2024 2023 2022 Flere år...
10-11-2005
AUL-ip tunineqarnissaa akuerineqarpoq
Arctic Umiaq Line A/S-ip (AUL) Arctic Travel Groupimut (ATG) tunineqarnissaa pillugu pinasuartumik suliarinninnissamik Naalakkersuisut inassuteqataat ulloq 3.11.2005 Aningaasaqarnermut Ataatsimiititaliap tiguaa.
Aningaasaqarnermut Ataatsimiititaliaq ulluni arlalinni, tassungalu ilanngullugu Naalakkersuisut siulittaasuannut apeqqutinik qulaajaassutaasunik 19-inik suliarinnereerluni, ulloq 8. november 2005 ilaasortanit tallimaasunit amerlanerussutilinnit sisamaasunit Siumumeersunit, Inuit Ataqatigiineersumit Demokraatineersumillu ingerlatseqatigiiffiup pigisaasa pingaarnerpaat ilaasa tunineqarnissaat pillugu akuersissutiginnippoq.
Angallannermut tunngassutillit annertuunik sipaaruteqarfigineqarnissaannik Inatsisartut 2003-mi ukiakkulli arlaleriarlutik aalajangertarsimanerisa tunisineq kinguneraat. Angallannermut tunngassutilinnut atatillugu ulloq 29. juni 2005-imi sullissinissamut nutaamik isumaqatigiissuteqarnissa mik aalajangikkap AUL-ip ingerlatsivigineqarneranut tapiissutinik 2006-imiit tunniussisoqartarunnaarnissaa kinguneraa. Tamanna tunngavigalugu ingerlatsinerup ingerlatiinnarneqarnissaa periarfissaaruttussaassaaq, taamaattumillu AUL¿ip pigisaasa amerlanersaat pillugit ATG¨mut tunineqarnissaannik Naalakkersuisut isumaqatigiissuteqarput.
Pissutsit taamaatsillugit taamatut aaqqiissuteqarnissaq Ataatsimiititaliami amerlanerussutillit pissusissamisoornerpaatut isigimmassuk tunisinissaq akuersissutigineqarpoq. Matumanili aalajangiinermut peqatigitillugu ilaatigut sinerissami illoqarfinni mikinerusuni nunaqarfinnilu kiffartuussinerup naammaginartumik ingerlanneqarsinnaanissaa anguniarlugu angallasseqatigiiffiit assigiinngitsut imaatigut silaannakkullu angallannermut pilersaarutaasa akornanni pitsaasumik ataqatigiissaarinissaq qulakkeerniarlugu pisariaqartunik iliuuseqarnissamut Naalakkersuisut Ataatsimiititaliamit kaammattorneqarsimapput.
Ilaatigut umiarsuit Namminersornerullutik Oqartussanit qularnaveeqqusiunneqarnerisigut Namminersornerullutik Oqartussat annaasaqaratarsinnaanerat Naalakkersuisut tunniussinermi isumaqatigiissut aqqutigalugu killilersimaarniaraat amerlanerussuteqartut maluginiarpaat.
Tunisinerup tamatuma nunami maani sulisoqarnikkut kaaviiaartitsinikkullu iluaqutaasumik kinguneqarsinnaasutut naatsorsuutigineqarsinnaaneratigut takornariaqarnikkut ineriartortits inerup annertuumik periarfissaqartinneqarnissaa Ataatsimiititaliami amerlanerussuteqartut pingaartissimavaat.
Simon Olsen
Aningaasaqarnermut Ataatsimiititaliap Siulittaasua