2024 2023 2022 Flere år...
18-09-2006
Tusagassiuutitigut nalunaarut. Igitanut avatangiisinut ulorianaatilinnut Nuummi tigooqqaavittaaq
Nuummi tigooraavimmi takussaagut
Inatsisartut eqqissisimatitsinermut Avatangiisinullu Ataatsimiititaliaata Siulittaasua, Thomas Kristensen, arfininggorneq ulloq 16. september 2006 nal.11.00 Nuup Kommuniata igitanut avatangiisinut ulorianaatilinnut tigooqqaavittaavata ammarneqarnerani najuuppoq.
Nuummi innuttaasut suliffeqarfiillu soorlu batterinik, computerit, allaffinni atortut, akoorutissanit eqqakkanik, nillataartitsivinnik kiisalu pequtinik tunniussinermi avataatigut aammattaaq tigooraavimmi atorluarsinnaasaminnik nassaarsinnaapput tassa sunik atoqqinneqarsinaasunik igitanik 'igitakunik iluatinnartut'nik taaneqartartunik.
Ullutsinnut naleqquttumik akisussaassuseqartumillu eqqagassanik assigiinngitsunik avatangiisinut ulorianaateqarsinnaasunik passussisinnaaneq angusinnaajumallugu Nuup Kommuniata siunniussimasani piviusunngortinniarlugu iluatsissimavaa. Nuup kommuniata anguniakkani piviusunngortissinnaalerpaa inuiaqatigiit kalaallit aningaasanut inatsimmi tapiissuteqarnerisigut.
Kalaallit Nunaanni kommunit allat tigooraavillit aamma Namminersornerullutik Oqartussanit aningaasatigut ikiorserneqartarput.
Eqqagassanik passussineq iluatsittumik ingerlanneqasssappat eqqakkanik akisussaassulimmik passussineq Innuttaasut tamakkerlutik peqataaffigalugulu tapersersortariaqarmassuk matumani piumasaqataavoq. Tigooqqaavimmi naapinneq eqqagassanillu ataatsimoorluni passussineq Innuttaasut akornanni pilerinartuusariaqartoq Thomas Kristensen oqarpoq.
Kalaallit Nunaanni nutaaliaasumi atuisutullu eqqarsartaaseqarfiuleriartortormi kingulissatta avatangiisitigut ajornartorsiutinik annertuunik iluarsiuminaatsunillu pilersitsiffiginnginnissaat ataatsimoorluta pisussaafittut qulakkiigassarigipput Thomas Kristensen naliliivoq.
Ajoraluartumik Nunatsinni piffinni amerlaqisuni eqqagassanik passussineq suli ullutsinnut naleqquttumik akisussaassuseqartumillu ingerlanneqanngilaq taamaammallu aaqqiissutissanik tigussaasunik aallartitsisariaqarpugut taamaaliunngikkutta innuttaasut peqqissusaat avatangiisillu immeraassutigissagatsigit Thomas Kristensen nangippoq.
Inatsisartut Eqqissisimatitsinermut Avatangiisinullu ataatsimiititaliaanut suliassaq pissanganartoq aallartippoq tassa kommunit tigooqqaaviini atuinermit misilittakkat katersorneqarsimasut saqqummerneqarsissallugit. Innuttaasut, ingerlatsiviit suliffeqarfiillu tigooqqaavinnik atuinngippata taava kajumilersitsinissamut tunngasut qiviartariaqarpagut. Aammattaaq eqqakkanik passussinermi aningaasatigut avatangiisinullu sunniutigisinnaasat erseqqinnerusumik misississueqqissaarfigineqarnissaat ingerlanneqartariaqartoq Thomas Kristensen naggasiivoq.
Paasissutissat annertunerusut - Thomas Kristensen attavigineqarsinnaavoq, www.thok@gh.gl