpunga, qujanaqaaq upernaamut
aappassaaneernissaa aatsaat periarfissalerneqarmat. Apeqquterpassuit maani
saqqummersinneqarput, aamma Naalakkersuisut namminneq tungiminnit
oqallisigerusutaat, qularnanngitsumik Inatsisartut ataatsimiititaliaanni
annertuumik oqallisaajumaartut, apeqqutit sulisussaanut tunngasut
akineqartussat tamatumaniipput,
tamatumaniipputtaaq
sulisussaasa ineqarnissaannut akiliutissat, kommuninut sunniutissaat aammalu
Kalaallit Nunaata atuarfiata tamarmi ingerlanneqarnerannut sunniutaasinnaasut.
Apeqqutit
tamakkua tamaasa ilanngullugit misissorneqarnissaat pisariaqartoq
nalunanngilaq. Isumaqarpunga, Siumup oqaaseqartuata ullumikkut oqaaserisai
ilumoortut; sumi tamani namminersorluni atuarfimmik
pisariaqartitsisoqarunanngilaq, taamaakkaluarpalluunniit tamanna aamma
naammassineqarsinnaanngilaq. Qularnanngilaq Nuummi ajornartorsiut taanna
oqaatigineqartutut annertunerusoq. Aammalu tamatumani naammassiniarnissaa
ajornakusoorunarani.
Siumuminngaaniit
oqaatigineqartoq malugisara tassaavoq, periarfissiinerup taamatut ittup
nunatsinni meeqqat atuarfiannik sanngiillisitsinnginnissaa. Nukittorsaatitut
isigineqarsinnaappat, aamma taanna aqqutissaq ajunngilaq, meeqqat
atuartitaanerannut nukittorsaataasumik.
Tassami
Kalaallit Nunaani pisortaninngaaniit atuarfiit amerlaqisut maannakkut
ingerlappagut; nunaqarfippassuarni illoqafinnilu amerlaqisuni. Aamma taakkua
ilinniartitsisuisa pitsaasumik pikkorissartuarnissaat,
suliffimminni pitsaasunik atugaqarnissaat ineqarnissaat allallu
sakkukillisinneqassanngitsut
neriuutigaarput.
Taamaattumik
Naalakkersuisuninngaanniit misissugassap uumap ingerlannerani
oqaatigerusuppara,
pisussaatitaanerput nunatsinni atuarfeqarfiup tamakkiisumik
pitsanngorsarneqarnissaa salliutillugu aammalu ilinniartitsisut ilinniarnerisa
pitsaasut ingerlattuarnissaat, atugarisaasalu aamma pitsanngorsagaanerisa
ajornerulersinneqannginnissaat, akerlianilli pitsaanerulersinneqarnissaat.
Tamakkua siunertaappata, aamma taamatut paaserusuppara, taava maani aamma
ilassilluarneqarnera oqaatigissallugu tunngavissaqarpoq.
Naimanngitsoq
Petersen, Atassutip oqaaseqartua:
Nalunngilarput
ullumikkut meeqqat atuarfiini tattorliornerit illoqarfinni angisuuni,
pingaartumik Nuummi, tusarsaajuarpoq aamma taanna anguniagaq Atassummiit
taamatut ammaassinissamut periarfissiisoq tapersersorluinnarparput.
Atuarfitsialak
pilersinniarneqartoq Inatsisartuni tasiortissaanik ammaassinissamik aamma
ujartuineq pitsaavoq. Meeqqat tasiortarput, aamma atuarfiit tasiortariaqarput.
Angajoqqaarpassuaqarpoq
meeqqamik pitsaanerusumik atuartinneqarnissaanik kissaateqartunik. Taanna
anguniagaq pisortat aammalu Inatsisartut soqutigisariaqarpaat inatsisitigut
atuarfiit namminersortut periarfissinneqarnerisigut. Isumaqarpunga taamatut
aaqqiiniarneq soqutiginartuusoq, Atassummiillu
soqutinartuusoq aamma pingaartipparput taamatut ammaassiniarneq pimoorullugu
suliarineqassappat.
Per
Berthelsen, attaviitsoq:
Tunngaviusumik
inatsisip naqitanngorlugu saqqummiunneqarnera pigaara, kisianni tassa Johan
Lund Olsenip neqeroorutaa assorsuaq iluatigaara, tassalu taakkua naqinnerit
angisuunngorlugit tunniussinnaaneranut neqeroorutaa assorsuaq tikilluaqquara.
Neriuppunga timitalerumaarit, taamaattumillu koperilluarnissannik
kissaallutit.
Daniel
Skifte, Atassut:
Qujanaq.
Pinngitsoorumanngilanga Inuit Ataqatigiit oqaaseqartuat uparualaarniarlugu.
Tassami ersarilluinnaqqissaarmat pututitsiniaasoqartoq. Aammalu Inuit
Ataqatigiit taakkua oqartarnerat malillugu ilinniagassaminnik ullumikkut
Naalakkersuisut siunnersuutaannik ilinniarluarsimanngitsut maluginiarakku.
Taamatut
oqarninnut tunngavigaakka qanoq tapiisoqartarnissaanik inatsisissami
siunnersuut, maannakkullu oqaluttumit eqqartorneqartut imminnut
ataqatigiinngillat, aammalu una oqarnera ilaatigut Danmarkimingaasiit
ajortitsiniaaneq tusarniippoq tunngavigissallugu.
Atassutip
aamma erseqqissumik maluginiagaa unaavoq, Naalakkersuisooqatigiit
aviissaartuu- teqqipput-aasiit. Qularinngilara Naalakkeruisuisut namminneq
Inuit Ataqatigiit siulittaasuat peqatigalugu siunnersuut akuerisimagaat
taamatut nipeqartillugu, taannali suliaraarput Inuit Ataqatigiit
Siumukkormiullu siunnersuutaat. Uagut ilutsinninngaaniit tapersersoratsigu
isertorneqassanngilaq, kisianni maannakkut Inatisartuni ilaasortaatitaat
allaalluinnartumik nipeqalerput. Taamatut ingerlaneq Atassummiit
nalilerusuppara inuiaqatigiit iluanni pututsiniaanerusoq
toqqissisimannginnermik kinguneqarsinnaasoq. Taannalu Atassumminngaaniit
peqataaffigiumanngilarput, isumaqaratta Naalakkersuisut siunnersuutaat
pitsaasuusoq.
Assersuutigalugu
eqqartorneqartut ilagaat maannakkut kalaallit ilaqutariippassuit atortaligaat,
atuartuutimik ilaasa tuluttut pikkorissinerunissaat anguniarlugu nunanut
allanut aallartitsisariaqartalernerat, ilaatigut ilaqutariinnut
akissaqartunut aningaasanik annertuumik kinguneqartartoq.
Taamaaliortoqanngikkaangat nunatsinni kommunit ilai aamma annertuumik
taamaaliorusuttunut tapiisarput. Isumaqarpunga, taanna tunngaviatigut
akiliisariaqarneq apeqquserneqartariaqanngitsoq, kommunillu iliortarnera,
kommunit ilaasa, nersortariaqartoq.
Taamaattumik
taakku tunngavigaakka pututsitsiniaanermik nipeqarnermik oqarama. Aamma
taamaappoq, Kattusseqatigiit allanngillat Kultureqarnermut
Ilinniartitaanermullu Ataatsimiititaliamut
ataatsimiigiaqataasarsimanngitsut.
Taamaattumik
inatsisissaq taanna taamak pingaartigisoq maannakkut siullermiiginnaraluartoq
oqaatsit naatsorsuutigalugit neriuutigaara Atuartitaanermut Ataatsimiititaliaq
ukioq manna upernaap tungaanut sulinissamini tamakkua qallorneqartut
akissuteqarfigisinnaajumaarai. Taamaalippallu qularnanngilaq suli
amerlarnerussuteqarnerusut inatsisissamut akuersiumaarmata. Qujanaq.
Ruth Heilmann, Siumut:
Qujanaq. Kultureqarnermut Ilinniartitaanermullu Ataatsimiititaliami maani
saqqummiunneqartut eqqartussavagut, aamma Inuit Ataqatigiit taamatut isumaat
soorunami ilanngullugit eqqartussavagut. Soorunami pissanganarpoq,
misissorusussallutigulu friskoleqarnerup nunatsinnut eqqunneqarnissaani
kingunerisinnaasai tamaasa piareersimaffigineqartariaqarmata.
