2024 2023 2022 Flere år...
27-02-2005
Tamat oqartussaaqataanerannut matut pingasut
Asasakka inuusuttut inatsisartui,
Suliassarsi pillugu pilluaritsi avatangiisitaassinnullu tikilluaritsi.”Tamat oqartussaaqataanerisa uummataat” iserfigaarsi, ilaasami Inatsisartut ataatsimiittarfiat taama taajumasarmassuk, ilaasali pasinarsaarinerulaarlutik ”pissaanerup isaariaanik” taajumasarlugu. Innuttat taaguutitut atorajjutaat alla tassa ”Siuttut illorsuat aappalaartoq Nuummiittoq”. Taaguutit taakku tamarmik ilumoortortaqarunarput.
Innuttaasut quiasaarlutik qanorluunniit taasaraluarpassuk inatsisartut ataatsimiittarfiannut iseqqaarnermi uissuummiallanngitsoorneq ajornaqaaq. Persuarsiornarpaseqaaq, tassanilu inuit qinigaat tulleriiaarlutik issiasarput nunattalu siunissami atugarisassai pillugit isumaqatigiinniarlutillu aalajangiisarlutik. Taasinerit inernerisa inuiaqatigiit, allaammi nunaqarfiit ungasinnerpaat sajuppillatsissinnaasarpai.
Assersuutigalugit eqqaaginnarsigit akileraartarnikkut nutarterineq, akit assigiittussaatitaanerisa atorunnaarsinneqarnerat imaluunniit ilinniagaqarnersiutinik nutarterineq sapaatit akunnerpassuunngitsut matuma siorna Inatsisartunit taasissutigineqartut. Maannalu allannguutit atuutilereersut kingunissaannut inuiaqatigiit piareersarput. Inuinnaat naalakkersueqataanerat ingerlavoq sunniutaalumi takkutinngitsuussanatik.
Inuinnaalli naalakkersueqataanerat naammaginartumik ingerlava? Kalaallit Nunaat kinguaarinni inuusuttut pitsaasumik siunissaqarnissaat qulakkeerlugu tamat oqartussaaqataanerannik ingerlatsilersimava?
Tusagassiortunngorniaq kinguartitsinissaq sioqqullugu inuusuttut inatsisartuisa sulinerannik allaaserinnittoq tamanna pillugu inuusuttut isumaannik ungasinngitsukkut paasiniaasimavoq. Nuummi angalaarluni inuusuttoqatisi ilissitut ukiullit aperisarpai tamat oqartussaaqataanerat qanoq paasineraat. Tamannali nikalluallannanngitsuunngilaq. Inuusuttut 20-it aperai tallimaannaalli sammisaq taanna oqaaseqarfigiumavaat. ”No comment” amerlanerpaat oqarput.
Tunngavilersuutaat tuaviornermik pissuteqanngilluinnarpoq, taamaallaalli sammisamik soqutigisaqannginnermik. Inuusuttut oqaatigaat tamat oqartussaaqataanerat ilisimasaqarfigivallaanngikkitsik, tusagassiutitigulluunniit oqallinnermut peqataanissartik kajumerinngikkitsik.
”Soormi, ajorami?” soorunami aperisoqarsinnaavoq. Inuusuttut nukitik atuarfimmut sunngiffimmilu soqutigisanut, ikinngutinut, angutaammut arnaammulluunniit atussannginnamikkit, inuiaqatigiillu pillugit pingaarutilimmik oqallinneq tamakkuninnga paasisimasalinnut isumagitillugu? Taamatulli oqartut eqqarsaatiginngitsoortarpaat inuiaqatigiit timersoqatigiiffittut peqatigiiffimmut inuusuttulluunniit kattuffiannut peqataaffigineqarsinnaasunut peqataaffigineqanngitsoorsinnaasunulluunniit assersuunneqarsinnaanngimmata. Inuiaqatigiinni tamassi ilaasortaavusi, inuuneq naallugu. Inuiaqatigiinni aalajangikkat ilissi sinnerlusi aalajangerneqartarput, taakkulu ajunngippata ajorpataluunniit inooqataaffigisussaavasi.
