Inatsisartut kikkunnit tamanit iserfigineqarsinnaapput taamatullu aamma eqimattatut kisimiilluniluunniit pulaarnissamut periarfissaqarluni. Qaqugukkut pulaartoqarniarnera pulaarnerullu siunertaa apeqqutaalluni Inatsisartunut angalaarunneqarluni pulaarnissamut periarfissat assigiinngitsuupput.
Piffissani ataatsimiiffiunngitsuni akeqanngitsumik angallanneqartarnerit
Piffissani ataatsimiiffiunngitsuni, tassa Inatsisartut ataatsimiinnerisa avataatigut, ullut tamaasa ataasinngornermiit tallimanngornermut nal. 13.00 akiliisitsiviunngitsumik siumullu isumaqatigiissuteqaqqaarani angallanneqarluni pulaarnissamut periarfissaqarpoq. Taamatut alakkaaneq saaffiginnittarfimmut saaffiginnilluni Marmorhalimik taasartagaanni aallartittarpoq (Namminersorlutik Oqartussanut isaarissap pingaarnerup eqqaani), tamannalu Inatsisartut Allattoqarfiannit ingerlanneqartarpoq. Angallassinermi annerpaamik inuit 31-it peqataasinnaapput. Angalaarussinerit minutsit 30-it missaannik sivisussuseqartarput.
Pulaartitsinerup kalaallisut, qallunaatullu oqaaseqarfiusumik ingerlanneqartarnera nalinginnaasuuvoq, immikkut tamanna pillugu isumaqatigiissuteqarnikkut, sulisoqarnikkullu pissutsit tamanna ajornartinngippagu, tuluttut oqaaseqarfiusumik alakkaaneq ingerlanneqarsinnaavoq. Tuluttut oqaaseqarfiusumik alakkaasinnaanermut periarfissaq pillugu erseqqinnerusumik paasisaqarumaguit ina@ina.gl-imut oqarasuaatikkulluunniit 34 50 00-imut saaffiginnigit.
Pulaartut takkunnerminni saaffiginnittarfimmi nalunaarsorneqassapput. Nalunaarsorneqarnermi pulaartup sumiuussusia ilanngullugu nalunaarsorneqassaaq. Pulaartut tamatuma kingorna angallanneqarnerup ingerlanneqarnerani takuneqarsinnaasumiittussamik nalunaaqutserneqassapput. Pulaarnermi nalunaaqutaq pulaarnerup naammassinerani sulisumut tunniunneqassaaq.
Inatsisartuni angalaarunneqarnerit
Takornarialerisunit angallanneqarluni pulaarneq
Takornarialerisut piffissat ataatsimiiffiusut avataasigut namminneq angallassinissaminnut isumaqatigiissuteqarnissamut periarfissaqarput, ataasinngornermiit tallimanngornermut nal. 9.00-imiit 12.00-imut kiisalu 14.00-imiit 16.00-imut saaffiginnilluni tamatumunnga inniminniisoqarsinnaavoq. Inatsisartut Allattoqarfiat kingusinnerpaamik pulaarniarneq kissaatigineqartoq nalunaaquttap akunnerinik 24-inik sioqqullugu uunga saaffigiuk: ina@ina.gl imaluunniit oqarasuaammut uunga sianerit: 34 50 00. Amerlanerpaamik inuit 31-it peqataasinnaapput. Takornariat angallassat 31-init amerlaneruppata, tamanna assersuutigalugu umiarsuarnut takornariartaatinut ilaasuuppata, eqimattanut angallanneqarnissamik kissaateqartunut ataasiakkaanut immikkut isumaqatigiissusiortoqartariaqassaaq.
Pulaartut takkunnerminni saaffiginnittarfimmi nalunaarsorneqassapput. Nalunaarsorneqarnermi pulaartup sumiuussusia ilanngullugu nalunaarsorneqassaaq. Pulaartut tamatuma kingorna angallanneqarnerup ingerlanneqarnerani takuneqarsinnaasumiittussamik nalunaaqutserneqassapput. Pulaarnermi nalunaaqutaq pulaarnerup naammassinerani sulisumut tunniunneqassaaq.
Nalunaarsorneqarnerup kingorna eqimattaq nakkutilliisumit ataatsimiittarfimmut ingiallorneqassaaq, tassanngaaniit takornarialerisup nammineerluni takornariat ataatsimiittarfimmi, inimi paasissutissiiviusumi tusagassiortullu sullivianni, ataatsimiittarfiup saavani majuartarfinni kiisalu Inatsisartut isaariaasa eqqaani angallatissavai. Angallassineq illup iluani immikkoortuni allani pisussanngorlugu annertusineqarsinnaanngilaq. Illumut isissutissamik matuersaammilluunniit tunniussisoqassanngilaq. Angallassat illumi angallanneqarnerminni pissuserissaarnissaat takornarialerisup akisussaaffigaa. Angalaarunneqarnerup nalaani nakkutilliisumik najuuttoqassaaq.