Annerusumik soorunami friskoleqarneq pillugu ataatsimiititaliami
eqqartuisarsimanitsinni itinerususoq tikillugu eqqartuisimanngilagut. Taanna
oqaatigissavara, isumaqarpungalu allani misilittakkat aamma friskoleqanermut
tunngatillugu paasiniaqqissaarneqartariaqartut. Isumaqarpunga qallunaat
nunaanni friskoleqarneq ukiorpaalunni ingerlatereerneqarsimammat, pissutsit
qanoq innersut aamma pissanngatigaagut qallunaat nunaaniittut
paasisaqarfigissallugit.
Mogens Kleist, Kattusseqatigiit:
Daniel Skiftemut oqassaanga, maani oqassanngilatit
ataatsimiigiartarsimanngitsunga. Aatsaat ilaasortaatitasi allanngortippasi.
Uanga tassaniiginnarnikuuvunga sivisuumik, taamaattumik oqassanngilatit
malinnaasimanngitsunga.
Aamma taamatut uagut tungitsinninngaaniit Johan Lund-Olsenimut oqassaanga,
aallaqqaammut oqaatigineqareerput taamatut tunngaviusumik siunnersuut
tapersersoripput, kisiannili qulaajagassat assigiinngitsut
qulaajaqqaariarlugit sukumiisumik nalileerusuppugut. Imaanngilaq
naaggaartugut, imaanngilaq angertugut, kisianni qulaajagassat taamatut uagut
tungitsinninngaanniit oqaatigerusuppagut.
Aammalu oqalunniaassaarluta Kalaallit Nunarput nunanut allanut
sanilliunniarlugu qaffassarniartigu, taava nunarsuarmioqativut tamakkuninnga
ukiorpassuarni misilittagaqartut isiginngitsuusaaginnarsinnaanngilagut.
Kalaalinngorsaasinnaanngilagut suut tamaasa mattullugit. Aamma
periarfissaasinnaasut ujartortariaqarpagut. Taamaattumik tungitsinningaanniit
aamma uagut oqaatigissavarput atuartitaanerup, Atuarfitsialammut
tunngatillugu, aamma qaffassaaqaasinnaanera ammaffigaarput, taamatut
friskoleqalerneranut. Taamaattumik oqaatigissavara KU -mi ataatsimiilerutta
soorunami aamma tamakku qulaajassaqqaarpagut.
Augusta Salling, Siulittaasoqarfimmi sinniisussatut ilaasortaq,
ataatsimiinnermik aqutsisoq, Atassut:
Aap, Mogens Kleistimut qujavugut. Massakkullu Johan Lund-Olsen, Inuit
Ataqatigiit oqaaseqartuat, pingajussaaniilerami minutit marluk.
Johan Lund-Olsen, Inuit Ataqatigiit oqaaseqartuat:
Qujanaq. Naatsunnguussaaq. Maluginiarparput Siumup upernaap tungaanut
oqaloqatigineqarsinnaanera ammatimmassuk. Tamanna iluarisimaarnarpoq,
tassami Ruth Heilmannip, Siumut qruppeata siulittaasuata aatsaaginnaq
oqaatigivai siunnersuutip uumap kingunerisinnaasai eqqarsaatigalugit
oqaloqatigineqarsinnaassallutik. Taamaattumik neqeroorut taanna
ilassilluarumavarput.
Taassumap saniatigut aamma Daniel Skiftemut una
erseqqissaatiginngitsoorusunngilara, tassa naatsorsuinerit taakkua
inatsisissatut siunnersuummik nammineq Daniel Skifte soqutiginnikkuni
misissoqqissaarsinnaavai. Naatsorsuinerit tassaniipput taassumap saniatigut
aamma aviisimi saqqummersartumi Sermitsiami kingullermi saqqummersumi, tassa
tallimanngormat kingullermik annertuumik aamma taanna pilersaarutigineqartoq
maani Nuummi friskole imaluunniit privatskoletut aallartinneqartussaq aamma
annertuumik allaaserineqarpoq.
Naatsorsuinerit tassani aamma erseqqilluinnartumik takutinneqarput, aajunalu
erseqqeqqinnaartoq issuassavara; apersorneqartup nalunaarutigivaa, meeqqamik
atuarfimmut taamaattumut atualertitsiumalluni allatsinnermi kr. 25.000
akiliutaasassasoq. Taassumalu saniatigut qaammammut aamma
akiliuteqartartussaapput. Ila, naatsorsuinerit tamakkua neriuppunga, Daniel
Skiftep aamma arajutsisimassanngikkai. Taamaammat neriuppugut upernassap
tungaanut eqqarsarluartoqarumaartoq.