Taamaammat arajutsinaveersaaritsi: Inuiaqatigiit angajoqqaassi pilersitaat inuuffigaasi kinguaariillu tullerimmasi akisussaaffik ilissinnut tunniuttussaavaat. Akisussaaffik tamanna tigujumanngissinnaanngilarsi allallu ilissi sinnerlusi aalajangiinernik isumaginnikkiartorlutik takkunnissaannik neriukkaluarussi iluaqutaanavianngilaq. Maleruutiinnarnissigut aalajangiinissaq avaqqussinnaanngilluinnarparsi. Maleruutiinnarneq inuiaqatigiit kingornutassi allanngortinnagit siunissami meeqqassinnut tunniunneqarnissaannik aalajangerneruvoq. Taamatut pisoqarpat kinguaariittut katataasutut taaneqassaasi piffissarlu inuuffigisarsi periarfissanik atuilussinnarfittut taaneqarluni. Kinguaaariimmi angajoqqaassi nalaaneersut iluatseqqullusi periarfissaqaqqullusilu qanorluunniit ilungersorsimatigisimagaluarpata suliassat suli amerlaqaat.
Tamat oqartussaaqataaneranni suna pineqarnersoq inuusuttut ilaasa ilisimanngippallaaqigamikkugooq tamat oqartussaaqataaneranni peqataajumanngitsut tusareerparput. Ilissi taamaalissanngilasi. Taamaammat sulinerup qanoq aallartinneqarsinnaaneranik oqaluttuullusi piffissap sinnera atorniarpara. Tamat oqartussaaqataanerat qanoq pigiliunneqarsinnaanersoq tunaartassatullu nutaatut qanoq atorneqarsinnaanersoq. Qanoq iliornissaq nalunngikkaanni misiliinissamullu sapiissuseqaraanni tamanna ajornanngilaq, soorlu allarpassuartigut taamaattoq.
Tamat oqartussaaqataaneranni inersuarnut illernartunut isernissamut matut pingasuupput. Kasuttussanngilasi, isersinnaanerlusilu aperissanngilasi. Tamat oqartussaaqataaneranni takkunneq nalunaarutigiinnassallugu ileqqorissaarneruvoq, tikilluaqquneqassaqqaarpusi.
Tamat oqartussaaqataanerannut matu siulleq tassa oqartussaaqataalluni qinersisinnaatitaaneq. Folketingimut qinerseqqammerpugut upernaarlu manna kommunalbestyrelsinut qinersinissaq tullinnguuppoq. Ullormi qinersivimmi 18-ileereersimagussi inuit eqqortut oqartussaassusilerneqarneranni peqataagitsi. Qineqqusaarneq tusarnaarluarisiuk, ilissilu pigisassi erlinnarnersaasa ilaannut, tassalu taasisinnaatitaanissinnut, tatiginninnissinnut, ilissi sinnerlusi naalakkersuinikkut akisussaanermik isumaginnittunik tapersiinissinnut naalakkersuinermik suliallit akiliutissatut neqeroorutaat tusarsigit.
Eqqaamasiuk naalakkersuinermik suliallit ilissi inuusuttuususi pissarsiarerusummasi. Taamaammat akikinaartinniaqinasi. Qinersisartut ataatsimiisinneqarnerinut najuukkiartoritsi, apeqquteqaritsi piumasaqaatisilu nalunaarutigisigit. Naalakkersuinermik suliallit suliaasa inerneri pillugit qineqqusaarnerullu kingulliup kingorna neriorsuutaat sumut pisimanersut aperisigit. Suliassaq piareersarluarsimagussiuk kina pikkorissuunersoq, aallussilluartuunersoq ilissilu taasinissinnik pissarsinissamut unneqarissuseqarnersoq ajornanngitsumik paasisinnaavarsi.
Eqqaamasiuttaaq taasiumanerlusi nammineerlusiluunniit qinigassanngortikkumanerunerlusi ilissi nammineerlusi aalajangigassarigassiuk. 18-inik ukioqalereerussi naalakkersuinikkut atorfiit tamarmik ilissinnut ammapput. Kinami oqarpa naalakkersuinermik sulialittut misilittagartuutut pitsaatigisumik – immaqaluunniimmi pitsaanerusumik – iliorsinnaanngitsusi? Kinami oqarpa naalakkersuinikkut inissisimaffimmi kiinnanik isummanillu nutaanik qinersisartorpassuit takunninnissaq nuannarissanngikkaat? Sapiissuseqarussi kingusinnerusumut utaqqinissamut pissutissaqanngilaq.
