Inatsisartut nittartagaanni saqqummiunneqartussatut partiit oqaaseqaataasa nassiunneqartarneri

 

Oqaluuserisassani immikkoortup suliarineqarnissaa kingusinnerpaamik ullumik ataatsimik sioqqullugu partiini oqaaseqartartut oqaaseqaatissaat qarasaasiakkut inatsisartut@inatsisartut.gl -imut nassiunneqartarnissaat kaammattuutigineqarpoq.

 

Oqaaseqartartut oqaaseqaataat ullumi oqaluuserinniffissami qarasaasiakkut nassiunneqarpata Inatsisartut Allattoqarfiata nittartakkamut piaarnerpaamik ilanngunnissaat isumagissavaa.

 

Partiit allattoqarfiisa piffissani ulapiffiusuni nassiussisarneq pingaartissappassuk assorsuaq iluaqutaassagaluarpoq, tassa oqaluuserisassami immikkoortut tulleriiaarnerat naapertorlugu, oqaluuserisassami immikkoortoq siulleq siulliullugu il. il., ullumillu ataatsimik sioqqunnissaa eqqaamaqqullugu, oqaaseqartartup oqaaseqaatissaanik nassiussisarsinnaaqqullugit.

 

Oqaaseqartartut oqaaseqaataasa nutserneqarnissaanut aningaasaliissutit nutserneqarnissaanullu akisussaaffik Allattoqarfimmit siusinnerusukkut partiit allatseqarfiinut nuunneqarnikuummata, oqaaseqartartut oqaaseqaataat aallaaviusumik kalaallisut danskisullu allassimallutik nassiunneqartarnissaat Siulittaasoqarfiup aalajangigaraa.

 

Oqaaseqartartut oqaaseqaataasa pappiaranngorlugit agguaanneqartarunnaarnissaat qarasaasiakkulli Inatsisartut nittartagaani ataatsimiinnerup immikkoortuisa ataani takuneqarsinnaanissaat Siulittaasoqarfiup aalajangersimavaa.