Lars-Karl Jensen, Siumup oqaaseqartua:
Siullermik Naalakkersuisut Siulittaasuata aammalu Ilinniartitaanermut
Naalakkersuisup saqqummiussat paasilluarmatigit qujassutigeqqaassavara.
Uagut pingaartissimavarput, soorunami aamma ataatsimiititaliami
suliarineqarnissaa taanngikkaluarlugu, naatsorsuutigivarput
ingerlanneqarumaartoq. Ataatsimiititaliap aamma nalilersuiffigiumaarai
atuartitaanermi piumasaqaatini oqaatsit soorlu uani inatsisissami atorneqartut
qasungasutut immaqa Siumup iluani eqqartukkagut, taakkua aamma
sukateriffigineqarumaartut, atuartunut piareersaataasinnaavoq.
Isumaqarpunga, atuarfik sunaluunniit unammilleruni nammineerluni
ingerlasuuguni, meeqqat atuarfiata ingerlanneqarneranut unammilleruni taamak
qasungasunik inatsisitaartariaqanngitsoq. Anguniagaqarpalaartumik taakku aamma
inatsiseqarnissaat Siumup tungaanninngaanniit soqutigivarput.
Uani, ilaatigut immaqa Inatsisartuni suleriaaserput eqqarsaatigigaanni,
ullut tamaasa maani oqaluttarfimminngaanniit oqimaalutaavittut
nalilersorneqartarnerput aamma isumaqarpunga, uani taalaassallugu
pisariaqartoq. Inuit Ataqatigiillu naalakkersuisooqatigiippugut, aap, kisianni
Naalakkersuisut sulinerat aammalu Inatsisartut sulinerat 1998-imili
avissaartinneqarmat suli maannakkumut ilikkarneqanngitsoruna Inatsisartut
gruppesa nammineq isummatik illersorlugit aamma Naalakkersuisut
saqqummiussaannut assortuisinnaanerat. Taanna ilikkartariaqalerparput, uani
pisuutitsisaqattaanerit immitsinnut aamma qasunarsinnaasarmata.
Inuit Ataqatigiit isumaqatiginagit oqarsinnaanngilanga, immitsinnut
naapinnikuunngilagut oqaasissiornitsinni, kisianni takusinnaasakka
najoqqutaralugit aamma taakku oqallisigineqarnissaat ammaffigivaat. Aamma
soorlu uagut Siumup tungaaninngaaniit pisariaqartilluinnaripput kommunit
taakkua susassaqartuussammata, taamatut namminersortut atuarfiinik
pilersitsiviussappata
aningaasatigut sunnerneqartussaanertik, qanoq kattuffitsik aqqutigalugu
qisuariarfigisimaneraat nalunaarusiornermi takuneqarsinnaanngimmat.
Meeqqat atuarfiani aningaasaliissutit atorlugit atuarfiit namminersortut
angerlarsimaffimmilu atuartitsineq ingerlanneqarsinnaapput. Uumap
oqariartuutigivaa inatsisissap nassuiaataasup, kisiannili aningaasaliissutit
taakkua allaminngaanniit milluarneqalerpata atuartut qassit atuarfimmi taamak
ittumi namminersortumi ingerlanneqassappat saniani Atuarfitsialaap
ingerlatissaanik aningaasanik tigooraaffigalugu? Ilinniartitsisut qassit
Atuarfitsialamminngaanniit namminersorlutik atuarfinnut nuussorneqassappat?
Atuarfitsialammut innarliisinnaanera uani aarlerinngikkaluarlugu, kisianni
inuiaqatigiinni aaqqissuussaanitsinni nutaaq sunaluunniit eqqunneqartussaq
uagut Siumuminngaanniit tamuaqqaanngiivillugu eerusunngilarput. Taamaattumik
inatsisip aappassaaneerneqarnissaata tungaanut susassaqartut tamaasa
paasiniaaffigineqarnissaat Siumup tungaaninngaaniit pingaartipparput.