Taamaammat taamaalioreersimanngikkussi naalakkersuinikkut inuusuttut kattuffii tipisiuiffigilaarsigit. Naalakkersuinermik aallutaqarneq kisimiinniartunut naatsorsuussaanngilaq, ataatsimoorlutilli kivitserusuttunut. Inuusuttut naalakkersuinikkut kattuffianni inuusuttut assigiinnik ilissitut soqutigisallit siunissamullu takorluugallit naapitassaapput. Ilaasortat nammineerlutik aalajangissavaat naalakkersuinikkut inissanut qinigassanngortikkumanerlutik namminermissulluunniit eqqarsartartut qinigaatinniarlugit ikiorumanerunerlugit. Qanorluunniilli ikkaluarpat tamat oqartussaaqataanerat qanimut peqataaffigineqassaaq inuiaqatigiillu ineriartorneranni tunaartat aalajangersarneqarnerat peqataaffigineqassalluni.
Qinersinerulli kingorna qanoq pisoqassava? Ukiut sisamat qaangiunneranni nutaamik qinersisoqarneratigut oqartussaaqataanermik atueqqinnissap tungaanut innuttaasoq sulinngiffeqassava? Naamerluinnaq! Qinersisoqareerpat tamat oqartussaaqataaneranni innuttaasup sulinera aatsaat iluamik aallartissaaq. Naalakkersuinermik suliallit akisussaaffimminnik aalajangiusimanninnissaannik ullut tamaasa eqqaasittassavasi, neriorsuutaannik eqqaasittassallugit qinersisartullu pisinnaatitsinerannik oqaaqqissaartarlugit. Taamaalippat tamat oqartussaaqataanerannut matu tulleq ammartussanngussavarsi.
Matu tulleq tassa killiliivigineqarani oqaaseqarsinnaatitaaneq, tamat oqartussaaqataaneranni innuttatut pisinnaatitaaffitta pingaarnersaat. Taanna inuusuttut tamanut ammasumik isummaminnik saqqummiiumannginnerannik tusagassiortunngorniap misigisaanit ilassilluarneqarnerusariaqarpoq. Sunaliuna killiliivigineqanngitsumik oqaaseqarsinnaatitaanerup immikkuullarissutigigaa?
Killiliivigineqarani oqaaseqarsinnaatitaanerup innuttaaqatissi misilittagaasa isumaasalu ilisimalernissaannut periarfississavaasi, minnerunngitsumillu ilissi nammineerlusi eqqarsaatissi siunnersuutissilu ingerlateqqissinnaanerinut periarfissillusi.
Oqaaseq oqaatigineqartoq allassimasorluunniit tamat oqartussaaqataaneranni inuiaqatigiit sananeqaataannut toqqammaviuvoq. Tamanut ammasumik oqaaseqaraangassi inuiaqatigiit sananeqaataannut toqqammavileeqataassaasi. Qularutigissanngilarsilu taanna atornequmaarmat. Soorunami qularnaarneqarsinnaanngilaq tusarnaartut atuartartullu tamarmik isummernissinni isumaqatigissagaasi oqallinnermullu ilanngussassinnut oqaaseqartoqassasoq aamma qularnaarneqarsinnaagunanngilaq.
Qularutissaanngitsorli tassa oqaatsisi inuppassuit qarasaanni eqqarsaatinik pilersitsissasut, ilissilu isummernersi ataqqineqassasoq, soorluttaaq tamat oqartussaaqataaneranni innuttat nipaat tamatigut ataqqineqartartoq.
Innuttatut oqallinnermi nipaaginnarussi pissutsit qanoq issusiat nipaatsumik tapersiivigissavarsi. Taamaattumik nipaaginnarnissigut inuiaqatigiinni amigaatitut atuuttut pissusissamisuunngitsuliorfiginninnerillu, kissaatigigussiuk kissaatiginngikkussiulluunniit, naqissuseeqataaffigissavasi. Aalajangersimalluartumilli oqaaseqarussi innuttatut akisussaaffissi aamma atussavarsi, kikkullu tamarmik siunissaata ilusiliivigineranut peqataallusi.
Aalajangiisoqartillugu isummassi avaqqunneqarsinnaannginnissaat qulakkeerumagussiuk qasutsuilluni ingerlaavartumillu iliuuseqarneq kisimi atorsinnaavoq. Tamatumani taava allat peqasiuttariaqarput, oqalliseqatigiinnermi nammineq tunngavilersuutigisat atorsinnaanersut misilillugit, isumaqatigiinnissarlu angujumallugu tusarnaarumassuseqarlusi, isumassarsiorsinnaallusilu akissuteqarsinnaasariaqarlusi.
