2024 2023 2022 Flere år...
03-03-2004
Paasissutissat annertunerusut piumaneqarput
Namminersornerulernerup eqqunneqarneranit ukiut 25-inngornerat pillugu nalliuttorsornissamut ilassutitut aningaasaliissuteqarnissamik qinnuteqaatip Aningaasaqarnermut Ataatsimiititaliamit ulloq manna oqaluuserineqarnera
Kontomi pingaarnermi 10.01.04-mi, Namminersornerullutik Oqartussat ukiunik 25-iliineranni nalliuttorsiornermut tunngasumi, aningaasaliissutit 782.000 kr.-inik qaffanneqarnissaat aammalu kontomi pingaarnermi 20.11.50-imi, Ingerlatsinermut sillimmatinut tunngasumi, aningaasaliissutit 782.000 kr.-inik ikilineqarnissaat Naalakkersuisut ulloq 24.2.2004-mi qinnutigaat.
Qinnuteqaat Aningaasaqarnermut Ataatsimiititaliap ulloq manna oqaluuseraa imalu Naalakkersuisunut nassiunneqaqqammersunik oqaaseqaateqarluni:
Aningaasaqarnermut Ataatsimiititaliap aallarniutigalugu tikkuassava nutaamik aningaasaliissuteqarnissamik aningaasaliissutilluunniit allanngortitsinissamik qinnuteqaatit pineqartillugit, taakku
- pingaaruteqarnissaat, aamma
- aningaasanut inatsisip suliarineqarnerani siumut naatsorsuutigineqareersinnaasimannginnissaat
missingersuutit pillugit inatsimmi tunngavissaatinneqarmat.
2004-mi aningaasanut inatsit Inatsisartunit ulloq 10.12.2003-mi akuersissutigineqarpoq. Suliami matumani takuneqarsinnaavoq tamatuma kinguninngua ukiunik 25-inngortorsiornissamut aningaasaliissutit qaffanneqarnissaat sulissutigineqalersimasoq.
Aningaasaliissutit qaffanneqarnissaannik qinnuteqarnermi tunngavilersuutit ulloq 10. december 2003-mi aningaasanut inatsit akuersissutigineqarmat ilisimaneqareersimariaqartut isumaqarnarsorinarpoq. Assersuutigalugu Nuup Kommuneata nalliuttorsiornera qaammatit arlallit sioqqullugit ingerlanneqareersimavoq. Ataatsimiititaliattaaq paasivaa Dronningip Kunngissallu peqataanissaat Namminersornerullutik Oqartussat nalliuttorsiornissaannut atatillugu 2004-mi aningaasanut inatsimmi kontomut 10.01.04-mut missingersuutinut ilanngussami ilanngunneqareersimasoq, taamaattumillu kunngikkormiut aaqqissuussinermi peqataanissaat siumut naatsorsuutigineqareersinnaanngitsutut oqaatigineqarsinnaanngitsoq, taamaalillunilu ilassutitut aningaasaliissuteqartoqarnissaanik qinnuteqaammi tunngavilersuutitut atorneqarsinnaanngitsoq.
Tamatuma saniatigut aalajangiisoqartinnagu qinnuteqaammut tunngatillugu pissutsit assigiinngitsut erseqqinnerusumik paasinarsisinneqarnissaat Aningaasaqarnermut Ataatsimiititaliap kissaatigaa.
Tamanna tunngavigalugu Naalakkersuisut makku paasissutissiissutigissagaat Aningaasaqarnermut Ataatsimiititaliap kissaatigaa:
- Pissutsit suut, ulloq 10.12.2003-p kingorna atuutilersut, aningaasaliissutit taama annertutigisumik qaffanneqarnissaannik qinnuteqarnermut tunngaviuppat?
- Nerersuartitsinissamut 875.000 kr.-inik kangerlummullu angalaartitsinissamut 352.400 kr.-inik atuinissamik missingersuutit erseqqinnerusumik immikkoortiterneqarnissaat kissaatigineqarpoq; kingullertut taaneqartoq missingersuutini kisitsisiusartunut allanut sanilliullugu tupinnaannartumik eqqoqqissaartungavoq.
- Ilaatigut nerersuartitsinissamut matumani qinnuteqaatigineqartut saniatigut taassuma ingerlanneqarnissaanut 300.000 kr.-inik aningaasaateqarfinnut aamma qinnuteqartoqarpoq. Aningaasat taakku aningaasaateqarfinnit akuersissutigineqarpata aningaasat taakkorpiaat pillugit aningaasaateqarfinnit Aningaasaqarnermullu Ataatsimiititaliamit Naalakkersuisut akuersissuteqarfigineqaratarsinnaapput.
Taamaattumik taama pisoqassappat aningaasaliissutaaqqittussatut Aningaasaqarnermut Ataatsimiititaliamit akuersissutigineqarsimajunnartut ilaannik 300.000 kr.-inik atuinnginnissaminnut piareersimanerlutik paasissutissiissutigeqqullugu Naalakkersuisut qinnuigineqarput.
Nalliuttorsiornissamut aningaasaliissuteqaqqinnissamik Naalakkersuisut qinnuteqaqqinnginnissaat Aningaasaqarnermut Ataatsimiititaliamit aamma tunngavissaatinneqarpoq.
Aalajangiineq
Paasissutissat kissaatigineqartut tiguneqarnissaasa tungaanut Aningaasaqarnermut Ataatsimiititaliap suliami matumani isummernissani kinguartippaa.
Ole Thorleifsen
Aningaasaqarnermut Ataatsimiititaliap siulittaasua