Uani assigiinngitsunik oqaaseqarusunnaraluartoq, kisianni aamma
ataasimiititaliami aammalu inuiaqatigiit annertunerusumik oqallisigineranni
peqataasarnissarput Siumuminngaannit qularutiginnginnatsigu, upernaap
tungaanut oqallittoqarluarnissaa Siumup tungaaninngaaniit kissaatigaarput.
Augusta Salling, Siulittaasoqarfimmi sinniisussatut ilaasortaq,
ataatsimiinnermik aqutsisoq, Atassut:
Siumup oqaaseqartua, Lars-Karl Jensen, qutsavigaarput. Massakkullu
oqaaseqassaaq Daniel Skifte, Atassut; kingulliussaarlu, Per Berthelsen
sisamassaaniilerami naatsuaraararsuarmik.
Daniel Skifte, Atassut:
Qujanaq. Mogens Kleistimut erseqqissaatigilaaginnarniarpara, uanga
oqanngilanga maanngaaniit Mogens Kleisti ataatsimiigiarneq ajortoq.
Oqarpunga, Kattusseqatigiit ilaanni ilaasortat imaluunniit sinniisussaq
ataatsimiigiartuartuartarpoq assigiinngitsunut, kisianni taanna
paasilaallaqquara
inuttarsiuinngilanga uanga aammalu taanna atorumassanagu.
Taavalu taanna inisseriarlugu aappaatut oqaatigerusuppara ilaatigut Johan
Lund-Olseniminngaanniit neqeroorutigineqartoq, tassa naqitanngorlugit
pigisat naatsorsuinerit taakkua qutsatigaakka aamma nalunngilluinnarpakka
ilisimareerlugillu imaassinnaavoq illit allanik nutaarsiassaateqartutit.
Naatsorsuinerit pillugit ilassutigiinnassavara, apeqquterpassuit
qaffatsinneqarput ilaatigut Kattusseqatigiit oqaaseqartuannit.
Issuaalaassaanga, taamaallaat pingasut assersuutigissavakka. Friskolet
pilersinneqarnissaannut aningaasartuutit kiap akilissagai apeqqutigineqarpoq.
Taanna akineqarsinnaavoq Johan Lund-Olsenimit imaluunniit Naalakkersuisut
siunnersuutaanni takuneqarsinnaavoq.
Namminersortutut aallartinniartut namminneq aningaasartuutissat
akilissavaat? Taanna aatsaannguaq oqaatsinnut imissutigeqqippara aammalu
Namminersornerullutik Oqartussat akissaqarpugut? Aamma taanna naatsorsuutit
aatsaannguaq eqqartukkama iluani takuneqarsinnaavoq.
Taamaattumik taamatut oqaaseqariarlunga oqassaanga, kaammattuutigiinnarpara
uanngaaniit oqaluttarfimminngaaniit ersarissisillugulu isumaga malillugu,
Naalakkersuisooqatigiit siunnersuutaat uagullu pimoorullugu
suliarisariaqakkavut pissappata naatsorsuutigisariaqaratsigu
ileqquliutiinnassannginnatsigu ilai uunga isummertut, ilai uunga isummertut.
Imaluunniit soorlu uanga allaalluinnartumik isumaqartumik uagut parteerput
allaalluinnartumik isumaqalissasoq. Taanna tavanneq tassaavoq
tikkuarniagara.
Neriuppungalu taava upernaap tungaanut qajaqatigiinnerulluni
ingerlasoqarsinnaassasoq, tassa oqariartuutima qeqqa. Qujanaq.
Per
Berthelsen, attaviitsoq:
Qujanaq
taamaassaaq. Johan Lund-Olsenip oqaatigisaanut aningaasarpassuarnut
attuumassuteqartunut taaqqiinnassavara una neqeroorut
pinngitsaaliissutaanngimmat, neqeroorutaallunili. Taamaattumik neriuppunga
sunniiniapilunneq taanna Siumumit sangusartinneqarnermik
sianiinaarneqarnermillu kalitaqassanngitsoq.
Lars-Karl
Jensenip oqaatigisaanut taalaaginnassavara tuppalleqaanga nuannaarutigalugulu
takusinnaalerlugu asuli Siumumit ilaasortaasimannginnama
oqarsinnaalersimagavit Inatsisartut aamma Naalakkersuisunut
illuatungiuliussinnaasut, alutornassusia.