Taamaammat killiligaanngitsumik oqaaseqarsinnaatitaaneq kisimiinngilaq, allatut kiffaanngissuseqarluni pisinnaatitaaffinnik tapertaqartinneqartarpoq, soorlu katersuunnissamut kiffaanngissuseqarnermik peqatigiiffeqarnissamullu kiffaanngissuseqarnermik. Attaveqarfinnik soqutigisaqaqatigiiffinnillu pilersitsiortoritsi. Inuiaqatigiit naqqaniit sanarfisigit. Taamaappat kisimiillusi nipersi niperpassuannguutissaaq, misigissavarsilu atsiornernik katersineq, tamanut ammasumik akerliussutsimik takutitsineq nassaarsiullaqqissummilluunniit aaqqissuussineq annertoorujussuarmik sunniuteqarsinnaassuseqartut. Taamaaliorneq tamanik soqutiginnilersitsisarpoq aalajangiisartullu isumaliutigilluakkanik akissuteqarnissamut ilissilu isummassi inuiaqatigiit piumasaattut akuersaarneqarnissaannut tatineqartarlutik. Naluneqanngitsutummi innutaasut tamat oqartussaaqataanerannik ingerlatsinermi naggataatigut aalajangiisartuupput.
Tamat oqartussaaqataanerannut matut marluk siulliit ammareersimagussigit nipersi tusaaneqarsinnaalersimassaaq, qanorlu tusarneqarnissarsi nalujunnaarsimassavarsi. Maannalu piffissanngorpoq tamat oqartussaaqataaneranni matut pingajuata ammarnissaanut. Matup taassuma oqaaseqarnermiit iliuuseqarsinnaalersissavaasi, qanorluuniillu pitsaatigisunik siunertaqaraluarussi iliuutsit tunngaviginerullugit qaquguugaluarnersoq naliliivigineqarumaarpusi.
Ataatsimooqatigiiffiup tamarmik iluarisaannik atulernissaa nallertinnagu assigiinngitsorpassuarnik allanngortitassaqarpoq. Nammineerlusi suliniuteqarnissassinnut imminut tunniugitsi innuttallu sinnerlugit aalajangiillusi. Piginnaatitaanermik pissarsinissaq eqqaamasimagaanni tamanna tamat oqartussaaqataaneranni inerteqqutaanngilaq.
Suliassamut ilumoorullugu soqutiginnikkaanni piginnaatitaanermik pissarsinissaq ajornarpaallaanngilaq. Atuarfisi ilinniarfisiluunniit assersuutigiinnariarsigit. Taakkunani isummaminnik saqqummiussisinnaaginnaratik aammali ilinniarfitsik pillugu aalajangigassanik ilungersuutiginnissinnaallutillu piviusunngortitsinissamut sapiissusilinnut tatigisatut ilinniartullu siunnersuisoqatigiivini qinigaanissamut inissaqarpoq. Sulinermik inuussutissarsiuteqartut sulinerminni atugarisamikkut sunniuteqarnissaannut matuersaatitut atuuttunik tatigisatut suliffimmi qinigaaffeqarpoq. Ilinniartut ineqarfiini inissianilu attartortittakkani najugaqartunut sinniisoqarfeqarpoq najugaqartut ulluinnarni inuuneranni pitsaasumik atugassaqarnissaq qularnaarneqassappat annertoorujussuarmik pingaaruteqalersinnaasunik.
Timersorneq soqutigigussiuk timersornermut atugassarititaasut pillugit suliniuteqaleritsi. Kulturi soqutigigussiuk kulturimut tunngatillugu kattuffinni siulersuisunilu suleqataagitsi. Siunnersuisoqatigiinni nævninilu pisortat pilersitaanni inuinnaat sinniisuisut toqqagaatissinnaavusi, allaammi eqqartuusseqataasartutut eqqartuussisutulluunniit tiguinnakkatut pineqaatissinneqarsimasortatsinnut inuiaqatigiit qanoq pissuseqarfiginninnissaannut akisussaaqataalersinnaavusi. Inuit pisinnaatitaaffi, meeqqat, napparsimasut utoqqaalluunniit atugarisaat, nunani issittumiittuni suleqatigiinneq, atuisut pillugit sulineq, pinngortitap illersorneqarnissaanut inooqatigiinnermiluunniit sanngiitsumik inissisimasut pillugit suliniuteqarsinnaavusi.
