2024 2023 2022 Flere år...
06-08-2004
Ulloq nunatsinnut pingaarutilik
Ullumi ulloq 6. august 2004-mi Igalikumi USA-p Nunanut allanut ministeriata Collin Powellip, Danmarkip Nunanut allanut ministeriata Per Stig Møllerip aammalu Aningaasanut Nunanullu allanut naalakkersuisup Josef Motzfeldtip naapeqatigiillutik atsioqatigiinnerisa nalliuttorsiuttigineqarnerani, Inatsisartut sinnerlugit Nunanut Allanut Sillimaniarnermullu Ataatsimiititaliap siulittaasua Per Rosing-Petersen peqtaavoq. Thulemi radarip nutarternerqarnissaanik Amerikamiut kissaateqarnerisa kingunerisaannik Kalaallit Nunaata/Damarkip USA-llu akornanni isumaqatigiinniarnerit inernerattut isumaqatigiissut atsiussavaat.
Isumaqatigiissutip pileriartuaarnerani Ataatsimiititaliap tamakkiisumik malinnaasimanera aammalu Ataatsimiititaliap tamarmiusup isumaqatiginninneriarnerit inerneranik tapersiinera Inatsisartut Nunanut Allanut Sillimaniarnermullu Ataatsimiititaliaata siulittaasuata naammagisimaarlugu oqaatigaa. Taamaattumik Inatsisartut Nunanut Allanut Sillimaniarnermullu Ataatsimiititaliaata Igalikumi atsioqatigiinneq isumaqatiginninniarnerit Kalaallit Nunaannut pitsaasumik angusaqarfiusimanerannik takussutissiisoq naammagisimaarpaa.
Naalakkersuinikkut suliallit atorfilittallu kusanartumik suliaqarsimanerat kiisalu isumaqatiginniarnermi Danmarkip Kalaallillu Nunaata qanimut peqatigiillutik isumaqatigiilluarsimanerat siulittaaasup immikkut taassallugu pingaartippaa. Isumaqatiginninniarnerit ingerlaneranni Kalaallit Nunaat toqqaannartumik sunniuteqarsimavoq, Kalaallit Nunaatalu atsioqataanera Itillermi Isumaqatigiisutip siunertaanut kiisalu namminersuleriartuaarnerup ingerlanneqarneranni alloriarneruvoq aalajangiisuusoq.
Illersornissaq pillugu 1951-imi isumaqatigiissutip nutarterneqarneratigut Kalaallit Nunaata qanoq pingaaruteqartigineranik akuerinninnerup aammalu amerikamiut Thulemi sakkutooqarfeqarneranni ullutsinnut naleqquttumik tunngavissiineq kiisalu pissutsit nunasiaagallarnerup nalaanut sanilliullugit allanngorsimanerat qanoq pingaaruteqartigisut ataatsimiititaliap siulittaasuata erseqqissarpaa.Aningaasaqarnikkut teknikkikkullu suleqatigiikkumalluni nalunaaruteqarnikkut Kalaallit Nunaata USA-mik toqqaannartumik suleqateqarsinnaaneranut periarfissaqalernera siulittaasup pitsaasutut isigaa, tamatumalu sakkutoqarfeqarnermut tunngasuinnaanngitsumik USA-mut attaveqalernerup aallatinneratut isigalugu. Avatangiisinut tunngasumik nalunaaruteqarneq avatangiisinut tunngatillugu USA-p akisussaaffeqarneranik aalajangiusimanninnissamut pingaaruteqartoq siulittaasup isigaa. Avatangiisinut piumasaqaatit sakkortunerpaat sakkutooqarfimmi malinninnissaanut USA maanna pisussaaffeqalerpoq, tamatumani apeqqutaatinnagu piumasaqaatit kalaallinit, danskinit imaluunniit amerikamiunit piumasaqataanersut.
Isumaqatigiissut www.nanoq.gl/nap -mi atuarneqarsinnaavoq.
Inatsisartut Nunanut Allanut Sillimaniarnermullu Ataatsimiititaliaat ukuninnga ilaasortaqarpoq:
Inatsisartunut ilaasortaq Per Rosing-Petersen (Siumut), siulittaasoq
Inatsisartunut ilaasortaq Aqqaluk Lynge (Inuit Ataqatigiit), siulittaasup tullia
Inatsisartunut ilaasortaq Jonathan Motzfeldt (Siumut)
Inatsisartunut ilaasortaq Ellen Christoffersen (Atassut)
Inatsisartunut ilaasortaq Per Berthelsen (Demokraatit)
Folketingimut ilaasortaq Kuupik Kleist, taaseqataasinnaanani ilaasortaq
Folketingimut ilaasortaq Lars Emil Johansen, taaseqataasinnaanani ilaasortaq
Inussiarnersumik inuulluaqqusillunga,
Per Rosing-Petersen
Ataatsimiititaliap siulittaasua
Igaliku, ulloq 6. august 2004