Maliinannguaq
Markussen-Mølgaard, Inuit Ataqatigiit:
Takornartaajunnaarpoq
maani oqaluttarfimmi arlaatigut Naalakkersuisunut akerliusumik apeqqusiilluta
saqqummiissarnigut, Atassutip siulittaasuata nuannaangaarluni oqaatigisagai,
kisianni ilisimassavaa uagut Inuit Ataqatigiinni sulinitsinni
pingaartilluinnaratsigu sukumiisumik misissuilluaqqaarluni suna tamaat
imaaliinnarlugu, imanngilaq Naalakkersuisooqativut aamma Naalakkersuisut
sulilluartaqaat, taanna assortorneqarsinnaanngilaq, kisianni ugguuna
avissaartuuttutut oqaatigineqartarnerput isumaqarpunga suliat
misissoqqugaangatsigit ingerlaannaavik oqaatigineqartarnerput taanna
pissusissamisuunngitsoq.
Uagut
Inuit Ataqatigiinni anngaavinnarluta sulinngilagut. Suliat sukumiisumik
suliarerusuttarpagut, misissorluarlugit. Apeqqusigassat apeqquserlugit.
Aamma ullumikkut oqaluuserisarput siulleq aallaavigissagaanni tamatta qanoq
annertutigisumik Atuarfitsialak kusanangaartutut taakkartorparput.
Taassumamuna naallerarneqannginnissaa aamma matumani atuarfiit aningaasat
ataasiinnaat pigaagut. Aamma taakkua eqqarsaatigisariaqarpagut, qanoq tamanut
pitsaanerpaamik meerartatsinnut atorsinnaanerigut.
Taamaattumik
taanna oqaatigiinnassavara Inuit Ataqatigiinninngaaniit uagut suliniaratta
pimoorussilluta ilumoorluta aammalu tunuliaquttagut aallaavigut
aallaavigalugit. Aamma naapeqatigiittarpugut aamma suleqatigiinnitsinni
Siumukkullu aamma oqaloqatigiissinnaasarpugut. Taamaattumik suli aatsaat
siullermeeratsigu aappassaaneernissaalu pingajussaaneernissaalu
kingusinnerusukkut pisussaammat taanna eqqaasitsissutigissavara.
Godmand Rasmussen, Atassut:
Una oqallisissiaq eqqaamaneqassooq siorna Otto Steenholdtip saqqummiummagu
Atassumminngaanniit kisima taamani tapersersuisimavugut. Massakkorpiarlu
nuannerpoq allat aamma tapersersuisumik nipeqalersimammata, kisianni uanga
inatsisartuni ilaasortatut Maliinannguaq Markussen-Mølgaarip oqaasia aamma
Johan Lund-Olsenip aatsaannguaq pissusilersuutai akuerisinnaanngilakka. "Inuit
Ataqatigiimmi asuli sulinngilagut", oqaatsit taakku atormagit. Imatut immaqa
oqartariaqaraluarputit inatsisartuni ilaasortat tamatta asuli sulinngilagut,
tamavitta, tamavitta inatsisartuni ilaasortat asuli sulinngilagut.
Pisinnaassuserput killeqaannarpoq, tamatta piumassuseqaraluarpugut
pitsaanerpaamik sullissinissatsinnut taanna eqqaamalaartariaqarpoq.
Unali oqaatiginngitsoornianngilara Johan Lund-Olsenip oqaaseqaqqaarnermini
oqaaseq atormagu "pigissaarnerusunaasiit meeqqat", ila Atassutip
oqaaseqartuata erseqqilluinnartumik oqaatigivaa inuit kikkulluunniit
angajoqqaat pitsaanerpaamik meeqqat atuartitaanissaat, tamavitta, tamaavitta
kissaatigivarput. Imaaratarsinnaannginnerluni ullumi nunatsinni
umiatsiaararpassuit
milliuunerpassuarnik nalillit biilerpassuit milliuunerparpassuarnik nalillit
anersa meeqqatta atuartitaaneranut periarfissaq tassani saqqummerpat arlaani
tamakkua inuulluarniutit pinngitsoorsinnaalissagaluannginnerlutigit. Meeqqatta
atuartitaanerat akissaqarfigerusullugu.
Oqaluttuarpugut ilinniartitaaneq meeqqani amigaatigigipput. Qanormita
issagaluarpa angajoqqaat atorluaasut aamma akissaatigissaartut meeraat
ilinniarnermikkut naammassillutik nunatsinnut nuannaarutaallutik
sulileraluarpata. Taanna
assortuussutigisinnaanngilarput tamatta.
Avissaartuunnermik
pisoqarsinnaanngilaq. Aamma kommunip iluani qangarsuarli ileqquusarpoq
ilaatigut atuartut pikkorissut arlaatigut nikeriarnerannik, soorlu oqaluttup
ilaanit taaneqartoq. Aamma Danmarkiliartitaanerani ilaatigut tapiissutinik
qinnuteqartoqartillugu kommunit pissaqassuseq naapertorlugu tassani
ikiorsiisarpoq.
Uangaana
una Johan Lund-Olsenimit oqaatigineqartoq nuaanrinngikkiga. Neriuppunga,
taanna nittarsaaneq qaquguluunniit uani oqaluttarfimmi atorneqaqqissanngitsoq.
Inatsisit tamavitta tigummivagut ilaatigut ilaat piginnaaneqarfigisarpagut
ilaatigullu aamma sanngiiffigisarlutigit. Aamma qularinngilara uagutsitulli
inatsit arlaat illit aamma uagutsitulli sanngiiffeqarfigissagit.
Inatsiserpassuimmi
Inatsisartunut tunngassuteqartut nalunngilagut. Tamaviisa qaratsatsinnut
pulatissinnaanngilagut illit uangalu aamma uani isersimasut tamarmik.
Arlaat
qarsupinnerusinnaavagut. Arlaallu aamma piginnaaneqarfiginerusinnaallugit.
Taanna ileqqoq nittarsaasarneq ataasialinngilaq uani taanna
unitsinneqarniarli. Uani oqaaseqartuni uanga Daniel Skifte akineqarmat
oqaatigilaarusuppara immaqa oqallinneq uani aamma
sivikinnerusarsinnaagaluarpoq, ilami aamma nikassaanermik paasineqassanngilaq.
Siorna qanoq neriorsorneqarpugut? Naalakkersuisooqatigiinngooq assortunneq
uani angorusunnagu gruppemi naapittalissapput, kisianni aatsaannguaq
oqartoqarpoq, taamaaliorneq ajorlutik qaqutiguinnaq taamaaliortarlutik.
Isumaqarpunga,
suleqatigiissagaanni taamak pingaaruteqartigisuni oqallisissiat gruppemi aamma
naapissutigisassagaanni peqqinnarnerpajusoq. Qujanaq.
Augusta
Salling, Siulittaasoqarfimmi sinniisussatut ilaasortaq, ataatsimiinnermik
aqutsisoq, Atassut:
Godmand
Rasmussenimut qujavugut, kisianni eqqaasitsissutigilaassavara oqallisigisarput
tassaammat tunngaviusumik atuarfiit namminersortut aamma angerlarsimaffimmi
atuartitaaneq il.il. Inatsisartut inatsisissaattut siunnersuut.
Massakkullu kingulliulluni Siumup oqaaseqartua, Lars-Karl Jensen, oqaaseqassaaq. Pingajussaaniilerami minutit marluk.
Lars-Karl Jensen, Siumup oqaaseqartua:
Aap, oqaluuserisarput sunaasoq nalunngeqaara, kisianni uani Per Berthelsenip quinassaarutaa uanga pinngitsoornanga akilaarusuppara. Neriuppunga, siulittaasup taanna akuerissagaa. Tassa oqarpunga, Inatsisartut Naalakkersuisullu 1988-imiit avissaartitaanikuupput. Taanna nalunngilarput.
Siumumiikkallaravit aamma nalunngilat gruppemi oqallittaqaagut paaseqatigiiniarluta, gruppellu isumaa paaseqatigiiffigisarput illersorlugu tamatigut saqqummiuttarparput, imaanngitsoq inuup ataasiinnaap isumaa allanit naapinneqarsinnaanngitsoq uaugt politikkerigipput. Qujanaq.
Augusta Salling, Siulittaasoqarfimmi sinniisussatut ilaasortaq, ataatsimiinnermik aqutsisoq, Atassut:
Qujanaq. Tassa taamaalilluta oqaluuserisaq immikkoortoq 37 naammassivarput.