Tamakku tamarmik allarpassuillu ilissinnut piareersimapput, taakkulu aallartiinnariaavasi. Inuiaqatigiit ima amerlanngitsigaagut allat suliassamik paasisimasallit soqutigisassilu assinganik ilungersuutiginnittut peqatissarsiarisinnaagussigit aalajangiinerit allanngortissinnaavasi. Kattuffiit amerlanersaat utaqqiinnarput nukiit nutaat suleqataalernissaannut periarfissarpassuarnillu atuinissaannut. Inuusuttuuneq aporfissaanngilaq. Piumassuseqarnersi, eqqarsallaqqissusersi ilumoortuunersilu aallartinnissamut piumasatuaapput. Ilissiunersi naammaqaaq piumagussilu tamat oqartussaaqataaneranni piaartumik akuulersinnaavusi.
Tamat oqartussaaqataanerannut matut pingasuusut pillugit maanna oqaluttuutereerpassi. Siulleq tassa qinersisinnaatitaanersi, naalakkersuinikkut inissanut qinigassanngortinnissamut piginnaatitaaffigisarsi allamilluunniit tatigisassinnik taasisinnaatitaaffissi. Matup aappaa tassa killiliivigineqarani oqaaseqarsinnaatitaaneq kiffaanngissuseqarlusi ilisimasanik misilittakkanillu katersinissassinnut periarfissiisuusoq kiisalu inuiaqatigiinnut ilisimalikkassinnik siunnersuutissinnillu siamasissumik apuussivigisinnaasarsi. Matut pingajuat ”peqataanikkut oqartussaaqataanermik” taaneqarsinnaavoq, taassumalu inuiaqatigiinni aalajangigassat nammineerlusi tigunissaannut periarfissarpassuarnik tunissavaasi - Inatsisartunut, kommunalbestyrelsinut ilagiilluunniit sinniisaannut inuusuttutut naalakkersuinikkut sulialittut taamaallaat pinnasi, aammali suliffippassuatsinni sinniisutut, siulersuisuni, siunnersuisoqatigiinni nævninilu tatigisatut ilaasortatut.
Namminersornerulluni oqartussaaneq ukiunik 25-inngortorsiorlugu nalliuttorsiutigeqammerparput, immitsinnullu eqqaasilluta Kalaallit Nunaanni tamat oqartussaaqataaneranni pisimasuusoq pingaarutilerujussuaq. Maannamut pisimasut eqqaamasassat anginersaat. Iluatsilluarnerali angajoqqaassi nalaani inuusut sinikataarlutik angunngilaat. Namminersornerulluni oqartusaanermik pilersitsisut – inuusuttut ilissitungajak ukiullit – nunap ingerlannera Kalaallit Nunaata ministereqarfianit peerlugu innuttaasunut nuunneqarnissaanut qaaqquneqarsimanngillat.
Akerlianik inuppassuaqarsimavoq iluatsissinnaannginneranik isumaqartunik. Kalaallit nammineerlutik angerlarsimaffimminnut aalajangiisunngornissaannik piaarpallaarneraasut. Tamatigut tamaanna immaqa oqartussaaffilerneqarsinnaasut, allannguinerilli annertunerit pissappata naatsorsoruminaatsumik kinguneqaateqarsinnaasut. Aalajangiinerit immikkut ilisimasalinnit qanganisarsiortutullu allaffimmiut allaffiinit aalajangerneqarpata pitsaanerussasoq.
Tamarmilli silattuaqiimisinneqarsimapput. Ullormili tassani 1979-imi namminersornerulernerup piviusunngortinneqarnerani nuannersumik neriuuteqarfiusumillu nalliuttorsiornermi taamaanngilaq. Nunamili tamarmi nalunaaquttap akunnerpassuini ilungersoreerluni, aporfissaqareerluni, pakatsisareerluni, kukkusareerluni akisunaaqalugillu misilittagaqalereerluni, nalunaaquttap akunneri nuannersut nikallunganartullu atoreerlugit, ullut malartitassaanngitsumik neriulluarfiusut annernartumillu nangaanermik imaqartut atoreerlugit tamarmik erseqqissumik paasilerpaat namminersornerulernerup eqqunneqarnera aalajangernerusoq eqqortutuaasoq. Taanna siumut pisussanik naatsorsuutigineqarsinnaasunik kinguaariillu nutaat paasisimasaqarlualernissaannik pilersitsivoq. Kinguaariit taakku ilissi maannakkut tumisiorlugit aallarpusi. Kingornussaq eriagisassaq angeqaaq.
Piffissami matumani namminersornerulluni oqartussaanermut suna kingoraartaassanersoq assut oqallisigineqarpoq. Inuiaqatigiit aaqqissuussaanerat qanorluunniit ittoq piffissaqartarpoq, maannalu namminersornerunermik aaqqissuussinerup atuuffia naajartulinnguatsiarpoq. Inatsisartuni partiit isumaqatigiissutigaat inatsisit tunngaviusut naalagaaffeqatigiinnerullu iluani Kalaallit Nunaata sapinngisamik annertunerpaamik namminiilernissaanut piareersassalluni piffissanngortoq. Kalaallit Nunaata imminut aquttup sinaakkutissai takusinnaaleriartorpavut. Nunami namminermi pissutsit pillugit suliassaqarfiit sinneruttuttaaq akisussaaffiginissaat Kalaallit Nunaata akuerisimagaa erseqqissiartuaarpoq. Kalaallit Nunaat Naalagaaffeqatigiinnermi naligisatut inississimasoq aammalu pisinnaatitaaffiit pisussaaffillu akornanni oqimaaqatigiinnermik nutaamik atugaqalersimasoq. Kalaallit Nunaat nunat innuttallu nunat tamalaat akornanni ataatsimooqatigiinneranni erseqqissumik inissisimanissamut ajukkunnanngitsoq.
Tamannali tassaavoq oqaluttuap affaannaa. Tamannami tassaaginnarpoq avammut sammisumik nunap avatangiisaanut tunngatillugu namminersornissamik anguniagaqarneq. Tamatuma saniatigut sakkukinnerunngitsumik sorsuutiginnittoqassaaq, tassalu nammineerluta namminersulernissarput pillugu sorsuuteqarnissarput. Inuiaqatigiit tamarmiusut tamat oqartussaaqataanerannik aallaavilimmik ingerlatsinissaannik sorsuuteqarneq. Kinguaarit ilinniagaqarluarsimasut kalaallillu kinaassutsiminnik paasinnilluarsimasut naalakkersuinikkut allaffissornikkullu sutigut tamatigut nunatta aqutsivigineranik patajaatsumik tigusippata sorsuutiginninneq tamanna aatsaat ajugaaninngussaaq. Oqartussaasullu tamarmik ammalluinnartumik periuseqarnissaq ilikkarpassuk soqutigisaqaqatigiiffittullu kattuffiit nukittuut pisinnaalluartullu peqatigalugit ingerlasinnaalerpata. Ullumikkut allaffissornikkut naalakkersuisoqarnikkullu ingerlatsiviit nalinginnaasumillu innuttat nalornisutut immikkoorsitaasutullu misigisimasut avissaarutaat qarmat suujunnaarsikkutsigit. Tunniussinnaasat sinnerlugit atuiunnaarutta aammalu pisuujunerpaat piitsuunerpaallu atugarisaat naligiissaarneqarpata. Taamatut sorsuutiginninneq kalaallit inuusuttut ilissi kisissi ajugaaffigisinnaavarsi sorsuutiginninnerummi ajorsarfiunissaanik ilissi kisissi aarleqqutissaqarassi.
Qujanaqaarli tamanna allarpassuit nalunngereermassuk. Tusagassiortutut ilinniagaqartup anersaaruluunni internetikkut animmagu piffissaq sivikitsuinnaq qaangiuttoq atuartartut ilaat ima tuppallersaatinik oqaaseqarluni illiivoq:
”Tunniutiinnannginnavit torrak. Inuusuttut maannakkut eqeeertariaqarput, taamaattoqanngippat Kalaallit Nunaata siunissaa neriunaateqanngilluinnassaaq. Nuanneqaaq tusagassiortutut ilinniartumik inuusuttoqarmat tamat oqartussaaqataanerisa paasineqarnissaa pillugu oqariartuummik pingaaqisumik saqqummiussinerup pingaarutaanik takunnissinnaasumik.”
Taavalu allannernik angisuunik allassimavoq: ”KALAALLIT INUUSUTTUT EQEERITSI - MAANNAKKUT!!!!” -------- Inuusuttut Inatsisartuini 2005-imi oqallilluarnissasinnik kissaappassi!