Ataatsimiinnerit nalaani
Inatsisartut ataatsimiinnerisa nalaani takuniaatitsinissamut neqerooruteqartoqarneq ajorpoq, Inatsisartulli ataatsimiittarfianni oqallinnerup ataasinngornermiit sisamanngornermut nal. 11.00 aallartinneqartartussat malinnaaffiginissaannut periarfissaqarpoq.
Inatsisartut allaffeqarfiannut iserniartut qitiusumik allaffeqarfimmi torsuusarsuarmi isertarfikkut silarlikkut isissapput, tassanilu saaffiginnittarfimmut saaffiginnissallutik. Nalunaarsorneqareernermi pulaartutut ilisarnaat tunniunneqassaaq, taanna pulaarnerup nalaani ersitsillugu nippusimatinneqassaaq. Pulaartut nakkutilliisumit Inatsisartut ataatsimiittarfiannut ingiaqatigineqartassapput. Pulaartutut ilisarnaat Inatsisartoqarfiup qimanneqarnerani sulisumut tunniunneqassaaq.
Inuit Inatsisartut oqallinnerannik malinnaarusuttut arlaliuppata kaammattuutigineqarpoq Inatsisartut Allattoqarfiannut saaffiginninnissaq ina@ina.gl-imut allalluni 34 50 00-imulluunniit sianerluni, tamanna issiavissat pisariaqartut inniminnerneqareerniassammata.
Unnummi kultorisiorfimmi
Inatsisartut 2001-imiilli Nuummi Unnummi kultorisiorfimmi, ukiut tamaasa januaarip naalernerani ingerlanneqartartumi, matutik ammatittarpaat.
Ilaasortat sulinerannik, allaffeqarfiit sunik suliaqartarnerinik Inatsisartunilu sulinermi avatangiisinik inuppalaartumik paasisassarsiornissaminnut pisumi tamatumani innuttaasut periarfissinneqartarput. Unnuk Kulturisiorfik Inatsisartut nittartagaatigut Nuuk Ugeavisikkullu nalunaarutigineqartarpoq.
Atuartut paasisassarsioqatigiillu
Niende klassimiit qummut atuartut, ilisimatusarfinni ilinniartut imaluunniit ilinniarfinni ingerlaqqiffiusuni allani ilinniartut ina@ina.gl-imut oqarasuaatikkulluunniit 34 50 00-imut saaffiginnillutik angalaarunneqarnissaminnik Inatsisartullu sulinerat pillugu itinerusumik paasisassarsiornissaminnut immikkut inniminniisinnaapput. Meeqqerivinnit meeqqanut atuartunulluunniit 8. klasse tikillugu alakkaatitsinissamut neqerooruteqartoqarneq ajorpoq,taamaattorli inersuaq ataatsimiittarfik takujumallugu piffissamik inniminniisoqarsinnaalluni.
Inatsisartunut pulaarneq pissarsiviunerpaassaaq atuartut ilinniartullu pulaannginnerminni Inatsisartut oqartussaaqataanerlu pillugit siumut paasisassarsioqqaalaarsimappata. Saqqaani Oqartussaaqataaneq iserfigalugu sukumiinerusunik paasisaqarsinnaavutit.
Oqartussaaqataaneq pillugu atuartitsinermi atorneqarsinnaasut aamma Inerisaaviup nittartagaani nassaarineqarsinnaapput:
inerisaavik.gl/projekter-og-fag/samfundsfag/
Inuusuttut Inatsisartui
Inuusuttut aalajangersimasumik amerlassusillit ukiut marlukkaarlugit, Inuusuttut Inatsisartuinik taasamik, Inatsisartutut sulinermik misiliinissaminnut periarfissinneqartarput. Inatsisartut oqartussaaqataanerlu pillugit itinerusumik ilinniagaqarnissamut, ilisimalikkanillu nammineerluni misileraanissamut, aaqqissuussaq taanna periarfissiivoq. Atatillugulu suleqatigisinnaasanik naapitsinissamut silarsuarmullu naalakkersuinermik suliaqarfiusumut qanittumik atassuteqalernissamut oqalliffik taanna periarfissaavoq pitsaasoq. Inuusuttut Inatsisartuisa nittartagaanni tamanna pillugu annertunerusumik paasisaqarit:
inu.gl
Tusagassiorfinnut paasissutissat
Inatsisartuni sulineq pillugu tusagassiorfinnut paasissutissat quppersakkami matuma kingulianiittumi takuneqarsinnaapput: